Givim Biknem Long Krais King i Gat Glori!

1, 2. Bilong wanem yumi laik save gut long ol tok i stap long Song sapta 45?

NAMBAWAN king i sindaun long hos na i go long pait bilong sambai long tok i tru na daunim ol birua. Bihain long em i winim pait, em i maritim wanpela naispela meri. Ol manmeri i tingim dispela king na ol i litimapim nem bilong em long olgeta lain tumbuna i kamap bihain. Dispela em as tok bilong Buk Song sapta 45.

² Song sapta 45 i kamapim gutpela stori we i gat gutpela pinis bilong en. Ol samting long dispela stori i bikpela samting, long wanem, em ol samting i painim yumi long nau na bai painim yumi long bihain. Yumi laik tru long save long ol dispela samting, olsem na yumi ken skelim gut dispela song.

3, 4. (a) Tok bilong wanem samting i olsem “gutpela tok” i sutim bel bilong yumi? Dispela tok inap kirapim yumi long mekim wanem? (b) Olsem wanem yumi mekim ‘song long wanpela king’? Olsem wanem maus bilong yumi i kamap olsem ingpen?

³ Ritim Song 45:1. Stori bilong wanpela king i olsem “gutpela tok” i sutim tru bel bilong man bilong raitim song na “i stap long tingting” bilong em. Tok Hibru ol i tanim olsem “i stap long tingting,” mining tru bilong en i olsem, wanpela samting “i wok long boil.” Man bilong raitim song i pilim olsem bel bilong em i pulap tru long amamas, i kain olsem wanpela samting i wok long boil, na maus bilong em i kamap olsem “ingpen bilong gutpela kuskus.”

⁴ Wankain samting i kamap long yumi. Gutnius bilong Kingdom Bilong Mesaia em wanpela gutpela tok i sutim bel bilong yumi. Long 1914, nius bilong Kingdom i kamap “gutpela” samting tru. Kirap long dispela taim, dispela nius i no makim wanpela Kingdom bai kamap bihain, nogat, em i makim wanpela gavman tru i mekim wok nau long heven. Dispela em “gutnius bilong Kingdom” we yumi save autim “long olgeta hap bilong graun na bai olgeta lain man i ken harim.” (Mat. 24:14) Olsem wanem? Nius bilong Kingdom “i stap long tingting” na bel bilong yumi? Yumi givim bel long autim gutnius bilong Kingdom? Wankain olsem man bilong raitim song, yumi tu i mekim ‘song long wanpela king,’ em King Jisas Krais. Yumi tokaut long ol man olsem Jisas em i King long Kingdom Bilong Mesaia long heven. Yumi singautim olgeta manmeri—ol king na lain manmeri bilong ol—long kam na stap daun long wok king bilong Jisas. (Sng. 2:1, 2, 4-12) Maus bilong yumi i kamap olsem “ingpen bilong gutpela kuskus” taim yumi yusim gut Baibel long mekim wok autim tok.

 5. (a) Wanem ol samting i mekim na yumi inap tok olsem Jisas i luk “naispela” tru? (b) Olsem wanem “gutpela” tok tasol i kamap long maus bilong King? Olsem wanem yumi inap wok strong long bihainim pasin bilong em?

⁵ Ritim Song 45:2. Baibel i no stori tumas long Jisas i luk olsem wanem. Em i gutpela olgeta, olsem na yumi inap tok olsem em i luk “naispela” tru. Na tu, em i luk “naispela” tru, long wanem, em i stap gut tru long Jehova. Taim Jisas i autim tok bilong Kingdom, em i autim “ol gutpela tok” tasol. (Luk 4:22; Jon 7:46) Olsem wanem? Yumi wok strong long bihainim pasin bilong Jisas taim yumi autim tok na traim long yusim ol tok we ol man inap pilim tru long bel?—Kol. 4:6.

 6. Bilong wanem yumi ken tok olsem “oltaim” God i mekim gut long Jisas?

⁶ Jisas i givim bel olgeta long stap gut long Jehova, olsem na Jehova i blesim em taim em i mekim wok autim tok long graun, na Jehova i givim em gutpela pe bihain long em i dai na givim laip bilong em olsem ofa. Aposel Pol i tok: “Taim [Jisas] i lukim olsem em i kamap wankain olsem ol man, em i daunim em yet na i bihainim tok i go inap long em i dai, yes, inap long em i dai long diwai pos. Long dispela as tasol God i givim bikpela namba moa long em na i givim em wanpela nem i winim olgeta arapela nem. Na bai olgeta i ken brukim skru long nem bilong Jisas, em olgeta long heven na long graun na aninit long graun. Na olgeta maus i ken tokaut long ai bilong ol man olsem Jisas Krais em i Bikpela, na dispela i ken givim glori long God Papa.” (Fili. 2:8-11) Jehova i bin kirapim bek Jisas na Jisas i kisim laip oltaim na em i no inap i dai moa. Taim Jehova i mekim dispela samting, i olsem “oltaim” em i mekim gut long Jisas.—Rom 6:9.

