Bilip Long Jehova
“Yu mas bilip long [Jehova] . . . , na bihainim pasin bilong em. Sapos yu mekim olsem, bai em i givim biknem long yu, na yu ken holim dispela graun em i givim yu. Na bambai yu lukim em i bagarapim ol man nogut.”−SAM 37:34.
1, 2. Olsem wanem long ol man long nau? Olsem wanem Yunaitet Nesen i insait long dispela?
Ol MAN bilong nau i kisim pinis bikpela save, winim olgeta taim bipo. Ol i wok strong long kisim save na nau ol inap wokim ol samting long nuklia. Long rot bilong nuklia ol i gat strong bilong kirapim planti ensin na masin samting, na rot i op bilong ol i mekim bikpela wok bilong helpim ol man long olgeta hap. Tasol rot i op tu bilong ol i bagarapim olgeta man.
2 Wanem samting i pasim rot bilong ol na ol i no kirap bagarapim ol yet long pait nuklia? Sampela man i ting Yunaitet Nesen i pasim ol, long wanem 159 kantri i gat kain kain gavman ol i insait long en. Tasol ol dispela kain kain gavman i no i stap wanbel; olgeta wan wan i ting olsem wok gavman bilong ol yet i gutpela na i winim bilong ol narapela. Ol lain bilong Yunaitet Nesen ol i bruk bruk. Ol i hambak long kantri bilong ol yet na litimapim ples bilong ol yet na ol i no laik bai narapela lain i bosim ol. Na planti lain insait long Yunaitet Nesen ol i givim baksait long God na ol i tok i no gat God.
3 Tasol sampela lain ol i kolim yet olsem Kristen, long wanem ol i no laik givim baksait long God na ol i bilip long Krais Jisas. Ol i bilip long God Triwan. Ol i tok i gat tripela man i stap ol i olsem wanpela God tasol, em “God Papa” na Krais Jisas na spirit holi. Ol i tok tripela wantaim i gat wankain biknem, na narapela i no antap o aninit long narapela. Tasol Papa bilong Jisas i kirapim profet Aisaia long raitim tok olsem: “Mi Jehova. Em nem bilong mi; na mi no ken givim biknem bilong mi long narapela man, na mi no ken larim ol god giaman i kisim biknem bilong mi.” (Aisaia 42:8, NW) Dispela God Jehova o Yawe em i bin mekim planti bikpela wok.
4 Yunaitet Nesen i no bin litimapim nem bilong God o kolim dispela nem. Long nau bikpela bagarap i laik painim ol man, winim olgeta taim bipo, tasol Yunaitet Nesen i no kirapim ol man long bilip na wetim God Jehova i helpim ol. Tasol dispela God em i “as bilong bilip bilong yumi,” long wanem em yet i wokim rot bilong kamapim dispela wanpela samting tasol yumi ken bilip long en na wetim i kamap tru. (Rom 15:13) Dispela bilip God i as bilong en, em i bin strongim bel bilong planti man na meri.
Long Pastaim Tru Bilip i Kamap!
5 Pastaim tru, taim ol man i kamap nupela long graun, God i mekim wanpela tok promis i as bilong ol samting ol i ken bilip na wet long en. Paslain liklik long taim God i rausim namba wan tumbuna papamama bilong yumi, Adam na Iv, long Gaden Iden, God i mekim dispela tok promis. Stori bilong dispela gaden, o Paradais, em ol i bin raitim pastaim long tok Hibru, em i no wanpela stori nating. Nogat. Em i stori bilong wanpela man na meri tupela i bin i stap tru long bipo na tupela i bin lusim Man bilong wokim ol.−Jenesis 2:7-3:24.
6 Winim 4,000 yia bihain, spirit bilong God i kirapim aposel Kristen Pol long raitim tok olsem: “Wanpela man i bin mekim sin, na long dispela pasin sin i kamap long graun. Na sin i bringim dai i kam. Olsem na dai i kisim olgeta man. Long wanem olgeta man i bin mekim sin.” (Rom 5:12) Long narapela pas tu, Pol i makim ‘dispela wanpela man i gat asua.’ Pol i tok: “Olgeta man bilong lain bilong Adam ol i save dai. Na olsem tasol olgeta man bilong lain bilong Krais bai ol i kisim laip.” (1 Korin 15:22) Wanpela dokta, nem bilong em Luk, em i raitim Gutnius bilong Krais, na long sapta 3 em i stori long ol tumbuna bilong Jisas i go inap long pastaim tru, inap long Adam. Taim Adam i stap yet long Iden, em i harim dispela tok promis Jehova i mekim, em i as bilong ol samting yumi bilip na wet long en.−Luk 3:23-38.
