Lukautim Famili na Bai Pasin Nogut i No Ken Bagarapim Ol

1-3. (a) Ol samting nogut i laik bagarapim famili ol i save kam we? (b) Ol papamama i mas bihainim wanem stretpela tingting long lukautim ol pikinini na bai ol samting nogut i no ken bagarapim ol?

YU REDI long salim pikinini bilong yu i go long skul, na ren i kam daun. Orait yu mekim wanem? Yu larim em i go tasol na yu no givim kot ren o ambrela long em? O yu putim planti samting tru long skin bilong em na em i hatwok tru long wokabaut? Yu no mekim olsem, a? Yu givim ol samting long em inap tasol na bai ren i no ken wasim em.

² Olsem tasol, papamama i mas bihainim stretpela tingting taim ol i laik lukautim famili na bai ol i ken sakim ol pasin nogut i laik bagarapim ol, i olsem ol spia ol i sutim i kam long famili na ol i kam long planti rot​—long rot bilong ol amamas, televisen na ol buk samting, ol wanlain, na sampela taim ol skul. Sampela papamama ol i no save mekim wanpela samting bilong lukautim famili na bai ol samting nogut i no ken bagarapim ol. Na sampela papamama i ting olgeta samting bilong dispela graun inap bagarapim famili, olsem na ol i putim planti lo na tambu long ol pikinini na ol i pilim olsem ol i kalabus olgeta. Olsem wanem? Papamama inap skelim stret samting ol i mas mekim?

³ Ol inap. Sapos ol i isi tumas o strong tumas, dispela i no inap helpim ol pikinini, na bikpela hevi inap kamap long dispela pasin. (Saveman 7:​16, 17) Tasol olsem wanem papamama Kristen i ken mekim stret wok bilong lukautim famili? Tingim 3-pela samting: skul, ol poroman, na ol amamas.

 4. Ol papamama i mas ting olsem wanem long pasin bilong kisim skul?

⁴ Ol papamama Kristen i tingim skul i bikpela samting. Ol i save skul i save helpim ol pikinini long rit rait, na toktok gut wantaim ol man, na save long pasin bilong stretim ol hevi. Na long skul ol i mas kisim save tu long pasin bilong lain long ol samting. Ol save em pikinini i kisim long skul inap helpim em long kisim wanpela gutpela wok,

maski long nau i gat hatwok tru long painim gutpela wok. Na tu, taim pikinini i skul gut, dispela inap helpim em long mekim gutpela wok tru.—Sindaun 22:29.

5, 6. Olsem wanem ol pikinini long skul inap harim ol tok kranki long ol samting bilong maritpasin?

⁵ Tasol taim pikinini i go long skul, em i save bung wantaim ol narapela pikinini​—em planti bilong ol i gat ol tingting kranki. Yumi ken skelim tingting bilong ol long maritpasin na stretpela pasin. Long wanpela haiskul long Naijiria, wanpela yangpela meri i save mekim pasin pamuk em i givim sampela tok long ol wanskul bilong em long ol samting bilong maritpasin. Ol i amamas long putim yau long tok bilong em, maski em i kamapim ol tok kranki tru em i bin kisim long ol buk nogut i stori long pasin sem. Sampela yangpela meri ol i mekim ol samting olsem em i bin tokim ol. Olsem na wanpela yangpela meri singel i kisim bel na taim em i mekim ol samting bilong  rausim bel, em i dai.

⁶ Sori tru, sampela tok kranki bilong maritpasin i save kamap long skul, i no ol pikinini i kamapim​—ol tisa yet i kamapim. Planti papamama ol i tingting planti long taim ol skul i lainim ol pikinini long ol samting bilong maritpasin na ol i no tokim ol pikinini long ol stretpela lo bilong maritpasin na wok bilong ol long bihainim ol dispela lo. Mama bilong wanpela pikinini meri i gat 12-pela krismas em i tok: “Mipela i sindaun long wanpela hap ol man i save givim bel tru long lotu, na ol i bihainim ol pasin na tingting bilong bipo, tasol long haiskul yet bilong dispela ples, ol i givim ol kondom long ol pikinini!” Dispela mama wantaim man bilong em ol i kirap nogut taim ol i harim olsem sampela manki bilong skul, em ol wankrismas bilong pikinini meri bilong tupela, ol i tokim pikinini meri olsem ol i laik mekim maritpasin wantaim em. Orait papamama i ken mekim wanem na bai ol kain samting nogut olsem i no ken pulim ol?

