Tok Bilong Jehova i Gat Laip
Sampela Bikpela Tok Bilong Buk Aisaia—Namba 1
“BAI yumi salim husat? Husat bai i bringim tok bilong mi i go?” Aisaia, pikinini man bilong Emos, i bekim dispela askim bilong God Jehova na i tok olsem: “Yu salim mi.” (Aisaia 1:1; 6:8) Orait nau God makim em long mekim wok olsem wanpela profet. Ol tok profet bilong em i stap long buk bilong Baibel i gat nem bilong em.
Profet Aisaia yet i raitim ol tok i stap long Buk Aisaia, na em i stori long ol samting i kamap insait long 46 yia, kirap long 778 B.C.E., i go bihain liklik long 732 B.C.E. Tru, dispela buk i tokaut long bagarap bai painim Juda, Israel, na ol narapela kantri i stap klostu long ol, tasol bikpela tok bilong en, em i tokaut long God bai “kisim bek” ol man. (Aisaia 25:9) Insait bilong nem bilong Aisaia i olsem, “Wok Bilong Jehova Long Kisim Bek Ol Man.” Dispela stori bai kamapim ol bikpela tok bilong Aisaia 1:1–35:10.
‘LIKLIK LAIN BAI OL I KAM BEK’
Aisaia i bin raitim ol tok profet i stap long sapta 1 i go sapta 5 paslain long God i makim em long kamap profet o em i raitim bihain long en, Baibel i no tokaut long dispela. (Aisaia 6:6-9) Tasol Baibel i tokaut klia olsem Juda na Jerusalem i stap nogut tru long ol samting bilong spirit, i olsem ‘ol sua i karamapim het bilong ol i go daun inap long lek bilong ol.’ (Aisaia 1:6) Pasin bilong lotuim god giaman i go bikpela tru. Ol lida bilong ol i no bihainim stretpela pasin. Ol meri i bihainim pasin hambak. Ol manmeri i lotuim God long pasin em i no laikim. God i tokim Aisaia long i go na kamapim tok bilong em “planti taim” long ol manmeri em ol i no kliagut long wanpela samting na ol i no laik kisim save.
Lain Israel na Siria i bung wantaim na ol i laik bagarapim Juda. Jehova i mekim wok long Aisaia na ol pikinini bilong em olsem “mak” bilong soim ol Juda olsem lain Israel na Siria bai i no inap win. (Aisaia 8:18) Tasol bel isi bai kamap taim “King bilong kamapim gutpela sindaun na bel isi” i bosim ol man. (Aisaia 9:6, 7) Jehova bai bekim pe nogut long lain Asiria tu, em lain em i mekim wok long en olsem “wanpela stik bilong paitim na mekim save long ol manmeri.” Lain Juda bai go kalabus, tasol ‘liklik lain bai ol i kam bek.’ (Aisaia 10:5, 21, 22) Stretpela pasin tasol bai kamap aninit long wok king bilong dispela ‘nupela kru i kamap long as bilong diwai [olsem Jesi].’—Aisaia 11:1.
Bekim Bilong Ol Askim Bilong Baibel:
1:8, 9—Olsem wanem taun Jerusalem bai “stap olsem giaman haus ol man i wokim insait long gaden”? Olsem wanpela giaman haus ol man i wokim insait long gaden, taim lain Asiria i kam pait na daunim ol Israel, bai i luk olsem i no gat wanpela bilong helpim Jerusalem. Tasol Jehova bai lukautim Jerusalem na em i no ken bagarap, olsem bipo Sodom na Gomora i bin bagarap.
1:18—Wanem insait bilong dispela tok: “Harim. Bai yumi mas bung na stretim tok”? Dispela tok i no makim olsem Jehova i singautim lain Israel i kam na bai ol i ken toktok wantaim na kamap wanbel, nogat. Dispela tok i makim wanpela taim we stretpela Jas, Jehova, i givim rot long lain Israel long senisim pasin bilong ol na mekim ol yet i kamap klin long ai bilong em.
