Pasin Bilong Jop Long i Stap Gut Long God—Husat Inap Bihainim?
“God bai skelim mi long skel i stret na bai em i save, mi bin i stap gut long em.”—JOP 31:6, NW.
1. Bilong wanem i gutpela sapos yumi skelim ol samting Jop i bin mekim? Na i gat wanem ol askim long dispela?
JOP i bilip tru olsem em i bin holimpas stretpela pasin na i stap gut long God, olsem na em i no pret long God i skelim em. Pasin bilong em inap strongim yumi long nau, long wanem long dispela taim nau Seten i wok strong long pundaunim olgeta man i mekim wok bilong God bambai ol i lusim stretpela pasin na lusim wok bilong God. (1 Pita 5:8) Disaipel Jems i save long dispela samting na em i tok, “yupela i mas tingim ol profet,” olsem Jop, “bipo ol i autim tok long nem bilong Bikpela. Ol birua i bin mekim nogut long ol, tasol ol i strongim bel na karim dispela hevi.” (Jems 5:10, 11) Tasol husat inap bihainim pasin bilong Jop long i stap gut long God? Ating yumi inap? Jop i mekim wanem na dispela i makim ol pasin yumi ken bihainim bilong i stap gut long God?
2. (a) Wanem insait bilong dispela nem Jop? (b) Jop i stap gut long God na dispela i mekim wanem?
2 Insait bilong dispela nem Jop i olsem “Man Ol i Birua long Em,” na tru tumas dispela samting i bin painim Jop. Jehova i larim Seten i mekim nogut long Jop na em i no lukautim moa Jop, tasol Seten i no inap pundaunim Jop. Jop i stap gut long God. (Jop 1:1-2:10) Dispela samting Jop i mekim i givim rot long God bilong bekim tok long Seten, em Seten i tok em inap pundaunim olgeta man na bai ol i lusim God. (Provep 27:11) Jop i stap gut long God na long dispela rot i olsem em i tokaut long olgeta ensel na olgeta man: ‘Seten yu man bilong giaman, long wanem Jehova em i God bilong mi na mi no ken lusim em. Maski wanem wanem samting i painim mi, bai mi stap gut long em!’—Jop 27:5.
Ol Manmeri i Kain Olsem Jop
3. God i lukautim gut husat long heven? I gat wanem askim long em?
3 Olgeta man na olgeta ensel tu i insait long dispela tok Seten i sutim long Jehova. Long heven God i lukautim gut dispela “pikinini” em i rot bilong God bilong kamapim olgeta gutpela gutpela samting God i laik mekim. (Jenesis 3:15) Tasol taim God i no lukautim moa dispela “pikinini,” bai em i bihainim pasin bilong Jop na i stap gut long God? Bai em i kamapim long ples klia olsem man i gutpela olgeta wankain olsem Adam long pastaim em inap i stap gut olgeta long God? (1 Korin 15:45) Seten i redi long putim bikpela traim tru long dispela “pikinini” taim em i kam long graun.
4. Seten i birua tru long husat? Olsem wanem yumi save, wanpela taim God i no lukautim em moa? (b) Jisas i givim wanem samting long God?
4 Krais Jisas em i dispela “pikinini” God i salim em i kam long graun. Seten i birua tru long em. Na wanpela taim Jehova i no lukautim em moa. Yumi inap save long dispela samting, long wanem taim Krais i stap long pos pen em i singaut strong na em i tok: “God bilong mi, God bilong mi, bilong wanem yu lusim mi?” (Matyu 27:46; Sam 22:1) Jisas i pilim tru olsem God i no lukautim em moa, tasol olsem Jop, em “i no mekim sin o toknogutim God.” (Jop 1:22, NW) Em i bihainim pasin bilong Jop na em i stap gut olgeta long God. Long dispela rot em i kamapim long ples klia olsem long graun “i no gat narapela man i kain olsem em.” (Jop 1:8, NW) Jisas i givim rot long God Jehova bambai Jehova inap bekim tru, inap long olgeta taim bihain, tok giaman Seten i bin sutim long Em, olsem Em i no inap putim wanpela man long dispela graun em bai sanap strong long bikpela traim tru na i stap gut long God.
5. (a) Seten i wok yet long mekim wanem? (b) Ol i rausim Seten long heven na em i mekim wanem?