 7. Taim ol pikinini i harim ol tok kranki long ol samting bilong maritpasin, i gutpela sapos papamama i mekim wanem?

⁷ Olsem wanem? Yu mas haitim olgeta tok bilong maritpasin na no ken kamapim liklik long ol pikinini? Nogat. I gutpela sapos yu yet yu skulim ol pikinini bilong yu long dispela samting. (Sindaun 5:1) Tru, long sampela hap bilong Yurop na Not Amerika, planti papamama i save surik long toktok long dispela samting. Na long sampela hap bilong Afrika tu, ol papamama i no save toktok wantaim pikinini long ol samting bilong maritpasin. Wanpela papa long Siera Leon i tok: “Em i no pasin bilong ol Afrika.” Sampela papamama i ting, sapos ol i skulim ol pikinini long ol samting bilong maritpasin, dispela bai givim sampela tingting long ol na bihain bai ol i mekim pasin pamuk! Tasol wanem tingting bilong God long dispela samting?

8, 9. Baibel i kamapim wanem tok long ol samting bilong maritpasin?

⁸ Baibel i tokaut klia olsem i no samting bilong sem long toktok long ol samting bilong maritpasin long taim na long pasin i stret long mekim. Long Israel, Moses i tokim ol manmeri bilong God, na ol “pikinini” tu, long ol i mas bung wantaim bilong harim ol Livai i kaunim Lo Bilong Moses. (Lo 31:​10-12; Josua 8:35) Lo i tokaut stret long ol samting bilong sik mun, na wara i kamap nating long sem bilong man, pasin pamuk, bagarapim marit, man i slip wantaim man, pasin bilong slip wantaim wanblut, na goapim wanpela animal. (Wok Pris 15:​16, 19; 18:​6, 22, 23; Lo 22:22) Taim ol i harim pinis ol dispela tok bilong Lo, ating ol pikinini i laik save long ol dispela tok, na papamama i mas kamapim klia long ol.

⁹ Sampela ves long sapta 5, 6, na 7 bilong Buk Sindaun i tokim ol papamama long ol samting nogut inap kamap long ol man o meri i mekim pasin pamuk. Ol dispela ves i soim yumi olsem sampela taim i olsem pasin pamuk i gutpela samting bilong traim. (Sindaun 5:3; 6:​24, 25; 7:​14-21) Tasol ol dispela ves i skulim yumi olsem dispela pasin i gat rong long en, na ol man i mekim ol bai kisim bikpela hevi tru long en. Na ol dispela ves i kamapim ol tok bilong helpim ol yangpela long abrusim pasin pamuk na ol kain pasin olsem. (Sindaun 5:​1-14, 21-23; 6:​27-35; 7:​22-27) Na tu, ol i kamapim klia olsem pasin pamuk i narapela kain tru long amamas bilong mekim maritpasin insait long marit, em samting i stret ol marit i ken mekim. (Sindaun 5:​15-20) Em gutpela pasin tru ol papamama i ken bihainim bilong skulim ol pikinini!

10. Sapos yu givim gutpela save bilong God long ol pikinini long ol samting bilong maritpasin, bilong wanem dispela i no ken kirapim ol long mekim pasin pamuk?

¹⁰ Taim papamama i skulim ol pikinini olsem, yu ting dispela i kirapim ol pikinini long mekim pasin pamuk? Nogat. Baibel i tok: “Gutpela [save] bilong ol stretpela man inap long helpim ol yet na bai ol i stap gut.” (Sindaun 11:9) Yu laik bai ol pikinini bilong yu i ken i stap gut na ol pasin bilong graun i no ken bagarapim ol, a? Wanpela papa i tok: “Kirap long taim ol pikinini i liklik yet, mipela i save tokim ol stret long ol samting bilong maritpasin. Olsem na taim ol i harim ol narapela pikinini i toktok long en, ol i no save putim yau long harim. Em i no wanpela tok hait ol i no save long en.”

