Husat i Kamapim Ol Lo i Bosim Yunives?

“ATING yu save long ol lo em ol sta bilong skai i save bihainim, laka?” (Jop 38:33) Taim God i givim dispela askim long Jop, em i laik helpim Jop long kliagut olsem ol man i gat liklik save tru taim ol i skelim wantaim bikpela save tru bilong Man Bilong Wokim olgeta samting. Yu ting olsem wanem long dispela?

Ol man i kisim pinis bikpela save long ol lo i bosim ples antap, tasol planti saientis i tokaut olsem i gat planti samting moa ol i mas kisim save long en. Planti taim ol nupela save ol saientis i kisim i mekim na ol i mas senisim tingting bilong ol long wok bilong yunives. Olsem wanem? Ol nupela save i mekim na dispela askim God i givim long Jop i no gat wok moa long en? O ol dispela save i helpim yumi long kamapim klia olsem Jehova em i As bilong ol lo i bosim ol samting bilong ples antap?

Baibel i gat ol gutpela tok bilong helpim yumi long bekim ol dispela askim. Tru, Baibel em i no wanpela buk bilong saiens. Tasol taim Baibel i toktok long ol sta i stap long ples antap, tok bilong en i stret na inap planti tausen yia bihain tasol ol man i kisim save olsem ol dispela tok i tru.

Tingting Bilong Bipo Long Ples Antap

Bilong kisim sampela tingting, yumi ken skelim ol samting i bin kamap long yia 350 B.C.E. samting, em inap 100 yia bihain long ol i bin pinisim wok bilong raitim Olpela Testamen​—⁠em hap bilong Baibel ol i bin raitim long tok Hibru. Long dispela taim, saveman Grik, em Aristotal, i bin skulim ol narapela saveman long taim bilong em long ol samting bilong ples antap. Long nau, Aristotal i gat biknem yet namel long ol saientis bilong bipo i kam inap long nau. (Lukim blok long pes 25.) Buk Encyclopædia Britannica i tok, “Aristotal em i namba wan saientis i gat bikpela save tru. . . . Olgeta saientis i mas tenkyu long ol wok em i bin mekim.”

Aristotal i wokim wanpela piksa bilong yunives. Long dispela piksa, graun i stap namel tru long yunives na winim 50 ring glas i raunim graun, na narapela ring i stap insait long narapela. Ol sta i pas long ol ring i stap ausait tru, na ol planet i pas long ol ring i stap klostu moa long graun. Olgeta samting i stap longwe long graun, em i bilong i stap oltaim na i no inap senis. Long nau, dispela tingting i olsem tingting kranki, tasol em i bin stiaim tingting bilong ol saientis inap 2,000 yia samting.

Tasol olsem wanem long tok bilong Aristotal taim yu skelim wantaim ol tok bilong Baibel? Wanem tok i stret? Orait nau yumi ken skelim 3-pela askim long ol lo i bosim yunives. Ol bekim bai helpim yumi long strongim bilip bilong yumi long Man i kamapim ol tok bilong Baibel, na Man i kamapim “ol lo em ol sta bilong skai i save bihainim.”​—⁠Jop 38:⁠33.

1. Olsem Wanem? Yunives i Stap Strong na i No Save Senis?

Aristotal i tok ol ring glas i raunim graun ol i no save senis. Ol ring we ol sta i pas long en, na ol narapela ring tu, ol i no save go liklik na i no save go bikpela.

Olsem wanem? Baibel i kamapim wankain tingting? Nogat; Baibel i no kamapim sampela strongpela tok long dispela. Tasol tingim tok piksa Baibel i mekim: “Bikpela tasol i sindaun long sia king bilong en antap long skai [“antap long raunpela graun,” NW ], em i bin wokim olgeta samting. Em i save opim skai olsem laplap na sanapim olsem haus sel bilong em. Long ai bilong em, ol manmeri bilong graun i samting nating olsem ol grasopa.”​—⁠Aisaia 40:22.a

Wanem samting i stret moa long nau​—⁠piksa bilong Aristotal o tok bilong Baibel? Ol wok saiens bilong skelim ples antap long nau i kamapim wanem tingting long yunives? Kirap long yia 1900 na i kam, ol saveman bilong glasim yunives ol i kisim save olsem yunives i save senis senis. I luk olsem ol galaksi i save muv hariap i go longwe long ol narapela galaksi. Ating i no gat planti saientis i bin ting olsem yunives i save mekim olsem. Long nau, ol saientis bilong skelim ples antap i ting olsem yunives i bin kirap olsem wanpela liklik samting na i wok long i go bikpela tru. Tru tumas, saiens i soim olsem piksa bilong Aristotal i no stret.

