Man i Bilip Tru Long Jehova Em Bai Stap Bel Isi

‘Bikpela i save harim singaut bilong mi.’​—SNG. 4:3.

 1, 2. (a) Wanem bikpela hevi i painim Devit? (b) Bai yumi skelim wanem ol song?

KING DEVIT i mekim wok king long Israel inap sampela yia pinis, na nau bikpela hevi i painim em. Bikhet pikinini bilong em, Apsalom, i tok em yet i king, na Devit i mas lusim Jerusalem. Na tu, wanpela pren bilong Devit i givim baksait long em, na nau Devit i krai na i wokabaut lek nating long maunten Oliv, na sampela man i stap gut long em ol i wokabaut wantaim em. Na Simei, em bilong wanpela famili long haus bilong King Sol, em i wok long tromoi ol ston na graun long Devit na tok nogut long em.​—2 Sml. 15:​30, 31; 16:​5-14.

² Olsem wanem? Dispela hevi bai mekim na Devit i dai wantaim bikpela bel hevi na sem? Nogat, long wanem, em i bilip long Jehova. Dispela i kamap klia long Song 3, we Devit i bin stori long em i mas ranawe long Apsalom. Devit i bin raitim tu Song 4. Dispela tupela song wantaim i kamapim klia olsem God i save harim beten bilong ol man. (Sng. 3:4; 4:3) Ol dispela song i helpim yumi long kliagut olsem Jehova i stap wantaim ol gutpela wokboi bilong em long san na long nait, em i sambai long ol na mekim ol i stap bel isi. (Sng. 3:5; 4:8) Olsem na i gutpela sapos yumi skelim dispela tupela song na lukim olsem wanem ol i helpim yumi long stap bel isi na bilip long God.

Taim ‘Ol Birua i Mekim Nogut Long Yumi’

 3. Olsem Song 3:​1, 2 i soim, wanem hevi i painim Devit?

³ Wanpela man i kam na i tokim Devit olsem: “Nau olgeta man long ol lain bilong Israel i redi long bihainim Apsalom.” (2 Sml. 15:13) Devit i tingting long olsem wanem Apsalom inap kirapim planti man long sapotim em, na em i tok: “Bikpela, ol birua bilong mi i kamap planti moa. Ol i wok long mekim nogut long mi. Ol i tokim mi olsem, ‘God bai i no inap helpim yu.’” (Sng. 3:​1, 2) Planti man bilong Israel i ting Jehova bai i no kisim bek Devit long han bilong Apsalom na ol lain bilong em.

 4, 5. (a) Devit i bilip tru long wanem samting? (b) Dispela tok ‘God i pinisim bel hevi bilong man’ i makim wanem samting?

⁴ Tasol Devit i stap bel isi, long wanem, em i bilip tru long God. Em i singsing olsem: “God, yu olsem hap plang bilong pait i haitim mi. Yu tasol yu mekim mi i win. Yu tasol yu pinisim bel hevi bilong mi na mekim mi i sanap strong.” (Sng. 3:3) Devit i bilip tru olsem Jehova bai lukautim em olsem hap plang i save lukautim soldia. Yes, lapun king i ranawe, em i sem na i karamapim na daunim het bilong en. Tasol God Antap Tru bai senisim ol samting na Devit bai kisim biknem. Jehova bai mekim na Devit inap sanap stret na apim gen het bilong em. Devit i singaut long God, em i save tru olsem God bai harim beten bilong em. Olsem wanem? Yu gat wankain pasin olsem Devit long bilip tru long Jehova?

⁵ Taim Devit i tok ‘yu mekim mi i sanap strong,’ em i save olsem helpim em bai kisim, em i kam long Jehova. Wanpela Baibel (Today’s English Version) i tanim dispela ves olsem: “Tasol yu, BIKPELA, oltaim yu stap olsem hap plang bilong lukautim mi; yu helpim mi long winim pait na givim mi strongpela bel.” Wanpela buk i stori long dispela tok ‘yu mekim mi i sanap strong’ na i tok: “Taim God i mekim man i sanap strong, dispela i makim olsem God i mekim man i stap bel isi na em inap bilip na wetim gutpela samting bai kamap bihain.” Ol man i fosim Devit long lusim wok king bilong en, olsem na i gat as na em i bel hevi. Tasol taim ‘God i mekim em i sanap strong,’ dispela i mekim na Devit i no pret, em i stap bel isi, na i bilip tru long God.

