Stap Gut long Jehova na Mekim Bel Bilong Em i Amamas!
“Sapos yumi stap laip, o sapos yumi dai, yumi bilong [Jehova] tasol.”—ROM 14:8.
1, 2. (a) Bilong wanem ol Witnes Bilong Jehova i tingting strong long i stap gut long God? (b) Tasol i gat wanem ol askim?
DISPELA tok bilong aposel Pol i kamapim gut tingting bilong ol manmeri bilong nau em ol i holimpas stretpela pasin na i stap gut long God! Sapos yumi stap laip yet na yumi lukim pasin nogut bilong nau i pinis, bai yumi amamas tru, a? Tasol sapos yumi mekim wok bilong God na paslain long dispela taim yumi dai, orait no gat samting. Sapos yumi stap laip o sapos yumi dai, maski, yumi tingting strong long i stap gut long wok bilong autim tok bilong God bilong yumi, em God Jehova. Bai yumi stap gut long Em. Bilong wanem? Long wanem, sapos yumi stap laip, o sapos yumi dai, yumi bilong Jehova tasol!
2 Tasol yumi mas mekim wanem na bai yumi stap gut long God? Na sapos yumi stap gut long God o yumi lusim Em, em bikpela samting long God o nogat?
Ol Samting Yumi Mas Mekim na Bai Yumi Stap Gut long God
3. Baibel i tok wanem long i stap gut long God?
3 Baibel i tok, man i stap gut long God em i holimpas stretpela pasin; em i stap stret na em i no gat asua long wanpela samting. Em i givim bel olgeta long bihainim stretpela pasin. Bilong i stap gut long God, yumi mas givim bel olgeta long Em. Tru tumas, sapos yumi laik i stap gut long God yumi mas wok long bihainim laik bilong Em.
4. Husat i namba wan man bilong lusim stretpela pasin? Em i pulim namba wan man na meri long mekim wanem?
4 Namba wan man i lusim stretpela pasin em i no wanpela man bilong graun. Nogat. Em i wanpela spirit, olsem wanpela ensel. Dispela ensel nogut i pulim namba wan man na meri na tupela i bikhet long Man bilong wokim ol. Sapos Adam tupela Iv i no bin kalapim tambu God i putim long diwai bilong kisim save, bai tupela i kamapim long ples klia olsem tupela i man bilong holimpas stretpela pasin. Tasol dispela Nambawan Birua i pulim tupela long bihainim laik bilong tupela yet, na tupela i mekim pasin bikhet. Tupela i no i stap stret; tupela i no bihainim lo bilong Jehova; ol i no stap gut long Em.—Sam 119:1, 80.
5. Pasin bikhet bilong Seten i kamapim wanem bikpela askim? Olsem wanem ol samting i painim Jop i kamapim long ples klia dispela samting?
5 Pasin bikhet bilong Seten i kamapim bikpela askim olsem: I stret God i stap bos bilong olgeta samting em i bin wokim, na ol i mas bihainim olgeta tok bilong em o nogat? Olsem na ol man tu i insait long dispela bikpela askim. Bai ol i stap gut long God na bihainim laik bilong em, em i Bos tru bilong heven na graun, o nogat? Ol samting i bin painim Jop i kamapim long ples klia dispela samting. Jop em i stretpela man; em i pret long God na em i no gat asua long wanpela samting. (Jop 1:1) Jop i no lusim stretpela pasin bilong God. Em i no mekim pasin pamuk. Em i no mekim pasin i no stret long kot. Em i save givim planti samting bilong helpim ol meri em man bilong ol i dai pinis, na bilong helpim ol pikinini i no gat papa na ol rabisman. Jop i no givim bel long ol mani kago samting bilong skin na ting dispela samting inap helpim em. Nogat. Em i givim bel long Bikpela Man Antap, em i Nambawan Bikpela. (Jop 31:7-40) Tasol Seten i sutim tok long Jop na i tok, Jop i tingting long helpim skin bilong em yet na dispela i kirapim em long mekim wok bilong God. Jehova i larim Seten i putim hevi long Jop—ol man i stilim ol bulmakau sipsip samting bilong Jop na olgeta pikinini bilong em i dai. Tasol Seten, dispela Nambawan Man Bilong Giaman em i no inap pundaunim stretpela man Jop. Jop i holimpas stretpela pasin na i stap gut long God. Bikpela sik na ol tok nogut ol pren giaman i sutim long em, dispela tu i no inap pundaunim em. Jop i stap gut long God.—Jop 1:6-2:13; 27:5, 6; 31:6; 42:8, 9.
