Meri i Mas Laikim Tumas Man Bilong Em na Harim Tok Bilong Em
“Meri i mas litimapim nem bilong man bilong en.” EFESAS 5:33.
1. I gat wanem ol askim long marit long nau?
LONG nau ol manmeri i no laik bai narapela man i bosim ol; ol i laik i stap “fri.” Dispela kain tingting i bin senisim tru pasin bilong marit. Long nau planti famili i gat papa tasol o mama tasol. Na planti meri i no marit tru; ol i sindaun nating wantaim man. Olsem wanem? Dispela pasin i bin helpim ol meri na ol mama long i stap gutpela? Em i bin helpim ol pikinini? Ol manmeri i sakim ol lo bilong bipo na yu ting dispela i bin helpim narapela long tingim gut narapela insait long famili? Tasol Baibel i tok yumi mas mekim wanem?
2 Taim God i tokaut long em i laik wokim namba wan meri, em i tok: “I nogut man i stap wanpis tasol.” Adam i lukim ol animal i stap tupela tupela, olsem man na meri, na ol i kamapim pikinini, olsem na ating em tu i pilim olsem i nogut em i stap wanpis. Adam em i gutpela olgeta na em i stap long gutpela ples paradais, tasol em i no gat poroman i kain bilong em. Em inap kisim tingting na mekim toktok, tasol em i no gat poroman bilong kamapim tingting long em o bilong toktok wantaim em. Tasol nau God i laik wokim poroman bilong Adam na God i tok: “Mi mas mekim kamap wanpela poroman i stap bilong helpim em.”−Jenesis 2:18-20.
3 Jehova i kisim wanpela bun long banis bilong Adam na em i wokim namba wan meri, em Iv. Olsem na Iv em i kain bilong Adam. Em i no wanpela animal−“bun bilong em i kamap long bun bilong [Adam], na mit bilong em i kamap long mit bilong [Adam].” Olsem na Baibel i tok, “Dispela pasin i kamap: Man i save lusim papamama na i pas wantaim meri bilong em, na tupela i kamap wanpela.” (Jenesis 2:23, 24) Long tok Hibru, insait bilong dispela tok “pas wantaim” i olsem “pas strong wantaim, olsem simen i pasim wantaim.” (Hebrew and Chaldee Lexicon to the Old Testament Scriptures bilong Gesenius) Dispela i makim olsem man wantaim meri bilong em i mas pas tru wantaim, olsem poroman tru, na narapela i no ken lusim narapela. Wanpela saveman i stori long insait bilong dispela tok “pas wantaim” na em i tok, “Dispela i no makim tasol olsem tupela i mekim maritpasin wantaim. Nogat. Dispela i makim tupela i pas wantaim long olgeta samting.” Olsem na marit i no bilong liklik taim tasol, bilong inapim laik na i pinis. Nogat. Em bilong longtaim. Na sapos narapela i tingim gut narapela na mekim pasin i stret long em, maski hevi i kamap long sampela taim, tasol bai tupela i pas gut wantaim na marit i no ken bruk.−Matyu 19:3-9.
4 God i tok meri i mas i stap helpim na poroman bilong man. God i wokim tupela i kain olsem em, olsem na em i laik bai tupela i mas bihainim ol gutpela pasin bilong em long ol samting narapela i mekim long narapela, olsem tupela i mas bihainim stretpela pasin na pasin sori na savepasin na strong. Olsem na Iv i no ken resis wantaim Adam na antap long em; nogat; Iv i mas i stap “poroman” bilong Adam. Nogut famili bilong tupela i olsem wanpela sip i gat tupela kepten i resis long bosim sip−Adam tasol em i bos bilong famili.−1 Korin 11:3; Efesas 5:22-24; 1 Timoti 2:12, 13.