11. Olsem wanem yu ken skulim ol pikinini isi isi long ol samting bilong skin bilong ol?

¹¹ Olsem sampela sapta paslain long dispela i tok, taim ol pikinini i liklik yet papamama i mas kirap skulim ol long ol samting bilong maritpasin. Taim yu skulim ol long nem bilong ol wan wan hap bilong skin, yu no ken lusim ol hap bilong skin em sampela i no laik kolim nem bilong ol; ol dispela hap i no samting bilong sem long en. Taim ol i wok long i go bikpela, skulim ol olsem i gat sampela tambu i stap long ol dispela hap bilong skin. Papa na mama wantaim i mas skulim ol pikinini olsem ol dispela hap bilong skin i bikpela samting tru, na ol i no ken i stap ples klia na ol narapela i no ken holim, na ol i no ken mekim tok doti long en. Taim ol pikinini i go bikpela liklik, papamama i mas tokim ol long olsem wanem man na meri i save pas wantaim bilong kamapim pikinini. Orait taim ol pikinini i gat bikpela krismas liklik na i gat sampela senis bai kamap long skin bilong ol yet, i gutpela sapos ol i save pinis long ol dispela senis bai kamap. Olsem Sapta 5 i tok, dispela kain skul inap lukautim ol pikinini na bai ol man i no ken mekim pasin nogut long ol.​—Sindaun 2:​10-14.

12. Long skul ol i save lainim ol pikinini long wanem ol tok kranki?

¹² Papamama i mas redi long daunim ol narapela tok giaman ol skul i lainim ol pikinini long en​—olsem ol tok nating bilong ol man i tok yumi bin kamap long rot bilong ol animal samting, o ol tok bilong litimapim kantri, o dispela tingting olsem i no gat wanpela tok em i tru olgeta. (1 Korin 3:19; skelim wantaim Stat 1:27; Wok Pris 26:1; Jon 4:24; 17:17.) Planti tisa i gat gutpela bel, ol i ting em i bikpela samting tru long pikinini i mas kisim sampela skul moa. Tru, em i samting bilong pikinini na papamama yet long skelim dispela, tasol sampela tisa i ting, long dispela rot tasol pikinini inap kisim gutpela wok long bihain.a​—Song 146:​3-6.

13. Ol pikinini i save go long skul, olsem wanem papamama i ken lukautim ol na bai ol i no ken kisim ol tingting i no stret?

¹³ Bilong daunim ol tok i no stret o tok kranki ol i skulim ol pikinini long en long skul, papamama i mas save long ol samting ol pikinini i lain long en. Olsem na yupela ol papamama, yupela tu i gat homwok bilong mekim! Soim ol pikinini yu gat laik tru long save long ol samting ol i skul long en. Taim skul i pinis long apinun na ol i kam bek long haus, toktok wantaim ol. Askim ol, ol i lain long wanem samting, na wanem samting ol i laik tru long lainim, na wanem samting i hatwok long ol i lainim. Lukim gut ol homwok ol i mas mekim, na sampela hap tok ol i raitim, na ol mak ol i kisim long ol tes. Na wok strong long save gut long ol tisa bilong ol. Tokim ol tisa olsem yu amamas long wok ol i mekim, na yu laik helpim ol sapos ol i laik bai yu mekim olsem.

14. Ol pikinini i givim bel long God, bilong wanem ol i mas makim ol gutpela pren bilong poroman wantaim ol?

¹⁴ “Yu bin kisim dispela tok we?” Ating planti papamama i bin askim olsem taim pikinini i mekim wanpela tok o pasin i narapela kain tru long pasin bilong em, na papamama i kirap nogut long en. Na planti pikinini i save tok, ol i bin kisim dispela tok o pasin long wanpela nupela pren long skul o long hap ol i sindaun long en. Tru tumas, ol poroman inap stiaim ol tingting na pasin bilong yumi, maski yumi yangpela o yumi lapun. Aposel Pol i mekim tok lukaut olsem: “Yupela i no ken larim ol arapela man i giamanim yupela. . . . Sapos yumi poroman wantaim ol man nogut, bai ol i bagarapim gutpela pasin bilong yumi.” (1 Korin 15:33; Sindaun 13:20) Taim ol wanlain i laik pulim ol yangpela, i hatwok long ol yangpela long sakim ol, long wanem, tingting bilong ol i no strong tumas, na sampela taim ol i gat bikpela laik tru long ol poroman i ken laikim ol. Olsem na taim ol i laik makim sampela pren bilong poroman wantaim ol, em i bikpela samting long ol i mas kisim ol gutpela pren!

