Larim Tok Bilong God i Soim Rot Long Yu
“Tok bilong yu i olsem . . . lait bilong soim rot long mi.”—SONG 119:105.
1, 2. Olsem wanem tok bilong Jehova bai givim lait bilong soim rot long yumi?
TOK bilong Jehova bai givim lait bilong soim rot long yumi sapos yumi larim em i mekim olsem. Bilong lait bilong spirit i ken helpim yumi, yumi mas stadi gut long Baibel na bihainim ol tok bilong en. Taim yumi mekim olsem yumi inap wanbel long tok bilong man bilong raitim song: “Tok bilong yu i olsem lam bilong helpim mi long wokabaut stret, na i olsem lait bilong soim rot long mi.”—Song 119:105.
2 Nau bai yumi skelim Song 119:89-176. I gat planti gutpela tok i stap long ol dispela ves, em ol i brukim long 11-pela hap! Ol inap helpim yumi long bihainim yet rot i go long laip oltaim.—Matyu 7:13, 14.
Laikim Tumas Tok Bilong God—Bilong Wanem?
3. Olsem wanem Song 119:89, 90 i soim olsem yumi inap bilipim tok bilong God?
3 Taim yumi laikim tumas tok bilong Jehova yumi stap strong long samting bilong spirit. (Song 119:89-96) Man bilong raitim song i tok: “Bikpela, tok bilong yu bai i stap oltaim oltaim. Em i stap strong long heven. . . . Yu putim graun i stap long ples bilong en, na i stap olsem na i no save surik.” (Song 119:89, 90) Long rot bilong tok bilong God—em ol lo bilong em “ol sta bilong skai i save bihainim”—ol sta samting long ples antap i bihainim stret rot bilong ol yet na inap oltaim oltaim graun i no inap surik liklik. (Jop 38:31-33; Song 104:5) Yumi ken bilipim olgeta tok Jehova i mekim; tok bilong “em bai i mekim ol samting i kamap” olsem em i tingting pinis long mekim.—Aisaia 55:8-11.
4. Pasin bilong laikim tumas tok bilong God i save mekim wanem long ol wokboi bilong God taim ol narapela i mekim save long ol?
4 Man bilong raitim song i tok ‘sapos mi no laikim tumas lo bilong yu, orait ol man inap mekim save long mi na mi dai.’ (Song 119:92, NW ) I no ol man bilong ol narapela kantri i mekim save long em, nogat; em ol man Israel husat i brukim lo na ol i no laikim em. (Wok Pris 19:17) Tasol dispela i no daunim em, long wanem, em i laikim tru lo bilong God, em dispela lo i lukautim em. Long Korin, aposel Pol i “laik bagarap long han bilong ol giaman brata,” ating ol dispela “namba wan aposel” i insait long dispela na ol i laik painim sampela rong long Pol. (2 Korin 11:5, 12-14, 26) Tasol Pol i no bagarap long ol samting bilong spirit, long wanem, em i laikim tumas tok bilong God. Yumi laikim tumas tok bilong Jehova i stap long Baibel na yumi wok long bihainim tok bilong en, olsem na yumi laikim ol brata bilong yumi. (1 Jon 3:15) Maski ol man bilong dispela graun i birua long yumi, dispela i no mekim na yumi lusim tingting long ol tok bilong God. Long pasin laikim yumi wanbel wantaim ol brata long mekim laik bilong God na yumi tingim amamas bai yumi kisim long olgeta taim bihain long mekim wok bilong Jehova.—Song 119:93.
5. Olsem wanem King Asa i bin wok long painim Jehova?
5 Bilong kamapim olsem yumi givim bel tru long mekim laik bilong Jehova, yumi inap beten olsem: “Mi bilong yu tasol, olsem na yu kisim bek mi. Oltaim mi bihainim tok bilong yu.” (Song 119:94) King Asa i bin wok long painim God na em i pinisim pasin bilong tromoi lotu i tru long Juda. Long wanpela bikpela kibung long namba 15 yia bilong Asa i stap king (963 B.C.E.), ol Juda “i mekim strongpela promis . . . bai ol i wok strong long bihainim [God].” God “i larim ol i kam klostu long em” na “i no gat wanpela hevi i kamap long ol.” (2 Stori 15:10-15) Dispela stori i ken strongim ol bratasista husat i bin lusim kongrigesen Kristen long kirap gen long painim God. Em bai blesim na lukautim ol manmeri em ol i kirap gen na bung wantaim lain bilong em.
