Jehova i No Save Givim Baksait Long Man i Mekim Pasin Daun
“Mi daunim mi yet na mi stap aninit long yu. . . . Yu no givim baksait long man i pilim hevi long sin na i daunim em yet.”—SONG 51:17.
JEHOVA inap “pasim yau bilong” em na “karamapim [em] yet long bikpela klaut” na bai beten bilong man “i no inap i kamap long” em sapos em i no laik harim. (Krai 3:44) Tasol em i laik bai lain bilong em ol inap beten long em. Maski wanpela i mekim bikpela rong, sapos em i pilim tru rong bilong em na em i tanim bel, Papa bilong yumi long heven em bai tingim ol gutpela samting dispela man i bin mekim bipo. Olsem na Pol i tokim ol wanwok Kristen: “God em i no man nogut na bai em i lusim tingting long ol gutpela wok yupela i bin mekim. Nogat.”—Hibru 6:10.
2 Ol elda Kristen tu i mas tingim gutpela wok bilong God em sampela ol wanbilip i bin mekim inap planti yia. Maski sampela i bin pundaun na mekim rong, sapos ol i tanim bel, ol elda i mas tingim gutpela wok bilong God bipo ol i bin mekim. Ol wasman Kristen i mas helpim olgeta wan wan bilong lain bilong God long i stap strong long ol samting bilong spirit.—Galesia 6:1, 2.
3 Man i mekim rong, sapos em i tanim bel, em i laik bai Jehova i ken marimari long em. Tasol dispela man i mas mekim narapela samting tu, olsem Devit i tok long Song 51:10-19.
Mas i Gat Klinpela Bel
4 Sapos Kristen i dediket pinis em i bin mekim rong na nau em i stap nogut long spirit, em i mas mekim wanem? Devit i krai long God olsem: “Yu wokim nupela klinpela bel insait long mi. Putim nupela spirit insait long mi na bai mi bihainim yu tasol.” (Song 51:10) Em i tok olsem, long wanem, em i save, bel yet i save kirapim man long mekim ol rong, na oltaim em i mas was gut long bel bilong em. Ating yumi no bin mekim kain rong olsem Devit i bin mekim long Batseba na Uria, tasol Jehova i mas helpim yumi tu na bai bel bilong yumi i no ken pulim yumi long mekim sampela bikpela rong, na Jehova i ken helpim na strongim yumi long givim baksait long dispela samting. Na Jehova i mas helpim yumi long rausim tingting nogut long bel, olsem mangal, na bel nogut long sampela man, long wanem, ol dispela rong i wankain olsem stil, na kilim man i dai samting.—Kolosi 3:5, 6; 1 Jon 3:15.
5 Jehova i laik bai yumi mas i gat “klinpela bel,” olsem gutpela stretpela bel o laik. Devit i bin save, em i no gat klinpela bel, na em i askim God long stretim bel bilong em na bai i stret wantaim lo bilong God. Na em i laik kisim nupela “spirit” tu, olsem nupela stretpela tingting, na bai em i ken sakim ol traim na em i ken holimpas ol lo bilong God.
Mas i Gat Spirit Holi
6 Sapos yumi bel hevi long ol rong na popaia na pasin kranki yumi bin mekim, ating bai yumi pilim olsem God bai tekewe spirit holi bilong em long yumi. Devit i bin ting olsem tu, na em i krai long Jehova olsem: “Nogut yu rausim mi na mi stap longwe long yu. Spirit bilong yu yet i stap long mi, na yu no ken tekewe long mi.” (Song 51:11) Devit i gat pasin daun na em i pilim olsem em i nogut pinis na em i no inap moa long mekim wok bilong Jehova. Em i ting, sapos Jehova i rausim em, Jehova i no inap orait moa long em o mekim gut bel bilong em taim em i bel hevi. Tasol sapos spirit holi bilong Jehova i ken stap long em, em inap kamap strong gen long spirit, na em inap askim Jehova long helpim em na soim rot long em na bai em inap mekim pasin Jehova i laikim, na em inap abrusim ol rong na bihainim gutpela tingting taim em i mekim wok king na bosim ol man.