 7. Taim Jehova i makim Jisas, wanem ol samting i mekim na Jisas i kisim biknem i winim “ol poroman” bilong em?

⁷ Ritim Song 45:6, 7. Jisas i laikim tru stretpela pasin na em i heitim ol samting we i daunim nem bilong Papa bilong em, olsem na Jehova i makim em long kamap King long Kingdom Bilong Mesaia. God i “kapsaitim wel long [Jisas] bilong makim [em] olsem man i gat biknem” i winim “ol poroman” bilong em, em ol king bilong Juda husat i kamap long lain famili bilong Devit. Olsem wanem em i kisim biknem i winim ol? I gat 4-pela samting i mekim na em i winim ol. Namba 1: Jehova yet i bin makim Jisas. Namba 2: Jehova i makim em long kamap King na Hetpris. (Sng. 2:2; Hib. 5:5, 6) Namba 3: Taim God i makim Jisas, em i no bin kapsaitim wel long Jisas, nogat, em i bin kapsaitim holi spirit. Namba 4: Jisas i no mekim wok king long graun, nogat, em i mekim wok king long heven.

 8. Bilong wanem yumi ken tok olsem God yet i givim namba long Jisas long mekim wok king? Bilong wanem yumi ken bilip olsem kingdom bilong Jisas bai mekim stretpela wok bos?

⁸ Long 1914, Jehova i makim Pikinini bilong em long stap olsem King Mesaia long heven. ‘Em i save bosim ol manmeri bilong em long stretpela pasin tasol,’ olsem na yumi ken bilip tru olsem em bai mekim stretpela wok bos na mekim wankain pasin long olgeta manmeri. Em i gat rait long holim namba bilong mekim wok bos, long wanem, ‘God i stap king oltaim oltaim.’ Jehova yet i givim namba long em long mekim wok king long kingdom. Na tu, wok king bilong Jisas bai stap inap “oltaim oltaim.” Olsem wanem? Yu amamas long mekim wok bilong Jehova na stap daun long strongpela King em God yet i makim?

9, 10. (a) Wanem taim Krais i pasim bainat bilong em? Wanem namba 1 samting em i mekim taim em i kirap long yusim bainat? (b) Bihain, Krais bai yusim bainat long mekim wanem moa ol samting?

⁹ Ritim Song 45:3. Jehova i tokim King long “pasim bainat” bilong em. Dispela i makim olsem Jehova i tok orait long Jisas long mekim pait long olgeta man husat i sakim nambawan wok bos bilong God, na em bai givim strafe bilong God long ol. (Sng. 110:2) Krais em strongpela Soldia-King, olsem na Baibel i kolim em olsem “strongpela king.” Em i pasim bainat bilong em long 1914, na em i mekim pait na daunim Satan na ol ensel nogut bilong em na rausim ol long heven na tromoi ol i kam daun long graun.—Rev. 12:7-9.

¹⁰ Dispela em samting we King i mekim taim em i kirap nupela long ron long hos na winim pait. Tasol em i mas mekim sampela samting moa bilong “winim ol pait.” (Rev. 6:2) Jehova i laik bai strafe i mas painim olgeta liklik samting long dispela haptaim bilong nau em Satan i bosim, na Em i laik bai Satan na ol ensel nogut bilong em i no ken i gat strong moa long pulim ol man. Namba 1 lain bilong kisim bagarap em Bikpela Babilon, em olgeta lotu giaman. Jehova i tingting pinis long yusim ol lida bilong wok politik long bagarapim dispela “pamukmeri.” (Rev. 17:16, 17) Bihain, Soldia-King bai bagarapim lain politik bilong Satan na pinisim olgeta. Krais em “ensel bilong hul i no gat as,” na em bai pinisim pait taim em i tromoi Satan na ol ensel nogut i go daun long hul i no gat as. (Rev. 9:1, 11; 20:1-3) Orait nau yumi ken skelim olsem wanem Song sapta 45 i tok profet long ol dispela bikpela samting.

