Sapta 14
Husat i Bilong i Go Long Heven, na Bilong Wanem Ol i Go?
1. Planti man i ting husat ol i bilong i go long heven na bilong wanem ol i go?
PLANTI man i ting olgeta gutpela man i save go long heven. Tasol sapos yumi askim ol, bilong wanem ol i go long heven, ating bai ol i tok: ‘Ol i go bilong i stap wantaim God,’ o ‘Em i olsem pe bilong ol gutpela man.’ Orait, Baibel i tok wanem long dispela samting?
2, 3. (a) Olsem wanem yumi inap save, sampela man bai ol i go long heven? (b) I gat wanem askim yumi mas save long bekim bilong en?
2 Baibel i tok klia, taim Jisas i kirap bek long matmat em i go long heven. Na Baibel i tok, sampela man moa bai ol i go long heven. Paslain liklik long taim Jisas i dai, em i tokim ol gutpela aposel bilong em: “Long haus bilong Papa bilong mi i gat planti rum. Sapos i no olsem, orait bipo mi inap tokim yupela. Mi go bilong redim ples bilong yupela. Na sapos mi go redim ples bilong yupela, bai mi kam bek na mi kisim yupela i go i stap wantaim mi. Olsem na ples mi stap long en, bai yupela tu i stap long en wantaim mi.”—Jon 14:1-3.
3 Tok bilong Jisas i klia tumas, em i tokim ol aposel ol bai go long heven na stap wantaim em. Na aposel Pol i tokim ol Kristen bilong pastaim: “Yumi stap manmeri bilong heven. Na yumi wetim Bikpela Jisas Krais i lusim heven na i kam daun, na i kisim bek yumi.” (Filipai 3:20, 21; Rom 6:5; 2 Korin 5:1, 2) Planti manmeri ol i tingim ol kain tok promis olsem na ol i gat bikpela tingting long i go i stap long heven. Tasol olsem wanem? Bai olgeta gutpela man i go long heven?
YU TING OLGETA GUTPELA MAN I GO LONG HEVEN?
4, 5. Olsem wanem yumi save, Devit na Jop i no go long heven?
4 Jisas i kirap bek long matmat na bihain liklik aposel Pita i tokim bikpela lain Juda: “Tumbuna bilong yumi, Devit. . . . i dai pinis, na ol i planim em. Na matmat bilong em i stap namel long yumi inap long nau. Devit i no go long heven.” (Aposel 2:29, 34) Olsem na yumi save, gutpela man Devit i no go long heven. Orait, olsem wanem long stretpela man Jop?
5 Jop i karim bikpela pen na hevi na em i beten long God, olsem: “Plis, haitim mi long [matmat] inap long taim kros bilong yu i pinis; na yu ken makim wanpela taim na bai yu tingim mi!” Jop i save, taim em i dai bai em i slip tasol long matmat. Em i save em i no ken i go long heven. Tasol em i wetim wanpela gutpela samting i kamap, olsem em i tok: “Man i dai pinis em inap kisim bek laip? Olgeta de bilong wok kalabus bilong mi [long matmat] bai mi wet, inap long taim dispela hevi bilong mi i pinis. Bai yu singaut na mi bai harim.”—Jop 14:13-15, NW.
6, 7. (a) Ol man i dai paslain long taim Krais i dai, olsem wanem yumi save i no gat wanpela i go long heven? (b) Olgeta manmeri i dai paslain long taim Krais i dai na ol i bin i stap gut long God, wanem samting bai painim ol?
6 Jon, em i man bilong baptaisim Jisas, em tu i gutpela man. Tasol Jisas i tok: “Man i liklik long kingdom bilong heven, em i winim Jon.” (Matyu 11:11) Jisas i tok olsem, long wanem Jon Bilong Baptais i no ken i go long heven. Taim Jisas i stap long graun, em 4,000 yia samting bihain long taim Adam tupela Iv i bikhet, Jisas i tok: “I no gat narapela man i bin go long heven. Pikinini Bilong Man em wanpela tasol i bin lusim heven na i kam daun.”—Jon 8:13.