6. Ol man ol i ‘bilong Jehova’, ol i mas mekim wanem?
6 Olsem na i gat wanpela gutpela wok ol man inap mekim, em olsem: Ol i ken helpim wok bilong stretim bek nem bilong God. Olsem wanem ol inap mekim? Ol i mas holimpas stretpela pasin; ol i mas kamapim long ples klia olsem ol i stap gut long God Jehova, em i King bilong heven na graun. Orait, yumi ol manmeri yumi ‘bilong Jehova,’ yumi mas mekim wanem? Yumi mas givim bel olgeta long mekim wok bilong God Jehova. Yumi no ken lusim tingting olsem Jehova i tok yumi mas lotuim em wanpela tasol. —Eksodas 20:5.
Yumi Inap Mekim Bel Bilong Jehova i Amamas
7, 8. (a) Yumi sinman, orait olsem wanem yumi inap holimpas stretpela pasin na i stap gut long God? (b) Sapos yumi stap gut long God, olsem wanem tok bilong Provep 27:11 i stret long yumi?
7 Yumi olgeta yumi sinman. Olsem na yumi no inap i stap stret olgeta long ol stretpela lo bilong God. Orait, olsem wanem yumi inap holimpas stretpela pasin na i stap gut long God? I no olsem yumi mas i stap stret olgeta long olgeta pasin na tok bilong yumi, long wanem yumi no inap mekim olsem. Tasol yumi mas givim bel olgeta long God na long dispela rot yumi stap gut long Em. Olsem na maski Devit i bin mekim sampela bikpela rong, tasol em i ‘tingting long God wanpela tasol na wokabaut.’ (1 King 9:4) Taim God i stretim Devit, Devit i harim na em i stretim pasin bilong em. Long dispela pasin bilong em em i kamapim long ples klia olsem em i givim bel tru long Jehova. (Sam 26:1-12) Yumi tu yumi inap givim bel tru long God na ‘tingting long wok bilong Em tasol.’—Sam 78:72.
8 Yumi inap holimpas stretpela pasin na i stap gut long God Jehova, long wanem yumi bilip tru long em na long strong bilong em bilong helpim yumi. (Sam 25:21; 41:12) Tru, i hatwok long yumi stap gut long God, long wanem Seten—em nambawan birua bilong Jehova na bilong yumi—em i pasim tingting bilong ol man i no bilip na em i “giamanim olgeta manmeri bilong graun.” (Revelesen 12:9; 2 Korin 4:4) Tasol olsem Jop, yumi tu yumi inap holimpas stretpela pasin na i stap gut long God. Tru, yumi sinman, tasol yumi inap i stap gut long God na mekim bel bilong em i amamas. Olsem Provep 27:11 i tok: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.” Gutpela tru, yumi ol wokboi bilong Jehova i stap gut long Em, yumi givim rot long Em na em inap bekim tok long dispela Birua i sutim tok bilas long Em. Olsem na ol samting yumi mekim, olsem yumi stap gut long God o nogat, dispela em i bikpela samting. Sapos yumi stap gut long God, yumi inap mekim bel bilong em i amamas. Yumi amamas tru long dispela samting, a?
