Larim Jehova i Holim Yu Oltaim Long Han Bilong Em
“God Bilong I Stap Oltaim Oltaim, em i ples hait bilong yumi. Oltaim em i holim yumi long han bilong en na i no save lusim yumi.” —LO 33:27.
1, 2. Bilong wanem lain bilong Jehova i ken bilip tru olsem em bai lukautim ol?
JEHOVA i save wari long lain bilong em. Taim ol Israel i karim pen na hevi, “Bikpela tu i bin karim pen na hevi wantaim ol”! Bel bilong em i bin sori tumas long ol na em i marimari long ol na em i “karim ol na lukautim ol gut tru.” (Aisaia 63:7-9) Olsem na sapos yumi stap gut long em, yumi ken bilip tru olsem em bai lukautim yumi.
2 Profet Moses i bin tok: “God Bilong I Stap Oltaim Oltaim, em i ples hait bilong yumi. Oltaim em i holim yumi long han bilong en na i no save lusim yumi.” (Lo 33:27) Tasol em i save lukautim yumi olsem wanem, olsem holim yumi oltaim long han bilong em?
Bilong Wanem Yumi Gat Planti Hevi?
3. Ol manmeri i bihainim tok, wanem taim bai ol i ‘stap gutpela tru olsem ol pikinini bilong God’?
3 Yumi mekim wok bilong Jehova, tasol nogut yumi ting dispela bai lukautim yumi na ol hevi bilong dispela graun i no ken painim yumi. Nogat. Wanpela wokboi bilong God, em Jop, em i tok: “Mipela ol manmeri i save stap sotpela taim tasol long graun, na stat long taim mama i karim mipela, ol kain kain [hevi] i save kamap long mipela.” (Jop 14:1) Na wanpela man bilong raitim song long Baibel em i tok, long olgeta yia yumi stap laip yumi “save hatwok na painim hevi tasol.” (Buk Song 90:10) Bai yumi stap olsem i go inap long taim ‘God i pinisim dispela kalabus bilong bagarap nau olgeta samting i stap long en, na bai olgeta samting i stap gutpela tru olsem ol pikinini bilong God.’ (Rom 8:19-22) Dispela gutpela samting bai kamap long taim Krais i bosim graun inap 1,000 yia. Long taim bilong dispela 1,000 yia, long rot bilong ofa bilong Krais bai sin na i dai i pinis long ol man i stap aninit long dispela Kingdom. Krais wantaim ol man i wok king na pris wantaim em bai wok long helpim ol manmeri na long pinis bilong dispela 1,000 yia bai olgeta manmeri i bihainim tok ol i kamap gutpela olgeta. Na ol manmeri i stap gut long God long laspela traim Satan na ol spirit nogut i putim long ol, bai God i raitim nem bilong ol long “buk bilong laip,” na bai nem bilong ol i stap oltaim long en. (Kamapim Tok Hait 20:12-15) Em nau, long dispela taim bai ol i stap gutpela tru olsem ol pikinini bilong God.
4. Yumi no ken bel nogut na toktok planti long ol samting i painim yumi long nau, tasol yumi mas mekim wanem?
4 Dispela gutpela taim i no kamap yet, tasol yumi no ken bel nogut na toktok planti long ol samting i painim yumi long nau. Nogat. Yumi mas bilip strong long Jehova. (1 Samuel 12:22; Jut 16) Na yumi mas tenkyu long Hetpris bilong yumi, em Jisas, long wanem, long rot bilong em yumi inap i go klostu long God, “na bai yumi lukim em i sori long yumi. Na sapos yumi gat hevi, orait marimari bilong em bai i helpim yumi.” (Hibru 4:14-16) Yumi no ken tru bihainim pasin bilong Adam. Adam i tokim Jehova: “Dispela meri yu bin givim mi . . . , em tasol i givim mi pikinini bilong dispela diwai na mi kaikai.” (Stat 3:12) I olsem Adam i laik tok, Jehova i bin givim meri nogut long em na em i laik sutim asua i go long Jehova. Tasol Adam i kranki stret. God i save givim ol gutpela samting tasol long yumi, na em i no save mekim hevi i kamap long yumi. (Matyu 5:45; Jems 1:17) Planti hevi i kamap long yumi, as bilong en i olsem: Yumi yet yumi sot long gutpela tingting o narapela man i popaia na nau hevi i kamap long yumi. Narapela as bilong en em olsem: Yumi olgeta yumi gat sin na yumi stap namel long ol manmeri i stap aninit long strong bilong Satan. (Sindaun 19:3; 1 Jon 5:19) Tasol Jehova i save lukautim ol gutpela wokboi bilong em ol i save bilip long em, na ol i beten askim em long helpim ol, na ol i save bihainim ol tok bilong em long Baibel. Em i save holim ol oltaim long han bilong em na em i no save lusim ol.—Buk Song 37:5; 119:105.
