Mekim Wok Wantaim Wasman
“Bikpela, mi bin sanap long ples bilong was long ol birua na mi bin was gut long san na long nait.”—AISAIA 21:8.
1. Jehova yet i stap olsem witnes bilong wanem ol gutpela tok promis?
JEHOVA em i Bikpela Man bilong kamapim laik bilong em. Dispela ensel em i bin bikhet na kamap Satan, em i no inap mekim wanpela samting bilong pasim Jehova long kamapim laik bilong em long mekim nem bilong Em yet i stap holi na kamapim wanpela gutpela Kingdom tru bilong bosim graun i stap olsem paradais. (Matyu 6:9, 10) Taim dispela Kingdom i bosim graun, God bai mekim gut tru long ol man. Em “bai i pinisim dai tru . . . God, Bikpela bai i pinisim krai bilong ol na mekim drai wara bilong ai bilong olgeta manmeri.” Ol manmeri bai i stap wanbel na amamas, na ol bai stap bel isi na i gat gutpela sindaun i go inap oltaim oltaim. (Aisaia 25:8; 65:17-25) Jehova yet i stap olsem witnes bilong ol dispela gutpela tok promis!
2. Jehova i bin kamapim wanem ol witnes long graun?
2 Tasol Man bilong wokim yumi em i gat sampela witnes bilong em long graun tu. Paslain long taim bilong ol Kristen, kirap long Abel yet, i gat bikpela lain manmeri i stap olsem witnes, em “ol i sanap na raunim yumi i stap olsem bikpela klaut,” na ol i bin strongim bel na ran strong long dispela resis i gat hatwok tru long ran long en, na i gat planti hevi i bin painim ol long dispela resis. Ol i stap olsem gutpela piksa tru na dispela i strongim bel bilong ol Kristen bilong nau em ol i stap gut long God. Krais Jisas em i nambawan gutpela piksa bilong man i stap olsem witnes na i gat strongpela bel. (Hibru 11:1–12:2) Yumi ken tingim laspela bikpela tokaut em i bin mekim taim em i sanap long ai bilong Pontius Pailat. Em i tokaut olsem: “Mama i karim mi na mi kam long dispela graun bilong mekim wanpela wok tasol, em bilong autim tok tru, bai olgeta manmeri i ken harim.” (Jon 18:37) Kirap long yia 33 C.E. i kam inap long dispela yia 2000 C.E., ol Kristen i save wok strong ol i bihainim pasin bilong Jisas na ol i wok yet long autim tok witnes, na ol i strongim bel na tokaut long “ol strongpela wok bilong God.”—Aposel 2:11.
Ol i Bruk Bruk Long Ol Lotu Bilong Babilon
3. Olsem wanem Satan i bin biruaim wok bilong autim tok witnes long Jehova na laik bilong em?
3 Insait long planti tausen yia, dispela bikpela Birua, em Satan, em i laik mekim olsem tokaut bilong ol witnes bilong God i no stret. “Dispela snek . . . bilong bipo yet,” em “papa tru bilong pasin bilong tok giaman,” em i wok long “giamanim olgeta manmeri bilong graun.” Em i strong tru long mekim pait long ol manmeri “i save bihainim ol lo bilong God,” na em i wok strong moa long mekim nau long dispela taim bilong las de.—Jon 8:44; KTH 12:9, 17.
4. Bikpela Babilon i bin kamap olsem wanem?
4 Inap olsem 4,000 yia i go pinis, bihain long taim bilong Bikpela Tait Wara i bin kamap long taim bilong Noa, Satan i givim strong long Nimrot, em i “bikhet long Jehova na em i strongpela man bilong raunim ol animal.” (Stat 10:9, 10, NW ) Nambawan bikpela taun bilong Nimrot, em Babilon (Babel), em i kamap olsem as bilong lotu i gat ol pasin bilong lotuim ol spirit nogut. Taim Jehova i paulim tok ples bilong ol man bilong wokim traipela haus taua bilong Babel, ol man i bruk na ol i go nabaut long olgeta hap bilong graun, na ol i kisim lotu giaman bilong ol i go wantaim ol. Olsem na Babilon i kamap olsem as ples bilong olgeta lotu giaman bilong graun, nem bilong ol long Buk Kamapim Tok Hait em Bikpela Taun Babilon. Dispela buk i tok profet long bagarap bai painim ol dispela lotu i bin kamap long bipo yet.—KTH 17:5; 18:21.
