Yupela Famili Insait Long Lain Bilong God, Litimapim Nem Bilong Em
‘Litimapim nem bilong God namel long lain bilong lotu.’—SONG 26:12.
1. Yumi stadi na beten long haus, tasol wanem samting moa i bikpela hap wok bilong lotu i tru?
BILONG lotu long Jehova, yumi mas beten na stadi long Baibel long haus, na tu, yumi mas insait long ol wok bilong lain bilong God. Lain Israel bilong bipo i kisim tok olsem ol i mas “singautim olgeta man wantaim meri na pikinini,” bai ol i ken lain long lo bilong God na wokabaut long rot em i makim. (Lo 31:12; Josua 8:35) Na ‘ol yangpela man na meri’ na ol lapun tu ol i kisim tok i kirapim ol long litimapim nem bilong Jehova. (Song 148:12, 13) Lain Kristen tu i mas mekim kain samting olsem. Long ol Haus Kingdom long olgeta hap bilong graun, ol man, meri, pikinini, ol i save kamapim sampela tok long ol hap bilong miting i gat ol askim na bekim bilong en, na planti ol i kisim bikpela amamas taim ol i mekim olsem.—Hibru 10:23-25.
2. (a) Bilong wanem pasin bilong redim ol tok bilong ol miting em i bikpela samting long helpim ol yangpela long amamas long ol miting? (b) Pasin bilong husat em i bikpela samting?
2 Tru, sampela taim i hatwok long helpim ol yangpela long insait long ol wok bilong kongrigesen. Sampela pikinini i go wantaim papamama long Haus Kingdom, sapos ol i no amamas long ol miting, yu ting wanem samting i as bilong dispela? Tru, planti pikinini i hatwok long putim tingting i go long wanpela samting inap longpela taim, na ol i save les kwik. Tasol pasin bilong redim ol tok bilong ol miting inap stretim dispela hevi. Sapos pikinini i no redim ol tok i laik kamap long ol miting, em i no inap bekim gut ol tok. (Sindaun 15:23) Na sapos em i no redim gut ol tok pastaim, em bai hatwok long kamap strong long ol samting bilong spirit na stap belgut. (1 Timoti 4:12, 15) Papamama i ken mekim wanem? Pastaim ol i mas askim ol yet, ‘Mipela yet i save redim ol tok bilong ol miting?’ Pasin papamama i mekim inap helpim gut pikinini. (Luk 6:40) Na pasin bilong stretim gut famili-stadi, dispela tu em i bikpela samting.
Strongim Bel Bilong Ol
3. Long taim bilong famili-stadi, bilong wanem yumi mas mekim bikpela wok bilong strongim bel bilong famili? Bilong mekim olsem, yumi mas mekim wanem?
3 Famili-stadi em i no taim bilong putim save long tingting bilong ol pikinini na em tasol, nogat; em taim bilong strongim bel bilong ol tu. Bilong mekim olsem, papamama i mas save long ol hevi bilong ol na ol i mas laikim na tingim tru olgeta wan wan. Jehova i save skelim “bel” bilong man.—1 Stori 29:17.
4 Taim God Jehova i skelim bel bilong ol pikinini bilong yumi, em i lukim wanem samting? Klostu olgeta bai tok ol i laikim tru God, na dispela em i gutpela samting. Tasol pikinini i liklik, o nau tasol em i kirap long kisim save long Jehova, em i no lain gut yet long ol pasin Jehova i laikim. Em i no gat planti save, olsem na ating em i olsem “longlong man.” I no olsem olgeta laik bilong em i nogut, nogat; tasol bilong stretim bel bilong em na bai God i ken laikim, bikpela hap taim liklik i mas lus. Em i mas mekim ol tingting, na ol laik, na ol samting em i pilim long bel bilong em, na ol wok em i laik mekim long bihain, i kamap stret wantaim laik bilong God inap long mak yumi man bilong graun inap mekim. Taim man i stretim stretim pasin bilong em olsem God i save laikim, em i wok long “kisim gutpela tingting na save.”—Sindaun 9:4; 19:8.