Em i Helpim Ol Taim Ol i Gat Sik
5. I gat wanem gutpela tok long Buk Song 41:1-3 bilong strongim bel bilong ol man i gat sik?
5 Sik em wanpela hevi i save kamap long yumi planti man long sampela taim. Tasol Devit i tok: “Man i save tingim ol rabisman na i helpim ol, dispela man i ken amamas. Bikpela bai i helpim em long taim hevi i kamap long em. God bai i lukautim em na strongim laip bilong em. Na Bikpela bai i mekim em i stap gut long ples bilong em. Na bai Bikpela i no larim ol birua i bagarapim em. Taim dispela man i gat sik, Bikpela bai i lukautim em. Em bai i mekim orait sik bilong em, na mekim em i kamap strong gen.”—Buk Song 41:1-3.
6, 7. Taim Devit i gat sik, God i helpim em olsem wanem? Olsem wanem dispela inap strongim ol wokboi bilong Jehova long nau?
6 Man i save tingim gut ol narapela man em i save helpim ol man i sot long samting. Sampela taim “hevi i kamap long em,” na sampela taim em i karim hevi longtaim na dispela i laik pinisim strong bilong em. Long kain taim olsem em i save bilip olsem God bai lukautim em na strongim em. Na ol narapela i save tokaut long ‘Jehova i bin mekim em i stap gut.’ Taim Devit “i gat sik,” ating long taim em i gat hevi long pikinini man bilong em Apsalom i laik kisim wok king bilong em na bosim Israel, long dispela taim God Jehova i lukautim Devit.—2 Samuel 15:1-6.
7 Devit i bin tingim ol rabisman na helpim ol, olsem na em i pilim olsem God bai tingim dispela gutpela pasin bilong em, na taim em i gat sik na em i no inap helpim em yet, bai God i helpim em na lukautim em. (Buk Song 18:24-26) Maski em i gat bikpela sik inap long em i dai, em i bilip tru olsem God bai “mekim orait sik bilong em.” Em i save, God i no ken wokim mirakel na pinisim sik bilong em, tasol God bai givim ol gutpela tingting long em bilong strongim bel bilong em, na bai i olsem God i “mekim em i kamap strong gen.” Yumi ol wokboi bilong God long nau tu, sapos yumi gat sik, bai Jehova i helpim yumi. Em i save holim yumi oltaim long han bilong em.
Em i Mekim Isi Bel Bilong Ol Man i Bel Hevi
8. Wanpela Kristen i gat sik em i mekim wanem na em i kamapim klia olsem em i bilip strong na wetim God i helpim em?
8 Sik inap mekim yumi bel hevi. Wanpela brata Kristen i stap em i gat bikpela sik na sampela taim em i no gat strong inap long em i kaunim ol buk. Em i tok: “Dispela samting i save mekim mi i bel hevi, na mi pilim olsem mi no inap mekim wanpela gutpela wok, na mi krai.” Em i save, Satan i laik bai dispela bel hevi bilong em i ken daunim em olgeta, olsem na em i wok strong long sakim. Em i save, long strong bilong God em inap winim pait. (Jems 4:7) Pasin bilong dispela brata i save strongim ol narapela, em ol i save em i bilip strong long God. (Buk Song 29:11) Taim em i stap long haus sik tu, em i save wok long strongim ol narapela. Em i save telefon long sampela i gat sik na sampela moa na em i wok long strongim ol long spirit. Em i save harim ol kaset i gat musik bilong ol singsing bilong Kingdom long en, o i gat ol stori bilong dispela nius Wastaua na nius Kirap! long en, na em i save bung wantaim ol wanlotu bilong em, na olgeta dispela samting i strongim em yet long spirit. Dispela brata i tok: “Long olgeta taim mi save beten na toktok long Jehova, na mi save askim em long givim strong long mi, na soim rot long mi, na mekim isi bel bilong mi, na helpim mi bambai mi inap karim hevi na sanap strong.” Sapos yu wanpela Kristen i gat bikpela sik, orait yu mas bilip strong long Jehova na larim em i lukautim yu, olsem holim yu oltaim long han bilong em.