5 Tasol Seten i laik kisim bekim moa yet, olsem na em i kotim yet ol brata spirit bilong Jisas, em olgeta wantaim Jisas i olsem “lain” o “pikinini” bilong oganaisesen o “meri” bilong God. Baibel i stori long Kingdom bilong God i kamap long heven na i tok long Seten olsem: “Dispela man bilong kotim ol brata bilong yumi, em i bin kotim ol long ai bilong God bilong yumi long san na long nait.” Seten i no kotim tasol dispela lain; em i kirapim pait long ol! Baibel i tok, taim ol i rausim Seten long heven, nau em i “belhat long dispela meri, na em i go na i laik kirapim pait wantaim ol arapela pikinini bilong en. Em ol dispela manmeri i save bihainim olgeta lo bilong God, na ol i autim tok bilong Jisas na bihainim em.”—Revelesen 12:7-12, 17.
6. (a) Husat long nau ol i go pas long autim tok? Husat ol i kam bung na wok wantaim ol? (b) Seten i laik mekim wanem long olgeta dispela manmeri?
6 Ol dispela “arapela pikinini” bilong dispela “meri” em ol witnes bilong Jehova spirit holi i bin makim ol na ol i stap yet long graun. Ol i go pas long wok bilong “autim tok bilong Jisas”—ol i autim tok long olgeta hap bilong graun na tokim ol man Jisas i kamap king pinis na liklik taim bai dispela pasin nogut bilong nau i pinis. (Matyu 24:14; Danyel 2:44) Tasol i no dispela lain tasol ol i autim tok. Nogat! Bikpela lain tru, inap olsem 3 milion samting, ol i bin i kam bung na ol i wok wantaim ol. Seten i wok long mekim nogut long olgeta dispela manmeri tu, em ol i stap gut long God na ol i stap wanbel na wanlain tru. Na Papa bilong ol long heven, em God Jehova, em i amamas tru long stretpela pasin bilong ol.—2 Timoti 3:12; Provep 27:11.
7. Bilong wanem yumi no ken pret long ol samting Seten i mekim bilong pundaunim yumi?
7 Bipo Seten i birua tru long Jop na long nau em i birua tru long yumi ol manmeri i wok long i stap gut long God. Yumi mas tingim gut dispela samting. Tasol yumi no ken pret. Bilong wanem yumi no ken pret? Long wanem “Bikpela [Jehova] i save sori moa long yumi, na oltaim em i marimari long yumi.” Na “em i no ken lusim [yumi], na em i no ken givim baksait long [yumi].” (Jems 5:11; Diuteronomi 31:6, NW) Tru tumas, Jehova bai helpim yumi na strongim yumi. Baibel i tok: ‘Em i save lukautim gut ol stretpela man.’ (Provep 2:7) Tasol i no olsem Jehova i no ken larim traim i painim yumi. Nogat. Em bai larim traim i painim yumi olsem em i bin larim traim i painim Jop. Tasol aposel Pol i tok: “God i save bihainim promis bilong em, bai em i no larim wanpela traim i winim strong bilong yupela. Nogat. Sapos traim i kamap long yupela, bai God i wokim rot bilong helpim yupela. Dispela rot em i olsem: Bai em i strongim yupela na yupela inap sanap strong long traim.”—1 Korin 10:13.
Taim Traim i Kamap long Yumi
8. Olsem wanem pasin bilong Jop inap helpim yumi long nau?
8 Pasin bilong Jop long i stap gut long God em inap helpim yumi long nau taim bikpela traim tru i kamap long yumi. Bikpela hevi tru i painim Jop na em i laik bai em i dai na em i ken hait i stap long matmat. (Jop 14:13) Sampela long nau tu ol i pilim olsem. Ating sampela taim yu tu yu pilim olsem. Taim yumi kaunim stori bilong Jop i olsem yumi kisim gutpela tok bilong strongim yumi i kam long wanpela pren bilong yumi em i bin karim bikpela hevi moa, winim ol hevi bilong yumi. Taim yumi save i gat narapela man em i bin karim bikpela hevi na sanap strong, em dispela man i pilim pinis hevi yumi karim, orait dispela samting i helpim yumi long sanap strong, a?
9. Taim ol narapela man i karim hevi na sanap strong, olsem wanem dispela i helpim yumi?
9 Jehova i save long ol samting bilong helpim yumi, olsem na em i putim stori bilong Jop long Baibel bilong helpim yumi long i stap gut long Em olsem Jop i bin mekim. (Rom 15:4; Jems 5:10, 11) God i save narapela hap bilong bodi i mas helpim narapela hap bilong bodi na olsem tasol narapela gutpela wokboi bilong em i mas helpim narapela gutpela wokboi bilong em. (1 Korin 12:20, 26) Planti milion manmeri i save kaunim dispela nius Wastaua ol i bin i go long ol “Holimpas Stretpela Pasin” kibung distrik. Ol manmeri i bin i go long ol dispela kibung ol i pilim pinis gutpela samting ol i kisim taim ol i bung wantaim planti manmeri, em nambawan bikpela tingting bilong ol em olsem ol i laik i stap gut long God. Ol manmeri i go long ol dispela kibung ol i save ol i stap namel long planti tausen manmeri em ol i save holimpas stretpela pasin na i stap gut long God long ples wok o long skul—na sampela ol i karim bikpela hevi na sanap strong. Dispela samting i strongim tru ol manmeri i go long ol dispela kibung!—1 Pita 5:9.
