“Tok Bikpela i Bin Givim” i No Inap Lus Nating

“Nau bai mi autim tok Bikpela i bin givim mi. Em i tokim mi olsem, ‘Yu Pikinini bilong mi. . . . Askim mi, na bai mi givim olgeta lain manmeri long yu, na bai yu bosim olgeta hap graun.’ ”​​—⁠SONG 2:​7, 8.

 1. Olsem wanem tingting bilong God na tingting bilong ol lain bilong graun i narapela narapela kain?

GOD JEHOVA i tingting pinis long ol samting em bai mekim long ol manmeri na long graun. Ol lain bilong dispela graun tu i tingting pinis long ol samting ol i laik mekim. Tasol dispela tupela tingting i narapela narapela kain! Yumi ken ting dispela bai i olsem, long wanem, God i tok: “Skai i stap antap tru long graun, olsem tasol ol pasin bilong mi na tingting bilong mi i winim tru ol pasin bilong yupela na tingting bilong yupela.” Dispela tingting bilong God bai kamap tru, long wanem, em i tok moa: “Ren i save pundaun long skai, em i no save go bek nating antap long skai. Nogat. Em i save givim wara long graun na mekim ol kaikai i kamap long gaden, na ol man i save kisim. Sampela ol i save kaikai na sampela pikinini kaikai ol i save planim. Olsem tasol tok bilong mi bai i no inap kam bek nating long mi. Nogat. Em bai i mekim ol samting i kamap olsem mi tok. Na em bai i kamapim ol samting mi gat laik long ol i mas kamap.”​​—⁠Aisaia 55:​9-​11.

2, 3. Namba tu song i kamapim klia wanem samting? Tasol wanem ol askim i kamap?

² Namba tu song i kamapim klia olsem ol samting God i tingting pinis long mekim long King Mesaia bai kamap tru. Spirit bilong God i bin kirapim man bilong raitim song, em King Devit bilong Israel bilong bipo, long tok profet olsem wanpela taim bai i kamap na ol lain manmeri bai i mekim pasin bikhet. Ol hetman bilong ol bai kirap na pait long God Jehova na Man God i Makim. Tasol man bilong raitim song em i tok tu: “Nau bai mi autim tok Bikpela i bin givim mi. Em i tokim mi olsem, ‘Yu Pikinini bilong mi. . . . Askim mi, na bai mi givim olgeta lain manmeri long yu, na bai yu bosim olgeta hap graun.’ ”​​—⁠Song 2:​7, 8.

³ Dispela “tok Bikpela i bin givim” i makim wanem samting long ol lain manmeri? Dispela bai mekim wanem long ol manmeri? Dispela tok bai mekim wanem long ol man i pret long God em ol i ritim namba tu song?

Ol Lain i Mekim Pasin Bikhet

 4. Bai yu stori olsem wanem long ol bikpela tok bilong Song 2:​1, 2?

⁴ Man bilong raitim song i tingim ol samting ol lain manmeri na ol hetman bilong ol bai mekim, na em i kirapim song bilong em olsem: “Bilong wanem olgeta lain manmeri i pasim tok bilong mekim pasin bilong bikhet? Bilong wanem ol dispela manmeri i pasim tok nating bilong mekim ol pasin nogut [“toktok planti long ol samting nating,” NW ]? Ol king bilong olgeta hap graun, ol i redi long pait. Na ol hetman i bung na painim rot bilong daunim Bikpela na dispela man em i makim bilong bosim ol manmeri bilong en.”​​—⁠Song 2:​1, 2.a

5, 6. Wanem dispela “samting nating” ol lain manmeri i bin “toktok planti” long en?

⁵ Dispela “samting nating” ol lain manmeri i “toktok planti” long en, em i wanem samting? Ol i no laik aninit long Man God i Makim​—⁠em Mesaia, o Krais​—⁠ol lain manmeri i “toktok planti,” o ol i tingim tingim long bel, laik bilong ol long holim yet strong bilong ol long bosim graun. Ol dispela tok bilong namba tu song i gat truim tu long taim bilong ol aposel taim ol hetman bilong ol Juda na ol Rom i wok wantaim bilong kilim i dai dispela King God i Makim, Jisas Krais. Tasol bikpela truim i kirap long 1914 taim Jisas i kamap King long heven. Kirap long dispela taim na i kam inap long nau, i no gat wanpela lain politik long dispela graun i redi long i stap aninit long King God i Makim.

