Nambawan Bikpela Samting Long i Stap Bilong Yu Em Wanem Samting?

“Soim rot long mi na mi ken bihainim.”​—⁠SONG 143:⁠8.

YU SAVE pinis, long i stap bilong yumi i gat planti wok yumi mas mekim na i gat planti samting yumi save tingim. Taim yu skelim ol dispela samting yu inap save, sampela wok yumi mekim na sampela samting yumi tingim, ol i bikpela samting. Tasol sampela wok na sampela samting yumi save tingim, ol i no bikpela samting tumas o ol i samting nating tasol. Yu save pinis long dispela, olsem na ating yu wanbel long tok bilong wanpela man i gat gutpela tingting na save, winim planti ol narapela man, em King Solomon. Em i tingting gut long ol wok samting em i bin mekim long i stap bilong em, na nau em i tok: “Namba wan samting long laip bilong yumi man i olsem. Yumi mas aninit [olsem pret] long God tasol na bihainim ol lo bilong em.” (Saveman 2:​4-9, 11; 12:13) Dispela i mas givim wanem tingting long yumi ol man bilong nau?

² Orait sapos yu laik “aninit long God tasol na bihainim ol lo bilong em,” yu mas givim wanpela bikpela askim long yu yet olsem: ‘Wanem samting i bikpela samting tru long i stap bilong mi?’ Tru, ating yu no inap tingim dispela askim long olgeta wan wan de, tasol i gutpela sapos nau yu ken tingim, a? Na ating dispela bai kirapim yu long tingim sampela askim moa, olsem: ‘Ating mi save tingting tumas long wok mani bilong mi o long ol samting bilong skin? Haus, na famili, na ol manmeri mi save laikim tumas ol, ol i bikpela samting olsem wanem long mi?’ Na ol yangpela i ken askim olsem: ‘Skul i save pulim bikpela hap tingting na taim bilong mi o olsem wanem? Wanpela wok mi save amamas long mekim, o spot, o sampela kain amamas o nupela save bilong mekim ol wok, ol dispela samting i olsem nambawan bikpela samting long tingting bilong mi?’ Na maski yumi gat hamas krismas o yumi gat wanem kain sindaun, i stret yumi mas askim yumi yet olsem: ‘Mi save putim wok bilong God i stap olsem namba wan samting long i stap bilong mi?’ Ating bai yu wanbel long tok olsem, yumi mas tingim wanem wok i bikpela samting tru na wanem wok i no bikpela samting tumas. Tasol olsem wanem yumi inap kisim helpim bilong skelim gut wanem wok i bikpela samting tru, na yumi ken kisim we dispela helpim?

³ Samting em i nambawan bikpela samting, yumi mas putim i go pas long olgeta narapela samting, o yumi mas tingim dispela samting pastaim. Maski yu wanpela Witnes Bilong Jehova o yu wanpela bilong ol planti milion manmeri i gat gutpela bel na i save bung wantaim ol na stadi long tok bilong Baibel, yu mas tingim wanpela tok i tru olsem: “Olgeta samting i kamap long dispela graun, i save kamap long taim bilong em yet.” (Saveman 3:⁠1) Yes, i gat taim bilong mekim olgeta samting, na wanpela bilong ol dispela samting, em yu mas mekim pasin sori na tingim ol samting bilong famili bilong yu, na i stret yu mekim olsem. (Kolosi 3:​18-​21) Olsem na yu save mekim wok mani bilong lukautim famili long ol samting bilong skin. (2 Tesalonaika 3:​10-​12; 1 Timoti 5:⁠8) Na bilong kisim liklik malolo long dispela wok, ating yu save mekim wanpela wok yu amamas long mekim, o wan wan taim yu mekim sampela samting bilong kisim amamas o malolo. (Skelim wantaim Mak 6:​31.) Tasol taim yu tingim gut ol dispela samting, ating yu save olsem ol i no nambawan bikpela samting long i stap bilong yumi, a? I gat wanpela samting i bikpela samting moa yet.

