Yumi No Inap Save Olgeta Long Biknem Bilong Jehova
“Bikpela i gat biknem na yumi mas litimapim biknem bilong em moa yet. Em i antap tru na yumi no inap save olgeta long biknem bilong en.”—SONG 145:3.
1, 2. Devit i wanem kain man? Taim em i skelim em yet, em i gat wanem tingting long em yet na long God?
MAN i bin raitim Song 145 em i wanpela man bilong bipo em planti ol i save long em. Taim em i mangi yet, em i bin pait wantaim wanpela traipela man i holim spia samting na kilim em i dai. Na taim em i stap olsem wanpela king bilong mekim pait, dispela man bilong raitim song i bin daunim planti birua. Nem bilong em Devit, na em i namba tu king bilong lain Israel bilong bipo. Bihain long i dai bilong Devit ol man i stori yet long ol samting em i bin mekim, olsem na long nau tu planti milion ol i save long sampela stori bilong em.
2 Maski Devit i bin mekim ol bikpela samting, em i gat pasin daun. Em i mekim singsing long Jehova olsem: “Taim mi lukim skai yu bin wokim, na taim mi lukim mun na olgeta sta yu bin putim i stap antap, mi save ting olsem. Mipela man i wanem samting na yu save tingting long mipela? Mipela i samting nating. Bilong wanem yu save was gut long mipela?” (Song 8:3, 4) Devit i no ting em yet i gat biknem, em i tok Jehova i bin kisim em bek long han bilong ol birua, na em i tok long God olsem: “Bikpela, yu bin kisim bek mi long han bilong ol birua. Yu givim mi hap plang bilong yu na mi hait i stap baksait long en. Yu bin helpim mi na mi gat biknem long ai bilong ol manmeri.” (2 Samuel 22:1, 2, 36) Jehova i mekim pasin daun taim em i marimari long ol sinman, na Devit i tenkyu tru long dispela gutpela pasin bilong God.
‘Mi Tokaut Long Biknem Bilong God na King’
3. (a) Devit i gat wanem tingting long wok king bilong lain Israel? (b) Devit i laik litimapim nem bilong Jehova inap long wanem mak?
3 Maski Devit em i king God i bin makim, em i ting Jehova em i King tru bilong Israel. Devit i tok: “Olgeta samting i stap long heven na graun i bilong yu tasol. Na yu stap bikpela king bilong olgeta samting.” (1 Stori 29:11) Devit i amamas tru long God i stap King! Em i tok: “God na King bilong mi, bai mi tokaut long biknem bilong yu. Na oltaim oltaim bai mi tok tenkyu long yu. Olgeta de bai mi tenkyu long yu. Na oltaim oltaim bai mi litimapim nem bilong yu.” (Song 145:1, 2) Devit i gat laik tru long litimapim nem bilong Jehova long olgeta de na inap oltaim oltaim.
4. Song 145 i kamapim ples klia wanem ol tok giaman?
4 Song 145 i bekim gut tok Satan i sutim olsem God i save tingim em yet tasol na i no larim ol man na ensel i stap fri long mekim ol samting. (Stat 3:1-5) Na tu, dispela song i kamapim ples klia tok giaman bilong Satan olsem ol man i harim tok bilong God bilong kisim ol samting, na i no olsem ol i laikim God na long dispela as ol i harim tok. (Jop 1:9-11; 2:4, 5) Olsem Devit, ol Kristen tru long nau ol i mekim ol samting i givim bekim long ol tok giaman Satan i sutim. Ol i pilim tru ol samting ol i bilip na wet long kisim, em laip oltaim aninit long Kingdom, long wanem, ol i gat laik long litimapim nem bilong Jehova inap oltaim oltaim. Planti milion i bin kirap pinis long bilip long ofa bilong Jisas bilong baim bek ol man, na ol i laikim tru Jehova na dispela i kirapim ol long bihainim tok na mekim wok bilong em olsem ol man i dediket na baptais pinis.—Rom 5:8; 1 Jon 5:3.
5, 6. I gat wanem ol rot bilong litimapim nem bilong Jehova?