Wanpela Lain i Stap Olsem Witnes
5. Jehova i bin bungim wanem lain bilong kamap witnes bilong em? Tasol bilong wanem em i larim dispela lain i go kalabus long narapela kantri?
5 Inap olsem 500 yia bihain long taim bilong Nimrot, Jehova i bungim ol tumbuna pikinini bilong bilipman Abraham na ol i kamap lain Israel, bambai ol i ken mekim wok olsem witnes bilong Em long graun. (Aisaia 43:10, 12) Planti man bilong dispela lain ol i bin mekim wok bilong Jehova na ol i stap gut long em. Tasol bihain ol bilip giaman bilong ol lain i stap klostu long ol Israel i pulim ol, na dispela lain bilong Jehova em i bin mekim kontrak wantaim ol, ol i lusim em na ol i kirap lotuim ol god giaman. Olsem na long yia 607 B.C.E. ol ami bilong Babilon, em King Nebukatnesar i bosim, ol i kam bagarapim Jerusalem wantaim tempel bilong en na ol i kisim planti Juda i go kalabus long Babilon.
6. Wasman bilong Jehova i bin autim wanem gutpela tok? Truim bilong dispela tok profet i bin kamap long wanem taim?
6 Em nau, lotu giaman i win! Tasol Babilon i no stap olsem nambawan strongpela gavman inap longtaim—em bilong sotpela taim tasol. Inap olsem 200 yia paslain long dispela taim, Jehova i tok: “Yu makim wanpela wasman na em bai i stap was. Na em i mas tokim yu long wanem samting em i lukim.” Orait, i gat wanem tok dispela wasman i tokaut long en? Em i tokaut olsem: “Babilon i bagarap pinis. Em i bagarap pinis. Na olgeta piksa bilong ol giaman god bilong ol i pundaun long graun na i bruk olgeta.” (Aisaia 21:6, 9) Em nau, long yia 539 B.C.E., ol samting i kamap tru olsem dispela tok profet i bin kolim. Strongpela taun Babilon i bagarap, na i no longtaim na lain bilong God ol inap i go bek long ples bilong ol yet.
7. (a) Taim Jehova i stretim ol Juda, dispela i skulim ol long wanem samting? (b) Taim ol Juda i kam bek na sindaun gen long ples bilong ol, wanem ol samting i pulim ol? Olsem na wanem samting i kamap?
7 Dispela hevi i bin painim ol Juda em i skulim ol na ol i lusim pasin bilong lotuim ol god giaman na lotu bilong ol spirit nogut. Tasol sampela yia bihain i gat ol narapela samting i pulim ol. Ol tingting na tok bilong ol lain Grik i pulim sampela. Na sampela ol i putim tok bilong ol man i go pas long Tok Bilong God. Na pasin bilong litimapim kantri i pulim sampela. (Mak 7:13; Aposel 5:37) Olsem na taim mama i karim Jisas, lain Israel i lusim pinis lotu i tru olsem ol i bin mekim long pastaim. Tru, i gat sampela Juda ol i harim gutnius Jisas i autim na ol i bilip long en, tasol lain Israel i sakim em, olsem na God i rausim ol. (Jon 1:9-12; Aposel 2:36) Ol Israel i no stap moa olsem witnes bilong God, na long yia 70 C.E. Jerusalem wantaim tempel bilong en i bagarap gen—long dispela taim ol ami bilong Rom i bagarapim.—Matyu 21:43.
8. Husat i kamap witnes bilong Jehova? Olsem wanem yumi ken tok, Pol i bin givim tok lukaut long dispela witnes long taim stret?
8 Tasol long dispela taim wanpela lain Kristen, em “lain Israel tru bilong God,” i kamap pinis, na nau dispela lain i stap olsem witnes bilong God bilong autim tok bilong em long ol narapela lain. (Galesia 6:16) Kwiktaim tru Satan i kirap painim rot bilong bagarapim dispela nupela lain bilong spirit. Long yia 100 samting, pasin bilong brukim lain i kamap pinis insait long ol kongrigesen. (KTH 2:6, 14, 20) Long taim stret Pol i bin givim tok lukaut long ol Kristen, olsem: “Yupela i mas lukaut gut, nogut wanpela man i autim olkain giaman save na toktok nating long yupela na em i mekim yupela i bihainim tingting bilong en. Ol dispela kain man i save kisim tingting bilong ol tumbuna na bilong ol spirit i save bosim ol samting bilong skai na graun. Ol i no save bihainim tingting bilong Krais.”—Kolosi 2:8.
