Ol Kristen i Mas i Gat Wanem Tingting Long Alkohol?

Long olgeta hap bilong graun, ol manmeri i gat narapela narapela tingting long alkohol. Sampela i amamas long kisim alkohol sampela taim wantaim ol pren bilong ol. Ol narapela i wokim disisen olsem ol i no inap dring alkohol. Tasol sampela ol i dring i go inap ol i spak olgeta. Baibel i tok wanem long alkohol?

1. I gat rong long dring alkohol?

Baibel i no tambuim pasin bilong dring alkohol. Taim Baibel i kolim ol presen em God i givim yumi, em i tok tu olsem “wain i mekim bel bilong man i amamas.” (Buk Song 104:14, 15) Baibel i stori long sampela bilip man na meri i bin dring alkohol.​—1 Timoti 5:23.

2. Baibel i givim wanem edvais long ol man i wokim disisen long dring alkohol?

Jehova i tambuim pasin bilong dring planti tumas na dring longlong. (Galesia 5:21) Baibel i tok: “No ken stap namel long ol man i save dring planti wain tumas.” (Provep 23:20) So sapos yumi makim long dring​—maski sapos yumi stap yumi yet​—yumi no ken dring planti tumas we i mekim na yumi no inap tingting klia, bosim toktok na pasin bilong yumi, o bagarapim helt bilong yumi. Sapos yumi no inap bosim pasin bilong yumi long dring planti, orait yumi mas redi long stop olgeta long dring alkohol.

3. Olsem wanem yumi ken rispektim disisen bilong ol narapela long alkohol?

Olgeta man wan wan i mas wokim disisen olsem ol bai kisim alkohol o nogat. Yumi no ken skelim man husat i wokim disisen long kisim liklik alkohol, na yumi no ken fosim man husat i no laik kisim alkohol long dring alkohol. (Rom 14:10) Yumi bai no inap dring alkohol sapos yumi save olsem dispela bai putim hevi long ol arapela. (Ritim Rom 14:21.) Yumi “no ken tingting long ol samting bilong helpim [yumi] yet.”​—Ritim 1 Korin 10:23, 24.

KISIM SAMPELA SAVE MOA

4. Skelim olsem yu bai dring alkohol o nogat

Jisas i gat wanem tingting long pasin bilong dring alkohol? Bilong kisim bekim bilong dispela askim, skelim namba wan mirakel em i wokim. Ritim Jon 2:1-11, na stori long ol dispela askim:

• Long dispela mirakel, yumi kisim wanem skul long tingting bilong Jisas long alkohol na ol man i dring alkohol?

• Jisas i no tambuim pasin bilong dring alkohol, so Kristen i mas i gat wanem tingting long wanpela husat i wokim disisen long kisim alkohol?

Tru, Kristen i stap fri long dring alkohol, tasol dispela i no makim olsem oltaim em i savepasin long em i kisim alkohol. Ritim Provep 22:3, na skelim olsem wanem ol dispela samting bai stiaim yu long wokim disisen olsem yu bai kisim alkohol o nogat:

• Yu bai draivim kar o yusim ol masin.

• Yu gat bel.

• Dokta i tokim yu long no ken dring alkohol.

• Yu gat hevi long bosim hamas dring yu save kisim.

• Lo bilong kantri i gat tambu long dring alkohol.

• Yu stap wantaim wanpela husat i no laik dring bikos long bipo em i gat hevi long em i no inap bosim pasin bilong em long dring planti.

Yu ting yu mas putim dring long bung bilong weding o long ol narapela bung? Bilong lukim wanem samting bai helpim yu long wokim disisen long dispela samting, pilaim VIDIO.

VIDIO: I Stret Mi Putim Alkohol Long Ol Bung? (2:41)

Ritim Rom 13:13 na 1 Korin 10:31, 32. Taim yupela i ritim wan wan skripsa pinis, stori long dispela askim:

• Olsem wanem yu ken bihainim dispela stiatok long helpim yu long wokim disisen we i amamasim Jehova?

5. Skelim hamas dring yu bai kisim

Sapos yu wokim disisen long dring alkohol, tingim dispela samting: Tru, Jehova i no tambuim pasin bilong dring alkohol, tasol em i tambuim pasin bilong dring planti tumas. Bilong wanem? Ritim Hosea 4:11, 18, na stori long dispela askim:

• Sapos man i dring planti tumas, wanem samting inap kamap?

Olsem wanem yumi ken sakim pasin bilong dring planti tumas? Yumi mas i gat pasin daun, o luksave long mak bilong skel bilong yumi long dring na no ken abrusim. Ritim Provep 11:2, na stori long dispela askim:

• Wai na em gutpela tingting long putim mak stret long hamas dring yu bai kisim?

6. Wanem samting bai helpim man long lusim pasin bilong dring planti tumas?

VIDIO: ‘Mi Les Pinis Long Pasin Mi Bihainim’ (6:32)

• Long vidio, alkohol i mekim wanem long pasin bilong Dmitry?

• Olsem wanem? Wantu em i lusim pasin bilong dring planti tumas?

• Hau na em inap long lusim kalabus bilong dring planti tumas alkohol?

Ritim 1 Korin 6:10, 11, na stori long ol dispela askim:

• Baibel i tok wanem long pasin bilong dring spak?

• Wanem samting i soim olsem man i gat hevi long pasin bilong dring planti tumas alkohol em inap long senis?

Ritim Matyu 5:30, na stori long dispela askim:

• Tok piksa bilong katim han i makim olsem yumi mas lusim sampela samting bilong yumi yet bilong amamasim Jehova. Yu ken mekim wanem sapos yu hatwok long lusim pasin bilong dring planti tumas alkohol?a

Ritim 1 Korin 15:33, na stori long dispela askim:

• Pasin bilong ol pren bilong yu inap mekim wanem long yu long hamas alkohol yu kisim?

OL BIKPELA POIN

Jehova i givim alkohol long yumi kisim amamas long en, tasol em i tambuim pasin bilong dring planti tumas na dring spak.

Riviu

• Baibel i tok wanem long alkohol?

• Pasin bilong dring planti tumas inap kamapim wanem ol hevi?

• Olsem wanem yumi ken rispektim disisen bilong ol narapela long sait bilong dring?

MEKIM WOK PAINIMAUT

Olsem wanem ol tineja i ken wokim ol gutpela disisen long sait bilong alkohol?

Sakim Pasin Bilong Dring Alkohol (2:31)

Kisim save long ol rot yu ken bihainim bilong winim hevi bilong dring planti tumas.

“Alkohol Holim Stretpela Tingting Long En” (Wastaua, Janueri 1, 2010)

I stret Kristen i apim glas i gat dring long en bilong litimapim nem bilong wanpela man?

“Askim” (Wastaua, Februeri 15, 2007)

Long stori “Mi Olsem Wanpela Dram i No Gat As Bilong En,” lukim hau wanpela man i lusim pasin bilong dring planti tumas.

“Baibel i Save Senisim i Stap Bilong Man” (Wastaua, Me 1, 2012)