Amamas Long Stadi Long Tok Bilong God

“Bai mi tingting long olgeta samting yu bin mekim. Yu bin mekim ol strongpela wok, na bai mi tingim dispela tu.”​​—⁠SONG 77:12.

1, 2. (a) I gat wanem as na yumi mas makim hap taim bilong tingim tingim ol samting long bel? (b) Taim yumi tingim tingim ol samting long bel, i olsem yumi mekim wanem?

YUMI ol disaipel bilong Jisas Krais i mas tingim gut pasin bilong yumi long pas gut wantaim God na i gat wanem as na yumi mekim wok bilong Em. Tasol long nau planti man i gat planti wok ol i mekim na ol i no makim hap taim bilong tingim tingim ol samting long bel. Ol i tingting tasol long kisim ol samting bilong skin, na baim planti samting, na painim kain kain amamas. Yumi ken mekim wanem na bai yumi no insait long kain wok olsem i no gat as tru bilong en? Olsem yumi save makim hap taim long olgeta de bilong mekim ol samting yumi mas mekim, olsem kaikai na slip, olsem tasol yumi mas makim hap taim long olgeta de bilong tingim tingim ol samting Jehova i bin mekim na ol wok bilong em.​​—⁠Lo 8:3; Matyu 4:⁠4.

² Olsem wanem? Yu save lusim hap taim bilong tingim tingim ol samting long bel? Wanpela buk dikseneri i tok dispela pasin i olsem yumi putim tingting i go long wanpela samting na skelim skelim na tingim gut long bel. Dispela em i bikpela samting long yumi olsem wanem?

 3. Wanem samting bai helpim yumi long kamap strong long ol samting bilong spirit?

³ Wanpela samting i olsem: Em i mas kirapim yumi long tingim dispela tok aposel Pol i raitim long wanwok bilong em, Timoti: “Wok yet long ritim buk bilong God long ol manmeri na long autim as bilong tok long ol na long skulim ol gut long pasin God i laikim. . . . Oltaim yu mas lukautim gut [“tingim tingim,” NW ] ol dispela wok bilong yu. Yu mas wok hat long mekim olgeta dispela wok i kamap gut, na bai olgeta manmeri i lukim pasin bilong yu yet i kamap gutpela tru.” Yes, Timoti i mas wok long kamap strong moa, na ol tok bilong Pol i soim olsem pasin bilong tingim tingim ol samting bilong spirit bai helpim em long mekim olsem. Na i wankain tu long nau. Bilong kamap strong moa long ol samting bilong spirit, yumi mas “tingim tingim” tok bilong God long Baibel.​​—⁠1 Timoti 4:​13-​15.

 4. I gat wanem ol tul yu ken mekim wok long en bilong helpim yu long tingim tingim tok bilong Jehova long Baibel?

⁴ Bilong makim hap taim i gutpela long yu long tingim tingim ol samting long bel, skelim sediul bilong yu na bilong famili. Planti ol i skelim wanpela tok bilong Baibel long moningtaim tru, taim ol i ritim buklet Skelim Sampela Tok Bilong Baibel Long Olgeta De. Ol 20,000 volantia long Betel long olgeta hap ol i save lusim 15 minit long olgeta moningtaim bilong tingim wanpela skripsa bilong Baibel bilong dispela de. Tru, wan wan tasol long famili Betel i mekim sampela tok long olgeta moningtaim, tasol ol narapela long famili ol i tingim tingim ol tok ol i harim. Na sampela Witnes i tingim tingim tok bilong Jehova long Baibel taim ol i go long wok. Ol i save putim yau long ol kaset bilong Baibel na bilong nius Wastaua na Kirap! em ol i stap long sampela tok ples. Planti meri marit ol i save harim ol tok long kaset taim ol i mekim wok long haus. Long dispela pasin ol i bihainim man bilong raitim song, em Asap, em i tok: “God, bai mi tingting gen long ol bikpela wok bilong yu. Yes, bai mi tingting bek long ol kain kain bikpela samting bipo yu bin mekim. Bai mi tingting long olgeta samting yu bin mekim. Yu bin mekim ol strongpela wok, na bai mi tingim dispela tu.”​​—⁠Song 77:​11, 12.

