Jehova Em i Helpim Bilong Mi

“Ol samting yupela i sot long en bai yupela i kisim long mi, Bikpela tasol.” ​—NAM. 18:20.

1, 2. (a) Olsem wanem long lain Livai taim Jehova i tilim graun long ol arapela lain Israel? (b) Jehova i mekim wanem tok promis long ol Livai?

OL ISRAEL i kisim pinis bikpela hap bilong Graun Bilong Promis, na Josua, Hetpris Eleasar, na ol hetman i bung bilong tilim graun. Em graun ol wan wan lain Israel bai kisim olsem graun bilong ol. (Nam. 34:​13-29) Jehova i givim hap graun long olgeta wan wan lain, tasol lain Livai nogat. (Jos. 14:​1-5) Bilong wanem lain Livai i no bin kisim hap graun insait long Graun Bilong Promis? Yu ting God i lusim tingting long ol?

² Tok Jehova i mekim long lain Livai i bekim dispela askim. Jehova i promis olsem em bai i no lusim ol. Em i tok: “Ol samting yupela i sot long en bai yupela i kisim long mi, Bikpela tasol.” (Nam. 18:20) Taim Jehova i tok: “Ol samting yupela i sot long en bai yupela i kisim long mi,” em i mekim wanpela gutpela tok promis tru long ol Livai. Bai yu pilim olsem wanem sapos Jehova i mekim kain tok olsem long yu? Ating bai yu askim olsem, “Jehova bai mekim kain tok promis long mi, wanpela Kristen i no gutpela olgeta, na givim mi ‘ol samting mi sot long en’? Dispela em i wanpela bikpela askim, long wanem, yu na ol manmeri yu laikim tumas i insait long en. Olsem na yumi bai skelim olsem wanem man i larim Jehova i stap olsem helpim bilong em. Dispela bai helpim yumi long kliagut long olsem wanem Jehova inap i stap olsem helpim bilong ol Kristen long nau. Na bai yumi kliagut long olsem wanem em i ken stap olsem helpim bilong yu, maski yu bai kisim laip long heven o long Paradais hia long graun.

Jehova i Bin Lukautim Ol Livai

 3. Olsem wanem God i bin makim lain Livai long mekim wok bilong em?

³ Paslain long Jehova i givim Lo long lain Israel, ol papa i mekim wok pris long famili bilong ol yet. Tasol taim Jehova i givim Lo long lain Israel, em i makim sampela bilong lain Livai long mekim wok pris na sampela bilong i stap helpim bilong ol pris. Olsem wanem dispela i kamap? Taim Jehova i bagarapim ol fesbon pikinini man bilong Isip, em i tok olsem em i ‘makim bilong em yet’ olgeta fesbon pikinini man bilong ol Israel. Dispela lain bai stap olsem lain bilong mekim wok bilong em. Tasol Jehova i tok em bai kisim ol Livai olsem senis bilong ol fesbon pikinini man bilong Israel, na ol Livai bai mekim wok bilong em. Namba bilong ol fesbon pikinini man insait long lain Israel i winim namba bilong ol Livai, olsem na Jehova i tokim ol Israel long givim mani bilong baim bek ol dispela fesbon pikinini i “winim namba bilong ol Livai.” (Nam. 3:​11-13, 41, 46, 47) Orait, nau ol Livai inap kirap mekim wok God bilong Israel i makim ol long mekim.

4, 5. (a) God i givim wanem samting long ol Livai we i dia tumas? (b) Olsem wanem Jehova i bin lukautim ol Livai?

⁴ Taim Jehova i makim ol Livai long mekim wok bilong em, olsem wanem em i kamap helpim bilong ol? Jehova i no givim hap graun long ol, nogat, em i givim ol wanpela samting i dia tumas, em wanpela bikpela wok ol i mas mekim. Em wok bilong i “stap pris bilong Bikpela.” (Jos. 18:7) Buk Namba sapta 18 i helpim yumi long kliagut olsem ol bai kisim yet ol samting bilong skin ol i nidim. (Ritim Namba 18:​19, 21, 24.) Ol Livai i save kisim namba 10 hap bilong olgeta samting ol Israel i givim “olsem pe bilong wok ol i mekim bilong lukautim haus sel.” Dispela i makim olsem ol i kisim namba 10 hap bilong olgeta kaikai samting na bilong ol nupela animal i kamap. Na bilong lukautim ol pris, ol Livai bai givim 1-pela hap i gutpela tru bilong ol dispela 10-pela hap ol i bin kisim.a (Nam. 18:​25-29) Ol pris i kisim tu “ol dispela ofa” ol Israel i kisim i kam long God long hap ol i lotu long en. So ol pris i ken bilip tru olsem Jehova bai lukautim ol long ol samting ol i nidim.

