‘I No Gat Wanpela Man i Olsem Jehova, God Bilong Yumi’
“I no gat wanpela man i olsem God [Jehova], Bikpela bilong yumi. Em i stap antap tru.”—SONG 113:5.
1, 2. (a) Ol Witnes Bilong Jehova i ting olsem wanem long God na long Baibel? (b) Wanem sampela askim yumi laik save long en?
JEHOVA i mekim gut long lain bilong em ol i litimapim nem bilong em. Yumi amamas tru long i stap insait long dispela lain! Yumi Witnes bilong em i laik bihainim ol lo na tok bilong em long Baibel, na yumi bilip long ol tok promis na tok profet bilong em. Yumi amamas long lainim tok bilong Baibel na “harim tok bilong Papa na kisim save long em.”—Jon 6:45.
2 Ol Witnes Bilong Jehova i save daun long God bilong ol, olsem na ol i save tok: “I no gat wanpela man i olsem God, Bikpela bilong yumi. Em i stap antap tru.” (Song 113:5) Ol i bilip tru long God Jehova. Bilong wanem ol i bilip tru long Jehova? Bilong wanem ol i litimapim nem bilong em?
I Stret Yumi Bilip na Givim Biknem Long Em
3. I gat hamas Singsing Halel? Ol dispela singsing i bilong mekim wanem?
3 I stret yumi bilip long Jehova, long wanem, em wanpela tasol i God tru. Long Baibel, Song 113 na 114 na 115 i save litimapim nem bilong Jehova, na wanpela skul bilong ol tisa bilong lotu Juda i tok, taim ol Juda i wokim Pasova ol i save singsing long Song 113 na 114 taim ol i kapsaitim wain long namba 2 kap na ol i stori pinis long as bilong dispela bung, na ol i singsing long Song 115 i go inap 118 taim ol i kapsaitim pinis wain long namba 4 kap. (Lukim Matyu 26:30.) Ol i kolim dispela 6-pela singsing olsem “Singsing Halel,” olsem “Litimapim nem bilong Jehova,” long wanem, planti taim ol dispela singsing i kolim dispela tok olsem “Litimapim nem bilong Jehova!” o “Ya!”—Lukim Kamapim Tok Hait 19:1 na sta bilong en daunbilo.
4. Wanem insait bilong dispela tok “Haleluya”? Em i kamap hamas taim long Baibel?
4 Dispela tok “Haleluya!” i olsem “Litimapim nem bilong Ya,” na long tok Hibru em i kamap 24 taim long Baibel long hap bilong Song. Na long Kamapim Tok Hait 19:1-6 long tok Grik em i bin kamap 6-pela taim na ol i raitim long Buk Baibel long tok Pisin olsem “Yumi litimapim nem bilong God!” Long wanem, em i makim taim Bikpela Babilon bai kisim bagarap na God Jehova i kamap King, na yumi amamas long dispela samting. Orait, nau yumi ken stori long 3-pela Singsing Halel, na yumi ken ting olsem yumi yet i stap wantaim ol na mekim ol dispela singsing na litimapim nem bilong Jehova.
Litimapim Nem Bilong Jehova!
5. Song 113 i ken tokim yumi long bekim bilong wanem askim? Husat i mas bihainim tok bilong Song 113?
5 Sapos yumi laik save, bilong wanem yumi mas litimapim nem bilong Jehova, Song 113 long Baibel i ken tokim yumi. Ves 1 na 2 i tok: “Yupela wokman bilong Bikpela, litimapim nem bilong em! Yumi olgeta i mas amamas long nem bilong Bikpela, nau na olgeta taim bihain.” Olsem na long “nau” yumi lain bilong God i stap “long taim bilong las de” yumi mas “litimapim nem bilong Jehova,” olsem nem bilong “Ja” o “Ya.” (Daniel 12:2) Lain bilong God i mas litimapim nem bilong em long olgeta hap bilong graun, “nau na olgeta taim bihain.” Long nau ol Witnes bilong em i tokaut long olgeta man olsem: Jehova em i God, na Krais em i King, na Kingdom i kirap pinis long heven. Satan wantaim lain na oganaisesen bilong em i no inap pasim ol Witnes long litimapim nem bilong Jehova.
