Baibel i Tok Wanem?

Ol Kristen i Mas Birua Long Ol Man i Mekim Pasin Sodom?

LONG 1969 ol i kamapim wanpela nupela tok long tok Inglis bilong makim pasin bilong pret nogut tru o no laikim tru ol man bilong mekim pasin sodom. Dispela tok em “homophobia.” Planti tok ples i no gat kain tok olsem, tasol inap planti tausen yia ol manmeri bilong planti kantri na tok ples i kamapim klia ol i no laikim tru ol man i mekim pasin sodom.

Tasol long nau planti man i ting pasin sodom em i narapela rot tasol long mekim maritpasin. Jerry Z. Muller, em man bilong raitim stori bilong ol samting i bin kamap bipo, em i raitim tok olsem: “Planti man i laik ol narapela i mas orait long ol man i mekim pasin sodom.” Em i tok, ol man i mekim pasin sodom “ol i bung wantaim na tokaut olsem pasin ol i mekim i gutpela, na ol i laik ol narapela tu i mas tok olsem.” Dispela i kamap moa long ol kantri long hap bilong Wes. Tasol long planti hap bilong graun, long ol kantri ol i no gat ol strongpela strongpela lo tu, planti manmeri i tokaut strong olsem pasin sodom i no stret.

Planti taim ol man i save tok bilas, na putim hevi, na paitim ol man i mekim pasin sodom na ol man ol i ting ol i mekim pasin sodom. Ol bikman bilong lotu tu i bin mekim olsem. Sampela i kirapim pait bilong ol yet bilong daunim ol man i mekim pasin sodom. Tingim tok wanpela bisop bilong Misin Grik Otodoks i bin mekim long nesenel redio bilong ol Grik. Em i tok: “God bai kukim ol man i mekim pasin sodom long bikpaia inap oltaim oltaim. Singaut i kamap long dotipela maus bilong ol bai stap oltaim oltaim. Skin nogut bilong ol bai pilim bikpela pen nogut tru.” Olsem wanem? Dispela tok em i tru? God i ting olsem wanem long ol man i mekim pasin sodom?

Tingting Bilong God

Baibel i no mekim wanpela tok i makim stret olsem ol Kristen i mas givim baksait long ol man i mekim pasin sodom o ol i mas nolaik tru long ol. Na tu, Baibel i no tok God bai givim strafe olsem kukim ol man i mekim pasin sodom​—⁠o ol narapela man God i wokim​—⁠long bikpaia inap oltaim oltaim.​—⁠Skelim wantaim Rom 6:⁠23.

Tasol Baibel i kamapim ol lo bilong Man i wokim yumi, na planti taim lo bilong em i pait wantaim tingting bilong ol man long nau. Pasin sodom, ol singel i mekim maritpasin, goapim animal, olgeta dispela pasin Baibel i no orait long en. (Kisim Bek 22:19; Efesus 5:​3-5) God i bin bagarapim taun Sodom na Gomora, long wanem, ol i mekim ol kain pasin sem olsem.​—⁠Stat 13:13; 18:20; 19:​4, 5, 24, 25.

Taim Baibel i stori long pasin sodom, em i tok klia: “Dispela pasin i nogut tru.” (Wok Pris 18:22) Lo God i givim long lain Israel i tok: “Sapos wanpela man i goapim narapela man, tupela i mekim bikpela rong tru. Olsem na yupela i mas kilim tupela i dai.” (Wok Pris 20:13) Lo i makim wankain strafe long ol man i goapim animal, mekim maritpasin wantaim wanblut, o pasin pamuk.​—⁠Wok Pris 20:​10-12, 14-17.

