Tok Bilong Jehova i Gat Laip
Sampela Bikpela Tok Bilong Buk 3 na 4 Bilong Buk Song
LONG beten bilong em long God, man bilong raitim song i kamapim askim olsem: “Ol lain i slip pinis long matmat, ol i save toktok long yu laikim ol tumas, o nogat? Long ples bilong bagarap ol i save tok long yu bin lukautim ol gut, a?” (Song 88:11) Bekim bilong dispela askim em nogat. Man i no stap laip em i no inap litimapim nem bilong Jehova. Yumi stap laip na dispela i mas kirapim yumi long litimapim nem bilong em.
Buk 3 na 4 bilong Buk Song, em Song 73 i go 106, ol i kamapim planti as na yumi mas litimapim nem bilong Man Bilong Wokim yumi. Taim yumi tingim gut ol dispela song, dispela i mas kirapim yumi long laikim tru “tok bilong God” na strongim yumi long mekim pasin bilong yumi long litimapim nem bilong em i kamap gutpela moa. (Hibru 4:12) Orait nau yumi ken skelim tok bilong Buk 3 bilong Buk Song.
‘MI STAP KLOSTU LONG GOD NA DISPELA I GUTPELA TRU’
Asap yet o sampela long famili bilong em i bin raitim Song 73 i go Song 83. Kirap bilong Song 73 i stori long samting i bin helpim Asap na tingting kranki i no pundaunim em. Em i kisim stretpela tingting. Em i tok: “Mi stap klostu long yu na dispela i gutpela tru.” (Song 73:28) Song 74 em singsing bilong sori long Jerusalem i bagarap. Song 75, 76 na 77 i kamapim olsem Jehova em i stretpela Jas, Man Bilong Kisim Bek ol man i gat pasin daun, na Man Bilong Harim beten. Song 78 i stori long ol samting i bin painim lain Israel kirap long taim bilong Moses na i go inap long taim bilong Devit. Song 79 em singsing sori long tempel i bagarap. Song 80 em beten bilong lain bilong God i askim em long kisim bek ol. Song 81 i kirapim ol man long bihainim tok bilong Jehova. Song 82 na 83 em ol beten bilong askim Jehova long givim strafe long ol jas nogut na ol birua bilong God.
Wanpela singsing bilong lain Kora i olsem: ‘Mi laikim tumas bai mi stap long haus bilong yu. Olgeta laik bilong mi i laikim tumas haus bilong yu.’ (Song 84:2) Song 85 em beten bilong askim God long blesim ol lain i lusim kalabus na kam bek. Dispela song i kamapim klia olsem ol blesing bilong spirit i winim tru ol blesing bilong skin. Long Song 86, Devit i askim God long lukautim em na skulim em. Song 87 em i wanpela singsing bilong Jerusalem na ol man em mama i karim ol long dispela hap, na Song 88 em i wanpela beten long Jehova. Song 89 i stori long gutpela-pasin-sori bilong Jehova em i kamapim long rot bilong kontrak em i mekim wantaim Devit, na Etan i raitim dispela singsing, ating em wanpela bilong 4-pela man i gat savetingting i stap long taim bilong Solomon.—1 King 4:31.
Bekim Bilong Ol Askim Bilong Baibel:
74:14—Long wanem taim Jehova i bin “brukim ol het bilong bikpela pukpuk”? Baibel i kolim Fero, “King bilong Isip, . . . olsem wanpela traipela pukpuk i slip i stap long ol wara bilong Isip.” (Esekiel 29:3) Ating bikpela pukpuk inap makim tu “ol strongpela hetman bilong Fero.” (Song 74:14, NW, sta) Ating dispela tok olsem God bai brukim ol het bilong ol i makim dispela taim Jehova i daunim Fero na lain ami bilong em taim Jehova i kisim bek lain Israel long kalabus long Isip.