6. Taim san i kam antap na i go inap san i go daun, olsem wanem Jehova i kisim biknem?
6 Ol bai wok long litimapim nem bilong Jehova “long hap bilong sankamap i go inap hap bilong san i go daun,” olsem long olgeta hap bilong graun. (Song 113:3) San i save kam antap long hap bilong is na i go daun long hap bilong wes, olsem na long olgeta de san i lait long sampela hap, na olsem tasol lain bilong Jehova i mas lotuim em na litimapim nem bilong em, maski ol i stap we long graun. Wanem hap em san i lait long en, taim ol man bilong dispela hap ol i lusim pinis kalabus bilong lotu giaman na oganaisesen bilong Satan, olgeta bai litimapim nem bilong Jehova. Long nau, lain bilong i go long heven wantaim lain bilong i stap long graun em ol bai kamap pikinini bilong King Krais Jisas, ol i mekim dispela singsing. Em wanpela gutpela samting tru ol inap mekim!
Jehova i Nambawan
7. Song 114 i makim wanem tupela bikpela samting bilong Jehova?
7 Baibel i tok: “Bikpela i save bosim olgeta lain [man]. Biknem bilong en i winim olgeta samting long heven.” (Song 113:4) Dispela i makim tupela bikpela samting bilong Jehova: (1) Em i God Antap Tru, na long ai bilong em ol man “bilong graun i olsem samting nating. Ol i olsem das bilong graun na i olsem liklik wara i pundaun.” (Aisaia 40:15; Daniel 7:18) (2) Biknem bilong em i winim lait bilong ples antap, em sno na san na mun na sta, long wanem, ol ensel i save bihainim laik bilong em.—Song 19:1, 2; 103:20, 21.
8. Bilong wanem Jehova i lukim ol samting long heven na graun? Em i mekim wanem na i olsem em i lukim na tingim ol dispela samting?
8 Man bilong raitim Song i tok: “I no gat wanpela man i olsem God [Jehova], Bikpela bilong yumi. Em i stap antap tru. Em i save lukluk i kam daun na lukim heven na graun wantaim.” (Song 113:5, 6) God i gat biknem tru na em i antap tumas, olsem na em i mas lukluk i kam daun bilong lukim ol samting i kamap long heven na graun. Tasol em i no gat pasin antap, nogat; em i gat pasin daun na em i tingim ol man i gat sin na em i marimari long ol. Em i givim Pikinini bilong em, em Krais Jisas, olsem ofa bilong “tekewe sin” bilong ol man, na dispela i kamapim klia tru pasin daun bilong Jehova.—1 Jon 2:1, 2.
Jehova i Gat Pasin Sori
9, 10. Olsem wanem Jehova em i helpim ol rabisman?
9 Devit i tingim pasin sori bilong Jehova na em i tok: “Em i save helpim ol rabisman na ol i no i stap nogut moa. Ol i stap gut tasol. Em i save helpim ol man i sot long ol samting na ol i kisim inap. Em i save putim ol i stap wantaim ol hetman bilong ol manmeri bilong en. Na em i save mekim gut long ol meri i no save karim pikinini na mekim ol i karim planti pikinini. Litimapim nem bilong Bikpela!” (Song 113:7-9) Lain bilong Jehova i bilip tru olsem em inap lukautim ol stretpela man i sot long ol samting, na bai ol i gat kaikai samting inap long ol. ‘Em i stap antap tru long gutpela ples bilong em yet. Tasol em i stap tu wantaim ol manmeri i save daunim ol yet . . . Na em i save strongim bel bilong ol na mekim laip bilong ol i kamap gutpela gen.’—Aisaia 57:15.
10 Olsem wanem Jehova i save helpim ol rabisman na “putim ol i stap wantaim ol hetman”? Sapos God i laik, em i ken putim lain bilong em long wok i gat namba, olsem givim namba long ol na ol i holim bikpela wok na nau ol i gat nem. Em i bin mekim olsem long Josep, na Josep i kamap bos bilong kaikai long Isip. (Stat 41:37-39) Ol man i bosim ol samting long lain Israel, olsem ol hetman, ol i gat namba, na ol man nating i ting em i bikpela samting sapos ol inap sindaun wantaim ol. Jehova i bin mekim gut long ol dispela man i gat namba insait long lain bilong em, na i olsem tu long ol elda Kristen, em God i helpim ol na mekim gut long ol.