7 Orait, ating yu laik save long dispela tok promis God i bin mekim. Tasol pastaim yu mas save olsem: Kirap long bipo yet God Jehova em i Man bilong givim gutpela tok long yumi bambai yumi ken bilip na wetim gutpela samting i kamap. Taim God i wokim Adam, Adam i stap pikinini bilong God long graun. Na God i larim em i kamapim ol pikinini. Sapos yu wanpela papa na yu save sampela samting nogut bai painim ol pikinini bilong yu, yu laik givim sampela gutpela tok long ol bambai ol i ken bilip na wetim gutpela samting i kamap bihain, a? God i bin mekim olsem. God i tokim Adam long ol samting nogut bai painim em, na bihain God i mekim wanpela gutpela tok promis long ol pikinini bilong Adam.
8 God, em i as bilong bilip bilong yumi, em i mekim wanem gutpela tok promis? Wanpela snek i insait long rong bilong Adam na God i tokim dispela snek: “Na bai mi mekim yu birua long meri, na meri i birua long yu. Na bai mi mekim ol lain bilong yu i birua long lain bilong meri. Bai em i krungutim het bilong yu, na bai yu kaikaim lek bilong em.” (Jenesis 3:15) Ating yu laik save olsem wanem dispela tok inap kirapim yumi long bilip na wetim gutpela samting i kamap, a? Orait, pastaim dispela tok i givim save long yumi olsem: Wanpela man bai “krungutim het” bilong snek.
9 Long Revelesen 12:9, Baibel i tok: “Na ol ensel bilong God ol i tromoi snek i go daun. Em i dispela snek bilong bipo yet, na ol i kolim em Seten na ‘Man I Save Kotim Olgeta Man.’ Em i man bilong giamanim olgeta manmeri bilong graun. Ol i tromoi em i go daun long graun, na ol i tromoi ol ensel bilong en ol i go daun wantaim em.” Tru tumas, dispela snek long Iden em dispela ensel nogut, Seten. Dispela “snek” i pulim sampela ensel long heven i go bihainim em, na em i gat “lain” bilong em long graun tu. “Ol lain” bilong snek bai pinis wantaim em.−Revelesen sapta 12.
10 Krais Jisas tu i kamapim long ples klia olsem dispela “snek” i pundaunim namba wan tumbuna papamama bilong yumi, em Seten tasol. Jisas i tokim ol hetman bilong lotu Juda: “Yupela i pikinini bilong papa bilong yupela, Seten. Na yupela i strong long bihainim laik bilong bel bilong papa bilong yupela. Bipo yet em i man bilong kilim man i dai. Na em i no bihainim pasin i tru. . . . Tok giaman em i mekim, dispela em i tok bilong em stret. Em i man bilong tok giaman, na em i papa tru bilong pasin bilong tok giaman.” (Jon 8:44) Na Baibel i kolim ol dispela birua olsem ol “pikinini bilong snek nogut.”−Matyu 3:7.
Bilip i Kamap Strong
11 Tok promis God i mekim long krungutim het bilong dispela “snek,” em bilong helpim olgeta man bihain bai ol i kamap long graun bambai ol i ken bilip na wetim gutpela samting i kamap. Bilong save gut long dispela samting, yumi mas skelim narapela tok bilong Jenesis 3:15. Dispela tok i stori tu long “lain” bilong meri. Inap longtaim ol man i no save pikinini o “lain” bilong meri i husat. Dispela save i stap hait. Tasol samting i stap ples klia, em olsem: Jehova bai mekim dispela pikinini o “lain” bilong meri i birua long “snek” wantaim ol lain bilong “snek,” em ol i givim baksait long God. “Lain” bilong meri bai winim pait! Ol man i ken bilip na wetim dispela gutpela samting i kamap. Ol man i ken wetim dispela pikinini bilong meri em i kam.