6:11—Wanem insait bilong dispela tok bilong Aisaia: “Bikpela, mi bai mekim dispela wok i go inap wanem taim?” Aisaia i no askim Jehova long em i mas autim tok long ol manmeri i no save harim tok i go inap long wanem taim, nogat. Em i laik save ol manmeri bai mekim pasin i bagarapim nem bilong God i go inap long wanem taim.
7:3, 4—Bilong wanem Jehova i kisim bek king nogut, Ahas? King bilong Siria na king bilong Israel i tingting long rausim King Ahas bilong Juda na makim pikinini man bilong Tabel—em wanpela man i no bilong lain bilong Devit—long kamap king. Dispela wok em Satan yet i stiaim, em bai pasim kontrak bilong Kingdom em Jehova i mekim wantaim Devit. Jehova i kisim bek Ahas bambai Em i ken lukautim lain em “King bilong kamapim gutpela sindaun na bel isi” bai kamap long en.—Aisaia 9:6.
7:8, 9—Olsem wanem Efraim i “bagarap” insait long 65 yia? Kirap long “taim bilong Peka i stap king” ol birua i wok long kisim ol manmeri bilong 10-pela lain bilong Israel i go kalabus na ol i bringim ol manmeri bilong narapela narapela lain i kam stap long graun bilong Israel. Dispela samting i kamap bihain liklik long taim Aisaia i mekim dispela tok profet. (2 King 15:29) Ol birua bilong Israel i bihainim dispela pasin i go inap long taim bilong King Esarhadon bilong Asiria, em pikinini man bilong Senakerip. (2 King 17:6; Esra 4:1, 2; Aisaia 37:37, 38) Olsem Aisaia 7:8, 9 i tok, dispela haptaim we ol Asiria i mekim olsem em inap 65 yia olgeta.
11:1, 10—Wanem insait bilong dispela tok olsem Jisas Krais i “nupela kru i [bin] kamap long as bilong diwai [em Jesi]”? Long samting bilong skin, Jisas em i “nupela kru” i kamap long lain bilong Jesi. Em i tumbuna pikinini bilong Jesi long rot bilong Devit.—Matyu 1:1-6; Luk 3:23-32.
Skul Yumi Kisim:
1:3. Sapos yumi no laik mekim ol samting em Man Bilong Wokim yumi i laik bai yumi mas mekim, orait dispela i olsem yumi no gat save na i olsem save bilong bulmakau na donki i winim save bilong yumi. Tasol pasin bilong pilim tru olgeta samting Jehova i bin mekim bilong helpim yumi, dispela bai pasim yumi na bai yumi mekim pasin i no stret na lusim God.
1:11-13. Jehova i les long ol pasin giaman bilong ol lotu na pasin bilong kolim nating long maus ol beten. Stretpela laik na tingting i mas i stap olsem as bilong ol beten bilong yumi na ol samting yumi mekim.
1:25-27; 2:2; 4:2, 3. Taim liklik lain Juda i kam bek long Jerusalem na kirapim gen lotu i tru, ol Juda bai i no stap kalabus moa na graun bilong ol bai i no stap nating. Jehova i save marimari long ol man i tanim bel.
2:2-4. Pasin bilong yumi long wok strong long autim tok bilong Kingdom na kamapim disaipel i helpim ol man bilong narapela narapela lain long kisim save long pasin bilong i stap bel isi, na long stap wanbel wantaim ol narapela.
4.4. Jehova bai rausim olgeta pasin doti na ol pasin nogut ol man i bin mekim bilong bagarapim ol narapela man.
5:11-13. Man i no bosim em yet long ol samting em i mekim bilong kisim amamas, dispela kain man em i no mekim pasin i stret wantaim save bilong God.—Rom 13:13.
