Lo Paslain Long Taim Bilong Krais

“Mi laikim tru lo bilong yu. Mi save tingting long en long san na long nait.”​—⁠SONG 119:⁠97.

KIRAP long taim Jop i liklik yet, ating em i save lukluk i go antap long ol sta na em i kirap nogut long ol dispela sta. Ating papamama i bin skulim em long nem bilong ol bikpela lain sta, na ol i skulim em long ol save ol i bin kisim long ol lo i save bosim wokabaut bilong ol lain sta long ples antap. Ol man bilong bipo ol i save skelim wokabaut bilong ol dispela traipela lain sta bilong makim ol taim bilong yia, olsem taim bilong kol na taim bilong san na taim bilong ren samting. Tasol maski Jop i wok long lukim lukim ol dispela lain sta, em i no save wanem strong i save bungim wanpela lain sta na pasim ol i stap wantaim. Olsem na em i no inap bekim tok taim God Jehova i askim em: “Ating yu save long ol lo em ol sta bilong skai i save bihainim, laka?” (Jop 38:​31-​33) Tru tumas, i gat ol lo i save bosim ol sta​—⁠ol dispela lo i save wok stret olgeta na i no popaia liklik, na ol saveman bilong saiens long nau, maski ol i gat bikpela save, ol i no save ol dispela lo i wok olsem wanem.

² Long olgeta hap bilong heven na graun, Jehova em i Nambawan Man bilong givim lo. Olgeta samting em i bin wokim, i gat lo i bosim ol. Pikinini bilong em, em “i bin wokim em paslain long olgeta narapela samting,” em i bihainim stret olgeta lo bilong Papa bilong em taim ol sta na graun samting i no bin kamap yet! (Kolosi 1:​15, NW) Ol ensel tu i gat lo bilong bosim ol. (Song 103:20) Na i gat lo i save bosim ol animal tu​—⁠ol i save bihainim lo em Man bilong wokim ol i bin putim long skin bilong ol.​—⁠Sindaun 30:​24-​28; Jeremaia 8:⁠7.

³ Na olsem wanem long yumi ol man? Tru, God i bin inapim yumi long kisim save, na bihainim pasin i stret, na tingim ol samting bilong spirit. Tasol bilong mekim stretpela wok long ol dispela samting, yumi mas i gat ol lo bilong God bilong soim rot long yumi. Tupela tumbuna bilong pastaim tru, em Adam na Iv, ol i gutpela olgeta, olsem na ol i mas i gat ol wan wan lo tasol bilong soim rot long ol. Sapos tupela i laikim tumas Papa bilong ol long heven, dispela samting yet inap kirapim tupela long bihainim tok bilong em na amamas long mekim olsem. Tasol tupela i sakim tok bilong em. (Stat 1:​26-​28; 2:​15-​17; 3:​6-​19) Dispela i mekim na ol pikinini bilong tupela i gat sin na ol i mas i gat planti lo moa bilong soim rot long ol. Orait, long pasin sori Jehova i givim dispela samting long ol. Em i givim sampela lo long Noa, na Noa i mas givim ol dispela lo long famili bilong em. (Stat 9:​1-7) Planti handet yia bihain, long rot bilong Moses, God i givim Lo long nupela lain bilong em, em lain Israel. Moses i bin raitim olgeta liklik liklik samting bilong dispela Lo. Em i namba wan taim Jehova i bin bosim wanpela lain olgeta long rot bilong lo bilong em. Sapos yumi skelim gut dispela Lo, dispela bai helpim yumi long save long bikpela wok em lo bilong God i mekim long i stap bilong ol Kristen long nau.

