Kisim Pasin Bilong Daunim Yu Yet

1, 2. Jisas i tokim ol aposel long mekim wanem? Bilong wanem em i mekim olsem?

EM YIA 32 C.E. Jisas i stap long Galili taim hevi i kamap. Sampela aposel bilong em i wok long tok pait long husat i nambawan namel long ol. Luk em man bilong raitim Gutnius i tok: “Ol disaipel i kirap toktok i go i kam long husat namel long ol i nambawan na i winim ol arapela. Jisas i save long tingting i stap long bel bilong ol, na em i kisim wanpela liklik pikinini na sanapim em klostu long em na tokim ol: ‘Man i tingim nem bilong mi na mekim gut long dispela liklik pikinini, em i mekim gut long mi tu. Na man i mekim gut long mi, em i mekim gut tu long Man i salim mi i kam. Man i save daunim em yet namel long yupela, dispela man em i nambawan.’” (Luk 9:46-48) Long pasin isi, Jisas i helpim ol aposel long save olsem ol i mas mekim pasin daun.

² Taim Jisas i tokim ol aposel long daunim ol yet, yu ting dispela i wankain long pasin bilong ol Juda long dispela taim? O yu ting em i no wankain? Buk Theological Dictionary of the New Testament i stori long pasin bilong ol man long dispela taim bipo na i tok: “Long olgeta samting, ol i laik save husat em i nambawan, na ol i save tingting planti long biknem ol i givim long man, olsem em i stret o nogat.” Jisas i laik bai ol disaipel bilong em i stap narapela kain long ol narapela manmeri.

 3. (a) Pasin bilong daunim yumi yet, dispela i makim wanem? Bilong wanem i hatwok long yumi daunim yumi yet? (b) Bai yumi skelim wanem ol askim long dispela stadi?

³ Tok Grik ol i tanim olsem “man i save daunim em yet,” i makim man husat i gat pasin isi, na em i tingim em yet olsem man i no gat namba na i no gat nem. Jisas i yusim wanpela liklik pikinini long kamapim klia long ol aposel olsem ol i mas bihainim pasin daun na pasin isi. Long nau, ol Kristen tru i mas bihainim dispela tok. Ating long sampela taim, yumi bai hatwok long daunim yumi yet. Yumi gat sin na dispela inap kirapim yumi long hambak na tingting long kisim biknem. Na tu, pasin bilong dispela graun inap stiaim yumi long tingim yumi yet, kros hariap, o bosim narapela. Wanem samting inap helpim yumi long kisim pasin bilong daunim yumi yet? Olsem wanem ‘man i save daunim em yet namel long yumi, dispela man em i nambawan’? Yumi mas soim pasin daun long wanem kain taim?

4, 5. Wanem samting inap kirapim yumi long kisim pasin daun? Stori long dispela.

⁴ Wanpela rot long kisim pasin bilong daunim yumi yet, em long tingim tingim olsem Jehova i gat bikpela namba winim tru yumi. Tru tru, “i no gat man inap long save long olgeta tingting bilong em.” (Ais. 40:28) Aposel Pol i stori long biknem bilong Jehova olsem: “Olaman! Ol blesing na savetingting na save bilong God i daun tumas olsem solwara. Yumi man i no inap tru long painim as bilong ol pasin em i save skelim ol man long en. Na yumi no inap tru long kliagut long olgeta rot bilong en.” (Rom 11:33) Kirap long taim Pol i raitim dispela tok inap olsem 2,000 yia i go pinis, dispela tok i tru yet long nau maski save bilong ol man i go bikpela. Maski yumi gat save, yumi mas daunim yumi yet na luksave olsem i gat planti samting i stap yet bilong kisim save long en long Jehova, ol wok bilong em, na ol pasin bilong em.

