Sapta 33

Kot i Painim Pamukmeri Nogut

Driman 11​​—⁠Kamapim Tok Hait 17:​1-​18

Stori: Bikpela Babilon i sindaun long retpela wel animal, na bihain wel animal i birua long em na bagarapim em

Taim bilong truim: Kirap long 1919 i go inap long taim bilong bikpela hevi tru

 1. Wanpela bilong 7-pela ensel i tokim Jon long wanem samting?

OL I mas kapsaitim olgeta 7-pela dis i gat belhat bilong Jehova i pulap long en! Namba 6 ensel i kapsaitim dis bilong em long hap em Babilon bilong bipo i bin stap long en, na dispela i makim ol samting nogut tru bai painim Bikpela Babilon taim Armagedon i laik kamap. (KTH 16⁠:​1, 12, 16) Ating dispela ensel yet i tokaut olsem i gat wanem as na Jehova bai bekim strafe long Bikpela Babilon, na Jehova bai mekim olsem wanem. Jon i kirap nogut long ol tok nau em i harim na ol samting em i lukim: “Wanpela bilong ol dispela 7-pela ensel i holim ol 7-pela dis, em i kam na i tokim mi olsem, ‘Yu kam. Dispela pamukmeri i sindaun antap long ol bikpela wara, em bai i kisim pe nogut bilong en. Mi laik soim yu long wanem kain pe em bai i kisim. Ol king bilong graun ol i bin mekim planti pasin pamuk wantaim dispela meri. Na olgeta man bilong graun ol tu i bin mekim pasin pamuk wantaim em, na ol i kamap longlong, olsem man i spak.’ ”​—⁠KTH 17⁠:​1, 2.

 2. Olsem wanem yumi save “dispela pamukmeri” (a) i no makim Rom bilong bipo? (b) i no makim ol bikpela wok bisnis? (c) em i makim samting bilong lotu?

² Dispela bikpela “pamukmeri”! Bilong wanem ensel i kolim kain nem nogut olsem long dispela meri? Dispela meri em i husat? Sampela man i tok, dispela pamukmeri i makim Rom bilong bipo. Tasol Rom bilong bipo em wanpela gavman. Dispela meri i pamuk wantaim ol king, o gavman, bilong graun, na ol king, o gavman, bilong Rom tu. Na taim em i kisim bagarap, “ol king bilong graun . . . bai i krai sori na i stap bel hevi.” Olsem na dispela pamukmeri i no makim samting bilong politik, o gavman, nogat. (KTH 18⁠:​9, 10) Na em i no makim ol kampani o wok bisnis tu, long wanem, “ol man i save wok bisnis” ol tu “bai i krai sori” taim em i bagarap. (KTH 18⁠:​15, 16) Tasol Baibel i tok, em i “bin wokim ol kain kain posin samting bilong giamanim ol manmeri bilong olgeta kantri.” (KTH 18⁠:23) Olsem na dispela bikpela meri pamuk i makim samting i stap long olgeta hap na i samting bilong lotu.

 3. (a) Olsem wanem na “dispela pamukmeri” i no makim Misin Katolik tasol o olgeta lotu i gat nem Kristen long ol? (b) Wanem sampela bilip bilong Babilon em ol lotu bilong Is i bilip long en na ol lotu i gat nem Kristen tu? (c) Wanpela kadinal bilong lotu Katolik, em John Henry Newman, em i tok wanem long as bilong planti bilip na pasin bilong ol lotu i gat nem Kristen long ol? (Lukim sta i gat liklik rait, i stap long pes 236.)

³ Em i makim wanem lotu? Em i makim Misin Katolik, olsem sampela man i tok? O em i makim olgeta lotu giaman i gat nem Kristen? Nogat. Em i mas makim samting i bikpela moa, long wanem, em i wok long “giamanim ol manmeri bilong olgeta kantri.” “Dispela pamukmeri” i makim olgeta lotu giaman wantaim, ol i stap long olgeta hap bilong graun. Babilon bilong bipo i gat kain kain bilip na pasin, na em i as bilong dispela Bikpela Babilon, em “dispela pamukmeri.” Na ol lotu bilong olgeta hap ol i bihainim ol bilip na pasin bilong dispela Babilon bilong bipo​—⁠ol i tok, man i gat tewel na taim man i dai tewel bilong em i stap yet, na ol i tok tewel bilong man nogut i go long bikpaia na kisim bikpela pen, na ol i bilip long god triwan. Ol lotu bilong hap bilong Is na ol lotu i holim nating nem Kristen, olgeta wantaim i bilip olsem. Lotu giaman i bin kirap 4,000 yia bipo long olpela taun Babilon, na em i kamap bikpela na kisim olgeta hap, olsem na dispela nem Bikpela Babilon i stret tru long ol lotu giaman.a Tasol olsem wanem na ensel i kolim em olsem “dispela pamukmeri”?

 4. (a) Bipo Israel i mekim wanem na i olsem pasin bilong pamuk? (b) Bikpela Babilon i mekim wanem pasin pamuk?