7 Yumi tu i mas beten askim God long givim spirit holi long yumi. Na taim dispela spirit i laik stiaim tingting na bel bilong yumi, yumi mas bihainim, nogut yumi sakim na givim hevi long spirit holi. (Luk 11:13; Efesus 4:30) Sapos yumi bikhet long spirit, em bai lusim yumi na i no inap helpim yumi long kamapim ol gutpela pasin olsem pasin sori, na amamas, na bel isi, na no ken les kwik long man, na stretpela pasin, na bilip, na bosim gut skin. Sapos oltaim yumi wok long brukim lo bilong God Jehova, na yumi no hevi long dispela samting, na yumi no tanim bel, Jehova bai tekewe spirit bilong em long yumi.
Em i Amamas Long God i Kisim Em Bek
8 Sapos sinman i tanim bel na God i kisim em bek, em i save amamas long Jehova. Devit i bin laikim olsem, na em i beten askim God olsem: “Bipo mi amamas long yu i kisim bek mi, na nau mi laik bai yu givim mi dispela amamas gen. Yu mas kirapim laik bilong mi long bihainim tok bilong yu, na yu ken strongim mi long mekim olsem.” (Song 51:12) Devit i bilip tru olsem Jehova bai kisim em bek, na em i amamas! (Song 3:8) Bihain em i mekim rong na em i no amamas moa, tasol nau em i laik kisim bek dispela amamas na bai em i ken amamas gen long Jehova i kisim em bek. Bihain Jehova i wokim narapela rot bilong kisim bek ol man, em ofa bilong Krais Jisas. Sapos yumi ol wokman bilong God i mekim bikpela rong, tasol yumi laik amamas gen long God i kisim bek yumi, yumi mas daun long em na tanim bel na lusim dispela rong yumi bin mekim na bai yumi no ken mekim rong long spirit holi.—Matyu 12:31, 32; Hibru 6:4-6.
9 Devit i laik bai Jehova i “mas kirapim laik bilong” Devit na “strongim” em na bai em i gat strongpela tingting na laik long bihainim pasin i stret na givim baksait long pasin nogut, na bai em i no ken mekim rong gen. God Jehova i save mekim olsem long lain bilong em—taim ol i gat hevi, oltaim em i save helpim na strongim ol. (Song 145:14) Taim yumi save long dispela samting, bel bilong yumi i gutpela, na bai yumi amamas tru long dispela save sapos yumi bin mekim pasin kranki na yumi tanim bel na yumi laik bihainim laik bilong Jehova long olgeta taim!
Lainim Ol Long Wanem Samting?
10 Devit i amamas long Jehova i bin marimari long em, na em i laik bekim tok amamas long Jehova, na em i laik helpim ol narapela “manmeri bilong sin” long tanim bel tu sapos Jehova i larim em i mekim dispela wok. Em i beten long Jehova olsem: “Bai mi lainim ol manmeri bilong sin, bai ol i ken save long pasin bilong yu, na bai ol . . . i kam bek long yu.” (Song 51:13) Devit yet i bin mekim rong, na olsem wanem em inap skulim ol narapela long Lo bilong God? Em bai givim wanem tok long ol? Dispela bai helpim ol olsem wanem?
11 Taim ol Israel i mekim rong, Devit inap lainim ol long pasin bilong Jehova na bai ol i ken lusim pasin nogut, na em i ken lainim ol olsem sin em i samting nogut, na ol i mas mekim wanem bilong tanim bel na bai God i ken marimari long ol. Devit i bin i stap nogut long ai bilong Jehova, na bel bilong em i gat tok, na em i bin pilim hevi bilong ol dispela samting, na nau dispela hevi i pinis. Olsem na taim em i lainim ol narapela man i bel hevi tru long rong bilong ol na ol i tanim bel, em bai mekim long pasin sori. Tasol pastaim em yet i mas bihainim ol lo bilong God, na God i mas lusim rong bilong em, na nau em inap ‘kolim ol lo bilong’ God long ol narapela man, olsem “lainim ol.”—Song 50:16, 17.