⁵ Leoa i luksave olsem em i no inap long kisim save long olgeta samting God i wokim, na dispela i helpim em long daunim em yet. Taim Leo i stap yangpela, em i save laikim tru saiens. Em i laik kisim gut save long ol sta na ol planet, olsem na em i go long skul bilong kisim save long ol samting bilong yunives, na em i luksave long wanpela bikpela samting. Em i tok: “Ol save mi kisim long skul i helpim mi long luksave olsem ol save bilong saiens tasol i no inap helpim ol man long save gut long olgeta samting bilong yunives, olsem na mi lusim na mi kirap stadi long lo.” Leo i kamap loya na bihain liklik em i kamap jas bilong kot. Bihain, em na meri bilong em i stadi long Baibel wantaim ol Witnes Bilong Jehova, laikim tok i tru, dediket na kamap wokman bilong God. Maski Leo i gat bikpela save, wanem samting i helpim em long daunim em yet? Em i tok: “Mi luksave olsem maski yumi kisim pinis sampela save long Jehova na ol samting bilong yunives, i gat planti samting i stap yet bilong kisim save long en.”

6, 7. (a) Olsem wanem Jehova i stap gutpela piksa long pasin daun? (b) Olsem wanem pasin daun bilong God i mekim man i stap “nambawan”?

⁶ Narapela samting i helpim yumi long bihainim pasin daun em olsem, Jehova yet i soim pasin daun. Tingim dispela: ‘Yumi ol wanwok bilong God.’ (1 Kor. 3:9) Tingim! God Jehova i gat biknem i antap tru, na em i givim biknem long yumi long rot bilong larim yumi long yusim tok bilong em long Baibel long mekim wok autim tok. Maski Jehova yet i save mekim kaikai i kamap, em i larim yumi long planim kaikai na givim wara long en. (1 Kor. 3:6, 7) Long dispela rot, God i stap gutpela piksa tru long pasin daun. Tru tumas, pasin bilong Jehova long daunim em yet i mas kirapim yumi tu long daunim yumi yet.

⁷ Pasin bilong God long daunim em yet i bin helpim tru Devit. Em i mekim singsing long Jehova na i tok: “Yu bin kisim bek mi long han bilong ol birua. Yu givim mi hap plang bilong yu na mi hait i stap baksait long en. [“Pasin daun bilong,” NW] yu bin helpim mi na mi gat biknem long ai bilong ol manmeri.” (2 Sml. 22:36) Devit i bin kisim biknem long ol wok em i mekim long Israel, na em i save olsem Jehova yet i bin lukluk i kam daun na helpim em. (Sng. 113:5-7) Na dispela i wankain long yumi tu. Olgeta pasin, save, na gutpela wok yumi mekim, olgeta dispela samting i kam long Jehova. (1 Kor. 4:7) Man husat i daunim em yet, em i stap “nambawan,” long wanem, em i kamap wokman i dia tru long ai bilong Jehova. (Luk 9:48) Yumi ken stori long dispela samting.

 8. Bilong wanem ol man i stap long oganaisesen bilong God i mas bihainim pasin daun?

⁸ Pasin daun bai helpim yumi long stap amamas insait long oganaisesen bilong God na helpim ol wok bilong kongrigesen. Olsem: Tingim Petra, wanpela yangpela meri husat i bin kamap bikpela insait long wanpela famili Witnes. Em i laik bihainim laik bilong em yet, olsem na Petra i lusim kongrigesen. Sampela yia bihain, em kirap gen long bung wantaim kongrigesen. Nau em i amamas long stap insait long oganaisesen bilong Jehova na helpim ol wok bilong kongrigesen. Wanem samting i senisim tingting bilong em? Em i tok: “Bilong mi ken stap amamas insait long oganaisesen bilong God, i gat 2-pela pasin em mi mas kliagut na wok strong long bihainim, em pasin daun na pasin isi.”

 9. Man i gat pasin daun, em i gat wanem tingting long ol tok bilong Baibel na ol buk na nius bilong yumi? Bilong wanem dispela i mekim em i kamap gutpela wokman?

