Yu Save Laikim Tumas Ol Tok Bilong Jehova?
“Mi save bihainim ol lo bilong yu. Mi laikim tumas ol dispela lo.”—SONG 119:167.
1. Yumi ken painim we planti tok bilong Jehova i olsem tok bilong kirapim gen tingting?
JEHOVA i laik bai lain bilong em i stap amamas. Tasol bilong i stap amamas, yumi mas bihainim ol lo na tok bilong God. Em i givim tok bilong em long yumi bilong kirapim gen tingting bilong yumi. Ol dispela kain tok i kamap planti taim long Baibel, na i gat planti tru long Song 119, ating pikinini bilong king bilong Juda, em yangpela man Hesekia, i bin raitim. Ol tok bilong kirapim dispela gutpela singsing i olsem: “Ol man i wokabaut stret na i no gat asua, na i save bihainim lo bilong Bikpela, ol i ken amamas. Ol man i bihainim tru olgeta tok bilong God, ol i ken amamas.”—Song 119:1, 2.
2. Olsem wanem ol tok bilong God bilong kirapim gen tingting i poroman wantaim pasin bilong i stap amamas?
2 Bilong ‘bihainim ol lo bilong Jehova,’ yumi mas kisim stretpela save long Baibel na bihainim oltaim. Tasol yumi no gutpela olgeta, olsem na yumi mas kisim ol tok bilong kirapim gen tingting bilong yumi. Long tok Hibru, dispela tok olsem ‘tok bilong kirapim gen tingting’ i makim olsem God i save kirapim tingting bilong yumi long tingim gen ol lo na tok bilong em. (Matyu 10:18-20) Sapos yumi wok yet long bihainim ol dispela tok bilong God, bai yumi stap amamas, long wanem, ol dispela tok bai helpim yumi long abrusim ol samting bilong pundaunim yumi, em ol i save kamapim bikpela hevi tru.
Holimpas Ol Tok Bilong Jehova
3. Olsem Song 119:60, 61 i tok, yumi bilip tru long wanem samting?
3 Ol tok bilong God bilong kirapim gen tingting i gutpela samting tru long man bilong raitim Song, em i tok: “Mi no ken wet. Mi hariap long bihainim lo bilong yu. Ol man nogut i traim long pasim mi bilong pulim mi i go long pasin bilong ol, tasol mi no lusim tingting long lo bilong yu.” (Song 119:60, 61) Taim ol man i mekim nogut long yumi, ol tok bilong Jehova i save helpim yumi long sanap strong na karim hevi, long wanem, yumi bilip tru olsem Papa bilong yumi long heven em inap rausim ol samting ol birua i save putim bilong pasim yumi na i olsem rop ol i pasim long skin bilong yumi. Long taim em yet i makim, em i save rausim ol dispela samting i pasim yumi, bambai yumi inap mekim wok bilong autim tok bilong Kingdom.—Mak 13:10.
4. Yumi mas ting olsem wanem long ol tok bilong God bilong kirapim gen tingting?
4 Sampela taim ol tok bilong Jehova i save stretim yumi. Long olgeta taim yumi mas amamas long ol dispela tok yumi kisim bilong stretim yumi, olsem man bilong raitim Song i bin amamas long en. Em i beten long God olsem: “Mi laikim tumas tok yu givim mi bilong stiaim lek bilong mi. . . . Mi laikim tumas tok bilong yu.” (Song 119:24, 119) Long nau yumi gat planti tok moa bilong Jehova bilong kirapim gen tingting, winim dispela man bilong raitim Song. I gat planti handet ves bilong Ol Skripsa Hibru i stap insait long Ol Skripsa Grik, na ol dispela tok i kirapim yumi long tingim gen ol tok Jehova i bin givim long lain bilong em ol i stap aninit long Lo, na tu, ol dispela tok i kirapim yumi long tingim gen ol laik bilong Jehova long kongrigesen Kristen. Taim God i lukim olsem em i mas kirapim yumi long tingim gen ol lo bilong em, yumi amamas long em i stiaim yumi olsem. Na taim yumi holimpas ol tok bilong Jehova bilong kirapim gen tingting, yumi save abrusim ol samting i laik pulim yumi long mekim rong, em Jehova i no orait long en na i save pinisim amamas bilong yumi.—Song 119:31.