12 Bihain God i kamapim long ples klia olsem dispela pikinini bilong meri em i Pikinini bilong Em yet, em i salim em i kam long graun olsem Mesaia o Krais, na em i lusim laip bilong em olsem ofa bilong baim bek ol man. (Jenesis 22:17, 18; Galesia 3:16; 1 Jon 2:2; Revelesen 5:9, 10) Olsem na ol Witnes Bilong Jehova i no wetim Yunaitet Nesen i helpim ol man. Ol i bilip long Krais Jisas, em i stap laip na em i Maus bilong God Jehova. Yumi ken bilip tru olsem Krais i stap laip, long wanem God i kirapim bek em na putim em i sindaun long han sut bilong Em long heven. I olsem Pol i tok: “Yumi bilip long Krais na wetim em. . . . Krais i dai pinis, na tru tumas God i bin kirapim em bek. Em i kirap paslain long ol man i dai pinis, olsem namba wan kaikai i redi long gaden.” (1 Korin 15:19, 20) Planti taim dispela nius Wastaua i bin kamapim ol tok bilong Baibel i makim olsem nau Krais Jisas i stap king long heven.−Revelesen 11:15.
13 Tasol Jisas i no senisim Jehova. Nogat. Yumi mas bilip long Jehova na wetim em i helpim yumi. Tok bilong Sam 37:34 i stret yet: “Bilip long [Jehova] . . . , na bihainim pasin bilong em. Sapos yu mekim olsem, bai em i givim biknem long yu, na yu ken holim dispela graun em i givim yu. Na bambai yu lukim em i bagarapim ol man nogut.” Yumi mas bilip yet long Jehova, na yumi mas helpim ol narapela man long mekim olsem, na bai ol i no ken bilip long ol oganaisesen ol man i bin kamapim na wetim ol i helpim ol.
14 Olsem na ol Witnes Bilong Jehova i wok strong long 208 kantri long autim gutpela tok bilong Kingdom long 164 tok ples. Ol man i no inap pasim ol long mekim dispela wok. Sampela gavman na lain politik i laik pasim ol na ol lotu i helpim ol dispela lain, tasol ol i no kisim namba long God bilong mekim olsem. Yumi ken wok yet long autim tok bilong God Jehova na i stap witnes bilong Em, na yumi ken bilip long Em, olsem Devit bilong Betlehem i bin mekim. Devit i tok:
15 “[Jehova] i wasman bilong mi. Olsem na mi no inap sot long wanpela samting. Em i mekim mi slip long gutpela gras. Na em i bringim mi i go long ol liklik wara na mi dring na mi malolo. Em i givim mi nupela strong. Na em i save bringim mi long ol gutpela rot, olsem em i tok bipo long mekim. God, sapos mi wokabaut long ples nogut na bikpela tudak, maski, mi no ken pret long samting nogut, long wanem, yu stap wantaim mi. Mi lukim yu holim stik bilong wasman olsem na bel bilong mi i stap isi. Mi no inap bagarap. Yu redim gutpela kaikai bilong mi long ples klia na ol birua bilong mi ol i lukim mi. Yu kisim mi i kam sindaun wantaim yu, na yu lukautim mi gutpela tumas. Bikpela, bai yu lukautim mi gut na yu marimari long mi olgeta de mi stap laip. Na bai mi stap oltaim oltaim long haus bilong yu.”−Sam 23.
16 Jehova i putim King Devit i stap olsem wasman bilong ol Isrel bilong bipo, na King Devit i opim rot bambai Jerusalem i ken kamap nambawan biktaun bilong ol. Pikinini bilong King Devit, em Solomon, em i stap king long Jerusalem inap 40 yia. I gat gutpela as na Baibel i kolim Krais Jisas olsem “Pikinini Bilong Devit.” (Luk 1:31; 18:39; 20:41) Devit i bilip long God Jehova na wetim Jehova i helpim em, na tumbuna pikinini bilong em, Krais Jisas, em tu i mekim olsem.
17 Krais Jisas i kamap long lain bilong Devit long graun na em i kisim biknem, winim olgeta narapela man i kamap long lain bilong Devit. Krais Jisas i bilip long God olsem Sam 37:34 i tok, olsem na taim ol i nilim em long pos pen na em i laik i dai, em i tok: “Papa, mi putim spirit bilong mi long han bilong yu.” (Luk 23:46) Em i kolim tok bilong Devit long Sam 31:5 na em i truim dispela tok, em Devit i tokim God: “Mi givim mi yet long han bilong yu.” Jisas wantaim King Devit, tupela i bilip long God na wetim em i helpim ol, na bilip bilong tupela i no lus nating. God i kirapim bek Krais long namba tri de. Fopela ten de bihain em i go bek long Papa bilong em long heven. Long yia 1914 C.E., taim bilong ol man bilong ol arapela lain i pinis na Jehova i putim Pikinini bilong em i stap Bos bilong graun.