⁹ Man i gat pasin daun em bai tenkyu tru long ol gutpela samting Jehova i givim, na ol samting Em i givim bilong helpim yumi long kisim save long em. Olsem na man i gat pasin daun em bai stadi gut long Baibel na ritim gut nius Wastaua na Kirap! Olsem planti arapela wokman bilong Jehova i mekim, em inap kisim pasin bilong ritim olgeta nupela nius paslain long em i putim long laibreri bilong em yet. Taim yumi soim pasin daun long rot bilong ritim na stadi long ol buk na nius bilong yumi, yumi bai pas gut moa wantaim Jehova, na em bai yusim yumi long mekim planti samting moa long wok bilong em.—Hib. 5:13, 14.

10. Insait long kongrigesen, olsem wanem yumi inap soim olsem yumi daunim yumi yet?

¹⁰ Taim man i daunim em yet, i gat narapela samting tu i mekim em i stap “nambawan.” Olgeta kongrigesen i gat ol man em Jehova i bin makim ol long holi spirit long mekim wok olsem elda. Ol i save stretim rot bilong kamapim ol miting bilong kongrigesen, mekim wok autim tok, na mekim sepeding visit. Taim yumi sapotim ol dispela wok, yumi soim olsem yumi daunim yumi yet, na dispela bai kamapim amamas, bel isi, na pasin wanbel insait long kongrigesen. (Ritim Hibru 13:7, 17.) Sapos yu mekim wok olsem elda o kongrigesen sevan, i gutpela yu soim pasin daun na tenkyu long Jehova i givim yu dispela gutpela wok.

11, 12. Wanem pasin bai helpim yumi long i stap olsem samting i dia tru insait long oganaisesen bilong Jehova? Bilong wanem?

¹¹ Taim man i daunim em yet, em i stap “nambawan,” o samting i dia tru insait long oganaisesen bilong Jehova, long wanem, pasin daun bilong em i mekim na em i stap gutpela wokman bilong God. Jisas i kirapim ol disaipel bilong em long daunim ol yet, long wanem, sampela bilong ol i kisim wankain tingting olsem bilong ol man bilong dispela taim bipo. Luk 9:46 i tok: “Ol disaipel i kirap toktok i go i kam long husat namel long ol i nambawan na i winim ol arapela.” Long nau, nogut yumi tu i kisim tingting olsem yumi winim ol wanbilip bilong yumi na ol narapela long sampela samting yumi mekim. Yumi stap namel long ol manmeri em planti bilong ol i gat pasin antap na pasin bilong tingim ol yet tasol. Olsem na yumi mas stap narapela kain long ol na bihainim pasin daun. Taim yumi mekim olsem na putim laik bilong Jehova i stap namba 1, dispela bai strongim ol bratasista bilong yumi.

¹² Tok bilong Jisas long daunim yumi yet i kirapim tru yumi long mekim pasin daun. Olsem na long olgeta samting yumi mekim, i gutpela yumi bihainim pasin bilong daunim yumi yet. Orait nau yumi ken stori long 3-pela bilong ol dispela samting.

13, 14. Olsem wanem man marit na meri marit i ken daunim ol yet? Dispela bai mekim wanem long marit bilong ol?

¹³ Insait long marit. Planti manmeri long nau i tingim laik bilong ol yet, olsem na ol i strong long ol narapela i mas bihainim laik bilong ol maski dispela i putim hevi long ol narapela. Tasol man i daunim em yet, em bai bihainim pasin em Pol i kirapim yumi long kisim. Long pas bilong em long ol Rom, em i tok: “Yumi mas wok strong long mekim ol samting i save kamapim bel isi na ol samting i save strongim ol arapela.” (Rom 14:19) Man o meri i daunim em yet, em bai stap bel isi wantaim olgeta manmeri, na moa yet wantaim poroman marit bilong em.