5. Olsem wanem yumi ken kisim pasin bilong laikim tumas ol tok bilong Jehova bilong kirapim gen tingting?
5 Yumi mas laikim ol tok bilong Jehova i go inap long wanem mak? Man bilong raitim Song i tok: “Mi save bihainim ol lo bilong yu. Mi laikim tumas ol dispela lo.” (Song 119:167) Bai yumi laikim tumas ol tok bilong Jehova bilong kirapim gen tingting sapos yumi kisim ol dispela tok olsem tok bilong wanpela Papa i save tingim tru yumi. (1 Pita 5:6, 7) Yumi mas i gat ol dispela tok bilong em bilong kirapim gen tingting, na bai yumi wok long laikim moa yet taim yumi lukim olsem ol i save helpim gut yumi.
As na Yumi Mas i Gat Ol Tok Bilong God
6. Wanem wanpela as na yumi mas i gat ol tok bilong Jehova bilong kirapim gen tingting? Wanem samting bai helpim yumi long tingim bek ol dispela tok?
6 Wanpela as na yumi mas i gat ol tok bilong God bilong kirapim gen tingting bilong yumi, em yumi save lusim tingting. Wanpela buk i tok: ‘Ol man i save lusim tingting long ol samting, na taim ol yia i wok long kam i go pinis, ol i save lusim tingting moa yet. Ating sampela taim yu no inap tingim nem bilong wanpela man, o wanpela tok i olsem i stap long maus bilong yu tasol yu no inap tingim. Dispela pasin bilong lusim tingting i save kamap planti taim. Ol man bilong saiens i tok em i olsem man i laik painim wanpela samting i lus insait long rum i gat planti samting i pulap long en. Wanpela gutpela rot bilong helpim yu na bai yu no lusim tingting long wanpela tok, em yu mas stadi gut long en inap longtaim, maski yu ting yu save gut long en.’ (The World Book Encyclopedia) Sapos yumi stadi gut na yumi mekim mekim planti taim, dispela bai helpim yumi long tingim bek ol tok bilong God na bihainim ol dispela tok bambai ol inap helpim yumi.
7. Bilong wanem yumi ol lain bilong nau i mas i gat ol tok bilong God bilong kirapim gen tingting, winim ol narapela taim bipo?
7 Long nau long dispela taim em i bikpela samting tru long yumi mas i gat ol tok bilong Jehova bilong kirapim gen tingting, long wanem, pasin nogut i go bikpela moa yet, winim olgeta narapela taim bipo. Sapos yumi putim gut yau long tok bilong God, bai yumi kisim gutpela tingting bilong helpim yumi na bai ol lain bilong dispela graun i no ken pulim yumi long bihainim ol pasin nogut bilong ol. Man bilong raitim Song i tok: “Oltaim mi save tingting long tok tru bilong yu, olsem na mi kisim gutpela tingting tru, na mi winim ol tisa bilong mi. Na save bilong mi i winim save bilong ol lapun, long wanem, mi save bihainim stretpela lo bilong yu. Mi surik long bihainim pasin nogut, long wanem, mi laik bihainim tok bilong yu tasol.” (Song 119:99-101) Sapos yumi bihainim ol tok bilong God bilong kirapim gen tingting, bai yumi surik long bihainim “pasin nogut,” na bai yumi no kamap wankain olsem ol lain bilong dispela graun, em tingting bilong ol i stap ‘olsem tudak, na ol i stap ausait long laip bilong God.’—Efesus 4:17-19.
