Aisaia
11 Wanpela nupela han+ bai kamap long as bilong diwai bilong Jesi,+
Na nupela kru+ i kamap long ol rop bilong diwai bilong em bai karim kaikai.
2 Spirit bilong Jehova bai kam stap long em,+
Olsem na em bai i gat savetingting+ na pasin bilong kliagut tru long ol samting,
Em bai givim gutpela tingting na em bai i gat bikpela strong,+
Em bai i gat planti save na em bai i gat pasin bilong pret long Jehova.
3 Em bai kisim amamas long pasin bilong pret long Jehova.+
Em bai no jasim man long samting em i lukim tasol long ai,
O stretim man long samting em i harim tasol long yau.+
4 Em bai jasim ol taranguman long pasin i fea,*
Na long stretpela pasin, em bai givim tok bilong stretim ol man i gat pasin daun, em tok we inap helpim ol.
Em bai paitim graun long stik i kam aut long maus bilong em,+
Na long win bilong maus bilong em, em bai kilim i dai ol man nogut.+
5 Stretpela pasin bai i olsem belt i raunim weist bilong em,
Na pasin bilong stap gut long wok bai i olsem belt long hips bilong em.+
6 Wulf na pikinini sipsip bai stap gut wantaim,+
Na yangpela meme na lepat bai slip wantaim,
Na pikinini bulmakau na laion, na patpela animal, olgeta bai stap wantaim;*+
Na wanpela liklik mangi bai lidim ol.
7 Bulmakau meri na bea bai kaikai wantaim,
Na ol pikinini bilong ol bai slip wantaim.
Laion bai kaikai gras olsem bulmakau.+
8 Bebi i dring susu yet bai pilai antap long hul bilong snek kobra,
Na pikinini i no susu moa, em bai putim han bilong em i go antap long hul bilong posin snek.
9 Bai ol i no inap kamapim wanpela bagarap+
O bagarapim ol samting long olgeta hap bilong maunten holi bilong mi,+
Long wanem, graun bai pulap long save bilong Jehova
Olsem wara i karamapim solwara olgeta.+
10 Long dispela taim, rop bilong diwai bilong Jesi+ bai sanap olsem wanpela signal pos* bilong ol manmeri.+
Ol lain manmeri bai go long em bilong em i stiaim ol,*+
Na ples em i stap long en* bai kamap naispela ples tru.
11 Long dispela taim, Jehova bai givim han bilong em gen, namba 2 taim, bilong kisim liklik hap lain bilong em husat i stap yet long Asiria,+ long Isip,+ long Patros,+ long Kus,+ long Elam,+ long Sainar,* long Hamat, na long ol ailan bilong solwara.+ 12 Em bai sanapim wanpela signal pos* bilong ol lain manmeri na em bai bungim ol manmeri bilong Israel em ol i stap nabaut,+ na em bai bungim ol manmeri bilong Juda i stap nabaut long 4-pela kona bilong graun.+
13 Pasin jeles bilong Efraim bai pinis,+
Na ol man i birua long Juda, ol bai i no stap moa.
Efraim bai i no jeles long Juda,
Na Juda bai i no birua long Efraim.+
14 Na ol bai go daun kwiktaim long sait bilong maunten* bilong Filistia long hap wes;
Ol bai bung wantaim na stilim ol samting bilong ol man bilong hap Is.
15 Jehova bai brukim long tupela hap* pasis bilong solwara Isip+
Na em bai weivim han bilong em antap long Wara Yufretis.+
Long hatpela win bilong maus bilong em, em bai paitim* 7-pela hanwara bilong Wara Yufretis
Na em bai mekim ol man i wokabaut i go brukim wara.