Ol Bilipman Bilong Bipo Ol i Stap Gut long God
9. Kolim nem bilong sampela bilipman bilong bipo ol i bin i stap gut long God. Wanem sampela traim i bin painim ol?
9 Ol Witnes Bilong Jehova long nau ol i holimpas stretpela pasin na i stap gut long God, na long bipo tu i gat sampela man na meri ol i bin mekim olsem. Pastaim tru Ebel i stap gut long God, na bihain long em i gat Inok na Noa na Ebraham na Sera na Aisak na Jekop na Josep na Moses na Rehap na Gidion na Barak na Samson na Jepta na Devit na Samuel, na planti moa. Satrak na Misak na Abetnigo ol i bin holimpas stretpela pasin na i stap gut long God. Tripela i tokim King Nebukatnesa bilong Babilon ol i no ken lotuim draipela piksa o imis em i bin tokim ol man long sanapim. Olsem na ol i tromoi tripela i go insait long draipela paia. Ating Pol i tingim tripela na em i tok, sampela bilipman bilong bipo ol i “mekim draipela paia i dai.” Na sampela witnes bilong Jehova, em ol tu i stap paslain long taim bilong Krais, ol birua i bin ‘tok bilas long ol, na paitim ol, na putim ol long kalabus, na tromoi ston long ol, na traim ol nogut tru, na katim bodi bilong ol long so i kamap tupela hap, na kilim ol i dai long bainat; sampela bilipman ol i bin pasim skin bilong sipsip na meme olsem laplap, ol i sot long ol samting bilong bodi, na ol man i mekim nogut tru long ol.’ Pol i tok: “Ol i gutpela manmeri moa, na ol man bilong graun ol i no inap long ol dispela bilipman ol i stap namel long ol.” Yumi wanbel long dispela tok, a? Olgeta dispela bilipman bilong bipo ol i bin holimpas stretpela pasin na i stap gut long God. Yumi amamas yumi bilong dispela bikpela lain ol i olsem “bikpela klaut” i raunim yumi, a?—Hibru 11:1-12:1; lukim tu Danyel sapta 3.
10. Aposel Pol i mekim wanem na em i mekim bel bilong Jehova i amamas?
10 God i givim strong long aposel Pol na strongim bel bilong em, olsem na Pol i karim planti hevi na sanap strong. Pol i kalabus, na ol man i paitim em, na sip i bagarap na em i lus long solwara; planti taim bagarap i laik painim em, na planti taim em i no slip, na em i stap hangre, na em i dai long wara, na em i kol, na em i sot long klos. Planti taim ‘klostu em i dai.’ (2 Korin 11:23-27) Pol i mekim wok bilong Jehova na ol dispela hevi i painim em, tasol em i sanap strong na i stap gut long Jehova na dispela samting i mekim bel bilong Jehova i amamas. Yumi tu inap mekim olsem.
11. Krais Jisas i makim wanem gutpela pasin bilong sanap strong na karim hevi?
11 Nambawan Man bilong holimpas stretpela pasin na i stap gut long God, em Krais Jisas, em i “as bilong bilip bilong yumi, na bihain bai em inapim tru bilip bilong yumi.” Seten i traim em, tasol em i no lusim stretpela pasin. Em i tokim Seten: “Yu klia! Baibel i tok, ‘Yu mas lotu long [Jehova] tasol. Em i God bilong yu, na yu mas holim wok bilong em wanpela tasol.”’ Long strong bilong God, Jisas i sakim Seten na Seten i lusim em. Bihain Seten i traim gen Jisas, tasol em i no inap pundaunim Jisas; Jisas i stap gut long God. “Jisas em i tingting long amamas em i laik kisim bihain na em i stap strong, na em i karim pen na i dai long diwai.” Em i holimpas stretpela pasin. Yumi mas bihainim gutpela pasin bilong em na sanap strong na bai yumi mekim bel bilong Jehova i amamas.—Hibru 12:2, 3; Matyu 4:1-11.
12, 13. 1 gat wanem wanem hevi na traim ol Kristen bilong pastaim i bin karim na sanap strong?
