Ol Gutpela Samting Jehova i Wokim i Givim Biknem Long Em
GOD JEHOVA i gat biknem moa yet na yumi man bilong graun i no inap piksaim long tingting dispela biknem bilong em. Ol samting em i bin wokim long graun na long skai i litimapim nem bilong em na yumi kirap nogut long ol dispela samting.—Song 19:1-4.
Jehova i bin wokim olgeta samting na em i King Bilong Heven na Graun, olsem na i stret yumi mas putim yau taim em i toktok. Tasol bai yumi kirap nogut moa sapos em i toktok wantaim yumi ol man nating bilong graun! Sapos em i toktok wantaim yu, ating long rot bilong wanpela ensel, bai yu putim gut yau long tok bilong em, a? Ating stretpela man Jop i bin putim gut yau taim God i toktok wantaim em inap 3,500 yia i go pinis. Ol tok God i givim long Jop long ol samting bilong graun na skai inap skulim yumi long wanem samting?
Husat i Wokim Graun, na Husat i Bosim Solwara?
God i stap insait long bikpela win na ren na i askim Jop long ol samting bilong graun na solwara. (Jop 38:1-11) No gat wanpela man bilong wokim plen bilong haus i bin tingim graun i mas bikpela inap long wanem mak na i helpim God long wokim, nogat. God i tok graun i olsem wanpela haus, na em i askim Jop: “Husat i bin putim bikpela ston bilong wokim graun antap long en?” I no gat wanpela man i bin mekim! Ol ensel bilong God i lukluk i stap na ol i amamas tru taim Jehova i wokim dispela graun.
Taim yumi skelim solwara na God, solwara i bin stap sotpela taim tasol, na long tok piksa God i bilasim em long ol gutpela klos. Solwara “i bin sut i kam ausait long bel bilong graun.” I olsem God i bin pasim ol dua long ol strongpela lok na solwara i stap insait long mak bilong en, na strong bilong mun na san i mekim na i gat taim bilong draiwara na taim bilong haiwara.
Buk The World Book Encyclopedia i tok: “Win i save kirapim si long solwara, em sampela i liklik na sampela i traipela si tru, i go antap inap 30 mita. . . . Taim win i dai, ol biksi i ron i go yet, na ol inap i go longwe tru long ples ol i bin kirap long en. . . . Bihain ol dispela si i bruk long nambis.” Solwara i save bihainim tok bilong God, olsem: “Biksi bilong yu i ken bruk i kam inap long dispela mak tasol. I tambu tru long kalapim dispela mak.”
Husat i Mekim na Tulait i Bruk?
Orait nau God i askim Jop long ol samting lait i save mekim na ol narapela samting tu. (Jop 38:12-18) I no gat wanpela man inap bosim taim bilong tudak na taim bilong tulait. Tulait i save kamap na i sut i go long olgeta hap na rausim tudak na ol man nogut i ranawe i go nabaut. Ol sinman i mekim pasin nogut taim “san i go daun.” (Jop 24:15, 16) Tasol taim tulait i bruk, ol man bilong mekim pasin nogut i save ranawe i go nabaut.
Long han bilong God, lait bilong moningtaim i olsem samting ol i bin katim mak long en na taim em i go nabaut, em i save putim naispela mak bilong en long graun. Lait bilong san i mekim na ol naispela kala i save kamap ples klia, na i olsem ol naispela klos i gat kala kala i bilasim graun. Jop i no bin mekim wanpela wok na ol dispela samting i kamap, na em i no bin wokabaut long solwara na raitim lista bilong ol gutpela gutpela samting i stap long en. Kirap long dispela taim na i kam inap nau, ol saveman i bin kisim liklik save tasol long ol samting i stap long solwara!
Ol Bakstua Bilong Ais na Ren Ais
I no gat wanpela man i bin bringim lait o tudak i go long haus bilong en o i bin go insait long ol bakstua bilong ais na ren ais em God i putim i stap bilong “kirapim pait long ol narapela lain.” (Jop 38:19-23) Taim Jehova i mekim ren ais i kam daun long ol birua bilong em long Gibeon, “namba bilong ol man i dai long dispela ren ais i winim namba bilong ol man ol Israel i kilim.” (Josua 10:11) Ating em bai yusim ol ren ais yumi no save long sais bilong en, bilong bagarapim ol man nogut em Gok—Satan—i bosim ol.—Esekiel 38:18, 22.
