Bikpela Kot Yu Tu Yu Insait Long En

“Jehova i tok: ‘Kamapim tok bilong yupela long kot. Kolim ol tok bilong yupela.’ ”−AISAIA 41:​21, NW

LONG bipo na inap nau planti kot i bin kamap, na ol man i kot ol i gat ol witnes bilong ol bilong kamapim tok long ol samting ol i bin harim o lukim o save long en. Sampela taim tupela man tasol i kot, o liklik lain tasol; tasol sampela taim planti man i insait long kot. Tasol ol dispela kot em i bilong ol man tasol, na i olsem samting nating sapos yumi skelim wantaim dispela bikpela kot nau yumi bai stori long en hia. Dispela kot bai kisim olgeta man bilong graun, maski ol i laik o nogat; olgeta wantaim i insait long en.

₂ Nambawan Man insait long dispela bikpela kot em God Jehova, em i bikpela moa na i winim olgeta narapela man o spirit. “Em i Man bilong wokim ples antap, na em i Bikpela Man i bin putim ples antap; em i Man bilong putim graun na kamapim kaikai long en, na em i Man bilong givim win long ol manmeri i stap long en.” (Aisaia 42:​5, NW ) Wanem as bilong dispela kot? As bilong en i olsem: I gat tok long Jehova i stap God. Seten i tok, Jehova i no bosim gut heven na graun, na em i no bihainim stretpela pasin long bosim graun na yumi ol man, na i no stret long em i stap God, na em i no gutpela God tumas. Olsem na as bilong dispela kot em olsem: I stret husat i mas i stap Nambawan Bos bilong heven na graun?

₃ Bilong yumi ken save gut long dispela samting, yumi mas save pastaim long sampela askim olsem: I gat planti god i stap, em ol man i save lotuim ol, tasol wanem god em i bin mekim gutpela wok na i gat gutpela pasin inap long yumi ken bilip long em na givim bel long em na i stap gut long em inap long olgeta taim bihain? Wanem God i stap tru, na wanem ol god i no stap tru, em ol man yet i tok ol i stap, tasol ol i god giaman tasol? Olsem wanem? I gat wanpela God tru i stap, na em i winim ol narapela, na em inap helpim ol man, na pinisim ol dispela hevi i stap long graun, na kamapim gutpela gavman na bai yumi ken stap bel isi na kisim gutpela sindaun na i no gat sik?

₄ Planti man i tok, ol i no insait long dispela samting, long wanem, ol i save bilip long God. Tasol olsem wanem? Ol inap stori long ol samting dispela god bilong ol i bin mekim na bai ol i ken save em God tru o nogat? Ol inap stori long em i truim ol tok promis bilong em? Ol inap stori long olsem wanem ol i bihainim laik bilong em na ol lo bilong em? Sapos ol i bekim na i tok, ol inap, orait, ating ol inap bekim sampela askim moa, olsem: Wanem ol samting i makim olsem i gat wanpela God tru i stap na yumi inap bilipim ol tok promis bilong em? God i gat wanem laik long ol man na long graun? God i makim taim bilong em i mekim ol samting, orait, yumi stap long wanem taim? Klostu nau wanem samting bai kamap? God i laik bai yumi mekim wanem bilong helpim em long winim dispela kot?

₅ Planti man i tok ol i bilip long God, tasol ol i no inap bekim gut ol dispela askim. Ol i olsem ol dispela man bilong bipo ol i bin tok ol i bilip long God, tasol wok ol i mekim na pasin bilong ol i no stret wantaim dispela tok bilong ol. Baibel i tok: “Long maus ol i save tok olsem: ‘Mi save long God.’ Tasol long wokabaut bilong ol ol i save givim baksait long God.” Tru tumas, “man i bilip nating na i no kamapim gutpela pasin tu, bilip bilong dispela man i olsem em i dai pinis.” (Taitas 1:16; Jems 2:26) Olsem na sapos man i tok em i bilip long God, tasol em i no bihainim gutpela pasin o mekim gutpela wok na wokabaut bilong em i no stret, em i wankain olsem ol dispela man bilong bipo ol i bin bilip long ol god giaman em nau ol i pinis na i no gat man moa i save lotu long ol.