5:21-23. Ol elda Kristen i mas sakim pasin bilong ‘ting ol i gat gutpela tingting tru.’ Na tu, ol i mas “dring” liklik tasol na ol i no ken mekim gut long sampela lain tasol na ol arapela nogat.
11:2, 3a. Pasin bilong Jisas na ol samting em i skulim ol man long en i soim olsem man bai stap amamas sapos em i aninit long Jehova.
“BIKPELA BAI I SORI GEN LONG OL MANMERI BILONG ISRAEL”
Aisaia sapta 13 i go 23 i kamapim tok God i mekim long ol narapela kantri. Tasol “Bikpela bai i sori gen long ol manmeri bilong Israel” na larim ol i kam bek long as ples bilong ol. (Aisaia 14:1) Aisaia sapta 24 i go 27 i stori long graun bilong ol Juda bai i stap nating, na tu, ol dispela sapta i stori long tok promis bilong God long kisim bek ol Israel. Jehova i kros long ‘ol bikman bilong Israel i spak nogut tru’ na ol i wokim kontrak wantaim Siria na em i kros long “ol profet na ol pris” bilong Juda long ol i wokim kontrak wantaim ol Asiria. (Aisaia 28:1, 7) Bagarap bai painim “Jerusalem,” long wanem, “ol i go pasim tok wantaim king bilong Isip” long helpim ol. (Aisaia 29:1; 30:1, 2) Maski i olsem, God i tok promis olsem em bai kisim bek ol man i bilip long em.
Olsem wanpela ‘laion i was long sipsip em i kilim’ bilong kaikai, Jehova bai was long “Jerusalem.” (Aisaia 31:4) Na i gat dispela tok promis tu: ‘Harim. I gat wanpela king bai i kamap na em bai i bihainim stretpela pasin tasol na bosim gut ol manmeri.’ (Aisaia 32:1) Ol Asiria i laik bagarapim ol Juda na dispela i mekim na “ol man i bin hatwok long mekim gutpela taim i kamap” ol i krai strong moa, tasol Jehova i tok promis olsem lain bilong em bai kamap orait gen, na em bai “lusim sin bilong ol.” (Aisaia 33:7, 22-24) “Bikpela i belhat tru long olgeta kantri na long ol soldia bilong ol.” (Aisaia 34:2) Juda bai i no stap nating longpela taim. “Ples wesan nating wantaim ples drai bai ol i amamas tru, long wanem, ol naispela plaua bai i kamap na karamapim ol dispela hap.”—Aisaia 35:1.
Bekim Bilong Ol Askim Bilong Baibel:
13:17—Olsem wanem lain Midia i tingim silva na gol i olsem samting nating? Ol Midia na Persia i tingim olsem biknem ol i kisim taim ol i daunim ol narapela kantri i winim ol samting ol i kisim long pait. Dispela i kamap tru long taim bilong Sairus. Em i kisim ol plet na kap ol i bin wokim long silva na gol em Nebukatnesar i bin kisim long tempel bilong Jehova, na em i givim long ol Juda i go bek long ples bilong ol.
14:1, 2—Olsem wanem lain bilong Jehova i kamap bos bilong ol lain i bin “kalabusim” na “mekim nogut long ol”? Dispela i kamap tru long Daniel, em i holim bikpela wok long Babilon aninit long lain Midia na Persia; Esta i kamap wanpela kwin bilong Persia; na Mordekai ol i makim em long kamap praim minista bilong Persia.
20:2-5—Taim Aisaia i rausim klos na su bilong em na em i wokabaut nating, yu ting dispela i makim olsem em i stap as nating inap 3-pela yia? Nogat. Ating em i rausim longpela saket bilong em na em i pasim “liklik laplap tasol.”—1 Samuel 19:24.