Kisim Stretpela Tingting

 5. I gat wanem as na pasin bilong stadi i bikpela samting long yumi?

⁵ Long nau i gat TV, video, na kompiuta, olsem na planti man i no save ritim buk. Tasol dispela pasin i no ken stap namel long ol Witnes Bilong Jehova. Pasin bilong ritim Baibel i rot bilong helpim yumi long save long Jehova. Planti tausen yia bipo, Josua i senisim Moses olsem lida bilong Israel. Bilong kisim blesing bilong Jehova, Josua yet i mas ritim Tok Bilong God. (Josua 1:8; Song 1:​1, 2) Yumi tu i gat wok long ritim Baibel. Tasol sampela i no bin skul gut, olsem na ol i no save gut long rit o ol i hatwok long mekim. Olsem na wanem samting i ken helpim yumi na bai yumi gat laik long ritim na stadi long Tok Bilong God? King Solomon i bekim dispela askim long Sindaun 2:​1-6. Plis opim Baibel bilong yu na ritim ol dispela ves. Bihain bai yumi stori long en.

 6. Yumi mas kamapim wanem kain tingting long kisim save long God?

⁶ Pastaim i gat dispela tok: “Pikinini, yu mas harim tok bilong mi na putim gut long tingting bilong yu. Yu mas putim yau gut long olgeta tok i save givim yu gutpela tingting. Na yu mas wok strong long kisim gutpela save.” (Sindaun 2:​1, 2) Dispela tok i lainim yumi long wanem samting? Olsem: Em wok bilong yumi olgeta wan wan long stadi long Tok Bilong God. Lukim dispela tok, “yu mas harim tok bilong mi.” Em i mekim dispela tok “mas,” long wanem, planti man i no laik putim yau long Tok Bilong God. Bilong amamas long stadi long Baibel, yumi mas redi long harim ol tok bilong Jehova na tingim ol dispela tok i olsem wanpela gutpela samting tru em yumi no laik lusim. Maski yumi gat ol wok bilong mekim long olgeta de, yumi no ken larim dispela i mekim na yumi gat planti wok tumas o ol dispela wok i pulim nabaut tingting bilong yumi na nau yumi les long ritim Baibel o yumi gat tupela tingting long en.​​—⁠Rom 3:​3, 4.

 7. Taim yumi gat rot, i gat wanem as na yumi mas stap long ol miting Kristen na putim gut yau?

⁷ Olsem wanem? Taim ol i kamapim Tok Bilong God long ol miting Kristen, yumi save ‘putim gut yau’? (Efesus 4:​20, 21) Yumi save “wok strong” bambai yumi inap kisim gutpela save? Maski brata i no save gut tru long pasin bilong toktok, taim em i kamapim Tok Bilong God, yumi mas putim gut yau long ol tok em i mekim. Tasol bilong putim yau long ol tok bilong Jehova i gat gutpela tingting na save long en, yumi mas stap long ol miting Kristen long olgeta taim yumi gat rot long mekim olsem. (Sindaun 18:⁠1) Tingim: Sapos wanpela man i bin lusim dispela miting long rum antap long Jerusalem long Pentikos 33 C.E., bai em i bel hevi stret! Tru, ol miting bilong yumi i no narakain tru olsem dispela miting i bin kamap long de Pentikos, tasol yumi save kamapim ol tok bilong Baibel, em namba wan buk yumi stadi long en. Olsem na olgeta miting inap helpim gut yumi sapos yumi putim gut yau na opim Baibel na lukim ol tok brata i ritim.​​—⁠Aposel 2:​1-4; Hibru 10:​24, 25.

8, 9. (a) Taim yumi stadi, yumi mas mekim wanem? (b) Olsem wanem long pe bilong gol na pasin bilong save long God?

⁸ Orait nau Solomon i tok: “Yu mas askim gutpela tingting na save long kam long yu, olsem yu singautim wanpela man i kam bilong helpim yu.” (Sindaun 2:⁠3) Dispela tok i givim wanem tingting long yumi? Olsem: Yumi mas i gat strongpela laik long kisim gut tok bilong Jehova long Baibel. Yumi mas amamas long stadi na bai yumi ken kisim gutpela save, na save long laik bilong Jehova. Bilong mekim olsem, yumi mas wok strong. Orait nau yumi ken tingim wanpela tok piksa Solomon i mekim.​​—⁠Efesus 5:​15-17.