⁴ Kantri Babilon (o Babel, insait bilong en i olsem “Longlong”) i kamap strong long taim bilong Nebukatnesar. Gavman bilong em i hap lotu na hap politik. Taun Babilon i gat planti haus lotu, winim wan tausen, na ol pris i gat bikpela strong. Babilon i pinis longtaim bipo, na nau i no gat kantri o gavman bilong en i stap, tasol lotu bilong en i stap, em Baibel i kolim Bikpela taun Babilon, na em i bihainim pasin bilong olpela Babilon, olsem em i laik bosim ol gavman. Yu ting God i orait long lotu i ken wok wantaim politik? Long hap bilong Olpela Testamen Baibel i tok, lain Israel i olsem ol i mekim pasin pamuk taim ol i bihainim lotu giaman na taim ol i lusim Jehova na ol i mekim kontrak wantaim ol narapela lain nabaut. (Jeremaia 3⁠:​6, 8, 9; Esekiel 16⁠:​28-​30) Na Bikpela Babilon tu i mekim pasin pamuk. Em i bin strong long bosim ol king bilong graun na ol i mas bihainim laik bilong em.​—⁠1 Timoti 4⁠:⁠1.

 5. (a) Ol bikman bilong lotu i mekim wanem bilong kisim biknem? (b) Olsem wanem dispela laik bilong ol long kisim biknem i narapela kain long tok Jisas i bin mekim?

⁵ Long nau ol bikman bilong lotu i laik kisim bikpela namba long gavman, na long sampela kantri ol i holim wok insait long gavman. Long 1988 tupela bikman bilong lotu Talatala i resis long kamap presiden bilong gavman bilong Amerika. Ol bikman bilong Bikpela Babilon i laik tru long ol man i ken litimapim nem bilong ol; planti taim ol nius i kamapim piksa bilong ol bikman bilong lotu i sanap wantaim ol bikman bilong politik, na ol i save pren wantaim. Tasol Jisas i bin sakim olgeta samting bilong politik, na em i no insait liklik long en; na em i tok long ol disaipel bilong em: “Ol i no bilong dispela graun, olsem mi yet mi no bilong dispela graun.”​—⁠Jon 6⁠:15; 17⁠:16; Matyu 4⁠:​8-​10; lukim tu Jems 4⁠:⁠4.

‘Pasin Pamuk’ Bilong Em Long Nau

6, 7. (a) Olsem wanem lain Natsi bilong Hitler i kamap gavman long Jemani? (b) Kontrak em Misin Katolik long Vatiken i mekim wantaim gavman bilong Hitler, olsem wanem dispela i helpim Hitler long taim em i wok strong long kamap nambawan bilong olgeta kantri?

⁶ Dispela bikpela pamukmeri i insait long ol wok gavman, na dispela i as bilong planti bikpela hevi i bin painim ol man. Yumi ken stori long olsem wanem Hitler i bin kamap nambawan bilong Jemani​—⁠sampela man i sem long dispela stori na ol i laik haitim ol pasin nogut i bin kamap long dispela taim. Long Me 1924 ol Natsi, olsem lain bilong Hitler, ol i strong insait long gavman bilong Jemani, tasol long Me 1928 ol i no strong moa. Bikpela hevi bilong mani i bin kamap long 1930 long olgeta hap, na long dispela taim ol Natsi i kamap strong gen, na long Julai 1932 i gat eleksen na planti man i vot long ol Natsi. Bihain liklik wanpela bikman bilong pop, em Franz von Papen, em i kirap long helpim lain Natsi. Ol man i tok, Franz von Papen i laik kamapim nupela Gavman Holi Bilong Rom. Em i bin holim bikpela wok, tasol wok bilong em i no kamap gut, olsem na nau em i tingting long kamap bikpela long rot bilong wok politik bilong ol Natsi. Em i kirapim ol bikman bilong bisnis long givim bel long Hitler na helpim em, na long Janueri 1933 planti ol i mekim olsem. Na Franz von Papen i grisim sampela man na nau Hitler i kamap nambawan bilong Jemani long Janueri 30, 1933, na Franz von Papen yet i helpim bilong Hitler, na Hitler i mekim wok long em long grisim ol Katolik long Jemani long givim bel long gavman Natsi bilong Hitler. Tupela mun bihain Hitler i pinisim palamen, na ol bikman bilong politik i no orait long gavman bilong em, em i kalabusim ol long ol banis kalabus nogut, na nau em i kirap long putim hevi long ol Juda.

⁷ Misin Katolik long Vatiken i tingting long helpim gavman Natsi long Jemani, olsem na long Rom long Julai 20, 1933, Kadinal Pacelli i sainim pepa kontrak bilong pasim tok bilong Misin Katolik wantaim gavman Natsi bilong Jemani. (Bihain Pacelli i kamap Pop Pius Namba 12.) Von Papen i helpim bilong Hitler long sainim dispela pepa kontrak, na long dispela taim Pacelli i givim bikpela namba bilong pop long von Papen (Grand Cross of the Order of Pius).b Wanpela man (Tibor Koeves) i raitim stori long wanpela buk (Satan in Top Hat) na i tok: ‘Dispela Kontrak Hitler i bin mekim wantaim Pop i strongim tru gavman bilong Hitler. Bipo i no gat wanpela lain ausait long Jemani i bin helpim em. Tasol nau Pop bilong Rom yet i helpim em, na Pop i gat bikpela namba tru, winim olgeta man bilong graun.’ I gat wanpela lain politik Katolik long Jemani, tasol kontrak i tok, Misin Katolik long Vatiken i no ken helpim moa dispela lain bambai Hitler i ken kamap bos bilong olgeta samting bilong gavman.c Na kontrak i tok: ‘Taim ol i laik makim ol man bilong holim wok asbisop na bisop na kain wok olsem, orait, wanpela man bilong gavman yet i mas skelim ol pastaim na bai em i ken save, ol dispela man i orait long wok politik bilong gavman o nogat.’ Long pinis bilong yia 1933 (em Pop Pius Namba 11 i bin makim dispela yia olsem Yia Holi) Misin Katolik i mekim planti samting bilong helpim Hitler long daunim ol narapela kantri na bai em i ken kamap nambawan bos bilong graun.