6. Wanem samting bai lukautim yumi na yumi no bagarap long samting bilong spirit?
6 Yumi inap kisim savetingting long tok bilong Jehova na em inap lukautim yumi na yumi no kisim bagarap long samting bilong spirit. (Song 119:97-104) Lo bilong God i mekim na save bilong yumi i winim save bilong ol birua bilong yumi. Taim yumi bihainim tok bilong em yumi kisim gutpela tingting tru, na taim yumi ‘bihainim stretpela lo bilong em’ save bilong yumi “i winim save bilong ol lapun.” (Song 119:98-100) Sapos tok bilong Jehova ‘i swit moa yet long maus bilong yumi’ winim hani, orait bai yumi abrusim na “no laik tru long olgeta pasin nogut.” (Song 119:103, 104) Dispela bai lukautim yumi long ol samting bilong spirit nau long taim bilong las de taim yumi bungim ol man nogut i bikhet na ol i givim baksait long God.—2 Timoti 3:1-5.
Lam Bilong Helpim Yumi Long Wokabaut
7, 8. Bilong bihainim tok bilong Song 119:105, yumi mas mekim wanem?
7 Oltaim tok bilong God i save givim lait bilong spirit. (Song 119:105-112) Maski yumi bilong lain Kristen God i bin makim long holi spirit o yumi bilong lain “arapela sipsip,” yumi tokaut: “Tok bilong yu i olsem lam bilong helpim mi long wokabaut stret, na i olsem lait bilong soim rot long mi.” (Jon 10:16; Song 119:105) Tok bilong God i olsem lam i soim rot long yumi, na bai yumi no pundaun long samting bilong spirit. (Sindaun 6:23) Tasol yumi wan wan i mas larim tok bilong Jehova i stap olsem lam bilong helpim yumi long wokabaut stret.
8 Yumi mas sanap strong olsem man bilong raitim Song 119 i bin mekim. Em i tingting strong olsem em i no inap lusim ol tok bilong God. Em i tok: “Mi promis pinis bai mi bihainim olgeta stretpela tok bilong yu. Orait bai mi mekim olsem. Mi no ken giaman.” (Song 119:106) Yumi no ken kisim tingting olsem pasin bilong stadi oltaim long Baibel na insait long ol miting Kristen em i liklik samting tasol.
9, 10. Olsem wanem yumi save man i dediket pinis long Jehova em inap ‘lusim tok bilong em’? Tasol olsem wanem yumi abrusim dispela samting?
9 Man bilong raitim song i no bin ‘lusim tok bilong God,’ tasol kain samting olsem inap kamap long man i dediket pinis long Jehova. (Song 119:110) King Solomon i bin lusim tok bilong God, maski em i insait long wanpela lain i dediket long Jehova na pastaim em i bihainim savetingting God i bin givim em. “Em i bin maritim sampela haiden meri na ol i bin paulim tingting bilong en na em i mekim sin” na ol i kirapim em long lotuim ol god giaman.—Nehemia 13:26; 1 King 11:1-6.
10 Long pasin hait Satan i save mekim kain kain samting bilong holimpasim ol man. (Song 91:3) Olsem: Wanpela man, bipo em i wanbilip bilong yumi, em inap traim long kirapim yumi long lusim rot i gat lait bilong spirit long en na bihainim pasin apostet, em rot i tudak tru. Namel long ol Kristen long Taiataira i gat “dispela meri Jesebel,” ating em wanpela lain meri i lainim ol narapela long lotuim ol imis na mekim pasin pamuk. Jisas i no inap larim ol kain pasin nogut i stap, na yumi mas bihainim pasin bilong em. (KTH 2:18-22; Jut 3, 4) Olsem na yumi mas prea long Jehova i helpim yumi na bai yumi no lusim tok bilong em na yumi stap yet long lait bilong God.—Song 119:111, 112.
Tok Bilong God i Lukautim Yumi
11. Olsem Song 119:119 i tok, God i ting wanem long ol man nogut?
11 Sapos oltaim yumi bihainim ol lo bilong God, em bai lukautim yumi. (Song 119:113-120) Yumi no orait long ‘ol man i giaman long bihainim God,’ wankain olsem Jisas i no orait long ol man bilong nau em ol i tok ol i Kristen na ol i givim hap bel tasol long God. (Song 119:113; KTH 3:16) Yumi givim bel olgeta long mekim wok bilong Jehova, olsem na em i ‘strongpela banis bilong yumi’ na em bai lukautim yumi. Em bai ‘givim baksait long olgeta manmeri i lusim lo bilong em’ taim ol i mekim pasin trik na giaman. (Song 119:114, 117, 118; Sindaun 3:32) Em i tingim ol kain man nogut olsem “pipia”—olsem ol pipia ol i rausim long silva na gol. (Song 119:119; Sindaun 17:3) Oltaim yumi laik soim olsem yumi laikim tumas ol tok bilong God, na yumi no laik tru long kisim bagarap wantaim ol man nogut!