75:4, 5, 10—Bilong wanem yumi mas abrusim pasin bilong bikhet na litimapim nem bilong yumi yet? Jehova bai pinisim strong bilong ol man i mekim kain pasin olsem, tasol em bai “givim bikpela strong moa long ol stretpela man.” Jehova em man bilong givim strong na litimapim nem bilong man, olsem na yumi mas ting olsem ol wok yumi kisim insait long kongrigesen i kam long em.—Song 75:7.
76:10—Taim “ol man i save belhat,” olsem wanem dispela i save litimapim nem bilong Jehova? Taim God i larim ol man i kamapim belhat bilong ol long yumi long wanem yumi wokman bilong em, gutpela samting inap kamap long dispela. Ol hevi yumi karim dispela inap skulim yumi. Jehova i save larim ol hevi i painim yumi inap long mak we ol i ken skulim yumi. (1 Pita 5:10) Tasol olsem wanem sapos ol man i mekim nogut long yumi i go inap long yumi dai? Dispela tu inap givim biknem long Jehova, long wanem, ol man i lukim yumi i stap gut long Jehova, ating ol tu bai kirap na givim biknem long God.
78:24, 25—Bilong wanem ol dispela ves i tok mana em i “kaikai bilong heven” na em i “kaikai bilong ol ensel”? Dispela tupela tok i no makim olsem mana em i kaikai bilong ol ensel, nogat. Em “kaikai bilong heven,” long wanem, em i kam long heven. (Song 105:40) Ol ensel i stap long heven, olsem na ating dispela tok “kaikai bilong ol ensel” i makim olsem God em i stap long heven i givim dispela kaikai. (Song 11:4) Na tu, ating Jehova i mekim wok long ol ensel bilong givim mana long ol Israel.
82:1, 6—Husat ol i dispela “god” na ol “pikinini bilong God Antap Tru”? Tupela tok wantaim i makim ol hetman bilong Israel. Dispela i stret, long wanem, ol i stap olsem mausman bilong God.—Jon 10:33-36.
83:2—Dispela tok ol i ‘bikhet long yu’ i makim wanem samting? Dispela tok i makim olsem ol man i redi long bosim ol narapela, olsem birua long narapela, o pait, o daunim narapela.
Skul Yumi Kisim:
73:2-5, 18-20, 25, 28. Yumi no ken mangal long ol samting bilong ol man nogut na bihainim pasin nogut bilong ol. Ol man nogut i stap long rot i wel. Ol bai ‘pundaun na bagarap olgeta.’ Na tu, ol man i no inap pinisim pasin nogut, long wanem, ol sinman i bosim ol man, olsem na sapos yumi wok strong long pinisim ol pasin nogut, hatwok bilong yumi bai lus nating. Olsem Asap, yumi bihainim savepasin taim yumi karim hevi bilong ol pasin nogut long rot bilong ‘stap klostu long God’ na amamas long pas gut wantaim Em.
73:3, 6, 8, 27. Yumi mas sakim pasin bilong litimapim nem bilong yumi yet, hambak nating, na tok bilas na tok giaman. Yumi mas mekim olsem maski dispela ol pasin i luk olsem ol inap helpim yumi.
73:15-17. Sapos yumi gat tupela tingting, orait yumi no ken kamapim dispela tingting bilong yumi long ai bilong ol man. Sapos yumi “mekim kain tok olsem” dispela i no inap strongim ol narapela. Yumi mas tingim tingim long bel ol samting yumi tingting planti long en na stretim ol dispela samting taim yumi bung wantaim ol wanbilip bilong yumi.—Sindaun 18:1.
73:21-24. Taim ‘bel i pilim nogut tru’ long ol man nogut, long wanem, ol i gat planti samting, yumi mekim pasin olsem ol animal i no gat gutpela tingting. Dispela kain pasin i save kirap long bel na kamap wantu tasol. Tasol yumi mas larim tok bilong Jehova i stiaim yumi, na yumi mas bilip tru olsem em bai ‘holim han bilong’ yumi na helpim yumi. Na tu, Jehova ‘bai kisim yumi na yumi stap wantaim em,’ olsem pas gut wantaim em.