7 Olsem na kirap long taim God i wokim namba wan man na meri na i kam inap long taim bilong Jisas, i no gat wanpela man i bin i go long heven. Em, Jisas yet i tok olsem. Devit na Jop na Jon Bilong Baptais bai ol i kirap bek na i stap laip gen long dispela graun. Olgeta gutpela man na meri ol i dai paslain long taim Jisas i dai, ol i save bai ol i kisim laip gen long graun. Ol i no gat tingting long i go long heven. Bai ol i kirap bek na i stap long graun aninit long kingdom bilong God.—Sam 72:7, 8; Aposel 17:31.
BILONG WANEM SAMPELA GUTPELA MAN I GO LONG HEVEN?
8. Em bikpela samting yumi mas save long bekim bilong wanem ol askim? Bilong wanem em i bikpela samting?
8 Bilong wanem Jisas i go long heven? Em i gat wanem wok na em i go? Em bikpela samting yumi mas save long en, long wanem ol man i go long heven ol bai wok wantaim Jisas. Long dispela as tasol na ol i go long heven.
9, 10. Danyel i tok wanem na yumi save, sampela moa bai ol i stap king long gavman bilong God?
9 Yumi lain pinis olsem Jisas bai stap king long gavman bilong God long heven na bosim gutpela ples paradais long nupela graun. Paslain tru long taim Jisas i kam daun long graun, profet Danyel i tok “pikinini bilong man” bai kisim “wok king.” Dispela “Pikinini Bilong Man” em Krais Jisas. (Mak 14:41, 62) Na Danyel i tok moa olsem: “Wok king bilong em i bilong i stap inap long taim bihain bihain, em i no ken pinis. Na kingdom bilong em i no ken bagarap.”—Danyel 7:13, 14, NW.
10 Tasol bikpela samting yumi mas tingim long tok profet bilong Danyel em olsem: I gat sampela man moa bai ol i mekim wok king wantaim dispela “pikinini bilong man.” Danyel i tok: “Na dispela kingdom na wok king . . . ol i givim long ol manmeri bilong Nambawan Bikpela Man. Kingdom bilong ol em bilong i stap inap long taim bihain bihain.” (Danyel 7:27, NW) Yumi lukim dispela tok “ol manmeri” na “kingdom bilong ol” na yumi save, sampela moa bai wok king wantaim Krais long gavman bilong God.
11. I gat wanem samting na yumi save ol Kristen bilong pastaim bai ol i stap king wantaim Krais?
11 Long apinun, paslain long taim Jisas i dai, Jisas i tokim 11-pela gutpela aposel ol bai stap king wantaim em long kingdom bilong God. Em i tok: “Taim ol samting i kamap bilong traim mi, yupela i bin i stap wantaim mi, na yupela i no lusim mi. Na Papa bilong mi em i givim kingdom long mi, olsem tasol mi givim kingdom long yupela.” (Luk 22:28, 29) Bihain, aposel Pol na Timoti ol i insait long dispela tok promis bilong kingdom. Olsem na Pol i tokim Timoti: “Sapos yumi stap strong long karim olgeta hevi, orait bai yumi stap king tu wantaim em.” (2 Timoti 2:12) Na aposel Jon tu i stori long ol manmeri ol bai “i stap king” wantaim Krais Jisas na bosim graun.—Revelesen 5:9, 10; 20:6.
12. Baibel i tok wanem long ‘pikinini’ bilong Ebraham na yumi save, i gat sampela moa ol bai wok king wantaim Krais?
12 Olsem na ol manmeri bilong i go long heven, ol i go bilong mekim wok king wantaim Krais. Krais em i nambawan ‘pikinini’ bilong tok promis bilong kingdom. Tasol God i makim sampela manmeri moa bilong wok wantaim em long dispela kingdom. Ol tu i kamap ‘pikinini’ bilong kisim ol samting God i tok promis long en. Baibel i tok: “Sapos yupela i stap man bilong Krais, orait yupela i stap pikinini bilong Ebraham tu. Yupela i man bilong kisim ol dispela samting bipo God i [tok promis long en] long Ebraham.”—Galesia 3:16, 29; Jems 2:5.
HAMAS OL I GO LONG HEVEN?
13. (a) Bilong wanem ol bebi i no ken i go long heven? (b) Dispela lain ol bai kisim Kingdom, Jisas i tok ol i liklik lain o bikpela lain?