15. Olsem wanem papamama i ken stiaim ol pikinini long makim ol gutpela pren bilong poroman wantaim ol?

¹⁵ Olgeta papamama i save pinis, sampela taim ol pikinini i no save makim ol gutpela pren; papamama i mas stiaim ol. Tasol i no olsem yupela ol papamama yet i mas makim ol pren bilong ol pikinini, nogat. Taim ol i wok long i go bikpela, skulim ol long bihainim gutpela tingting na helpim ol long skelim olsem ol poroman i mas i gat wanem kain pasin. Nambawan pasin tru, em ol i mas laikim tru Jehova na ol i mas laik tru long mekim ol samting i stret long ai bilong em. (Mak 12:​28-30) Skulim ol pikinini long laikim tru na tingim gut ol manmeri i gat stretpela pasin, na mekim gutpela pasin long ol man, na givim ol samting long ol narapela, na wok strong. Long famili-stadi, helpim ol pikinini long luksave long ol dispela kain pasin i stap long ol man na meri em Baibel i stori long ol, na nau yu ken helpim ol long luksave long wankain pasin i stap long ol narapela insait long kongrigesen. Yu mas mekim wankain pasin taim yu laik makim sampela pren bilong yu yet, na bai yu ken i stap olsem gutpela piksa ol pikinini i ken bihainim.

16. Olsem wanem papamama i ken save, pikinini bilong ol i kisim wanem kain poroman?

¹⁶ Yu save long ol poroman bilong pikinini bilong yu? Yu ken tokim pikinini long bringim ol poroman bilong em i kam long haus na bai yu ken bungim ol. Na yu ken askim pikinini, ol narapela i save ting olsem wanem long ol dispela poroman. Ol i gat nem long bihainim stretpela pasin, o ol i save giaman na mekim hait ol pasin i no stret? Sapos ol i mekim pasin olsem, orait helpim pikinini long skelim gut long tingting, bilong wanem ol kain poroman olsem ol inap bagarapim em. (Song 26:​4, 5, 9-12) Sapos yu lukim sampela senis i kamap long pasin, o bilas, o tingting, o tok bilong pikinini na ol dispela senis i no gutpela, ating yu mas toktok wantaim em long ol poroman bilong em, nogut em i wokabaut wantaim poroman i no gat gutpela pasin na em i kisim dispela pasin bilong poroman.​—Skelim wantaim Stat 34:​1, 2.

17, 18. Papamama i mas givim tok lukaut long pikinini long ol poroman nogut, tasol ol i ken mekim wanem samting moa bilong helpim pikinini?

¹⁷ Tasol sapos yu skulim pikinini long abrusim ol poroman nogut, dispela tasol i no inap. Yu mas helpim em long painim ol gutpela poroman. Wanpela papa i tok: “Oltaim mitupela i wok strong long i stap olsem poroman bilong pikinini. Olsem na taim skul i laik bai pikinini man bilong mipela i go insait long tim bilong pilai kikbal, mitupela meri bilong mi i sindaun wantaim em na stori long olsem wanem dispela i no gutpela tumas​—em i no gutpela, long wanem, em bai bung wantaim ol nupela poroman. Orait nau mipela i tokim em olsem mipela i ken kisim sampela manki insait long kongrigesen na go long pak bilong pilai kikbal. Mipela i mekim olsem na dispela hevi i pinis.”

¹⁸ Ol papamama i gat gutpela tingting ol i save helpim pikinini long painim ol gutpela poroman na kisim ol gutpela amamas. Tasol planti papamama i gat hatwok long skelim gut dispela pasin bilong painim amamas.

19. Wanem ol stori bilong Baibel i soim yumi olsem i no gat rong long ol famili i kisim amamas?

¹⁹ Olsem wanem? Baibel i tok i gat rong long kisim amamas? Nogat tru! Baibel i tok i gat “taim bilong lap . . . na taim bilong singsing.”b (Saveman 3:4) Lain bilong God long bipo ol i bin amamas long paitim gita samting na danis, na mekim pilai, na mekim ol tok bokis. Jisas i bin go long bikpela kaikai bilong marit na “bikpela kaikai” em Matyu Livai i bin wokim bilong em. (Luk 5:29; Jon 2:​1, 2) Em nau, Jisas i no ting amamas em i samting nogut. Na insait long famili bilong yu, nogut sampela i ting i gat rong long lap na amamas!