⁵ Sampela i ting ol Israel i bin givim narapela namba 10 hap. Na ol famili Israel i save yusim dispela bilong kisim kaikai, dring, na amamas long taim bilong ol bung holi long olgeta yia. (Lo 14:​22-27) Tasol i gat narapela wok long dispela namba 10 hap. Ol Israel i save selebretim wanpela yia Sabat long olgeta 7-pela yia. Long pinis bilong namba 3 na namba 6 yia insait long dispela 7-pela yia, ol Israel i save yusim dispela namba 10 hap bilong helpim ol rabisman na ol Livai. Wanem as na ol Livai i insait long dispela lo? Long wanem, ol i no gat graun bilong ol yet.​—Lo 14:​28, 29.

 6. Ol Livai i no gat hap graun, olsem na ol i sindaun we?

⁶ Ol Livai i no gat hap graun, olsem na ol i sindaun we? God i lukautim ol. Em i givim ol Livai 48 taun wantaim hap graun i stap klostu long ol dispela taun. Sikspela taun bilong ples hait i insait long ol dispela taun. (Nam. 35:​6-8) So ol Livai i gat hap bilong i stap long en taim ol i no mekim wok long haus lotu bilong God. Jehova i lukautim gut ol lain husat i mekim wok bilong em. Ol Livai i mekim wanem bilong soim olsem Jehova i stap helpim bilong ol? Ol i bilip olsem em i gat strong bilong givim ol samting ol i nidim na em i gat laik long lukautim ol.

 7. Olsem wanem ol Livai inap soim olsem Jehova em i helpim bilong ol?

⁷ Lo i no makim wanpela strafe long man Israel husat i no givim namba 10 hap. Tasol taim ol manmeri i no bihainim lo bilong Jehova long givim namba 10 hap, dispela i givim hevi long ol pris na ol Livai. Dispela samting i bin kamap long taim bilong Nehemia. Olsem na ol Livai i mas wok long ol gaden na ol i no inap mekim wok bilong helpim ol pris. (Ritim Nehemia 13:10.) Bilong ol Livai i kisim ol samting ol i nidim, lain Israel i mas bihainim Lo Bilong Jehova. Na ol pris na ol Livai i mas bilip long Jehova na long ol rot Jehova i makim bilong lukautim ol.

Ol Livai Em Jehova i Stap Helpim Bilong Ol

 8. Wanem samting i mekim na Asap i tingting planti?

⁸ Jehova i stap helpim bilong lain Livai. Tasol wan wan Livai i bin tokaut olsem Jehova i stap helpim bilong ol taim ol i stori long pasin bilong ol long trastim em na i stap pren bilong em. (Kra. 3:24) Olsem, Baibel i stori long wanpela Livai husat i save raitim na mekim ol singsing na em i bin tok olsem Jehova i helpim bilong em. Bai yumi kolim em Asap, tasol ating em i bilong famili Asap, em man Livai i go pas long singsing long taim bilong Devit. (1 Sto. 6:​31-43) Long Song 73 yumi ritim olsem Asap i jeles long ol man nogut na em i no save wai ol man nogut i stap gutpela tru. Em i tok: “Mi bin lukaut gut na bel bilong mi i stap klin, na mi no bin mekim sampela sin. Ating dispela em i lus nating, a?” Ating inap sotpela taim em i bin lusim tingting olsem wok Jehova i givim long em i wanpela spesel wok. Em i lusim tingting olsem Jehova i tok promis long lukautim em. Em i bel hevi i go inap long taim em i “go insait long haus bilong [God].”​—Sng. 73:​2, 3, 12, 13, 17.

9, 10. Bilong wanem Asap inap tok God bai ‘stap wantaim em na em inap tru oltaim oltaim’?