9. I gat wanem ol stori long Baibel i kamapim klia olsem ol man i save aninit long God ol tu i save bel hevi long sampela taim?
9 Bipo tu ol manmeri i save bel hevi long sampela taim. Taim traim i painim Jop, em i bel hevi na pilim olsem God i lusim em. (Jop 29:2-5) Nehemia i bel hevi, long wanem, taun Jerusalem na ol banis bilong en i bagarap; Pita i bel hevi tru long em i bin givim baksait long Krais, na em i krai. (Nehemia 2:1-8; Luk 22:62) Eprafoditus i bel hevi, long wanem ol Kristen long Filipai i harim olsem sik i bin painim em. (Filipai 2:25, 26) Yumi save, sampela Kristen long Tesalonaika i stap bel hevi, long wanem, Pol i raitim pas long ol brata na tokim ol long “strongim bel” bilong ol dispela brata. (1 Tesalonaika 5:14) Orait, God i save helpim ol dispela kain man olsem wanem?
10. Sapos yumi stap bel hevi, wanem samting inap helpim yumi?
10 Sapos wanpela man o meri i gat bikpela bel hevi, em yet i mas skelim wanem rot em bai bihainim bilong stretim, olsem i go lukim dokta o kisim marasin samting.a (Galesia 6:5) Tasol ating sapos em i malolo gut na em i no mekim planti wok tumas, dispela inap helpim em. Na nogut em i wok long tingim planti hevi wantaim na em i pilim olsem bikpela hevi tumas i painim em; gutpela sapos em i wok long stretim wanpela hevi tasol, na bihain em i wok long stretim narapela hevi. Ating dispela inap helpim em. Ol elda tu inap helpim em, na ol i mas wok strong moa long helpim em sapos dispela kain sik i mekim na nau em i no strong tumas long spirit. (Jems 5:13-15) Na bikpela samting tru em olsem: Em i mas bilip strong long Jehova na wetim em i helpim em. Yumi ken ‘putim olgeta hevi bilong yumi long han bilong em, long wanem, em i save wari long yumi.’ Na sapos em i beten oltaim na givim bel long beten, dispela tu inap helpim em, na bai ‘bel isi God i save givim long yumi i mekim bel na tingting bilong em i stap gutpela tru.’—1 Pita 5:6-11; Filipai 4:6, 7.
Jehova i Helpim Yumi Taim Yumi Hevi Long Man i Dai Pinis
11-13. Taim yumi hevi long man o meri i dai pinis, wanem samting inap helpim yumi na mekim isi bel bilong yumi?
11 Taim wanpela man o meri yumi laikim tumas em i dai, dispela tu i save mekim yumi i bel hevi. Taim Sara meri bilong Abraham i dai, Abraham i bel hevi tru na em i krai long em. (Stat 23:2) Taim Apsalom pikinini man bilong Devit i dai, bel bilong Devit i nogut tru. (2 Samuel 18:33) Jisas, em man i nambawan olgeta, “i krai” taim pren bilong em Lasarus i dai! (Jon 11:35) Olsem na taim wanpela man o meri yumi laikim tumas em i dai, yumi save bel hevi. Tasol wanem samting inap helpim yumi long daunim dispela kain bel hevi?
12 God i save helpim lain bilong em long karim kain hevi olsem. Long Baibel em i tok, ol man i dai pinis bai ol i kirap bek. Olsem na yumi no save hevi tumas “olsem ol arapela manmeri i no bilip long God na i no wetim taim bilong kirap bek long matmat.” (1 Tesalonaika 4:13; Aposel 24:15) Spirit bilong Jehova i helpim yumi long i stap bel isi na bilip na tingim gutpela taim Baibel i tok bai kamap long bihain. Olsem na yumi no save stap bel hevi na tingim tasol dispela man o meri i dai pinis, em yumi laikim tumas em. Na taim yumi kaunim Baibel na yumi beten long “God bilong mekim isi bel bilong olgeta man i gat hevi,” dispela tu i save mekim bel bilong yumi i stap gutpela.—2 Korin 1:3, 4; Buk Song 68:4-6.
