Ol Pasin Nogut Bai Pinis!

GOD i givim Baibel long yumi, na Baibel i tokaut long as na ol man i mekim ol pasin nogut. Na tu, God i larim yumi yet i makim wanem rot yumi laik bihainim na em i givim yumi pasin bilong bosim gut bel, na dispela i inapim yumi long makim olsem yumi no laik mekim ol pasin nogut. (Lo 30:​15, 16, 19) Ol dispela pasin i helpim yumi long luksave long ol laik nogut i kamap long bel bilong yumi na mekim ol samting bilong stretim. Taim yumi mekim olsem na abrusim ol pasin nogut, dispela bai givim amamas long yumi yet na ol narapela tu.​—⁠Song 1:⁠1.

Tasol maski yumi olgeta wan wan i wok strong long sakim pasin bilong insait long ol pasin nogut, dispela graun i pulap yet long ol pasin nogut em ol narapela manmeri i mekim. Baibel i tok lukaut olsem: “Yu mas save olsem, long taim bilong las de planti hevi nogut tru bai i kamap.” Em i tok moa olsem: “Ol man bai i laikim ol yet tasol, na ol bai i laikim tumas long kisim mani. Ol bai i litimapim nem bilong ol yet na hambak nabaut, na ol bai i tok kros na tok nogut long ol arapela. Ol bai i sakim tok bilong papamama, na ol bai i no tok tenkyu long ol manmeri i mekim gutpela pasin long ol. Ol bai i givim baksait long ol pasin bilong God. Ol bai i no save long pasin bilong i stap pren bilong ol arapela, na taim ol i kros, bai i no gat rot bilong pinisim kros bilong ol. Ol bai i tok nogut long ol arapela. Ol bai i no bosim laik bilong bodi bilong ol, na ol bai i pait na bagarapim ol man nabaut. Ol bai i birua long olgeta gutpela pasin. Ol bai i mekim nogut long ol pren bilong ol yet, na ol bai i bihainim kwik olgeta kranki tingting bilong ol yet. Ol bai i tingim ol yet i bikpela man tru. Ol bai i laikim tumas ol kain kain pasin bilong amamas bilong dispela graun, na ol bai i no laikim God. Ol bai i bihainim pasin bilong God long skin tasol na ol bai i no save liklik long bikpela strong i stap long pasin tru bilong God. Yu mas stap longwe long ol dispela kain man.”​—⁠2 Timoti 3:​1-5.

Ating yu luksave long dispela tok “taim bilong las de” long dispela tok profet i stap antap. Dispela tok i gat wanem mining long yu yet? Long planti man taim ol i harim dispela tok “las de,” dispela i makim pinis bilong wanpela samting. Wanem dispela samting? Tingim ol promis bilong God i stap long Baibel.

Ol man nogut bai pinis olgeta.

“I no longtaim na bai ol man nogut i lus olgeta. Bai yu wok long painim ol long ples bilong ol, tasol yu no inap lukim ol. Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.”​—⁠SONG 37:​10, 11.

“[Bikpela] i save was gut long ol manmeri i save laikim em tru. Tasol em bai i bagarapim ol manmeri i save mekim pasin nogut.”​—⁠SONG 145:⁠20.

Pasin bilong daunim na bagarapim man bai pinis.

“Em i save helpim ol rabisman i singaut long em. Na ol manmeri i sot long ol samting na i no gat helpim, orait em yet bai i helpim ol. Sapos ol man nogut i laik daunim ol na bagarapim ol, em i save kisim bek ol.”​—⁠SONG 72:​12, 14.

“Long taim God i makim, God bai i pinisim dispela kalabus bilong bagarap nau olgeta samting i stap long en, na bai olgeta samting i stap gutpela tru wantaim yumi ol pikinini bilong God.”​—⁠ROM 8:⁠21.

God bai inapim tru laik bilong ol man long haus na kaikai samting.

“Olgeta man wan wan bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret.”​—⁠MAIKA 4:⁠4.

“Ol manmeri bilong mi bai i wokim ol haus na stap long ol. Na bai ol i planim ol gaden wain na wokim wain na dring. Ol birua bai i no inap kam moa na rausim ol manmeri bilong mi na sindaun long ol haus bilong ol na kisim ol gaden wain bilong ol na wokim wain na dring. Ol manmeri bilong mi bai i stap longpela taim tru, olsem ol strongpela diwai. Na bai ol i amamas long ol samting ol yet i bin hatwok long kamapim.”​—⁠AISAIA 65:​21, 22.

Stretpela pasin tasol bai stap.

“Ol manmeri God i bin makim bilong em yet, na ol i wok long krai long em long olgeta de na long olgeta nait, . . . em bai i helpim ol kwiktaim.”​—⁠LUK 18:​7, 8.

“God i save laikim tumas stretpela pasin. Em i no inap larim ol manmeri bilong en i lus. Oltaim Bikpela i save lukautim ol manmeri i wokabaut stret.”​—⁠SONG 37:⁠28.

Stretpela pasin bai senisim pasin bilong ol man long tingim ol yet tasol.

“Yu save . . . skulim ol [manmeri] long stretpela pasin bilong yu.”​—⁠AISAIA 26:⁠9.

“God i promis pinis long em bai i wokim nupela skai na nupela graun, na stretpela pasin tasol bai i stap long en. Yumi wet long dispela samting tasol i mas kamap.”​—⁠2 PITA 3:⁠13.