‘God i Harim Singaut Bilong Mi’

 6. Bilong wanem Devit i tok Jehova i stap long maunten holi bilong em na i harim beten bilong em?

⁶ Devit i bilip tru long Jehova na i stap bel isi, na em i tok moa: “Mi save singaut long God i helpim mi. Em i stap long maunten bilong em yet na em i harim singaut bilong mi.” (Sng. 3:4) Olsem Devit i bin tokim ol man long mekim, ol i kisim Bokis Kontrak i go long maunten Saion. Wanem hap Bokis Kontrak i stap long en, i olsem God i stap long dispela hap. (Ritim 2 Samuel 15:​23-25.) Olsem na i stret Devit i tok Jehova i stap long maunten holi bilong em na i harim beten bilong em.

 7. Bilong wanem Devit i no pret?

⁷ Devit i bilip tru olsem beten bilong em i no inap lus nating, olsem na em i no pret. Em i singsing olsem: “Mi save slip long bet na mi slip i dai. Na bihain mi save kirap gen na mi stap gut, long wanem, God i save lukautim mi.” (Sng. 3:5) Long nait tu, taim birua inap kam, Devit i no pret long slip. Em i save olsem em bai stap gut, long wanem, ol samting i bin painim em i helpim em long save tru olsem God bai sambai long em. Yumi tu inap bilip olsem, sapos yumi bihainim ol “lo bilong Bikpela” na yumi no lusim em.​—Ritim 2 Samuel 22:​21, 22.

 8. Olsem wanem Song 27:​1-4 i soim olsem Devit i bilip tru long God?

⁸ Devit i bilip tru long God na i stap bel isi, dispela i kamap ples klia long narapela song em i raitim we em i tok: “God em i lait bilong mi na em i helpim bilong mi. Olsem na mi no ken guria long wanpela man. Bikpela tasol i save lukautim mi, olsem na mi no ken pret long wanpela samting. . . . Maski sapos bikpela lain ami i kam raunim mi, bai mi no ken pret. . . . Mi bin askim God long wanpela samting tasol, na mi laikim tumas bai em i mekim olsem. Mi askim em bai mi ken i stap long haus bilong em inap olgeta de mi gat laip. Mi laik amamas long em i gutpela tumas long mi. Na mi laik askim em long soim mi gutpela rot.” (Sng. 27:​1-4) Sapos yu gat wankain tingting olsem Devit na i no gat wanpela samting i pasim yu, orait bai yu bung oltaim wantaim ol wanbilip i lotuim Jehova.​—Hib. 10:​23-25.

 9, 10. Song 3:​6, 7 i stori long samting nogut i ken painim ol birua bilong Devit, tasol bilong wanem yumi ken tok Devit i no gat pasin bilong bekim rong?

⁹ Maski Apsalom i bikhet tru na planti narapela i givim baksait long Devit, em i singsing olsem: “10,000 birua i banisim mi long olgeta hap, tasol mi no ken pret long ol. Bikpela, yu kam. Yu God bilong mi, yu kam helpim mi. Yu save paitim nabaut ol birua bilong mi. Yu save brukim tit bilong ol man nogut.”​—Sng. 3:​6, 7.

¹⁰ Devit i no gat pasin bilong bekim rong. Sapos wanpela i mas “paitim nabaut” ol birua bilong em, God yet bai mekim olsem. King Devit i bin raitim wanpela kopi bilong Lo, na long dispela Lo Jehova i tok: “Bikpela bai i bekim rong bilong ol na mekim save long ol.” (Lo 17:​14, 15, 18; 32:35) Na tu, God bai “brukim tit bilong ol man nogut.” Taim God i mekim olsem, ol birua bai i no inap givim hevi moa. Jehova i save long ol man nogut ol i husat, long wanem, em i “save lukim tingting na laik bilong man.” (1 Sml. 16:7) Yumi amamas tru long God i mekim na yumi gat bilip na yumi gat strong inap long sakim nambawan man nogut, Satan. Klostu nau em bai kalabus olsem wanpela laion i singaut nating na i no gat tit, na i stret em bai bagarap!​—1 Pita 5:​8, 9; Rev. 20:​1, 2, 7-10.