8, 9. (a) Vatiken, na Misin Katolik, na ol pris, ol i mekim wanem long pasin nogut bilong gavman bilong Hitler? (b) Ol bisop Katolik bilong Jemani i tok wanem long taim Namba 2 Pait i bin kirap? (c) Lotu na politik i pren wantaim, na dispela i as bilong wanem ol samting?

⁸ Hitler i bin mekim pasin nogut tru long ol man, na wan wan pris na sister tasol i bin tokaut olsem dispela pasin i no stret, na gavman i bekim nogut long dispela ol pris na sister. Vatiken, na Misin Katolik, na ol pris, ol i no gat tok long dispela pasin nogut bilong Hitler; ol i orait tasol long ol dispela pasin ol Natsi i mekim, na ol i helpim ol Natsi; Vatiken na Misin Katolik na ol pris i ting gavman bilong Hitler i gutpela samting bilong sakim pasin Komyunis na bai i no ken kamap strong na bosim graun. Pop Pius Namba 12 i sindaun gut i stap long Vatiken na em i no mekim wanpela samting long pasim lain bilong Hitler taim ol i wok long bagarapim ol Juda na ol Witnes Bilong Jehova na ol narapela lain​—⁠em i no gat tok long dispela samting. Taim Pop John Paul Namba 2 i bin go long Jemani long Me 1987 em i litimapim nem bilong wanpela pris i no bin orait long pasin bilong Hitler, tasol olsem wanem long ol planti tausen narapela pris bilong Jemani? Ol i mekim wanem long taim Hitler i bin mekim dispela pasin nogut? Ol bisop Katolik bilong Jemani i raitim wanpela pas long Septemba 1939 taim Namba 2 Pait i bin kirap, na dispela i givim save long yumi. Ol i tok: ‘Dispela em i wanpela bikpela taim tru, na mipela laik tokim ol soldia Katolik bilong mipela, ol i mas bihainim tok bilong Hitler na ol i mas redi bilong i dai tu. Na mipela laik tokim ol Katolik, ol i mas beten long God i ken helpim mipela long winim pait.’

⁹ Lotu Katolik i save mekim dispela kain pasin bilong grisim gavman, na ol lotu giaman i bin mekim dispela kain pasin ‘pamuk’ inap 4,000 yia pinis​—⁠ol i grisim na prenim ol gavman na bai ol gavman i ken mekim gut long ol. Dispela pasin bilong lotu na politik i pren wantaim, dispela i as bilong planti pait na birua na hevi bilong ol man. Tasol nau ol man i ken amamas, long wanem, klostu nau bai Jehova i bekim strafe long dispela bikpela pamukmeri. Gutpela tru sapos Jehova i mekim hariap!

Em i Sindaun Antap Long Ol Bikpela Wara

10. Wanem dispela “ol bikpela wara” i save lukautim na helpim Bikpela Babilon? Tasol olsem wanem long dispela “wara” long nau?

¹⁰ I gat planti wara long hap bilong Babilon bilong bipo​—⁠i gat bikpela wara Yufretis, na i gat planti baret wara tu. Ol dispela wara i save pasim ol birua, na i helpim wok bisnis bilong ol Babilon tu na bai ol i gat planti samting bilong skin. Tasol insait long wanpela nait tasol wara i drai pinis. (Jeremaia 50⁠:38; 51⁠:​9, 12, 13) Bikpela Babilon tu i gat “ol bikpela wara” bilong lukautim em na helpim em long kisim planti samting bilong skin. Ol dispela bikpela wara i makim “ol manmeri bilong olgeta lain man na bilong olgeta kain skin na bilong olgeta tok ples na bilong ol bikpela bikpela lain ol i bung i stap,” em planti tausen milion man em Bikpela Babilon i bin bosim ol na em i bin pulim planti mani na ol samting bilong skin long ol. Tasol ol dispela “wara” i wok long drai, na long nau ol man i no helpim tumas ol misin.​—⁠KTH 17⁠:15; skelim wantaim Song 18⁠:4; Aisaia 8⁠:⁠7.

11. (a) Olsem wanem Babilon bilong bipo i mekim ol man i kamap “longlong”? (b) Na olsem wanem Bikpela Babilon i mekim ‘ol man bilong graun ol i kamap longlong’?

¹¹ Baibel i stori long Babilon bilong bipo na i tok: “Babilon i bin stap long han bilong Bikpela olsem wanpela kap gol, na Bikpela i bin mekim ol arapela lain i dring wain long dispela kap. Na ol i spak na nau ol i longlong nabaut.” (Jeremaia 51⁠:⁠7) Jehova i bin mekim wok long olpela Babilon long daunim ol narapela lain i bin bikhet long Jehova. Jehova i givim strafe long ol long rot bilong Babilon, na dispela i pinisim strong bilong ol na ol i olsem man i dring longlong. Na Bikpela Babilon tu i bin daunim na bosim planti lain man, olsem na em i kamap strong long olgeta hap. Tasol em i no rot bilong Jehova long mekim olsem, nogat; em i mekim wok bilong “ol king bilong graun,” na long rot bilong lotu em i olsem pamuk wantaim ol. Ol dispela “king” i amamas long em, long wanem, em i lainim “olgeta man bilong graun” long ol bilip giaman i save daunim ol na pasim ol na bai ol i no gat strong, na ol i olsem ol man i dring longlong na i no hatwok long ol dispela “king bilong graun” i ken bosim ol.