12 Na Devit i beten moa olsem: “Yu God bilong kisim bek mi, yu ken marimari long mi na yu no ken kilim mi i dai. Olsem na bai mi mekim planti [singsing] long yu i bin mekim stretpela pasin.” (Song 51:14) Em i bin kilim man i dai, na lo i tok, em tu i mas dai. (Stat 9:5, 6) Olsem na taim em i save olsem God i lusim dispela rong em i bin mekim long Batseba na Uria, na God i kisim em bek, nau em i ken i stap bel isi, na maus bilong em i ken mekim planti singsing amamas long stretpela pasin bilong God. (Saveman 7:20; Rom 3:10) Taim Devit i bin mekim pasin pamuk, em i no inap haitim o rausim olgeta long tingting bilong em, o kirapim bek Uria long matmat, na sapos man i pamuk wantaim wanpela nupela meri, o kilim man i dai, em i no inap mekim dispela meri i kamap nupela gen o kirapim bek dispela man. Yumi mas tingim gut dispela sapos wanpela samting i laik pulim yumi long mekim pasin nogut. Na sapos God i marimari long yumi taim yumi bin popaia, yumi mas amamas tru long em! Na dispela i mas kirapim yumi long helpim ol narapela long i kam long stretpela God Jehova, em i Man bilong marimari na lusim rong bilong ol man.
13 Sapos God i no marimari long sinman, i no stret long dispela man i litimapim nem bilong God o autim tok tru bilong God. Olsem na Devit i beten olsem: “Bikpela, yu ken helpim mi long tokaut stret, na long litimapim nem bilong yu.” (Song 51:15) God i lusim pinis rong bilong Devit, olsem na nau bel bilong em i no gat tok, na dispela i kirapim em long skulim ol sinman long pasin na lo bilong God na em i ken litimapim nem bilong God. Ol man em God i bin lusim rong bilong ol, olsem Devit, ol i ken amamas long pasin sori God i bin mekim long ol, na oltaim ol i mas autim tok tru bilong God na “litimapim nem bilong” em.—Song 43:3.
Givim Gutpela Ofa Long God
14 Devit i bin kisim gutpela save na tingting, na em i tokim God: “Yu no laik bai mi bringim abus bilong mekim ofa long yu. Sapos mi kilim abus bilong ofa na paia i kukim olgeta, maski, yu no amamas long dispela.” (Song 51:16) Lo bilong God long bipo i bin tok, ol i mas kukim animal bilong mekim ofa long God, tasol dispela kain ofa i no inap tekewe rong Devit i bin mekim, olsem pasin pamuk na kilim man i dai. Em i mas tanim bel na bai God i ken marimari long em. Olsem na yumi no ken ting, sapos yumi mekim sampela gutpela wok samting, yumi ken wok long mekim sampela pasin nogut tu.
15 Na Devit i beten moa: “Mi daunim mi yet na mi stap aninit long yu. Dispela em i ofa bilong mi. Mi save, yu no givim baksait long man i pilim hevi long sin na i daunim em yet.” (Song 51:17) Man i bin mekim rong, sapos em i tanim bel tru, dispela i olsem ofa em i mekim long God. Em i no bikhet o kros. Bel bilong em i hevi tru long rong em i mekim. Nau em i gat pasin daun. Em i save God i no orait long rong em i bin mekim, na em i wok strong long stretim dispela na bai God i ken laikim em gen. Yumi mas tanim bel pastaim na givim bel gen long God, na bai God i orait gen long yumi.—Nahum 1:2.
16 Sapos yumi hevi tru long rong yumi bin mekim, na yumi laik tok sori long God, em bai harim. Sapos yumi bin pundaun na mekim ol pasin kranki na yumi bel hevi tru long dispela na yumi krai long God i ken marimari long yumi, orait, sapos yumi tanim bel na mekim pasin daun, na yumi bilip long ofa bilong Krais, Jehova i ken sori long yumi, maski rong bilong yumi i bikpela. Olsem na bel bilong yumi i no ken bagarap olgeta long rong yumi bin mekim. (Aisaia 57:15; Hibru 4:16; 1 Jon 2:1) Tasol nogut yumi tingting long abrusim strafe na yumi beten. Yumi mas beten na bai God i ken orait gen long yumi. God i bin lusim rong bilong Devit, tasol God i bin givim strafe long em tu.—2 Samuel 12:11-14.