10. (a) Wanem samting inap mekim na ating bai yumi lusim stretpela tingting? (b) Jop i tingting kranki olsem wanem?
10 Tasol ating sampela taim yumi lusim stretpela tingting olsem Jop i bin mekim. Man i karim bikpela hevi na em i stap bel hevi, ating bai em i tingting olsem: ‘Bilong wanem God i mekim olsem long mi? Bilong wanem em i karim hevi olsem i painim mi?’ O ating bai tingting bilong em i kamap kranki tru na bai em i ting olsem: ‘Sapos mi mekim wok bilong God, dispela i helpim mi olsem wanem?’Jop i no save long as bilong ol hevi i painim em na em i tingting kranki olsem: ‘Sapos ol gutpela man i karim bikpela hevi, winim ol man nogut, bilong wanem mi wok strong long bihainim stretpela pasin? Dispela i helpim mi olsem wanem?’ (Jop 9:22) Ilaihu i tok Jop i bin tok olsem: “Dispela i helpim mi olsem wanem? Mi kisim wanem samting winim sapos mi bin mekim sin?” (Jop 35:3, NW) Tasol nogut yumi tingting tumas long ol hevi bilong yumi na yumi lusim stretpela tingting, na yumi ting sapos yumi mekim wok bilong God yumi no inap kisim wanpela gutpela samting.
11. Ilaihu i givim wanem gutpela tok long Jop bilong stretim tingting bilong em?
11 Ilaihu i givim gutpela tok long Jop bilong stretim tingting bilong em. Ilaihu i tok Jehova i stap antap moa na em i gat bikpela nem tru, winim Jop. (Jop 35:4, 5) Ilaihu i tok, maski wanem wanem samting i painim yumi, tasol yumi no ken ting God i no pilim hevi bilong yumi. Na yumi no ken ting em i mekim pasin i no stret long yumi; na yumi no ken ting yumi inap mekim sampela samting na bekim nogut long em. Nogat. Yumi no ken ting olsem. Ilaihu i givim askim long Jop, olsem: “Sapos yu mekim rong, yu ting dispela bai mekim nogut long God? Sapos yu mekim planti rong, yu ting dispela bai nogutim God?” (Jop 35:6, NW) Tru tumas, sapos yu tingting long bekim nogut long God na yu lusim ol stretpela pasin bilong em o lusim wok bilong em, yu bagarapim yu yet tasol; yu no mekim nogut long God.
12. Taim yumi stap gut long God, dispela i mekim wanem long em?
12 Na Ilaihu i tok, sapos yumi bihainim stretpela pasin, dispela i no helpim God. Tru sapos yumi stap gut long God, God i amamas long dispela samting. Tasol taim yumi lotuim God i no olsem yumi helpim God. Ilaihu i mekim olsem taim em i tokim Jop: “Sapos yu mekim stretpela pasin, yu givim wanem samting long God? Em i kisim wanem samting long han Bilong yu?” (Jop 35:7, NW) God i givim laip na win na olgeta samting long yumi; em i givim strong long yumi na yumi save wokabaut. Olgeta samting em i bilong em! (Aposel 17:25; 1 Kronikel 29:14) Olsem na pasin nogut o stretpela pasin bilong yumi i no inap mekim wanpela samting long God yet.—Jop 35:8.
Taim Yumi Kisim Tok Bilong Stretim Yumi
13. (a) Taim Jop i kisim tok Bilong stretim em, em 1 mekim wanem? (b) Yumi olgeta yumi gat wanem hevi?
13 Taim Ilaihu na bihain Jehova yet i stretim Jop, Jop i mekim wanem? Em i harim tok na em i hevi long rong em i bin mekim na em i tanim bel tru. (Jop 42:6) Yes, Jop i bihainim pasin daun na em i no haitim rong bilong em. Yumi save laikim tru kain pasin daun olsem, a? Tasol olsem wanem long yumi? Ating yumi sanap strong na stap gut long God olsem Jop, tasol yumi olgeta yumi save popaia na sampela taim yumi mekim pasin kranki. (Jems 3:2; Galesia 2:11-14) Orait, taim wanpela man, ating wanpela yangpela man olsem Ilaihu, i kamapim dispela popaia o pasin kranki long yumi bilong stretim yumi, bai yumi mekim wanem?—Jop 32:4.