5 Yumi ol wokman bilong Jehova i gat planti rot bilong litimapim nem bilong Jehova. Yumi ken mekim olsem long rot bilong beten taim yumi pilim tru sampela tok yumi ritim long Tok bilong em, long Baibel. Yumi inap tok tenkyu na litimapim nem bilong em taim yumi pilim tru pasin God i mekim long lain bilong em o taim yumi amamas long wanpela bilong ol gutpela samting tru em i bin wokim. Yumi litimapim nem bilong God Jehova taim yumi toktok wantaim ol wanbilip long ol samting Jehova i tingting pinis long mekim. Yumi mekim olsem long ol miting Kristen na long ol narapela taim yumi toktok wantaim ol. Olgeta “gutpela pasin” yumi mekim bilong helpim wok bilong Kingdom Bilong God i litimapim nem bilong Jehova.—Matyu 5:16.
6 Sampela gutpela wok em olsem: Lain bilong Jehova i sanapim planti haus bilong lotu long ol kantri we ol man i no gat planti mani. Bikpela hap bilong dispela wok ol i mekim long rot bilong mani ol wanbilip bilong ol long ol narapela kantri i givim. Sampela Kristen i volantia na go long ol dispela kantri bilong insait long wok bilong sanapim ol Haus Kingdom. Na nambawan gutpela wok em pasin bilong litimapim nem bilong Jehova long rot bilong autim gutnius bilong Kingdom. (Matyu 24:14) Olsem ol ves i kamap bihain long Song 145 i soim, Devit i pilim tru wok bos bilong God na i litimapim wok king bilong Em. (Song 145:11, 12) Olsem wanem? Yu tu i save tenkyu long gutpela pasin bilong God long mekim wok bos? Na oltaim yu save tokim ol narapela long Kingdom bilong em?
Ol Samting i Soim Biknem Bilong God
7. I gat wanem bikpela as na yumi mas litimapim nem bilong Jehova?
7 Song 145:3 i kamapim wanpela bikpela as na yumi mas litimapim nem bilong Jehova. Devit i singsing: “Bikpela i gat biknem na yumi mas litimapim biknem bilong em moa yet. Em i antap tru na yumi no inap save olgeta long biknem bilong en.” Biknem bilong Jehova i no gat mak bilong en. Ol man i no inap painim, klia gut, o skelim biknem bilong Em. Tasol nau yumi laik skelim ol samting i soim biknem bilong Jehova na dispela bai helpim yumi.
8. Ples antap i kamapim klia wanem samting bilong biknem na strong bilong Jehova?
8 Tingim taim yu stap long ples, longwe long ol strongpela lait bilong taun, na long nait yu bin lukluk i go antap long skai i no gat klaut. Ating yu kirap nogut long planti planti sta yu inap lukim long blakpela skai. Ating dispela i kirapim yu long litimapim biknem bilong Jehova long em i bin wokim ol sta samting. Tasol ol samting yu lukim em sampela sta tasol bilong dispela bikpela lain sta, o galaksi, em graun bilong yumi i stap insait long en. Na ol i ting i gat winim wan handet bilion galaksi i stap, ol man inap lukim tripela galaksi tasol long ai taim ol i no mekim wok long teleskop. Tru tumas, ol planti planti sta na galaksi i stap long ples antap i soim strong bilong Jehova long wokim ol samting na biknem bilong em, em yumi no inap save olgeta long en.—Aisaia 40:26.
9, 10. (a) Wanem ol samting bilong biknem bilong Jehova i kamap ples klia long Jisas Krais? (b) Kirap bek bilong Jisas i mas mekim wanem long bilip bilong yumi?
9 Tingim ol narapela samting bilong biknem bilong Jehova—em ol samting Jisas Krais i insait long en. Biknem bilong Jehova i kamap ples klia taim em i bin wokim Pikinini bilong em na mekim wok long em olsem “saveman i bosim wok” inap longpela taim tru. (Sindaun 8:22-31) Pasin laikim bilong Jehova i bikpela tru na dispela i kamap ples klia taim em i givim dispela wanpela Pikinini bilong em olsem ofa bilong baim bek ol man. (Matyu 20:28; Jon 3:16; 1 Jon 2:1, 2) Na ol man i no inap klia gut long nambawan gutpela bodi spirit em Jehova i bin wokim bilong Jisas taim em i kirap bek.—1 Pita 3:18.