12. Bilong wanem pasin bilong pret long Jehova em i bikpela samting?
12 Man bilong raitim song i tok: “Mi pret tumas long yu [God] na skin bilong mi i guria.” (Song 119:120) Sapos God bai lukautim yumi, orait yumi mas pret long em, na kamapim dispela long rot bilong abrusim ol samting em i no laikim, dispela em i bikpela samting. Pasin bilong pret long Jehova i bin kirapim Jop long bihainim stretpela pasin. (Jop 1:1; 23:15) Dispela pasin inap helpim yumi long bihainim laik bilong God maski wanem samting i painim yumi. Tasol bilong sanap strong yumi mas bilip long God na prea strong.—Jems 5:15.
Bilip Long God na Mekim Prea
13-15. (a) Bilong wanem yumi ken bilip olsem God bai harim ol prea bilong yumi? (b) Wanem samting inap kamap sapos yumi no save long ol tok yumi mas mekim insait long beten bilong yumi? (c) Stori long olsem wanem tok bilong Song 119:121-128 i stret wantaim samting yumi ‘no inap tokaut’ long en taim yumi beten.
13 Yumi ken bilip na beten askim God long mekim ol samting bilong helpim yumi. (Song 119:121-128) Olsem man bilong raitim song, yumi bilip tru olsem God bai harim ol prea bilong yumi. Bilong wanem yumi bilip olsem? Long wanem, yumi laikim tumas ol lo bilong God, winim “nambawan gol.” Na tu, ‘yumi tingim olgeta tok bilong God long olgeta samting i stret tasol.’—Song 119:127, 128; NW.
14 Jehova i harim ol beten bilong yumi, long wanem, yumi bilip long em na beten, na tu, yumi wok strong long bihainim ol tok bilong em. (Song 65:2) Tasol olsem wanem sapos yumi gat ol hevi i paulim tru tingting bilong yumi na yumi no save bai yumi tok wanem long beten bilong yumi? Orait, “holi spirit yet i save prea bilong helpim yumi.” (Rom 8:26, 27) Long kain taim olsem, God i larim ol tok i stap long Baibel i kamap olsem ol prea bilong helpim yumi.
15 Long Baibel i gat planti beten na tingting i stret wantaim samting yumi ‘no inap tokaut’ long en. Olsem: Tingim Song 119:121-128. Ol tok i stap hia inap stret long samting i wok long painim yumi. Sapos yumi pilim olsem ol birua i laik mekim nogut long yumi, orait yumi ken askim God long helpim yumi olsem man bilong raitim song i bin mekim. (Ves 121-123) Sapos yumi mas mekim wanpela disisen i hatwok long mekim, orait yumi inap beten olsem spirit bilong Jehova i ken helpim yumi long tingim na bihainim ol tok bilong em. (Ves 124, 125) Tasol maski yumi ‘no laik tru long ol rot i abrusim rot bilong God,’ ating yumi mas askim God long helpim yumi long sakim ol traim i laik kirapim yumi long brukim lo bilong em. (Ves 126-128) Sapos yumi ritim Baibel long olgeta de, taim yumi prea long Jehova yumi inap tingim ol gutpela skripsa olsem.
Ol Tok Bilong Jehova i Helpim Yumi
16, 17. (a) Bilong wanem yumi mas i gat ol gutpela tok bilong God? Yumi mas i gat wanem tingting long ol dispela tok? (b) Ol narapela man inap kisim wanem tingting long yumi? Tasol wanem samting i bikpela samting moa?
16 Bilong God i ken orait long yumi na harim beten bilong yumi, yumi mas bihainim tok bilong em. (Song 119:129-136) Yumi save lusim tingting long ol samting, so yumi mas i gat ol gutpela tok bilong Jehova bilong kirapim yumi long tingim gen ol tok na lo bilong em. Yumi amamas long ol save yumi kisim, olsem lait bilong spirit, taim yumi kisim nupela mining long sampela tok bilong God. (Song 119:129, 130) Na tu, yumi tenkyu olsem Jehova ‘i stap klostu long yumi’ na em i orait long yumi, maski ‘aiwara bilong yumi i ran moa yet,’ long wanem, ol narapela man i brukim lo bilong em.—Song 119:135, 136; Namba 6:25.