12. (a) Olsem wanem na wanpela hap bilong Bikpela Babilon long Japan i bin kapsaitim bikpela blut long taim bilong Namba 2 Pait? (b) Olsem wanem na dispela “wara” i bin helpim Bikpela Babilon long Japan em i drai? Taim em i drai, wanem samting i bin kamap?

¹² Yumi ken tingim lotu Sinto bilong Japan. Ol soldia Japan i bilip strong long dispela lotu na ol i ting sapos ol i kisim bagarap long pait taim ol i helpim bikman bilong Japan, dispela bai givim biknem long ol, long wanem, dispela bikman em nambawan god bilong lotu Sinto. Long taim bilong Namba 2 Pait inap olsem 1,500,000 soldia bilong Japan ol i dai. Ol i ting i no stret sapos ol i larim birua i win​—⁠ol i mas pait i go inap long ol i dai. Tasol Japan i lus long pait, olsem na bikman hia, em Hirohito, em i mas tokaut olsem em i no wanpela god. Olsem na bihain planti Japan i no givim bel moa long dispela lotu Sinto, em hap bilong Bikpela Babilon. I olsem “wara” bilong en i drai. Tasol sori tumas ol i no bin mekim paslain long Namba 2 Pait, long wanem, ol Japan i bin kilim i dai planti planti man long hap bilong solwara Pasifik na bikpela blut i kapsait! Na taim lotu Sinto i pundaun olsem, dispela i opim rot na planti Japan i tanim bel, na winim 200,000 ol i dediket long Jehova na kisim baptais na ol i kamap wokman bilong Bikpela King Jehova. Bipo planti bilong ol i bilong lotu Sinto o lotu Buda.

Pamukmeri i Sindaun Antap Long Wanpela Wel Animal

13. Taim spirit i bringim Jon i go long graun i no gat man, Jon i lukim wanem samting?

¹³ Dispela tok profet i kamapim wanem tok moa long dispela bikpela pamukmeri na samting nogut bai painim em? Orait, Jon i stori moa long sampela samting moa em i lukim, na em i tok: “Holi Spirit i kamap strong long mi, na [ensel] i karim mi i go long graun i no gat man. Long dispela hap mi lukim wanpela meri i sindaun i stap antap long wanpela retpela wel animal. Dispela wel animal i gat planti nem i pulap long skin bilong en, na olgeta dispela nem i olsem ol kain kain tok bilas na tok nogut long God. Dispela wel animal i gat 7-pela het, na 10-pela kom i kamap long ol dispela het.”​—⁠KTH 17⁠:⁠3.

14. Olsem wanem na i stret Jon i mas i go long graun i no gat man?

¹⁴ Bilong wanem spirit i kisim Jon i go long “graun i no gat man”? Bipo God i bin givim strongpela tok long Babilon bilong bipo na i tok, Babilon i mas bagarap, na God i kolim Babilon olsem “ples drai nating.” (Aisaia 21⁠:​1, 9) Maski Babilon i gat ol wara bilong lukautim em, em bai kamap olsem “ples drai nating.” Olsem na long driman, i stret Jon i mas i go long “graun i no gat man” na bai em i ken lukim Bikpela Babilon i kisim bagarap. Bikpela Babilon tu i mas kamap olsem “ples drai nating.” (KTH 18⁠:​19, 22, 23) Jon i kirap nogut long samting em i lukim​—⁠i no bikpela pamukmeri tasol i stap, nogat! Em i sindaun antap long wanpela traipela wel animal nogut!

15. Wanem ol samting i narapela narapela kain long wel animal bilong Kamapim Tok Hait 13⁠:1 na wel animal bilong Kamapim Tok Hait 17⁠:⁠3?

¹⁵ Dispela wel animal i gat 7-pela het na 10-pela kom. Olsem wanem? Em i dispela wel animal bipo Jon i lukim na i gat 7-pela het na 10-pela kom? (KTH 13⁠:⁠1) Nogat, i no dispela. Tupela i narapela narapela kain. Dispela wel animal nau Jon i lukim, skin bilong en i retpela, na i no gat ol hat king i stap long ol kom bilong en olsem narapela wel animal i gat. Na narapela i gat ol tok bilas long God i stap long ol het tasol bilong en, tasol dispela wel animal hia em i gat dispela kain tok i “pulap long skin bilong en.” Tasol i gat sampela samting bilong tupela i wankain, na ol dispela samting i stap ples klia.

16. Retpela wel animal i makim wanem samting? Wanem wok bilong en?

¹⁶ Dispela nupela retpela wel animal i makim wanem samting? Em i piksa bilong wel animal i kamap long solwara. Narapela wel animal i gat tupela kom olsem bilong sipsip na i makim Inglan wantaim Amerika, em i bin strong long kamapim dispela piksa bilong wel animal. Taim em i kamapim pinis em i givim win long en. (KTH 13⁠:​14, 15) Piksa i kisim win pinis, orait em i kirap na pulim win, na nau Jon i lukim. Em i makim Lig ov Nesen em wel animal i gat tupela kom i bin kamapim long 1920. Presiden Wilson bilong Amerika i tok, dispela Lig ov Nesen bai helpim ol gavman long toktok gut wantaim long olsem wanem ol i ken kamapim stretpela pasin namel long olgeta lain man na pinisim tru olgeta pait. Lig ov Nesen i kirap bek bihain long Namba 2 Pait, tasol nem bilong en long dispela taim em Yunaitet Nesen, na wok bilong en i bilong mekim bel isi na gutpela sindaun i kamap long olgeta hap.