⁹ Long haus bilong God, Asap i kirap senisim tingting bilong em. Ating kain samting olsem i bin kamap long yu tu. Ating inap sotpela taim yu bin lusim tingting olsem wok bilong Jehova yu mekim em wanpela spesel wok, na yu kirap tingting long ol mani kago yu inap kisim. Tasol taim yu stadi long Baibel na go long ol miting Kristen, yu kirap gen long kisim tingting i wankain olsem bilong Jehova. Asap i kliagut long samting bai painim ol man nogut. Em i tingim ol gutpela samting em i bin kisim olsem wanpela wokman bilong God. Em i tok olsem Jehova bai holim han bilong em na stiaim em. Na em i tok long Jehova: “God, mi laikim yu moa yet. Mi no laikim olgeta samting bilong graun olsem mi laikim yu.” (Sng. 73:​23, 25) Na em i tok Jehova i stap wantaim em na em inap tru. (Ritim Song 73:26.) Asap i tok: “Bodi na tingting bilong mi i no gat strong moa.” Tasol em i tok moa olsem, “God yu yet yu strong bilong mi. Na yu stap wantaim mi na mi inap tru oltaim oltaim.” Em i save olsem inap oltaim Jehova bai tingim em olsem pren bilong em na em i no inap lusim tingting long gutpela wok em i mekim. (Sav. 7:1) Dispela i mekim gut bel bilong Asap. Em i singsing: “Bikpela, yu banis tru bilong mi, na mi laik tokaut long olgeta samting yu bin mekim.”​—Sng. 73:28.

¹⁰ Olsem na taim Asap i tok God em i helpim bilong em, em i no stori tasol long ol samting em i kisim olsem wanpela Livai, nogat. Bikpela samting em i toktok long en, em wok bilong Jehova em i mekim na pasin bilong stap pren wantaim God Antap Tru. (Jems 2:​21-23) Long stap yet olsem pren bilong Jehova, Asap i mas bilip yet long Jehova na trastim em. Em i mas bilip olsem Jehova bai givim gutpela sindaun long em long bihain sapos em i bihainim tok bilong em. Yu ken bilip olsem Jehova bai mekim olsem long yu tu.

11. Jeremaia i givim wanem askim long Jehova? Olsem wanem Jehova i bekim?

¹¹ Narapela Livai husat i tok Jehova em i helpim bilong em, em profet Jeremaia. Yumi ken stori long as na em i mekim dispela tok. Em i bin sindaun long Anatot, wanpela taun bilong ol Livai i stap klostu long Jerusalem. (Jer. 1:1) Jeremaia tu i bin askim Jehova long as na ol man nogut i stap gut, tasol ol gutpela man i karim hevi. (Jer. 12:1) Taim em i lukim ol samting i kamap long Jerusalem na Juda, em i komplein long Jehova. Jeremaia i save olsem Jehova i save bihainim stretpela pasin. Bilong bekim dispela askim, Jehova i givim wok long Jeremaia long tokaut long bikpela bagarap bai kamap, na bihain Jehova i truim dispela tok profet. Ol man i bihainim tok bilong Jehova i abrusim bagarap, tasol ol man nogut husat i sakim tok ol i dai.​—Jer. 21:9.

12, 13. (a) Wanem samting i kirapim Jeremaia long tok: “Bikpela wanpela tasol em inap long mi”? Jeremaia i kamapim wanem pasin? (b) Bilong wanem ol lain bilong Israel i mas stap isi na wet olsem Jeremaia?

¹² Bihain, taim Jeremaia i lukim as ples bilong em i stap nating na i bagarap, em i pilim olsem em i wokabaut long ples tudak. I olsem Jehova i mekim em i stap “olsem ol man bipo tru ol i dai pinis.” (Kra. 1:​1, 16; 3:6) Jeremaia i tokim lain Israel long kam bek long Papa bilong ol long heven, tasol ol i mekim pasin nogut tru, olsem na Jehova i mas bagarapim Jerusalem na Juda. Dispela i mekim Jeremaia i bel hevi, maski em i bin mekim pasin i stret. Tru, em taim bilong bel hevi, tasol Jeremaia i tok: “Yumi no bagarap olgeta.” Em i tok marimari bilong Jehova “i kamap nupela long olgeta de.” Em long dispela taim Jeremaia i tok: “Bikpela wanpela tasol em inap long mi.” Em i holim yet wanpela spesel wok. Em wanpela profet bilong Jehova.​—Ritim Krai 3:​22-24.

¹³ Inap 70 yia, as ples bilong ol Israel bai stap nating na i bagarap. (Jer. 25:11) Tasol tok bilong Jeremaia olsem “Bikpela wanpela tasol em inap long mi,” i soim olsem em i trastim tru Jehova. Pasin bilong em long trastim Jehova i as na em i stap isi na wetim Jehova long mekim samting. Olgeta lain bilong Israel i no gat graun moa, olsem na ol i mas stap isi na wet olsem Jeremaia. Jehova tasol inap helpim ol. Bihain long 70 yia, ol i go bek long as ples bilong ol na ol inap mekim wok bilong Jehova long dispela hap.​—2 Sto. 36:​20-23.