Skelim Ol God

₆ Inap 1,500 yia bipo wanpela samting i kamap na i skelim ol god bilong Isip; i olsem kot i painim ol. Ol Isip bilong bipo i lotuim planti god, olsem bulmakau na pusi na pukpuk na taragau na rokrok na weldok na laion na snek. Ol Isip i ting ol dispela animal i olsem piksa na i makim ol god spirit ol i no inap lukim, na sapos man i kilim wanpela bilong ol dispela animal em man hia i mas i dai. Ol i tok, ol dispela animal i holi, na sapos wanpela i dai ol i save mekim gut skin bilong en na bilasim, na taim ol i planim, ol i mekim bikpela bung.

₇ Tasol God bilong lain Isrel i narapela kain. Nem bilong em Jehova. Ol Isrel i bin stap kalabus long Isip, tasol Jehova i tok em bai helpim ol, olsem na Jehova i salim Moses bilong toksave long king bilong Isip long em i mas lusim ol Isrel. (Eksodas 3:​6-10) “Tasol king i tok, ‘[Jehova] em i husat? Bilong wanem mi mas harim tok bilong en na larim yupela Isrel i go? Mi no save long [Jehova], olsem na mi no ken larim yupela i go.’ ” (Eksodas 5:⁠2) King i no pret liklik long Jehova; em i ting ol god bilong Isip i winim God Jehova.

₈ Orait, husat i kamapim long ples klia olsem em i God tru na em i gat strong inap long truim tok promis em i bin mekim na em inap lukautim lain bilong em? Dispela samting i kamap ples klia kwiktaim. Jehova i kirap na i tok: “Bai mi mekim save long olgeta god giaman bilong ol Isip.” (Eksodas 12:12) Olsem wanem? Jehova i truim tok bilong em? Tru tumas em i mekim! Em i salim 10-pela bikpela hevi long ol Isip, na i no gat wanpela bilong ol dispela god bilong ol em inap helpim ol. Long namba 10 hevi olgeta namba wan pikinini i kisim bagarap, na namba wan pikinini bilong king tu. Long dispela namba 10 hevi Jehova i semim bikpela god bilong ol Isip, nem bilong em Ra. Ol king bilong Isip i ting ol yet i olsem ol god, long wanem ol i tok, ol i pikinini bilong Ra, olsem na sapos namba wan pikinini bilong king i dai, i olsem wanpela god i dai.

₉ I no gat wanpela namba wan pikinini bilong ol Isrel i kisim bagarap long dispela hevi, long wanem Jehova i lukautim ol. Jehova i givim rot long ol Isrel na ol i lusim kalabus long Isip, olsem em i bin tok promis long mekim. Na Jehova i mekim narapela samting tu i daunim tru ol god bilong Isip−em i bagarapim king bilong Isip wantaim ami bilong em, na olgeta i dai pinis insait long Solwara Ret Si. Dispela i semim tru ol god bilong Isip na i litimapim Jehova na i makim em i God tru. Em i truim ol tok promis em i bin mekim, na em i lukautim ol man i save lotu long em bambai ol i no ken bagarap. (Eksodas 14:​21-31) Tasol olsem wanem long ol god bilong Isip? Ol i no gat strong na ol i no inap helpim ol man i bin lotuim ol. Ol dispela god i no bin stap tru; ol i god giaman tasol. Ol man yet i tok ol i stap, tasol ol i tok nating, na bilip bilong ol i no gat as bilong en.

₁₀ Inap 800 yia bihain moa, olsem long taim bilong King Hesekaia, tok i kamap gen olsem husat i God tru.a Lain Asiria i strong na i winim ol narapela lain long graun. Ol i kam bilong pait wantaim lain bilong Jehova. Taun Jerusalem em as ples bilong lotu bilong Jehova na Baibel i tok, “sia king bilong Jehova” i stap long Jerusalem, tasol nau ol Asiria i laik daunim Jerusalem. (1 Kronikel 29:​23, NW ) Lain Juda i stap long Jerusalem; ol i hap lain bilong Isrel. Hesekaia em king bilong ol. Hesekaia i save ol Asiria i strong na ol i bin winim na daunim ol narapela lain na kukim ol god bilong ol, em ol man yet i bin wokim ol dispela god.−Aisaia 37:​18, 19.