Nau Em i Taim Bilong Bilip
18 Nau, long dispela yia, ol man i bin i stap long graun inap 6,014 yia pinis na yumi laik save: I gat wanem gutpela samting ol i ken bilip long en na wetim i kamap? I stret yumi askim olsem long nau, long wanem yumi stap inap olsem 1,900 yia bihain long taim ol man i bin raitim ol tok bilong Baibel. Devit i bin raitim tok bilong Sam 37:34 planti handet yia bipo.
19 God Jehova, em God I Gat Olgeta Strong, em i bin kirapim bek Jisas long matmat na em i laik givim bikpela wok moa long em, winim ol wok ol man i ting Jisas bai mekim. God Jehova i kirapim bek Jisas na givim biknem long em na sindaunim em long han sut bilong em long heven, olsem na i gat narapela gutpela as na yumi ken bilip long Jehova na wetim gutpela samting i kamap−yumi ken wet long kisim laip i stap oltaim na i stap amamas tru. I olsem aposel Pol i tok: “God i bin kisim bek yumi, na nau yumi bilip na wetim em inapim tru dispela gutpela samting.”−Rom 8:24.
20 Na Pol i tok moa olsem: “Tasol samting yumi bin wetim na bihain lukim pinis, yumi no save wetim em moa. Sapos man i lukim pinis wanpela samting, bilong wanem em i wetim moa? Tasol samting yumi no lukim yet, yumi bilip tru long yumi bai kisim, orait yumi save tingting strong long dispela samting na wetim i stap.” (Rom 8:24, 25) Olsem na tok promis God i bin mekim long pastaim tru em i stap yet na yumi ken bilip tru long en na wetim ol gutpela samting i kamap olsem God i bin tok promis long en. Liklik taim nau na bai ol dispela samting i kamap. (2 Pita 3:13; Revelesen 21:4, 5) Olgeta man i ken bilip na wetim dispela gutpela samting i kamap, olsem na olgeta i mas save long en. Dispela em i laik bilong God, em i “as bilong bilip bilong yumi.”
21 Nau em i taim bilong God i mas kamapim dispela laik bilong em. Long dispela taim nau, sampela lain bilong Yunaitet Nesen ol i kisim save pinis long wokim ol samting long nuklia, tasol ol hetman bilong ol dispela gavman i no pilim olsem ol i mas bilip long wanpela Man em i gat bikpela save, winim bilong ol, na wetim em i stretim ol hevi.−Lukim Jenesis 11:6.
22 Ol bikpela lotu bilong graun i no gat strong moa. Ol i bin brukim ol man i stap narapela narapela lain na ol i mas pinis. Baibel i tok, ol gavman bai kirap na daunim ol dispela lotu i bin wok long bosim ol na longtaim pinis ol i wok long pulim planti samting long ol man. Olsem na taim ol gavman i kirap bagarapim ol lotu, yumi no ken kirap nogut long dispela samting. Taim ol i bagarapim ol lotu, bai i no gat wanpela samting nogut i painim ol, olsem na bai ol i hambak na ting olsem i no gat God. Na Baibel i tok, bihain bai ol i kirapim pait long ol Witnes Bilong Jehova, em ol i no bagarap wantaim ol narapela lotu. Ol dispela gavman i givim baksait long God na bai ol i ting i no hatwok long ol i pinisim ol Witnes tu.−Revelesen 17:12-17; Esikiel 38:10-23.
23 Tasol bai ol i lus long pait. Ol man i pait wantaim Jehova, ol i no inap winim pait. Dispela samting ol i mekim bai kamapim long ples klia olsem ol i lain bilong nambawan birua bilong dispela God em wanpela tasol em i God tru. Ol i lain bilong “snek,” em Seten, em i “god giaman bilong dispela graun.”−2 Korin 4:4.