Tingim Klinpela Lotu
17 Sapos yumi mekim bikpela rong, bai yumi bel hevi na yumi tingting planti, na bel bai kirapim yumi long krai long God na askim em long lusim dispela rong. Na yumi mas askim God long marimari long ol narapela tu na helpim ol. Devit i bin mekim olsem. Em i beten olsem: “Long laik bilong yu yet, yu ken mekim gut long ol manmeri bilong Saion. Yu ken sanapim gen banis bilong Jerusalem.”—Song 51:18.
18 Devit i bin tingting long taim God bai orait gen long em, tasol em i tingting tu long Saion, em biktaun Jerusalem. Devit i gat laik long wokim wanpela haus lotu bilong Jehova long dispela taun. Rong Devit i bin mekim em inap nogutim olgeta narapela Israel tu. (Lukim 2 Samuel sapta 24.) I olsem dispela rong i bin nogutim “banis bilong Jerusalem,” olsem na Devit i beten long God: “Yu ken sanapim gen.”
19 Sapos yumi bin mekim bikpela rong, na God i bin lusim tingting long dispela rong, nau yumi ken askim em long stretim sampela hevi em rong bilong yumi i bin kamapim long ol narapela man. Ating rong bilong yumi i bin mekim nogut long nem holi bilong God, o mekim nogut long kongrigesen, o putim hevi long famili bilong yumi. Papa bilong yumi long heven em i gat pasin bilong sori, na em inap tekewe sem em rong bilong yumi i bin mekim long nem bilong em, na spirit holi bilong em inap strongim bek kongrigesen, na mekim gut bel bilong husat long famili bilong yumi ol i save mekim wok bilong em. Tasol maski yumi bin mekim rong o nogat, bikpela tingting bilong yumi em bilong mekim gut nem bilong Jehova, na yumi laik bai lain bilong em ol i stap orait.—Matyu 6:9.
20 Olsem wanem sapos Jehova i “sanapim gen banis bilong Jerusalem”? Devit i beten long Jehova olsem: “Long dispela taim bai yu laikim tumas ol gutpela na stretpela ofa, na olkain ofa paia i kukim olgeta. Na bai mipela i ofaim ol bulmakau man long alta bilong yu.” (Song 51:19) Devit i laik bai Jehova i ken amamas gen long lotu em lain bilong Devit i mekim long Jehova, na em i ken amamas tu long “olkain ofa paia i kukim olgeta” na ol i ofaim long em. Sapos ol i tanim bel na mekim pasin daun na mekim ol dispela ofa olsem, Jehova bai sori long ol na amamas long ol. Na ol bai amamas long marimari Jehova i mekim long ol, olsem na bai ol “i ofaim ol bulmakau man” long em, i olsem nambawan ofa. Long nau yumi laik givim ol nambawan samting bilong yumi long Jehova, i olsem ofa. “Oltaim yumi mas givim biknem long God . . . na dispela pasin i mas i stap olsem ofa yumi save givim long God. Yes, oltaim maus bilong yumi i mas litimapim nem bilong en.”—Hibru 13:15.
Jehova i Harim Krai Bilong Yumi
21 Beten Devit i mekim long Song 51 i lainim yumi olsem: Sapos yumi mekim rong yumi mas tanim bel tru. Na Song 51 i lainim yumi long planti samting moa, olsem: Sapos yumi mekim rong na yumi tanim bel, yumi ken bilip long God bai marimari long yumi. Tasol bikpela samting tru, em yumi mas tingting long samting nogut em rong bilong yumi i bin mekim long nem bilong Jehova. (Ves 1-4) Na yumi ken beten askim Jehova long tingim skin bilong yumi i gat rong bilong Adam i stap long en, olsem na Jehova i ken sori long yumi. (Ves 5) Na yumi no ken giaman; na yumi mas kisim gutpela tingting i kam long God. (Ves 6) Sapos yumi mekim rong, yumi mas askim Jehova long stretim yumi na givim gutpela bel na tingting long yumi.—Ves 7-10.
