Famili-Stadi i Save Kamapim Amamas

Baibel i tok: “Dispela kain man [i gat gutpela tingting na save] em inap baim olkain gutpela samting i dia tumas na putim long haus bilong en.” (Sindaun 24:⁠4) Dispela olkain gutpela samting i dia tumas i no ol gutpela samting bilong skin tasol, nogat; em ol narapela samting tu, olsem pasin bilong laikim tru ol narapela, pret long God, strongpela bilip. Tru tumas, ol kain pasin olsem i save strongim famili na ol i stap gutpela. (Sindaun 15:​16, 17; 1 Pita 1:⁠7) Tasol bilong kisim ol dispela kain pasin, yumi mas bringim save bilong God i kam insait long famili bilong yumi.

PAPA bilong famili i gat wok long skulim gut olgeta wan wan insait long famili long dispela save. (Lo 6:​6, 7; Efesus 5:​25, 26; 6:⁠4) Wanpela gutpela rot tru bilong mekim olsem, em bilong mekim famili-stadi long olgeta wik. Famili inap laikim tru dispela stadi taim papa bilong famili i mekim gutpela wok bilong skulim ol na ol i kisim amamas long en! Orait yumi ken stori long sampela bikpela samting bilong mekim stadi i kamap gutpela na i helpim famili.a

Famili-stadi inap mekim gutpela wok taim famili i mekim long olgeta wik. Sapos ol i mekim nating tasol na ol i no makim stret taim bilong en, o taim ol i tingim stadi ol i kirap nating tasol na mekim, yumi save planti taim bai ol i no ken mekim. Olsem na yu mas makim wanpela taim stret bilong mekim famili-stadi. (Efesus 5:​15-​17) Sampela taim i hatwok long makim wanpela taim i stret long olgeta wan wan bilong famili. Wanpela papa bilong famili i tok: “Mipela i bin hatwok long mekim famili-stadi long olgeta taim, olsem na mipela i traim narapela narapela taim, na mipela i painim wanpela hap taim long apinun em i stret long ol, na nau mipela i mekim famili-stadi long olgeta taim long dispela taim stret.”

Orait taim yu painim pinis wanpela gutpela hap taim bilong mekim stadi, yu mas was gut, nogut yu larim sampela samting i pulim nabaut tingting bilong yu na nau yu no mekim stadi. Maria,b nau em i gat 33 krismas, em i tok: “Sapos sampela lain i kam lukim mipela taim mipela i mekim stadi, papa i save tokim ol long wet pastaim na bai mipela i ken pinisim stadi. Na taim sampela i ring long telefon, em i save tokim ol em bai telefon long ol bihain.”

Tasol i no olsem yumi no inap senisim taim bilong stadi long sampela taim. Sampela taim wanpela hevi samting inap kamap na yumi mas lusim o surikim taim bilong stadi. (Saveman 9:​11) Tasol was gut, nogut yu larim ol dispela samting i paulim yu na yu lusim pasin bilong mekim stadi long olgeta wik long taim yu bin mekim.​—⁠Filipai 3:​16.

Orait yu mas mekim stadi i go inap hamas aua samting? Robert, em i bin mekim bikpela long wanpela pikinini meri na wanpela pikinini man, em i tok: “Mipela i save mekim stadi inap olsem wanpela aua. Taim ol pikinini i yangpela yet, mipela i save wok long mekim kain kain samting bilong kirapim tingting bilong ol insait long dispela aua, olsem lukim sampela piksa i stap long stori mipela i stadi long en insait long Wastaua, o kaunim sampela hap bilong Baibel, o sampela hap bilong ol narapela buk samting.” Maria i tok: “Taim mi wantaim tupela susa bilong mi i liklik yet, stadi bilong mipela em inap olsem 20 minit, na mipela i save mekim tupela o tripela taim long olgeta wik. Orait taim mipela i wok long go bikpela, famili-stadi bilong mipela em inap olsem wanpela aua samting.”

Yumi Mas Stadi Long Wanem Samting?