5, 6. Ol papamama i ken mekim wanem bilong helpim ol pikinini bilong ol long kisim “gutpela tingting na save”?
5 Olsem wanem? Papamama inap helpim ol pikinini bilong ol long “kisim gutpela tingting na save”? Tru, i no gat wanpela man inap givim gutpela bel long narapela, nogat. Yumi olgeta wan wan inap tingim wanem pasin yumi yet i laik bihainim, na planti taim, samting yumi mekim em samting yumi larim yumi yet i tingting long en. Tasol long pasin bilong gutpela tingting, papamama inap kirapim pikinini long kamapim tingting bilong em na long dispela rot ol inap kisim save long tingting i stap long bel bilong pikinini na ol i mas helpim em olsem wanem. Kamapim ol askim olsem, ‘Yu yet yu gat wanem tingting long dispela?’ na ‘Yu gat laik tru long mekim wanem?’ Orait nau stap isi na putim yau long tok bilong em. No ken kirap nogut na kros samting. (Sindaun 20:5) Sapos yu laik bai ol tok yu mekim i go long bel bilong pikinini, orait yu mas mekim gut long pikinini, na pilim gut tingting bilong em, na laikim em tru.
6 Bilong strongim ol gutpela tingting i stap long bel bilong pikinini, planti taim toktok wantaim em long ol pasin em spirit holi i kamapim—toktok long olgeta wan wan pasin—na olgeta long famili i mas wok wantaim long kisim ol dispela pasin. (Galesia 5:22, 23) Helpim pikinini long laikim moa yet Jehova na Krais Jisas—yumi no ken tok tasol yumi mas laikim ol; yumi mas stori wantaim pikinini long ol as na yumi mas laikim ol na long olsem wanem yumi ken kamapim dispela pasin. (2 Korin 5:14, 15) Strongim laik bilong pikinini long mekim ol pasin i stret—helpim em long tingim ol gutpela samting i kamap long mekim ol pasin i stret. Helpim em long kisim laik long sakim ol tingting nogut, ol toktok nogut, na ol pasin nogut—stori long ol samting nogut inap kamap long ol dispela samting. (Amos 5:15; 3 Jon 11) Helpim em long save olsem tingting na toktok na pasin bilong em—maski i gutpela o i nogut—dispela inap helpim em long pas gut wantaim Jehova, o pasim rot bilong em long mekim olsem.
7. Papamama i ken mekim wanem bilong helpim pikinini long stretim ol hevi bilong em na long mekim ol samting bilong helpim em long stap klostu long Jehova?
7 Taim pikinini i gat hevi, o em i mas skelim wanpela bikpela samting em bai mekim, yumi ken askim em: ‘Yu ting Jehova i gat wanem tingting long dispela? Yu gat wanem save long Jehova na yu tok olsem? Yu bin beten toktok wantaim em long dispela samting?’ Taim pikinini i liklik yet, helpim em long kisim pasin olsem olgeta taim em i mas wok strong long save long laik bilong God na bihainim. Na taim pikinini i go klostu long Jehova na pas gut wantaim Em, em bai amamas long wokabaut long rot Em i makim. (Song 119:34, 35) Dispela bai helpim em long amamas long em i stap insait long lain bilong trupela God.
Redim Ol Tok Bilong Ol Miting
8. (a) Wanem samting inap helpim yumi na long taim bilong famili-stadi yumi toktok long olgeta samting famili i mas stretim? (b) Olsem wanem dispela stadi em i bikpela samting?
8 I gat planti samting yu mas toktok wantaim famili long en long taim bilong famili-stadi. Olsem wanem yu inap mekim olsem? Yu no inap toktok long olgeta samting long wanpela taim. Tasol sapos yu raitim lista bilong ol samting yu laik toktok long en, olsem ol samting yu laik stretim, ating dispela bai helpim yu. (Sindaun 21:5) Sampela taim, lukim gen dispela lista na tingim wanem samting i bikpela samting na yu mas toktok long en. Tingim gut olgeta wan wan long famili, olsem ol i wok long kamap strong long ol samting bilong spirit o nogat. Famili-stadi i save mekim bikpela wok long givim gutpela skul Kristen long yumi, na i helpim yumi long dispela laip nau yumi stap long en, na i helpim yumi long redi long laip i stap oltaim yumi inap kisim bihain.—1 Timoti 4:8.