17. (a) Olsem wanem na ol tok bilas i pulap long skin bilong dispela retpela wel animal? (b) Husat i sindaun antap long dispela retpela wel animal? (c) Taim Lig ov Nesen na Yunaitet Nesen i kamap nupela yet na i kam inap nau, olsem wanem lotu bilong Babilon i pas wantaim ol?

¹⁷ Olsem wanem na ol tok bilas i pulap long skin bilong dispela wel animal? I olsem: Ol man i bin kirapim dispela samting bilong mekim wok em Kingdom bilong God i mas mekim, na i no wok bilong dispela wel animal. God i tok, Kingdom bilong em tasol i mas mekim dispela wok. (Daniel 2⁠:44; Matyu 12⁠:​18, 21) Dispela driman nau Jon i lukim i narapela kain tru, long wanem, Bikpela Babilon i sindaun antap long dispela retpela wel animal. Tok profet bilong Kamapim Tok Hait i tok stret olsem lotu bilong Babilon, em ol dispela lotu i gat nem Kristen i insait long en, ol i pas wantaim Lig ov Nesen na Yunaitet Nesen. Long Disemba 18, 1918, wanpela lain bilong ol lotu (National Council of the Churches of Christ) bilong Amerika ol i tok: ‘Dispela Lig ov Nesen i no samting bilong politik tasol, nogat; em i olsem Kingdom bilong God long graun na i kam long rot bilong politik. Sios i ken mekim gut long dispela Lig ov Nesen na bai em i ken i stap strong. Gutnius i as bilong Lig ov Nesen, na wok bilong en long kamapim bel isi long graun na mekim gut long ol man.’

18. Ol pris pasto i mekim wanem na yumi save ol i orait long Lig ov Nesen?

¹⁸ Long Janueri 2, 1919, wanpela nius (San Francisco Chronicle) i gat het-tok long namba wan pes olsem: “Pop i Strong Long Ol Man i Mas Orait Long Lig ov Nesen Em Wilson i Bin Kamapim.” Long Oktoba 16, 1919, inap 14,450 pris pasto bilong ol bikpela lotu ol i bin sainim nem bilong ol long pepa bilong tokim gavman bilong Amerika olsem gavman i mas orait long tok i bin kamap long Paris long bihainim kontrak bilong Lig ov Nesen. Gavman bilong Amerika i no bin orait long en, tasol ol pris pasto i wok strong yet long tokim ol gavman long givim bel long Lig ov Nesen. Wanpela nius bilong Swiselan, em bilong Novemba 15, 1920, em i stori long taim Lig ov Nesen i bin kirap mekim wok na i tok: “Namba wan miting bilong Lig ov Nesen i bin kirap nau moningtaim long 11 klok na olgeta haus lotu long taun Jeniva i paitim belo bilong ol.”

19. Taim retpela wel animal i kirap, dispela lain em Jon i piksa bilong ol, ol i mekim wanem?

¹⁹ Olsem wanem long lain bilong Jehova long dispela taim, em dispela lain Jon i piksa bilong ol? Dispela lain tasol long graun ol i givim bel long wetim Kingdom bilong Krais i bosim graun, olsem na ol i no amamas wantaim ol dispela lotu long litimapim nem bilong retpela wel animal, nogat tru! Long Sande, Septemba 7, 1919, ol i kibung long Sida Poin long Ohaio, na ol i harim wanpela pablik-tok, nem bilong en “Gutpela Samting Ol Man i Gat Hevi Ol i Ken Wetim.” Na long de bihain wanpela nius (Star-Journal) bilong Sandaski i tok, J. F. Rutherford em i givim tok long 7,000 man na em i tok, ‘Bikpela i no ken laikim Lig ov Nesen, long wanem, ol pris pasto bilong lotu Katolik na lotu Talatala i tok ol i lain bilong God, tasol ol i no bihainim moa laik bilong God; ol i givim bel long Lig ov Nesen na ol i tok em i kingdom bilong Krais i kamap long graun long rot bilong wok politik.’

20. Ol lotu i tok, Lig ov Nesen em i ‘Kingdom bilong God i kamap long graun long rot bilong wok politik,’ na olsem wanem dispela tok em i tok bilas?

²⁰ Wok bilong Lig ov Nesen i no kamap gut, na ol lotu inap save, dispela samting ol man i bin kamapim i no wanpela hap bilong Kingdom bilong God long graun. Tasol ol i tok em i Kingdom bilong God, na dispela tok em i tok bilas! Ol man i harim, ol bai ting God i insait long ol wok bilong Lig ov Nesen na dispela wok i bagarap. Tasol ol wok na “pasin bilong [God] i gutpela na stretpela tasol.” Lig ov Nesen em wanpela lain bilong politik ol i save tok resis wantaim na tok pait na kros, na planti ol i haiden; ol i no inap stretim ol hevi. Em wok bilong Kingdom bilong Jehova long heven long mekim dispela wok, na Krais bai bosim. Dispela Kingdom tasol bai kamapim bel isi na kamapim laik bilong God long graun na long heven.​—⁠Lo 32⁠:4; Matyu 6⁠:⁠10.