⁹ Em i tok: “Yu mas wok hat long painim gutpela tingting, olsem man i wok long painim silva ol i bin haitim insait long graun na olsem man i wok long painim mani samting ol i bin haitim.” (Sindaun 2:⁠4) Dispela i kirapim yumi long tingim wok bilong digim graun ol man i bin mekim inap planti handet yia bilong painim silva na gol, em ol i ting i gutpela samting tru. Sampela i bin kilim i dai ol narapela bilong kisim gol. Na sampela, kirap long taim ol i yangpela yet i go inap long taim ol i dai, ol i bin wok long painim. Tasol gol i gutpela samting olsem wanem? Tingim: Sapos yu stap long ples wesan nating na yu no gat wara na yu laik i dai, orait yu laik kisim wanem samting​—⁠gol o wara? Tasol ol man i bin givim bel tru bilong painim gol, maski em samting ol man yet i save makim pe bilong en, na strong bilong en i save senis senis!a Orait, yumi mas givim bel moa yet long painim gutpela tingting, na save gut long God na long laik bilong em, a? Tasol wok bilong painim ol dispela samting bai helpim yumi olsem wanem?​​—⁠Song 19:​7-​10; Sindaun 3:​13-​18.

10. Sapos yumi stadi long Tok Bilong God, bai yumi save long wanem samting?

¹⁰ Solomon i tok moa: “Sapos yu mekim ol dispela samting, orait bai yu save tru long pasin bilong stap aninit long Bikpela, na bai yu save gut long God.” (Sindaun 2:⁠5) Man! Yumi kirap nogut tru long dispela tok, a? Yumi ol man i gat sin yumi inap “save gut long God,” Jehova, em Bikpela King bilong heven na graun! (Song 73:28; Aposel 4:​24) Ol saveman bilong dispela graun i bin wok strong inap planti handet yia long save long ol samting i gat laip na ol samting bilong ples antap. Tasol ol i bin lus long “save gut long God.” Bilong wanem? Maski save bilong God i bin stap planti tausen yia long Baibel na ol inap kisim, ol i bin sakim, long wanem, ol i ting dispela save i no gat hatwok liklik long kisim​—⁠i olsem bilong ol pikinini tasol⁠—olsem na ol i no bilip long en na kisim gut as bilong en.​​—⁠1 Korin 1:​18-​21.

11. Stadi inap helpim yumi olsem wanem?

¹¹ Orait nau Solomon i kamapim narapela samting bilong kirapim yumi: “Bikpela yet em i as bilong gutpela tingting. Na em i save givim gutpela tingting na save long yumi.” (Sindaun 2:⁠6) Jehova i save givim planti gutpela tingting na save long olgeta man i givim bel long painim. I gat as tru na yumi mas laikim tumas long stadi long Tok Bilong God, maski yumi mas wok strong, na bosim gut skin, na lusim sampela samting bilong yumi yet long mekim. I gutpela tru yumi gat Baibel ol i prinim pinis na yumi no gat wok long raitim raitim ol tok bilong en long han, olsem sampela bipo ol i bin mekim!​​—⁠Lo 17:​18, 19.

Wokabaut Long Pasin Jehova i Laikim

12. Wanem samting i mas kirapim yumi long save gut long God?

¹² Wanem samting i mas kirapim yumi long stadi? Bilong winim ol narapela? Bilong kamapim bikpela save bilong yumi? O bilong stap olsem wanpela saveman tru bilong Baibel? Nogat. Yumi laik stadi bambai yumi ken i stap Kristen tru long pasin na wok bilong yumi, na bihainim pasin bilong Krais na oltaim redi long helpim ol narapela na givim nupela strong long ol. (Matyu 11:​28-​30) Aposel Pol i mekim tok lukaut olsem: “Save nating em i save kirapim pasin bilong bikhet. Tasol pasin bilong givim bel bilong yumi long ol arapela man, dispela i save mekim yumi i kamap strongpela Kristen.” (1 Korin 8:⁠1) Olsem na yumi mas i gat wankain pasin daun olsem Moses i kamapim taim em i tokim Jehova: “Mi laik yu tokim mi long tingting bilong yu na bai mi ken save gut long yu na oltaim mi ken mekim pasin yu save laikim.” (Kisim Bek 33:13) Yes, yumi mas i gat laik long kisim save bambai yumi ken mekim pasin God i laikim, na i no bilong ol man i ken litimapim nem bilong yumi. Yumi laik stap wokboi bilong God i gat pasin daun na God i orait long yumi. Olsem wanem yumi inap winim dispela mak?