Spirit holi i kirapim aposel Pol long tokaut olsem pasin sodom i “dotipela pasin nogut” na “pasin i no stret.” Em i tok: “Olsem na God i lusim ol i stap long ol dotipela pasin nogut bilong ol yet. Ol meri bilong ol ol i lusim stretpela pasin bilong marit, na ol i bihainim pasin i no stret. Na ol man tu ol i lusim stretpela pasin bilong marit, na bel bilong ol i kirap olsem paia, na ol i mekim pasin nogut wantaim ol arapela man. Ol man i mekim ol dispela pasin i gat sem, olsem na ol yet i kisim pe nogut inap long bekim dispela pasin nogut bilong ol. Ol i no tingting long i stap aninit long God, olsem na God i larim ol i bihainim tingting nogut bilong ol yet. Na ol i mekim ol kain kain pasin i no stret.”​—⁠Rom 1:​26-28.

Baibel i no tok orait liklik long pasin sem, nogat; pasin sodom, pasin pamuk, ol singel i mekim maritpasin, olgeta dispela pasin i nogut tru long ai bilong God. Olsem na ol trupela Kristen i no ken daunim tok bilong Baibel long ol “dotipela pasin nogut,” bambai ol man i ken amamas na orait long ol. Na ol i no wanbel wantaim sampela lain i tok, pasin sodom em i gutpela samting.

Nolaik Tru Long Pasin Nogut

Baibel i tok: “Bikpela i laikim tru ol manmeri i no save laikim pasin nogut.” (Song 97:10) Olsem na ol Kristen i mas nolaik tru long olgeta pasin i brukim lo bilong Jehova. Sampela i ting pasin sodom em i nogut tru na i nogut moa long ol narapela pasin pamuk, ol i ting pasin sodom em i narakain pasin sem nogut tru. Tasol olsem wanem? Ol Kristen i mas mekim pasin birua long ol man i mekim pasin sodom?

Man bilong raitim Song i kamapim sampela tingting long dispela samting long Song 139:​21, 22. Em i tok: “Bikpela, mi no laikim tru ol man i no laikim yu. Na mi bel nogut tru long ol man i save bikhet long yu. Tru tumas, mi no laikim tru ol dispela man. Mi lukim ol i olsem ol birua bilong mi yet.” Pasin bilong yumi long stap gut long Jehova na long ol lo bilong em i mas kirapim yumi long nolaik tru long ol man i gat laik long bikhet long Jehova na ol i kamap birua bilong God. Satan na ol spirit nogut ol i birua olsem long God. Sampela manmeri tu i birua olsem long God. Tasol ating em i hatwok long Kristen long luksave long kain man olsem. Yumi no inap skelim bel bilong narapela man. (Jeremaia 17:​9, 10) I no stret long ting wanpela man o meri em i birua bilong God na em i no inap senis, long wanem, em i mekim pasin nogut. Planti man i mekim pasin nogut, long wanem, ol i no save long lo bilong God.

Olsem na ol Kristen i no kirap kwik long birua long ol narapela man. Maski ol i nolaik tru long pasin bilong sampela man, ol i no painim rot long bagarapim ol, na tu ol i no tingting nogut long ol. Nogat. Baibel i tokim ol Kristen long “stap wanbel wantaim olgeta man.”​—⁠Rom 12:​9, 17-19.

“God i Save Mekim Wankain Pasin Long Olgeta Manmeri”

Sapos man i tanim bel tru, Jehova bai lusim tingting long rong bilong em, maski em i bin mekim pasin pamuk o pasin sodom. I no gat wanpela samting i makim olsem Jehova i ting wanpela kain pasin pamuk i nogut moa long narapela. “God i save mekim wankain pasin long olgeta manmeri.” (Aposel 10:​34, 35) Tingim kongrigesen bilong Korin long bipo. Aposel Pol i tokim ol: “Ol man i save mekim pasin pamuk, na ol man i save lotu long ol giaman god, na ol man i trabel long ol maritmeri, na ol man i save mekim ol kain kain pasin i gat sem wantaim ol arapela man, na ol stilman, na ol man i save mangal . . . , na ol man i save spak, na ol man i save tok bilas long ol arapela man, na ol man i save pulim samting bilong ol arapela man, olgeta dispela kain man bai i no inap i go insait long kingdom bilong God.” Na bihain Pol i tok, sampela man bipo ol i bin mekim pasin pamuk, pasin sodom, na ol i stilman, ol i bin kam insait long kongrigesen Kristen long Korin. Em i tok: “Na bipo sampela bilong yupela i stap kain man olsem. Tasol God i wasim yupela pinis . . . Yupela i kisim nem stretpela man pinis. Na long nem bilong Bikpela Jisas Krais na long strong bilong Spirit bilong God yet, God i mekim yupela i kamap stretpela manmeri.”​—⁠1 Korin 6:​9-11.