13 Sapos yumi wetim taim bilong kirap bek, dispela bai mekim gut bel bilong yumi, olsem i bin mekim long Jop, em Jop i tok: “God, i gutpela sapos yu haitim mi long ples bilong ol man i dai pinis, inap belhat bilong yu i slek olgeta. Na yu ken makim wanpela taim bilong tingim mi gen. Na bai mi wet i stap inap long taim yu makim bilong mi i stap long dispela ples, em i pinis. Na long dispela taim . . . bai yu singautim mi na bai mi lusim dispela ples.” (Jop 14:13-15) Taim wanpela gutpela pren bilong yumi i lusim yumi na i go raun, yumi no save bel hevi, long wanem yumi ting long lukim em gen. Orait, taim wanpela gutpela Kristen i dai, sapos yumi gat wankain tingting, olsem bihain bai yumi lukim em gen, dispela inap helpim bel bilong yumi long i stap isi. Sapos dispela Kristen i bin bilip na wet long kisim laip long graun, bai em i slip inap liklik taim long matmat, na taim Krais i bosim graun inap 1,000 yia, orait insait long dispela taim bai em i kirap bek na i stap hia long graun. (Jon 5:28, 29; Kamapim Tok Hait 20:11-13) Na sapos yumi tu i wet long kisim laip i stap oltaim long graun, bai yumi inap i stap na sekanim em taim em i kirap bek.
14. Tupela meri Kristen i bin mekim wanem taim man bilong ol i dai pinis na dispela i bin helpim tupela long karim dispela hevi?
14 Man bilong wanpela sista i dai pinis na sista i save em i mas mekim yet ol wok bilong God. Olsem na em i “wok strong long mekim wok bilong Bikpela,” na em i wokim tu wanpela kain sitbet long 800 narapela narapela liklik hap laplap em i samapim wantaim. (1 Korin 15:58) Em i tok: “Dispela wok i helpim mi, long wanem, taim mi samapim ol liklik hap bilong dispela sitbet mi save putim ol kaset i gat musik bilong ol singsing bilong Kingdom na ol tok bilong Baibel long en na mi wok long harim. Dispela i helpim mi na mi no tingting oltaim long hevi bilong mi.” Em i kolim narapela samting i bin helpim em, em wanpela elda na meri bilong em i kam lukim em. Dispela elda i gat save pinis long helpim ol brata sista i gat kain hevi olsem na em i kaunim wanpela tok bilong Baibel long em i tok, God i save tingim tru na lukautim gut ol meri em man bilong ol i dai pinis. (Jems 1:27) Narapela meri Kristen i gat wankain hevi, olsem man bilong em i dai, em tu i no wok long tingim hevi bilong em yet tasol. Em i save pilim tru gutpela pasin ol pren i mekim bilong helpim em, na em i wok strong moa long helpim ol narapela. Em i tok: “Mi beten planti taim moa na mi go klostu moa long Jehova long bel na long tingting bilong mi.” Em nau, God i save lukautim yumi. Em i no save lusim yumi; em i save holim yumi oltaim long han bilong em. Em gutpela blesing tru yumi kisim!
Em i Helpim Yumi Taim Yumi Popaia
15. Devit i kamapim wanem ol bikpela tok long Buk Song 19:7-13?
15 Yumi laikim tumas lo bilong Jehova, tasol sampela taim yumi lusim lo bilong em na mekim rong. Taim yumi mekim rong, yumi save bel hevi olsem Devit long bipo, em Devit i save laikim tru ol lo na tok bilong Jehova, winim gol. Em i tok: “Lo bilong yu i givim save long mi, wokman bilong yu. Mi bihainim lo bilong yu, olsem na yu save mekim sindaun bilong mi i gutpela tru. Tasol husat inap save long olgeta rong bilong em yet? Mi mekim sampela rong em mi no save long ol, olsem na yu mas rausim ol dispela rong na mekim mi i kamap klin long ai bilong yu. Mi wokman bilong yu, na yu mas was gut long mi, bai mi no ken bikhet. Yu no ken larim pasin bilong bikhet i bosim mi. Olsem na bai mi stap stret na mi no mekim bikpela rong.” (Buk Song 19:7-13) Orait, nau yumi ken skelim ol dispela tok.