13. Man i mas mekim wanem na bai em i ken kamap wokman God i orait long en?

¹³ Pol i tokim Timoti long olsem wanem em i ken mekim pasin God i laikim. Em i tok: “Yu mas wok strong long kamap wokman tru, na bai God i laikim wok bilong yu. Olsem na bai yu autim stret tok tru bilong God, na bai yu no gat sem long ai bilong en.” (2 Timoti 2:​15) Tok Grik ol i tanim olsem “autim stret,” insait bilong en i olsem “katim stret.” (Baibel Kingdom Interlinear) Sampela saveman i tok, dispela inap makim man bilong samapim klos em i save bihainim mak bilong pepa na katim laplap, o fama i wokim ol liklik baret long gaden bilong planim kaikai, o kain samting olsem. Tasol maski man i katim laplap o wokim baret, em i mas mekim stret. Olsem na bilong stap olsem wokman God i laikim na orait long en, Timoti i mas “wok strong” bambai em i ken save gut olsem ol tok em i skulim ol man long en na ol pasin bilong em, dispela i stret wantaim tok i tru bilong Baibel.​​—⁠1 Timoti 4:​16.

14. Taim yumi stadi, dispela i mas mekim wanem long ol pasin na tok bilong yumi?

¹⁴ Pol i kamapim wankain tingting taim em i kirapim ol wanlain Kristen long Kolosi long ol i mas ‘wokabaut long pasin Bikpela i laikim,’ na bilong mekim olsem ol i mas ‘mekim planti kain gutpela wok, na save long God, na oltaim dispela save bai i kamap bikpela moa.’ (Kolosi 1:​10) Pol i bungim pasin bilong wokabaut stret long ai bilong God wantaim pasin bilong “mekim planti kain gutpela wok” na “save long God.” Em nau, bikpela samting long Jehova, em yumi ting olsem wanem long kisim save, tasol i no dispela samting tasol; yumi mas bihainim gut Tok Bilong God long ol pasin na tok yumi mekim. (Rom 2:​21, 22) Olsem na taim yumi stadi, dispela i mas stiaim tingting na pasin bilong yumi na bai yumi ken mekim pasin God i laikim.

15. Olsem wanem yumi ken lukautim na bosim ol tingting bilong yumi?

¹⁵ Long nau, Satan i wok strong long bosim tingting bilong yumi na bai em i ken bagarapim yumi long ol samting bilong spirit. (Rom 7:​14-​25) Olsem na yumi mas lukautim na bosim tingting bilong yumi na bai God bilong yumi, Jehova, i ken orait long yumi. Samting bilong lukautim yumi, em dispela “save” yumi kisim long God​—⁠em inap “kalabusim olgeta tingting bilong ol man, bilong mekim tingting bilong ol i bihainim laik bilong Krais.” Em nau, i gat as na yumi mas stadi long Baibel long olgeta de, long wanem, yumi laik rausim olgeta tingting nogut.​​—⁠2 Korin 10:⁠5.

Ol Samting Bilong Helpim Yumi Long Kisim Save

16. Taim Jehova i skulim yumi, yumi ken mekim wanem bilong helpim yumi yet?

¹⁶ Ol tok Jehova i skulim yumi long en i helpim yumi long ol samting bilong spirit na skin. Ol dispela tok i save kirapim tru tingting bilong yumi na i helpim tru yumi. Baibel i tok: “Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut.” (Aisaia 48:17) Olsem wanem Jehova i save soim yumi stretpela pasin yumi mas bihainim? Namba wan samting, em yumi gat Baibel. Dispela em nambawan buk yumi stadi long en, na oltaim yumi save lukim ol tok bilong en. Olsem na taim yumi stap long ol miting Kristen, i gutpela sapos yumi opim Baibel na lukim ol tok ol i ritim. Yumi ken lukim ol gutpela samting i kamap long dispela pasin long stori bilong man Itiopia long Aposel sapta 8.

17. Wanem samting i painim man bilong Itiopia? Dispela i lainim yumi long wanem samting?

¹⁷ Man bilong Itiopia i bihainim lotu Juda. Em i bilip tru long God, na em i save stadi long Baibel. Wanpela taim em i raun long karis na em i ritim buk bilong Aisaia, na Filip i ran i go klostu na i askim em: “Ating yu save long as bilong dispela tok yu ritim, o nogat?” Man bilong Itiopia i tok wanem? “ ‘Sapos i no gat man i tokim mi long as bilong dispela tok, orait bai mi inap save olsem wanem?’ Na em i tokim Filip, ‘Yu kam antap long karis na sindaun wantaim mi.’ ” Orait nau spirit holi i stiaim Filip na em i helpim dispela man long kisim gut as bilong tok profet bilong Aisaia. (Aposel 8:​27-​35) Dispela i lainim yumi long wanem samting? Olsem: Sapos yumi ritim Baibel na em tasol, dispela i no inap. Long rot bilong spirit holi, Jehova i save mekim wok long lain wokboi i gat gutpela tingting bilong helpim yumi long kisim gut as bilong Tok bilong em long taim stret. Em i mekim olsem wanem?​​—⁠Matyu 24:​45-​47; Luk 12:42.