Lo Bilong Moses​—⁠Wok Bilong En

⁴ Aposel Pol, em man bilong stadi long Lo, em i askim olsem: “Bilong wanem lo i stap?” (Galesia 3:​19) Bilong bekim dispela askim, yumi mas tingim tok promis Jehova i bin mekim long pren bilong em Abraham, olsem wanpela Pikinini bai kamap insait long lain bilong Abraham na em bai i mekim gut tru long olgeta lain bilong graun. (Stat 22:​18, NW) Tasol i gat wanpela hevi i kamap, olsem: Lain tumbuna pikinini bilong Abraham, em lain Israel God i bin makim bilong em yet, i no olgeta i save laikim tru Jehova. Bihain klostu olgeta i bikhet long Jehova​—⁠sampela i no inap tru long bihainim wanpela lo! (Kisim Bek 32:9; Lo 9:⁠7) I no long laik bilong ol yet na ol i stap insait long lain bilong Jehova, nogat; mama i bin karim ol insait long dispela lain.

⁵ Orait, olsem wanem ol kain man olsem ol inap kamapim dispela Pikinini God i tok promis long salim i kam na ol inap kisim gutpela samting long em? Jehova i no laik bosim ol olsem yumi save mekim long wanpela masin robot, nogat. Jehova i skulim ol long rot bilong lo. (Song 119:​33-​35; Aisaia 48:17) Tok Hibru bilong dispela tok “lo,” em toh·rahʹ, na insait bilong en i olsem “skulim.” Dispela lo i skulim ol Israel long wanem samting? Em i skulim ol olsem ol i mas i gat Mesaia bilong kisim bek ol long dispela sin i stap long ol. (Galesia 3:24) Na Lo i skulim ol long pret long God na bihainim tok bilong em. Bilong mekim samting i stret wantaim tok promis God i bin givim long Abraham, ol Israel i mas i stap olsem witnes bilong Jehova long ol narapela lain. Olsem na Lo i mas skulim ol long bihainim ol lo i makim stretpela pasin ol i mas bihainim na em inap givim biknem long Jehova; ol dispela lo bai helpim lain Israel long i stap narapela kain long ol narapela lain i save bihainim ol pasin nogut.​—⁠Wok Pris 18:​24, 25; Aisaia 43:​10-​12.

⁶ Olsem na Lo Bilong Moses i gat planti planti lo i stap insait long en​—⁠winim 600.a Ol dispela lo Moses i bin raitim, ol i bosim ol samting bilong lotu, na gavman, na pasin ol i mas bihainim, na stretpela pasin bilong kot, na ol kaikai, na pasin bilong i stap klin long skin. Tasol olsem wanem? Ating Lo Bilong Moses em wanpela bikpela lista i kolim ol lo na i givim strongpela tok long ol Israel long ol samting ol i mas mekim na i no gat pasin sori liklik long en? Nogat tru! Sapos yumi skelim gut dispela Lo bai yumi pilim tru pasin bilong Jehova long laikim tumas ol man. Orait nau yumi ken skelim sampela bilong ol dispela lo.

Wanpela Lo i Kamapim Klia Pasin Marimari na Sori

⁷ Lo i tok ol Israel i mas mekim pasin marimari na sori, na ol i mas mekim moa yet long ol rabisman na ol manmeri i no gat helpim bilong ol. Na ol i mas lukautim ol meri em man bilong ol i dai pinis na ol pikinini i no gat papamama. (Kisim Bek 22:​22-​24) Ol i no ken mekim nogut long ol animal i save mekim wok bilong ol. Ol i mas tingim gut ol samting bilong narapela man. (Lo 24:10; 25:⁠4) Tru, Lo i tok ol i mas kilim i dai ol kilman, tasol sapos man i no bin tingting gut na em i popaia na kilim i dai wanpela man, i gat rot bilong mekim pasin marimari long em. (Namba 35:11) Na i gat sampela kain rong ol jas bilong Israel yet i ken tingim strafe bilong en​—⁠taim ol i laik makim strafe, ol i tingim dispela man i tanim bel o nogat.​—⁠Skelim wantaim Kisim Bek 22:7 na Wok Pris 6:​1-7.

