Bilong Skelim Pasin Bilong Man—Em i No Strong, Em i Man Nogut, Em i Tanim Bel

SIN em samting ol Kristen i no laikim tru; man i mekim sin em i no inapim mak bilong stretpela pasin bilong Jehova. (Hibru 1:⁠9) Sori tumas, yumi olgeta i save mekim rong long sampela taim. Yumi olgeta i gat bikpela hatwok long sakim ol laik na tingting nogut sin i kamapim long skin bilong yumi. Tasol planti rong, sapos yumi autim long Jehova na yumi wok strong bambai yumi no ken mekim gen, yumi no ken pret long beten long Jehova na bel bilong yumi bai i no gat tok long mekim. (Rom 7:​21-24; 1 Jon 1:​8, 9; 2:​1, 2) Yumi tenkyu long Jehova, long wanem, long rot bilong ofa bilong Krais Jisas, em i orait long ol wok bilong em yumi mekim, maski yumi gat sin.

Sapos skin bilong man i kirapim em long mekim bikpela rong, kwiktaim ol wasman i mas helpim em, olsem Jems 5:​14-16 i tok: “Ating wanpela bilong yupela i gat sik [bilong spirit]? Orait em i mas singautim ol hetman bilong sios i kam long em. . . . Na sapos em i bin mekim sin, orait Bikpela bai i lusim ol dispela sin. Olsem na yupela wan wan i mas autim sin bilong yupela long ol arapela manmeri bilong God. Na . . . prea long God i helpim ol arapela, na bai God i mekim yupela i kamap orait gen.”

Olsem na taim Kristen i dediket pinis, em i mekim bikpela rong, em i no ken autim tasol long Jehova. Ol elda i mas mekim sampela samting, long wanem, dispela inap bagarapim klinpela pasin o pasin wanbel bilong kongrigesen. (Matyu 18:​15-17; 1 Korin 5:​9-11; 6:​9, 10) Ol elda i mas skelim gut: Dispela Kristen i tanim bel? Wanem samting i kirapim em long mekim rong? Em i no strong long dispela taim em i mekim sin? Em i bihainim pasin bilong sin? I hatwok long skelim gut ol dispela samting, na man i laik skelim em i mas bihainim gutpela tingting.

Tasol olsem wanem sapos man i mekim rong, long wanem, em i save bihainim pasin i no stret na pasin nogut? Baibel i kolim klia ol samting ol elda i mas mekim. Pol i givim tok long kongrigesen long Korin bilong stretim wanpela bikpela rong na em i tok: “Yupela i mas rausim dispela man nogut i stap namel long yupela.” (1 Korin 5:13) Ol man nogut i no ken i stap insait long kongrigesen Kristen.

Em i No Strong? Em i Man Nogut? Em i Tanim Bel?

Olsem wanem ol elda inap save man i tanim bel?a Em hatwok liklik. Tingim King Devit. Em i trabel long meri marit, na bihain i olsem em i kilim man i dai. Em i mekim bikpela rong tru inap long em i mas i dai, tasol Jehova i larim em i stap laip. (2 Samuel 11:​2-24; 12:​1-14) Orait, nau tingim Ananaias na Safaira. Tupela i mekim tok giaman na i laik giamanim ol aposel bai ol i ting tupela i givim planti samting. Em bikpela rong? Tru tumas. Tasol yu ting em i bikpela rong olsem kilim man i dai na bagarapim marit? Nogat, a? Tasol tupela i dai.​—⁠Aposel 5:​1-11.

Bilong wanem strafe i no wankain? Sin long skin bilong Devit i mekim na em i pundaun na mekim rong. Taim em i save em i gat rong, em i bel hevi tru na tanim bel na Jehova i marimari long em​—⁠tasol bikpela strafe i painim em long ol hevi i kamap long famili bilong em. Tasol Ananaias na Safaira i giaman tru na ol i wok long giamanim lain Kristen, na long dispela rot ‘ol i laik giamanim spirit holi na giamanim God yet.’ Samting ol i mekim i kamapim klia olsem ol tingting nogut i pulap long bel bilong ol. Olsem na ol i kisim bikpela strafe moa.