Jehova Inap i Stap Helpim Bilong Ol Arapela

14, 15. Jehova i stap olsem helpim bilong ol Livai na husat moa? Bilong wanem Jehova i mas helpim Devit?

¹⁴ Asap na Jeremaia i bilong lain Livai, tasol i no lain Livai tasol inap mekim gutpela wok bilong Jehova. Yangpela man Devit, em bai kamap king bilong Israel, em i tok long God olsem, “Bikpela, mi singaut long yu bilong yu ken helpim mi.” (Ritim Song 142:​1, 5) Taim Devit i bin raitim dispela song, em i no stap long haus king o long wanpela haus. Em i hait long ol birua bilong en long wanpela keiv. Inap 2-pela taim, Devit i mas hait long ol keiv. Wanpela taim em long Adulam na narapela taim em long ples nating bilong Engedi. Ating em i raitim Song 142 taim em i stap long wanpela bilong dispela tupela keiv.

¹⁵ Sapos Devit i raitim dispela song long keiv, dispela em long wanem em i hait long King Sol. Sol i laik kilim i dai Devit, olsem na Devit i ranawe i go long wanpela keiv i no isi long go long en. (1 Sml. 22:​1, 4) Long dispela ples i no gat man, ating Devit i pilim olsem em i no gat pren bilong lukautim em. (Sng. 142:4) Em long dispela taim Devit i askim God long helpim em.

16, 17. (a) Bilong wanem Devit inap pilim olsem i no gat man long helpim em? (b) Devit inap askim husat long helpim em?

¹⁶ Paslain long Devit i raitim Song 142, ating em i harim stori long samting i painim Hetpris Ahimelek. Taim Ahimelek i bin helpim Devit, em i no save olsem Devit i ranawe long Sol. King Sol i jeles na em i tokim ol soldia long kilim i dai Ahimelek na famili bilong en. (1 Sml. 22:​11, 18, 19) Devit i pilim olsem em i gat asua long indai bilong ol. I olsem em yet i kilim i dai dispela pris husat i bin helpim em. Olsem wanem? Sapos samting i painim Devit i painim yu, bai yu pilim olsem em i asua bilong yu? Na tu, narapela samting i givim hatwok long Devit, em Sol i wok yet long ronim em.

¹⁷ Bihain liklik long dispela samting i painim Ahimelek, Samuel i dai, em dispela profet husat i bin makim Devit long kamap king. (1 Sml. 25:1) Devit inap pilim olsem em i stap wanpis na i no gat man long helpim em. Tasol em i save olsem Jehova bai helpim em. Em i no holim wankain spesel wok olsem ol Livai, tasol God i bin makim em long mekim narapela spesel wok. Em bai kamap king bilong lain bilong God. (1 Sml. 16:​1, 13) So Devit i autim olgeta tingting na filings bilong em long Jehova na em i wok yet long trastim em. Jehova inap i stap olsem helpim bilong yu tu. Yu ken trastim em taim yu wok yet long mekim ol samting yu inap mekim long wok bilong em.

18. Olsem wanem ol man yumi stori long ol long dispela stadi i kamapim olsem Jehova em i helpim bilong ol?

¹⁸ Long wanem rot Jehova i bin stap olsem helpim bilong ol wokman em yumi stori long ol long dispela stadi? Em i givim wok long ol. Na tu, ol i bilip olsem Jehova bai lukautim ol. God i stap olsem helpim bilong ol Livai na ol man bilong ol arapela lain bilong Israel, olsem Devit. Olsem wanem yumi inap bihainim pasin bilong ol na Jehova i ken i stap olsem helpim bilong yumi? Bai yumi stori long dispela long neks stadi.

[Futnot]

Bai Yu Bekim Olsem Wanem?

• Olsem wanem Jehova i stap olsem helpim bilong ol Livai?

• Asap, Jeremaia, na Devit i mekim wanem bilong soim olsem Jehova em i helpim bilong ol?

• Long God i ken i stap olsem helpim bilong yu, yu mas i gat wanem pasin?

[Rait long pes 8]

Ol Livai i no kisim hap graun, nogat, Jehova em i helpim bilong ol, na ol i holim gutpela wok, em wok bilong God

[Piksa long pes 7]

Olsem wanem Jehova i stap olsem helpim bilong ol pris na ol Livai?

[Piksa long pes 9]

Wanem samting i helpim Asap long larim Jehova i stap olsem helpim bilong em?