18. Lain wokboi i gat gutpela tingting i helpim yumi olsem wanem?

¹⁸ Tru, Jisas i tok dispela lain wokboi i gat “gutpela tingting,” tasol em i no tok dispela lain i no inap popaia, nogat. Dispela lain brata Kristen em God i bin makim ol, ol i no gutpela man olgeta. Maski ol i gat laik tru long mekim stret ol samting, ol inap popaia, olsem sampela brata Kristen i bin mekim long taim bilong ol aposel. (Aposel 10:​9-​15; Galesia 2:​8, 11-​14) Tasol ol i gat gutpela bel, na Jehova i save mekim wok long ol bilong givim ol buk na nius bilong Baibel long yumi bilong strongim bilip bilong yumi long Baibel na long ol tok promis bilong God. Namba wan tul dispela lain i bin givim long yumi bilong mekim stadi bilong yumi yet, em Baibel New World Translation of the Holy Scriptures. Ol i bin prinim 114 milion bilong dispela Baibel​—⁠em Baibel olgeta o hap bilong en​—⁠long 42 tok ples. Olsem wanem yumi ken mekim gutpela wok long en taim yumi stadi?​​—⁠2 Timoti 3:​14-​17.

19. Wanem sampela hap long Baibel New World Translation​​—⁠With References inap helpim yumi taim yumi mekim stadi bilong yumi yet?

¹⁹ Orait yumi ken tingim Baibel New World Translation of the Holy Scriptures​​—⁠With References. Em i gat ol ves long blok namel long pes i makim narapela hap bilong Baibel i kamapim wankain tok, na ol footnote, na long hap “Bible Words Indexed” na “Footnote Words Indexed,” i gat lista bilong helpim ol man long painim ol tok, na i gat “Appendix” i kamapim 43 stori, na i gat ol mep na sat. Na i gat “Introduction” i stori long planti olpela rait ol i bin mekim wok long en bilong kamapim dispela Baibel. Sapos yu save long tok Inglis, orait lukim ol dispela gutpela samting na mekim wok long en. Tasol maski yumi inap mekim o nogat, Baibel em nambawan buk yumi mekim wok long en taim yumi stadi, na yumi gat wanpela Baibel, New World Translation, i kamapim strong nem bilong God taim em i stori long wok king bilong God.​​—⁠Song 149:​1-9; Daniel 2:​44; Matyu 6:​9, 10.

20. I gat wanem ol askim long pasin bilong stadi em yumi mas bekim?

²⁰ Orait nau yumi laik askim: ‘Wanem sampela helpim moa em yumi mas i gat bilong save gut long Baibel? Olsem wanem yumi ken makim hap taim bilong mekim stadi bilong yumi yet? Olsem wanem yumi ken mekim stadi bilong yumi i kamap gutpela moa? Stadi yumi mekim i mas mekim wanem long ol narapela?’ Stori i kamap bihain long dispela bai stori long ol dispela bikpela samting bilong helpim yumi ol Kristen long kamap strong moa.

[Futnot]

Yu Inap Tingim?

• Taim yumi tingim tingim ol samting long bel, i olsem yumi mekim wanem?

• Yumi mas i gat wanem kain tingting long pasin bilong stadi long Tok Bilong God?

• Wanem samting i mas kirapim yumi long stadi?

• Yumi gat wanem ol tul bilong helpim yumi long save gut long Baibel?

[Piksa long pes 15]

Long olgeta moningtaim ol brata sista bilong famili Betel i save skelim wanpela skripsa na dispela i save strongim ol long ol samting bilong spirit

[Ol Piksa long pes 15]

Taim yumi raun long ka na harim ol kaset bilong Baibel, yumi save mekim gutpela wok long hap taim bilong yumi

[Piksa long pes 16]

Ol man i bin wok strong na wok inap longtaim tru bilong kisim gol. Yu save wok strong long stadi long Tok Bilong God o olsem wanem?

[Kredit Lain]

Courtesy of California State Parks, 2002

[Ol Piksa long pes 17]

Baibel inap bringim yu long laip i stap oltaim oltaim