8. Wanem samting inap helpim yumi long winim ol hevi i save kamap bilong traim bilip bilong yumi?
8 Na tu, yumi mas i gat ol tok bilong God bilong kirapim gen tingting, long wanem, ol dispela tok i save strongim yumi long karim ol hevi i painim yumi nau long dispela “taim bilong las de.” (Daniel 12:4) Sapos yumi no gat ol dispela tok bilong kirapim gen tingting, bai yumi kamap man bilong “harim nating na lusim tingting hariap.” (Jems 1:25) Tasol sapos yumi wok strong long stadi long Baibel long haus na long kongrigesen wantaim ol buk na nius bilong “wokboi i gat gutpela tingting,” dispela bai helpim yumi long winim ol hevi i save kamap bilong traim bilip bilong yumi. (Matyu 24:45-47) Ol dispela samting bilong spirit Jehova i givim long yumi, ol i helpim yumi long save long ol samting yumi mas mekim taim ol hevi o traim i painim yumi, na bai Jehova i ken orait long yumi.
Bikpela Wok Bilong Ol Miting
9. Ol dispela man i olsem “presen” ol i husat? Ol i save helpim ol wanbilip olsem wanem?
9 Na tu, yumi save kisim ol dispela tok bilong God taim yumi go long ol miting Kristen. Long ol dispela miting ol brata i save givim ol tok long yumi bilong skulim yumi. Aposel Pol i tok, taim Jisas “i go antap tru, . . . em i kisim bikpela lain kalabus i go wantaim em. Na em i givim ol presen long ol man.” Na Pol i tok: “Long sampela man em i givim wok aposel. Na long sampela em i givim wok profet. Na long sampela em i givim wok bilong autim gutnius . . . Na long sampela em i givim wok pasto [olsem wasman] na wok bilong skulim ol manmeri long ol pasin God i laikim. Krais i givim ol dispela presen bilong helpim yumi manmeri bilong God bai yumi inap long mekim gutpela wok bilong em. Olsem na bai bodi bilong Krais i ken kamap strong na i stap gut.” (Efesus 4:8, 11, 12) Yumi ken amamas tru long ol dispela man i olsem “presen”—em ol elda—ol i save stiaim tingting bilong yumi i go long ol tok bilong Jehova taim yumi bung wantaim long lotuim Em!
10. Wanem bikpela tok bilong Hibru 10:24, 25?
10 Sapos yumi amamas long ol samting God i givim long yumi bilong helpim yumi, dispela bai kirapim yumi long go long 5-pela miting bilong yumi i save kamap long olgeta wik. Pol i tokaut strong olsem yumi mas bung wantaim long olgeta taim. Em i tok: “Yumi wan wan i mas tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol. Na yumi ol manmeri bilong God i no ken lusim pasin bilong bung wantaim . . . Yupela i save, De bilong Krais em i kam klostu. Olsem na yumi wan wan i mas wok strong moa long strongim bel bilong ol arapela.”—Hibru 10:24, 25.
11. Ol wan wan miting bilong yumi bilong olgeta wik i save helpim yumi olsem wanem?
11 Olsem wanem? Yu save pilim tru ol samting ol miting i mekim bilong helpim yumi? Stadi Wastaua i kamap long olgeta wik i save strongim bilip bilong yumi, na i helpim yumi long bihainim ol tok bilong Jehova, na i strongim yumi long sakim ol tingting bilong dispela graun. (1 Korin 2:12; Aposel 15:31) Long Miting Bilong Pablik-Tok, ol brata i save kamapim ol tok bilong Baibel bilong skulim yumi, na ol tok bilong Jehova bilong kirapim gen tingting, na ol gutpela tok bilong Jisas “i save givim laip i stap gut oltaim oltaim.” (Jon 6:68; 7:46; Matyu 5:1–7:29) Long Skul Tiokratik Bilong Autim Tok, yumi lain long pasin bilong skulim gut ol man. Miting Bilong Wok Autim Tok i helpim yumi long kamapim gut ol tok taim yumi autim gutnius long haus bilong ol man, na mekim ol gobek, na Baibel-stadi, na long ol narapela taim yumi save autim tok. Long Buk-Stadi i no gat bikpela lain tumas, olsem na planti taim yumi gat rot long kamapim ol tok, na ating i gat sampela tok bilong God long en bilong kirapim gen tingting.
12, 13. Olsem wanem lain bilong God long wanpela kantri long Esia i kamapim olsem ol i amamas tru long ol miting Kristen?
