Mekim Ol Samting Bilong Kamapim Bel Isi
“Yumi mas wok strong long mekim ol samting i save kamapim bel isi.”—ROM 14:19.
1, 2. Bilong wanem bel isi i stap namel long ol Witnes Bilong Jehova?
LONG nau, i no gat bel isi tru i stap namel long ol man. Na ol man bilong wankain kantri na wankain tokples, planti taim ol tu i no stap wanbel. Ol samting ol i mekim long sait bilong lotu, wok politik, mani, na ediukesen, dispela i mekim na ol i bruk bruk. Tasol bel isi i stap namel long 7 milion Witnes Bilong Jehova i stap long olgeta hap bilong graun, maski ol i bilong “olgeta kantri na bilong olgeta lain na bilong olgeta lain pipol na bilong olgeta tokples.”—Rev. 7:9.
2 I gat ol gutpela risen na bel isi i stap namel long yumi. Nambawan risen em yumi ‘stap wanbel wantaim God.’ Dispela i kamap, long wanem, yumi bilip long Pikinini bilong em husat i bin sakrifaisim laip bilong em bilong helpim yumi. (Rom 5:1; Efe. 1:7) Na tu, Jehova i givim holi spirit long ol gutpela wokboi bilong em, na holi spirit i save kamapim bel isi. (Gal. 5:22) Narapela risen na yumi stap bel isi na wanbel em long wanem yumi “no insait long ol samting bilong dispela graun.” (Jon 15:19) Dispela i makim olsem yumi no insait long wok politik o woa. Olsem Baibel i tok, lain bilong Jehova i “paitim ol bainat bilong ol i kamap olsem ol ain bilong brukim graun.”—Ais. 2:4.
3. Bel isi i stap namel long yumi i kirapim yumi long mekim wanem? Nau bai yumi stori long wanem samting?
3 Insait long kongrigesen yumi “laikim narapela narapela,” maski yumi bilong narapela narapela ples na kastam na tingting bilong yumi i no wankain. (Jon 15:17) Bel isi i stap namel long yumi i kirapim yumi long “mekim gutpela pasin long olgeta man, tasol moa yet long ol wanbilip.” (Gal. 6:10) Bel isi i stap namel long yumi na Jehova na ol bratasista, dispela i dia tumas, olsem na yumi mas lukautim. Nau bai yumi stori long olsem wanem yumi ken i stap wanbel taim ol hevi i kamap insait long kongrigesen.
Taim Yumi “Popaia”
4. Taim yumi bagarapim bel bilong wanpela, yumi ken mekim wanem bilong stap bel isi wantaim em?
4 Disaipel Jems i tok: “Planti taim yumi olgeta i save popaia. Sapos man i no popaia long tok em i mekim, orait dispela man i gutpela olgeta.” (Jems 3:2) So sampela taim tupela long kongrigesen bai i no wanbel o wanpela hevi i kamap namel long ol. Tasol sapos hevi i kamap, ol inap long stretim na bai bel isi i stap yet insait long kongrigesen. Olsem, ritim samting Jisas i tok yumi mas mekim sapos yumi ting yumi bin bagarapim bel bilong narapela.—Ritim Matyu 5:23, 24.
5. Taim wanpela i bagarapim bel bilong yumi, yumi ken mekim wanem bilong i stap bel isi wantaim em?
5 Olsem wanem sapos wanpela i bagarapim bel bilong yumi? I stret long ting olsem em i mas kam na tok sori long yumi? Namba 1 Korin 13:5 i tok man i gat pasin laikim em i no save tingim rong ol arapela i mekim long em. Taim wanpela i bagarapim bel bilong yumi, yumi soim olsem yumi laik i stap bel isi wantaim em taim yumi fogivim em na lusim tingting long dispela hevi. (Ritim Kolosi 3:13.) Dispela em i nambawan gutpela samting long mekim taim hevi i no bikpela tumas. Na i helpim yumi long stap wanbel wantaim ol brata bilong yumi. Na yumi stap amamas, long wanem, yumi mekim pasin i stret. Wanpela savetok i kamapim olsem em i gutpela samting long lusim tingting long rong narapela i mekim.—Snd. 19:11.