22 Na Song 51 i lainim yumi moa olsem: Yumi no ken mekim rong i go i go inap long em i pas strong long yumi, nogut Jehova i tekewe spirit bilong em long yumi. Sapos spirit holi i stap wantaim yumi, em bai inapim yumi long skulim ol man long pasin bilong Jehova. (Ves 11-13) Sapos yumi popaia na yumi tanim bel, Jehova bai larim yumi i litimapim yet nem bilong em, long wanem, em i no save givim baksait long man i mekim pasin daun na i bel hevi tru long rong bilong em. (Ves 14-17) Na taim yumi beten, yumi mas tingim ol narapela man tu, i no yumi tasol. Yumi mas askim Jehova long helpim na mekim gut long ol man i save lotu long em.—Ves 18, 19.
23 Dispela gutpela beten bilong Devit i ken kirapim yumi na strongim bel bilong yumi na bai yumi ken save, sapos yumi pundaun na mekim rong, i no olsem yumi lus olgeta. Nogat. Jehova, em Papa bilong yumi, em i ken marimari long yumi sapos yumi tanim bel na krai long em long helpim yumi, na yumi givim bel tru long em. Em i no save givim baksait long man i mekim pasin daun!
Bai Yu Bekim Olsem Wanem?
◻ Bilong wanem Kristen i mas i gat klinpela bel na spirit bilong God?
◻ Olsem wanem man i tanim bel em inap skulim narapela man long lo bilong God?
◻ Jehova i ting olsem wanem long man i mekim pasin daun?
◻ Song 51 i lainim yumi long wanem ol samting?
[Askim Bilong Stadi]
1. Jehova i ting olsem wanem long man i save lotu long em, tasol em i mekim rong, na bihain em i tanim bel?
2, 3. Ol elda i mas tingim wanem samting taim brata o sista i bin mekim rong?
4. Bilong wanem Devit i askim God long “nupela klinpela bel”?
5. (a) “Klinpela bel” em wanem samting? (b) “Nupela spirit” Devit i laikim, em wanem samting?
6. Bilong wanem Devit i krai long Jehova i no ken tekewe spirit holi long em?
7. Bilong wanem yumi mas beten askim God long givim spirit holi long yumi? Tasol yumi no ken mekim wanem long spirit holi?
8. Sapos yumi mekim rong, tasol yumi laik amamas long God i kisim bek yumi, orait, yumi mas mekim wanem?
9. Devit i laik bai God i mekim wanem long em?
10, 11. (a) Devit bai lainim ol narapela long mekim wanem? (b) Devit i mas mekim wanem samting pastaim na bai em inap “lainim ol” narapela?
12. Taim Devit i save God i bin lusim rong bilong em, dispela i helpim Devit olsem wanem?
13. Taim man i mekim rong, God i mas mekim wanem pastaim na bai man i ken litimapim nem bilong God?
14. (a) Lo bilong God long bipo i makim wanem kain ofa ol man i mas mekim? (b) Sapos yumi mekim sampela gutpela wok, bilong wanem yumi no ken ting dispela em inapim yumi na yumi ken mekim pasin i no stret?
15. Man i dediket long Jehova na em i bin mekim rong, tasol em i mekim pasin daun, em i gat wanem kain tingting na laik?
16. God i ting olsem wanem long man i bel hevi long rong em i bin mekim?
17. Yumi askim God long lusim rong bilong yumi, na yumi mas mekim wanem narapela samting tu?
18. Bilong wanem Devit i tingim Saion taim em i beten?
19. Sapos Jehova i lusim rong bilong yumi, yumi ken beten long wanem samting?
20. Olsem wanem Jehova i ken amamas long ofa bilong ol Israel?
21, 22. Song 51 i lainim yumi long wanem ol samting?
23. Olsem wanem Song 51 i ken strongim bel bilong yumi?
[Piksa long pes 15]
Yu save askim God long spirit holi na yu was gut, nogut yu mekim nogut long en?
[Piksa long pes 17]
Yu mas amamas long pasin sori bilong Jehova na autim tok i tru bilong em