17 Yumi save God bai orait long yumi sapos yumi wok long bihainim ol stretpela lo bilong em. (Song 119:137-144) Yumi stap ol wokboi bilong Jehova, olsem na yumi save i stret em i tokim yumi long ol stretpela lo bilong em na em i givim ol dispela lo long yumi bilong yumi ken bihainim. (Song 119:138) Man bilong raitim song i bin bihainim tok bilong God, olsem na bilong wanem em i tok: “Mi samting nating na samting nogut tasol”? (Song 119:141, NW ) I luk olsem em i stori long tingting bilong ol birua bilong em. Sapos yumi no surik liklik long bihainim stretpela pasin, ol narapela bai i no laik tru long yumi. Tasol em i bikpela samting moa long Jehova i orait long yumi, long wanem, yumi bihainim ol stretpela lo bilong em.
Stap Gut na Stap Bel Isi
18, 19. Wanem samting i save kamap taim yumi bihainim ol tok bilong God?
18 Yumi stap klostu long God taim yumi bihainim ol tok bilong em. (Song 119:145-152) Yumi bihainim ol tok bilong Jehova, olsem na yumi save yumi inap prea strong tru na em bai harim prea bilong yumi. Ating yumi kirap taim “tulait i no bruk yet” na yumi singaut long kisim helpim. Em i gutpela taim tru long beten! (Song 119:145-147) Na tu, God i stap klostu long yumi, long wanem, yumi no mekim pasin bikhet-nogat-sem, na yumi tingim tok bilong em i tru, olsem Jisas i bin tingim. (Song 119:150, 151; Jon 17:17) Pasin bilong yumi long pas gut wantaim Jehova i helpim yumi long i stap strong long dispela taim nogut na em bai helpim yumi long winim Armagedon.—KTH 7:9, 14; 16:13-16.
19 Yumi tingim tru tok bilong God, olsem na yumi stap gut tru. (Song 119:153-160) Yumi no olsem ol man nogut, em ol i bin ‘lusim tok tru bilong God.’ Yumi laikim tumas tok bilong God, olsem na yumi stap gut, long wanem, em i laikim yumi tumas. (Song 119:157-159) Tok bilong Jehova i save kirapim tingting bilong yumi na yumi inap tingim em i laik bai yumi mekim wanem long ol samting i save kamap long yumi. Ol lo bilong God i tokaut stret long samting yumi mas mekim, na yumi save olsem Man Bilong Wokim yumi i gat rait long mekim olsem. Yumi save ‘as bilong lo bilong God em i tok tru tasol’ na yumi no inap bosim wokabaut bilong yumi yet, olsem na yumi amamas long larim God i stiaim yumi.—Song 119:160; Jeremaia 10:23.
20. Bilong wanem yumi “stap gut tru”?
20 Yumi laikim tumas lo bilong Jehova na long dispela as yumi stap bel isi tru. (Song 119:161-168) Maski ol man i mekim nogut long yumi, dispela i no inap tekewe “bel isi God i save givim.” (Filipai 4:6, 7) Yumi tingim tru stretpela tok Jehova i mekim long kot na planti taim yumi litimapim nem bilong em—inap “7-pela taim long olgeta de.” (Song 119:161-164) Man bilong raitim song i tok: “Ol manmeri i laikim tumas lo bilong yu, ol i stap gut tru, na i no gat wanpela samting inap mekim ol i pundaun.” (Song 119:165) Sapos yumi wan wan i laikim na bihainim lo bilong Jehova, orait samting narapela i mekim na ol narapela samting tu i no inap pundaunim yumi long samting bilong spirit.
21. Wanem ol stori bilong Baibel i soim olsem yumi no ken pundaun, maski sampela hevi i kamap insait long kongrigesen?
21 Planti manmeri em Baibel i stori long ol, ol i no larim wanpela samting i pundaunim ol olgeta. Olsem: Gaius, wanpela Kristen, em i no pundaun, em i “wokabaut long pasin bilong tok tru” maski Diotrefes i mekim ol pasin i no stret. (3 Jon 1-3, 9, 10) Pol i tokim tupela meri Kristen, em Yuodia na Sintike, long ol i “mas kamap wanbel,” long wanem, i gat wanpela hevi namel long tupela. I luk olsem ol i bin kisim helpim bilong stretim dispela hevi na tupela i bin stap gut long mekim wok bilong Jehova. (Filipai 4:2, 3) Olsem na yumi no ken pundaun sapos sampela kain hevi i kamap insait long kongrigesen. Yumi laik tingting strong long bihainim ol lo bilong Jehova, na no ken lusim tingting olsem ‘em i save lukim olgeta pasin bilong yumi.’ (Song 119:168; Sindaun 15:3) Long dispela rot bai i no gat wanpela samting inap pasim yumi long i “stap gut tru.”