9. Olsem Pol i bin tokaut long en, wanem ol samting i kamap na bihain wanpela lain i kamap em ol i holim nating nem Kristen?
9 Bihain, ol tingting na tok bilong ol saveman Grik, na ol bilip bilong Babilon, na bihain moa ol tok bilong evolusen, na pasin bilong ol saveman long skelim skelim ol tok bilong Baibel, dispela i bagarapim lotu bilong planti manmeri em ol i tok ol i Kristen. Dispela samting i kamap stret olsem Pol i bin tok profet long en, em i tok: “Mi save, taim mi lusim yupela na mi go pinis, ol weldok nogut tru bai i kam namel long yupela, na ol bai i bagarapim ol sipsip. Na sampela man bilong yupela yet bai i kirap na mekim tok giaman nabaut, bilong pulim ol manmeri bilong God i go bihainim ol.” (Aposel 20:29, 30) Em nau, dispela pasin bilong bikhet na lusim bilip i mekim na wanpela lain i kamap em ol i holim nating nem Kristen.
10. Wanem ol samting i kamap na i kamapim klia olsem i no olgeta man i bihainim ol bilip giaman bilong ol lain i holim nating nem Kristen?
10 Ol man i givim bel tru long lotu i tru, ol i mas “wok strong long lukautim bilip bilong [ol] na long sakim tok bilong ol birua bilong gutnius.” (Jut 3) Olsem wanem? Dispela wok bilong i stap witnes bilong lotu i tru na witnes bilong Jehova em bai pinis long graun? Nogat. Taim bilong bagarapim bikhetman Satan wantaim olgeta wok bilong em, dispela taim i wok long kam klostu, na insait long dispela taim wanpela samting i bin kamap ples klia, olsem: I no olgeta man i bihainim bilip giaman bilong ol lain i holim nating nem Kristen. Klostu long yia 1900, long Pitsbek, Pensilvenia, long Amerika, i gat wanpela liklik lain sumatin bilong Baibel em ol i gat gutpela bel, na dispela lain i kamap olsem as bilong lain witnes bilong God long taim bilong yumi. Ol dispela Kristen i tokaut long ol man long ol tok bilong Baibel i makim olsem pinis bilong dispela pasin bilong graun i klostu. Na stret olsem Baibel i tok profet long en, dispela taim bilong “pinis” i kirap long yia 1914, na long dispela taim namba wan pait bilong olgeta hap i kirap. (Matyu 24:3, 7) Ol samting i kamapim klia olsem ol i bin rausim Satan wantaim ol spirit nogut bilong em long heven bihain long dispela yia. Planti hevi moa yet i kamap long taim bilong yumi na dispela i kamapim klia tru olsem Satan i wok i stap, na i kamapim klia truim bilong dispela mak Jisas i bin kolim, i makim taim em bai kam i stap olsem king long Kingdom bilong heven.—Matyu, sapta 24 na 25; Mak, sapta 13; Luk, sapta 21; KTH 12:10, 12.
11. Satan i wok strong long mekim wanem? Tasol olsem wanem dispela wok bilong em i lus nating?
11 Long Jun 1918, Satan i wok strong tru long pinisim ol dispela sumatin bilong Baibel, em long dispela taim ol i wok long autim tok long sampela kantri moa. Na em i wok long painim rot bilong bagarapim Sosaiti bilong ol i rejista pinis long gavman, em Sosaiti Was Taua. Ol man i lukautim wok bilong Sosaiti ol i kalabus, na ol man i sutim tok long ol long kot olsem ol i laik daunim gavman—em wankain tok olsem ol i bin sutim long Jisas long bipo. (Luk 23:2) Tasol long 1919, ol dispela man i lusim kalabus na ol inap kirap gen long mekim wok bilong God. Bihain kot i tokaut olsem ol i no bin mekim rong.