21. Wanem samting i makim olsem bikpela pamukmeri i helpim na laikim Yunaitet Nesen?

²¹ Na olsem wanem long Yunaitet Nesen, em senis bilong Lig ov Nesen? Taim em i kamap nupela yet, bikpela pamukmeri i sindaun antap long dispela tu, na yumi inap lukim tupela i bung wantaim na dispela meri i traim long stiaim na bosim dispela wel animal. Long Jun 1965, Yunaitet Nesen i winim 20 krismas, na sampela hap lain bilong Lotu Katolik na Isten Otodoks na Talatala na Juda na Hindu na Buda na Muslim​—⁠olsem maus bilong 2 tausen milion manmeri bilong graun​—⁠ol i bung long San Fransisko bilong amamas long Yunaitet Nesen na bilong helpim na litimapim nem bilong en. Long Oktoba 1965 Pop Paul Namba 6 i go lukim Yunaitet Nesen na em i tok, Yunaitet Nesen i winim olgeta narapela oganaisesen intenesenel, na em i tok: ‘Ol lain man bilong graun i tingim Yunaitet Nesen tasol bai kamapim gutaim na bel isi.’ Na long Oktoba 1979 Pop John Paul Namba 2 i go lukim Yunaitet Nesen na em i tok: ‘Mi laik bai Yunaitet Nesen i ken i stap nambawan samting bilong ol gavman i ken bung long en na toktok long olsem wanem ol i ken kamapim bel isi na gutaim na stretpela pasin long graun.’ Tasol pop i no mekim bikpela tok long Krais Jisas o Kingdom bilong God, nogat. Na em i go long Amerika long Septemba 1987 na wanpela nius (The New York Times) i tok: ‘John Paul i mekim bikpela tok long wok bilong Yunaitet Nesen long helpim ol kantri long kamap strong.’

Wanpela Nem i Olsem Tok Bokis

22. (a) Dispela animal em bikpela pamukmeri i sindaun long en em i wanem kain animal? (b) Jon i stori olsem wanem long dispela meri pamuk, em Bikpela Babilon?

²² Aposel Jon bai save, bikpela pamukmeri i sindaun long wanpela wel animal nogut. Tasol pastaim Jon i lukim Bikpela Babilon yet, em i putim kain kain bilas, tasol long ai bilong Jon em i samting nogut tru! “Dispela meri i putim tupela kain retpela klos, na em i gat ol kain kain bilas gol na ol bilas ol i bin wokim long ol naispela ston wantaim ol bis i dia tumas. Em i holim kap gol long han bilong en. Na ol kain kain pasin i sting tru long ai bilong God na ol kain kain doti bilong pasin pamuk bilong dispela meri, em olgeta i pulap long dispela kap. Na long pes bilong dispela meri ol i bin raitim nem bilong en. Dispela nem em i olsem wanpela tok bokis, na nem yet em i olsem, ‘Bikpela taun Babilon, em mama tru bilong olgeta pamukmeri na bilong olgeta pasin nogut tru i stap long graun.’ Dispela meri em i bin kilim i dai ol manmeri bilong God, em ol manmeri i bilip long Jisas na i save autim nem bilong en. Na mi lukim dispela meri em i dringim blut bilong ol na em i kamap longlong olsem man i spak.”​—⁠KTH 17⁠:​4-6a.

23. Wanem longpela nem bilong Bikpela Babilon? Wanem insait bilong dispela nem?

²³ Long Rom long bipo, ol pamukmeri i save raitim nem bilong ol long pes bilong ol, na dispela pamukmeri tu em nem bilong em i stap long pes bilong em. Nem bilong em i longpela, na em i olsem: “Bikpela taun Babilon, em mama tru bilong olgeta pamukmeri na bilong olgeta pasin nogut tru i stap long graun.” Dispela nem “i olsem wanpela tok bokis,” olsem insait bilong en i stap hait. Tasol God i makim pinis taim bilong kamapim long ples klia insait bilong dispela nem. Ensel i givim tok long Jon inap long lain bilong Jehova long nau ol i ken save long insait bilong dispela nem. Yumi save, Bikpela Babilon i olsem olgeta lotu giaman wantaim. “Em mama tru bilong olgeta pamukmeri,” long wanem, olgeta wan wan lotu giaman i olsem pikinini meri bilong em, em ol dispela lotu i gat nem Kristen, na olgeta narapela lotu giaman tu; ol i save bihainim pasin bilong em long mekim pasin pamuk bilong spirit. Na “em i mama tru . . . bilong olgeta pasin nogut tru i stap long graun,” long wanem, em i as bilong pasin bilong lotuim ol god giaman, na marila, posin, sanguma samting, na kolim ol samting i stap hait, na lukluk long sta na bai ol i ken kisim save long sampela samting, na lukluk long han na bai ol i ken kisim save, na kilim man bilong mekim ofa long god giaman, na mekim pasin pamuk long haus lotu, na dring longlong bilong lotuim god giaman, na ol narapela pasin sem.

24. Olsem wanem i stret Jon i tok, Bikpela Babilon “i putim tupela kain retpela klos, na em i gat ol kain kain bilas gol na ol bilas ol i bin wokim long ol naispela ston wantaim ol bis i dia tumas”?