77:6. Bilong pilim tru na kisim save gut long ol tok i tru, yumi mas lusim haptaim bilong stadi na tingim tingim long bel ol dispela samting. Em i bikpela samting long yumi makim haptaim bilong yumi yet i ken i stap wanpela na mekim olsem!
79:9. Jehova i save harim ol beten bilong yumi, na moa yet taim yumi beten bilong mekim nem bilong Jehova i stap holi.
81:13, 16. Taim yumi bihainim tok bilong Jehova, na wokabaut long rot em i makim bai yumi kisim planti blesing.—Sindaun 10:22.
82:2, 5. Ol kot giaman i mekim na ol manmeri i no save bihainim stretpela pasin. Ol kain pasin olsem i mekim na ol manmeri i no sindaun gutpela tumas.
84:1-4, 10-12. Ol man bilong raitim song i save laikim tumas haus bilong Jehova na ol i amamas long wok ol i mekim, na ol i stap gutpela piksa yumi ken bihainim.
86:5. Yumi ken amamas tru olsem Jehova i save “rausim sin” bilong yumi! Em i lukluk i stap, em i laik lukim man i mekim samting i soim olsem em i tanim bel na Em i ken marimari long em.
87:5, 6. Olsem wanem? Ol man i kisim laip oltaim long Paradais long graun, ol bai save long nem bilong ol man i bin kirap bek na kisim laip long heven o nogat? Ol dispela ves i givim tingting long yumi olsem ol bai save long nem bilong ol.
88:13, 14. Sapos yumi no kisim bekim bilong beten bilong yumi long wanpela hevi yumi karim, ating dispela inap makim olsem Jehova i laik bai yumi mas kamapim klia olsem yumi givim bel tru long em.
“TENKYU LONG EM NA GIVIM BIKNEM LONG EM”
Tingim ol narapela as na yumi mas litimapim nem bilong Jehova olsem Buk 4 bilong Buk Song i kamapim. Long Song 90, Moses i skelim “King bilong olgeta taim” wantaim ol man em ol i bilong i stap sotpela taim tasol. (1 Timoti 1:17) Long Song 91:2, Moses i tok long Jehova olsem Man bilong ‘banisim na was gut’ long em. Ol narapela song bihain long Song 91 ol i stori long ol gutpela pasin bilong Jehova, ol gutpela tingting bilong em, na ol bikpela wok bilong em. Tripela song i kirap wantaim dispela tok “Bikpela i stap king.” (Song 93:1; 97:1; 99:1) Man bilong raitim song i tok olsem Jehova em i Man Bilong Wokim yumi, na man bilong raitim song i kirapim yumi long “tenkyu long em na givim biknem long em.”—Song 100:4.
Wanpela king i save aninit long Jehova i mas bihainim wanem pasin taim em i mekim wok king? Song 101, em King Devit i bin raitim, i kamapim bekim bilong dispela askim. Song 102 i tokim yumi olsem Jehova bai “harim beten bilong ol manmeri bilong en, bipo em i bin lusim ol na ol i stap nating. Bai em i no ken givim baksait moa long ol prea bilong ol.” (Song 102:17) Song 103 em i stori long gutpela-pasin-sori na pasin marimari bilong Jehova. Man bilong raitim song i stori long planti samting Jehova i wokim long graun na em i tok: “Bikpela, yu bin wokim planti samting. Yu gat bikpela save na yu wokim olgeta dispela samting.” (Song 104:24) Tupela laspela song long Buk 4 bilong Buk Song i litimapim nem bilong Jehova long ol gutpela wok bilong em.—Song 105:2, 5; 106:7, 22.
Bekim Bilong Ol Askim Bilong Baibel:
91:1, 2—Dispela ples we man “i go long God Antap Tru” i makim wanem samting? Olsem wanem yumi ken stap long dispela ples? Dispela ples i makim wanpela ples we man i ken i stap gut long ol samting bilong spirit. Ol man i no save bilip long God ol i no save long dispela ples. Yumi stap long dispela ples taim yumi litimapim nem bilong Jehova olsem King bilong heven na graun, na yumi autim tok bilong Kingdom. Yumi save yumi stap gut long ol samting bilong spirit, long wanem, yumi save olsem oltaim Jehova i redi long helpim yumi.—Song 90:1.