14. (a) Planti man taim ol i kisim sampela tok bilong stretim ol, ol i mekim wanem? (b) Wanem samting inap mekim na bai yumi popaia na yumi no tingting gut? Taim Jop i kisim tok bilong stretim em, em i makim wanem gutpela pasin yumi ken bihainim?
14 Taim wanpela man i stretim yumi, long dispela taim yumi no save amamas. (Hibru 12:11; Provep 3:11, 12) Ating bai yumi kirap mekim sampela tok bilong karamapim rong bilong yumi. Ating olsem Jop yumi no bin tingting long mekim wanpela tok nogut o wanpela pasin nogut; yumi popaia tasol na yumi mekim. Ating yumi no save gut long sampela samting o yumi no pilim hevi bilong narapela man na yumi mekim sampela tok i givim hevi long em. Ating tok yumi mekim i makim olsem yumi hambak na yumi ting lain bilong yumi i winim ol narapela lain, o yumi strong long ol man i mas mekim wanpela samting, tasol Baibel i no gat lo long dispela samting. Taim wanpela man i tokim yumi, dispela tok yumi bin mekim i kamapim tingting bilong yumi yet tasol na em i bin givim hevi long sampela man na bagarapim ol long spirit, orait bai yumi bihainim pasin bilong Jop? Bai yumi tokaut olsem yumi ‘no save gut’ na yumi mekim dispela tok na yumi hevi long rong yumi bin mekim?—Jop 42:3, 6.
Givim Bel long God; i No long Mani Kago
15. Olsem wanem yumi save Jop i no givim bel long mani kago bilong em?
15 Bildat i sutim tok long Jop na em i tok, Jop i givim baksait long God na givim bel long narapela samting. ( Jop 8:13, 14) Tru, Jop i bin kisim planti samting bilong skin, tasol em i no givim bel long ol dispela samting na ting ol dispela samting inap helpim em; nogat. Taim olgeta samting bilong em i lus, em i no lusim God. (Jop 1:21) Long laspela tok Jop i bekim long dispela tripela man, em i tok: Sapos mi givim bel long mani gol, o mi tokim mani gol, ‘Mi bilip tru olsem yu inap helpim mi!’ Sapos bipo mi amamas, long wanem mi gat planti samting, na han bilong mi i bin kisim planti samting; . . . orait dispela tu i olsem mi mekim rong na bai mi gat kot, long wanem i olsem mi givim baksait long God tru i stap antap.”—Jop 31:24-28, NW.
16. (a) Yumi olgeta i mas givim wanem ol askim long skin bilong yumi yet? (b) God i givim wanem tok promis long ol man i givim bel long em?
16 Orait, olsem wanem long yumi? Yumi givim bel long wanem samting? Yumi givim bel long Jehova o long ol mani kago samting? Sapos God i skelim yumi long skel i stret, olsem Jop i laik bai God i mekim long em, God bai lukim yumi bihainim stretpela pasin long dispela samting o nogat? Olsem wanem? Yumi gat bikpela tingting long i stap gut long God bambai God i ken bekim tok long Seten? O yumi gat bikpela tingting long inapim olgeta laik bilong yumi long kisim amamas na kisim planti samting bilong skin? Gutpela tru sapos yumi bihainim pasin bilong Jop na givim bel long Jehova na yumi no tingting tumas long yumi yet o long kisim ol samting bilong skin yumi inap kisim. Long dispela rot bai yumi mekim bel bilong Jehova i amamas. Sapos yumi givim bel long Jehova na tingim ol samting bilong em pastaim, em i givim gutpela tok promis long yumi, em i tok em i no ken lusim yumi o givim baksait long yumi.—Matyu 6:31-33; Hibru 13:5, 6.
Sakim Pasin Pamuk Samting
17. Tripela “pren” bilong Jop i no tok stret, tasol tripela i ting Jop i bin mekim wanem?
17 Tripela pren giaman bilong Jop i no tok stret olsem ol i ting Jop i bin mekim pasin pamuk, tasol planti taim ol i tok em i bin mekim wanpela rong long pasin hait na nau God i givim strafe long em. Jop em i wanpela maniman, em i “gat bikpela nem tru, winim olgeta narapela man long hap bilong sankamap,” olsem na ating em i gat rot bilong mekim pasin pamuk. (Jop 1:3, NW; 24:15) Sampela wokboi bilong God ol i stap paslain o bihain long Jop, ol i bin pundaun na mekim pasin pamuk. (Jenesis 38:15-23; 2 Samuel 11:1-5) Tasol Jop i tok em i no bin mekim kain rong olsem. Em i tok: “Mi wokim kontrak wantaim ai bilong mi. Olsem na ai bilong mi i no ken lukluk long yangpela meri singel. Sapos bel bilong mi i kirap long wanpela meri na mi hait na wet long dua bilong haus bilong man i stap klostu long mi, . . . dispela em i pasin nogut tru, em i wanpela bikpela rong na bai mi gat kot.”—Jop 31:1, 9-11, NW.