²⁴ “Dispela meri i putim tupela kain retpela klos,” em kala bilong klos bilong ol king, “na em i gat ol kain kain bilas gol na ol bilas ol i bin wokim long ol naispela ston wantaim ol bis i dia tumas.” Em i stret! Tingim ol bikpela bikpela haus lotu, na ol piksa i dia tumas, na ol imis ol i wokim long gol samting na ol i bilasim long ol samting i gat bikpela pe moa, na ol kain kain narapela samting bilong lotu. Na ol lotu i gat planti graun na bisnis na bikpela mani. Long ples Vatiken em pop i sindaun long en, i gat planti samting i dia tumas, na ol lotu bilong Amerika i save mekim tok long televisen ol i bungim bikpela mani na ol i gat planti samting bilong skin. Na ol haus lotu long hap bilong Is i olsem. Bikpela Babilon i bin bungim planti samting bilong graun na bikpela mani tu.

25. (a) Ol samting nogut i pulap long kap, ol dispela samting i makim wanem samting? (b) Pamukmeri i dring longlong olsem wanem?

²⁵ Nau lukim samting i stap long han bilong dispela bikpela pamukmeri​—⁠em wanpela kap gol, “na ol kain kain pasin i sting tru long ai bilong God na ol kain kain doti bilong pasin pamuk bilong dispela meri, em olgeta i pulap long dispela kap.” Ating taim Jon i lukim, em i kirap nogut. Dispela kap em i gat “strongpela wain” na “pasin pamuk” i pulap long en “na olgeta man bilong graun” i bin dring long en “na ol i kamap longlong.” (KTH 14⁠:8; 17⁠:⁠4) Skin bilong kap i gutpela, tasol ol samting insait long en i samting nogut nogut. (Lukim Matyu 23⁠:​25, 26.) Ol samting nogut nogut i pulap long kap em ol pasin nogut na tok giaman bilong bikpela pamukmeri, na em i bin mekim wok long ol dispela samting long grisim na giamanim ol lain man na bai ol i daun long em na em i bosim ol. Na Jon i lukim narapela samting i nogut tru, em dispela pamukmeri yet em i dring longlong; em i bin dringim blut bilong ol wokman bilong God. Na Baibel i tok moa olsem, em “i gat asua bilong kilim i dai ol profet na ol manmeri bilong [God]. Na olgeta man bilong graun ol birua i bin kilim ol i dai, asua bilong dispela tu em i stap long Babilon tasol.” (KTH 18⁠:24) Em i gat bikpela asua tru long blut!

26. Olsem wanem yumi save Bikpela Babilon i gat asua long blut?

²⁶ Inap planti handet yia ol lotu giaman i bin kilim i dai planti manmeri tru. Bipo long Japan ol haus lotu long Kioto i kamap olsem ples pait, na ol pris i beten long “nem holi bilong Buda” long helpim ol long winim pait, na ol i pait pait i go inap long blut i pulap long ol rot olsem baret wara. Na long nau ol pris pasto bilong ol lotu i gat nem Kristen ol i bin go wantaim ol ami bilong ol kantri, na narapela ami i bin kilim i dai narapela ami, na planti man i dai, winim wan handet milion. Long Oktoba 1987, wanpela presiden bilong Amerika long bipo, em Nixon, i bin tok: ‘Long dispela taim bilong yumi em planti man i bin dai long pait, winim olgeta pait i bin kamap bipo.’ God i skelim ol lotu pinis, ol i gat bikpela rong long kilim ol man i dai. Jehova “i no laikim tru . . . pasin bilong kilim nating ol arapela man.” (Sindaun 6⁠:​16, 17) Bipo Jon i harim maus bilong ol man i stap aninit long alta ol “i singaut strong olsem, ‘Bikpela King bilong olgeta samting, yu save mekim gutpela na stretpela pasin oltaim. Yu stap holi, na pasin bilong yu em i tru olgeta. Hamas taim bai mipela i wet, na bai yu mekim kot long ol manmeri i stap long graun, na yu bekim blut bilong mipela long ol?’ ” (KTH 6⁠:10) Bihain God bai kirap mekim ol samting bilong bekim dispela askim, na long dispela taim Bikpela Babilon, em mama bilong ol pamukmeri na bilong ol pasin nogut bilong graun, em bai kisim nogut.

[Ol Futnot]

Tasol ol Kristen i no mekim ol dispela pasin haiden i kamap holi, nogat. Ol i bihainim tok bilong Jehova, em i Nambawan Strongpela God, em i tok: “Yupela i mas lusim ol, na . . . yupela i mas lukaut gut, nogut yupela i pas long ol samting i no klin long ai bilong God.”​—⁠2 Korin 6⁠:​14-​18.

[Blok long pes 237]

Churchill i Kamapim Long Ples Klia ‘Pasin Pamuk’ Bilong Dispela Meri

Long buk (The Gathering Storm, 1948), Winston Churchill i tok, Hitler i makim Franz von Papen bilong kamap minista bilong gavman bilong Jemani long i stap long Viena na grisim ol bikman bilong Ostria na bai ol i ken daun long Hitler. Churchill i tok, minista bilong gavman bilong Amerika long Viena em i bin tok, von Papen em ‘i no sem liklik taim em i tokim mi olsem em bai mekim wok long strong bilong em olsem strongpela Katolik, na grisim ol bikman bilong Ostria, olsem Kadinal Innitzer.’