20. Taim papamama i laik makim ol samting famili i ken mekim bilong kisim amamas, ol i mas tingim wanem samting?

²⁰ Jehova em i ‘as bilong amamas.’ (1 Timoti 1:11) Olsem na pasin bilong lotuim Jehova i mas givim amamas long famili, na em i no ken mekim na i stap bilong famili i no gat amamas long en. (Skelim wantaim Lo 16:15.) Skin bilong ol pikinini i gat strong na ol i laik kalap na pilai na amamas; em pasin bilong ol pikinini. Orait taim papamama i makim ol gutpela amamas bilong pikinini, em i no bilong amamas nating tasol, nogat. Em i wanpela rot bilong pikinini i ken lain na kisim gutpela save. Papa bilong famili i gat wok long lukautim famili long olgeta samting ol i mas kisim, na ol amamas tu. Tasol em i mas skelim gut dispela samting.

21. Wanem samting bilong ol amamas em famili i mas was gut long en?

²¹ Olsem Baibel i tok profet long en, nau long taim bilong “las de,” planti manmeri ol i ‘laikim tumas ol amamas bilong dispela graun, na ol i no laikim God.’ (2 Timoti 3:​1-5) Long planti man, amamas em i nambawan bikpela samting. I gat ol kain kain amamas i stap na ol i planti tru, na nogut ol dispela amamas i mekim na famili i no tingim ol samting i bikpela samting moa. Na tu, planti amamas i gat pamuk, pait na bagarapim man, kisim drak, na ol narapela pasin i nogut tru. (Sindaun 3:31) Orait papamama i ken mekim wanem na bai ol amamas nogut i no ken bagarapim ol pikinini?

22. Olsem wanem papamama i ken skulim ol pikinini long bihainim gutpela tingting taim ol i makim ol samting ol bai mekim bilong kisim amamas?

²² Papamama i mas putim sampela lo na ol pikinini i no ken kalapim. Na tu, ol i mas skulim ol pikinini long skelim wanem kain amamas inap bagarapim ol, na olsem wanem ol i ken save long pasin bilong kisim amamas long skel tasol na no ken winim skel. Bilong skulim ol pikinini olsem, papamama i mas lusim bikpela hap taim na strong. Tingim wanpela samting i bin kamap: Wanpela papa i gat tupela pikinini man, em i lukim olsem planti taim namba wan pikinini man i wok long harim ol samting i kamap long wanpela nupela redio-stesin. Orait wanpela taim papa i draivim trak i go long wok, na em i opim redio long dispela redio-stesin. Sampela taim em i pasim ka na raitim tok bilong sampela singsing. Orait bihain em i sindaun wantaim tupela pikinini bilong em na toktok long ol samting em i bin harim. Em i mekim sampela askim bilong kamapim tingting bilong tupela, olsem “Yupela i ting olsem wanem?” Orait nau em i putim gut yau long bekim bilong tupela. Em i mekim wok long Baibel na skelim dispela samting, na nau tupela manki i tok ol i no ken harim moa dispela redio-stesin.

23. Papamama i ken mekim wanem na bai ol amamas nogut i no ken bagarapim ol pikinini bilong ol?

²³ Ol papamama Kristen i gat gutpela tingting ol i save skelim gut ol musik, ol program bilong televisen, ol video, ol buk komik, ol pilai bilong video, na ol piksa wokabaut ol pikinini bilong ol i save laikim. Papamama i save lukim ol piksa long skin bilong ol buk na kaset, na ol tok bilong singsing, na ol i save lukim sampela liklik hap bilong ol dispela program na bai ol i ken skelim. Planti papamama i kirap nogut long sampela “amamas” ol i save kamapim bilong ol pikinini long nau. Ol papamama i laik lukautim gut ol pikinini na bai ol pasin doti i no ken kalap long ol, ol i toktok wantaim famili long olsem wanem ol dispela kain amamas inap bagarapim ol, na ol i save mekim wok long Baibel na ol buk samting i kamapim ol tok bilong Baibel, olsem buk Sampela Askim Bilong Ol Yangpela​—Ol Gutpela Bekim, na sampela stori long nius Wastaua na Kirap!c Taim papamama i putim sampela lo long ol pikinini, na papamama i strong long ol i mas bihainim oltaim, na ol dispela lo i no strong tumas, ol i save lukim ol gutpela samting i kamap long en.​—Matyu 5:37; Filipai 4:5.

24, 25. Wanem sampela gutpela samting famili i ken mekim wantaim bilong kisim amamas?