⁶ Wanem insait bilong dispela askim bilong man bilong raitim song olsem ‘bilong wanem ol manmeri i toktok planti long ol samting nating’? Ol samting ol i tingting pinis long mekim em samting nating, i no gat as bilong en; em bai lus nating na i no inap kamap tru. Ol i no inap kamapim gutaim na pasin wanbel long dispela graun. Tasol ol i mekim ol samting bilong biruaim wok bos bilong God. Ol i birua na bung wantaim bilong daunim God Antap Tru na Man God i Makim. Em longlong pasin stret, a?

King Bilong Jehova i Win

 7. Long wanpela beten ol disaipel bilong Jisas bilong pastaim i tok Song 2:​1, 2 i makim husat?

⁷ Ol disaipel bilong Jisas i kamapim tok bilong Song 2:​1, 2 bilong makim Jisas. Ol man i mekim nogut long ol, long wanem, ol i holimpas bilip bilong ol, na ol i beten: “Bikpela, yu bin wokim skai na graun na solwara na olgeta samting i stap long en. Bipo Holi Spirit bilong yu i bin givim wanpela tok long tumbuna bilong mipela, em wokman bilong yu, Devit. Na Devit i bin tok olsem, ‘Bilong wanem olgeta lain manmeri ol i belhat tumas? Bilong wanem ol dispela manmeri i pasim tok nating bilong mekim ol pasin nogut [“tingim tingim long bel ol samting nating,” NW ]? Ol king bilong olgeta hap graun ol i redi long pait. Na ol hetman i bung wantaim bilong daunim Bikpela, na bilong daunim dispela man em i makim bilong kisim bek ol manmeri bilong en.’ Tru tumas, Herot [Antipas] na Pontius Pailat wantaim ol man bilong ol arapela lain na ol Israel, ol i bin bung wantaim long dispela taun bilong daunim Jisas, dispela wokman bilong yu yet, bipo yu makim em long mekim wok bilong yu.” (Aposel 4:​24-27; Luk 23:​1-12)b Yes, long taim bilong ol aposel ol birua i bin wok wantaim bilong rausim Man God i Makim, em Jisas. Tasol dispela song bai i gat narapela truim inap planti handet yia bihain.

 8. Olsem wanem tok bilong Song 2:3 i kamap long ol lain bilong nau?

⁸ Taim lain Israel bilong bipo i gat wanpela king bilong graun, olsem Devit, ol lain haiden na ol hetman i bin bung wantaim bilong biruaim God na man em i bin makim olsem king. Tasol olsem wanem long taim bilong yumi? Ol lain bilong nau i no laik bihainim ol lo bilong Jehova na Mesaia. Na i olsem ol i tok: “Yumi brukim hankap bilong tupela. Yumi rausim ol baklain tupela i pasim yumi long en.” (Song 2:⁠3) Ol hetman na ol lain manmeri i birua long olgeta lo em God na Man God i Makim i kamapim. Tasol olgeta wok bilong ol long brukim ol dispela hankap na rausim ol baklain bai lus nating.

Jehova i Tok Bilas Long Ol

9, 10. Bilong wanem Jehova i tok bilas long ol lain manmeri?

⁹ Jehova i no wari long wok bilong ol hetman bilong graun long bosim kantri bilong ol yet. Namba tu song i tok moa olsem: “God i sindaun long sia king bilong en long heven, na em i lap na tok bilas long ol.” (Song 2:⁠4) God bai i mekim ol samting em i tingting pinis long mekim na i olsem ol dispela hetman i samting nating. Em i lap long wok bilong ol na i tok bilas long ol. Em i larim ol i hambak long ol samting ol i laik mekim. Long Jehova ol i olsem samting bilong lap tru long ol. Em i lap long pasin birua bilong ol.