12 Jisas i tokim ol disaipel bilong em: “Bambai olgeta man i bel nogut tru long yupela. Long wanem yupela i bilong mi.” (Matyu 10:22) Na tru tumas, ol man i bin mekim olsem long ol Kristen tru! Wanpela man i raitim buk na em i stori long lotu Kristen na gavman bilong Rom long bipo, na em i tok: ‘Ol man i holim nem Kristen, ol i kisim nogut long dispela nem tasol; maski ol i no bin mekim rong, tasol sapos ol i tok ol i Kristen, ol inap kisim strafe.’—Buk Christianity and the Roman Government, bilong E. G. Hardy.
13 God i givim strong long ol dispela Kristen bilong pastaim na long strong bilong em ol inap karim bikpela hevi na traim na sanap strong. Wanpela buk i stori long ol samting nogut i bin painim ol Kristen bilong pastaim na i tok: ‘Sampela taim ol man i givim pen long ol o tromoi ol long ol wel abus i hangre. Ol i mekim olsem long ples bung bambai ol manmeri i ken amamas long lukim, olsem wanpela pilai samting.’ Ol dispela Kristen i karim bikpela pen na hevi, tasol dispela buk i tok, dispela samting “i strongim bilip bilong ol na pulim planti moa i kam insait long lain bilong ol.” (From the Old World to the New, bilong Eugene A. Colligan na Maxwell F. Littwin, yia 1932, pes 90 na 91) Na i wankain tu long ol witnes bilong Jehova nau long taim bilong yumi—ol tu i bin karim hevi na sanap strong. Ol i holimpas stretpela pasin na i stap gut long God. Lain bilong Seten i no inap pundaunim ol.
14, 15. Dispela “tupela man bilong autim tok” i makim husat? Wanem samting i painim ol long yia 1918 na 1919?
14 Tingim ol samting i bin painim ol wokboi bilong Jehova spirit holi i bin makim ol, em Baibel i tok piksa long ol na kolim ol olsem “tupela man bilong autim tok.” Long yia 1918 na 1919 ol birua i laik “putim lo” na bagarapim ol. (Revelesen 11:3, 7-10; Sam 94:20) J. F. Rutherford em i presiden bilong Sosaiti Was Taua long dispela taim bipo, na ol i putim em wantaim 7-pela wanwok bilong em long kalabus, tasol ol i no gat rong. Long dispela taim i olsem ol man i kilim i dai dispela “tupela man bilong autim tok,” long wanem ol i pasim wok bilong autim tok, na ol birua bilong ol i amamas. Wanpela man i raitim buk na em i tok, ‘Sapos yumi skelim ol samting i bin painim Rutherford na ol poroman bilong em yumi ken save, ol pris na pasto i as bilong dispela wok bilong pinisim ol dispela Sumatin Bilong Baibel. Taim ol man bilong wokim ol nius bilong lotu i harim tok olsem kot i givim 20 yia kalabus long ol dispela man, olgeta wantaim i amamas. Mi no lukim sampela tok long ol dispela nius i tok ol i sori long ol dispela man.’—Buk Preachers Present Arms, bilong Ray H. Abrams.
15 Bihain dispela etpela Sumatin Bilong Baibel ol i lusim kalabus na kot i tok ol i no gat rong; no gat tru. Seten wantaim lain bilong em i lus. Spirit bilong God i kirapim dispela “tupela man bilong autim tok,” olsem ol manmeri God i bin makim ol, em ol i liklik lain, na ol i kirap gen long autim tok bilong Kingdom. (Revelesen 11:11) Inap long nau ol birua bilong Jehova i wok long pait wantaim ol dispela man i holimpas stretpela pasin, tasol ol i no pundaunim ol. Ol i sanap strong na i stap gut long God.
