Namba Tri Jon
1 Tok bilong hetman i go long Gaius, pren tru bilong mi, em man mi laikim tumas.
2 Pren tru, mi beten olsem yu ken i stap gut long olgeta samting na helt bilong yu i ken i stap gutpela, wankain olsem yu stap long nau. 3 Mi amamas tru taim ol brata i kam na ol i tokaut long tok i tru yu holim, na mi amamas olsem yu wokabaut yet long tok i tru.+ 4 Taim mi harim olsem ol pikinini bilong mi i wokabaut yet long tok i tru,+ dispela i save givim bikpela amamas tru long mi.*
5 Pren tru, wok yu save mekim bilong helpim ol brata, maski yu no save long ol,+ dispela i kamapim pasin bilong yu long i stap gut long wok. 6 Ol i tokaut long kongrigesen long pasin laikim yu bin mekim. Taim ol i lusim yu, plis mekim pasin long ol em God bai amamas long en.+ 7 Long wanem ol i go long nem bilong em, na ol i no kisim wanpela samting+ long ol manmeri bilong ol arapela lain.* 8 Olsem na yumi gat wok long mekim gut long ol kain man olsem,+ na yumi ken kamap ol wanwok insait long tok i tru.+
9 Mi raitim sampela tok i go long kongrigesen, tasol Diotrefes, em man i save laik i stap nambawan bilong ol,+ em i no save rispek long ol tok mipela i mekim.+ 10 Olsem na sapos mi kam, bai mi tingim ol samting em i mekim, olsem em i mekim ol tok nogut long mipela.*+ Na i no dispela samting tasol, em i no save amamas long lukautim ol brata,+ na ol arapela husat i laik lukautim ol brata, em i save traim long pasim ol na rausim ol long kongrigesen.
11 Pren tru, bihainim ol pasin i gutpela,+ na no ken bihainim ol pasin nogut. Man i mekim gutpela pasin em i stap long sait bilong God.+ Man i mekim pasin nogut, em i no bin lukim God.+ 12 Ol brata i tokaut long gutpela pasin bilong Demitrius. Na tok i tru yet i tokaut long gutpela pasin bilong em tu. Na mipela tu i tokaut, na yu save olsem tok mipela i mekim em i tru.
13 I gat planti samting mi laik stori long yu long en, tasol mi no laik mekim long rot bilong pas. 14 Tasol mi gat laik long kam kwiktaim, na lukim yu stret na mitupela i ken toktok wantaim.
Bel isi i ken stap wantaim yu.
Ol pren i salim gude long yu. Givim gude bilong mi long olgeta wan wan pren.