¹⁰ Long narapela song bilong em, Devit i toktok long ol man na ol lain i birua long God olsem: “God, Bikpela I Gat Olgeta Strong, yu mas hariap i kam helpim mi. Yu God bilong Israel, lukim ol dispela man. Yu kam kwik na mekim save long olgeta lain manmeri. Yu no ken sori long ol. Bekim tru ol dispela lain manmeri i tok olsem ol i laik mekim gutpela pasin, tasol ol i tingting long mekim pasin nogut. Long nait ol i kam bek long biktaun na ol i raun raun long banis na singaut olsem ol dok. Harim. Tok bilong ol i nogut tru, i olsem bainat i sap moa. Tasol ol i tok, ‘Husat bai i harim mipela?’ Tasol Bikpela, yu save lap nogut long ol. Yu save tok bilas long olgeta lain manmeri.” (Song 59:​5-8) Jehova i lap long tok hambak bilong ol lain manmeri na ol i paul nabaut long wok bilong ol long birua long em.

11. Wanem samting i kamap taim ol lain manmeri i traim long sakim ol samting God i tingting pinis long mekim?

¹¹ Ol tok bilong Song 2 i strongim bilip bilong yumi olsem God inap stretim olgeta hevi. Yumi ken bilip tru olsem long olgeta taim em bai kamapim laik bilong em na em i no inap lusim ol gutpela wokman bilong em. (Song 94:14) Olsem na wanem samting i kamap taim ol lain manmeri i traim long sakim ol samting Jehova i tingting pinis long mekim? Olsem dispela song i tok, God bai “i belhat tru na i givim strongpela tok long ol,” i olsem bikpela nois bilong klaut i pairap. Na em bai i kamapim “bikpela kros bilong en” olsem wanpela bikpela laitning “i mekim ol i pret moa yet.”​​—⁠Song 2:⁠5.

God i Putim King

12. Song 2:6 i stori long husat i kamap king?

¹² Tok Jehova i mekim nau long rot bilong man bilong raitim song, i mekim na ol lain manmeri i no amamas long en. God i tok: “Mi makim pinis dispela man bilong i stap king. Mi yet mi putim em i stap long Saion, dispela maunten bilong mi yet.” (Song 2:⁠6) Saion i wanpela liklik maunten long Jerusalem, na long dispela hap Devit i kamap king long olgeta lain Israel. Tasol King Mesaia bai i no sindaun long wanpela sia king long dispela taun o long narapela hap bilong graun. Jehova i putim pinis Jisas Krais olsem dispela King Mesaia em i bin makim long maunten Saion long heven.​​—⁠KTH 14:⁠1.

13. Jehova i bin mekim wanem kontrak wantaim Pikinini bilong em?

¹³ Orait nau King Mesaia i toktok. Em i tok: “Nau bai mi autim tok Bikpela i bin givim mi [em i bin mekim wanpela kontrak wantaim Pikinini bilong em long wanpela Kingdom]. Em [God] i tokim mi olsem, ‘Yu Pikinini bilong mi. Nau mi kamap papa bilong yu.’ ” (Song 2:⁠7) Krais i stori long kontrak bilong Kingdom taim em i tokim ol aposel bilong em: “Taim ol samting i kamap bilong traim mi, yupela i bin i stap wantaim mi, na yupela i no lusim mi. Papa bilong mi em i givim kingdom long mi, olsem tasol mi givim kingdom long yupela.”​​—⁠Luk 22:​28, 29.

14. Bilong wanem yumi ken tok i stret tru long Jisas i kamap King?

¹⁴ Olsem Song 2:7 i tok profet long en, long taim Jisas i kisim baptais na long rot bilong kirapim bek em olsem wanpela spirit, Jehova i tokaut olsem Jisas em i Pikinini bilong Em. (Mak 1:​9-​11; Rom 1:4; Hibru 1:5; 5:⁠5) Tru tumas, King bilong Kingdom long heven em dispela wanpela Pikinini bilong God. (Jon 3:​16) Em i tumbuna pikinini bilong King Devit, olsem na i stret tru long Jisas i kamap king. (2 Samuel 7:​4-​17; Matyu 1:​6, 16) Olsem dispela song i kamapim, God i tokim Pikinini bilong em: “Askim mi, na bai mi givim olgeta lain manmeri long yu, na bai yu bosim olgeta hap graun.”​​—⁠Song 2:⁠8.