16. Wanpela yangpela brata i stap gut long God, em i tok wanem?
16 Olsem: Tingim ol tok wanpela yangpela brata i raitim long famili bilong em taim em i stap kalabus na wetim ol birua long lain bilong Hitler i kilim em i dai. Em i tok: “Em biknait nau. I gat liklik hap taim yet bilong mi senisim tingting bilong mi. Tasol sapos mi givim baksait long Bikpela bilong yumi, yu ting bai mi inap i stap amamas moa long dispela graun? Nogat tru! Olsem na yupela i ken save, nau mi stap amamas na bel isi na mi dai.” Dispela yangpela brata i no pret na lusim stretpela pasin, a? Em i no pundaun. Em i sanap strong na i stap gut long God.
17. Long Rasia ol i holim planti Witnes, tasol dispela i mekim wanem long wok bilong ol Witnes long autim tok bilong Kingdom?
17 Ol birua i wok yet long pundaunim ol wokboi bilong Jehova bambai ol i lusim stretpela pasin na ol i no i stap gut long God. Wanpela niusman i stori long lotu long hap bilong Rasia na em i tok, long yia 1951 ol i bin holim planti Witnes. Em i tok, ‘Ol Witnes yet i tok ol i holim 7,000 samting na salim ol i go longwe long hap bilong ol maunten Ural na long hap bilong Saibiria na long ples longwe long hap bilong not (Vortuka) na long Kasakstan.’ Na em i tok moa olsem: “Dispela samting i no pinisim ol Witnes long Rasia; nogat; nupela rot i op long ol bilong autim tok. Taim ol i salim ol Witnes i go na tren i kamap long wanpela ples bilong kisim ol pasendia, kwiktaim ol Witnes i kirap autim tok long ol man i stap long dispela ples. Dispela samting gavman bilong Rasia i mekim i givim rot long ol Witnes bilong autim tok long ol narapela hap. Pastaim ol i stap long ol liklik liklik ples, tasol nau ol inap autim tok long planti man moa long planti ples moa maski ol dispela ples i ples nogut, olsem banis kalabus nogut o kem bilong ol man i wok kalabus.” (Buk Religion in the Soviet Union, bilong Walter Kolarz) Long ol dispela “ples nogut” ol wokboi bilong Jehova i painim pinis planti man ol i amamas long harim gutpela tok bilong Kingdom na ol i bilip.—Lukim Aposel 11:19-21.
Ol i Olsem Ami i Winim Pait
18, 19. Olsem wanem yumi inap winim pait na i stap gut long God?
18 Ol man i mekim nogut long lain bilong God inap long nau. Orait, olsem wanem ol Witnes Bilong Jehova inap holimpas stretpela pasin na i stap gut long God? Yumi inap mekim olsem, long wanem yumi bihainim tok bilong Baibel, em Tok Bilong God, na yumi ‘skelim tingting bilong yumi na yumi inap skelim gutpela pasin na pasin nogut.’ Yumi stap gut long wok bilong autim tok bilong Jehova, olsem na yumi “no ken wokabaut wankain olsem ol man bilong dispela graun”; yumi larim God i mekim tingting bilong yumi i kamap nupela. Yumi amamas long mekim pasin God i laikim, na long strong bilong Em yumi inap winim ol birua bilong yumi maski ol i ensel nogut o man nogut.—Hibru 5:12-14; Rom 12:1, 2.
19 Yumi ‘bilong Jehova’ na yumi kain olsem ami i winim pait. Pait bilong yumi em i bilong spirit, na yumi “stap strong long Bikpela, na long strong bilong bun bilong em.” Yumi pasim olgeta klos pait God i givim long yumi na spirit holi bilong em i strongim yumi, olsem na yumi inap “sanap strong na sakim olgeta pasin hait bilong Seten.” (Efesas 6:10-20; 2 Korin 10:3, 4) Long dispela rot yumi inap winim pait na sanap strong yet olsem ol man bilong i stap gut long God.