Long dispela tupela taim wantaim, Jehova yet i skelim na givim strafe i stret, long wanem, em inap skelim bel bilong man. (Sindaun 17:⁠3) Tasol ol elda i no inap mekim olsem. Orait, olsem wanem ol inap skelim gut olsem man i no strong na em i pundaun na mekim bikpela rong, o em i man nogut na em i mekim?

Olgeta kain sin em i pasin nogut, tasol i no olsem olgeta man i mekim sin ol i man nogut. Tupela man inap mekim wankain rong, tasol wanpela em i no strong na em i mekim, na wanpela em i man nogut na em i mekim. Tasol olgeta man i mekim rong, yumi ken tok ol i no strong na ol i mekim pasin nogut. Wanpela samting i kamapim klia olsem man i no strong o em i man nogut em olsem: Em i ting olsem wanem long rong em i mekim, na em i laik stretim o nogat. Olsem wanem? Em i mekim pasin i makim olsem em i tanim bel? Ol elda i mas i gat gutpela tingting bambai ol inap save. Olsem wanem ol i ken kisim gutpela tingting? Aposel Pol i tokim Timoti: “Yu mas tingting [oltaim, NW] long dispela tok mi mekim, na Bikpela bai i mekim tingting bilong yu i klia, na bai yu save long as bilong dispela olgeta tok.” (2 Timoti 2:⁠7) Sapos ol elda i mekim pasin daun na ‘tingting oltaim’ long ol tok bilong Pol na ol narapela man bilong raitim Baibel, bai ol i kisim gutpela tingting inap long ol i skelim gut ol manmeri long kongrigesen ol i mekim sin. Na ol samting ol i pasim tok long mekim bai i stret wantaim tingting bilong Jehova; ol i no bihainim tingting bilong ol yet.​—⁠Sindaun 11:2; Matyu 18:18.

Wanpela rot bilong kisim stretpela tingting em olsem: Ol i ken lukim stori bilong ol man nogut long Baibel na tingim pasin bilong man ol i laik skelim​—⁠em i mekim wankain pasin?

Pilim Asua na Tanim Bel

Adam na Iv i namba wan man na meri i bihainim pasin nogut long laik bilong ol yet. Tupela i gutpela olgeta na ol i save tru long lo bilong Jehova, tasol tupela i bikhet na i no laik bai God i stap bos bilong ol. Tingim samting tupela i mekim taim Jehova i kamapim rong bilong ol​—⁠Adam i tok em asua bilong Iv, na Iv i tok em asua bilong snek! (Stat 3:​12, 13) Skelim pasin bilong tupela wantaim pasin bilong Devit, em i mekim pasin daun tru. Taim profet i soim Devit em i gat bikpela rong, Devit i pilim tru asua bilong em na em i askim Jehova long lusim rong bilong em, em i tok: “Mi mekim sin long ai bilong Bikpela.”​—⁠2 Samuel 12:13; Song 51:​4, 9, 10.

Ol elda i mas tingim dispela tupela stori taim ol i skelim bikpela rong, na ol i mas tingim moa yet sapos man i mekim rong em i bikpela pinis. Olsem wanem? Em i mekim pasin olsem Devit taim Devit i save pinis em i gat rong? Em i tokaut olsem em i gat asua na em i tanim bel na askim Jehova long helpim em na lusim rong bilong em? O em i wok long tok, i no bikpela rong, o em asua bilong narapela? Tru, ating em i laik stori long ol samting i bin kirapim em long mekim rong, na ating i gat sampela samting, bilong nau o bilong bipo, em ol elda i ken tingim taim ol i skelim rot bilong helpim em. (Skelim wantaim Hosea 4:14.) Tasol em i mas save, em yet i bin mekim rong na em yet i gat asua long ai bilong Jehova. Em i mas save: “God i save stap klostu long ol manmeri i gat hevi. Na em i save helpim ol manmeri [tingting, NW] bilong ol i bagarap.”​—⁠Song 34:18.