5 Tasol namba wan man na meri i bin mekim pasin bikhet na tupela i mekim rong. Tupela i no laik bai God i stap bos bilong ol, olsem na famili bilong tupela na olgeta famili long bihain ol i kamap insait long narapela kain pasin. Jehova i save pinis long ol samting nogut bai kamap long rot bilong rong tupela i mekim, olsem na em i tokim Iv: “Bai [man bilong yu] i bosim yu.” (Jenesis 3:16) Sori tru, long bipo na i kam inap long nau, planti man i bin bosim nogut ol meri na mekim hatpela pasin long ol. Ol i bin mekim planti samting i daunim na semim ol meri na dispela pasin i stap yet long olgeta hap bilong graun. Tasol olsem stori i kamap paslain long dispela i tok, i no gat wanpela lo bilong Baibel i orait long dispela kain pasin ol man i mekim. Baibel i tok, ol man i mas tingim gut ol meri.
Em i Mas Litimapim Nem Bilong Man
6 Aposel Pita i stori long gutpela pasin bilong Krais na em i tok: ‘Krais i soim dispela pasin long yumi, bai yumi ken bihainim.’ Na nau Pita i tok: “Olsem tasol, yupela maritmeri, yupela i mas aninit long ol man bilong yupela. Na sapos sampela man i no save bihainim tok bilong God, orait ol i ken lukim yupela meri bilong ol, yupela i no toktok planti, tasol yupela i wokabaut stret. Olsem na ol i ken tanim bel. Yes, ol i ken lukim yupela meri i save [litimapim nem bilong ol] na wokabaut stret, na long dispela ol i ken tanim bel.” (1 Pita 2:21–3:2) Olsem wanem ol meri Kristen i ken “litimapim nem” bilong man bilong ol?
7 Planti sista Kristen bilong yumi i marit na man bilong ol i no bihainim tok bilong God, na sampela i karim hevi long dispela, long wanem man i birua long ol. Sapos kain pasin olsem i stap, yu ting sista inap bihainim tok bilong Pita? Em inap. Maski man “i no save bihainim tok bilong God,” tasol meri bilong em i mas daun long em na litimapim nem bilong em. Olsem na sapos man bilong wanpela sista i save birua long em na sista i save go long Haus Kingdom na stori long planti sista long olgeta pasin nogut man i mekim long em, yu ting dispela sista i litimapim nem bilong man bilong em? Sapos em i stori olsem long pasin bilong wanpela brata o sista long kongrigesen, bai yumi tok, em i mekim tok baksait na em i bagarapim gutnem bilong brata o sista, a? Olsem na sapos meri i tok nogut long man bilong em, em i no tingim gut man bilong em na em i no litimapim nem bilong em. (1 Timoti 3:11; 5:13) Tasol sampela sista, em man bilong ol i birua long ol na ol i karim bikpela hevi. Orait, ol i ken mekim wanem pasin Kristen bilong stretim dispela hevi? Ol i ken i go long ol elda na tokim ol elda long givim gutpela tingting long ol na helpim ol.−Hibru 13:17.
8 Ol elda i ken mekim wanem gutpela pasin isi sapos man bilong sista i birua long em? Pastaim ol i mas traim pilim tingting bilong man bilong em. Bilong wanem em i birua long sista? Ating em i no save gut long ol Witnes na em i tingting planti na dispela i kirapim em long sutim tok nogut long meri bilong em o paitim meri bilong em. Sampela taim man i no save gut long ol Witnes Bilong Jehova o em i no save liklik long ol. Ating em i bin harim tasol ol tok sampela wanwok bilong em i mekim long ol Witnes, em ol i no laikim ol Witnes. Na ating man i tingim narapela samting tu, olsem: Taim meri bilong em i no kirap yet long stadi long Baibel, meri i bin tingting tasol long em na long ol pikinini bilong tupela. Tru ating nau meri i kamap gutpela meri moa na gutpela mama moa, tasol man i tingting olsem: ‘Tripela taim long olgeta wik em i save lusim mi na go long ol dispela miting. Ol i mekim wanem long ol dispela miting, em mi no save, tasol mi lukim sampela man long dispela haus miting ol i gat gutpela skin, na . . . ’ Em nau, dispela tingting i mekim na em i tingting nogut long meri bilong em na em i tingting planti, nogut meri i laik lusim em. Na dispela kain tingting i kirapim em long mekim ol tok kros na long birua long meri bilong em. Sapos ol elda i pilim olsem man i gat dispela kain tingting, orait ol i ken mekim wanem bilong helpim em?−Provep 14:30; 27:4.