11. Olsem wanem Song 113:7-9 i makim lain bilong Jehova long nau?
11 Na olsem wanem God “i mekim gut long ol meri” na “ol i karim planti pikinini” na ol “i amamas”? Em i bin givim pikinini man, em Samuel, long Hana, na Hana i putim Samuel i go long wok bilong God. (1 Samuel 1:20-28) Saion long heven i olsem meri bilong God, na kirap long Jisas na long taim ol disaipel bilong em i kisim spirit holi long Pentikos bilong yia 33, dispela “meri” i kirap long karim ol pikinini spirit. (Aisaia 54:1-10, 13; Aposel 2:1-4) Na taim God i kisim bek lain Juda long Babilon, dispela i wankain olsem long 1919, em Jehova i helpim ol remnan bilong “Israel tru bilong God” na ol i klia olgeta long Bikpela Babilon, olsem na God i mekim gut long ol na nau tok bilong Song 113:7-9 i makim ol. (Galesia 6:16) Nau lain bilong i stap long graun i bung wantaim ol, na olgeta wantaim i mekim olsem laspela hap bilong Song 113:9 i tok: “Litimapim nem bilong Bikpela [Jehova]!”
Jehova i Narapela Kain
12. Olsem wanem Song 114 i makim Jehova i narapela kain?
12 Song 114 i stori long ol samting Jehova i mekim long lain Israel na yumi ken save, i no gat wanpela i olsem Jehova. Dispela singsing i tok: “Bipo ol Israel i lusim Isip na i go. Dispela ol lain bilong Jekop i lusim ples bilong ol arapela lain. Taim ol i mekim olsem, ol Juda i kamap manmeri bilong Bikpela, na ol Israel tu.” (Song 114:1, 2) God i helpim ol Israel o Juda long ranawe lusim kalabus long Isip, em tok ples bilong ol Isip i narapela kain long yau bilong ol Israel. Olsem na long nau tu God inap helpim lain bilong em long abrusim bagarap.
13. Olsem wanem Song 114:3-6 i makim Jehova i gat bikpela strong long taim bilong ol Israel long bipo?
13 Song 114 i makim Jehova i King bilong olgeta hap, na dispela Song i tok: “Solwara Retsi em i lukluk na i ranawe, na wara Jordan i sanap i stap na wara i no ran moa. Ol bikpela maunten i kalap kalap olsem ol meme na ol liklik maunten i kalap nabaut olsem ol sipsip. Solwara, wanem samting i kamap na yu ranawe? Wara Jordan, olsem wanem na yu no ran moa? Ol maunten, . . . olsem wanem na yupela i kalap nabaut?” (Song 114:3-6) Solwara Retsi “em i lukluk na i ranawe” long taim God i brukim long namel na wokim rot bilong Israel i ranawe. Ol i lukim bikpela strong bilong Jehova long helpim ol, na ol i lukim tu long taim solwara i pas bek gen long ol Isip na ol i kisim bagarap. (Kisim Bek 14:21-31) Na long Wara Jordan tu Jehova i kamapim bikpela strong bilong em na em i pasim wara na wokim rot na bai ol Israel i ken brukim wara na wokabaut i go long Kenan. (Josua 3:14-16) Na ‘ol maunten i kalap olsem meme’ long taim smok i kamap long Maunten Sainai na maunten i guria na God i givim kontrak bilong Lo long ol Israel. (Kisim Bek 19:7-18) Na Baibel i kolim dispela tok bilong Song i olsem ol askim, na i olsem solwara na wara na maunten i kirap nogut long strong bilong Jehova.
14. Jehova i mekim wanem strongpela samting long Meriba na long Kades? Lain bilong em long nau i mas ting olsem wanem long dispela?
14 Na Song 114 i stori moa long strong bilong Jehova na i tok: “Graun, nau Bikpela i kam na yu mas guria. God bilong Jekop i kam pinis na yu mas guria. Em i save mekim ston i kamap hul wara, na maunten ston i kamap bikpela wara.” (Song 114:7, 8) I olsem ol man i mas pret long Jehova, em i Bikpela King bilong olgeta hap. Em i bin i stap “God bilong Jekop,” em Israel, na olsem tasol em i God bilong lain Israel bilong spirit na lain poroman bilong ol bilong i stap long graun. Jehova i bin kamapim strong bilong em long Meriba na long Kades na em i wokim mirakel na i “mekim ston i kamap hul wara.” (Kisim Bek 17:1-7; Namba 20:1-11) Ol Witnes bilong em i tingim bikpela strong na sori bilong em, olsem na ol i bilip tru long em.