Ol Man i Save Mekim Rong

Planti taim Buk Song i stori long ol man nogut. Ol dispela tok bilong Baibel inap helpim ol elda long save, man i no strong o em i man nogut. Tingim tok em spirit holi i kirapim King Devit long mekim: “Yu no ken daunim mi wantaim ol man nogut, wantaim ol man i save mekim rong. Yu no ken daunim mi wantaim ol man i save mekim switpela tok, tasol tingting nogut tasol i save pulap long bel bilong ol.” (Song 28:⁠3) Ol man nogut i wankain olsem “ol man i save mekim rong.” Sapos sin long skin bilong man i kirapim em long mekim rong, taim em i pilim rong bilong em, kwiktaim bai em i lusim. Tasol man “i save mekim rong,” em i save mekim pasin nogut long olgeta taim na i kamap olsem pasin bilong em, na dispela inap makim olsem ol tingting nogut tasol i pulap long bel bilong em.

Long dispela ves, Devit i kolim narapela pasin bilong man nogut. Olsem Ananaias na Safaira, man nogut i save mekim ol switpela tok long maus, tasol ol tingting nogut i pulap long bel. Ating em i man bilong tupela maus​—⁠olsem ol Farisi long taim bilong Jisas, ‘long skin ol i olsem stretpela man, tasol long insait ol i pulap long ol pasin bilong giaman na pasin bilong sakim lo.’ (Matyu 23:28; Luk 11:39) Jehova i no laikim tru pasin bilong giaman. (Sindaun 6:​16-19) Sapos man i laik giamanim komiti bilong harim kot na em i tok, em i no mekim bikpela rong, o ol narapela i save pinis long rong bilong em na dispela tasol i kirapim em long autim rong bilong em, na em i no laik autim tru ol samting em i bin mekim, dispela inap makim olsem ol tingting nogut tasol i pulap long bel bilong em.

Hambak na Givim Baksait Long Jehova

Song 10 i kolim sampela pasin moa i makim man nogut. Song i tok: “Ol man nogut i save hambak na ranim ol rabisman bilong bagarapim ol. . . . Na [ol i] givim baksait long [Bikpela].” (Song 10:​2, 3) Yumi mas ting olsem wanem long Kristen i dediket pinis na em i hambak na givim baksait long Jehova? Em i mekim pasin nogut tru. Man i no strong na em i pundaun na mekim sin, taim em i save em i bin mekim rong o wanpela man i tokim em, em i save tanim bel na wok strong long stretim pasin bilong em. (2 Korin 7:​10, 11) Tasol man i givim baksait long Jehova na mekim rong, no gat samting bilong pasim em long mekim gen dispela rong, a? Sapos ol i givim tok long em long gutpela pasin isi, tasol em i hambak yet, em i no gat pasin daun inap long em i tanim bel tru, a?

Orait, tingim sampela tok moa bilong dispela song bilong Devit: “Man nogut i givim baksait long yu na long bel bilong en em i save tingting olsem, ‘Em i no inap bekim ol rong bilong mi.’ ” (Song 10:13) Long kongrigesen Kristen, man i mekim rong em i save wanem pasin i stret na wanem pasin i no stret, tasol em i no gat tupela tingting long mekim pasin nogut sapos em i ting em i no inap kisim strafe. Sapos em i ting ol man i no inap save long pasin em i mekim, em i no sakim liklik ol laik nogut bilong skin. Na sapos rong bilong em i kamap ples klia, em i no bihainim pasin bilong Devit​—⁠em i painim rot bilong abrusim strafe. Em i givim baksait tru long Jehova. “Dispela kain man i no save pret liklik long God. . . . Em i no save givim baksait long pasin nogut.”​—⁠Song 36:​1, 4.

Nogutim Ol Narapela

Taim man i mekim rong, dispela i nogutim ol narapela tu. Olsem: Man i bagarapim marit, em i mekim rong long God; em i mekim nogut long meri pikinini bilong em; sapos em i trabel long maritmeri, em i mekim nogut long famili bilong meri tu; em i bagarapim gutnem bilong kongrigesen. Em i ting olsem wanem long ol dispela samting? Em i bel hevi tru na tanim bel tru? O em i mekim pasin olsem Song 94 i stori long en: “Ol man nogut i . . . bikhet na amamas long pasin nogut ol i bin mekim . . . Ol i save daunim ol manmeri bilong [God] na givim bikpela hevi long ol. Ol i save kilim i dai ol meri, man bilong ol i dai pinis, na ol pikinini, papa bilong ol i dai pinis, na ol manmeri bilong narapela hap . . . Na ol i tok olsem, ‘Bikpela i no save lukim mipela. God bilong Israel i no wari long samting mipela i mekim.’ ”​—⁠Song 94:​4-7.