⁴ Ating yu save pinis, ol lo bilong Baibel bilong stiaim yumi ol i gutpela samting tru bilong helpim yumi long skelim wanem ol samting i bikpela samting tru, na bihainim gutpela tingting na save taim yumi tingim ol samting yumi mas mekim. Olsem: Long Filipai 1:​9, 10 (NW), aposel Pol i laik kirapim ol Kristen na bai “stretpela save na gutpela tingting em i ken pulap moa yet long [ol].” Dispela bai mekim wanem long ol? Pol i tok moa olsem: “Olsem bai yupela inap long skelim gut wanem ol samting i bikpela samting tru.” Dispela tok i stret tru, a? Sapos Kristen i gat gutpela tingting, orait stretpela save inap helpim em long skelim gut wanem samting i mas i stap olsem nambawan bikpela samting long i stap bilong em.

Man i Stap Gutpela Piksa

⁵ Yumi inap kisim wanpela gutpela save tru long tok bilong Pol, em i tok: “God i singautim yupela pinis bilong bihainim dispela kain pasin, long wanem, Krais tu i bin karim pen bilong helpim yupela. Em i soim yupela pinis dispela pasin bilong em, bai yupela i ken bihainim.” (1 Pita 2:​21) Yes, sapos yumi laik save wanem samting em i nambawan bikpela samting, yumi ken skelim tingting bilong Jisas long dispela. Song 40:8 i tok profet long em olsem: “God bilong mi, mi laikim tumas long bihainim laik bilong yu. Lo bilong yu i stap insait long bel bilong mi.” Na Jisas i kamapim wankain tingting tu taim em i tok: “God i bin salim mi na mi kam, na kaikai bilong mi, em long bihainim laik bilong em na long pinisim wok em i bin givim mi.”​—⁠Jon 4:​34; Hibru 12:⁠2.

⁶ Em nau, nambawan bikpela samting long Jisas, em bilong mekim laik bilong God. Dispela pasin bilong Jisas i kamapim klia wanem samting i mas i stap olsem nambawan bikpela samting long ol disaipel bilong em, long wanem, em i bin tok, “Taim [sumatin] i skul gut pinis, orait em bai i kamap wankain olsem tisa bilong en.” (Luk 6:​40) Na taim Jisas i wokabaut long rot Papa bilong em i makim bilong em, em i soim olsem i gat “amamas moa yet” long putim laik bilong God i stap olsem nambawan bikpela samting. (Song 16:11; Aposel 2:​28) Yu pilim dispela tok? Em olsem: Sapos ol disaipel bilong Jisas i tingim wok bilong God i olsem nambawan bikpela samting long i stap bilong ol, bai ol i “amamas moa yet,” na bai ol i amamas long dispela laip em i laip tru. (1 Timoti 6:19) Olsem na i gat planti as na yumi mas putim wok bilong God i go pas long ol narapela wok bilong yumi.

⁷ Taim Jisas i kisim baptais pinis bilong makim olsem em i givim em yet bilong mekim wok bilong God, kwiktaim Satan i wok long painim rot bilong pulim em na bai em i lusim God. Satan i mekim olsem wanem? Em i traim Jisas long 3-pela samting. Long olgeta wan wan traim, Jisas i kamapim tok i stap long Buk Bilong God bilong bekim tok long Satan. (Matyu 4:​1-​10) Tasol i gat sampela hevi moa bai painim em​—⁠ol man bai mekim nogut long em, na tok bilas long em, na Judas bai kamapim em long ol birua, na ol bai sutim tok giaman long em long kot, na bihain ol bai pasim em long wanpela pos na kilim em i dai. Tasol maski ol dispela hevi i painim em, dispela gutpela Pikinini bilong God i no lusim rot em i bihainim. Taim wanpela bikpela hevi tru i laik painim Jisas, em i beten olsem: “Yu no ken bihainim laik bilong mi. Nogat. Yu mas bihainim laik bilong yu tasol.” (Matyu 26:​39, 42) Bel bilong yumi olgeta wan wan i mas pilim tru dispela pasin bilong Jisas long givim bel long God, na dispela i mas kirapim yumi long “beten long olgeta taim.”​—⁠Rom 12:⁠12.

⁸ Tru tumas, taim yumi skelim gut wanem samting i mas i stap olsem bikpela samting long i stap bilong yumi, God i mas soim rot long yumi, na yumi mas kisim moa yet dispela helpim taim ol birua bilong tok i tru na ol man i birua long laik bilong God ol i mekim nogut long yumi. Yumi mas tingim beten bilong gutpela King Devit, em i askim God long soim rot long em taim ol birua i laik bagarapim em. Bai yumi pilim gut dispela samting taim yumi skelim sampela tok bilong Song 143. Dispela bai helpim yumi long save, olsem wanem yumi ken pas gut moa yet wantaim Jehova na kisim strong bilong putim wok bilong God i go pas long ol narapela wok bilong yumi.