⁸ Jehova i stap olsem piksa na i makim pasin ol jas i mas mekim​—⁠em i strong long bihainim Lo i kolim strafe bilong wanpela rong sapos em i mas mekim olsem, tasol taim em i gat rot, em i mekim pasin marimari tu. King Devit i bin mekim pasin pamuk na em i bin kilim i dai wanpela man, tasol Jehova i mekim pasin marimari long em. I no olsem Devit i no kisim strafe, nogat. Ol bikpela hevi tru i painim em long dispela rong em i bin mekim, na Jehova i no pasim ol dispela hevi. Tasol Jehova i tingim kontrak bilong Kingdom em i bin mekim, na em i tingim pasin bilong Devit, em i man bilong marimari, na tu, bel bilong em i bagarap tru long rong em i bin mekim na em i tanim bel. Olsem na Jehova i no kilim em i dai.​—⁠1 Samuel 24:​4-7; 2 Samuel 7:​16; Song 51:​1-4; Jems 2:​13.

⁹ Na tu, Lo Bilong Moses i tok ol i mas laikim tru ol narapela. Man! Wanem kantri long nau i gat lo olsem man i mas laikim tru ol narapela? I no gat wanpela, a? Lo Bilong Moses i tambuim pasin bilong kilim man i dai, tasol Lo i tok tu olsem: “Yu mas laikim tru ol wantok olsem yu laikim yu yet.” (Wok Pris 19:18) Lo i tambuim ol long mekim nogut long ol man bilong narapela lain ol i sindaun long graun bilong ol, tasol lo i tok moa olsem: “Yupela i mas laikim tru ol, olsem yupela i save laikim yupela yet. Yupela i bin i stap long Isip bipo, olsem na yupela i save long pasin bilong man i lusim as ples na i stap long narapela kantri.” (Wok Pris 19:34) Na Lo i tambuim pasin pamuk, tasol em i tok tu olsem man marit i mas mekim gut long meri bilong em na bai meri i amamas! (Lo 24:⁠5) Long Buk Lo long Baibel, ol tok Hibru i makim pasin bilong laikim tru ol narapela, ol i kamap olsem 20 taim samting. Jehova i tokim ol Israel long pasin bilong em long laikim tru ol​—⁠long bipo, na long dispela taim, na long bihain. (Lo 4:​37; 7:​12-​14) Nambawan bikpela lo long Lo Bilong Moses i olsem: “Yupela i mas laikim tumas God, Bikpela bilong yumi. Yupela i mas laikim em tru long bel bilong yupela na long tingting bilong yupela na long strong bilong yupela.” (Lo 6:⁠5) Jisas i tok, dispela lo na lo bilong laikim tru ol narapela man i as bilong olgeta tok bilong Lo. (Wok Pris 19:18; Matyu 22:​37-​40) Olsem na man bilong raitim Song em i tok: “Mi laikim tru lo bilong yu. Mi save tingting long en long san na long nait.”​—⁠Song 119:⁠97.

Ol i Mekim Wok Nogut Long Lo

¹⁰ Sori tru, klostu olgeta Israel i no tenkyu liklik long dispela Lo Bilong Moses! Ol i bikhet long lo, o ol i givim baksait long en, o ol i lusim tingting long en. Ol i kisim ol stingpela pasin lotu bilong ol narapela lain na ol i bagarapim klinpela lotu bilong ol. (2 King 17:​16, 17; Song 106:​13, 35-​38) Na long ol narapela rot tu ol i sakim Lo.