6. Olsem wanem sapos wanpela i bagarapim bel bilong yumi na i hatwok long lusim tingting long en?
6 Olsem wanem sapos wanpela i bagarapim bel bilong yumi na i hatwok long lusim tingting long en? Yumi no bihainim savetingting sapos yumi kamapim dispela hevi long ol arapela. Dispela kain pasin bilong tok baksait inap bagarapim bel isi bilong kongrigesen. Yumi ken mekim wanem bilong stretim dispela hevi? Matyu 18:15 i tok: “Sapos brata bilong yu i mekim sin, orait yu mas i go na kamapim rong bilong em namel long yutupela yet. Sapos em i harim tok bilong yu, orait yu bai kisim bek brata bilong yu.” Tru Matyu 18:15-17 i stori long ol bikpela sin, tasol yumi inap yusim stiatok i stap long ves 15 taim ol narapela narapela samting i kamap. So taim yu gat hevi wantaim narapela, em gutpela long yutupela tasol i toktok. Yumi mas bihainim gutpela pasin taim yumi toktok wantaim brata bilong yumi na traim long kamap wanbel gen wantaim em.a
7. Bilong wanem yumi mas stretim ol hevi kwiktaim?
7 Aposel Pol i tok: “Sapos yupela i belhat, orait no ken mekim sin. No ken larim san i go daun na yupela i belhat yet. Na no ken opim rot long Satan.” (Efe. 4:26, 27) Na Jisas i tok: “Sapos wanpela man i laik kotim yu, orait hariap na stretim tok wantaim em.” (Mat. 5:25) Bilong i stap bel isi wantaim narapela, yumi mas stretim ol hevi kwiktaim. Taim yumi no mekim olsem, ol hevi bai go bikpela moa, kain olsem sua i go nogut moa sapos kwiktaim yu no putim marasin long en. Yumi no ken larim pasin antap, jeles, o pasin bilong laikim tumas mani i pasim yumi long stretim hevi yumi gat wantaim brata bilong yumi.—Jems 4:1-6.
Taim Planti i Insait Long Hevi
8, 9. (a) Ol i tok pait long wanem samting long kongrigesen long Rom? (b) Olsem wanem Pol i stretim ol Kristen long Rom?
8 Sampela taim hevi i kamap insait long kongrigesen we planti man i insait long en. Dispela samting i bin kamap long ol Kristen long Rom. Tok pait i kamap namel long ol Kristen Juda na ol Kristen bilong ol arapela lain. Sampela insait long kongrigesen i luk daun long ol arapela em maus bilong bel bilong ol i kotim ol long olgeta liklik liklik samting. Na dispela lain, em maus bilong bel i kotim ol, ol i wok long jasim ol arapela long ol samting em wan wan yet i mas wokim disisen long en. Orait Pol i givim wanem tok long kongrigesen?—Rom 14:1-6.
9 Pol i givim tok kaunsel long tupela lain wantaim. Wanpela lain i kliagut olsem ol i no stap aninit long Lo Bilong Moses, na Pol i tokim ol olsem ol i no ken luk daun long ol brata bilong ol. (Rom 14:2, 10) Kain tingting olsem inap pundaunim ol arapela husat i no laik tru long kisim ol kaikai em Lo i tambuim. Pol i tok: “No ken tingim kaikai tasol na bagarapim wok bilong God.” Na em i tok tu: “I no gutpela long kaikai mit o dring wain o mekim wanpela samting i pundaunim brata bilong yu.” (Rom 14:14, 15, 20, 21) Na long ol man em maus bilong bel i kotim ol, Pol i tokim ol olsem ol i no ken jasim ol arapela em ol i no gat wankain tingting olsem ol. (Rom 14:13) Em i tokim ol: “Mi tok long olgeta man wan wan i stap namel long yupela, yu no ken ting yu nambawan tru.” (Rom 12:3) Bihain long em i stretim dispela tupela lain Kristen, em i tok: “Yumi mas wok strong long mekim ol samting i save kamapim bel isi na ol samting i save strongim ol arapela.”—Rom 14:19.