Em i No Olsem Ol God Giaman
15. Ating taim ol i singsing long Song 115 ol i mekim olsem wanem?
15 Song 115 i tok, yumi mas litimapim nem bilong Jehova na bilip long em. Dispela Song i tok, em i Man bilong mekim gut long ol manmeri na helpim ol, tasol ol god giaman na piksa samting ol man i lotu long en i no inap mekim olsem. Taim ol i singsing na kolim ol toktok bilong dispela Song, wanpela nek bai singsing na kolim hap bilong en, na nau ol narapela bai kolim narapela hap bilong en. Olsem: Wanpela nek bai singsing na i tok: “Yupela manmeri i save pret long Bikpela, yupela i mas bilip long em.” Na nau ol narapela bai skruim singsing na i tok: “Em wanpela tasol i save helpim yupela na lukautim yupela.”—Song 115:11.
16. Olsem wanem Jehova i narapela kain long ol god giaman bilong ol man bilong graun?
16 Jehova em i Man bilong pasin sori na tok tru, olsem na yumi mas litimapim nem bilong em wanpela tasol. (Song 115:1) Ating ol birua bai tok: “We stap God bilong yupela?” Tasol lain bilong em bai bekim olsem: “God bilong yumi i stap long heven. Sapos em i laik mekim wanpela samting, orait em i save mekim tasol.” (Ves 2, 3) Ol god giaman bilong ol man bilong graun i no gat laip, na inap mekim wanpela samting, long wanem, ol i olsem silva o gol tasol, na maski ol i gat maus na ai na yau, ol i no inap toktok o lukluk o harim tok. Na maski ol i gat nus na lek na nek, ol i no inap harim smel o wokabaut o singaut. Na ol man i wokim ol god giaman o bilip long en ol tu bai kamap wankain olsem ol dispela god giaman—bai ol i dai na i no gat laip moa.—Ves 4-8.
17. Ol man i dai pinis i no inap litimapim nem bilong God, olsem na yumi mas mekim wanem? Na sapos yumi mekim, olsem wanem long yumi long bihain?
17 Na Song 115 i tok, yumi mas bilip long Jehova, em i bin helpim ol Israel na lain bilong Aron na ol man i daun long em. (Song 115:9-11) Yumi daun long Jehova na yumi pret, nogut yumi mekim sampela samting em i no amamas long en. Na yumi bilip long em “i bin mekim kamap heven na graun” na em bai mekim gut long ol man i lotu long em. (Ves 12-15) Sia king bilong em i stap long heven, tasol em i wokim graun na bai ol man i stap gut long em na bihainim tok bilong em ol i ken stap oltaim long en. Ol man i dai pinis i no inap litimapim nem bilong God, olsem na yumi ol man i stap laip yumi mas givim bel long mekim. (Saveman 9:5) Ol man i save litimapim nem bilong Jehova ol tasol inap i stap laip oltaim na “tenkyu long Bikpela” inap long olgeta taim “bihain tu.” Olsem na yumi mas wanbel na sanap strong wantaim ol man i save “litimapim nem bilong Bikpela!”—Song 115:16-18.
Ol Gutpela Pasin Bilong Jehova
18, 19. Olsem wanem pasin bilong Jehova i narapela kain long ol god giaman?
18 Ol god giaman i olsem samting i dai pinis na i no gat laip long en, tasol Jehova i stap laip na em i save mekim ol gutpela pasin tru. Em i God “bilong marimari na sori. Na [em i] no save belhat kwik. [Em i] save laikim tru olgeta manmeri” i save “bihainim olgeta tok bilong” em. (Kisim Bek 34:6; 1 Jon 4:8) Tasol god Molek bilong ol Kenan em i god nogut! Het bilong en i olsem bilong bulmakau, na ol i save wokim paia insait long en na tromoi pikinini i go long en olsem ofa, na pikinini i go daun insait long paia. Jehova i nolaik tru long dispela, na em i tokim ol: “Mi no bin tingting long givim dispela kain lo long yupela.”—Jeremaia 7:31.