Long Julai 2002, ren ais i bikpela olsem kiau bilong kakaruk i pundaun na i bin kilim i dai 25 manmeri, na 200 i kisim bagarap long sentral Henan Provins, long Saina. Wanpela man bilong sapim piksa long ston samting, em Benvenuto Cellini bilong Itali, em i raitim stori bilong taim planti ren ais i bin pundaun long 1545, na em i tok: “I gat wanpela de moa na bai mipela i kamap long Lyons . . . na nau klaut i pairap strong tru. . . . Bihain long en bikpela pairap nogut tru i kamap long skai, na mi pret nogut tru, mi ting las de i kamap nau, olsem na mi stopim hos bilong mi inap liklik taim tasol taim ren ais i pundaun . . . Orait nau ren ais i bikpela tru olsem bikpela muli ol i wok long pundaun. . . . Bikpela win wantaim ren ais i stap longtaim liklik na bihain em i pinis. Mipela i soim narapela narapela long ol sua mipela i kisim long skin, tasol mipela i go inap wanpela mail moa na mipela i lukim bikpela bagarap tru i kamap em mi no inap stori gut long en. Olgeta lip bilong ol diwai i pundaun na ol han i bruk nabaut, ol bulmakau samting i dai pinis na i slip nabaut long graun, na planti man bilong lukautim bulmakau ol tu i dai pinis, na mipela i lukim planti bikpela ren ais i stap em man i no inap holim long tupela han.”—Autobiography (Book II, 50), Harvard Classics, Volium 31, pes 352-3.
Wanem samting bai kamap taim Jehova i opim dua bilong ol bakstua bilong ais na ren ais na kapsaitim i kam daun antap long ol birua bilong em? Ol i no inap abrusim bagarap taim em i yusim ais o ren ais bilong kamapim laik bilong em.
Husat i Bin Wokim Ren, Wara Bilong Nait, na Ais?
Orait nau Jehova i askim Jop long ren, wara bilong nait, na ais. (Jop 38:24-30) God em i Man Bilong Wokim ren, na ren i save helpim tu “ples drai i no gat man i stap long en.” I no gat wanpela man bilong graun i papa bilong ren na ais.
Nius Nature Bulletin i tok: “Wanpela bikpela samting tru [bilong ais] na i narapela kain tru i olsem: Taim wara i kamap ais em i save solap . . . Ais i save karamapim ol liklik raunwara long taim bilong kol na dispela i mekim na ol gras bilong wara na ol pis samting ol inap i stap laip insait long wara aninit long ais. Sapos . . . wara i wok long go liklik taim em i kamap ais, orait dispela ais bai i hevi tru, winim wara, na ais bai go daun olgeta insait long wara. Orait sampela ais moa bai kamap antap long wara na i go i go olsem, na bihain dispela raunwara bai kamap ais olgeta. . . . Long ol ples kol, ol wara, ol liklik na bikpela raunwara, na solwara tu, bai kamap ais olgeta na i stap olsem inap long olgeta taim.”
Yumi ken amamas tru long ol wara, raunwara, na solwara i no save kamap ais olgeta! Na yumi tenkyu tru long ren na wara bilong nait—em Jehova yet i bin wokim—i save givim nupela strong long ol gras na diwai samting.
Husat i Putim Ol Lo Bilong Ples Antap?
Orait nau God i askim Jop long ol samting bilong ples antap. (Jop 38:31-33) Wanpela lain sta ol i kolim Pleiades, i gat 7-pela bikpela sta na planti liklik sta em ol i stap longwe long san inap 380 lait yia. Ol man bilong graun i no inap “bungim wanpela lain sta na pasim ol i stap wantaim.” Na i no gat wanpela man inap “lusim rop i pasim wanpela lain sta” olsem lain sta ol i kolim Orion. Na ol man i no inap senisim “ol lo em ol sta bilong skai i save bihainim,” em ol lo i bosim olgeta samting bilong ples antap.