¹⁴ Tingim ol samting bilong kisim amamas. Ating tupela marit bai i gat narapela narapela laik long ol amamas ol i laik kisim. Ating man marit bai laik stap isi long haus na ritim buk long fri taim bilong em. Tasol meri marit bai gat laik long ol i go kaikai long narapela hap o visitim ol pren. Em bai isi long meri marit i rispektim man bilong em sapos man i gat pasin daun na em i no tingim tasol laik bilong em yet, nogat, em i tingim tu laik bilong meri. Na man marit bai laikim tru meri bilong em sapos meri i no tingim tasol laik bilong em yet, nogat, em i tingim tu laik bilong man. Taim tupela wantaim i bihainim pasin daun, dispela bai strongim marit bilong ol.—Ritim Filipai 2:1-4.

15, 16. Long Buk Song sapta 131, Devit i kirapim lain Israel long mekim wanem? Olsem wanem yumi ken mekim wankain pasin insait long kongrigesen?

¹⁵ Insait long kongrigesen. Planti manmeri long nau i tingting long inapim laik bilong ol yet wantu tasol. Ol i no gat pasin bilong wet na ol i nolaik tru long wet. Taim yumi gat pasin bilong daunim yumi yet, em bai isi moa long yumi bilip na wetim Jehova i helpim yumi. (Ritim Maika 7:7.) Sapos yumi bihainim pasin daun na bilip na wet long Jehova, yumi bai stap gut, kisim ol blesing, na stap amamas. Olsem na yumi mas bihainim pasin bilong Maika long stap isi na wetim God long helpim yumi!

¹⁶ Yu tu inap stap belgut sapos yu bihainim pasin daun na wetim Jehova i helpim yu. (Sng. 42:5) Ating yu “laik kisim gutpela wok,” olsem na yu wok long winim ol mak bilong “kamap wasman.” (1 Tim. 3:1-7) Em tru olsem yu mas mekim olgeta samting yu inap mekim bambai holi spirit inap helpim yu long kisim ol pasin yu mas gat bilong i stap olsem wasman. Tasol, olsem wanem sapos longpela taim i lus na yu no kisim yet wok olsem wasman? Man i daunim em yet na i stap isi na wet long kisim wok, em bai mekim yet wok bilong Jehova na amamas long mekim olgeta kain wok ol i givim em long mekim.

17, 18. (a) Taim yumi askim ol narapela long fogivim yumi, na yumi tu i redi long fogivim ol narapela, wanem ol gutpela samting i save kamap? (b) Sindaun 6:1-5 i kirapim yumi long bihainim wanem pasin?

¹⁷ Taim yumi poroman wantaim ol narapela. Planti manmeri i hatwok long tok sori long narapela. Tasol ol wokman bilong God i daunim ol yet na tokaut long rong bilong ol na askim narapela long fogivim ol. Na ol yet tu i redi long fogivim rong narapela i mekim long ol. Insait long kongrigesen, pasin antap i save kamapim kros na kirapim ol man long brukim lain, tasol pasin bilong lusim rong i save strongim bel isi.

¹⁸ Taim sampela samting i kamap na yumi no mekim samting yumi bin pasim tok long mekim, yumi inap daunim yumi yet na “stap aninit” long narapela na tok sori long rong bilong yumi. Maski narapela i gat hap asua, Kristen husat i gat pasin daun bai tokaut olsem em yet i gat asua.—Ritim Sindaun 6:1-5.

19. Bilong wanem yumi mas tenkyu olsem Baibel i kirapim yumi long bihainim pasin bilong daunim yumi yet?

¹⁹ Yumi tenkyu tru olsem Baibel i kirapim yumi long kisim pasin bilong daunim yumi yet! Ating sampela taim bai i hatwok long yumi mekim olsem. Tasol sapos yumi gat stretpela tingting long yumi stap olsem wanem long ai bilong Jehova na pilim tru pasin daun em i mekim, orait dispela inap kirapim yumi long kisim pasin daun. Taim yumi mekim olsem, dispela bai helpim yumi long i stap olsem ol gutpela wokman i dia tru long ai bilong Jehova. Olsem na i gutpela yumi olgeta wan wan i bihainim pasin bilong daunim yumi yet.