₁₁ Hesekaia i stap gut long Jehova na em i kirap beten askim Jehova long helpim em. Jehova i tok promis long Hesekia na i tok, ol Asiria i no ken sutim wanpela spia i kam insait long Jerusalem. (Aisaia 37:33) Jehova i truim tok bilong em na em i lukautim ol Juda. Tasol em i salim wanpela ensel bilong em i kam na dispela ensel i kilim i dai 185,000 Asiria. Senakerip em king bilong ol Asiria, na em i lukim dispela bikpela bagarap i painim lain bilong em na nau em i save em i lus tru long pait na em i ranawe. Bihain em i wok long lotuim god bilong em, em Nisrok, na ol pikinini man bilong em i kirap kilim em i dai. (Aisaia 37:​36-38) Em nau, Jehova i win gen. Em i mekim ol samting em i tok pinis long mekim na em i lukautim gut lain bilong em na ol i no bagarap. Ol god bilong lain Asiria i lus, na ol god bilong ol narapela lain tu. Ol dispela god i no gat strong na ol i no helpim ol man i save lotuim ol. Ol i god giaman tasol, na ol i no stap tru; ol man yet i tok ol i stap, tasol nogat.

₁₂ Inap olsem 200 handet yia bihain, lain bilong Jehova ol i kalabus i stap long Babilon, long wanem ol i bin bikhet long Jehova. Ol Babilon i gat planti god man na god meri na haus lotu. Belsasa i king bilong Babilon, na wanpela taim em i hambak na tok bilas long Jehova. Em i wokim bikpela kaikai, na em i tokim ol boi bilong em long kisim ol dis samting i kam, em ol dis holi ol i bin kisim long haus lotu long Jerusalem, na “king wantaim ol bikman bilong em na ol meri bilong em na ol nambatu meri bilong em, ol i dring long en. Ol i dring wain na ol i litimapim nem bilong ol god ol i bin wokim long gol na silva na bras na ain na diwai na ston.”−Danyel 5:​1-4, NW.

₁₃ I olsem ol i rabisim Jehova na ol i laik bai Jehova i traim winim ol god bilong ol bambai Jehova i ken lus. Orait, Jehova i kirap na i salim profet bilong em, em Danyel, long i go givim strongpela tok long King Belsasa na ol narapela man i bung i stap long dispela kaikai. Danyel i litimapim nem bilong God bilong em, em Jehova, na Danyel i tokim King Belsasa: “Yu no bihainim pasin daun . . . Yu laik antap long Bikpela bilong heven; . . .yu litimapim nem bilong ol god ol i bin wokim long silva na gol na bras na ain na diwai na ston, em ol god nating na ol i no inap lukim samting o harim tok o save long wanpela samting; tasol yu no litimapim nem bilong dispela God i bin givim laip long yu na bai yu inap mekim ol wok.”−Danyel 5:​22, 23, NW.

₁₄ Na nau Danyel i autim bikpela tok bilong Jehova, olsem: Long dispela nait tasol ol Midia na Pesia bai kam na daunim bikhet King Belsasa na ol Babilon! (Danyel 5:​24-27) Olsem wanem? Dispela samting i bin kamap o nogat? Em i kamap. “Long dispela nait stret ol i kilim i dai Belsasa, em king bilong Kaldia, na Darias bilong Midia em i kisim dispela kingdom.” (Danyel 5:​30, 31, NW ) Em nau Jehova i win gen, olsem em i bin mekim bipo taim em i winim ol god bilong Isip na Asiria; Jehova em i God tru, na Jehova tasol inap long truim ol tok promis em i save mekim. Taim Jehova i winim ol god bilong Babilon, dispela i helpim lain bilong em tu, na ol i lusim kalabus long Babilon na ol i go bek long as ples bilong ol. Tasol ol man i bihainim ol god giaman ol i kisim bagarap.

Ol Tok Profet Bilong Taim Bilong Yumi

₁₅ Jehova i kirapim profet Aisaia long autim ol tok profet em truim bilong en i bilong kamap long bipo. Tasol planti tok profet bilong Baibel ol i gat narapela bikpela truim bilong kamap long taim bilong yumi. Planti tok profet bilong Aisaia i kain olsem. Sampela tok profet bilong em i toktok long taim bilong nau, em Jehova i gat tok long ol lain man wantaim god bilong ol. Ol lain man bilong graun ol i gat ol god bilong ol ol i save lotuim, na ol lain haiden tu, tasol dispela tok “god” i karamapim planti samting i olsem god bilong ol man. Wanpela buk diksoneri i tok, “god” i olsem wanpela samting i save bosim sampela samting, o em i olsem wanpela man o wanpela samting i gat biknem na ol man i save litimapim.

