Olsem Wanem God i Ken Orait Long Lotu Bilong Yumi?

Olsem yumi bin stori long Lesen 13, God i no orait long olgeta lotu. Tasol yumi ken lotuim Krieta long pasin we i mekim em i amamas. Wanem “pasin bilong mekim lotu” i amamasim God? (Jems 1:27) Skelim tok Baibel i mekim.

1. Long wanem rot yumi ken kisim save long pasin bilong lotu em God i orait long en?

Yumi ken kisim save long dispela long rot bilong Baibel. Jisas i tok long God: “Tok bilong yu em i tok i tru.” (Jon 17:17) Sampela lotu i sakim tok i tru bilong God i stap long Baibel. Ol i no skulim ol man long tok i tru bilong God, nogat. Ol i skulim ol man long tingting na bilip bilong ol man. Tasol Jehova i no amamas long ol man i “givim baksait long tok bilong God.” (Ritim Mak 7:9.) Yumi mekim bel bilong em i amamas taim yumi bihainim tok bilong em i stap long Baibel.

2. Yumi mas lotuim Jehova olsem wanem?

Jehova em i Krieta bilong yumi, olsem na i stret yumi lotuim em wanpela tasol. (Revelesen 4:11) Dispela i makim olsem yumi mas laikim em na lotuim em wanpela tasol, na yumi no ken yusim ol imis o stetiu long lotuim em.—Ritim Aisaia 42:8.

Lotu bilong yumi i mas “i stap holi na [Jehova] i orait long en.” (Rom 12:1) Dispela i makim olsem yumi mas bihainim ol lo bilong em. Olsem, ol man i laikim Jehova, ol i tingim gut na bihainim ol lo bilong em long marit. Na ol i sakim ol pasin i save bagarapim bodi olsem, smok, kaikai buai, kisim drak, o dring planti alkohol.a

3. Wai na yumi mas bung wantaim ol wanbilip na lotuim Jehova?

Ol miting yumi save mekim long olgeta wik i opim rot long yumi ‘givim biknem long Jehova namel long ol manmeri i bung wantaim.’ (Buk Song 111:1, 2) Wanpela rot yumi mekim olsem em long mekim ol singsing i preisim God. (Ritim Buk Song 104:33.) Jehova i laik yumi go long ol miting bikos em i laikim yumi na em i save olsem ol miting bai helpim yumi long stap amamas oltaim. Taim yumi bung long ol miting, yumi strongim narapela narapela.

KISIM SAMPELA SAVE MOA

4. Yumi no ken yusim ol imis long mekim lotu

VIDIO: Yu Ting God i Orait Long Yusim Ol Imis Long Mekim Lotu? (3:26)

• Wanem samting i kamap taim sampela manmeri long lain bilong God long bipo i traim long lotuim em long rot bilong wanpela imis?

Sampela manmeri i save yusim ol imis bilong lotuim God bikos ol i laik go klostu long em. Yu ting dispela bai bringim ol i go klostu long God? Ritim Kisim Bek 20:4-6 na Buk Song 106:35, 36, na stori long ol dispela askim:

• Yu lukim wanem sampela samting o ol imis em ol manmeri i yusim bilong mekim lotu?

• Jehova i pilim olsem wanem long pasin bilong yusim ol imis long lotu?

• Yu pilim olsem wanem long pasin bilong yusim ol imis?

5. Sapos yumi lotuim Jehova wanpela tasol bai yumi no kalabus long ol bilip giaman

VIDIO: Tok i Tru i Mekim Mi Kamap Fri (5:16)

Ritim Buk Song 91:14, na stori long dispela askim:

• Taim yumi soim olsem yumi laikim Jehova na lotuim em wanpela tasol, em i tok promis long em bai mekim wanem long yumi?

6. Yumi lotuim God long ol miting bilong kongrigesen

Yumi litimapim nem bilong Jehova na strongim narapela narapela long rot bilong singsing na bekim tok long ol miting. Ritim Buk Song 22:22, na stori long ol dispela askim:

• Yu amamas long harim ol bratasista i bekim tok long miting?

• Yu laik redim wanpela bekim na kamapim long miting?

7. Jehova i amamas taim yumi tokim ol narapela long ol samting yumi lainim

Yumi olgeta i gat planti rot bilong tokim ol narapela long ol samting yumi lainim long Baibel. Ritim Buk Song 9:1 na 34:1, na stori long dispela askim:

• Wanem wanpela samting yu lainim long Baibel em yu laik tokim ol narapela long en?

OL BIKPELA POIN

Yumi amamasim Krieta bilong yumi taim yumi lotuim em wanpela tasol, preisim em long ol miting long kongrigesen, na tokim ol arapela long ol samting yumi lainim.

Riviu

• Olsem wanem yumi ken lotuim God long pasin em i orait long en?

• Bilong wanem yumi mas lotuim Jehova wanpela tasol?

• Bilong wanem yumi mas lotu wantaim ol man husat i laik amamasim God?

MEKIM WOK PAINIMAUT

Long stori “Mi No Stap Moa Olsem Wokmeri Bilong Ol Imis,” lukim hau wanpela meri i lusim kalabus bilong lotuim ol imis.

“Baibel i Save Senisim i Stap Bilong Man” (Wastaua, Julai 1, 2011)

Kisim save long wanem samting inap helpim yu long bekim tok long ol miting bilong kongrigesen.

“Litimapim Nem Bilong Jehova Insait Long Kongrigesen” (Wastaua, Janueri 2019)

Lukim hau ol miting bilong kongrigesen i helpim wanpela yangpela man maski i no isi long em i go long ol miting.

Jehova i Lukautim Gut Mi (3:07)

Planti manmeri i bilip olsem kruse em mak bilong ol Kristen, tasol yu ting yumi mas yusim kruse long lotu bilong yumi?

“Wai na Ol Witnes Bilong Jehova i No Yusim Kruse Long Lotu?” (Atikol long websait)