Jehova i Save Harim Ol Beten Bilong Yumi

⁹ Maski Devit i sinman bilong graun tasol, em i bilip olsem Jehova bai putim yau long beten bilong em. Long pasin daun em i krai long Jehova olsem: “Bikpela, mi laik bai yu harim prea bilong mi. Putim yau long krai bilong mi. Yu stretpela na yu save tok tru oltaim, plis, harim beten bilong mi. Yu no ken skelim mi, wokman bilong yu, long kot bilong yu. Long wanem, i no gat wanpela man i no gat asua na i stap stret long ai bilong yu.” (Song 143:​1, 2) Devit i save em i gat sin, tasol em i givim bel olgeta long God. Olsem na em i bilip tru olsem, long stretpela pasin God bai harim beten bilong em. Dispela i save strongim bel bilong yumi, a? Maski yumi no winim mak bilong stretpela pasin bilong God, yumi ken bilip olsem em bai harim beten bilong yumi sapos yumi givim bel olgeta long em. (Saveman 7:​20; 1 Jon 5:​14) Tru, yumi mas wok strong long mekim beten, tasol yumi mas tingting strong tu long ‘mekim gutpela pasin na bai yumi daunim pasin nogut’ nau long dispela taim nogut yumi stap long en.​—⁠Rom 12:​20, 21; Jems 4:⁠7.

¹⁰ Devit i gat ol birua, na yumi tu i wankain. Sampela taim Devit i tingting planti, olsem long taim Sol i raunim em na em i mas ranawe i go hait long ol ples nogut i no gat man, o taim em i stap king na ol birua i laik mekim nogut long em. Em i stori long samting dispela i mekim long em na em i tok: “Birua bilong mi em i ranim mi . . . Em i kalabusim mi long ples tudak . . . na tingting bilong mi i bagarap, na bel bilong mi i hevi moa yet.” (Song 143:​3, 4) Olsem wanem? Sampela taim yu bin stap bel hevi olsem?

¹¹ Ol hevi olsem ol birua i mekim nogut long ol, o sot tru long mani, o bikpela sik, o ol narapela kain hevi, dispela i bin mekim na sampela long lain bilong God i pilim olsem ol i no inap karim moa ol dispela hevi. Na sampela taim bel bilong ol i bagarap stret. I olsem ol wan wan i bin krai long God olsem: “Yu bin salim olkain hevi i kam long mi. Tasol mi save, bai yu strongim mi gen. . . . Bai yu mekim bel bilong mi i isi gen.” (Song 71:​20, 21) God i bin helpim ol olsem wanem?

Taim Ol Birua i Laik Daunim Yumi

¹² Song 143:5 i makim samting Devit i bin mekim taim ol birua i laik bagarapim em na taim ol bikpela hevi tru i painim em. Em i tok: “Nau mi tingting gen long ol samting i bin kamap bipo. Na mi tingting long ol samting yu bin mekim na long ol gutpela wok bilong yu.” Devit i tingting gen long ol samting Jehova i bin mekim long ol wokman bilong Em na olsem wanem Jehova i bin kisim bek em yet long han bilong ol birua. Em i wok long tingim ol samting Jehova i bin mekim bilong litimapim bikpela nem bilong Em. Yes, oltaim Devit i wok long tingim ol gutpela wok bilong God.