13 Ol gutpela disaipel bilong Krais ol i bin winim ol traim na hevi na sanap strong, ol tasol inap i go long heven. Olsem na God i no ken kisim ol bebi na liklik pikinini i go long heven. Nogat. (Matyu 16:24) Tasol ol bebi na liklik pikinini i dai pinis ol inap kirap bek na bai ol i stap laip gen long graun. (Jon 5:28, 29) Olsem na ol manmeri ol bai kisim laip oltaim long graun aninit long Kingdom ol i bikpela lain, tasol dispela lain bilong i go long heven ol i liklik lain tasol. Jisas i tokim ol disaipel: “Yupela liklik lain sipsip, yupela i no ken pret. Papa bilong yupela em i pasim tok pinis long givim kingdom long yupela.”—Luk 12:32.
14. Dispela “liklik lain” ol i bilong i go long heven, ol inap hamas?
14 I gat hamas manmeri olgeta long dispela liklik lain bilong Kingdom? Ating ol aposel na ol disaipel bilong Jisas tasol, a? Nogat. I gat sampela moa. Long Revelesen 14:1, 3 aposel Jon i tok: “Mi lukim Pikinini Sipsip [Krais Jisas] i sanap long maunten Saion [bilong heven], na 144,000 manmeri ol i sanap wantaim em. . . . Dispela 144,000 manmeri God i bin baim bek [o kisim] ol namel long olgeta man bilong graun.” Em nau, Jon i lukim 144,000 manmeri tasol ol i stap wantaim Jisas long heven. (Hibru 12:22) Olsem na i no olgeta gutpela manmeri i go long heven. Baibel i tok, i gat 144,000 tasol God bai kisim ol i go long heven bilong mekim wok king wantaim Krais, em ol i bin winim ol traim na hevi na sanap strong.
BILONG WANEM GOD I KISIM OL LONG GRAUN?
15. Bilong wanem God i makim sampela manmeri bilong graun long i stap king long Kingdom?
15 Tasol bilong wanem God i kisim sampela manmeri bilong graun long mekim wok king? Bilong wanem em i no makim sampela ensel? Long wanem long dispela graun yet wanpela bikpela tok i bin kamap olsem: I stret Jehova i bosim ol man o nogat? Na long dispela graun yet Seten i traim ol manmeri, ol bai i stap gut long God o nogat. Na long dispela graun yet Jisas i stap gut long God inap long taim em i dai. Na em i givim laip bilong em bilong baim bek ol manmeri bilong graun. Olsem na Jehova i stretim rot bilong kisim wanpela “liklik lain” bilong graun yet long wok wantaim Pikinini bilong em long kingdom bilong heven. Ol dispela manmeri ol i stap gut long God na ol i kamapim ples klia tok giaman Seten i sutim long God. Olsem na i stret Jehova i kisim ol dispela manmeri bilong graun bilong litimapim nem bilong em.—Efesas 1:9-12.
16. Ol dispela king bilong Kingdom ol i manmeri bilong graun, na bilong wanem yumi ken amamas long dispela samting?
16 Sapos ol kain manmeri olsem i stap king bilong yumi, em gutpela samting tru, long wanem ol i bin i stap gut long God maski ol man i kilim sampela i dai tu. (Revelesen 12:10, 11; 20:4) Ol kain traim olsem i no bin painim ol ensel. Na ol hevi i save painim ol manmeri bilong graun em i no bin painim ol ensel. Olsem na ol ensel i no inap pilim tru hevi bilong yumi ol pekatoman bilong graun. Tasol dispela 144,000 ol inap pilim tru, long wanem ol yet i bin karim wankain hevi. Na sampela i hatwok long lusim pasin nogut bipo ol i mekim, olsem na ol i save, yumi tu yumi gat hatwok. (1 Korin 6:9-11) Orait, taim ol i bosim yumi ol manmeri i stap long graun, bai ol i mekim gutpela pasin sori long yumi.—Hibru 2:17, 18.
KONGRIGESEN BILONG GOD
17. Dispela tok “sios” o ‘kongrigesen’ i makim wanem samting?
17 Baibel i tok, Krais em i het bilong kongrigesen bilong God, na dispela lain ol i mas aninit long em. (Efesas 5:23, 24) Dispela tok “sios” o ‘kongrigesen bilong God’ i makim wanpela lain Kristen. (1 Korin 15:9) Long nau, ol Kristen yumi save bung wantaim ol em tu yumi save kolim olsem kongrigesen. Olsem tasol Baibel i kolim ol Kristen bilong Leodisia olsem “sios [ o kongrigesen] long Leodisia.” Na long pas Pol i raitim long Failimon, Pol i tok long “sios [o kongrigesen] i save bung long haus bilong [Failimon].”—Kolosi 4:16; Failimon 2.