₁₆ Ol Hindu i save lotuim planti milion god, na ol Budis na Sinto na sampela narapela lotu ol tu i save lotuim planti god. Planti man i tingting tumas long mani na kago na ol samting bilong skin, na ol i save litimapim dispela ol samting na i kamap olsem god bilong ol. Na ol man i ting strong bilong ami bilong kantri bilong ol bai helpim ol bambai ol birua i no ken kisim ol, olsem na ol i litimapim ami i olsem god bilong ol. Na sampela i ting ol bikpela save bilong graun na bilong saiens bai helpim ol long ol samting na ol i givim bel long dispela na i kamap olsem god bilong ol. Na planti man i tok ol i bilip long God, tasol ol i no bilip tru na ol i no bihainim ol tok bilong God o mekim wok bilong em; nogat; ol i mekim wok bilong ol man.

₁₇ Bikpela truim bilong tok bilong Aisaia em i sutim ol dispela god bilong nau. Jehova i tokim ol lain man long ol i mas bung na kamapim tok. Em i tokim ol: “Yumi mas bung klostu na harim tok bilong kot.” (Aisaia 41:​1, NW ) Nau yumi stap long taim bilong “kot” bilong ol manmeri bilong dispela graun. Nau yumi stap long “las taim” olsem 2 Timoti 3:​1-5 na Matyu 24:​1-14 i tok. Jehova i tokim ol god bilong ol man long kolim stret ol samting bai kamap bihain bambai ol man i ken save, ol i god tru o nogat. Na Jehova i tokim ol dispela god, sapos ol inap ol i ken lukautim lain bilong ol na bai ol i no ken bagarap. Em i tok: “Kamapim tok bilong yupela long kot. Kolim ol tok bilong yupela, . . . na tokim mipela long ol samting bai kamap bihain.”−Aisaia 41:​21, 22, NW.

₁₈ God i gat olgeta strong em i kamapim nem bilong em na em i tok: “Mi Jehova. Em nem bilong mi; na mi no ken givim biknem bilong mi long narapela man, na mi no ken larim ol god giaman i kisim biknem bilong mi.” (Aisaia 42:​8, NW ) Na Jehova i tokim ol man i save litimapim nem bilong em, em i tokim ol: “Yupela no ken pret, long wanem mi stap wantaim yupela. Yupela no ken lukluk nabaut, long wanem, mi God bilong yupela. Bai mi strongim yupela. Bai mi helpim tru yupela.” Na Jehova i tok promis long ol, olsem: “Ol man i kros long yupela, bihain ol bai sem. Ol man i tok pait wantaim yupela bai ol i lus na bagarap.” “Olgeta samting ol man i mekim bilong daunim yupela, ol dispela samting bai lus nating. . . . Ol dispela gutpela samting i bilong lain bilong Jehova tasol”−Aisaia 41:​10, 11, NW, 54:​17, NW.

₁₉ Inap planti handet yia Jehova i larim ol lain man i bihainim laik bilong ol yet. Tasol nau taim i kamap pinis bilong Jehova bai stretim ol samting hia long graun. Olsem na em i tok: “Mi bin pasim maus bilong mi longtaim. Mi no bin toktok liklik. Mi bin bosim maus bilong mi.” Tasol long nau “Jehova bai kam olsem wanpela strongpela man. Olsem wanpela man bilong pait, em bai kirapim ol man long wok strong. Em bai singaut strong na mekim wanpela singaut bilong pait; em bai winim ol birua bilong em.” (Aisaia 42:​13, 14, NW ) Jehova i tok, long “las taim” em bai kamapim wanpela lain bilong tokaut strong long ol tok bilong em, olsem ol witnes i save mekim long kot. Yumi ken lukim dispela tok bilong Jehova i stap insait long ol tok profet bilong Aisaia, na long ol tok bilong ol narapela man bilong raitim Baibel, na long ol tok profet bilong Jisas tu.

₂₀ Dispela lain em Jehova i kamapim bilong tokaut long ol samting, ol i kamapim ol tok i makim Jehova i God tru, em Man bilong helpim ol man i save lotu long em, na em Man bilong bagarapim ol god giaman na lain bilong ol. Long nau lain bilong Jehova i save ‘litimapim nem bilong em long olgeta hap bilong graun, na long olgeta kantri, na long ol ailan, na antap long ol maunten.’ (Aisaia 42:​10-12) Taim ol i mekim olsem, ol i truim arapela tok profet bilong Aisaia, em i tok: “Long taim bilong bihain tru maunten bilong haus bilong Jehova [em trupela lotu bilong Em] bai kamap strong na i stap antap, winim het bilong ol narapela maunten [ol narapela lotu], na em bai go antap, winim ol maunten; na [sampela bilong] olgeta lain man i mas i kam long en.” Na ol dispela man bai tokim sampela man moa long mekim wanem? Ol bai tokim ol gutpela man olsem: “Yupela ol man yupela kam, na yumi go antap long maunten bilong Jehova . . . na bai em i lainim yumi long pasin bilong em, na bai yumi wokabaut long rot bilong em.”−Aisaia 2:​2-4, NW.