Ol Manmeri i Wok Long Senis​—⁠Long Nau Tu

Tru tumas, ol dispela tok promis i mekim gut bel bilong yumi. Tasol olsem wanem yumi ken save ol dispela tok bai kamap tru? I gat wanpela samting i kamapim klia olsem ol tok promis bilong God bai kamap tru. Wanem dispela samting? Planti milion manmeri long olgeta hap bilong graun long nau ol i lusim pinis pasin bilong tingim ol yet tasol, pasin pamuk, pasin bilong belhat na pait, na ol i lain long mekim tok tru, stap bel isi, na mekim gutpela pasin. Long nau, ol Witnes Bilong Jehova, em namba bilong ol i winim 7 milion, ol i stap wanpela lain brata tru long olgeta hap, ol i lusim pinis pasin bilong bel nogut long ol man bilong narapela skin, kantri, lain politik, o lain i stap rabis, em ol samting i bin kamapim pasin bilong nolaik tru long narapela, na pait na kilim man i dai, em ol pasin i bin stap bipo yet na i kam inap long nau.a Ol dispela senis i wok long kamap long nau i kamapim klia as na yumi ken bilip tru olsem ol tok promis bilong God bai kamap tru long olgeta hap bilong graun.

Wanem samting i mekim na ol i senis? Bekim bilong dispela askim i stap long wanpela bilong ol tok promis bilong Baibel, em profet Aisaia i bin raitim, em i tok:

“Ol wel dok na ol pikinini sipsip bai i stap gut wantaim, na ol lepat bai i slip wantaim ol pikinini meme. Ol pikinini bulmakau wantaim ol yangpela laion bai i raun na kaikai wantaim, na ol liklik mangi bai i was long ol. . . . Na ol laion bai i kaikai gras olsem ol bulmakau. Ol liklik pikinini i dring susu yet, ol bai i pilai klostu long ol hul bilong ol snek nogut. Long olgeta ples antap long maunten bilong Bikpela, olgeta samting bai i stap gut wantaim. Bai i no gat wanpela i mekim nogut long narapela, long wanem, olgeta samting long graun bai i save tru long Bikpela. Dispela save bai inapim olgeta hap graun olsem solwara i inapim mak bilong en olgeta.”​—⁠Aisaia 11:​6-9.

Yu ting dispela tok profet i stori long wanpela taim we ol animal bai stap bel isi wantaim ol man, na em tasol? Nogat. Dispela tok i gat narapela insait bilong en tu. Lukim laspela hap bilong ves i stori long samting i kamapim ol dispela senis: “Olgeta samting long graun bai i save tru long Bikpela.” Yu ting pasin bilong kisim save long God, dispela inap senisim pasin bilong ol animal? Nogat tru. Tasol em inap senisim pasin bilong ol man! Dispela tok profet i kamapim klia olsem ol man i gat pasin olsem bilong ol animal, ol inap senis na kisim pasin bilong Krais, long wanem, ol i lainim na bihainim ol tok em Baibel i skulim ol long en.

Tingim stori bilong Pedro.b Em i ting olsem em i pait bilong daunim pasin bilong mekim nogut long ol narapela taim em i joinim wanpela lain teroris. Bihain long em i kisim sampela skul, ol i tokim em long bomim wanpela polis bareks. Taim em i wok long redi long mekim olsem, polis i arestim em. Pedro i stap 18 mun long kalabus we em i wok long insait yet long wok teroris. Long dispela taim, meri bilong em i kirap stadi long Baibel wantaim ol Witnes Bilong Jehova. Taim Pedro i pinis long kalabus, em tu i kirap stadi long Baibel, na save em i kisim long God Jehova, dispela i kirapim em long senisim pasin bilong em na tingting bilong em long laip. Pedro i tok: “Mi tenkyu long Jehova olsem mi no bin kilim i dai wanpela man taim mi mekim wok teroris. Nau mi mekim wok long bainat bilong spirit, em Baibel, bilong skulim ol man long bel isi na stretpela pasin​—⁠em gutnius bilong Kingdom Bilong God.” Pedro i go long bareks em i bin tingting long bagarapim na em i autim tok long bel isi na taim we bai i no gat pait moa.

Tok Bilong God i senisim tru i stap bilong ol man, dispela i mekim na yumi ken bilip tru long tok promis bilong God olsem em bai pinisim tru pasin nogut. Tru tumas, ol manmeri bai i no inap mekim ol pasin nogut inap oltaim, nogat, ol bai senis na kamap gutpela manmeri. Klostu nau Jehova bai rausim man i as bilong olgeta pasin nogut, em Satan, em i save hait na bosim ol samting i kamap long dispela graun. Baibel i tok: “Dispela graun olgeta em i stap aninit long strong bilong Satan.” (1 Jon 5:19) Tasol klostu nau Satan bai i no stap moa. Na ol man i strong long bihainim ol pasin nogut, ol tu bai pinis. Yumi amamas long stap long dispela taim we i no gat moa ol pasin nogut, a?

Yumi mas mekim wanem bilong i stap long dispela taim? Tingim olsem ol man i mas “save tru long Bikpela,” em dispela save i senisim pasin bilong ol manmeri long nau na em bai senisim pasin bilong ol manmeri bilong olgeta hap bilong graun long bihain. Long rot bilong kisim stretpela save long tok bilong Baibel na bihainim​—⁠olsem Pedro i bin mekim​—⁠yu tu inap wetim taim we yu inap i stap long graun we “stretpela pasin tasol bai i stap long en.” (2 Pita 3:13) Olsem na mipela i laik kirapim yu long kisim save long God na Jisas Krais taim rot i op yet long yu mekim olsem, long wanem, dispela save bai givim laip oltaim long yu.​—⁠Jon 17:⁠3.

[Ol Futnot]

[Rait long pes 9]

Yu tu inap wetim taim we yu inap i stap long graun we “stretpela pasin tasol bai i stap long en.”​—2 PITA 3:13