God i bin putim ol lo i stiaim wokabaut bilong ol sta samting, em ol i stiaim ol samting olsem ren na taim bilong san, na haiwara na draiwara, win, na olgeta samting i stap laip long dispela graun. Yumi ken tingim san. Buk The Encyclopedia Americana (bilong 1996), i tok: “San i save hatim graun na i givim lait long en, na i helpim ol gras na diwai samting long kru na kamap, na i pulim wara i stap long solwara na ol raunwara samting i go antap olsem smok, na em i gat wok long kamapim win na mekim planti bikpela wok moa i helpim ol samting long i stap laip long graun.” Na buk i tok moa: “Bilong save gut long bikpela strong tru i stap long lait bilong san, yumi ken tingim dispela: Olgeta pawa i stap long win na long ol raunwara na wara, na olgeta pawa i stap long ol samting olsem paiawut, kol, na wel, dispela pawa em i lait bilong san tasol, em [dispela graun] i bin bungim i stap na i stap longwe tru long san inap olsem 150 milion kilomita.”
Husat i Bin Givim Save Long Ol Klaut?
Jehova i tokim Jop long tingim ol klaut. (Jop 38:34-38) Ol man i no inap tokim wanpela klaut long kamap na kapsaitim wara bilong en i kam daun. Tasol Jehova i bin wokim rot bambai wara i ken kam daun olsem ren na i go antap gen, na dispela em i bikpela samting tru long yumi ol man.
Wanem dispela rot bilong wara i save kam daun olsem ren na i go antap gen? Wanpela buk i tok: “I gat 4-pela samting bilong en, olsem: Wara i stap long sampela hap, san i pulim i go antap olsem smok, ren i kam daun, na wara i ran i go. Wara i save stap insait long graun, solwara, ol raunwara, ol wara, na long ol maunten i gat ais. San i save pulim wara i go antap olsem smok, na em i kamap wara insait long ol klaut, na nau em i kam daun long graun olsem ren o ais, na bihain dispela wara i save ran i go long solwara o san i pulim i go antap gen. Klostu olgeta wara i stap long graun i bin bihainim dispela pasin inap long planti planti taim.”—Microsoft Encarta Reference Library 2005.
Ol klaut em ren i pulap long en ol i olsem ol traipela sospen wara bilong ples antap. Taim Jehova i kapsaitim sospen, traipela ren tru i save pundaun na das i save kamap olsem graun malumalum na i pas pas wantaim. God inap kamapim ren na pasim ren.—Jems 5:17, 18.
Long taim bilong ren, planti taim laitning i save kamap. Tasol ol man i no inap mekim laitning i kamapim laik bilong ol. Taim laitning i kamap, i olsem em i tokim God, “Mipela i stap!” Buk Compton’s Encyclopedia i tok: “Laitning i save senisim sampela samting bilong win. Taim laitning i sut i go long win, em i kamapim pawa i hat nogut tru na i bungim naitrojen na oksijen wantaim na em i kamap naitret na sampela samting moa. Ol dispela marasin i save pundaun long Graun wantaim ren. Long dispela pasin, laitning inap helpim wok bilong putim ol marasin long graun long olgeta taim na bai graun i gat gris na em inap kamapim ol diwai na plaua samting.” Tru, ol man i no gat bikpela save tumas long laitning, tasol God i save gut long en.
Ol Gutpela Wok Bilong God i Litimapim Nem Bilong Em
Tru tumas, ol gutpela samting bilong ples antap na graun i litimapim nem bilong Man Bilong Wokim olgeta samting. (KTH 4:11) Ating Jop i bin pilim tru ol tok Jehova i mekim long dispela graun na ol sta na planet samting long skai!
Yumi bin stori long ol gutpela samting God i bin wokim—God i bin askim Jop long ol dispela samting na stori long en tasol i gat sampela samting moa. Ol samting yumi bin toktok long en i kirapim yumi long tokaut olsem: “God i nambawan na i antap tru.”—Jop 36:26.
[Piksa Kredit Lain long pes 14]
Snowflake: snowcrystals.net
[Ol Piksa Kredit Lain long pes 15]
Pleiades: NASA, ESA and AURA/Caltech; fish: U.S. Fish & Wildlife Service, Washington, D.C./William W. Hartley