Yu Mas Tok Sori o Nogat?
‘MI NO save tok sori.’ Wanpela man, em George Bernard Shaw, em i bin tok olsem. Na sampela moa ol i save tok, ‘Samting yu mekim pinis, yu no inap senisim.’
Ating yumi yet i surik long kamapim wanpela rong bilong yumi, nogut yumi gat sem long en. Ating yumi tokim skin bilong yumi olsem em i asua bilong narapela. O yumi laik tok sori, tasol yumi wok long surikim taim bilong mekim, i go inap long taim yumi ting ol i lusim tingting pinis long en.
Olsem na tok sori em i bikpela samting o nogat? Em inap kamapim tru wanpela gutpela samting?
Sapos Yumi Laikim Tru Narapela Yumi Mas Tok Sori
Pasin bilong laikim tru ol brata em i wanpela mak bilong ol disaipel tru bilong Krais Jisas. Em i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35) Baibel i tokim ol Kristen long “wok strong moa long laikim ol [narapela Kristen] na givim bel . . . olgeta long ol.” (1 Pita 1:22) Sapos yumi laikim tumas brata bilong yumi, orait yumi mas tok sori long em. Bilong wanem? Long wanem, sin bilong yumi ol man i save kirapim yumi long mekim samting i bagarapim bel bilong man, na sapos yumi no stretim dispela samting, em inap daunim pasin bilong laikim tru narapela.
Olsem: Sapos wanpela hevi i kamap namel long yumi na narapela insait long kongrigesen Kristen, ating yumi no laik toktok wantaim em. Sapos yumi yet i bin kamapim dispela hevi, olsem wanem pasin bilong laikim tru narapela i ken kamap gen namel long yumi na dispela Kristen? Yumi mas tok sori long em na wok strong long toktok wantaim, na mekim long gutpela pasin. Yumi gat dinau long ol wanbilip, olsem yumi mas laikim tru ol, na taim yumi tok sori long yumi bin bagarapim bel bilong ol, i olsem yumi bekim hap bilong dispela dinau.—Rom 13:8.
Yumi ken tingim wanpela stori olsem: Mari Carmen na Paqui em tupela meri Kristen ol i bin i stap gutpela pren inap longpela taim. Tasol Mari Carmen i harim wanpela tok baksait na em i bilipim dispela tok, olsem na em i no pren gut moa wantaim Paqui. Em i givim baksait olgeta long Paqui na em i no tokim Paqui long as bilong en. Orait, klostu wanpela yia i go pinis na Mari Carmen i kisim save olsem dispela tok baksait em i bin harim i no tru. Orait em i mekim wanem? Pasin bilong laikim tru narapela i kirapim em long go long Paqui, na long pasin daun em i tok sori tru long mekim dispela pasin nogut long em. Tupela wantaim i kirap na krai nogut tru, na kirap long dispela taim tupela i kamap gutpela pren gen.
Tru, ating yumi pilim olsem yumi no bin mekim rong long narapela, tasol sapos yumi tok sori, dispela inap stretim hevi i bin kamap namel long yumi na narapela. Manuel i stori long samting i bin kamap na em i tok: “Inap planti yia bipo, mi wantaim meri bilong mi i stap long haus bilong wanpela sista bilong spirit taim em i slip long haus sik. Mitupela i wok strong tru long helpim em wantaim ol pikinini bilong em taim em i gat sik. Tasol taim em i kam bek long haus, em i tokim wanpela pren bilong em olsem mitupela i no bin mekim gut wok long mani bilong baim ol kaikai samting bilong haus.
“Orait mipela i go lukim em na mipela i tokim em olsem mipela i yangpela yet na i no gat save tumas long dispela kain wok, olsem na mipela i no lukautim gut ol wok olsem em yet bai mekim. Em i kirap kwik na tok, em yet i gat dinau long mipela na em i tenkyu tru long olgeta samting mipela i bin mekim bilong helpim em. Em nau, mipela i stretim pinis dispela hevi. Dispela samting i bin painim mipela i skulim mi olsem: Taim wanpela hevi i kamap namel long yumi na narapela, yumi mas mekim pasin daun na askim em long lusim tingting long rong bilong yumi.”