Sapos yumi mekim dispela askim taim famili i sindaun pinis na i redi long mekim stadi, bai famili i tingting planti na yumi lusim nating bikpela hap taim bilong stadi. Sapos yumi bihainim kain pasin olsem, ol pikinini i no inap tingting long samting ol bai stadi long en, olsem na i no longtaim na ol bai les long stadi. Olsem na paslain long taim bilong stadi, makim wanpela buk samting bilong Sosaiti em yupela inap stadi long en.

“Wokboi i gat gutpela tingting” i bin wokim planti buk samting na yumi ken makim wanpela bilong mekim stadi long en. (Matyu 24:​45-​47) Ating yu ken makim wanpela buk em famili i no stadi yet long en. Na i gutpela samting tru long stadi long sampela hap bilong ol volyum Insight on the Scriptures sapos yu inap kisim long tok ples bilong yu! Olsem: Sampela wik paslain long taim bilong Memorial, yupela ken kamapim gen sampela tok long stori bilong Kaikai Bilong Bikpela. Planti famili ol i save amamas long redim Stadi Wastaua bilong wik. Tasol ol narapela stori tu bilong Wastaua i gat ol gutpela tok em famili i ken stadi long en. Papa bilong famili i save wanem ol samting bilong spirit em famili i mas kisim, olsem na em inap tru long makim wanem buk samting famili i mas stadi long en.

Maria i tok: “Long olgeta taim mipela i save stadi long wanpela samting papa i bin makim paslain long taim bilong stadi. Tasol taim wanpela i gat askim o wanpela hevi samting i kamap long skul, orait nau mipela i stadi long wanpela samting i kamapim ol tok i stret long dispela.” Sampela taim i gat sampela hevi samting i save painim ol yangpela long skul, o ol i gat askim long sampela pasin i kamap, olsem yangpela man i raun wantaim yangpela meri, o sampela samting ol klas i save mekim taim skul i pinis long apinun, na ol kain samting olsem. Orait taim ol kain askim olsem i kamap, painim sampela buk samting i kamapim tok bilong dispela hevi na ol samting ol yangpela i ken mekim. Sapos yu lukim sampela tok long wanpela nupela Wastaua o Kirap! na yu laik stadi nau tasol long en wantaim famili, orait stretim rot bilong mekim olsem. Tasol pastaim yu mas toksave long famili olsem yu senisim taim bilong stadi. Na taim yupela i stadi pinis long en na dispela i helpim pinis famili, orait yu mas kirap na mekim stadi gen long dispela buk samting em pastaim yu bin makim bilong mekim famili-stadi.

Helpim Ol Long i Stap Bel Isi

Bilong kisim gut save, yumi mas i stap bel isi. (Jems 3:​18) Olsem na yu mas helpim famili long i stap bel isi, tasol ol i mas mekim gutpela pasin olsem ol i tingim stadi. Wanpela papa bilong famili long Yunaitet Stets i tok: “Maski mipela i mekim stadi insait long famili-rum o long veranda, mipela i save sindaun klostu klostu​—⁠mipela i no save sindaun longwe longwe insait long bikpela rum. Taim mipela i mekim olsem, mipela i pilim olsem mipela i pas gut wantaim.” Na Maria i tok: “Bipo papa i save larim mi na ol susa bilong mi i makim wanem hap bilong haus mipela bai mekim stadi long en long dispela wik. Dispela i mekim na mipela i sindaun gut long stadi.” Yu mas tingting, sapos i gat gutpela lait, na i gat ol sia samting ol i ken sindaun gut long en, na ol samting long rum i stap stret na i gutpela, ol dispela samting i save helpim famili long i stap bel isi. Na taim stadi i pinis, sapos famili i ken kisim liklik kaikai o koldring samting, ol bai amamas long bung wantaim olsem.

Na long wan wan taim sampela famili i save singautim narapela famili long bung wantaim ol long famili-stadi, na ol i save amamas moa long stadi na ol inap harim ol kain kain bekim. Taim yu singautim ol nupela man i kam bung wantaim yupela long famili-stadi na ol i lukim pasin bilong papa bilong famili long mekim famili-stadi na em i gat save long mekim, dispela bai helpim ol.