Wanpela “Wasman” i Was i Stap
12. Long nau husat i stap olsem lain wasman bilong Jehova? Ol i holim wanem kain tingting?
12 Olsem na taim dispela “taim bilong las de” i kirap, Jehova i gat wanpela wasman gen i stap na i tokaut long ol man long ol samting i wok long kamap bilong truim ol laik bilong Jehova. (Daniel 12:4; 2 Timoti 3:1) I kam inap long nau, dispela lain wasman—em ol Kristen God i bin makim, olsem lain Israel bilong God—ol i bin mekim wok i stret wantaim ol tok profet em Aisaia i bin mekim long dispela wasman. Aisaia i stori long em olsem: “Em i . . . lukluk gut tru na putim yau gut long harim wanem samting bai i kamap. Orait na dispela wasman i singaut strong olsem laion na i tok olsem, ‘Bikpela, mi bin sanap long ples bilong was long ol birua na mi bin was gut long san na long nait.’ ” (Aisaia 21:7, 8) Man! Dispela wasman i tingim tru wok bilong em!
13. (a) Wasman bilong Jehova i autim wanem tok? (b) Olsem wanem yumi ken tok, Bikpela Babilon i pundaun pinis?
13 Dispela wasman i lukim wanem samting? Wasman bilong Jehova, em lain witnes bilong em, i tokaut gen olsem: “Babilon i bagarap pinis. Em i bagarap pinis. Na olgeta piksa bilong ol giaman god bilong ol i pundaun long graun na i bruk olgeta.” (Aisaia 21:9) Tasol long dispela taim, bihain long Namba Wan Pait, em Bikpela Babilon, olsem olgeta lotu giaman bilong graun, i pundaun na i no gat bikpela strong moa long bosim ol man. (Jeremaia 50:1-3; KTH 14:8) Yumi no kirap nogut long dispela samting! Dispela Namba Wan Pait i bin kirap insait long ol kantri i holim nating nem Kristen, na ol pris pasto bilong ol kantri i stap birua birua ol i mekim ol tok bilong kirapim ol yangpela strongpela man long go insait long pait, na long dispela rot ol dispela pris pasto i helpim pait long go bikpela moa. Em samting nogut tru ol i mekim! Long 1919, Bikpela Babilon i no inap pasim ol Sumatin Bilong Baibel—em nem bilong ol Witnes Bilong Jehova long bipo—long lusim kalabus bilong ol na kirapim wanpela wok bilong autim tok long olgeta hap bilong graun, em wok ol i mekim yet long nau. (Matyu 24:14) Em nau, dispela i makim olsem Bikpela Babilon i pundaun pinis, olsem long taim ol Israel i bin lusim kalabus inap 500 yia samting paslain long Krais, na dispela i makim olsem Babilon bilong bipo i pundaun pinis.
14. Lain wasman bilong Jehova i bin mekim bikpela wok long wanem nius? Olsem wanem Jehova i bin mekim gut long wok ol i mekim long dispela nius?
14 Long olgeta taim dispela lain wasman i wok strong tru long mekim wok bilong en na i gat strongpela laik long mekim ol samting i stret. Long Julai 1879, ol Sumatin Bilong Baibel i kirap wokim dispela nius, em ol i bin kolim olsem Zion’s Watch Tower and Herald of Christ’s Presence. Kirap long 1879 i kam inap long Disemba 15, 1938, ol i bin raitim wanpela tok long skin bilong dispela nius olsem “ ‘Wasman, Wanem Taim Bai Nait i Pinis?’—Aisaia 21:11.”a Inap 120 yia Wastaua i was i stap na lukluk long ol samting i wok long kamap long graun na olsem wanem ol dispela samting i truim ol tok profet. (2 Timoti 3:1-5, 13) Dispela lain wasman bilong God na ol poroman bilong ol, em “ol arapela sipsip,” ol i bin mekim wok long dispela nius long tokaut strong long ol manmeri olsem liklik taim nau na long rot bilong Kingdom em Krais i bosim, Jehova bai kamapim long ples klia olsem i stret em i stap Nambawan Bos bilong heven na graun. (Jon 10:16) Olsem wanem? Jehova i bin mekim gut long dispela nius Wastaua? Tingim dispela: Long namba wan taim ol i wokim dispela nius long 1879, ol i bin wokim 6,000. Tasol long nau ol i save wokim 22,000,000 Wastaua long 132 tok ples na ol i save tilim long olgeta hap bilong graun—inap 121 bilong ol dispela nius ol i save wokim long wankain taim. I no gat narapela nius bilong lotu ol i save tilim planti tru olsem nius Wastaua, olsem na i stret dispela nius i litimapim nem bilong trupela God, em Jehova!