¹³ Planti taim yumi yet i bin tingim gen ol samting Jehova i bin mekim long lain bilong em, a? Tru tumas, yumi bin mekim olsem! Na yumi bin tingting tu long gutpela wok bilong ‘ol dispela manmeri bilong bipo ol i raunim yumi i stap olsem bikpela klaut,’ em ol lain i bin stap olsem witnes paslain long taim bilong ol Kristen. (Hibru 11:​32-​38; 12:⁠1) Na ol Kristen bilong pastaim em God i bin makim long spirit holi, Pol i laik kirapim ol tu long “tingim gen dispela taim bipo” na ol bikpela hevi ol i bin karim. (Hibru 10:​32-​34) Na olsem wanem long ol samting i bin painim ol wokman bilong God nau long taim bilong yumi, em stori bilong sampela i stap long buk Jehovah’s Witnesses​​—⁠Proclaimers of God’s Kingdom?a Stori bilong ol i stap long dispela buk na sampela buk moa i helpim yumi long tingim gen ol samting Jehova i bin mekim bilong helpim lain bilong em long karim hevi na sanap strong long taim ol gavman i bin tambuim wok bilong ol, na kalabusim ol, na ol man i bung na mekim nogut long ol, na ol i kalabus long ol bikpela banis kalabus na ol i mas mekim wok olsem lain kalabus. Na sampela ol i bin karim bikpela hevi long ol kantri i gat bikpela pait i bin kamap long en, olsem Barundi, Laibiria, Ruanda, na kantri bipo ol i bin kolim Yugoslavia. Taim ol man i kirap mekim pasin birua long ol wokman bilong God, ol i sanap strong na karim ol dispela hevi, long wanem, ol i pas gut wantaim Jehova. Em i bin strongim ol man i putim wok bilong em i stap olsem nambawan bikpela samting long i stap bilong ol.

¹⁴ Tasol ating bai yu tok ol birua i no bin mekim nogut long yu olsem, na yu ting kain hevi olsem i no inap painim yu. Tasol God i no bin helpim lain bilong em long taim bilong ol bikpela hevi tasol, olsem ol birua i laik bagarapim ol o kain samting olsem, nogat. Em i bin helpim planti manmeri long karim ol hevi i save painim yumi olgeta man. I gat planti stori olsem, na nau yumi ken tingim wanpela: Wastaua bilong Disemba 1, 1996 i bin kamapim stori bilong Penelope Makris. Em i stap olsem gutpela piksa tru bilong ol Kristen long pasin bilong holimpas bilip! Yu inap tingim ol bikpela hevi em i bin kisim long ol manmeri i sindaun long hap bilong em, na ol bikpela sik nogut i bin painim em, na em i mas taitim bun tru bilong mekim yet wok bilong autim tok long olgeta de? Na olsem wanem long wanpela gutpela samting tru i bin painim em long Mitilini taim em i mekim dispela wok? Bikpela samting i olsem: Yu save tingim ol kain stori olsem em i samting bilong helpim yumi olgeta long putim wok bilong God i go pas long olgeta narapela samting long i stap bilong yumi?

¹⁵ Taim yumi tingim long bel ol gutpela wok bilong Jehova, olsem Devit i bin mekim, dispela i save strongim yumi. Bilong kamapim laik bilong em, Jehova i bin stretim rot bilong kisim bek ol man long rot bilong i dai bilong Pikinini bilong em, na kirap bek bilong em, na em i go antap long heven na kisim biknem. (1 Timoti 3:​16) Jehova i kamapim pinis Kingdom bilong em long heven, na em i rausim pinis Satan wantaim ol ensel nogut bilong em long heven, na em i kamapim bek lotu i tru hia long graun. (KTH 12:​7-​12) Em i kamapim wanpela paradais bilong spirit na em i bin mekim gut long lain bilong em na ol i kamap planti. (Aisaia 35:​1-​10; 60:22) Long nau lain bilong em i mekim laspela wok bilong autim tok paslain long taim bikpela hevi tru i kirap. (KTH 14:​6, 7) Tru tumas, i gat planti samting yumi inap tingim.

¹⁶ Sapos oltaim yumi tingim ol wok bilong God na yumi no tingting oltaim long ol wok bilong ol man, dispela bai helpim yumi long pilim tru olsem strong bilong Jehova em i save mekim wok long en, i no gat wanpela samting inap long sakim. Tasol ol gutpela samting God i bin wokim long ples antap na long graun em yumi inap lukim, i no ol dispela wok tasol God i bin mekim. (Jop 37:14; Song 19:1; 104:24) Sampela gutpela wok moa em i bin mekim, em i bin kisim bek lain bilong em long han bilong ol birua i bin mekim nogut long ol, olsem yumi lukim pinis long stori bilong ol samting i bin painim lain manmeri em i bin makim bilong em yet long bipo tru.​—⁠Kisim Bek 14:31; 15:⁠6.