16. Bilong wanem yumi mas klia long pasin bilong bikhet?
16 Man i bikhet long God, em i no mekim liklik pasin kranki o popaia tasol. Nogat. Em i mekim bikpela rong. Sol i bikhet long God. Em i sakim tok bilong God na mekim ol ofa, na i no wok bilong em long mekim. Na em i kisim ol gutpela samting bilong ol Amalek na larim king bilong ol i stap, em King Agak, maski God i tok em i mas kilim i dai olgeta Amalek na bagarapim olgeta samting bilong ol. (1 Samuel 13:8-14; 15:8-19) King Usia i bikhet long God. Em i kukim ofa insait long haus lotu, tasol dispela em i wok bilong ol pris tasol. Olsem na God i mekim na wantu sik lepra i kamap long skin bilong Usia. (2 Stori 26:16-21) Taim ol Israel i laik kisim Bokis Kontrak i go long Jerusalem, ol i putim long wanpela karis, na ol bulmakau i pulim karis ol i mekim na Bokis Kontrak i laik pundaun, olsem na wanpela man, nem bilong em Usa, em i putim han i go na holim. Tasol i tambu tru long em i holim dispela samting holi na God i kilim em i dai stret long dispela taim. (2 Samuel 6:6, 7) Olsem na sapos yumi no save long ol samting yumi mas mekim, o yumi no save i orait long yumi mekim wanpela samting o nogat, orait yumi mas bihainim pasin daun na i go toktok wantaim ol man i gat gutpela tingting na ol i ken givim sampela tingting long yumi. (Sindaun 11:2; 13:10) Na sapos bipo yumi bin mekim pasin bikhet long God, yumi mas beten askim God long lusim tingting long dispela rong bilong yumi, na yumi mas askim em long helpim yumi long was gut bambai yumi no ken mekim pasin bikhet long bihain.
17. Ol sin i stap hait inap mekim wanem long man? Tasol wanem samting inap helpim em na bai God i lusim sin bilong em na hevi bilong em i pinis?
17 Ol rong i stap hait inap givim hevi long yumi. Tok bilong Buk Song 32:1-5 i makim olsem Devit i bin wok long haitim rong bilong em na dispela i givim bikpela hevi long em. Devit i tok: “Taim mi no autim sin bilong mi yet, mi krai nogut long san na long nait. Olsem na bodi bilong mi i slek olgeta. Long san na long nait han bilong yu i mekim save long mi. Strong bilong mi i lus olgeta, olsem bikpela san i boinim graun na graun i drai.” Bel bilong em i wok long kotim em, na taim em i wok long daunim dispela, skin bilong em i slek olgeta. Bel na tingting bilong em i bagarap stret, olsem na strong bilong em i lus olgeta, olsem strong bilong wanpela diwai i lus olgeta long taim bikpela san i boinim graun na graun i drai. Taim em i haitim sin bilong em, dispela i nogutim skin na tingting bilong em na em i no i stap amamas moa. Tasol taim em i autim sin bilong em na God i tekewe sin bilong em, nau hevi bilong em i pinis. Devit i tok: “Sapos God i lusim pinis rong bilong wanpela man, na i tekewe sin bilong em, dispela man i ken amamas. . . . Bihain mi bin autim sin bilong mi long yu. Mi no haitim pasin nogut bilong mi. Mi ting olsem, mi laik autim olgeta sin bilong mi long Bikpela. Mi autim pinis na yu tekewe asua bilong mi na sin bilong mi tu.” Gutpela pasin sori ol elda Kristen i mekim bilong helpim man i bin mekim rong, dispela tu inap helpim em long kamap strong gen long spirit.—Sindaun 28:13; Jems 5:13-20.
18. Wanem samting i kamapim klia olsem sin bilong man inap givim hevi long em i go inap longtaim bihain? Tasol wanem samting inap mekim isi bel bilong man sapos kain samting olsem i painim em?