Isi Isi Ol i Stretim Ol Bilip Bilong Ol
15. Kirap long ol yia paslain long 1914, lain bilong Jehova i lusim wanem ol bilip giaman?
15 Insait long 40 yia paslain long taim Krais i kirap mekim wok king long heven long 1914, ol Sumatin Bilong Baibel i bin lusim planti bilip bilong ol lotu i gat nem Kristen, em ol bilip i no stap long Baibel, olsem baptaisim ol liklik pikinini, ol man i gat wanpela tewel i no save dai, klinpaia, bikpaia, na God Triwan. Tasol i gat sampela bilip kranki ol i no lusim hariap. Olsem: Long 1920 samting, planti Sumatin Bilong Baibel i save pasim wanpela bilas olsem pin long klos i gat mak bilong kruse na hat bilong king, na ol i save mekim krismas na ol narapela bikpela de bilong ol haiden. Tasol ol i mas rausim olgeta samting bilong lotuim ol god giaman na bai lotu bilong ol i stret olgeta. Tok Bilong God, em Baibel Holi, em tasol i mas i stap olsem as bilong bilip Kristen na i stap bilong ol Kristen. (Aisaia 8:19, 20; Rom 15:4) I gat rong long skruim sampela tok i go long Tok Bilong God o long tekewe sampela tok bilong en.—Lo 4:2; KTH 22:18, 19.
16, 17. (a) Inap planti yia lain wasman i holim wanem tingting kranki? (b) Wanem insait tru bilong dispela tok long “alta” na “pos ston” long “Isip”?
16 Yumi ken stori long wanpela samting i kamapim klia olsem dispela lo em i bikpela samting. Long 1886 C. T. Russell i wokim wanpela buk, bihain ol i kolim The Divine Plan of the Ages, na dispela buk i gat wanpela lista long en i bungim hamas krismas ol man i bin i stap long graun wantaim traipela haus matmat bilong wanpela king bilong Isip. Dispela haus matmat em Fero Kufu i bin wokim bilong ol man i ken tingim em, ol i ting em i dispela bikpela pos ston Aisaia 19:19, 20 i stori long en, em i tok: “Long dispela taim bai i gat wanpela alta bilong Bikpela i stap long graun bilong Isip. Na tu bai i gat wanpela pos ston ol i makim bilong Bikpela stret, em i stap long mak bilong kantri Isip. Dispela alta na pos ston bai i stap long Isip olsem mak bilong ol manmeri i ken lukim na tingim Bikpela I Gat Olgeta Strong.” Tasol olsem wanem dispela samting olsem haus matmat em i samting bilong Baibel? Ol i bin ting, longpela bilong sampela rot insait long dispela traipela haus ston em i makim taim dispela “bikpela hevi tru” bilong Matyu 24:21 bai kirap, olsem ol i bin tingim long dispela taim bipo. Sampela Sumatin Bilong Baibel ol i givim bel tru long metaim sampela samting bilong dispela haus ston bilong kisim save long wanem de ol bai go antap long heven, na kain samting olsem!
17 Dispela traipela haus matmat i gat biknem long ai bilong ol inap planti yia, tasol Wastaua bilong Novemba 15 na Disemba 1, 1928, i kamapim klia olsem ol bikpela ston ol king haiden bilong Isip i bin sanapim na i gat ol mak bilong ol lain i save lukluk long ol sta bilong kisim save long ol samting bai kamap bihain, Jehova i no gat wok long ol dispela samting bilong strongim ol tok em i mekim long Baibel. Ol i kisim save olsem tok profet bilong Aisaia i gat truim bilong en long ol samting bilong spirit. Olsem long Kamapim Tok Hait 11:8, “Isip” i makim dispela graun bilong Satan. Dispela “alta bilong Bikpela” i kirapim yumi long tingim ol gutpela ofa ol Kristen God i bin makim ol i givim long Em taim ol i stap long dispela graun olsem man bilong i stap liklik taim tasol long en. (Rom 12:1; Hibru 13:15, 16) Dispela ‘pos ston i stap long mak bilong kantri Isip’ em i makim lain Kristen God i bin makim long spirit holi, em i “olsem strongpela pos i karim tok tru,” na em i sanap olsem witnes long “Isip,” em dispela graun liklik taim ol bai lusim.—1 Timoti 3:15.