¹¹ Ol man i bagarapim tru dispela Lo, em ol man i tok ol i save skulim ol man long Lo na ol i wok long lukautim. Dispela samting i kamap bihain long taim bilong gutpela man Esra, em i bin i stap olsem 450 yia samting paslain long Krais na em i man bilong raitim raitim ol tok bilong Baibel. Esra i wok strong tru na bai ol pasin nogut bilong ol narapela lain i no ken kam insait long lain bilong em, na em i tok strong long ol i mas kaunim na skulim ol man long Lo. (Esra 7:​10; Nehemia 8:​5-8) Sampela tisa bilong Lo i bin tok ol i bihainim lek bilong Esra, na ol i kamapim wanpela lain em bihain ol man i kolim olsem “Bikpela Kaunsil.” Ol i bin kamapim sampela tok, na wanpela i olsem: “Sanapim wanpela banis bilong banisim Lo.” Ol dispela tisa i ting Lo i olsem wanpela gutpela gaden tru. Ol i no laik bai wanpela man i kalapim tambu na wokabaut insait long dispela gaden​—⁠olsem brukim ol dispela lo, olsem na ol i kamapim sampela lo moa, em “Lo Bilong Maus Tasol,” bilong pasim ol man na bai ol i no ken mekim wanpela samting i olsem ol i laik brukim Lo em Moses i bin raitim.

¹² Ating sampela bai tok, i stret ol hetman bilong lain Juda i gat dispela kain tingting. Bihain long taim bilong Esra, ol narapela kantri i bosim ol Juda​—⁠wanpela em kantri Grik. Bilong sakim tingting na tok na pasin bilong ol Grik, sampela lain hetman bilong lotu i kirap namel long ol Juda. (Lukim blok long pes 10.) Bihain sampela bilong ol dispela lain ol i kamap strong tru na ol i winim ol pris bilong lain Livai long skulim ol man long Lo. (Skelim wantaim Malakai 2:⁠7.) I kam inap long yia 200 B.C.E., lo bilong maus tasol em i wok long bosim tingting bilong ol Juda. Pastaim i tambu long raitim ol dispela lo, nogut ol man i ting ol dispela lo i bikpela tru olsem lo em Moses i bin raitim. Tasol isi isi ol i wok long putim tingting bilong ol man i go pas long tingting bilong God, olsem na bihain dispela “banis” i bagarapim dispela “gaden” yet, ol i tok em i gat wok long lukautim.

Bilip Bilong Ol Farisi

¹³ Tingting bilong ol rabai i olsem: Tora, o Lo Bilong Moses, em i stret olgeta, olsem na em inap bekim olgeta askim i save kamap. Tasol i no olsem ol i daun tru long dispela Lo, nogat. Dispela tok bilong ol rabai i givim rot long ol long mekim wok long sampela tingting bilong ol man, na bai i olsem Tok Bilong God i as bilong ol lo em ol i putim long olgeta liklik liklik samting​—⁠sampela em ol samting bilong ol man yet, na sampela i olsem samting nating tasol.

¹⁴ Planti taim ol hetman bilong lotu i kisim ol lo bilong Baibel bilong stiaim tingting bilong man na mekim i kamap olsem wanpela strongpela lo tru. Olsem: Lo Bilong Moses i kirapim ol Juda long i stap narapela kain long ol narapela lain, tasol ol rabai i tok, olgeta samting na olgeta man i no bilong lain Juda ol i samting nogut. Ol rabai i tok olsem ol Juda i no ken lusim bulmakau bilong ol long haus pasindia bilong wanpela man bilong ol narapela lain, long wanem, ol i “ting ol man bilong ol narapela lain i save mekim pasin sem wantaim ol animal.” Na i tambu long wanpela meri Juda i helpim meri bilong ol narapela lain taim em i laik karim pikinini, long wanem, sapos meri Juda hia i mekim olsem, em bai “helpim meri long kamapim wanpela pikinini bilong lotuim god giaman.” I gat as na ol rabai i tingting nogut long ol haus spot bilong lain Grik, olsem na ol i tambuim olgeta kain eksasais i olsem spot. Ol samting i bin kamap long lain Juda i kamapim klia olsem ol dispela lo i no bin helpim ol Juda long abrusim ol bilip bilong ol narapela lain. Bihain ol Farisi yet i kirap na skulim ol man long bilip bilong ol Grik olsem ol man i gat tewel!​—⁠Esekiel 18:⁠4.