10 Insait long kirap bek bilong Jisas i gat planti gutpela samting bilong biknem bilong Jehova em yumi no inap save olgeta long en. God i mekim na Jisas inap tingim gen ol wok em i bin mekim bilong kamapim ol samting bilong heven na bilong graun. (Kolosi 1:15, 16) Ol dispela samting em ol ensel, ples antap, graun, na olgeta samting i gat laip na i stap long dispela graun. Jehova i mekim na Pikinini bilong em inap tingim gen ol samting bilong laip long heven na graun em Pikinini i bin lukim paslain long em i kam daun long graun, na tu, Jehova i mekim na Jisas i tingim tu ol samting i bin painim em taim em i stap long graun olsem man i gutpela olgeta. Em nau, biknem bilong Jehova em yumi no inap save olgeta long en, i kamap ples klia long kirap bek bilong Jisas. Na tu, kirap bek bilong Jisas i soim olsem ol narapela tu inap kirap bek. Dispela i mas strongim yumi long bilip olsem God bai kirapim bek planti milion manmeri i dai pinis em ol i stap long tingting bilong Em.—Jon 5:28, 29; Aposel 17:31.
Ol Gutpela Wok na Pasin
11. Wanem bikpela wok bilong Jehova i kirap long Pentikos 33 C.E.?
11 Kirap long taim Jisas i kirap bek pinis, Jehova i bin mekim planti narapela bikpela na gutpela wok. (Song 40:5) Long Pentikos 33 C.E., Jehova i kamapim wanpela nupela lain, “lain Israel tru bilong God,” ol disaipel bilong Krais em God i bin makim ol long holi spirit. (Galesia 6:16) Dispela nupela lain bilong spirit i go bikpela long olgeta hap bilong graun long bipo. Maski bihain long i dai bilong ol aposel bilong Jisas pasin bilong tromoi lotu i tru i kamap na isi isi lain Kristendom i kamap, Jehova i wok long mekim yet ol gutpela wok bilong kamapim ol samting em i tingting pinis long mekim.
12. Baibel i stap long olgeta bikpela tok ples bilong graun, na dispela i kamapim klia wanem samting?
12 Olsem: Jehova i lukautim Baibel na olgeta tok bilong en i stap na bihain ol i tanim tok bilong en long olgeta bikpela tok ples bilong nau. Planti taim ol man i hatwok tru long tanim tok bilong Baibel na lain bilong Satan i laik kilim ol i dai. Tru tumas, ol man i no inap tru long tanim tok bilong Baibel long winim 2,000 tok ples, sapos dispela i no laik bilong bikpela God, Jehova!
13. Kirap long 1914, olsem wanem biknem bilong Jehova i kamap ples klia long ol samting em i tingting pinis long kamapim long rot bilong Kingdom?
13 Biknem bilong Jehova i kamap ples klia long ol samting em i tingting pinis long kamapim long rot bilong Kingdom. Olsem: Long yia 1914, Pikinini bilong em, Jisas Krais, i kamap King long heven. Bihain liklik, Jisas i mekim save long Satan na ol spirit nogut bilong em. Em i rausim ol long heven na ol i stap long graun, na ol i wet long taim ol bai kalabus long hul i no gat as. (KTH 12:9-12; 20:1-3) Kirap long dispela taim, ol man i birua moa yet long ol disaipel bilong Jisas em God i bin makim. Tasol Jehova i bin lukautim ol long dispela taim bilong Krais i kam i stap.—Matyu 24:3; KTH 12:17.
14. Jehova i bin mekim wanem gutpela wok long 1919? Dispela i bin kamapim wanem samting?
14 Long yia 1919, Jehova i mekim narapela gutpela wok i kamapim biknem bilong em. Ol disaipel bilong Jisas em God i bin makim, ol i no mekim moa ol wok bilong spirit, na God i kirapim ol long mekim gen ol wok bilong spirit. (KTH 11:3-11) Kirap long dispela taim, ol Kristen God i bin makim ol i bin givim bel long autim gutnius olsem Kingdom bilong heven i kirap pinis na i stap. Ol i bin bungim ol narapela Kristen God i bin makim bilong inapim dispela namba 144,000. (KTH 14:1-3) Na long rot bilong ol disaipel bilong Krais em God i bin makim, Jehova i kamapim as bilong “nupela graun,” em ol stretpela manmeri. (KTH 21:1) Tasol wanem samting bai painim dispela “nupela graun” bihain long ol Kristen God i bin makim ol i go pinis long heven?