Save Long Rot Yumi Mas Bihainim

¹⁷ Devit i beten askim God long helpim em, nogut strong bilong em i pinis olgeta: “Mi save beten long yu na spirit bilong mi i laikim yu tru olsem nek bilong man i drai na em i laikim tumas long dring wara. Bikpela, yu ken harim prea bilong mi nau, long wanem, bilip bilong mi i bagarap. Yu no ken hait long mi, nogut mi dai na mi go long ples bilong ol man i dai pinis.” (Song 143:​6, 7) Devit em i wanpela sinman, na em i save God i lukim ol hevi bilong em. (Song 31:⁠7) Ating sampela taim yumi tu i pilim olsem yumi no strong moa long ol samting bilong spirit. Tasol i no olsem yumi lus na yumi no gat rot moa, nogat. Jehova i save harim ol beten bilong yumi, na em bai givim nupela strong long yumi long rot bilong ol elda i gat pasin sori, o ol tok bilong Wastaua, o sampela tok i kamap long miting na i olsem ol dispela tok i bilong helpim yumi yet, na dispela inap strongim bek yumi hariap.​—⁠Aisaia 32:​1, 2.

¹⁸ Yumi bilip long Jehova na dispela i kirapim yumi long beten long em olsem: “Mi save bilip long yu, olsem na . . . yu ken mekim mi i tingting gen long bikpela sori bilong yu. Mi save prea long yu tasol. Olsem na yu soim rot long mi na mi ken bihainim.” (Song 143:⁠8) Yu ting Jehova i bin lusim Sista Makris, em i stap long wanpela liklik ailan Grik longwe long kongrigesen? Nogat, a? Olsem na yu ting em bai lusim yu taim yu putim wok bilong em i stap olsem nambawan bikpela samting long i stap bilong yu? Satan wantaim lain bilong em ol i laik pasim wok bilong yumi long autim tok bilong Kingdom bilong God. Maski yumi mekim wok bilong God long ol kantri ol i larim yumi i mekim lotu i tru, o yumi mekim long ol kantri i gat tambu long dispela wok, ol beten yumi mekim i stret wantaim beten bilong Devit: “Bikpela, mi go long yu bilong yu lukautim mi. Yu ken kisim bek mi long han bilong ol birua bilong mi.” (Song 143:⁠9) Bilong abrusim bagarap long ol samting bilong spirit, yumi mas i stap long ples hait bilong God Antap Tru bambai em i ken lukautim yumi.​—⁠Song 91:⁠1.

¹⁹ Bilip bilong yumi long wanem samting em i nambawan bikpela samting, em i gat as tru bilong en. (Rom 12:​1, 2) Olsem na yu mas sakim ol samting ol man bilong dispela graun i mekim bilong subim yu long bihainim tingting bilong ol yet long wanem samting i bikpela samting long ol man. Wok yet bambai olgeta samting yu mekim i kamapim long ples klia olsem wok bilong God em i nambawan samting long i stap bilong yu.​—⁠Matyu 6:​10; 7:​21.

²⁰ Namba wan i go inap namba 9 ves bilong Song 143 i kamapim klia olsem Devit i pas gut wantaim Jehova. Taim ol birua i banisim em, em i beten askim God long soim rot long em. Em i kamapim bel bilong em long God na em i laik bai God i soim em long stretpela rot em i mas bihainim. Na i wankain tu long liklik hap lain i stap yet long graun em God i bin makim ol long spirit holi na ol poroman bilong ol. Ol i ting em i gutpela samting tru long ol inap pas gut wantaim Jehova na ol i beten askim em long soim rot long ol. Ol i putim wok bilong God i go pas long olgeta narapela samting, maski Satan wantaim ol lain bilong dispela graun i wok long putim hevi long ol.

²¹ Planti milion manmeri em ol i stadi long Baibel wantaim ol Witnes Bilong Jehova ol i mas save, wok bilong God em i nambawan bikpela wok bilong mekim. Yumi ken helpim ol long pilim dispela samting taim yumi stadi wantaim ol long sapta 13 bilong buk Save i Bringim Man Long Laip Oltaim, em i toktok long ol lo yumi mas bihainim bilong mekim ol samting Baibel i tok yumi mas mekim.b Tasol ol yet i mas lukim olsem ol samting yumi skulim ol long en, yumi yet i save bihainim. I no longtaim tumas na bai ol tu i save long rot ol i mas bihainim. Taim ol dispela planti milion manmeri yet i pilim wanem samting i mas i stap olsem nambawan bikpela samting long i stap bilong ol, dispela bai kirapim planti bilong ol long dediket long God na kisim baptais. Orait bihain long dispela, kongrigesen inap helpim ol long wokabaut yet long rot bilong laip.