10. Olsem ol Kristen long Rom, ol man husat i gat hevi nau wantaim narapela, ol i mas mekim wanem bilong stretim dispela?
10 Yumi ken save gut olsem kongrigesen long Rom i bin bihainim tok bilong Pol na senisim pasin bilong ol. Long nau, sapos yumi bihainim ol tok bilong Baibel, yumi inap stretim ol hevi wantaim ol bratasista bilong yumi long gutpela pasin. Wankain olsem ol Kristen long Rom, sapos hevi i kamap insait long kongrigesen long nau, orait olgeta husat i insait long dispela hevi i mas mekim sampela samting “bilong stap bel isi wantaim.”—Mak 9:50.
Ol Samting Ol Elda Inap Mekim
11. Elda i mas mekim wanem sapos wanpela i laik toktok wantaim em long hevi em i gat wantaim narapela Kristen?
11 Olsem wanem sapos brata o sista i gat hevi wantaim wanpela wanblut o narapela Kristen na em i laik toktok wantaim elda long dispela samting? Sindaun 21:13 i tok: “Sapos yu pasim yau na yu no laik harim ol rabisman i singaut long yu bilong helpim ol, orait bihain ol man bai i no harim singaut bilong yu tu.” Sapos elda i no laik harim stori bilong wanpela husat i laik kisim helpim, orait i olsem elda i “pasim yau.” Tasol narapela tok bilong Buk Sindaun i tok: “Taim wanpela man i sanap long kot na toktok, i luk olsem tok bilong en bai i win. Tasol taim arapela man i askim em long kliaim dispela tok, ol man i no save husat tru bai i win.” (Snd. 18:17) Long gutpela pasin elda i mas putim yau, tasol em i mas was gut, em i mas kisim sampela save moa long dispela hevi paslain long em i wokim disisen. Taim elda i harim pinis stori bilong brata o sista, elda i ken askim em olsem em i bin toktok wantaim man o meri em i gat hevi wantaim em o nogat. Na tu, elda i ken toktok wantaim em long tok bilong Baibel i stori long samting yumi mas mekim bilong i stap bel isi wantaim ol bratasista bilong yumi.
12. Wanem 3-pela eksampel i soim olsem hevi inap kamap sapos yu hariap tumas long mekim samting taim yu harim tok bilong wanpela hevi?
12 Hevi inap kamap sapos yu hariap tumas long mekim samting taim yu harim wanpela sait tasol bilong wanpela hevi. I gat 3-pela eksampel long Baibel i kamapim klia dispela samting. Namba 1 eksampel em samting i kamap long Potifar. Meri bilong en i giaman na tok Josep i traim long reipim em. Potifar i bilipim meri na em i belhat na salim Josep i go long kalabus. (Stt. 39:19, 20) Narapela eksampel em samting King Devit i bin mekim. Siba, wokboi bilong Mefiboset, i tokim Devit olsem Mefiboset i helpim ol birua bilong Devit. Devit i bilipim em na wantu em i tok: “Tru, a? Orait nau mi givim olgeta samting bilong Mefiboset i go long yu.” (2 Sml. 16:4; 19:25-27) Namba 3 eksampel em samting i kamap long King Artaserksis. Ol birua bilong ol Juda i tokim king olsem ol Juda i laik bikhet long king na long dispela as ol i wokim gen Jerusalem. King i bilipim tok giaman bilong ol na em i pasim wok bilong ol Juda. Na long dispela as, ol Juda i lusim wok bilong sanapim tempel bilong God. (Esr. 4:11-13, 23, 24) Ol elda Kristen i bihainim savetingting taim ol i bihainim tok em Pol i givim long Timoti olsem ol i no ken kirap jasim man paslain long ol i harim stori olgeta bilong samting i bin kamap.—Ritim 1 Timoti 5:21.