‘Bikpela Tasol i Kisim Bek Yumi’

11. Bilong wanem yumi mas beten askim God long helpim ol wanbilip?

¹¹ Devit i save olsem Jehova tasol inap helpim em. Tasol dispela man bilong raitim song i no tingim em yet tasol. Nogat. Em i tingim tu lain bilong Jehova, olsem na em i mekim dispela tok long pinis bilong singsing em i raitim: “Bikpela, yu wanpela tasol yu save kisim bek mipela na mipela i no save bagarap. Yu ken mekim gut long ol manmeri bilong yu.” (Sng. 3:8) Tru, ol hevi bilong Devit i bikpela tru, tasol em i tingim lain bilong Jehova na em i bilip olsem God bai blesim ol. Yumi tu i mas tingim ol wanbilip bilong yumi. Yumi mas tingim ol taim yumi beten, yumi ken beten askim Jehova long givim holi spirit long ol na bai ol i ken strongim bel na strong long autim gutnius.​—Efe. 6:​17-20.

12, 13. Wanem samting i painim Apsalom? Devit i mekim wanem?

¹² Apsalom i kisim sem long pinis bilong laip bilong em. Dispela i stap olsem tok lukaut long ol man husat i tingting long mekim nogut long ol narapela, na moa yet sapos ol i laik mekim nogut long lain God i makim, olsem Devit. (Ritim Sindaun 3:​31-35.) Wanpela pait i kamap na lain bilong Apsalom i lus. Apsalom i sindaun long donki na i go, na bikpela gras bilong em i pas long han bilong wanpela bikpela diwai. Em i hangamap i stap​—em i stap laip, tasol em i no inap mekim wanpela samting​—na Joap i kam na sutim 3-pela spia long lewa bilong em na kilim em i dai.​—2 Sml. 18:​6-17.

¹³ Olsem wanem? Devit i amamas taim em i harim stori long samting i painim pikinini bilong em? Nogat. Em i wokabaut i go i kam na krai na singaut olsem: “O tarangu pikinini bilong mi, Apsalom. Pikinini bilong mi, pikinini bilong mi, Apsalom. I gutpela sapos mi bin senisim yu na mi bin i dai. O Apsalom, pikinini bilong mi, pikinini bilong mi.” (2 Sml. 18:​24-33) Tok bilong Joap tasol i mekim na bel hevi i no daunim Devit olgeta. Sori tru long Apsalom, bikpela laik bilong kisim namba i mekim na em i pait long papa bilong em yet​—em man Jehova i makim​—na Apsalom i bagarapim em yet!​—2 Sml. 19:​1-8; Snd. 12:21; 24:​21, 22.

Devit i Tokaut Gen Olsem Em i Bilip Long God

14. Ating i gat wanem as na Devit i raitim Song 4?

¹⁴ Song 4 i wankain olsem Song 3, em i wanpela beten bilong Devit i soim olsem em i bilip tru long Jehova. (Sng. 3:4; 4:3) Devit i bin raitim dispela song bihain long Apsalom i lus long pait, ating em i raitim bilong kamapim olsem em i no bel hevi moa na i tenkyu long God. O ating em i tingim ol singa bilong lain Livai na raitim dispela song. Tasol maski i gat wanem as na em i raitim, pasin bilong tingim tingim long bel dispela song, inap strongim pasin bilong yumi long bilip long Jehova.