11. Olsem wanem Krais i sindaun long hos na i go long pait bilong “sambai long tok i tru”?

¹¹ Ritim Song 45:4.a Soldia-King i no mekim pait bilong kisim ol kantri na daunim ol manmeri, nogat. Em i laik helpim sindaun bilong ol man, olsem na em i mekim stretpela pait. Em i sindaun long hos na i go pait “bilong sambai long tok i tru na ol manmeri i gat pasin daun na stretpela pasin.” Nambawan tok i tru em Jisas i mas sambai long en em rait bilong Jehova long stap nambawan bos bilong heven na graun. Taim Satan i mekim pasin bikhet, i olsem em i sutim tok long rait bilong Jehova long mekim wok bos. Kirap long dispela taim, ol ensel nogut na ol manmeri bilong graun i sutim tok long Jehova. Nau, taim i kamap pinis long King em Jehova i bin makim i mas ron long hos na kamapim klia dispela tok i tru olsem, i stret long Jehova i stap nambawan bos.

12. Olsem wanem King i sindaun long hos na i go long pait ‘bilong sambai long ol manmeri i gat pasin daun’?

¹² King i sindaun long hos na i go long pait ‘bilong sambai long ol manmeri i gat pasin daun.’ Em i Pikinini tru bilong God, olsem na em i stap gutpela piksa tru long pasin daun, na em i stap gut long wok bos bilong Papa bilong em. (Ais. 50:4, 5; Jon 5:19) Olgeta man husat i stap gut long King, ol i mas bihainim pasin bilong em na stap daun long wok bos bilong Jehova long olgeta samting. Ol manmeri husat i bihainim dispela pasin, ol tasol bai kisim laip long nupela taim em God i tok promis long en.—Sek. 14:16, 17.

13. Olsem wanem Krais i sindaun long hos na i go long pait ‘bilong sambai long stretpela pasin’?

¹³ Na tu, Krais i sindaun long hos na i go long pait ‘bilong sambai long stretpela pasin.’ Stretpela pasin em King i sambai long en em ol lo bilong Jehova long wanem pasin i stret na wanem pasin i no stret. (Rom 3:21; Lo 32:4) Aisaia i mekim tok profet long King Jisas Krais na em i tok: ‘Wanpela king bai bihainim stretpela pasin.’ (Ais. 32:1) Wok king bilong Jisas bai kamapim “nupela skai na nupela graun,” em God i tok promis long en, “na stretpela pasin tasol bai i stap long en.” (2 Pita 3:13) Olgeta manmeri long dispela nupela graun i mas bihainim ol lo bilong Jehova.—Ais. 11:1-5.

14. Olsem wanem rait han bilong Krais bai “mekim ol bikpela wok”? (Lukim piksa long kirap bilong stadi.)

¹⁴ Taim King i sindaun long hos na ron i go, em i gat bainat em i bin pasim long sait bilong em. (Sng. 45:3) Taim i kamap long em bai kisim bainat na holim long rait han bilong em. Man bilong raitim song i tok profet olsem: “Rait han bilong yu bai mekim ol bikpela wok.” (Sng. 45:4, NW) Taim Jisas Krais i sindaun long hos na i go bilong givim strafe em Jehova i tokim em long givim long taim bilong Armagedon, Jisas bai “mekim ol bikpela wok” bilong daunim ol birua bilong em. Yumi no save Jisas bai yusim wanem rot long bagarapim haptaim bilong nau em Satan i bosim. Taim dispela bagarap i kamap, bikpela pret bai kisim ol manmeri bilong graun husat i no bihainim tok lukaut bilong God na stap daun long wok bos bilong King. (Ritim Song 2:11, 12.) Long tok profet bilong Jisas long taim bilong pinis, em i tok ol manmeri bai “pret na ol samting ol man i ting bai kamap long graun bai mekim ol i airaun, na ol strongpela samting i stap long skai bai guria.” Em i tok moa olsem: “Ol bai lukim Pikinini bilong man i stap insait long klaut na kam wantaim pawa na bikpela glori.”—Luk 21:26, 27.

15, 16. Husat bai insait long “lain ami” i go wantaim Krais long mekim pait?

¹⁵ Buk Revelesen i stori long King bai “kam wantaim pawa na bikpela glori” long givim strafe, na i tok: “Mi lukim heven i op na mi lukim wanpela waitpela hos. Na man i sindaun antap long en i gat nem olsem, Man i Save Lukautim Gut Wok Bilong En na Man Bilong Tok Tru, na long stretpela pasin em i save mekim wok jas na mekim pait. Na tu, ol lain ami i stap long heven ol i bihainim em long ol waitpela hos. Na ol i pasim ol gutpela laplap i waitpela na i klin. Wanpela longpela bainat i sap tru i kamaut long maus bilong en. Na long dispela bainat em bai pait long olgeta lain pipol, na em bai bosim ol long stik ain. Na tu em i krungutim ol greip insait long bikpela tang ston i makim belhat bilong God i Gat Olgeta Strong.”—Rev. 19:11, 14, 15.