15. Ol Kristen God i bin makim i bin go pas long wanem wok? Wanem samting i bin kamap?
15 Long 1935, Watchtower bilong Ogas 1 na Ogas 15 i gat ol stori i skelim dispela tok “planti manmeri tru,” em Kamapim Tok Hait sapta 7 i stori long en. Ol Kristen God i bin makim, ol i kirap givim bel long painim ol wanbilip bilong olgeta kantri, lain, skin, na tok ples, na bringim ol i kam bung wantaim ol. Dispela bikpela lain bai abrusim bikpela hevi tru, na ol i wet long kisim laip oltaim long Paradais olsem ol lain bilong “nupela graun.” (KTH 7:9-14) Ol Kristen God i bin makim ol i bin go pas long autim tok bilong Kingdom na kamapim ol disaipel, olsem na nau winim 6 milion manmeri i bilip na wet long kisim laip oltaim long wanpela paradais long graun. Husat i mas kisim biknem long dispela lain i go bikpela, maski Satan na ol lain bilong em long graun i birua long ol? (1 Jon 5:19) Jehova tasol inap kamapim dispela samting long rot bilong holi spirit bilong em.—Aisaia 60:22; Sekaraia 4:6.
Glori na Namba Bilong Jehova
16. Bilong wanem ol man i no inap lukim glori bilong Jehova long ai tru?
16 Maski Jehova i bin mekim wanem kain “ol gutpela gutpela wok” na “strongpela wok,” ol man bai i no inap lusim tingting long en. Devit i tok: “God, ol lain manmeri i stap nau bai ol i tokaut long ol arapela lain i kamap bihain long ol samting yu mekim na bai ol i litimapim nem bilong yu. Na bai ol i stori long ol bikpela wok yu bin mekim. Ol man bai i tok long strong [“glori,” NW ] bilong yu, na long yu bikpela king tru. Na mi yet bai mi tingting long ol gutpela gutpela wok bilong yu. Bai ol manmeri i stori long ol strongpela wok yu bin mekim, na bai mi tokaut long yu i gat biknem tru.” (Song 145:4-6) Tasol ating Devit i no inap save olgeta long glori bilong Jehova, long wanem, “God em i Spirit” na ol man i no inap lukim em, a?—Jon 1:18; 4:24.
17, 18. Olsem wanem Devit inap pilim moa yet glori na bikpela namba bilong Jehova?
17 Devit i no inap lukim God, tasol i gat ol rot em i ken pilim moa yet namba bilong Jehova. Olsem: Em inap ritim ol tok bilong Baibel i stori long ol strongpela wok bilong God, olsem em i bagarapim ol man nogut long rot bilong bikpela tait i bin kamap long olgeta hap. Devit i bin kisim save olsem ol god giaman bilong Isip i kisim sem taim God i helpim lain Israel long lusim kalabus bilong Isip. Ol kain samting olsem i kamapim klia namba na biknem bilong Jehova.
18 Ating pasin bilong Devit long pilim tru namba bilong God i go bikpela taim em i ritim tok bilong Baibel, na tu, taim em i skelim ol dispela tok long bel. Olsem: Ating em i bin tingim tingim ol samting i bin kamap taim Jehova i givim Lo long lain Israel. Klaut i pairap, lait i sut i go, i gat bikpela blakpela klaut, na strongpela krai bilong biugel. Maunten Sainai i guria na smok i kamap. Ol Israel i bung long as bilong maunten na namel long paia na klaut ol inap harim “Tenpela Lo” taim Jehova i toktok long ol long rot bilong wanpela ensel. (Lo 4:32-36; 5:22-24; 10:4; Kisim Bek 19:16-20; Aposel 7:38, 53) Dispela em i narakain samting tru i kamapim biknem bilong Jehova! Ol man i laikim tru Tok Bilong God na i skelim long bel ol dispela stori, ol i pilim tru glori na bikpela namba bilong Jehova. Long nau yumi gat Baibel olgeta, na em i gat planti gutpela samting olsem driman i kamapim klia biknem bilong Jehova.—Esekiel 1:26-28; Daniel 7:9, 10; KTH, sapta 4.
19. Wanem samting bai mekim na yumi amamas moa yet long bikpela namba bilong Jehova?
19 Narapela rot bilong helpim Devit long pilim bikpela namba bilong God, em long rot bilong stadi long ol lo God i bin givim long lain Israel. (Lo 17:18-20; Song 19:7-11) Pasin bilong bihainim ol lo bilong Jehova i givim biknem long lain Israel na i mekim na ol i stap narapela kain long olgeta narapela lain man. (Lo 4:6-8) Olsem i bin kamap long Devit, pasin bilong ritim Baibel oltaim, skelim long bel ol tok bilong en, na givim bel long stadi long Baibel bai mekim na yumi amamas moa yet long namba bilong Jehova.