18. (a) Husat ol i insait long dispela ‘kongrigesen bilong God i gat laip’? (b) Baibel i kolim wanem ol narapela nem long dispela lain o kongrigesen?
18 Tasol taim Baibel i tok long “sios [o kongrigesen] bilong God i gat laip,” Baibel i no tok long olgeta Kristen; em i tok long sampela Kristen tasol ol i wanpela lain stret bilong Krais. (1 Timoti 3:15) Na Baibel i kolim dispela lain o kongrigesen olsem “ol namba wan pikinini bilong God. God i raitim pinis nem bilong ol, . . . long heven.” (Hibru 12:23) Dispela “sios” o ‘kongrigesen bilong God’ em olgeta Kristen ol i bilong kisim laip long heven. Inap 144,000 manmeri tasol i insait long dispela lain. Long nau i gat wan wan tasol i stap yet long graun. Ol narapela Kristen ol i gat tingting long i stap oltaim long graun, ol i laik bai ‘kongrigesen bilong God i gat laip’ i ken soim rot long ol bilong lotuim God. Baibel i kolim dispela kongrigesen o lain 144,000 olsem “meri bilong Pikinini Sipsip,” na “bodi bilong Krais,” na “haus holi bilong God,” na “Isrel tru bilong God,” na “nupela Jerusalem.”—Revelesen 21:9; Efesas 4:12; 1 Korin 3:17; Galesia 6:16; Revelesen 21:2.
NUPELA SAMTING LONG LAIK BILONG GOD
19. God i putim wanem nupela samting bilong kamapim namba wan laik bilong em long graun?
19 Taim Adam i bikhet, God Jehova i no senisim laik bilong em long dispela graun na long ol manmeri bilong graun. Sapos God i bin senisim laik bilong em, i olsem em i no inap kamapim tru namba wan laik bilong em. Dispela laik bilong em i olsem: Em i laik bai olgeta hap bilong graun i kamap olsem gutpela ples paradais na ol manmeri i ken i stap gutpela tru na i stap amamas. Dispela laik bilong God i stap yet. I gat wanpela nupela samting tasol long laik bilong God, olsem: Em i laik putim wanpela nupela gavman bilong kamapim laik bilong em. Yumi save pinis, Pikinini bilong em, Krais Jisas, em i nambawan bikpela king long dispela gavman, na God bai kisim 144,000 manmeri long graun bilong wok king wantaim Krais.—Revelesen 7:4.
20. (a) Husat ol i olsem “nupela skai”? Husat ol i olsem “nupela graun”? (b) Olsem wanem sapos yu laik insait long dispela lain ol i olsem “nupela graun”?
20 Ol dispela king long heven ol bai stap olsem “nupela skai” bilong bosim “nupela graun.” Olsem na i mas i gat sampela manmeri i stap long graun bambai ol dispela king i ken bosim ol. Ol dispela manmeri i olsem “nupela graun.” (2 Pita 3:13; Revelesen 21:1-4) Jop na Devit na Jon Bilong Baptais wantaim olgeta manmeri ol i stap paslain long taim Krais i kam daun long graun na ol i bin i stap gut long God, bai ol i insait long dispela lain ol i olsem “nupela graun.” Tasol i gat planti manmeri moa ol tu bai insait long dispela lain, olsem ol manmeri ol bai winim taim bilong pinis bilong dispela pasin nogut bilong nau. Olsem wanem long yu? Bai yu winim dispela taim? Yu laik i stap aninit long gavman bilong God? Sapos olsem, orait i gat sampela samting yu mas mekim.
[Ol Piksa long pes 121]
Olsem wanem? Ol dispela gutpela man i go long heven?
King Devit
Jop
Jon Bilong Baptais
[Piksa long pes 122]
Long apinun, paslain long taim Jisas i dai, Jisas i tokim ol aposel ol bai stap king wantaim em long kingdom bilong God