Olsem wanem long ol tok bilong Baibel? Taim profet Aisaia i lukluk i go antap long skai i gat planti sta i lait, yumi ken save long as na em i ting samting em i lukim i olsem wanpela bikpela haus sel.b Na ating em i lukim Milkiwe i olsem wanpela gutpela “laplap.”

Na tu, tok bilong Aisaia i kirapim yumi long piksaim long tingting wanpela haus sel long taim bilong ol man i bin raitim Baibel; yumi piksaim wanpela bandel laplap ol i opim, stretim, na slipim long graun paslain long ol i sanapim wantaim ol pos na mekim i kamap wanpela haus sel. Na olsem tasol, yumi ken tingim wanpela bisnisman i kisim wanpela bandel bilong gutpela laplap na opim bilong soim long kastama. Long tupela stori wantaim, i gat wanpela bandel ol i opim na em i go bikpela long ai bilong yumi.

Tru, yumi no tok olsem Baibel i mekim wok long tok piksa bilong haus sel na laplap bilong soim yunives i go bikpela olsem wanem. Tasol yumi kirap nogut olsem ol tok Baibel i mekim long yunives i stret wantaim saiens bilong nau. Aisaia i bin stap inap olsem 300 yia samting paslain long Aristotal na planti tausen yia paslain long saiens i kamapim ol tok i sapotim tingting bilong Aisaia. Tasol i no gat wok long senisim tok bilong dispela profet Hibru olsem ol i mas senisim piksa em Aristotal i bin wokim.

2. Wanem Samting i Mekim na Ol Sta na Ol Planet i Stap Long Ples Bilong Ol?

Aristotal i ting yunives i pulap tru. Em i lukim olsem graun na skai bilong en i gat 4-pela samting​—⁠graun, wara, win, na paia. Na long spes bihain long dispela i gat ol ring glas em ol i gat ges ether long en, em bilong i stap oltaim. Ol sta na planet samting i pas long ol dispela ring. Inap longpela taim, planti saientis i laikim tingting bilong Aristotal, long wanem, em i stret wantaim dispela tingting olsem: Wanpela samting i mas sindaun antap o pas long narapela samting, sapos nogat, em bai pundaun.

Olsem wanem long Baibel? Em i gat ol tok bilong wanpela gutpela man, nem bilong em Jop, husat i tok long Jehova olsem: “[Em] i bin mekim dispela graun i hangamap nating.” (Jop 26:⁠7) Dispela kain tingting i no stret liklik long Aristotal.

Long 1650 C.E. samting, inap olsem 3,000 yia bihain long taim bilong Jop, planti saientis i ting olsem yunives i pulap long wanpela kain wara na i no ol ring glas. Tasol klostu long yia 1700 C.E. samting, Bikman Isaac Newton i kamapim narapela tingting olgeta. Em i tok graviti namel long ol samting bilong ples antap i mekim na ol sta na planet i stap long ples bilong ol. Tingting bilong Newton i klostu wankain long dispela tingting olsem graun na ol sta na ol planet i “hangamap nating,” na i no gat wanpela samting i holim ol i stap.

Planti man i sutim tok long dispela tingting bilong Newton long graviti. Planti saientis i bin hatwok yet long ting olsem ol planet na ol sta samting i no sindaun antap long wanpela samting. Olsem wanem bikpela graun bilong yumi na ol sta na planet inap hangamap nating tasol? Sampela i kirap nogut long dispela tingting na ol i ting wanpela narakain strong i as bilong en. Kirap long taim bilong Aristotal, klostu olgeta saientis i ting olsem i mas i gat sampela samting i pulapim ples antap.

Tru, Jop i no gat save long wanem samting i mekim na graun i stap stret long ples bilong en na i wok long raunim san. Olsem na wanem samting i kirapim em long tok olsem graun bilong yumi i “hangamap nating”?

Na tu, dispela tingting olsem graun i hangamap nating i kamapim narapela askim olsem: Wanem samting i mekim na graun na ol narapela planet na sta i raun long rot stret bilong ol? Tingim tok God i mekim long Jop: “Jop, ating yu inap long bungim wanpela lain sta na pasim ol i stap wantaim long wanpela hap bilong skai, a? Na ating yu inap lusim rop i pasim wanpela lain sta, na larim ol i go nabaut?” (Jop 38:31) Long olgeta nait long longpela laip bilong em, Jop i bin lukim ol dispela lain sta i kamap na i go daun. Tasol bilong wanem ol i luk wankain long olgeta yia? Wanem samting i holim ol dispela sta na ol narapela samting bilong ples antap i stap long ples stret bilong ol? Taim Jop i tingim dispela samting, em i kirap nogut tru. Inap planti tausen tausen yia i mas lus pastaim bambai ol kain lain sta olsem i ken senis.