Kirapim Ol Long Pilim Tru

Taim yu mekim famili-stadi, mekim long pasin i save kirapim tru tingting bilong ol pikinini. Olsem bai ol i amamas long stadi. Bilong mekim olsem, yu ken kirapim ol liklik pikinini long wokim piksa bilong sampela stori bilong Baibel. Na long taim i stret long mekim, ol pikinini i ken mekim sampela pilai bilong makim ol samting i bin kamap bipo olsem Baibel i stori long en. Bilong skulim ol pikinini, i no olsem yumi mas bihainim pasin bilong askim na bekim oltaim. Yumi ken kaunim Baibel, o stori long ol man na meri em Baibel i kamapim stori bilong ol; dispela em i gutpela rot bilong putim ol lo bilong God i go long bel bilong ol pikinini. Robert, em pastaim yumi stori long em, em i tok: “Sampela taim mipela olgeta wan wan i kaunim sampela hap bilong Baibel, olsem makim nek bilong man i mekim dispela tok long Baibel.” Yumi ken larim pikinini yet i makim wanem man em i laik makim nek bilong em.

Na yumi ken mekim wok long ol mep na sat na dispela bai helpim ol bikpela pikinini long save, ol dispela hap em yumi stori long ol samting i bin kamap long en ol i wanem kain ples. Olsem na sapos yumi wokim gut tingting, famili-stadi bai gutpela na em bai kirapim tingting bilong ol. Na ol pikinini bai i kisim pasin bilong laikim tumas Tok Bilong God.​—⁠1 Pita 2:​2, 3.

Helpim Olgeta Long Mekim Tok

Sapos ol pikinini i pilim olsem ol i insait long stadi, ol bai amamas long en. Tru, taim ol pikinini i gat narapela nrapela krismas, i hatwok long kirapim olgeta long mekim sampela tok long stadi. Tasol Baibel i tok: “Man i bosim wanpela wok, em i mas wok strong long bosim gut dispela wok.” (Rom 12:⁠8) Olsem na sapos papa bilong famili i wok strong na bel i kirap tru long mekim stadi, dispela pasin bai kirapim ol narapela tu.

Pikinini meri bilong Ronald, em Dina, em i gat 5-pela krismas, na Ronald i save tokim em long kaunim ol liklik het-tok long buk ol i stadi long en na stori liklik long ol piksa. Long yia i go pinis, taim Memorial bilong tingim dai bilong Krais i klostu pinis, Ronald i mekim stadi long ol piksa bilong dispela samting long buk Nambawan Man Tru i Winim Olgeta Narapela Man.c Em i tok: “Dispela i helpim em long kisim gut as bilong dispela bung.”

Tasol Ronald i save mekim sampela samting moa long Misha, em pikinini meri bilong em i gat 10-pela krismas. Em i tok: “Nau Misha inap kisim gut insait bilong ol piksa, na em i no kolim stori bilong en tasol. Olsem na taim mipela i stadi long buk Kamapim Tok Hait​—⁠Bikpela Samting Bilong En i Laik Kamap!,* mipela i wok long kamapim insait bilong ol piksa, na dispela i bin helpim em.”

Taim ol pikinini i wok long go bikpela, olsem ol i gat 14 krismas samting, kirapim ol long stori long olsem wanem ol inap mekim wok long ol dispela tok ol i stadi long en. Na taim wanpela i gat askim long wanpela tok bilong stadi, orait makim sampela long skelim tok bilong dispela long ol buk samting. Robert i bin mekim olsem taim pikinini man bilong em i gat 12-pela krismas, nem bilong em Paul, i gat askim long wanpela nupela klap ol i kamapim long skul, em dispela pilai Dungeons and Dragons i insait long en. Orait Paul wantaim ol narapela long famili ol i mekim wok long buk The Watchtower Publications Index na ol i lukim ol tok bilong dispela samting, na bihain ol i kamapim gen ol dispela tok insait long famili-stadi. Robert i tok: “Dispela i mekim na kwiktaim Paul i save, i no stret long ol Kristen i mekim dispela pilai.”