9. Long taim bilong famili-stadi, isi isi yumi ken mekim wanem bilong redim ol tok bilong ol miting?
9 Olsem wanem? Long taim bilong famili-stadi yupela i save redim ol tok bilong ol miting bilong kongrigesen? Long taim bilong stadi, i gat planti samting yupela i ken wok isi isi long inapim. Bilong inapim tru sampela, ating sampela wik o mun o yia i mas lus. Tingim ol dispela samting yu ken putim olsem mak bilong winim: (1) olgeta wan wan long famili i redi long bekim sampela tok long ol miting bilong kongrigesen; (2) olgeta wan wan i wok long redim sampela tok na mekim long toktok bilong ol yet; (3) taim ol i bekim tok ol i kamapim sampela tok bilong Baibel; na (4) ol i skelim ol tok na bai ol i ken bihainim. Olgeta dispela samting inap helpim ol wan wan long famili long pilim gut tok i tru.—Song 25:4, 5.
10. (a) Yumi ken mekim wanem bilong redim olgeta wan wan miting bilong kongrigesen? (b) Olsem wanem na dispela inap helpim yumi?
10 Maski famili i redim stadi bilong Wastaua long taim bilong famili-stadi, yu no ken lusim tingting long famili o ol wan wan long famili i mas redim Buk-Stadi Bilong Kongrigesen, Skul Bilong Wok Autim Tok, na Miting Bilong Wok. Ol dispela miting tu i save mekim bikpela wok long skulim yumi long wokabaut long rot Jehova i makim. Ating sampela taim, olgeta long famili i ken bung wantaim na redim ol tok bilong ol miting. Long dispela rot, pasin bilong mekim stadi bai kamap gutpela moa na ol miting tu bai helpim ol moa. Na toktok tu long olsem wanem pasin bilong redim ol dispela miting inap helpim famili na em bikpela samting long makim wanpela taim long mekim olsem.—Efesus 5:15-17.
11, 12. Sapos yumi mekim traim long ol singsing bilong ol miting, olsem wanem dispela inap helpim yumi? Yumi ken mekim olsem wanem?
11 Long ol “Bihainim Rot God i Makim” Kibung, yumi harim sampela tok i kirapim yumi long redi long narapela hap bilong ol miting bilong yumi—em ol singsing. Olsem wanem? Yu bin mekim olsem? Sapos yu mekim olsem, dispela bai helpim ol tok tru bilong Baibel i go insait long tingting na bel bilong yu na helpim amamas bilong yu long ol miting bilong kongrigesen i go bikpela moa.
12 Taim yumi kaunim ol tok bilong ol singsing em sedyul i makim na yumi toktok wantaim long insait bilong ol dispela tok, dispela inap helpim yumi long givim bel long mekim singsing. Ol Israel bilong bipo i save mekim bikpela wok long musik bilong lotuim Jehova. (1 Stori 25:1; Song 28:7) Olsem wanem? Wanpela long famili bilong yu i save long pilaim musik? Sapos olsem, orait mekim wok long dispela musik na mekim traim long wanpela singsing bilong Kingdom ol i makim bilong dispela wik, na nau mekim dispela singsing olsem wanpela famili. O yu ken mekim wok long kaset samting i gat singsing long en. Long sampela kantri, ol brata bilong yumi i save mekim gutpela singsing, maski i no gat musik. Taim ol i wokabaut long rot o mekim wok long gaden, ol i amamas long mekim ol singsing em sedyul i makim bilong ol miting bilong wik.—Efesus 5:19.
Famili i Redi Long Autim Tok
13, 14. Taim famili i toktok wantaim long ol samting i redim bel bilong ol long mekim wok autim tok, bilong wanem dispela i bikpela samting?