15. I gat wanem as na yumi ken beten long Jehova long rot bilong Pikinini bilong em na bilip olsem em bai harim?

¹⁵ Devit i kamapim gen olsem em i bilip tru long God, na tu, em i kamapim klia em i bilip olsem pasin bilong beten i helpim em. Em i singsing olsem: “God, yu save mekim mi i win. Taim mi singaut long yu, yu ken harim singaut bilong mi. Bipo mi bel hevi nogut tru, na yu bin pinisim bel hevi bilong mi. Yu ken marimari long mi nau na harim prea bilong mi.” (Sng. 4:1) Yumi tu i ken bilip olsem pasin bilong beten bai helpim yumi, sapos yumi bihainim stretpela pasin. Yumi save olsem Jehova em i God bilong stretpela pasin, na em i save blesim lain bilong em. Yumi bilip long ofa bilong Jisas long baim bek ol man, olsem na yumi ken beten long God long rot bilong Pikinini bilong em na bilip olsem em bai harim. (Jon 3:​16, 36) Dispela i mekim yumi i stap bel isi tru!

16. Ating wanem samting i bin mekim Devit i bel hevi?

¹⁶ Sampela taim ating hevi i kamap na i mekim bel bilong yumi i no stap isi. Ating inap sotpela taim dispela i kamap long Devit, long wanem, em i singsing olsem: “Yupela ol man, hamas taim bai yupela i wok long daunim biknem bilong mi? Hamas taim bai yupela i laikim tumas ol kain kain rabis samting? Hamas taim bai yupela i bihainim ol pasin bilong giaman?” (Sng. 4:2) Dispela tok “ol man” i makim ol man bilong graun em ol i no gutpela. Ol birua bilong Devit i “laikim tumas ol kain kain rabis samting.” Wanpela Baibel (New International Version) i tanim dispela ves olsem: “Inap long wanem taim bai yupela i laikim ol tingting kranki na painim ol god giaman?” Maski sapos pasin bilong ol narapela i mekim yumi i bel hevi, yumi mas givim bel yet long beten na kamapim olsem yumi bilip long God tru.

17. Stori long wanem samting inap kamap we yumi gat rot long bihainim tok i stap long Song 4:3.

¹⁷ I klia tru olsem Devit i bilip tru long God, em i tok: “Yupela i mas save gut long dispela tok. Ol man i save aninit tru long [“stap gut long,” NW] Bikpela, em i makim ol bilong em yet. Na olgeta taim mi singaut long em, em i save harim singaut bilong mi.” (Sng. 4:3) Bilong i stap gut long Jehova, man i mas i gat strongpela bel na bilip tru long em. Famili Kristen i mas i gat ol dispela pasin taim kongrigesen i rausim wanpela wanblut bilong ol husat i no tanim bel. God i save blesim ol man husat i stap gut long em na i bihainim ol rot em i makim. Pasin bilong stap gut long Jehova na bilip tru long em i kamapim amamas insait long lain bilong em.​—Sng. 84:​11, 12.

18. Olsem Song 4:4 i tok, yumi mas mekim wanem sapos wanpela i mekim sampela tok o pasin i no stret long yumi?

¹⁸ Olsem wanem sapos wanpela i mekim sampela tok o pasin i bagarapim bel bilong yumi? Yumi inap stap amamas sapos yumi bihainim tok bilong Devit, em i tok: “Sapos yu kros, orait yu no ken mekim sin. Skelim long bel dispela samting taim yu slip long bet, na no ken toktok.” (Sng. 4:​4, NW) Sapos wanpela i bin mekim sampela tok o pasin nogut long yumi, yumi no ken mekim sin na bekim rong. (Rom 12:​17-19) Yumi ken skelim long bel dispela samting taim yumi slip long bet. Sapos yumi beten long dispela samting, ating tingting bilong yumi bai senis na pasin laikim i kirapim yumi long fogivim narapela. (1 Pita 4:8) Yumi ken tingim tok bilong aposel Pol, i luk olsem Song 4:4 i as bilong en, em i tok: “Sapos yupela i belhat, orait no ken mekim sin. No ken larim san i go daun na yupela i belhat yet. Na no ken opim rot long Satan.”​—Efe. 4:​26, 27.