Na long ol narapela taim tu Robert i save makim ol long skelim sampela tok long ol narapela buk samting. Meri bilong em Nancy i tok: “Taim mipela i skelim stori bilong ol aposel bilong Jisas, long olgeta wik mipela wan wan i kisim wok bilong skelim stori bilong olgeta wan wan aposel. Mi amamas tru long lukim ol pikinini em bel bilong ol i kirap tru long kamapim tok bilong ol long taim bilong famili-stadi!” Taim ol pikinini yet i wok long painim ol tok na ol i kamapim long famili, dispela i helpim ol long tingim Jehova taim ol i wok long “kamap bikpela.”​—⁠1 Samuel 2:​20, 21.

Pasin bilong mekim ol askim​—⁠bilong kamapim tingting bilong ol o bilong bekim ol bikpela askim bilong stadi​—⁠dispela em i gutpela rot bilong kirapim ol pikinini long mekim sampela tok. Bikpela Tisa Jisas em i bin mekim sampela askim bilong kamapim tingting bilong man, olsem: ‘Yu ting olsem wanem?’ (Matyu 17:25) Maria i tok: “Taim mipela i gat wanpela askim, papamama i no save kamapim bekim bilong en stret. Ol i save givim sampela bikpela askim long mipela, na ol i helpim mipela long wokim tingting na skelim gut dispela samting.”

Toktok Gut Wantaim​—⁠No Ken Skrapim Bel Bilong Ol

Famili bai amamas long mekim stadi sapos olgeta inap toktok gut wantaim na kamapim tingting na bel bilong ol, na ol i no pret long papa bai krosim ol o daunim ol. Wanpela papa i tok: “Bilong toktok gut wantaim insait long famili-stadi, dispela pasin i mas i stap insait long famili long ol narapela taim tu​—⁠i no long taim bilong stadi tasol.” Tru tumas, papa i mas abrusim ol kain tok i sutim bel bilong pikinini, olsem: ‘Em dispela tok tasol yu laik kamapim? Mi ting em i wanpela bikpela samting tru’; ‘Dispela tok bilong yu i longlong stret’; ‘Yu no inap kamapim sampela gutpela tingting​—⁠yu pikinini tasol.’ (Sindaun 12:18) Yu mas mekim pasin sori na marimari long ol pikinini bilong yu. (Song 103:13; Malakai 3:​17) Kisim amamas long ol, na sambai long ol taim ol i wok strong long bihainim ol tok ol i lainim.

I mas i gat bel isi i stap insait long famili-stadi na bai pikinini inap putim gut ol tok long tingting bilong em. Wanpela papa i gat 4-pela pikinini em i tok: “Taim yu kirap long stretim ol pikinini, dispela bai skrapim bel bilong ol na ol i no amamas.” Em nau, ating ol tok bilong stadi i no ken pas gut long tingting bilong ol. Olsem na yu mas abrusim pasin bilong stretim na givim strafe long ol pikinini taim yu mekim famili-stadi. Sapos yu mas mekim olsem, orait mekim bihain, na mekim long wan wan​—⁠no ken bungim ol na mekim.

Hatwok i Kamapim Gutpela Samting

Bilong kamapim wanpela famili i gat planti gutpela samting bilong spirit, yumi mas lusim bikpela hap taim na strong. Tasol man bilong raitim Song i tokaut olsem: “God i mekim gut long yumi na givim yumi ol pikinini olsem presen. Ol i gutpela blesing tru yumi kisim long God.” (Song 127:⁠3) Na Jehova i givim wok long papamama long ‘stretim gut ol pikinini bilong ol na skulim ol long tok bilong Bikpela.’ (Efesus 6:⁠4) Olsem na wok long kisim pasin bilong mekim gutpela famili-stadi i save skulim gut famili na ol i ken amamas long en. Wok strong long givim “gutpela susu” long ol pikinini, em “susu i kam long God,” na bai ol inap “kamap bikpela na strongpela” na kisim laip i stap oltaim.​—⁠1 Pita 2:2; Jon 17:⁠3.

[Ol Futnot]