15. Bilong wanem Jisas i askim God long givim olgeta lain manmeri long em?

¹⁵ Dispela King​—⁠Pikinini bilong God yet​—⁠em i gat bikpela namba tru, Jehova wanpela tasol i winim em. Ol samting i traim Jisas, tasol em i stap gut long Jehova, na Jehova inap bilip long em. Na Jisas bai kisim ol samting bilong God olsem Namba Wan Pikinini bilong em. Jisas Krais “em i wankain olsem God yet. Em i namba wan pikinini bilong God, na em i stap het tru bilong olgeta samting God i bin mekim ol i kamap.” (Kolosi 1:15) I gat wanpela samting tasol em i mas mekim, em i mas askim God long ‘givim olgeta lain manmeri long em, na bai em i bosim olgeta hap graun.’ Jisas i askim God long dispela samting, long wanem, em i “amamas long lukim dispela graun na ol manmeri i stap long en” na em i gat strongpela laik long inapim laik bilong Papa bilong em long heven long ol samting bilong dispela graun na ol manmeri.​​—⁠Sindaun 8:​30, 31.

Ol Samting Jehova i Tok Long Mekim Long Ol Lain Manmeri

16, 17. Olsem Song 2:9 i tok, wanem samting bai painim ol lain manmeri?

¹⁶ Truim bilong namba tu song i wok long kamap nau long taim bilong Jisas Krais i kam i stap, olsem na wanem samting bai painim ol lain manmeri? Klostu nau King bai mekim ol samting God i bin tokaut long en: “Bai yu bosim ol [ol lain manmeri] long strongpela han bilong yu [“long stik ain,” NW ]. Na bai yu brukim ol liklik liklik, olsem man i brukim sospen graun.”​​—⁠Song 2:⁠9.

¹⁷ Ol stik bilong ol king bilong bipo i bin makim namba ol king i holim. Sampela stik ol i bin wokim long ain, olsem stik dispela song i stori long en. Dispela tok piksa hia i kamapim olsem bai i isi tru long King Jisas Krais long bagarapim ol lain manmeri. Sapos wanpela man i paitim strong wanpela sospen graun long stik ain, dispela sospen bai i bagarap olgeta na man i no inap stretim gen.

18, 19. Bilong God i ken orait long ol, ol king bilong dispela graun i mas mekim wanem?

¹⁸ Olsem wanem? Ol hetman bilong dispela graun i mas lukim dispela bikpela bagarap? Nogat. Man bilong raitim song i tokim ol: “Yupela ol king, yupela putim gut yau na stretim pasin bilong yupela. Yupela ol hetman bilong graun, yupela harim dispela tok na yupela lukaut.” (Song 2:10) Man bilong raitim song i kirapim ol king long putim gut yau na tingting gut. Ol i mas save olsem ol samting ol i laik mekim bai i lus nating, tasol Kingdom bilong God bai helpim tru ol manmeri.

¹⁹ Bilong God i ken orait long ol, ol king bilong graun i mas senisim pasin bilong ol. Man bilong raitim song i kirapim ol long ‘ol i mas pret long God na aninit long em. Ol i mas guria long em na amamas wantaim.’ (Song 2:​11) Wanem samting bai kamap sapos ol i mekim olsem? Bai ol i no bikhet, o tingting bilong ol i no longlong nabaut, nogat; bai ol i ken amamas long samting King Mesaia i laik mekim. Ol hetman bilong dispela graun i mas lusim pasin antap taim ol i bosim dispela graun. Na tu, kwiktaim ol i mas senisim pasin bilong ol na tingting gut na save olsem Jehova em i nambawan bos na ol i no inap pasim wok bilong God na King Mesaia bilong em.

‘Givim Kis Long Pikinini’

20, 21. Wanem mining bilong dispela tok ‘givim kis long pikinini’?

²⁰ Orait nau Song 2 i mekim gutpela singaut long ol hetman bilong dispela graun. Ol i no ken bung wantaim na bikhet, man bilong raitim song i tokim ol: “Yupela i mas aninit long pikinini bilong en na givim kis long em. Nogut em [God] i kros long yupela na yupela i dai. Long wanem, em i save belhat hariap.” (Song 2:12a) Taim Bikpela King Jehova i tok long mekim wanpela samting ol hetman i mas harim tok bilong em. Taim God i putim Pikinini bilong em i stap King, ol hetman bilong dispela graun i mas lusim pasin bilong “toktok planti long ol samting nating.” Kwiktaim ol i mas aninit long dispela King na bihainim olgeta tok bilong em.