24 Bai ol i sem nogut tru! Samting ol i tingting long mekim bai kirapim bel bilong God bilong heven na graun na bai em i belhat long ol na i stret em i mekim. Em inap tokim ol man nating bilong dispela graun, olsem: “Tingting bilong yupela i no olsem tingting bilong mi, na pasin na wok bilong yupela i no olsem pasin na wok bilong mi. Olsem heven i antap na i winim graun, olsem tasol pasin na wok bilong mi i antap na i winim pasin na wok bilong yupela, na tingting bilong mi i antap na i winim tingting bilong yupela. Olsem ren na ais i kapsait i kam daun, na i no ken i go bek kwik long dispela ples, tasol pastaim em i mas wasim graun na graun bai kamapim kaikai, na man bilong planim kaikai em bai kisim pikinini bilong kaikai na em i ken planim, na man bilong kaikai em bai kisim bret bilong kaikai, olsem tasol tok bilong mi i lusim maus bilong mi na i go na i mekim olsem. Em i no ken i kam bek nating long mi na i no bin kamapim wok; nogat. Tasol em i mas mekim kamapim laik bilong mi, na ol wok mi bin salim em bilong mekim, em bai mekim tru.”−Aisaia 55:8-11, NW.
25 Dispela Man bilong wokim yumi, em i wokim bel bilong yumi inap pilim pen, olsem em yet. Jehova i tok: “Em i salim mi i go long ol lain i laik bagarapim yupela; long wanem man i holim yupela em i holim kiau bilong ai bilong mi.” (Sekaraia 2:8, NW) Olsem na ol Witnes Bilong Jehova i mas bilip long Jehova na wetim Em i helpim ol. Na em bai helpim ol. Dispela samting bai litimapim tru nem bilong em, em i King bilong heven na graun. Bai em i kamapim long ples klia olsem em i God antap tru, na em i gat olgeta strong, na em i stap oltaim; na olgeta lain bilong em long heven na long graun, em ol i bilip long em, bilip bilong ol i no ken lus nating. Litimapim nem bilong Jehova!−Sam 150:6.
Bai Yu Bekim Wanem Tok
◻ Ol samting ol lain bilong dispela graun i bilip na wet long en, bilong wanem dispela i giamanim ol?
◻ God i tok wanem long Jenesis 3:15 na yumi ken bilip na wetim gutpela samting i kamap?
◻ Jisas i mekim wanem long tok bilong Sam 37:34?
◻ I gat wanem as na yumi ken bilip na wetim gutpela samting i kamap?
3. Ol lain ol i kolim Kristen, olsem wanem ol i gat narapela kain tingting i no stret wantaim tingting bilong God?
4. Yunaitet Nesen i paulim tingting bilong ol man na ol i no mekim wanem?
5. Wanem taim as bilong bilip i kamap?
6. Olsem wanem na ol man i sot long gutpela samting ol i ken bilip long en na wetim i kamap?
7. Taim Adam i stap yet, God i mekim wanem bilong strongim bel bilong ol man bihain bai ol i kamap long graun?
8. Olsem wanem tok bilong Jenesis 3:15 inap kirapim ol man long bilip na wetim gutpela samting i kamap?
9. “Snek” long Jenesis 3:15 em i husat?
10. Jisas i tok wanem na yumi ken save long dispela “snek”?
11. Jenesis 3:15 i mekim wanem tok moa i olsem as bilong wetim gutpela samting i kamap?
12. Bihain God i kamapim wanem samting long ples klia long dispela pikinini bilong “meri”?
13, 14. Ol Witnes Bilong Jehova i bilip long husat na wetim em i helpim ol? Na ol i mekim wanem?
15. King Devit i bilip olsem wanem long Jehova?
16. Olsem wanem Jisas i gat wankain tingting olsem Devit?
17. I gat wanem samting na yumi ken save, Jisas i bilip long Jehova na wetim em?
18. Bilong wanem nau em i taim bilong bilip na wetim gutpela samting i kamap?
19. Jehova i mekim wanem long Jisas na yumi inap bilip na wetim gutpela samting i kamap?
20. Bilong wanem yumi ken tok Jehova i stap yet olsem “as bilong bilip bilong yumi”?
21, 22. Liklik taim moa na bai ol lain bilong dispela graun i mekim wanem?
23, 24. Taim ol dispela lain i kirapim pait long lain bilong Jehova, bai Jehova i mekim wanem?
25. Orait, bilong wanem nau yumi ken bilip long Jehova, em i God bilong yumi na as bilong bilip bilong yumi?
[Piksa long pes 10]
Olsem ol sipsip i save bihainim wasman bilong ol, olsem tasol Devit i bilip long Jehova na wetim em
[Kredit Lain]
Pictorial Archive (Near Eastern History) Est