12 Taim yumi go long olgeta miting bilong kongrigesen, dispela i save kirapim yumi long tingim gen ol lo bilong God na i helpim yumi long sanap strong long taim bilong pait, na taim i gat bikpela hevi long mani, na ol narapela samting i save traim bilip bilong yumi. Long wanpela kantri long Esia, wanpela lain Kristen em ol inap olsem 70 samting, ol i mas ranawe lusim haus bilong ol na go sindaun insait long bikbus. Ol i pilim tru olsem ol miting i bikpela samting, na ol i strong long bung wantaim na mekim yet ol miting long olgeta wik. Olsem na ol i go bek long taun bilong ol em pait i bin bagarapim, na ol i kisim ol hap bilong Haus Kingdom i stap yet, na ol i karim i go na sanapim gen insait long bikbus.
13 Long narapela hap bilong dispela kantri, pait i stap inap planti yia, tasol lain bilong Jehova long dispela hap ol i wok strong yet long mekim wok bilong em. Ol i bin askim wanpela elda long dispela hap: “Wanem samting i bin helpim tru ol brata long pas gut wantaim?” Em i tok: “Insait long 19 yia, mipela i no bin lusim wanpela miting. Sampela taim ol i save tromoi bom o i gat sampela hevi moa i kamap, olsem na sampela brata i no inap i kam long ples miting, tasol i no gat wanpela taim mipela i no bin mekim miting.” Ol dispela gutpela brata sista ol i pilim tru olsem ol “i no ken lusim pasin bilong bung wantaim.”
14. Pasin bilong lapun Ana inap skulim yumi long wanem samting?
14 Lapun meri Ana i gat 84 krismas em “i no save lusim tempel.” Olsem na taim Maria i karim Jisas na ol i kisim em i kam long tempel, Ana i stap. (Luk 2:36-38) Olsem wanem long yu? Yu save tingting strong olsem yu no ken lusim wanpela miting? Yu save wok strong bambai yu ken i stap na harim olgeta hap bilong program i kamap long ol kibung bilong yumi? Ol tok yumi kisim long ol dispela bung bilong helpim yumi long ol samting bilong spirit, ol i kamapim klia olsem Papa bilong yumi long heven i save tingim tru lain bilong em. (Aisaia 40:11) Ol dispela bung i save kamapim amamas, na taim yumi stap long ol dispela bung, dispela i kamapim olsem yumi amamas long ol tok bilong Jehova bilong kirapim gen tingting.—Nehemia 8:5-8, 12.
Yumi Stap Narapela Kain
15, 16. Taim yumi bihainim ol tok bilong Jehova bilong kirapim gen tingting, dispela i save mekim wanem long pasin bilong yumi?
15 Taim yumi bihainim ol tok bilong Jehova bilong kirapim gen tingting, dispela i helpim yumi long i stap narapela kain long ol lain bilong graun i save mekim pasin nogut. Olsem: Taim yumi putim gut yau long tok bilong God, dispela i save pasim yumi na yumi no mekim pasin pamuk. (Lo 5:18; Sindaun 6:29-35; Hibru 13:4) Taim yumi laik mekim tok giaman, o mekim wanpela pasin i no stret, o stil, yumi inap daunim ol dispela pasin sapos yumi bihainim ol tok bilong God bilong kirapim gen tingting. (Kisim Bek 20:15, 16; Wok Pris 19:11; Sindaun 30:7-9; Efesus 4:25, 28; Hibru 13:18) Na taim yumi bihainim ol dispela tok bilong Jehova, dispela i save pasim yumi long bekim rong ol man i mekim long yumi, o tingting nogut long man, o mekim ol tok i bagarapim gutnem bilong man.—Wok Pris 19:16, 18; Song 15:1, 3.