9 Ating wanpela elda i ken wok long kamap pren bilong dispela man bambai em i ken save gut long em. (1 Korin 9:19-23) Ating man hia i gat save long mekim wok paua o wok kamda o long penim haus samting, na bai em i orait long mekim dispela wok bilong helpim ol brata long stretim samting long Haus Kingdom. Olsem bai em i go insait long Haus Kingdom, tasol em i no i go long wanpela miting. Taim em i save pinis long sampela brata, ating nau bai em i kisim gutpela tingting long lotu bilong ol Witnes na long meri bilong em. Bai em i lukim gutpela pasin i stap long kongrigesen, em narapela i save laikim tru narapela na ol i save wok gut wantaim, na ating bai em i kirap kisim meri bilong em i go long ol miting. Na ating wanpela taim bai em i go insait na harim sampela tok bilong miting. Na bihain bai em i kirap tokim ol brata em i laik stadi. Kain gutpela samting olsem inap kamap, na em i bin kamap long sampela taim. I gat planti tausen man marit long lain Witnes long nau, em ol i bin kamap bilipman, long wanem ol brata i bin sori long ol na mekim pasin isi olsem long ol, na meri bilong ol i bin daun long ol na “litimapim nem” bilong ol.−Efesas 5:33.
Em i Lukautim Ol Samting long Haus
10 Mama bilong King Lemuel i givim gutpela tok long em bilong helpim em long painim gutpela meri tru bilong marit long em. (Provep 31:1) Mama i stori long meri i save wok strong na lukautim gut man bilong em na ol pikinini bilong em na dispela tok i stap long Provep 31:10-31. Em gutpela tok bilong kaunim na tingim gut. Dispela tok i soim yumi, mama bilong Lemuel i lain pinis long bihainim ol lo bilong God na long harim gut tok bilong man bilong em.
11 Lemuel i raitim ol dispela tok na em i tok, “meri i gat gutpela pasin tru” em i save bihainim gutpela pasin oltaim, na em i save stap gut long man bilong em na mekim gutpela pasin tasol long em. (Ves 10-12) Em i save wok strong long givim kaikai long man bilong pikinini na long lukautim ol gut. (Ves 13-19, 21, 24) Em i save mekim pasin sori na helpim ol man i sot long samting na i rabis tru. (Ves 20) Em i save harim gut tok bilong man bilong em na wokabaut stret, na dispela samting i givim biknem long man bilong em. (Ves 23) Em i no save mekim tok baksait o kros kros na sutim nating tok bilong bagarapim man. Nogat. Olgeta tok bilong em i save strongim man na helpim man. (Ves 26) Em i no save les, olsem na haus bilong em i klin na em i save stretim gut ol samting long haus. (Ves 27) (Haus bilong Kristen i mas klin moa, winim ol narapela haus i stap klostu.) Man bilong em na ol pikinini bilong em i pilim gutpela wok em i mekim na ol i save tenkyu long em na litimapim nem bilong em. Na ol narapela man tu i save pilim gutpela pasin bilong em. (Ves 28, 29, 31) Em i save aninit long God na bihainim ol pasin bilong God, olsem na em i gat gutpela pasin, i no gutpela skin tasol.−Ves 30.