Taim Hitler i daunim pinis Ostria na ol soldia bilong em i go long Viena, wanpela bikman bilong Misin Katolik, em Kadinal Innitzer i tokim olgeta lotu long Ostria long ol i mas sanapim plak i gat mak bilong Hitler, na paitim belo bilong haus lotu, na beten askim God long blesim Hitler long betde bilong em.

[Blok/Piksa long pes 238]

‘BETEN BILONG HELPIM PAIT’ BILONG JEMANI

Em het-tok bilong wanpela stori i bin kamap long namba wan edisen bilong nius The New York Times bilong Disemba 7, 1941, olsem:

“Ol Bisop Katolik Long Fulda i Beten Bambai Ol Soldia i Kisim Blesing na Winim Pait . . . Kibung Bilong Ol Bisop Katolik Bilong Jemani long Fulda i pasim tok long kamapim wanpela ‘beten bilong helpim pait,’ na ol i mas kaunim dispela beten taim ol i kirap long mekim lotu na taim ol i lotu pinis. Dispela beten i bilong singaut long God i ken blesim ol ami bilong Jemani bambai ol i ken winim pait, na God i ken lukautim olgeta soldia na ol i no ken bagarap o kisim sik. Na ol Bisop i tokim ol pris Katolik, wanpela taim long olgeta mun ol i mas mekim wanpela tok long haus lotu long Sande bilong tingim ol soldia bilong Jemani ol i stap ‘long graun na long solwara na long balus.’ ”

Bihain ol i rausim dispela stori long ol narapela edisen bilong dispela nius. Disemba 7, 1941, em dispela de Japan, em helpim bilong Jemani, i kirap tromoi bom long ol sip bilong pait bilong Amerika long Pel Haba.

[Blok long pes 244]

“Kain Kain Tok Bilas”

Wel animal i gat tupela kom, taim em i kamapim Lig ov Nesen bihain long Namba Wan Pait, kwiktaim ol lotu i givim biknem long en, olsem na ‘ol kain tok bilas i pulap long skin bilong’ dispela oganaisesen.

‘Ol lotu Kristen i ken mekim gut long Lig ov Nesen bambai em i gat strong na em i no ken i stap olsem wanpela tok ol i bin raitim long pepa; em i mas kamap samting bilong kingdom bilong God.’​—⁠The Christian Century, Amerika, Jun 19, 1919, pes 15.

‘Lig ov Nesen bai helpim ol kantri long i stap wanbel na bai ol i ken tingim Kingdom bilong God i samting bilong mekim gut long ol. Taim olgeta Kristen i beten na i tok, “Kingdom bilong yu i mas i kam,” ol i beten long Lig ov Nesen tasol i mas i kam.’​—⁠The Christian Century, Amerika, Septemba 25, 1919, pes 7.

‘Blut bilong Krais i olsem simen bilong strongim Lig ov Nesen.’​—⁠Dr. Frank Crane, pasto Talatala, Amerika.

‘Kaunsil Bilong Ol Sios Kongrigesenel i orait long Kontrak Bilong Lig ov Nesen, em dispela wanpela samting tasol bilong politik em Spirit bilong Jisas Krais i ken mekim wok bilong en long helpim ol lain man.’​—⁠The Congregationalist and Advance, Amerika, Novemba 6, 1919, pes 642.

‘Kibung i tok, olgeta bilong lotu Metodis i mas helpim na litimapim ol gutpela samting bilong Lig ov Nesen, em i samting bilong Papa God na ol pikinini bilong em long graun.’​—⁠Lotu Weslian Metodis long Inglan.

‘Sapos yumi tingim ol samting Lig ov Nesen i laik mekim na ol samting em inap mekim na ol samting em i pasim tok long mekim, bai yumi save, ol dispela samting i wankain olsem ol tok bilong Jisas Krais, em olsem: Kingdom bilong God na stretpela pasin bilong em.’​—⁠Asbisop bilong Kantaberi i tok olsem long taim ol i kirapim kibung bilong Lig ov Nesen long Jeniva long Disemba 3, 1922.

‘Asosiesen Bilong Lig ov Nesen long dispela kantri i gat wankain strong holi olsem bilong ol narapela oganaisesen i save helpim ol man, long wanem, Lig ov Nesen long nau i winim olgeta narapela samting bilong King Krais long kamapim bel isi long ol lain man.’​—⁠Dr. Garvie, pasto bilong lotu Kongrigesenel long Inglan.

[Mep long pes 236]

(Bilong save ol dispela rait i stap we long pes, lukim buk o magasin)

Babilon i as bilong ol bilip giaman bilong ol man bilong olgeta hap

Babilon

Ol god triwan

Man i gat tewel

Wok bilong ol spirit nogut ​—⁠toktok wantaim “man i dai pinis”

Lotu long rot bilong ol piksa

Wokim marila samting bilong mekim gut bel bilong ol spirit nogut

Lotu i stap olsem gavman

[Piksa long pes 239]

Babilon bilong bipo i sindaun antap long planti wara

[Piksa long pes 239]

Long nau bikpela pamukmeri tu i sindaun antap long “ol bikpela wara”

[Piksa long pes 241]

Bikpela Babilon i sindaun antap long wel animal nogut

[Ol Piksa long pes 242]

Pamukmeri i mekim pasin pamuk wantaim ol king bilong graun long ol samting bilong lotu

[Ol Piksa long pes 245]

‘Meri i dringim blut bilong ol manmeri bilong God na em i kamap longlong’