¹⁶ Husat bai insait long “lain ami” bilong Krais na i go wantaim em long mekim pait? Long namba 1 taim Jisas i pasim bainat, “ol ensel bilong en” i bin go wantaim em long rausim Satan na ol ensel nogut long heven. (Rev. 12:7-9) Olsem na i stret long yumi ken tok olsem, long pait bilong Armagedon ol ensel holi tu bai insait long lain ami bilong Krais. Olsem wanem? I gat sampela narapela tu bai insait long lain ami bilong em? Jisas i bin mekim dispela tok promis long ol brata bilong em, em ol Kristen God i bin makim, na em i tok: “Man husat i winim pait na i mekim ol samting olsem mi save mekim i go inap long pinis, mi bai givim em namba long bosim ol manmeri bilong graun. Na em bai bosim ol manmeri wantaim stik ain na brukim ol liklik liklik olsem sospen graun i bruk. Dispela namba i wankain olsem mi bin kisim long Papa bilong mi.” (Rev. 2:26, 27) Olsem na ol brata bilong Krais em God i makim ol long holi spirit, ol tu bai insait long lain ami bilong Krais, long wanem, long dispela taim ol bai kisim pinis prais bilong ol long heven. Ol dispela Kristen husat bai stap wanwok bilong Krais, ol bai stap wantaim em taim em i “mekim ol bikpela wok” na yusim stik ain long bagarapim lain manmeri bilong dispela graun.

17. (a) Waitpela hos em Krais i sindaun long en i makim wanem samting? (b) Bainat na banara i makim wanem samting?

¹⁷ Ritim Song 45:5. King i sindaun antap long waitpela hos, na dispela i makim pait we i klin na i stret long ai bilong Jehova. (Rev. 6:2; 19:11) King i gat wanpela bainat, na tu, em i holim wanpela banara. Baibel i tok: “Mi lukluk i stap, na mi lukim wanpela waitpela hos, na man i sindaun antap long en i holim wanpela banara. Na God i givim em wanpela kraun, na em i go bilong daunim ol birua bilong em na winim ol pait.” Bainat na banara i makim rot em Krais bai yusim long givim strafe long ol birua bilong em.

18. Olsem wanem “ol spia” bilong Krais bai “sap tumas”?

¹⁸ Man bilong raitim song i tok profet olsem ‘ol spia bilong King i sap tumas na i sutim ol birua’ na i ‘daunim ol arapela lain long pait.’ Bodi bilong ol daiman bai stap long olgeta hap bilong graun. Jeremaia i tok profet olsem: “Bikpela bai i kilim i dai planti manmeri moa na bai bodi bilong ol i stap nabaut long olgeta hap bilong graun.” (Jer. 25:33) Narapela tok profet i kamapim wankain tok, olsem: “Mi lukim tu wanpela ensel i sanap long ai bilong san, na em i singaut long strongpela nek na em i tokim ol pisin i flai namel long skai: ‘Yupela kam bung long bikpela kaikai bilong God. Bai yupela i kaikai ol bodi bilong ol king na ol bodi bilong ol komanda bilong ami, na ol bodi bilong ol strongpela man, na ol bodi bilong ol hos, na ol bodi bilong ol man i sindaun antap long ol hos, na ol bodi bilong olgeta man, em bilong ol friman na bilong ol wokboi na bilong ol man nating na bilong ol man i gat nem.’”—Rev. 19:17, 18.

19. Olsem wanem Krais bai “go daunim ol birua” na winim pait?

¹⁹ Taim Krais i bagarapim pinis dispela haptaim nogut bilong Satan long graun, em bai “gat glori” na em bai “go daunim ol birua” na winim pait. (Sng. 45:4, NW) Em bai pinisim pait bilong em taim em i kalabusim Satan na ol ensel nogut long hul i no gat as inap long Wan Tausen Yia bilong em long mekim wok king. (Rev. 20:2, 3) Long dispela taim, Satan na lain ensel bilong em bai stap kalabus na ol i no inap long mekim wanpela wok moa, olsem na ol manmeri long graun bai stap fri na Satan i no inap giamanim ol, na ol bai stap daun olgeta long King bilong ol, em Man i winim pait na i kisim biknem. Paslain long ol i lukim graun i kamap ples paradais, i gat narapela samting tu we bai mekim na ol i ken amamas wantaim King na ol wanwok bilong em long heven. Stadi i kamap bihain long dispela bai stori gut long dispela samting.