Sapos ol sta i pas long ol ring glas, bai i no gat wok long wanpela kain strong i pasim ol wantaim. Inap sampela tausen yia bihain tasol, ol saientis i kisim sampela save moa long ol samting i olsem “rop” i holim ol planet na ol lain sta i stap long ples stret bilong ol taim ol i raun long ples antap. Isaac Newton na bihain Albert Einstein, ol i kisim biknem long ol wok painimaut na save ol i kisim long dispela samting. Tru, Jop i no save liklik long dispela strong God i yusim bilong pasim ol lain sta na planet samting i stap stret long ples bilong ol. Tasol ol tok bilong Baibel long Buk Jop i tru yet bihain long sampela tausen yia, na ol tok bilong saveman Aristotal, nogat. Man Bilong Kamapim Ol Lo em wanpela tasol inap save long dispela, a?

3. Stap Oltaim o Inap Bagarap?

Aristotal i ting olsem ples antap i narapela kain tru long graun. Em i tok, graun inap senis na bagarap, tasol ol samting bilong ples antap i gat ges ether long en na i no inap senis o bagarap, em bai stap oltaim. Ol ring glas em Aristotal i bin tok long en, na ol sta na planet samting i pas long ol, ol i no inap senis, bagarap, o pinis olgeta.

Tasol Baibel i tok wanem? Song 102:​25-27 i tok: “Bipo tru yu bin wokim dispela graun na em i stap strong. Na long han bilong yu yet yu bin wokim skai na olgeta samting i stap antap. Skai wantaim graun bai i bagarap olgeta, tasol yu save stap oltaim. Tupela bai i bagarap olsem laplap i olpela pinis na i bagarap. Na bai yu senisim tupela olsem man i senisim klos, na bai tupela i pinis olgeta na i no moa i stap. Tasol yu save stap olsem tasol. Yu no save senis. Na taim bilong yu i no inap pinis.”

Tingim olsem man bilong raitim song​—⁠em i bin raitim dispela tok inap 200 yia samting paslain long taim bilong Aristotal​—⁠em i no skelim graun wantaim skai, na i olsem graun inap bagarap, tasol skai bai i stap oltaim, nogat. Em i bungim skai na graun na i skelim wantaim God, em dispela strongpela Spirit i save bosim olgeta samting em i bin wokim.c Dispela song i kamapim olsem skai inap bagarap wankain olsem olgeta samting i stap long graun. Wok saiens long nau i painimaut wanem samting?

Save ol saientis i kisim i sapotim tok bilong Baibel na tok bilong Aristotal olsem graun inap bagarap. Tru tumas, oltaim win na wara samting i wok long bagarapim ol ston long graun bilong yumi, na ol nupela ston i save kamap long rot bilong ol volkeno samting.

Tasol olsem wanem long ol sta? Ol i save bagarap olsem Baibel i tok o ol i save stap oltaim olsem Aristotal i skulim ol man long en? Bihain long yia 1500 C.E. samting, ol saientis bilong Yurop i gat tupela tingting long tok bilong Aristotal olsem ol sta i save stap oltaim. Long dispela taim ol i lukim long namba wan taim wanpela supanova, olsem wanpela sta i pairap na i pinis. Kirap long dispela taim na i kam, ol saientis i kisim save olsem ol sta inap pairap na pinis wantu, o ol inap pinis isi isi. Tasol ol saientis i lukim tu olsem ol nupela sta i save kamap insait long ol klaut i kamap long ges bilong ol olpela sta i bin pairap. Olsem na dispela tok piksa bilong Baibel long ol sta i olsem laplap i olpela pinis na i bagarap na man i senisim wantaim nupela laplap, dispela tok piksa i stret tru.d Man! Em i narakain tru olsem dispela man bilong raitim song long bipo em i raitim ol tok i stret tru wantaim save bilong saiens long nau!