19 Jehova i gat stretpela pasin na bikpela save na olgeta strong. (Lo 32:4; Jop 12:13; Aisaia 40:26) Tasol ol god bilong ol Babilon i save bekim nogut long ol man. Na ol god bilong ol Isip i sot long save, kain olsem yumi man i no save tumas long ol samting. Ol man tasol i bin kamapim ol god giaman, na ol dispela man “i no gat tingting na save.” (Rom 1:21-23) Na ol god giaman bilong ol Grik, em narapela i laik winim narapela. Sus em wanpela, na em i daunim papa bilong em, em Kronas, na Kronas tu i bin mekim olsem long papa bilong em, em Uranus. Gutpela tru, yumi save lotu long God Jehova, na yumi litimapim nem bilong em wanpela, em God bilong sori na pasin i stret, na em i gat bikpela save na strong!
Litimapim Nem Bilong Jehova
20. Wanem ol samting i mekim na Devit i litimapim nem bilong Jehova?
20 Olsem ol Singsing Halel i tok, i stret yumi mas litimapim nem bilong Jehova oltaim. Devit na sampela Israel moa i putim mani samting bilong wokim haus lotu, na em i tokim God long ai bilong kongrigesen: “O Bikpela, yu God bilong tumbuna bilong mipela, . . . mipela i ken litimapim nem bilong yu oltaim oltaim. Yu gat olgeta strong na . . . biknem, na yu stap antap tru. Yu nambawan olgeta. . . . Olgeta samting . . . i bilong yu tasol. Yu tasol i save givim ol planti gutpela samting long mipela. Na yu tasol yu bosim olgeta samting. Yu yet yu as bilong olgeta strong na pawa, na yu tasol inap long mekim ol man i kamap strong na kisim biknem. God bilong mipela, nau mipela i tenkyu long yu, na litimapim biknem bilong yu.”—1 Stori 29:10-13.
21. Kamapim Tok Hait 19:1-6 i tok wanem na yumi save, long heven ol i litimapim nem bilong Jehova?
21 Long heven tu ol bai litimapim nem bilong Jehova inap oltaim oltaim. Aposel Jon i harim “bikpela lain . . . long heven” i tok olsem: “Yumi litimapim nem bilong God! [Lukim sta daunbilo bilong 19:1] God bilong yumi em wanpela tasol i bin kisim bek yumi. Em i gat biknem na strong. God i save skelim pasin bilong ol manmeri long kot, na kot bilong en em i tru na i stret olgeta. Dispela bikpela pamukmeri [Bikpela Babilon] em i bin bagarapim olgeta manmeri bilong graun . . . Olsem na God i bekim pe nogut long em.” Na ol i tok gen olsem: “Yumi litimapim nem bilong God!” Na 24 hetman wantaim 4-pela samting i gat laip ol tu i mekim olsem. Na wanpela maus i singaut olsem: “Yupela wokman bilong God, em yupela ol lain i save pret long God na aninit long en, yupela ol man nating wantaim yupela ol man i gat nem, yupela olgeta i litimapim nem bilong God!”—KTH 19:1-6.
22. Long nupela taim ol bai mekim wanem bilong litimapim nem bilong Jehova olsem?
22 I stret tru long ol lain bilong heven i mas litimapim nem bilong Jehova! Long nupela taim long bihain, ol man i kirap bek long matmat na ol i stap gut long Jehova, ol bai bung wantaim ol man i abrusim bagarap taim dispela pasin bilong nau i pinis, na olgeta bai litimapim nem bilong Jehova. Ol bikpela maunten tu bai givim biknem long em. Ol diwai bai singsing amamas long em. Olgeta samting i stap laip ol bai mekim bikpela singsing Haleluya na litimapim nem bilong Jehova! (Song sapta 148) Olsem wanem long yu? Nek bilong yu bai insait long dispela bikpela singsing amamas? Bai yu inap sapos yu wok wantaim lain bilong em long mekim wok bilong em. Yu mas pasim tok long bel bilong yu long mekim olsem, long wanem, i no gat narapela i wankain olsem God bilong yumi, em Jehova!
Bai Yu Bekim Olsem Wanem?
◻ Bilong wanem yumi litimapim nem bilong Jehova?
◻ Olsem wanem Jehova i narapela kain?
◻ Olsem wanem yumi save Jehova i gat pasin sori?
◻ Olsem wanem Jehova i no wankain olsem ol god giaman?
◻ Olsem wanem ol bai litimapim nem bilong Jehova long heven na graun long olgeta taim?
[Piksa long pes 9]
Ol i mekim Singsing Halel long taim bilong Pasova