22. (a) Sapos yumi bihainim tok bilong God, yumi inap mekim wanem? (b) Yumi mas i gat wanem tingting long ol man em ol i bin lusim kongrigesen Kristen?
22 Sapos oltaim yumi bihainim tok bilong Jehova, orait oltaim bai yumi litimapim nem bilong em. (Song 119:169-176) Taim yumi bihainim ol lo bilong God, bai yumi stap gut long ol samting bilong spirit, na tu, ‘bai yumi litimapim nem bilong God oltaim.’ (Song 119:169-171, 174) Dispela em i nambawan samting yumi inap mekim nau long dispela taim bilong pinis. Man bilong raitim song i laik i stap laip na wok yet long litimapim nem bilong Jehova, tasol em i bin “lusim gutpela rot pinis olsem sipsip i lus.” Baibel i no stori long olsem wanem em i lusim rot. (Song 119:175, 176) Sampela i bin lusim kongrigesen Kristen, tasol ating ol i laikim yet God na ol i laik litimapim nem bilong em. Olsem na yumi laik tru long helpim ol long i stap gut gen long samting bilong spirit na amamas long litimapim nem bilong Jehova wantaim lain bilong Em.—Hibru 13:15; 1 Pita 5:6, 7.
Rot Yumi Wokabaut Long En i Gat Lait Oltaim
23, 24. Tok bilong Song 119 i bin helpim yu olsem wanem?
23 Song 119 inap helpim yumi long kain kain rot. Olsem: Em i helpim yumi long wetim God, long wanem, em i soim yumi olsem man i “bihainim lo bilong Bikpela,” em i stap amamas tru. (Song 119:1) Man bilong raitim song i kirapim yumi long tingim ‘as bilong lo bilong God em i tok tru tasol.’ (Song 119:160) Dispela i mas mekim yumi tenkyu moa yet long olgeta Tok Bilong God. Pasin bilong tingim tingim long bel tok bilong Song 119 i mas kirapim yumi long stadi gut long Baibel. Planti taim man bilong raitim song i bin tok: “Skulim mi gut long lo bilong yu.” (Song 119:12, 68, 135) Na em i bin tok: “Mi bilip tru long olgeta lo bilong yu, olsem na yu ken givim gutpela tingting na gutpela save long mi.” (Song 119:66) Yumi mas mekim wankain prea olsem.
24 Skul yumi kisim long God i mekim na yumi inap pas gut tru wantaim Jehova. Planti taim man bilong raitim song i tok em yet i wokman bilong God. Em i pilim tru ol pasin bilong God na em i tokim Jehova: “Mi bilong yu tasol.” (Song 119:17, 65, 94, 122, 125; Rom 14:8) Em i gutpela samting tru long mekim wok bilong Jehova na litimapim nem bilong em olsem wanpela Witnes bilong Em! (Song 119:7) Olsem wanem? Yu stap amamas na mekim wok bilong God olsem man bilong autim tok bilong Kingdom? Sapos olsem, orait yu ken bilip tru olsem Jehova bai wok yet long helpim na blesim yu taim yu mekim dispela gutpela wok. Em bai mekim olsem sapos oltaim yu bilip long tok bilong em na larim tok bilong em i stap olsem lam i soim rot long yu.
Bai Yu Bekim Olsem Wanem?
• Bilong wanem yumi mas laikim tumas tok bilong God?
• Olsem wanem tok bilong God i save lukautim yumi?
• Olsem wanem tok bilong Jehova i save helpim yumi?
• Bilong wanem lain bilong Jehova i stap gut na bel isi?
[Piksa long pes 16]
Tok bilong God em i wanpela rot bilong kisim lait bilong spirit
[Piksa long pes 17]
Sapos yumi laikim tumas tok bilong Jehova, bai em i no inap tingim yumi olsem “pipia” ol i rausim long silva na gol
[Ol Piksa long pes 18]
Sapos yumi ritim Baibel long olgeta de, yumi inap tingim ol gutpela skripsa bilong helpim yumi taim yumi prea