²¹ Bilong wanem ol i mas ‘givim kis long pikinini’? Taim Devit i raitim dispela song, pasin bilong givim kis long man i makim olsem man i pren wantaim narapela na i givim kis bilong tok welkam long man i kam long haus, na ol man bilong haus i mekim gut long ol dispela man i kam. Ol i givim kis tu bilong kamapim olsem ol i stap gut long narapela. (1 Samuel 10:⁠1) Long dispela ves bilong namba tu song, God i tokim ol lain manmeri long givim kis, olsem tok welkam, long Pikinini bilong em olsem King em i bin makim.

22. Ol hetman bilong dispela graun i mas putim gut yau long wanem tok lukaut?

²² Ol man i no laik daun long King God i bin makim, ol i bagarapim nem bilong Jehova. Ol i sakim namba Jehova i holim olsem King bilong heven na graun na strong na save bilong em long makim wanpela King em inap bosim gut tru ol man. Wantu belhat bilong God bai painim ol hetman bilong dispela graun, taim ol i wok yet long bihainim laik na tingting bilong ol yet. “Em i save belhat hariap,” olsem belhat kwiktaim na ol man i no inap pasim em. Ol hetman bilong dispela graun i mas tenkyu na putim gut yau long dispela tok lukaut na bihainim. Sapos ol i mekim olsem bai ol inap kisim laip.

23. I gat taim yet bilong ol man long mekim wanem?

²³ Dispela song i pinisim tok olsem: “Man i save bilip long God na pas tru long em, em i ken amamas.” (Song 2:12b) I gat taim yet bilong ol man i ken abrusim bagarap. Na ol wan wan hetman tu, em ol i bin wanbel long tingting na laik bilong ol lain manmeri. Ol inap ran i go long Jehova, em inap givim ples hait long ol aninit long Kingdom. Tasol ol i mas mekim samting paslain long Kingdom Bilong Mesaia i bagarapim ol lain i birua.

24. Olsem wanem sindaun bilong yumi bai gutpela maski nau i gat planti hevi?

²⁴ Sapos yumi givim bel tru long stadi long Baibel na bihainim ol tok bilong en, sindaun bilong yumi bai gutpela maski nau i gat planti hevi. Pasin bilong bihainim ol tok bilong Baibel bai helpim famili long i stap amamas na bai yumi no ken tingting planti long ol hevi na wari ol narapela manmeri bilong dispela graun i save tingting planti long en. Taim yumi bihainim ol tok bilong Baibel dispela i helpim yumi long save olsem yumi amamasim dispela Man Bilong Wokim yumi. King Bilong Heven na Graun tasol inap “helpim yumi long dispela laip nau yumi stap long en, na long laip yumi bai kisim bihain” taim em i pinisim ol birua em ol i sakim wok bos bilong Kingdom.​​—⁠1 Timoti 4:⁠8.

25. “Tok Bikpela i bin givim” i no inap lus nating, olsem na yumi inap wetim wanem samting bai kamap long taim bilong yumi?

²⁵ “Tok Bikpela i bin givim” i no inap lus nating. Olsem Man Bilong Wokim yumi, God i save wanem samting i gutpela long ol manmeri na em bai i kamapim ol samting em i tingting pinis long mekim na givim bel isi na amamas long ol man i bihainim tok bilong em, na ol bai i gat gutaim tru aninit long Kingdom bilong gutpela Pikinini bilong em. Profet Daniel i stori long taim bilong yumi na i tok: “Taim ol dispela king i stap yet God bai i kirapim wanpela kingdom na dispela kingdom bai i stap oltaim oltaim. . . . Em bai i daunim ol na bagarapim ol arapela king na kingdom bilong en bai i stap oltaim.” (Daniel 2:44) Olsem na nau em i taim bilong ‘givim kis long pikinini’ na mekim wok bilong Bikpela King, Jehova!

[Ol Futnot]

Bai Yu Bekim Olsem Wanem?

• Wanem dispela “samting nating” em ol lain manmeri i bin “toktok planti” long en?

• Bilong wanem Jehova i tok bilas long ol lain manmeri?

• God i givim wanem tok bilong daunim ol lain manmeri?

• Wanem mining bilong dispela tok ‘givim kis long pikinini’?

[Piksa long pes 16]

Devit i mekim singsing long King Mesaia i win

[Piksa long pes 17]

Ol hetman na ol manmeri bilong Israel i bung wantaim bilong birua long Jisas Krais

[Piksa long pes 18]

Krais i kamap King pinis long maunten Saion bilong heven