²⁴ Tasol pasin bilong tambuim ol pikinini long mekim ol kain amamas inap bagarapim ol, dispela tasol i no inap. I mas i gat ol gutpela samting bilong daunim ol samting nogut. Sapos nogat, ating isi isi ol pikinini bai lusim gutpela rot na bihainim rot i no stret. Planti famili Kristen ol inap tingim planti gutpela amamas ol i bin kisim wantaim​—olsem ol piknik, wokabaut long bus o maunten samting, slip long haus sel long bus, mekim sampela pilai na spot, raun na go lukim ol wanblut o pren. Sampela famili ol i bin kisim amamas long bung wantaim na kaunim ol buk, na dispela i bin strongim bel bilong ol. Sampela ol i kamapim ol stori i gat tok pani long en o i kirapim tingting bilong ol. Na sampela famili ol i bin lain long mekim sampela samting wantaim, olsem wokim ol samting long diwai o kain samting olsem, paitim gita o pilaim ol narapela musik, malenim piksa, o stadi long ol samting God i bin wokim. Taim ol pikinini i lain long kisim amamas long ol kain samting olsem, dispela i save lukautim ol na ol amamas nogut i no ken bagarapim ol. Na ol i lain tu olsem, i gat ol narapela rot bilong kisim amamas​—i no olsem ol i mas sindaun tasol na lukim televisen samting. Taim ol yet i mekim ol samting, dispela i gat bikpela amamas moa long en, winim pasin bilong lukim samting.

²⁵ Pasin bilong bung wantaim ol narapela, dispela tu i gutpela rot bilong kisim amamas. Sapos papa i bosim gut ol dispela bung na i no gat planti manmeri tumas long en, na em i no kisim bikpela hap taim bilong famili, ol pikinini inap kisim gutpela amamas. Na tu, ol dispela bung inap strongim pasin bilong laikim tru ol narapela insait long kongrigesen.​—Skelim wantaim Luk 14:​13, 14; Jut 12.

26. Wanem pasin i bikpela samting tru bilong helpim papamama long lukautim famili na bai ol pasin nogut i no ken kam insait long en?

²⁶ Tru tumas, em i bikpela wok tru long lukautim famili na bai ol pasin nogut bilong graun i no ken bagarapim. Tasol i gat wanpela samting em bai helpim yu tru long mekim gut dispela wok. Em pasin bilong laikim tru ol narapela! Taim famili i pas gut wantaim na narapela i laikim tru narapela, haus bilong yu bai stap olsem ples ol pikinini i ken stap gut long en, na em bai kamapim strong pasin bilong toktok gut wantaim, em i bikpela samting tru bilong lukautim famili na bai ol pasin nogut bilong graun i no ken kam insait long en. Na em i bikpela samting moa yet long famili i mas kisim pasin bilong laikim tru Jehova. Sapos dispela pasin i stap insait long famili, ating taim ol pikinini i go bikpela bai ol i no ken larim ol pasin bilong dispela graun i pulim ol, long wanem, ol i nolaik tru long mekim ol samting God i no laikim. Na ol papamama i givim bel tru long Jehova bai ol i wok strong long bihainim pasin bilong em long laikim ol narapela, na isi long ol, na bihainim stretpela tingting long mekim ol samting. (Efesus 5:1; Jems 3:17) Sapos papamama i mekim olsem, bai i no gat as na ol pikinini i ken tingim lotu bilong Jehova i olsem wanpela lista i kolim planti samting i tambu long mekim, o em i save pasim ol na ol i no inap kisim amamas o lap liklik, na ol i laik ranawe na lusim dispela kain sindaun bilong ol taim ol i gat rot long mekim. Ol pikinini bai i no inap kisim dispela kain tingting. Ol bai lukim olsem pasin bilong lotuim God em i gat bikpela amamas long en, na i stap bilong ol i gat as bilong en.

27. Olsem wanem famili inap winim strong bilong dispela graun?

²⁷ Jehova i amamas tru long ol famili i stap wanbel na ol i amamas long mekim wok bilong em, na ol i wok strong long i stap ‘klin long ai bilong God na i no gat asua’ long kisim hap doti bilong dispela graun. (2 Pita 3:14; Sindaun 27:11) Ol kain famili olsem ol i save bihainim lek bilong Krais Jisas, em i bin sakim olgeta samting ol lain bilong dispela graun bilong Satan i mekim bilong pulim em na bai em i kamap doti long ai bilong God. Klostu long taim Jisas i dai, em inap tok: “Mi winim pinis strong bilong dispela graun.” (Jon 16:33) Famili bilong yu tu inap winim strong bilong dispela graun na kisim amamas long i stap oltaim oltaim!