Jehova i mekim gut long dispela tupela marit, long wanem, ol i bin mekim pasin sori na “bihainim olgeta pasin i save mekim yumi i stap wanbel.” (Rom 14:19) Na bilong laikim tru narapela, yumi mas was gut, nogut yumi bagarapim bel bilong em. Pita i tok, yumi mas “sori long olgeta man.” (1 Pita 3:8) Sapos yumi gat sori long narapela, orait taim yumi popaia na mekim wanpela tok i sutim bel bilong em, ating bai yumi pilim dispela hevi yumi bin givim long em, na dispela bai kirapim yumi long tok sori long em.
“Daunim Yupela Yet”
Na ol gutpela elda Kristen tu, ating wan wan taim i gat sampela tok kros i kamap namel long ol. (Skelim wantaim Aposel 15:37-39.) Long kain taim olsem, sapos ol i tok sori dispela inap helpim ol tru. Tasol sapos wanpela elda o narapela Kristen i save hatwok long tok sori, wanem samting bai helpim em long mekim olsem?
Pasin daun bai helpim em long mekim olsem. Aposel Pita i tokim ol Kristen: “Yupela olgeta i mas bihainim pasin bilong daunim yupela yet na i stap aninit long ol arapela manmeri bilong God.” (1 Pita 5:5) Tru, taim kros i kamap namel long tupela man, planti taim em tupela wantaim i gat asua, tasol Kristen i gat pasin daun em i save tingim ol pasin kranki bilong em yet na em i redi long tokaut long ol dispela pasin kranki.—Sindaun 6:1-5.
Dispela man yumi tok sori long em, em i mas kisim dispela tok long pasin daun. Yumi ken tok piksa long tupela man, em ol i mas toktok gut wantaim, tasol ol i sanap antap long narapela narapela maunten. Namel long tupela maunten i gat wanpela bikpela ples daun, na tupela i traim long toktok wantaim, tasol tupela i no inap. Orait nau wanpela i go daun long maunten na i sanap long dispela ples daun, na narapela i bihainim pasin bilong em na mekim olsem. Em nau, tupela inap toktok gut wantaim na i no gat hatwok. Na i olsem tu sapos tupela Kristen i mas stretim wanpela hevi i stap namel long tupela. Long tok piksa yumi ken tok, narapela i mas i go bungim narapela long ples daun namel long tupela maunten, na nau narapela i ken tok sori long narapela.—1 Pita 5:6.
Tok Sori Insait Long Marit
Marit bilong wanpela man na meri em sin i stap long skin bilong ol, dispela i givim planti rot long ol long tok sori long poroman. Sapos man i sori long meri, na meri i sori long man, dispela bai kirapim tupela long tok sori taim tupela i mekim wanpela tok o pasin i sutim bel bilong poroman. Sindaun 12:18 i tok: “Sapos man i no tingting gut na i tok, orait tok bilong en inap bagarapim bel bilong narapela man olsem bainat i sutim em. Tasol tok bilong man i gat gutpela tingting i save helpim ol man olsem gutpela marasin.” Tru, yumi no inap tekewe wanpela ‘tok i olsem bainat i sutim man,’ tasol yumi inap stretim dispela hevi sapos yumi tok sori na bel bilong yumi i no giaman. Tasol oltaim yumi mas redi long mekim olsem.
Susana i stori long marit bilong em na em i tok: “Mitupela Jack* i bin marit inap 24 krismas, tasol mitupela i lain yet long sampela pasin bilong narapela em mitupela i no bin save long en. Sori tru, bipo liklik mipela i bruk na stap narapela narapela inap sampela wik. Tasol mipela i harim tok bilong Baibel ol elda i givim long mipela, na mipela i sindaun gen wantaim. Nau mipela i save, pasin bilong mipela i narapela narapela kain, olsem na sampela taim kros inap kamap namel long mipela. Taim dispela samting i kamap, kwiktaim mipela save tok sori na mipela i wok strong long pilim tingting bilong poroman. Mi amamas long tokaut olsem nau marit bilong mitupela i wok long kamap gutpela.” Na Jack i tok: “Mipela i lain tu long luksave long ol samting inap skrapim bel bilong poroman, na long kain taim olsem, narapela i save isi tru long narapela.”—Sindaun 16:23.