19. Song 4:5 i givim wanem skul long yumi long sait bilong ol wok lotu yumi save mekim?

¹⁹ Devit i kamapim klia olsem yumi mas bilip long God, em i singsing olsem: “Yupela i mas mekim olkain ofa Bikpela i save laikim. Na yupela i mas bilip tru long em.” (Sng. 4:5) Bilong God i ken orait long ol ofa lain Israel i mekim, ol i mas i gat stretpela tingting na mekim. (Ais. 1:​11-17) Sapos yumi laik bai God i orait long ofa bilong yumi, em ol wok lotu yumi mekim, orait yumi tu i mas i gat stretpela tingting na bilip tru long em.​—Ritim Sindaun 3:​5, 6; Hibru 13:​15, 16.

20. ‘Lait i kam long pes bilong Jehova’ i makim wanem samting?

²⁰ Devit i tok moa: “Planti man i save tok: ‘Husat bai mekim gut long mipela?’ O Jehova, mekim lait bilong pes bilong yu i lait long mipela.” (Sng. 4:​6, NW) ‘Lait i kam long pes bilong Jehova’ i makim olsem em i orait long man. (Sng. 89:​15, NW) Olsem na taim Devit i beten olsem: “Mekim lait bilong pes bilong yu i lait long mipela,” i olsem em i askim God long ‘mekim gut long ol.’ Yumi bilip long Jehova, olsem na em i orait long yumi na yumi stap amamas na mekim laik bilong em.

21. Sapos yumi givim bel olgeta long wok bilong bungim kaikai long nau, yumi ken save long wanem samting?

²¹ Devit i wetim ol amamas God bai givim em, ol i winim amamas bilong taim bilong bungim kaikai i mau long gaden, na em i singsing long Jehova: “Taim wit na wain i kamap planti long gaden, ol man i save amamas. Tasol amamas yu [“bai,” NW] putim long bel bilong mi, em i winim tru amamas bilong ol.” (Sng. 4:7) Yumi save olsem yumi bai kisim bikpela amamas sapos yumi givim bel olgeta long wok autim tok long nau. (Luk 10:2) Ol Kristen God i bin makim ol i “bikpela lain” na ol i go pas long wok, na long nau yumi amamas long namba bilong ol man i bungim kaikai i wok long i go bikpela. (Ais. 9:3) Olsem wanem? Yu insait long dispela gutpela wok bilong bungim kaikai?

Bilip Tru Long God na Mekim Wok i Go

22. Olsem Song 4:8 i makim, ol Israel i stap olsem wanem taim ol i bihainim Lo Bilong God?

²² Long pinis bilong dispela song, Devit i tok: “Bikpela, yu tasol yu save lukautim mi na mi stap gut. Mi no save pret long wanpela samting. Taim mi go long bet, wantu mi save slip i dai.” (Sng. 4:8) Taim lain Israel i bihainim Lo Bilong Jehova, ol i stap wanbel wantaim God na ol i stap bel isi. Olsem, long taim Solomon i stap king, ‘ol manmeri bilong Juda na Israel ol i sindaun gut.’ (1 Kin. 4:25) Ol man i bilip long God, ol i stap bel isi maski ol i stap klostu long ol lain i save kros na pait. Olsem Devit, yumi save slip gut, long wanem, God i givim bel isi long yumi.

23. Sapos yumi bilip tru long God, bai yumi kisim wanem samting?

²³ Yumi mas trastim Jehova na mekim wok bilong em i go. Yumi mas bilip na beten long em, long dispela rot bai yumi kisim “bel isi bilong God i winim tru tingting bilong man.” (Fili. 4:​6, 7) Dispela i givim bikpela amamas long yumi! Sapos yumi bilip tru long Jehova, orait bai yumi save tru olsem ol gutpela samting bai kamap bihain.

Bai Yu Bekim Olsem Wanem?

• Wanem ol hevi i painim Devit long rot bilong Apsalom?

• Olsem wanem tok bilong Song 3 i helpim man long i stap bel isi?

• Olsem wanem Song 4 i strongim yumi long bilip long Jehova?

• Taim yumi bilip tru long God, olsem wanem dispela inap helpim yumi?

[Piksa long pes 29]

Maski Devit i mas ranawe long Apsalom, em i bilip long Jehova

[Ol Piksa long pes 32]

Yu save bilip tru long Jehova?