18. Bilong wanem i hatwok long sakim pasin pamuk long nau? Tasol sapos yumi holimpas stretpela pasin na sakim pasin pamuk, bilong wanem bai yumi amamas?
18 Seten i bin pundaunim planti wokboi bilong God long rot bilong pasin pamuk. (Nambas, sapta 25) Olsem wanem? Yu inap holimpas stretpela pasin olsem Jop i bin mekim na sakim olgeta samting i laik pulim yu long mekim pasin pamuk? Em hatwok, long wanem nau long dispela taim planti manmeri i mekim pasin pamuk na kain kain pasin sem. Tasol gutpela tru sapos long taim God i skelim yumi, yumi inap mekim tok wankain olsem bilong Jop, em i tok: “Bai [God] i save, mi bin i stap gut long em”!—Jop 31:6, NW.
Wanem Samting Inap Helpim Yumi?
19. Wanem samting em i bikpela samting bilong helpim yumi long holimpas stretpela pasin na i stap gut long God?
19 I hatwok long yumi bihainim pasin bilong Jop long i stap gut long God, long wanem Seten i wok strong long pundaunim yumi olsem bipo em i mekim long Jop. Orait, wanem samting inap helpim yumi? Bikpela samting em olsem: Yumi mas kisim olgeta klospait God i save givim long yumi. (Efesas 6:10-18) Yumi mas stretim tingting bilong yumi bambai yumi tingim tru God, olsem Jop i bin mekim; oltaim yumi mas tingting long mekim pasin God i lainim long olgeta samting yumi o famili bilong yumi i mekim. (Jop 1:5) Olsem na long olgeta taim yumi mas stadi na lainim ol tok bilong Baibel, na bung wantaim ol wanlotu bilong yumi long ol miting, na autim bilip bilong yumi long ol man.—2 Timoti 2:15; Hibru 10:25; Rom 10:10.
20. (a) Yumi mas bilip long wanem samting na dispela inap helpim yumi long winim ol traim? (b) Sapos yumi wokabaut stret na i stap gut long God, yumi inap kisim wanem pe olsem man bilong raitim sam i tok?
20 Tasol i gat wanpela samting i bin strongim tru Jop na em inap strongim yumi tu, em olsem: Jop i bilip tru olsem em i no bilong i stap nau Tasol. Em i tok: “Man i dai pinis em inap kisim bek laip?” Na em i bekim tok olsem: “Bai yu singaut na mi bai harim.” (Jop 14:13-15, NW) Sapos yumi gat wankain strongpela bilip olsem Jop na yumi bilip tru olsem Jehova bai kirapim bek ol gutpela wokboi bilong em, dispela lo inap helpim yumi long sanap strong na karim olgeta hevi Seten i putim long yumi. (Hibru 6:10) Longtaim bipo, wanpela man bilong raitim sam long Baibel, em i raitim tok olsem: “Yu bin lukim mi wokabaut stret, olsem na yu lukautim mi, na yu holim mi klostu long yu oltaim.” (Sam 41:12) Gutpela tru sapos Jehova i mekim olsem long yumi! Gutpela tru sapos em i lukim yumi wokabaut stret, na bai em i lukautim yumi na holim yumi i stap klostu long em inap long olgeta taim bihain!
Yu Inap Bekim?
◻ Husat ol i kamap wankain olsem Jop? Ol i mekim wanem ol pasin wankain olsem Jop?
◻ Pasin Jop i mekim taim traim i painim em, dispela i lainim yumi long wanem samting?
◻ Taim Jop i kisim tok bilong stretim em, em i mekim wanem? Na dispela i lainim yumi long wanem samting?
◻ Jop i makim wanem gutpela pasin long kisim ol samting bilong skin na long pasin pamuk?
◻ Wanem samting inap helpim yumi long holimpas stretpela pasin na i stap gut long God olsem Jop i bin mekim?
[Piksa long pes 17]
Olsem Jop, sampela taim yu tingting olsem: ‘Sapos mi stap gut long God, dispela bai helpim mi olsem wanem long nau?’