²² Planti ol i tokaut olsem wok bilong God i mas i stap olsem nambawan bikpela samting long laip bilong ol. Tasol olsem wanem Jehova i wok long skulim ol wokman bilong em long mekim wok bilong em? Dispela i save helpim ol olsem wanem? Bai yumi toktok long ol dispela askim long stori i kamap bihain long dispela, na bai yumi toktok tu long wanpela ves i olsem as tok bilong dispela stori, em Song 143:⁠10.

[Ol Futnot]

Wanem Bekim Bilong Yu?

◻ Olsem wanem tok bilong Filipai 1:​9, 10 i helpim yumi long skelim wanem ol samting i bikpela samting?

◻ Olsem wanem Jisas i kamapim klia wanem samting i nambawan bikpela samting long i stap bilong em?

◻ Ol samting Devit i bin mekim taim hevi i painim em, dispela inap skulim yumi long wanem samting?

◻ Olsem wanem Song 143:​1-9 inap helpim yumi long nau?

◻ Wanem samting i mas i stap olsem nambawan bikpela samting long i stap bilong yumi yet?

[Askim Bilong Stadi]

 1. King Solomon i tok wanem long ol wok samting bilong ol man?

 2. Ol manmeri i stap aninit long God ol i mas givim wanem bikpela askim long ol yet? Dispela i kamapim wanem sampela askim moa?

 3. Taim Kristen i tingim wanem ol samting i bikpela samting, em i mas tingim wanem samting tu?

 4. Olsem wanem Filipai 1:​9, 10 i helpim yumi long skelim wanem ol samting i bikpela samting tru?

 5. Taim Baibel i stori long pasin bilong Jisas ol Kristen i mas bihainim, Baibel i tok wanem samting i nambawan bikpela samting long i stap bilong Jisas?

 6. Taim yumi putim wok bilong God i go pas long ol narapela samting long i stap bilong yumi, yumi inap kisim wanem gutpela samting long en olsem Jisas i bin kisim?

7, 8. Wanem ol traim na hevi i bin painim Jisas? Dispela inap skulim yumi long wanem samting?

 9. (a) Tru Devit em i sinman, tasol tok na pasin em i mekim i kamapim klia wanem samting? (b) Bilong wanem yumi no ken les long mekim ol samting i stret?

10. Bilong wanem sampela taim Devit i tingting planti?

11. Wanem ol samting i mekim na ol wokman bilong God long nau tu i tingting planti?

12. Taim birua na hevi i painim King Devit, olsem wanem em inap karim ol dispela hevi?

13. Taim ol hevi i painim yumi, sapos yumi tingim ol gutpela wokman bilong God long bipo na long nau em ol i bin karim hevi, olsem wanem dispela inap helpim yumi long sanap strong?

14. (a) Stori long wanpela sista em God i bin strongim em na ating ol hevi bilong em i wankain olsem ol hevi i painim yumi. (b) Pasin bilong em i skulim yumi long wanem samting?

15. Wanem sampela samting God i bin mekim na yumi mas tingim gut long bel?

16. Yumi mas tingim wanem samting? Dispela bai helpim yumi long pilim wanem samting?

17. Devit i tingim Jehova i stap tru o olsem wanem? Dispela inap strongim bel bilong yumi olsem wanem?

18, 19. (a) Yumi mas beten olsem wanem long Jehova? (b) Yumi inap bilip tru long wanem samting?

20. (a) Yumi bin kisim wanem save long Devit long Song 143:​1-9? (b) Olsem wanem ol Kristen bilong nau i bihainim wankain tingting olsem bilong Devit?

21. Taim yumi skulim ol narapela long wanem samting i mas i stap olsem nambawan bikpela samting long i stap bilong ol, bilong wanem yumi mas i stap olsem gutpela piksa?

22. Long stori i kamap bihain long dispela, bai yumi toktok long wanem ol askim?

[Piksa long pes 10]

Ol samting Devit i mekim i kamapim klia olsem em i bilip long Jehova

[Kredit Lain]

Ol i kisim long Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s