Bel i Stap Isi na Bel i Malolo
12 Pita tu i mekim wankain tok, em i tok ol meri Kristen i no ken tingting tumas long bilasim skin. Em i tok: “Mobeta yupela i bilasim insait bilong bel. Dispela bilas em i no inap long bagarap. Em i pasin bilong bel i stap isi, na bel i malolo. Dispela em i gutpela tumas long ai bilong God.” (1 Pita 3:3, 4) Em i tok, ‘pasin bilong bel i stap isi na bel i malolo em i gutpela tumas long ai bilong God.’ Olsem na sapos mama Kristen i gat dispela kain pasin, bai man bilong em i amamas, na bikpela samting em olsem: Em i mekim pasin God i laikim, olsem ol bilipmeri bilong bipo i bin mekim. Wanpela tok bilong Spen i kamapim dispela gutpela pasin bilong bel, em i tok: ‘Ai i save amamas long meri i gat gutpela skin, tasol bel i save amamas long meri i gat gutpela pasin. Meri i gat gutpela skin em i olsem naispela bis, tasol meri i gat gutpela pasin em i olsem gutpela samting moa yet.’
13 Mama Kristen inap mekim gutpela pasin bilong strongim olgeta long famili na bai bel bilong ol i painim malolo o i stap isi. (Lukim Matyu 11:28-30.) Taim mama i harim gut tok bilong papa, dispela i strongim ol pikinini long mekim olsem, na bai ol i harim gut tok bilong papamama na ol narapela man tu. Dispela bai helpim ol pikinini Kristen na bai ol i tingim gut ol narapela man na mekim gutpela pasin long ol. Sapos ol pikinini yet i kirap mekim sampela wok long haus bilong helpim papamama na papamama i no subim ol long mekim, dispela i save mekim gut bel bilong papamama! Ol i tingim gut papamama na dispela i helpim famili long i stap amamas, na taim ol pikinini i lukim mama i amamas long ol i olsem ol i kisim gutpela pe.
14 Tasol olsem wanem long taim i gat wok long stretim ol pikinini? Papamama i save popaia na mekim pasin kranki long sampela taim, na ol pikinini tu i save mekim. Sampela taim ol pikinini i sakim tok. Orait, sapos papa i no i stap, bai mama Kristen i mekim wanem? Bai em i wok yet long tingim gut ol pikinini? Bai em i kros kros na bikmaus long ol bilong kirapim ol long bihainim tok? Yu ting strong bilong nek inap kirapim pikinini long bihainim tok? O gutpela sapos mama i tok isi long pikinini na toktok gut wantaim pikinini?−Efesas 4:31, 32.
15 Wanpela nius (Psychology Today) i stori long pasin bilong kirapim ol pikinini long bihainim tok na nius i tok: “Ol man i bin skelim dispela samting na ol i tok, sapos yu bikmaus long ol pikinini, bai ol i bikhet moa yet.” Na ol i tok, sapos yu tok isi long pikinini, dispela inap kirapim em long bihainim kwik tok. Tasol bikpela samting em olsem: Yu mas toktok gut wantaim pikinini bambai em i save bilong wanem em i mas bihainim tok. Nogut yu strong tasol long em i mas bihainim tok na yu putim planti tumas lo long em na yu bagarapim bel bilong em.−Efesas 6:4; 1 Pita 4:8.
Tingim Gut Skin Bilong Meri
16 Man i mas tingim gut skin bilong meri bilong em, long wanem skin bilong meri i no strong tumas. Tasol meri tu i mas tingim gut man bilong em, na tingting long mekim gut bel bilong man bilong em, na em i mas tingim laik bilong man, em i gat laik long slip wantaim meri bilong em. Baibel i makim olsem tupela i mas amamas wantaim na narapela i mas inapim laik bilong narapela. Bilong mekim olsem, narapela i mas pilim gut laik bilong narapela na tingim gut skin bilong em. Sapos tupela i mekim olsem, orait taim tupela i slip wantaim bai tupela wantaim i kisim amamas, na tupela i no ken wok long painim narapela poroman na mekim pasin pamuk.−Provep 5:15-20.