13 Pasin bilong tokim ol narapela long Jehova na long laik bilong em i bikpela samting long i stap bilong yumi. (Aisaia 43:10-12; Matyu 24:14) Maski yumi yangpela o lapun, sapos yumi redi gut pastaim, bai yumi mekim gutpela wok moa na amamas long mekim dispela wok. Olsem wanem yumi ken mekim dispela samting insait long famili?
14 Bikpela samting em yumi mas redim bel bilong yumi. Yumi mas toktok long ol samting yumi bai mekim na long as na yumi bai mekim. Long taim bilong King Jehosafat, ol man i lain long lo bilong Jehova, tasol Baibel i tok ol i no redim yet bel bilong ol. Olsem na ol i no gat strong long sakim ol samting em inap pulim ol na ol i lusim lotu i tru. (2 Stori 20:33; 21:11) Yumi no laik autim tok na bai yumi ken raitim ol aua long ripot o tilim ol buk samting, nogat. Yumi autim tok, long wanem, yumi laikim tumas Jehova na ol man, na yumi laik bai ol man i gat rot long kisim laip. (Hibru 13:15) Yumi ol “wanwok bilong God” taim yumi mekim dispela wok. (1 Korin 3:9) Dispela em i gutpela samting tru! Na taim yumi autim tok, yumi wok wantaim ol ensel holi tu. (KTH 14:6, 7) Olsem na taim famili i toktok wantaim, olsem long taim bilong famili-stadi o long taim famili i stori long wanpela teks long liklik buk Skelim Sampela Tok Bilong Baibel Long Olgeta De, em i gutpela taim bilong helpim famili long pilim tru ol samting ol i bin kisim.
15. Wanem taim i gutpela bilong famili i ken redi long wok bilong autim tok?
15 Olsem wanem? Sampela taim insait long famili-stadi yu save helpim famili long redi long wok autim tok bilong dispela wik? Sapos yu mekim olsem, gutpela samting inap kamap. (2 Timoti 2:15) Dispela inap helpim wok autim tok bilong famili long kamap gutpela na karim kaikai. Na planti taim, mekim liklik tok long sampela wok bilong autim tok long pinis bilong famili-stadi o long narapela taim namel long wik.
16. Stori long olsem wanem olgeta wan wan samting paragraf i kolim inap helpim yumi.
16 Taim famili i stori wantaim, ol i ken mekim ol samting olsem: (1) Redim na mekim traim long wanpela tok yu laik kamapim long man bilong haus na wanpela ves bilong Baibel yu laik kaunim sapos rot i op. (2) Sapos inap, olgeta wan wan i mas i gat paus bilong autim tok, Baibel, notbuk, pen o pensil, ol liklik nius, na sampela nius i no bruk o doti samting. I no olsem yupela mas tromoi bikpela mani long baim paus bilong autim tok, tasol paus i mas klin na no ken bruk. (3) Stori long ol hap yupela i ken autim tok long en long kain kain taim na long olsem wanem yupela inap mekim. Bihain, wok wantaim ol wan wan long famili long autim tok. Kamapim sampela tok bilong helpim ol, tasol no ken kamapim tok long planti samting tumas.
17, 18. (a) Wanem sampela samting famili i ken toktok long en bilong helpim wok autim tok bilong ol i kamap gutpela? (b) Wanem sampela samting ol i ken redi long en long olgeta wik?
17 Wanpela bikpela wok Krais Jisas i bin givim long lain bilong em, em wok bilong kamapim disaipel. (Matyu 28:19, 20) Bilong kamapim ol disaipel, yumi no ken autim tok tasol. Yumi mas lainim ol. Olsem wanem famili-stadi inap helpim yu long mekim gut dispela wok?