Tasol ating yu laik save olsem: ‘Baibel i skulim ol man olsem graun na olgeta sta samting bilong ples antap bai pinis o i mas i gat senis bilong en?’ Nogat! Baibel i tok promis olsem ol bai stap oltaim oltaim. (Song 104:5; 119:90) Tasol ol i no stap oltaim long strong bilong ol yet, nogat; God husat i wokim ol em i bin tok promis olsem em bai lukautim ol. (Song 148:​4-6) Em i no tok long em bai mekim olsem wanem, tasol i stret yumi ken ting olsem Man husat i bin wokim dispela yunives em i gat strong bilong lukautim, a? Em i wankain olsem wanpela saveman bilong wokim haus bai i lukautim gut haus em i bin wokim bilong em yet na famili bilong em.

Husat i Mas Kisim Glori na Ona?

Pasin bilong tingim sampela lo i bosim ples antap i helpim gut yumi long bekim dispela askim. Taim yumi tingim Man husat i kamapim ol planti bilion sta i stap long ples antap i traipela tru, na em i holim ol i stap long ples bilong ol long rot bilong graviti, na em i lukautim ol, yumi kirap nogut tru long dispela, a?

Tok bilong Aisaia 40:26 i kamapim klia as na yumi pilim olsem, em i tok: “Yupela lukluk i go antap long skai na lukim ol sta samting i stap antap. Husat tru i bin wokim ol? Em Bikpela tasol. Ol dispela samting i olsem lain ami bilong Bikpela. Em i save long namba bilong ol, na em i save long nem bilong wan wan bilong ol, na em i save kolim ol long nem bilong ol.” Baibel i tok ol sta i olsem wanpela lain ami i gat planti soldia tru insait long en. Sapos i no gat komanda bilong givim tok long ami, orait dispela ami bai paul nabaut. Sapos Jehova i no putim ol lo, orait ol planet, ol sta, na ol galaksi i no inap bihainim stret rot bilong ol; olgeta bai paul nabaut. Tasol i no olsem, tingim wanpela Komanda husat i givim tok long planti bilion soldia long samting ol i mas mekim, na i no dispela tasol, em i save tu long nem bilong ol, ol i stap we, na ol i stap olsem wanem!

Ol lo i bosim ples antap i helpim yumi long save long tingting bilong dispela Komanda. I no gat narapela man inap kamapim ol kain lo olsem na kirapim ol man long raitim stret ol tok i stori long ol dispela samting inap planti handret o planti tausen yia paslain long ol saientis i kliagut long en. Olsem na i gat as tru na yumi givim “glori na ona” long Jehova.​—⁠Revelesen 4:⁠11.

[Ol Futnot]

[Blok/Ol Piksa long pes 24, 25]

Stiaim Tru Tingting

“Aristotal em i nambawan bikpela saveman na saientis bilong bipo.” Em tok bilong buk The 100​—A Ranking of the Most Influential Persons in History. I no hatwok long save long as na buk i mekim kain tok olsem long dispela narapela kain man. Aristotal (384-322 B.C.E.) em i sumatin bilong saveman Pleto, na bihain Aristotal i kamap tisa bilong yangpela prins husat i kamap Bikpela King Aleksander. Sampela lista bilong bipo i kamapim olsem Aristotal i bin raitim 170 buk samting, na 47 bilong ol dispela buk i stap yet. Em i raitim ol buk long ol samting bilong astronomi, baioloji, kemistri, zuoloji, fisiks, jioloji, na saikoloji. Sampela tok em i bin raitim long wok painimaut bilong em long ol samting i gat laip, ol saveman i no bin skelim na stadi gen long en inap planti handret yia bihain. Buk The 100 i tok: “Ol tok bilong Aristotal i stiaim tru tingting bilong ol man long Amerika na Yurop.” Tasol buk i tok moa: “Planti man long bipo i givim biknem tru long Aristotal na i olsem ol i kirap lotuim em.”

[Ol Kredit Lain]

Royal Astronomical Society / Photo Researchers, Inc.

From the book A General History for Colleges and High Schools, 1900

[Piksa long pes 26, 27]

Graviti i holim ol lain sta na ol planet long ples bilong ol

[Kredit Lain]

NASA and The Hubble Heritage Team (AURA/STScl)

[Piksa long pes 26, 27]

Lain sta Pleiades

[Piksa long pes 28]

Sampela sta i pinis long supanova

[Kredit Lain]

ESA/Hubble

[Piksa long pes 28]

Ol nupela sta i kamap insait long klaut bilong ges

[Kredit Lain]

J. Hester and P. Scowen (AZ State Univ.), NASA

[Piksa Kredit Lain long pes 24]

© Peter Arnold, Inc./Alamy