17 Tru tumas, sapos narapela i tingim gut narapela, bai meri i no pasim skin bilong em bilong subim man long bihainim laik bilong em, na bai man i no mekim olsem long meri bilong em. Narapela i no ken givim baksait long narapela na pasim skin bilong em. Tasol sapos tupela i laik tambuim skin long sotpela taim, orait tupela i mas wanbel na i mekim. (1 Korin 7:1-5) Olsem: Sapos man i laik i go mekim wok bilong sanapim nupela haus brens bilong Sosaiti Was Taua, o bilong mekim narapela kain wok olsem, orait em i mas toktok gut wantaim meri bilong em pastaim bambai em i ken save meri i orait long em i go mekim dispela wok na tupela i wanbel long dispela o nogat. Sapos papa i lusim meri pikinini bilong mekim kain gutpela wok olsem, dispela inap givim gutpela blesing bilong spirit long ol, olsem taim papa i kam bek na stori long ol gutpela samting i bin painim em, dispela inap strongim famili.
Bikpela Wok Bilong Ol Sista
18 Sapos sista em i meri bilong wanpela elda, orait dispela sista i gat bikpela wok moa. Olsem wanem na em i gat bikpela wok moa? Long wanem man bilong em i gat bikpela wok moa. Em i gat bikpela wok long helpim kongrigesen, na kongrigesen i stap strong o nogat, orait em i mas kot long Jehova long wok em i bin mekim. (Hibru 13:17) Na sapos sista i meri bilong elda, ating em i lapun meri tu na em i gat bikpela wok long harim gut tok bilong man bilong em na daun long man, bambai em i makim gutpela pasin ol yangpela meri i ken bihainim. (Lukim 1 Timoti 5:9, 10; Taitus 2:3-5.) Planti sista ol i meri bilong elda ol i stap olsem gutpela piksa−ol i helpim gut man bilong ol! Planti taim elda i mas i go mekim sampela wok bilong kongrigesen na ating meri bilong em i laik save long ol wok em i mekim. Tasol meri i givim bel long God em i no save askim nabaut long samting bilong narapela man na samting bilong kongrigesen.−1 Pita 4:15.
19 Tasol ating sampela taim elda i mas givim sampela tok long meri bilong em. Sapos meri i gat sampela tingting i no stret na em inap pundaunim narapela man, o em i no makim gutpela pasin ol narapela i ken bihainim, orait man bilong em i mas stretim dispela samting. Baibel i tok elda i mas “bosim gut meri pikinini bilong em yet,” olsem na em i mas bosim gut ol pikinini na em i mas bosim gut meri bilong em tu. Taim man i bihainim dispela lo bilong Baibel na givim sampela tok long meri bilong em, ating dispela bai traim bel bilong sampela meri, tru ol i gat pasin daun o nogat.−1 Timoti 3:4, 5, 11; Hibru 12:11.
20 Ol sista i no marit ol tu i mas tingim dispela pasin daun ol meri marit long kongrigesen i mas bihainim. Baibel i stori long sampela gutpela sista bilong bipo na i gat planti gutpela sista long ol kongrigesen long nau, em ol i stap olsem gutpela piksa! Ating Dokas em i singel, tasol ol i litimapim nem bilong em, long wanem em i save mekim gutpela pasin.” (Aposel 9:36-42) Prisila na Fibi tu i wok strong long helpim tok i tru. (Rom 16:1-4) Na olsem tasol long nau, planti sista bilong yumi, ol marit na ol singel ol i misineri o painia o pablisa na ol i mekim bikpela wok tru long autim tok. Ol dispela meri i givim bel long God na ol i mekim bikpela wok bilong autim tok, tasol ol i save klinim na stretim gut haus bilong ol na lukautim gut famili bilong ol tu. Ol i no slek long mekim dispela wok bilong ol. Ol i mekim gut tupela wok wantaim. Ol meri i bikpela lain na planti ol i gat bikpela hap taim moa bilong autim tok, olsem na ol i mekim bikpela hap wok long wok bilong autim tok.−Sam 68:11.