18. (a) Olsem wanem Jehova i wok long kamapim klia ol tok bilong helpim ol sumatin bilong Baibel ol i gat gutpela bel? (b) Sapos wanpela Kristen i hatwok long kisim gut nupela save bilong wanpela tok bilong Baibel, em i ken bihainim wanem gutpela tingting?
18 Isi isi Jehova i wok yet long kamapim klia tok i tru, na em i kamapim klia tu ol tok profet bilong em. (Sindaun 4:18) Nau long dispela taim, Sosaiti i bin kirapim yumi long skelim gen sampela tok bilong Baibel long nupela save ol i kisim long en—olsem dispela lain manmeri i no i dai yet na pinis bai kamap, na tok piksa bilong ol sipsip na meme, na dispela samting nogut tru na wanem taim em bai sanap long wanpela ples holi, na nupela kontrak, na Jisas i stap long maunten na skin bilong em i kamap narapela kain, na piksa olsem driman bilong tempel em Buk Esekiel i kamapim. Tru, sampela taim i hatwok long kisim gut ol nupela save yumi bin kisim long ol dispela samting, tasol bihain yumi klia gut long as na ol i kamapim ol dispela tok. Sapos wanpela Kristen i no kisim gut sampela nupela tok i kamapim insait bilong wanpela ves bilong Baibel, i gutpela sapos em i mekim pasin daun na mekim wankain tok olsem profet Maika, em i tok: “Mi wetim [God] i kam helpim mi.”—Maika 7:7.
19 Yumi ken tingim gen dispela wasman, em i bin “singaut strong olsem laion na i tok olsem: ‘Bikpela, mi bin sanap long ples bilong was long ol birua na mi bin was gut long san na long nait.’ ” (Aisaia 21:8) Liklik hap lain God i bin makim na ol i stap yet long graun, ol i gat strongpela bel olsem laion na ol i bin kamapim rong bilong ol lotu giaman na soim ol man long rot bilong kamap fri. (KTH 18:2-5) Ol i mekim wok olsem “wokboi i gat gutpela tingting,” na ol i bin wokim ol Baibel, na nius, na ol buk samting long planti planti tok ples na bai ol man inap kisim dispela ‘kaikai long taim bikman i makim.’ (Matyu 24:45) Ol i bin i go pas long bungim dispela bikpela lain olsem “planti manmeri tru . . . ol i bilong olgeta lain man na bilong olgeta kantri na bilong olgeta kain skin na bilong olgeta tok ples.” Blut bilong Jisas bilong baim bek ol man, em i mekim dispela lain tu i kamap klin, na ol i kamapim pasin olsem laion i gat strongpela bel na ol i mekim wok bilong God “long san na long nait.” (KTH 7:9, 14, 15) Orait dispela liklik hap lain bilong ol Witnes Bilong Jehova em God i bin makim na ol i stap yet long graun, na bikpela lain poroman bilong ol, ol i bin mekim wanem ol gutpela wok long yia i go pinis? Stori i kamap bihain long dispela bai tokim yumi long dispela samting.
[Futnot]
a Kirap long Janueri 1, 1939, ol i senisim dispela tok na raitim tok olsem “ ‘Ol bai save mi Jehova.’—Esekiel 35:15.”
Yu Inap Tingim?
• Kirap long bipo na i kam inap nau, Jehova i bin kamapim wanem ol witnes?
• Bikpela Babilon i bin kamap olsem wanem?
• Bilong wanem Jehova i bin larim Jerusalem, em nambawan biktaun bilong lain witnes bilong em, i bagarap long yia 607 B.C.E.? Bilong wanem em i larim Jerusalem i bagarap long yia 70 C.E.?
• Lain wasman bilong Jehova na ol poroman bilong ol, ol i gat wanem kain tingting?
19. Liklik hap lain God i bin makim na ol i stap yet long graun, olsem wanem ol wantaim ol poroman bilong ol bilong lain arapela sipsip i kamapim olsem ol i gat strongpela bel olsem laion nau long taim bilong las de?
[Piksa long pes 7]
“Bikpela, mi bin sanap long ples bilong was long ol birua na mi bin was gut long san na long nait”
[Ol Piksa long pes 10]
Lain wasman bilong Jehova i save tingim tru wok bilong ol