Ol Gutpela Pasin Bilong God i Nambawan Tru!
20, 21. (a) Song 145:7-9 i stori long wanem ol pasin i litimapim biknem bilong Jehova? (b) Ol dispela pasin bilong God em paragraf i stori long en i mekim wanem long ol man i laikim em tru?
20 Olsem yumi bin lukim, Song 145:1-6 i kamapim ol gutpela as na yumi mas litimapim nem bilong Jehova long ol samting i kamapim biknem bilong em, em yumi no inap save olgeta long en. Ves 7 i go 9 i litimapim biknem bilong God taim em i stori long ol gutpela pasin bilong em. Devit i singsing: “Ol bai i stori long ol gutpela pasin bilong yu na ol bai i singim song long marimari [“stretpela pasin,” NW ] bilong yu. Bikpela i save laikim yumi tumas na i save marimari long yumi. Em i no save kros kwiktaim na oltaim em i save sori long yumi. Em i save mekim gutpela pasin long olgeta manmeri na em i save marimari long olgeta samting em i bin wokim.”
21 Pastaim Devit i stori long gutpela pasin na stretpela pasin bilong Jehova—em ol pasin Satan i bin tok Jehova i no bihainim. Ol dispela pasin i mekim wanem samting long ol man i laikim tru God na i daun long wok king bilong em? Jehova i bihainim gutpela na stretpela pasin taim em i bosim ol man na dispela i mekim na lain i lotuim em ol i no inap lusim pasin bilong litimapim nem bilong em. Na tu, Jehova i save mekim gutpela pasin “long olgeta manmeri.” Gutpela sapos dispela bai helpim planti manmeri moa long tanim bel na kamap man i lotuim God tru taim rot i op i stap yet.—Aposel 14:15-17.
22. Jehova i save mekim wanem kain pasin long ol wokman bilong em?
22 Devit i laikim tu ol pasin God yet i kamapim klia taim Em i “go klostu long Moses na i singaut olsem, ‘Mi Bikpela, mi Bikpela. Mi God na mi as bilong marimari na sori. Na mi no save belhat kwik. Mi save laikim tru olgeta manmeri, na mi save bihainim olgeta tok bilong mi.’ ” (Kisim Bek 34:6) Olsem na Devit inap tokaut olsem: “Bikpela i save laikim yumi tumas na i save marimari long yumi. Em i no save kros kwiktaim na oltaim em i save sori long yumi.” Maski Jehova i gat biknem tru, em i save mekim gutpela pasin long ol wokman bilong em na long dispela rot em i givim biknem long ol. Em i save marimari, na long rot bilong ofa bilong Jisas bilong baim bek ol man, em i amamas long lusim rong bilong ol man i tanim bel. Na Jehova i no save belhat kwik, em i opim rot long ol wokman bilong em i ken winim ol pasin kranki em inap pasim ol long go insait long nupela taim i gat stretpela pasin tasol long en.—2 Pita 3:9, 13, 14.
23. Stori i kamap bihain long dispela bai skelim wanem gutpela pasin?
23 Devit i litimapim gutpela pasin sori bilong God. Ol narapela ves bilong Song 145 i soim olsem wanem Jehova i kamapim dispela pasin, na ol wokman i stap gut long em ol i mekim wanem taim Jehova i mekim gutpela pasin sori long ol. Stori i kamap bihain long dispela bai skelim ol dispela samting.
Bai Yu Bekim Olsem Wanem?
• I gat wanem ol rot bilong litimapim nem bilong Jehova long “olgeta de”?
• Wanem ol samting i soim olsem Jehova i gat biknem em yumi no inap save olgeta long en?
• Yumi ken mekim wanem bilong amamas moa yet long bikpela namba bilong Jehova?
[Piksa long pes 10]
Ol galaksi i kamapim klia biknem bilong Jehova
[Kredit Lain]
Courtesy of Anglo-Australian Observatory, photograph by David Malin
[Piksa long pes 12]
Olsem wanem biknem bilong Jehova i kamap klia long Jisas Krais?
[Piksa long pes 13]
Taim lain Israel i kisim Lo long maunten Sainai, ol inap lukim glori na bikpela namba bilong Jehova