24:13-16—Olsem wanem ol Juda bai kamap ‘liklik lain tru olsem wan wan pikinini oliv i stap long diwai oliv long taim ol man i kisim pinis, na olsem wan wan pikinini wain i stap long gaden wain long taim ol i kisim pinis’? Wankain olsem wan wan pikinini oliv o pikinini wain i stap yet long diwai long taim ol man i kisim pinis, liklik lain tasol bai abrusim bagarap bilong Jerusalem na Juda. Maski wanem hap ol birua bai salim ol Israel i go, long “hap bilong sankamap [Babilon]” o “ol ples i stap arere long solwara [Mediterenian],” ol bai litimapim nem bilong Jehova.
24:21—Husat dispela “lain ami bilong heven” na “ol king bilong graun”? Ating dispela “lain ami bilong heven” i makim ol spirit nogut. Na “ol king bilong graun” i makim ol hetman bilong graun, em ol spirit nogut i stiaim ol.—1 Jon 5:19.
25:7—Wanem dispela “klos bilong sori ol i putim”? Dispela tok i kirapim tingting bilong yumi long tingim tupela birua bilong ol man—em sin na dai.
Skul Yumi Kisim:
13:20-22; 14:22, 23; 21:1-9. Ol tok profet bilong Jehova i save kamap tru, olsem em i bin kamap tru long Babilon.
17:7, 8. Maski planti man long Israel i no bihainim tok bilong Jehova, i gat sampela i bin bihainim tok bilong em. Na olsem tasol, sampela long ol lotu i gat nem Kristen ol i putim yau long tok bilong Kingdom.
28:1-6. Ol Asiria bai bagarapim ol Israel, tasol God bai mekim ol samting bilong helpim ol man i stap gut long em long abrusim bagarap. Taim Jehova i mekim kot bilong em ol stretpela man i ken bilip olsem ol inap abrusim bagarap.
28:23-29. Long ol man i gat gutpela bel, Jehova i save givim tok long ol i stret long pasin na sindaun bilong ol.
30:15. Bilong God i ken kisim bek yumi, yumi mas ‘stap isi’ na no ken ting ol man bilong graun bai kisim bek yumi. Sapos yumi stap isi na yumi no pret, yumi kamapim klia olsem yumi bilip long Jehova bai lukautim yumi.
30:20, 21. Yumi “lukim” Jehova na harim em i toktok long yumi long rot bilong bihainim ol tok bilong em long Baibel, na long rot bilong “wokboi i gat gutpela tingting.”—Matyu 24:45.
Tok Profet Bilong Aisaia i Strongim Bilip Bilong Yumi Long Tok Bilong God
Yumi ken tenkyu tru long tok bilong God i stap long Buk Aisaia! Ol tok profet i bin kamap tru i strongim bilip bilong yumi olsem ‘tok bilong God bai i no inap kam bek nating long em, nogat, em bai mekim ol samting i kamap olsem em i tok.’—Aisaia 55:11.
Tasol olsem wanem long ol tok profet bilong Mesaia, olsem i stap long Aisaia 9:7 na 11:1-5, 10? Ol i strongim bilip bilong yumi olsem Jehova bai wokim rot bilong kisim bek yumi, a? Na tu, Buk Aisaia i kamapim ol tok profet em ol bikpela truim bilong en i wok long kamap long taim bilong yumi na sampela truim bai kamap bihain. (Aisaia 2:2-4; 11:6-9; 25:6-8; 32:1, 2) Tru tumas, Buk Aisaia i kamapim klia olsem “tok bilong God em i gat laip, na em i wok strong i stap.”—Hibru 4:12.
[Piksa long pes 8]
Aisaia na ol pikinini bilong em i stap olsem “mak bilong ol samting em [God] i laik mekim long ol manmeri bilong Israel”
[Piksa long pes 8, 9]
Jerusalem bai kamap “olsem giaman haus ol man i wokim insait long gaden”
[Piksa long pes 10]
Olsem wanem yumi helpim ol man long “paitim ol bainat bilong ol i kamap olsem ain bilong brukim graun”?