Orait, sapos yu ting yu no gat asua, yu mas tok sori o nogat? Taim bel bilong tupela wantaim i bagarap, i hatwok long tingting stret olsem em asua bilong husat tru. Tasol bikpela samting, em bel isi i mas i stap insait long marit. Tingim Abigel, em wanpela meri Israel, na man bilong em i bin mekim nogut long Devit. I no asua bilong Abigel na man bilong em i bin mekim pasin longlong, tasol em i tok sori long Devit. Em i tok: “Mi laik bai yu lusim dispela rong bilong mi.” Olsem na Devit i mekim gutpela pasin long em, na long pasin daun Devit i tokaut olsem, sapos Abigel i no bin kam na mekim dispela tok long em, bai em i kilim i dai ol man i no gat asua.—1 Samuel 25:24-28, 32-35.
Na wanpela meri Kristen, nem bilong em June, em i bin marit inap 45 krismas, na em i ting, bilong marit i ken kamap gutpela, em i mas redi long go pas long tok sori. Em i tok: “Mi save tokim skin bilong mi, marit bilong mitupela i bikpela samting tru, na tingting i stap long bel bilong mi i no bikpela samting tumas. Olsem na taim mi tok sori, mi pilim olsem mi helpim marit bilong mi long stap strong.” Wanpela lapun, nem bilong em Jim, em i tok: “Mi save tok sori long meri bilong mi long ol liklik samting tu. Em i gat bikpela sik na dokta i katim em, na kirap long dispela taim em i save bel hevi hariap. Olsem na planti taim mi save holim em na tok, ‘Sori, lewa bilong mi. Mi no laik bagarapim bel bilong yu.’ Em nau, taim mi tok olsem, wantu bel bilong em i gutpela—olsem wanpela liklik purpur yumi givim wara long en na kwiktaim em i kisim strong.”
Sapos yumi bin bagarapim bel bilong dispela poroman yumi save laikim em tru, orait taim yumi tok sori, bel bilong em bai gutpela. Milagros i wanbel long dispela tok. Em i tok: “Mi save ting mi no inap mekim gut wanpela wok, olsem na taim man bilong mi i sutim strongpela tok long mi, bel bilong mi i bagarap stret. Tasol taim em i tok sori, wantu bel bilong mi i gutpela.” Em nau, Baibel i tok stret tru, olsem: “Gutpela tok i olsem hani. Em i swit moa na i save strongim bodi bilong ol manmeri.”—Sindaun 16:24.
Mekim Tok Sori
Sapos oltaim yumi mekim tok sori taim yumi mas mekim olsem, bai yumi lukim olsem ol man bai amamas long dispela pasin bilong yu. Na ating ol yet bai kirap na tok sori long yu. Taim yumi pilim olsem yumi bin bagarapim bel bilong wanpela, i gutpela yumi ken kisim pasin bilong tok sori, na maski lusim taim long mekim ol samting bambai yu ken abrusim wok bilong tokaut olsem em i asua bilong yumi. Tru, ating ol man bilong graun i ting, taim yumi tok sori, dispela i makim olsem yumi no gat bun, tasol dispela pasin i mak bilong strongpela Kristen. Tasol yumi no laik bihainim pasin bilong sampela, em ol i tokaut olsem ol i bin mekim wanpela rong, tasol ol i mekim olsem ol i no gat wok long stretim. Olsem wanem? Sampela taim yumi save tok sori, tasol bel bilong yumi i no pilim tru? Sapos yumi kamap bihaintaim tru long wanpela bung samting na yumi wok long mekim bikpela tok sori, yumi tingting strong long stretim dispela pasin bilong yumi long kamap bihaintaim?
Orait, yumi mas tok sori o nogat? Yes yumi mas mekim. Yumi gat wok long mekim olsem bilong helpim yumi yet na ol narapela tu. Taim yumi tok sori, dispela inap daunim hevi em sin bilong yumi i save kamapim, na em inap stretim ol liklik kros samting i stap namel long yumi na narapela. Long olgeta taim yumi mekim tok sori, dispela i lainim yumi long mekim pasin daun, na em i lainim yumi tu long was gut, nogut yumi bagarapim bel bilong man. Sapos yumi lain long mekim olsem, ol wanbilip na poroman marit bilong yumi na ol narapela tu bai laikim tru yumi na bilip long yumi. Na bai yumi stap bel isi na God Jehova bai mekim gut long yumi.
[Futnot]
a Em i no nem tru bilong ol.
[Piksa long pes 23]
Taim yumi tok sori na bel i no giaman, dispela i save kamapim strong pasin Kristen long laikim tru ol narapela