13, 14. (a) Yumi mas tingim wanem ol samting taim tupela man i tok pait? (b) Wanem samting inap helpim ol elda long skelim stret ol kain hevi olsem?
13 Baibel i tok: “Maski sapos wanpela man i ting em i save pinis long wanpela samting, save bilong dispela man i no inap yet.” (1 Kor. 8:2) Yumi inap ting olsem yumi save long ol samting i bin kamap taim tupela man i tok pait. Tasol tingim, ating yumi no save long olgeta samting i bin kamap. Na tu, ating yumi no save gut tru long dispela tupela man i tok pait. Ol elda i mas was gut tru taim ol i skelim wanpela hevi, ol i no ken larim ol tok giaman o tok win i giamanim ol. Na tu, ol i no ken bilipim nating tok bilong man, long wanem, em i gat planti mani. Jisas, em jas God i makim, i no save “skelim man long ol toktok em i harim na long ol samting em i lukim long ai tasol. Nogat.” (Ais. 11:3, 4) Jisas i larim spirit bilong God i stiaim em. Ol elda Kristen tu i mas larim spirit bilong God i stiaim ol.
14 Paslain long ol i skelim wanpela hevi, ol elda i mas beten askim Jehova long givim spirit bilong em long ol. Ol i larim spirit bilong God i stiaim ol taim ol i yusim Baibel na ol buk samting em “gutpela wokboi i gat savetingting” i kamapim.—Mat. 24:45.
Yumi Mas Stap Bel Isi Wantaim God
15. Sapos wanpela Kristen i save olsem wanpela brata o sista i mekim bikpela rong, orait long wanem taim em i mas tokaut long ol elda long dispela?
15 Baibel i tok yumi mas stap bel isi wantaim ol arapela. Tasol tu em i tok: “Savetingting i kam long heven i mekim man i stap klin, dispela em i nambawan bikpela samting. Na tu, em i mekim man i stap wanbel wantaim ol arapela.” (Jems 3:17) Baibel i tok nambawan bikpela samting em yumi mas i stap klin. Dispela i makim olsem yumi mas larim God i tokim yumi long wanem samting i stret na wanem samting i no stret, na sindaun bilong yumi i mas mekim God i amamas. Sapos wanpela Kristen i save olsem wanpela brata o sista i mekim wanpela bikpela rong, orait em i mas tokim em long kamapim sin bilong em long ol elda. (1 Kor. 6:9, 10; Jems 5:14-16) Sapos brata o sista i no tokaut long bikpela rong em i mekim, orait Kristen husat i save long dispela rong i mas tokaut long ol elda. Sapos dispela Kristen i no laik mekim olsem, long wanem, em i laik i stap bel isi wantaim sinman, orait em tu i mekim sin.—Wkp. 5:1; ritim Sindaun 29:24.
16. Yumi kisim wanem skul long samting Jehu i mekim long King Joram?
16 Pasin Jehu i mekim i soim olsem em i bikpela samting moa long mekim pasin i stret, winim pasin bilong i stap bel isi wantaim man i save mekim bikpela rong. God i salim Jehu long givim strafe long famili bilong King Ahap. Pikinini bilong Ahap na Jesebel em King Joram, em wanpela man nogut. Em i kam long karis na bungim Jehu na askim em: “Olgeta samting i stap i orait, o nogat?” Na Jehu i bekim tok olsem, “Bai i orait olsem wanem, sapos mama bilong yu Jesebel, i wok yet long bihainim ol giaman god na i mekim ol pasin nogut na ol pasin bilong mekim posin.” (2 Kin. 9:21-23) Orait nau Jehu i yusim banara bilong en na sutim Joram long lewa. Jehu i kirap long mekim samting, na olsem tasol ol elda tu i mas kirap long mekim samting sapos wanpela sinman i no tanim bel. Ol elda i no ken ting long i stap bel isi wantaim sinman husat i no laik tanim bel na long dispela as ol i larim em i stap yet insait long kongrigesen. Ol elda i save rausim ol sinman bambai kongrigesen i ken i stap bel isi yet wantaim God.—1 Kor. 5:1, 2, 11-13.