21 Ol gutpela sista long kongrigesen ol inap strongim tru kongrigesen. Ol i givim bel long mekim wok na ol i stap olsem gutpela piksa na dispela i strongim ol brata na lain Kristen olgeta. Ol i mekim gutpela wok olsem poroman na helpim bilong ol brata. (Lukim Jenesis 2:18.) Tru tumas, yumi mas laikim tru ol na tingim gut ol! Na long ol Kristen i marit, dispela tok bilong Pol i stret, olsem: “Yupela man wan wan: ‘Yu mas sori long meri bilong yu, olsem yu sori long yu yet.’ Na meri i mas litimapim nem bilong man bilong en.”−Efesas 5:33.
Yu Tingim?
◻ God i givim wanem wok long namba wan man na meri?
◻ Wanem gutpela rot bilong helpim ol man i no bilip na bai ol i tanim bel?
◻ Wanem sampela pasin bilong gutpela meri marit?
◻ Maritmeri Kristen em i ken mekim wanem na bai em i bihainim “pasin bilong bel i stap isi, na bel i malolo”?
◻ Man na meri marit i mas bihainim wanem stretpela tingting long maritpasin?
2. Bilong wanem i nogut Adam i stap wanpis?
3. (a) Olsem wanem Iv em i “kain” bilong Adam? (b) Wanem insait bilong dispela tok olsem man i mas “pas wantaim” meri bilong em?
4. Olsem wanem meri em i helpim na poroman bilong man bilong em?
5. Planti man i bin mekim wanem kain pasin long ol meri? God i orait long dispela kain pasin o nogat?
6, 7. (a) Sapos man bilong sista i birua long em, sista i ken mekim wanem bilong helpim man long tanim bel? (b) Sapos sista i mekim wanem ating em i no tingim gut man bilong em o litimapim nem bilong em?
8. Man i birua long sista, ating em i gat wanem kain tingting?
9. Sapos man bilong sista i no Witnes, orait ol brata i ken mekim wanem gutpela pasin isi bilong helpim kain man olsem? Na wanem gutpela samting inap kamap long dispela?
10, 11. King Lemuel i stori long wanem ol pasin bilong gutpela meri tru? (Stori long olgeta pasin wan wan.)
12. Wanem samting i “gutpela tumas long ai bilong God”? Wanpela tok bilong ol Spen i kamapim dispela samting olsem wanem?
13. Mama inap mekim wanem gutpela pasin bilong helpim ol pikinini bilong em?
14. Ating i gat wanem hatwok long stretim ol pikinini?
15. Ol man i bin skelim pasin bilong ol pikinini long bihainim tok na ol i bin kisim wanem save?
16. Meri i ken mekim wanem na bai em i tingim gut laik bilong man bilong em? Dispela bai helpim tupela olsem wanem?
17. Man wantaim meri bilong em i mas ting olsem wanem long maritpasin?
18. Olsem wanem na meri bilong elda i gat bikpela wok moa?
19. Baibel i tok, man i mas “bosim gut meri pikinini,” olsem na ating sampela taim elda i mas mekim wanem?
20. Stori long sampela gutpela sista bilong bipo na bilong nau, ol marit na ol singel.
21. Olsem wanem ol gutpela sista inap strongim brata Kristen?
[Piksa long pes 23]
Nogut famili i olsem wanpela sip i gat tupela kepten i resis long bosim sip
[Piksa long pes 25]
Sapos man i no bilip, ating bai em i bel nogut o tingting planti long meri bilong em i go long ol miting o mekim narapela wok kristen. I gat wanem rot bilong helpim em?