₂₁ Olsem na Jehova i mekim wanpela tok, olsem em i mekim long kot, em i tok: “Olgeta lain man i mas bung wantaim long wanpela ples, na ol lain i mas bung wantaim. . . . Ol [god bilong ol] i mas bringim ol witnes bilong ol i kam tokaut, na bai ol man i ken save ol i stretpela [god], o ol [lain man] i ken harim na tok, ‘Em i stret!’ ” (Aisaia 43:​9, NW ) Dispela tok i sutim ol god bilong ol man. Olsem wanem? Ol dispela god inap kolim ol samting bai kamap bihain? Bipo ol inap mekim? I gat sampela witnes bilong ol inap kolim sampela tok na bai yumi ken save ol dispela god i god tru na yumi ken bilip long ol? Ol god bilong ol lain man na ol man i lotu long ol, ol i bin kamapim wanem kain wok nau long taim bilong yumi? Em i winim wok bilong ol god bilong Isip na Asiria na Babilon bilong bipo? Olsem wanem long ol witnes bilong God Jehova ol i bin kamapim long ples klia olsem Jehova em i God tru na em wanpela tasol em inap long yumi lotu long em? Orait, tok i kamap bihain bai stori long dispela samting.

[Futnot]

Sampela Askim Bilong Helpim Yumi long Tingim Gen Ol Bikpela Tok

◻ Bilong wanem wanpela bikpela kot i mas kamap?

◻ Wanem ol god i insait long dispela kot long nau?

◻ Tripela taim i gat traim bilong skelim husat i God tru, tasol wanem samting i bin kamap na nau yumi save Jehova i win?

◻ Aisaia i tok wanem na yumi save Jehova bai stretim ol samting hia long graun?

◻ Yumi tingim lain bilong olgeta lotu bilong nau na yumi gat wanem ol askim?

[Askim Bilong Stadi]

 1, 2. (a) Husat i insait long dispela bikpela kot nau yumi laik stori long en? (b) Wanem as bilong kot?

 3. Sapos yumi laik save long as bilong dispela kot, pastaim yumi mas save long bekim bilong wanem ol askim?

 4. Olsem wanem long ol dispela man i tok ol i bilip pinis long God, olsem na i no gat tok o kot bai kamap?

 5. Sapos man i tok em i bilip long God, tasol em i no mekim ol samting bilong kamapim long ples klia bilip bilong em, em i wankain olsem husat long bipo?

 6, 7. (a) Stori long lotu na ol god bilong ol Isip bilong bipo. (b) Olsem wanem lain Isrel i insait long bikpela tok i bin kamap namel long Jehova na ol god bilong Isip?

 8, 9. (a) Wanem samting i bin kamap na i makim Jehova i winim ol god bilong Isip? (b) Na olsem wanem long ol god bilong Isip?

10. Wanem samting i kamap namel long lain bilong Jehova na lain Asiria na dispela, i laik traim strong bilong ol god bilong ol?

11. Jehova i mekim wanem bilong helpim lain bilong em? Dispela i makim husat i strong moa?

12. Belsasa i mekim wanem bilong semim Jehova?

13. Jehova i salim Danyel i go givim wanem tok long Belsasa?

14. Jehova i mekim wanem na bai ol man i ken save em i God tru?

15. (a) Olsem wanem long planti tok profet bilong Baibel? (b) Dispela tok “god” em inap makim wanem samting?

16. Wanem ol samting i olsem god bilong ol man?

17. Bikpela truim bilong tok bilong Aisaia i sutim wanem samting?

18. Jehova i mekim wanem na bai ol man i ken save em i husat? Em i mekim wanem tok promis long ol man i save lotu long em?

19, 20. (a) Jehova i bin makim taim bilong stretim ol tok, na Aisaia i tok wanem long dispela samting? (b) Jehova i kamapim wanem lain nau long dispela “las taim”? Ol i mekim wanem bilong litimapim nem bilong Jehova?

21. Jehova i sutim tok long ol god bilong ol man na dispela tok i kamapim wanem ol askim?

[Piksa long pes 11]

God tru, em Jehova, i winim ol god bilong Isip

[Piksa long pes 12]

God tru em i daunim ol god giaman bilong Asiria na lain bilong ol

[Piksa long pes 13]

Danyel i givim tok bilong Jehova long ol man i lotuim ol god giaman bilong Babilon