16 Taim yumi harim gut ol tok bilong God bilong kirapim gen tingting, yumi stap narapela kain bambai yumi ken mekim wok bilong em. Na em i bikpela samting tru long yumi stap narapela kain long ol lain bilong dispela graun! Taim Jisas i beten long Jehova long laspela nait bilong em long graun, em i tingim ol disaipel bilong em na em i beten olsem: “Tok bilong yu, mi givim pinis long ol. Na ol manmeri bilong dispela graun ol i save birua long ol, long wanem, ol manmeri bilong mi ol i no bilong dispela graun, olsem mi tu mi no bilong dispela graun. Mi no askim yu long tekewe ol long dispela graun. Nogat. Mi beten long yu long yu ken lukautim ol, na man nogut i no ken bagarapim ol. Ol i no bilong dispela graun, olsem mi yet mi no bilong dispela graun. Tok bilong yu i tru olgeta, na mi laik bai yu mekim tok tru bilong yu i wok insait long bel bilong ol, na mekim ol i kamap ol lain bilong yu stret.” (Jon 17:14-17) Yumi mas wok yet long laikim tru Tok Bilong God, em i save mekim yumi i stap narapela kain bambai yumi ken mekim wok holi bilong em.
17. Wanem samting inap kamap sapos yumi givim baksait long ol tok bilong God bilong kirapim gen tingting? Olsem na yumi mas mekim wanem?
17 Yumi ol wokman bilong Jehova yumi laik bai em i ken orait long yumi ken mekim yet wok bilong em. Tasol sapos yumi givim baksait long ol tok bilong God bilong kirapim gen tingting, kwiktaim ol tingting bilong dispela graun inap pulim yumi, em dispela tingting i save kamap ples klia long ol toktok, ol buk, ol amamas, na ol pasin bilong dispela graun. Na yumi no laik kamap man bilong laikim tumas mani, litimapim nem bilong yumi yet, hambak, i no save tok tenkyu, i no stap gut long ol pren, pait na bagarapim man, strong long bihainim ol tingting kranki bilong yumi; tingim yumi yet i bikpela man tru, laikim tumas ol amamas long dispela graun, i no laikim God—em sampela pasin ol manmeri i stap longwe long God ol i save kamapim. (2 Timoti 3:1-5) Nau yumi stap long taim bilong las de bilong dispela pasin nogut bilong graun, olsem na yumi mas wok long beten askim God long helpim yumi bambai yumi ken bihainim yet ol tok bilong God bilong kirapim gen tingting, na bai yumi ken ‘bihainim tok bilong em na i stap klin.’—Song 119:9.
18. Sapos yumi bihainim ol tok bilong God bilong kirapim gen tingting, dispela bai kirapim yumi long mekim wanem?
18 Ol tok bilong Jehova bilong kirapim gen tingting i no toksave tasol long ol samting yumi no ken mekim, nogat; ol i mekim sampela samting moa. Sapos yumi bihainim dispela tok, dispela bai kirapim yumi long bilip na wetim Jehova, na laikim em tru long bel na tingting na strong olgeta. (Lo 6:5; Song 4:5; Sindaun 3:5, 6; Matyu 22:37; Mak 12:30) Na ol dispela tok bilong God i save kirapim yumi long laikim tru ol man. (Wok Pris 19:18; Matyu 22:39) Na taim yumi mekim laik bilong God na yumi givim save bilong God long ol man, em dispela save i givim laip long man, yumi kamapim klia moa olsem yumi laikim tru God na ol man.—Sindaun 2:1-5.
Bihainim Tok Bilong Jehova na Kisim Laip!
19. Olsem wanem yumi ken soim ol man olsem taim ol i harim gut ol tok bilong Jehova bilong kirapim gen tingting, dispela i gutpela na i save helpim ol?
19 Sapos yumi bihainim ol tok bilong Jehova na yumi helpim ol narapela long mekim olsem, orait God bai kisim bek yumi na ol man i save harim tok bilong yumi. (1 Timoti 4:16) Orait olsem wanem yumi ken soim ol man olsem pasin bilong harim gut ol tok bilong Jehova dispela i gutpela na i save helpim yumi? Yumi yet i mas bihainim ol lo bilong Baibel. Olsem na ol man em “bel bilong ol i gutpela tru . . . bilong kisim laip i stap gut oltaim,” ol bai lukim olsem rot Baibel i makim em i nambawan rot tru long bihainim. (Aposel 13:48) Na tu, ol bai lukim olsem ‘God i stap namel long yumi,’ na dispela bai kirapim ol long bung wantaim yumi long lotuim Bikpela King Jehova.—1 Korin 14:24, 25.