¹⁵ Na ol Farisi i paulim tru ol lo bilong mekim man i kamap klin. Sampela i bin tok, ol Farisi bai mekim san tu i kamap klin sapos ol i gat rot long mekim! Lo bilong ol Farisi i tok, sapos man i laik go long toilet na em i no go hariap, dispela bai mekim em i doti! Na pasin bilong wasim han em i kamap wanpela bikpela pasin bilong lotu i gat kain kain samting ol i mas mekim, na i gat ol lo bilong en olsem ol i mas wasim wanem han pastaim, na ol i mas wasim olsem wanem. Na ol Farisi i ting ol meri i doti tru. Ol i tingim wanpela lo bilong Baibel i tok man i “no ken aigris na pilai wantaim” wanpela meri bilong lain famili bilong em (em wanpela lo i tambuim man long mekim pasin sem long wanblut), olsem na ol dispela rabai i putim lo olsem man i no ken wokabaut bihain long meri bilong em; na man i no ken toktok wantaim meri bilong em long ples maket.​—⁠Wok Pris 18:⁠6.

¹⁶ Na dispela lo bilong maus tasol em i paulim tru lo bilong Sabat. Dispela lo God i givim long ol Israel i no gat planti tok long en; em i olsem: Yu no ken mekim wanpela wok long namba seven de bilong wik. (Kisim Bek 20:​8-​11) Tasol dispela lo bilong maus tasol em i kolim olsem 39 narapela narapela kain wok i tambu long mekim, olsem pasim o lusim wanpela buk long rop, o wokim tupela samap, o raitim tupela leta Hibru, na ol narapela samting. Na ol i putim planti planti lo long ol dispela wan wan kain wok i tambu long mekim. Wanem kain buk long rop i tambu na wanem kain i orait? Dispela lo bilong maus tasol i kolim ol lo bilong dispela samting. Na ol i tok, wok bilong oraitim sik bilong man em i tambu. Olsem: Long de Sabat i tambu long stretim wanpela bun i bruk. Na sapos wanpela tit i pen, man i ken putim viniga long kaikai bilong mekim kaikai i swit, tasol em i no ken pulim viniga i go long tit, nogut viniga i oraitim dispela tit i pen!

¹⁷ Em nau, ol dispela planti handet lo ol man yet i wokim, ol i karamapim lo bilong Sabat, na planti Juda i no inap pilim moa ol samting bilong spirit i as bilong dispela lo. Taim Krais Jisas, em Man bilong “bosim de Sabat,” em i wokim ol gutpela gutpela mirakel long de Sabat, ol saveman bilong lo na ol Farisi i no pilim liklik. Ol i tingim wanpela samting tasol​—⁠em i givim baksait long ol lo bilong ol.​—⁠Matyu 12:​8, 10-​14.

Pasin Kranki Bilong Ol Farisi i Mas Skulim Yumi

¹⁸ Orait yumi ken tok, ol dispela lo na tok bilong ol man em ol i bin skruim long Lo Bilong Moses, ol i pas strong tru long en olsem ol gam bilong solwara i save pas strong long as bilong sip. Papa bilong sip i save wok strong tru long rausim ol dispela gam, long wanem, hevi bilong ol i mekim na sip i no inap ran strong; na tu, ol dispela gam i save bagarapim pen ol i bin penim sip long en bambai ros i no ken holim. Na i olsem tu long ol dispela lo bilong maus tasol, na tok bilong ol tumbuna​—⁠ol i pas strong long Lo na nau Lo i kamap olsem wanpela hevipela samting i no wok gut, na ol man inap mekim nabaut long en na i go bagarap, olsem ros i save bagarapim samting. Tasol ol rabai i no wok long rausim ol dispela lo em ol man i bin skruim long Lo, nogat. Ol i wok long skruim sampela lo moa long en. Taim Mesaia i kam bilong inapim Lo, dispela “sip” i gat planti “gam” moa yet i pas long en na hevi bilong ol i mekim na “sip” i hatwok tru long ran​—⁠em i laik go daun insait long solwara! (Skelim wantaim Sindaun 16:25.) Ol dispela hetman bilong lotu i no lukautim kontrak bilong Lo​—⁠ol i bagarapim. Tasol olsem wanem na dispela “banis” bilong ol, olsem ol dispela planti planti lo, i pundaun long mekim wok bilong en?