20. I gat wanem samting bilong helpim yumi long i stap gut long God? Yumi save long wanem samting na dispela tu i helpim yumi long i stap gut long God?
20 Yumi narapela kain ami. Long wanem long lain bilong yumi i gat narapela ‘lain ami’ i stap, em ol “planti meri” ol i autim dispela gutpela tok! (Sam 68:11) Maski ol birua bilong yumi i bikpela strongpela lain, tasol ‘lain i helpim yumi i bikpela lain moa.’ (2 King 6:16) Ol ensel i helpim yumi long autim tok long olgeta manmeri i stap long graun. (Revelesen 14:6) Yumi holimpas stretpela pasin na i stap gut long God, olsem na yumi save, ‘olgeta samting ol man i mekim bilong daunim yumi, ol dispela samting i no inap daunim yumi.’—Aisaia 54:17.
21. Ol man i mekim nogut long yumi, tasol wanem samting i go yet na i kamap bikpela?
21 Tru tumas i gat pait i stap. Ol lain bilong Seten i wok strong long pasim wok bilong yumi long autim tok. Olsem na yumi mas sanap strong yet na “pait strong wantaim ol birua.” (1 Timoti 1:18) Krais Jisas i kisim pinis biknem long heven na em i Hetman bilong yumi, olsem na yumi olgeta wan wan i mas i stap “gutpela soldia bilong Krais Jisas.” (2 Timoti 2:3, 4) Maski ol hevi na traim i painim yumi, tasol yumi mas sanap strong na i stap gut long God, na long marimari bilong God bai yumi mekim olsem. Pes bilong yumi i lait—yumi amamas tru—long wanem yumi lukim lain bilong Jehova na wok bilong Jehova i kamap bikpela. Long nau planti ‘gutpela samting bilong olgeta lain’ ol i kam insait long ‘haus bilong Jehova’ na Jehova i kisim biknem. (Hagai 2:7) Maski ol man i mekim nogut long yumi —maski ol i putim yumi long kalabus o paitim yumi o tambuim wok bilong yumi o wok strong long pasim maus bilong yumi—tasol wok bilong kamapim ol disaipel, dispela wok i go yet na i kamap bikpela.—Matyu 24:14; 28:19, 20.
22. Yumi bilong Jehova, olsem na yumi mas mekim wanem?
22 Long nau bikpela lain ol i litimapim nem bilong Jehova na long olgeta taim dispela lain i wok long i go bikpela moa. Tru tumas, long dispela taim nau olgeta man na meri long dispela graun ol i mas tingim gut wanem rot ol i laik bihainim. Yumi gat gutpela wok tru yumi inap mekim—yumi ken autim dispela gutpela tok bilong Kingdom na lainim ol man i kirap bihainim lotu i tru! ‘Bikpela lain’ i wok long i go bikpela moa na yumi mas i stap strong yet olsem ol wokboi bilong God I Antap Tru. (Revelesen 7:9) ‘Sapos yumi stap laip o yumi dai, yumi bilong Jehova.’ Olsem na yumi mas ran strong yet bambai yumi inap kisim prais bilong laip, na oltaim yumi mas tenkyu long Jehova, long wanem yumi inap i stap gut long Em na mekim bel bilong Em i amamas!
Yu Inap Bekim?
◻ Man i stap gut long God, em i save mekim wanem?
◻ Bilong i stap gut long God, oltaim lain bilong God i mas mekim wanem?
◻ Olsem wanem yumi save, sapos yumi stap gut long God o nogat, dispela em i bikpela samting?
◻ Ol manmeri bilong bipo ol i bin i stap gut long God, sampela i bin winim wanem kain hevi na traim?
◻ Olsem wanem ol Witnes Bilong Jehova long nau ol inap i stap gut long God?
[Piksa long pes 10]
Long bipo na long nau tu ol wokboi bilong Jehova i holimpas stretpela pasin na i stap gut long Em. Yu tu yu mekim olsem?
Inok
Sera
Jepta
Pol