Tru, Jehova i no orait long man i save mekim pasin i brukim lo bilong em. Em i nolaik tru long pasin bilong bikhet long ol lo bilong em. Tasol em i opim rot long ol man i ken kamap wanbel gen wantaim em. (Song 86:5; Aisaia 55:⁠7) Olsem na ol Kristen i no birua na tok bilas na putim hevi long ol man i mekim pasin sodom, na ol narapela man. Ol Kristen tru i ting ol man inap kamap disaipel bilong Krais, olsem na ol i mekim gutpela na stretpela pasin long ol. Baibel i tok: “Kain prea olsem em i gutpela long ai bilong God, em Man bilong kisim bek yumi . . . Em i laik kisim bek olgeta manmeri, bai ol i ken save long as bilong tok tru.”​—⁠1 Timoti 2:​3, 4.

Ol Kristen i Amamas Long Ol Man i Tanim Bel

Planti taim Baibel i tok God i save lusim tingting long rong bilong man. Em i tok, God i save lusim sin bilong ol man na laikim ol na mekim gut long ol, em i no save belhat kwik na marimari moa yet. (Nehemia 9:17; Esekiel 33:11; 2 Pita 3:⁠9) Na Baibel i tok, God i olsem dispela papa long tok piksa bilong Jisas long pikinini i bin lusim papa na go long wanpela longwe ples, na pinisim olgeta mani papa i givim long em long ol pamukmeri. Papa i wetim em i stap na em i amamas tru taim pikinini man i kisim gutpela tingting na tanim bel, na em i kam bek long famili bilong em.​—⁠Luk 15:​11-24.

Yes, ol man i mekim pasin nogut ol inap senis. Baibel i kamapim dispela taim em i kirapim ol man long lusim pasin bilong olpela bel na kamap nupela man na ‘tingting bilong ol i mas kamap nupela.’ (Efesus 4:​22-24) Ol man i mekim pasin nogut, na ol man i mekim pasin sodom tu, ol inap long senisim tru tingting na pasin bilong ol, na planti man i bin mekim kain senis olsem.a Jisas yet i autim tok long kain man olsem; na taim ol i tanim bel, Jisas i orait long ol.​—⁠Matyu 21:​31, 32.

Ol Kristen i amamas long ol man bilong kain kain sindaun taim ol i tanim bel. Taim ol i lusim ol pasin nogut, maski em i wanem kain pasin nogut, olgeta i ken amamas long pasin bilong God long lusim sin, long wanem, “em i save mekim gutpela pasin long olgeta manmeri na em i save marimari long olgeta samting em i bin wokim.”​—⁠Song 145:⁠9.

Ol Kristen i redi long strongim ol narapela long ol samting bilong spirit, maski ol i save hatwok yet long lusim pasin sodom. Dispela i stret wantaim pasin sori bilong God yet, olsem Baibel i tok: “Tasol yumi stap yet olsem ol manmeri bilong mekim sin, na Krais i dai bilong helpim yumi. Long dispela pasin God i bin soim yumi olsem, em i laikim yumi moa yet.”​—⁠Rom 5:⁠8.

[Futnot]

[Rait long pes 25]

Ol Kristen i no save daunim strong bilong ol tok bilong Baibel long pasin sodom

[Piksa Kredit Lain long pes 24]

Punch