¹⁹ Ol hetman bilong lotu Juda i no bin kisim save olsem: Bel bilong man yet i mas kirapim em long sakim ol pasin nogut skin i laik mekim, na ol dispela planti planti lo ol man yet i kamapim na ol i raitim long buk, dispela i no inap mekim olsem. (Jeremaia 4:​14) Bilong winim pait bilong daunim pasin nogut, man i mas laikim tru Jehova, na laikim tru ol stretpela lo bilong em. Taim man i mekim olsem, orait dispela i save kirapim em long nolaik tru long ol samting Jehova i nolaik tru long en. (Song 97:10; 119:104) Ol man i save laikim tru Jehova olsem, ol i stap gut long bihainim ol lo bilong em namel long ol man bilong dispela graun i save mekim ol pasin nogut. Ol hetman bilong lotu Juda ol i gat gutpela wok tru bilong skulim ol man bambai ol i ken kirapim ol long laikim tru Jehova na ol lo bilong em. Orait, olsem wanem na ol i pundaun long mekim dispela wok? Ating as bilong en, em ol i no bilip. (Matyu 23:23) Sapos ol i bin bilip olsem spirit bilong Jehova i gat bikpela strong na i save wok insait long bel bilong ol man i stap gut long God, bai ol i save, i no gat wok long ol i mas bosim strong olgeta samting long i stap bilong ol man. (Aisaia 59:1; Esekiel 34:⁠4) Ol i no bilip, olsem na ol i no helpim ol man long kisim bilip; ol i putim planti lo long ol manmeri, em lo bilong ol man yet, na i olsem wanpela hevipela samting ol man i hatwok tru long karim.​—⁠Matyu 15:​3, 9; 23:⁠4.

²⁰ Ol dispela hetman bilong lotu Juda i no kirapim ol man long laikim tru Jehova. Ol tok ol i kisim long ol tumbuna i kamapim wanpela lotu i strong tumas long mekim ol samting long skin tasol, olsem ol i bihainim ol lo na bai ol i kamap olsem stretpela man long ai bilong ol man​—⁠em dispela pasin i save kamapim pasin giaman, olsem man bilong tupela maus. (Matyu 23:​25-​28) Ol lo bilong ol i mekim na i gat planti as moa yet long ol i ken skelim pasin bilong ol man. Olsem na ol dispela Farisi​—⁠em ol man i gat pasin antap na ol i strong long ol man i mas bihainim lo bilong ol​—⁠ol i ting i stret ol i skelim pasin bilong Krais Jisas yet. Ol i lusim tingting long wok tru bilong Lo na ol i sakim dispela Mesaia tru. Olsem na em i tokim lain Juda olsem: “Harim. Nau ples bilong yupela bai i bagarap na i stap nating.”​—⁠Matyu 23:38; Galesia 3:​23, 24.

²¹ Orait, dispela i skulim yumi long wanem samting? Em i skulim yumi olsem: Pasin bilong tingting strong long bihainim ol lo na tok bilong ol man yet, dispela i no save helpim man long lotuim Jehova long pasin i stret! Tasol olsem wanem? Ating i no stret long ol man i lotuim Jehova long nau ol i gat sampela lo ol i mas bihainim sapos Baibel i no tokaut klia long ol dispela lo? Nogat, i no olsem. Bilong kisim gut bekim bilong dispela askim, long stori i kamap bihain long dispela yumi ken toktok long olsem wanem Krais Jisas i bin kamapim wanpela nupela lo em i senis bilong Lo Bilong Moses na i winim dispela Lo.