17. Ol Kristen i mas mekim wanem bilong kamapim bel isi?
17 Planti taim ol hevi i kamap namel long yumi em long ol liklik samting tasol, i no long ol bikpela rong. So em i gutpela moa long mekim pasin laikim na lusim tingting long ol popaia brata i mekim. Baibel i tok: “Sapos man i laik bai ol man i stap gut wantaim pren bilong ol, orait em i no ken kamapim ol rong ol i bin mekim. Tasol sapos man i toktok nabaut long wanpela rong, orait em bai i mekim man i kros long pren bilong en.” (Snd. 17:9) Sapos yumi bihainim tok bilong Baibel, orait yumi bai helpim kongrigesen long i stap bel isi na yumi bai stap pren yet wantaim Jehova.—Mat. 6:14, 15.
God i Blesim Ol Man i Stap Bel Isi Wantaim Ol Arapela
18, 19. Olsem wanem Jehova i save blesim yumi taim yumi wok strong long i stap bel isi wantaim ol arapela?
18 Jehova i save blesim yumi taim yumi wok strong long i stap bel isi wantaim ol arapela. Taim yumi mekim olsem, pasin pren bilong yumi wantaim Jehova bai stap strong, na yumi helpim kongrigesen long i stap wanbel. Taim yumi stap bel isi wantaim ol arapela insait long kongrigesen, dispela i skulim yumi long i stap bel isi wantaim ol man em yumi “autim gutnius bilong bel isi” long ol. (Efe. 6:15) Yumi redi long “isi long olgeta man” na long bosim gut yumi yet ‘taim narapela i mekim pasin nogut long yumi.’—2 Tim. 2:24.
19 Wok yumi mekim long nau long i stap bel isi wantaim narapela, i redim yumi long samting bai kamap long bihain. Baibel i tok Jehova bai kirapim bek ol stretpela man na ol man nogut wantaim. (Apo. 24:15) Dispela i makim olsem Jehova bai kirapim bek planti milion man em ol i gat kain kain pasin. Em ol man bilong ol narapela narapela hap bilong graun na bilong narapela narapela taim, na sampela bilong taim bilong Adam na i kam. (Luk 11:50, 51) Em wanpela gutpela wok tru yumi bai mekim long skulim ol man i kirap bek long laikim pasin bilong i stap bel isi wantaim ol arapela. Skul yumi kisim long nau bai helpim yumi tru long dispela taim!
[Futnot]
a Baibel i save kamapim sampela tok moa long ol samting yumi mas mekim taim i gat ol bikpela hevi, olsem krungutim gutnem bilong narapela na giaman na paulim mani bilong narapela. Lukim Wastaua bilong Oktoba 15, 1999, pes 17-22.
Yu Lainim Wanem Samting?
• Taim yumi bagarapim bel bilong narapela, yumi ken mekim wanem bilong i stap bel isi wantaim em?
• Taim wanpela i bagarapim bel bilong yumi, yumi ken mekim wanem bilong i stap bel isi wantaim em?
• Yumi mas tingim wanem ol samting taim tupela man i tok pait?
• Bilong wanem em i bikpela samting moa long mekim pasin i stret, winim pasin bilong i stap bel isi wantaim man i save mekim bikpela rong?
[Ol Piksa long pes 29]
Jehova i save laikim tru ol lain i save amamas long fogivim narapela