Ol rong i kamap insait long kongrigesen, i no rong bilong kilim man i dai. Tasol tingting bilong man, olsem em i redi long nogutim ol narapela bambai em i ken helpim skin bilong em yet, dispela tingting bilong em inap kamap ples klia taim ol elda i skelim man i mekim rong. Dispela tu em i pasin bilong hambak, em i mak bilong man nogut. (Sindaun 21:⁠4) Em i no pasin bilong Kristen tru​—⁠Kristen tru em i redi long i dai bilong helpim brata bilong em.​—⁠Jon 15:​12, 13.

Bihainim Ol Lo Bilong God

Ol dispela tok i bilong stiaim tingting tasol, i no lo. Tasol i helpim yumi long save long ol pasin Jehova i tingim i olsem em i pasin nogut tru. Olsem wanem? Man i mekim rong, em i tok em i no gat asua? Em i bikhet na sakim ol tok bipo ol i givim long em long dispela pasin? Em i bin mekim ol pasin giaman bilong haitim rong bilong em, na em i paulim ol narapela tu? (Jut 4) Taim rong bilong em i kamap ples klia, em i strong moa long mekim ol dispela pasin? Em i no hevi liklik long em i bin mekim nogut long ol narapela na bagarapim nem bilong Jehova? Olsem wanem long tingting na pasin bilong em? Taim ol i givim gutpela tok bilong Baibel long em long pasin isi, em i hambak na bikhet? Em i no gat strongpela laik long was gut bambai em i no ken mekim gen dispela rong? Sapos ol elda i lukim olsem em i gat ol dispela kain pasin na tingting i makim olsem em i no tanim bel, ol inap kisim tingting olsem em i man nogut na em i no pundaun tasol na mekim rong.

Maski i olsem man i gat ol tingting nogut long bel bilong em, ol elda i no ken les long kirapim em long bihainim stretpela pasin. (Hibru 3:12) Man nogut em inap tanim bel na senisim pasin bilong em. Sapos nogat, Jehova i no ken tokim ol Israel: “Ol manmeri bilong mekim ol pasin nogut i mas lusim ol pasin nogut bilong ol na ol i no ken tingting moa long mekim ol dispela pasin. Na ol i mas kam bek long God, Bikpela bilong yumi. Em i save marimari moa yet long ol manmeri i kam bek long em.” (Aisaia 55:⁠7) Long taim bilong harim kot tu, ating bai man i mekim sampela tok o pasin i makim olsem em i tanim bel, na bai ol elda inap pilim dispela.

Na long taim bilong rausim man long kongrigesen, ol elda i mas mekim wok wasman na kirapim em long tanim bel na wok long kam bek long Jehova na i stap gutpela gen long ai bilong em. Tingim “man nogut” i stap long Korin. Em i stretim pasin bilong em, olsem na bihain Pol i tok, kongrigesen i mas kisim em bek. (2 Korin 2:​7, 8) Na tingim King Manase. Em i mekim pasin nogut moa yet, tasol bihain em i tanim bel na Jehova i orait long em.​—⁠2 King 21:​10-16; 2 Stori 33:​9, 13, 19.

Tru, i gat wanpela kain sin God i no ken lusim​—⁠em sin bilong man i mekim tok nogut long spirit holi. (Hibru 10:​26, 27) Jehova tasol i save husat i mekim kain sin olsem. Ol man i no gat namba bilong skelim dispela. Ol elda i gat wok long helpim kongrigesen long i stap klin, na long helpim ol man i tanim bel long kamap strong gen. Sapos ol i bihainim gutpela tingting na pasin daun, na mekim ol samting i makim olsem ol i bihainim tingting bilong Jehova, orait Jehova bai blesim dispela wok wasman bilong ol.

[Ol Futnot]

[Piksa long pes 29]

Ananaias na Safaira i laik giamanim spirit holi na dispela i makim tingting nogut i stap long bel bilong ol