[Futnot]

Yu Inap Stori Long Dispela?

◻ Olsem wanem lo bilong God i bosim olgeta samting em i bin wokim?

◻ Wanem bikpela wok bilong Lo Bilong Moses?

◻ Olsem wanem yumi save, Lo Bilong Moses i tok long man i mas mekim pasin marimari na pasin sori?

◻ Bilong wanem ol hetman bilong lotu Juda i skruim planti planti lo i go long Lo Bilong Moses? Wanem samting i kamap long dispela?

[Askim Bilong Stadi]

 1. Wanem samting i save bosim wokabaut bilong ol sta?

 2. Olsem wanem yumi ken tok, i gat lo i bosim olgeta samting God i bin wokim?

 3. (a) Bilong wanem ol man i mas i gat ol lo? (b) Jehova i bin bosim lain Israel long wanem rot?

 4. Olsem wanem na ol tumbuna pikinini bilong Abraham em God i bin makim bilong em yet ol bai i hatwok long kamapim dispela Pikinini God i tok promis long en?

 5. (a) Long rot bilong Lo Bilong Moses, Jehova i skulim ol Israel long wanem samting? (b) Lo i bilong mekim wanem long pasin bilong ol man i bihainim dispela Lo?

 6. (a) I gat olsem hamas lo i stap long Lo Bilong Moses? Bilong wanem yumi no ken ting em planti lo tumas? (Lukim ol tok long sta daunbilo.) (b) Sapos yumi skelim gut Lo Bilong Moses, bai yumi pilim tru wanem samting?

7, 8. (a) Lo i tok wanem long ol Israel i mas mekim pasin marimari na pasin sori? (b) Taim Devit i mekim rong, olsem wanem Jehova i strong long bihainim Lo, tasol em i mekim pasin marimari tu long Devit?

 9. Lo Bilong Moses i tok wanem long pasin bilong laikim tru ol narapela?

10. Klostu olgeta Juda i mekim wanem long Lo Bilong Moses?

11, 12. (a) Olsem wanem sampela lain hetman bilong lotu i mekim nogut long Lo bihain long taim bilong Esra? (Lukim blok.) (b) Bilong wanem ol rabai bilong bipo i ting ol i mas “sanapim wanpela banis bilong banisim Lo”?

13. Ol hetman bilong lotu Juda i gat wanem tingting na i olsem i gat as na ol i ken wokim planti lo?

14. (a) Wanpela lo bilong Baibel bilong stiaim ol Israel long i stap narapela kain long ol narapela lain, ol hetman bilong lotu Juda i mekim wanem long dispela lo na i kamap olsem narapela kain tru long lo bilong Baibel? (b) Wanem samting i kamapim klia olsem ol dispela lo bilong ol rabai i no bin lukautim ol Juda na bai ol i no ken kisim tingting bilong ol haiden?

15. Olsem wanem ol hetman bilong lotu Juda i paulim lo bilong kamap klin long skin na lo i tambuim ol man long mekim pasin sem long wanblut?

16, 17. Ol i skruim wanem ol lo long dispela lo bilong Sabat? Wanem samting i kamap long dispela?

18. Taim ol i skruim ol lo na tok bilong ol man yet i go long Lo Bilong Moses, dispela i mekim wanem? Kolim wanpela tok piksa bilong dispela samting.

19. (a) Bilong wanem dispela “banis bilong banisim Lo” i pundaun long mekim wok bilong en? (b) Wanem samting i kamapim klia olsem ol hetman bilong lotu Juda i no bilip tru?