18 Taim man i mekim wanpela rong, dispela inap givim hevi long em i go inap longtaim bihain. Wanpela rong bilong Devit i bin mekim olsem long em. Devit i trabel long wanpela maritmeri, em Batseba, na taim meri i kisim bel, nau Devit i wokim rot bambai man bilong dispela meri i dai, na Devit i maritim em. (2 Samuel 11:1-27) Tru God i marimari long Devit, long wanem God i bin mekim kontrak bilong Kingdom wantaim em, na Devit i hevi long rong bilong em na tanim bel, na Devit i save mekim pasin marimari long ol narapela, tasol bihain ‘sampela long famili bilong Devit yet i givim bikpela hevi long em.’ (2 Samuel 12:1-12) Pikinini i kamap long pasin pamuk bilong Devit, em i dai. Pikinini man bilong Devit, em Amnon, em i mekim pasin nogut long susa bilong em Tamar, olsem na brata bilong Tamar, em Apsalom, i tok na ol i kilim i dai Amnon. (2 Samuel 12:15-23; 13:1-33) Apsalom i slip wantaim ol namba 2 lain meri bilong papa bilong em Devit na semim papa. Em i laik kisim wok king bilong papa na ol i kilim em i dai. (2 Samuel 15:1–18:33) Em nau, sin inap givim hevi long man i go inap longtaim bihain. Olsem: Sapos rauspela man i tanim bel na kongrigesen i kisim bek em, ating sampela yia i mas lus pastaim na bai em i kisim gen gutnem, na bel hevi em rong bilong em i bin kamapim i ken pinis. Tasol taim Jehova i lusim rong bilong yumi na helpim yumi, olsem holim yumi oltaim long han bilong em, dispela i save mekim isi bel bilong yumi.
Em i Kisim Bek Yumi Long Ol Hevi na Traim
19. Taim bikpela traim i painim yumi, spirit bilong God inap helpim yumi olsem wanem?
19 Taim bikpela traim i painim yumi, ating yumi sot long gutpela tingting o strong inap long yumi tingim wanem rot yumi mas bihainim na yumi ken bihainim. Sapos olsem, orait spirit bilong God “i save helpim yumi man i no gat strong. Yumi no save yumi mas [beten] long wanem samting. Yumi save krai long bel tasol, na yumi no inap long tokaut. Na long dispela pasin Holi Spirit yet i save [beten] bilong helpim yumi.” (Rom 8:26) Sapos Jehova i mekim na senis i kamap long samting i traim yumi, orait yumi mas tenkyu long em. Tasol sampela taim em i save mekim narapela samting bilong helpim yumi. Sapos yumi beten askim Jehova long givim gutpela tingting long yumi, long rot bilong spirit holi Jehova inap makim ol samting yumi mas mekim na givim strong long yumi inap long yumi mekim. (Jems 1:5-8) Sapos Jehova i helpim yumi, maski “kain kain traim” i kamap na “givim pen” long yumi, bai yumi inap winim ol dispela traim na bai bilip bilong yumi i kamap strong moa.—1 Pita 1:6-8.
20. Wanem gutpela samting bai painim yumi sapos yumi larim Jehova i holim yumi oltaim long han bilong em?
20 Yumi no ken les long i go klostu long God long rot bilong beten. Devit i tok: “Olgeta taim mi wetim God i helpim mi. Em i kisim bek mi long ol samting i laik bagarapim mi. God, yu kam long mi gen na yu marimari long mi, long wanem, mi stap wanpis na strong bilong mi i pinis. Yu tekewe olgeta bel hevi bilong mi, na bel bilong mi i ken i stap isi. Yu helpim mi na ol hevi i no ken daunim mi. Tingting long olgeta bel pen na hevi i stap long mi, na tekewe olgeta sin bilong mi.” (Buk Song 25:15-18) God inap kisim bek yumi tu, na marimari long yumi, na tekewe olgeta sin bilong yumi, sapos yumi bihainim pasin bilong Devit na yumi larim Jehova i holim yumi oltaim long han bilong em!
[Ol Futnot]
a Lukim ol stori bilong bel hevi i stap long Kirap! bilong Epril 8, 1988, pes 3-18, na Kirap! bilong Me 8, 1988, pes 12-17.
Bai Yu Bekim Wanem Tok?
◻ Sapos wokboi bilong Jehova i gat sik, Jehova i save helpim em olsem wanem?
◻ Wanem samting inap helpim yumi long daunim bel hevi?
◻ Taim yumi hevi long man i dai pinis, wanem samting inap mekim isi bel bilong yumi?
◻ Ol man i wok long haitim rong bilong ol, ol i mas mekim wanem na dispela bai helpim ol?
◻ Taim bikpela traim i painim ol manmeri bilong Jehova, wanem samting inap helpim ol?
[Piksa long pes 16, 17]
Sapos yumi wetim taim bilong kirap bek, olsem Jop, dispela inap mekim gut bel bilong yumi