92:12—Long wanem rot ol stretpela man i “kamap gutpela tru olsem diwai [“pam,” NW]”? Diwai pam i save karim kaikai long olgeta yia. Stretpela man i kain olsem diwai pam, em stap gut long ai bilong Jehova na wok long karim “gutpela kaikai,” em ol gutpela wok na pasin em i save mekim.—Matyu 7:17-20.
Skul Yumi Kisim:
90:7, 8, 13, 14. Taim yumi mekim rong dispela i mekim na yumi no moa pas gut wantaim God tru. Ol sin man i mekim long pasin hait i save stap ples klia long ai bilong Jehova. Tasol sapos yumi tanim bel tru na lusim pasin nogut, orait Jehova bai orait long yumi, na ‘laikim yumi.’
90:10, 12; NW. Laip bilong yumi i sotpela, olsem na yumi mas ‘kaunim ol de bilong yumi.’ Olsem wanem yumi ken mekim olsem? Long rot bilong mekim wok long “gutpela save tru,” na yumi no mekim nabaut long haptaim yumi stap laip yet. Yumi mekim wok long laip bilong yumi bilong mekim ol samting Jehova i laikim. Dispela i makim olsem yumi mas putim ol samting bilong spirit i stap nambawan na mekim gutpela wok long taim bilong yumi.—Efesus 5:15, 16; Filipai 1:10.
90:17. I stret yumi beten long Jehova long ‘olgeta samting yumi mekim i ken kamap gutpela’ na Em i ken blesim wok yumi mekim long autim tok.
92:14, 15. Taim ol lapun i save givim bel long stadi long Baibel na oltaim ol i bung wantaim lain bilong Jehova, i olsem “lip bilong ol i stap grin oltaim”—ol i stap strong yet long ol samting bilong spirit—na ol i gutpela samting bilong kongrigesen.
94:19. Maski wanem samting i mekim na yumi “bel hevi,” sapos yumi ritim na tingim tingim long bel ol tok bilong Baibel bilong “mekim bel bilong yumi i stap isi,” dispela bai strongim yumi.
95:7, 8. Pasin bilong putim yau long ol tok bilong Baibel na redi long bihainim, dispela bai helpim yumi na yumi no pasim strong bel bilong yumi.—Hibru 3:7, 8.
106:36, 37. Long tok Hibru bilong pastaim, ves 36 na 37 i stori long pasin bilong lotu long ol imis, olsem ol giaman god, na givim ofa long ol spirit nogut. Dispela i soim olsem ol spirit nogut inap mekim wok long man husat i mekim wok long ol imis. Baibel i tok: “Stap longwe long olgeta giaman god.”—1 Jon 5:21.
“Litimapim Nem Bilong Bikpela”
Laspela ves bilong Buk Song 104, 105, na 106 i gat dispela tok: “Litimapim nem bilong Bikpela!” Dispela tok i stap tu long ves 1 bilong laspela song long Buk 4 bilong Buk Song. (Song 104:35; 105:45; 106:1, 48) Dispela tok “litimapim nem bilong Bikpela,” i stap planti taim long Buk 4 bilong Buk Song.
I gat as tru na yumi mas litimapim nem bilong Jehova. Song 73 i go 106 i kamapim planti samting em yumi mas tingim tingim na tenkyu long Papa bilong yumi long heven. Taim yumi tingim ol samting em i mekim pinis bilong helpim yumi na ol samting em bai mekim long bihain, dispela i kirapim yumi long givim bel olgeta long “litimapim nem bilong Bikpela,” a?
[Piksa long pes 10]
Olsem Asap, yumi tu inap karim hevi bilong ol pasin nogut long rot bilong ‘stap klostu long God’
[Piksa long pes 11]
Fero i kisim bagarap long solwara Retsi
[Piksa long pes 11]
Yu save long as na Baibel i tok mana em i “kaikai bilong ol ensel”?
[Piksa long pes 13]
Wanem samting bai helpim yumi long pinisim “bel hevi”?