20, 21. (a) Pasin bilong tingting strong long bihainim ol lo na tok bilong ol man yet, dispela i mekim wanem long lotu Juda? (b) Ol samting i bin painim lotu Juda, dispela inap skulim yumi long wanem samting?

[Blok long pes 10]

Ol Hetman Bilong Lotu Juda

Ol Saveman Bilong Lo: Ol i ting ol i bin kisim wok bilong Esra na ol i man bilong kamapim insait bilong Lo. Wanpela buk (A History of the Jews) i tok, “i no olgeta saveman bilong Lo i gat stretpela tingting na pasin tru, na taim ol i laik kamapim insait bilong ol tok bilong lo, planti taim dispela i mekim na ol i kamapim ol lo i no gat as bilong en na ol tambu i olsem longlong tru. Ol pasin bilong ol tumbuna i strongim ol dispela tambu, na i no longtaim na ol dispela tambu i kamap olsem hatpela bos tru i daunim ol man.

Ol Hasidim: Insait bilong dispela nem i olsem “ol man holi” o “ol santuman.” Namba wan taim ol man i bin toktok long dispela lain, em long yia 200 B.C.E. samting. Ol i gat bikpela strong long wok politik, na ol i strong long sambai long Lo na bai em i ken i stap klin olgeta na tingting bilong ol Grik i no ken bagarapim. Ol Hasidim i bruk long 3-pela lain, olsem: ol Farisi, ol Sadyusi, ol Esin.

Ol Farisi: Sampela saveman i ting, insait bilong dispela nem i olsem “Ol Man i Stap Narapela Kain.” Ol Farisi i strong tumas long i stap narapela kain long ol man bilong ol narapela lain, tasol ol i ting olsem lain bilong ol i narapela kain na i winim tru ol manmeri nating bilong lain Juda, em ol i no gat save long insait bilong lo ol i kolim lo bilong maus tasol. Wanpela man bilong raitim stori bilong ol samting i bin kamap bipo, em i tok long ol Farisi olsem: “Dispela lain i mekim pasin long ol man olsem ol i pikinini tasol, na ol i kolim olgeta liklik liklik samting bilong ol bilaspasin bilong lotu ol i mas bihainim, na putim olsem lo bilong ol man i mas bihainim.” Na narapela saveman i tok: “Ol Farisi i kamapim planti lo bilong olgeta samting, olsem na ol liklik samting tasol ol i mekim i kamap olsem bikpela samting tru, na ol bikpela samting ol i mekim i kamap olsem ol liklik samting tasol (Mt 23:23).”

Ol Sadyusi: Em wanpela lain ol i pas wantaim ol bikman na lain pris. Ol Sadyusi i no orait liklik long ol saveman bilong lo na ol Farisi, na ol i tok, lo bilong maus tasol i no gat strong olsem Lo ol i bin raitim. Tasol ol i lus long dispela tok pait​—⁠dispela i kamap ples klia long wanpela tok bilong Misna yet, em i tok: ‘Sapos man i no bihainim tok bilong ol saveman bilong lo, dispela i gat bikpela rong long en, winim rong bilong man i no bihainim Lo [ol i bin raitim].’ Talmut i gat planti tok bilong dispela lo bilong maus tasol, na em i tok: “Tok bilong ol saveman bilong lo i . . . gutpela moa, winim tok bilong Tora.”

Ol Esin: Em wanpela lain i save strong long daunim ol laik bilong skin, na ol i no save sindaun wantaim ol narapela lain​—⁠ol i save stap narapela. Wanpela buk (The Interpreter’s Dictionary of the Bible) i tok, ol i winim ol Farisi long ting ol i antap tru, na ‘sampela taim ol i winim ol Farisi yet long bihainim pasin bilong ol Farisi.’

[Piksa long pes 8]

Ating papamama bilong Jop i bin skulim em long ol lo i bosim wokabaut bilong ol lain sta