20, 21. Ol tok bilong God bilong kirapim gen tingting na spirit bilong em bai helpim yumi long mekim wanem?
20 Sapos yumi wok yet long stadi long Baibel, na bihainim ol tok yumi lainim, na mekim wok long olgeta samting bilong spirit Jehova i givim long yumi, bai yumi kisim pasin bilong laikim tumas ol tok bilong em bilong kirapim gen tingting. Sapos yumi harim gut ol dispela tok, dispela bai helpim yumi long “kamap ol nupela manmeri, em ol manmeri God i mekim ol i kamap nupela na ol i stap olsem God yet, long wanem, pasin bilong ol i stretpela olgeta na i holi tru.” (Efesus 4:20-24) Ol tok bilong Jehova bilong kirapim gen tingting, na spirit holi bilong em, dispela bai helpim yumi long kamapim pasin bilong laikim tru ol narapela, amamas, bel isi, i no belhat kwik, helpim ol man, mekim gutpela pasin long ol, bilip, stap isi, daunim laik bilong olpela bel—em ol pasin i narapela kain tru long pasin bilong dispela graun em Satan i bosim! (Galesia 5:22, 23; 1 Jon 5:19) Olsem na yumi ken amamas taim yumi harim ol tok bilong kirapim yumi long tingim gen ol lo bilong Jehova, olsem long rot bilong stadi long Baibel, na ol elda, na ol miting na kibung bilong yumi.
21 Yumi save bihainim ol tok bilong Jehova, olsem na yumi inap i stap amamas, maski yumi kisim hevi long bihainim stretpela pasin. (Luk 6:22, 23) Na taim bikpela hevi tru i painim yumi na ol man i laik bagarapim yumi, yumi bilip na wetim God i kisim bek yumi. Dispela em i bikpela samting tru, long wanem, nau long dispela taim olgeta lain bilong graun ol i wok long i kam bung bilong “kirapim pait long dispela bikpela de bilong God I Gat Olgeta Strong,” long Armagedon.—KTH 16:14-16.
22. Yumi mas tingting strong long mekim wanem long ol tok bilong Jehova bilong kirapim gen tingting?
22 Bilong kisim dispela gutpela presen olsem laip i stap oltaim, yumi mas laikim tumas ol tok bilong Jehova bilong kirapim gen tingting, na yumi mas givim bel long bihainim ol dispela tok. Yumi mas i gat wankain tingting olsem man bilong raitim Song, em i bin tok: “Tok bilong yu i stretpela oltaim oltaim. Yu helpim mi bai mi kisim save long dispela tok na mi ken i stap laip.” (Song 119:144) Na yumi mas tingting strong long bihainim ol dispela tok, olsem man bilong raitim Song i mekim, em i tok: “Mi singaut long yu [Jehova]. Kisim bek mi, na bai mi ken bihainim ol lo bilong yu.” (Song 119:146) Em nau, long maus na long pasin bilong yumi, yumi mas kamapim klia olsem yumi laikim tumas ol tok bilong Jehova bilong kirapim gen tingting.
Bai Yu Bekim Olsem Wanem?
• Man bilong raitim Song i ting olsem wanem long ol tok bilong Jehova bilong kirapim gen tingting?
• Bilong wanem yumi mas i gat ol tok bilong God bilong kirapim gen tingting?
• Ol miting bilong yumi i save mekim wanem wok long ol tok bilong God bilong kirapim gen tingting?
• Olsem wanem ol tok bilong Jehova bilong kirapim gen tingting i mekim yumi i stap narapela kain long ol lain bilong dispela graun?
[Piksa long pes 15]
Man bilong raitim Song i laikim tumas ol tok bilong Jehova bilong kirapim gen tingting
[Ol Piksa long pes 16, 17]
Olsem wanem? Yu bihainim pasin bilong Ana na yu no save lusim wanpela miting?
[Piksa long pes 18]
Taim yumi harim gut ol tok bilong Jehova bilong kirapim gen tingting, yumi stap narapela kain na i stap stret na Jehova i orait long yumi mekim wok bilong em