18 Bung wantaim na toktok long ol man yupela i ken go bek lukim ol. Sampela i bin kisim buk o nius samting, na sampela i bin harim tok na em tasol. Ating yu bin bungim ol long taim yu bin autim tok long ol haus o long maket o long skul. Larim Tok Bilong God i stiaim yu. (Song 25:9; Esekiel 9:4) Tingim ol man yupela olgeta wan wan i laik go bek lukim ol. Bai yu toktok long wanem samting? Famili i ken toktok wantaim na dispela inap helpim narapela narapela long redi. Tingim sampela ves bilong Baibel yu ken kamapim long ol dispela man i laik harim tok na sampela tok yu ken kamapim long buklet God i Laik Yumi Mas Mekim Wanem? o buk Save i Bringim Man Long Laip Oltaim. No ken toktok long planti samting long wanpela taim. Taim yu laik lusim man bilong haus, kamapim wanpela askim yu bai bekim long narapela taim. Long olgeta wik, makim wanem ol gobek ol wan wan long famili i ken mekim, na wanem taim ol bai mekim, na ol samting ol i laik mekim long gobek bilong ol. Dispela bai helpim wok autim tok bilong olgeta wan wan long famili long karim gutpela kaikai.
Wok Yet Long Skulim Ol Long Rot Jehova i Makim
19. Bilong famili i ken wokabaut yet long rot Jehova i makim, ol i mas kisim wanem samting? Wanem samting inap helpim dispela?
19 Long dispela taim nogut, het bilong famili i gat bikpela wok tru bilong mekim. Satan na ol ensel nogut i wok long bagarapim bilip bilong ol wokboi bilong Jehova. (1 Pita 5:8) Yupela ol papamama, na moa yet yupela papa na mama singel, yupela i gat hatwok. I hatwok tru long painim taim bilong mekim olgeta samting yu laik mekim. Tasol i gutpela sapos yu wok strong long mekim olsem, maski yu inap mekim wanpela samting tasol long wanpela taim, na isi isi wok long mekim famili-stadi i kamap gutpela. Taim yu lukim ol man yu laikim ol, ol i stap gut long bihainim rot Jehova i makim, dispela i olsem gutpela pe. Bilong wokabaut long rot Jehova i laikim, olgeta long famili i mas amamas long stap long ol miting na insait long wok autim tok. Bilong dispela samting i ken kamap, ol i mas redi gut—dispela bai strongim bel na inapim olgeta wan wan long mekim gutpela wok.
20. Wanem samting i ken helpim sampela papamama moa long kisim dispela amamas 3 Jon 4 i stori long en?
20 Aposel Jon i stori long ol man em i bin helpim ol long ol samting bilong spirit, na em i tok: “Taim mi harim tok long ol pikinini bilong mi i bihainim tok tru, orait mi save amamas tru, na dispela amamas i winim ol arapela kain amamas bilong mi.” (3 Jon 4) Sapos het bilong famili i save gut long ol samting em i laik bai famili-stadi i mekim, na long gutpela pasin em i mekim ol samting bilong helpim ol wan wan long famili, dispela bai helpim famili long amamas long mekim wok bilong God. Taim papamama i helpim famili long pilim tru rot God i makim, ol i save helpim famili long amamas long bihainim nambawan gutpela rot.—Song 19:7-11.
Yu Inap Stori Long Dispela?
◻ Bilong wanem pasin bilong redim ol tok bilong ol miting i bikpela samting long ol pikinini bilong yumi?
◻ Ol papamama i ken mekim wanem bilong helpim ol pikinini bilong ol long “kisim gutpela tingting na save”?
◻ Olsem wanem famili-stadi inap helpim wok bilong redim ol tok bilong olgeta miting?
◻ Sapos famili i redi long wok bilong autim tok, olsem wanem dispela inap helpim ol long mekim gutpela wok moa?
4. (a) Wanem insait bilong dispela tok, “longlong man”? (b) Yu mas mekim wanem bambai yu ken “kisim gutpela tingting na save”?
[Piksa long pes 20]
Long taim bilong famili-stadi, ating sampela taim yu ken redim ol tok bilong ol miting bilong kongrigesen
[Piksa long pes 21]
Pasin bilong traim ol singsing em bai kamap long ol miting em i gutpela