Orait nau Sairus i wok long redi long pait wantaim strongpela gavman Babilon. Kirap long dispela taim em i insait long truim bilong sampela tok profet bilong Baibel. Tu handet yia paslain, long rot bilong profet Aisaia, Jehova i tokaut olsem Sairus bai daunim Babilon na larim ol Juda i lusim kalabus. Jehova i bin makim Sairus long mekim dispela wok, olsem na Baibel i kolim Sairus olsem man Jehova i “makim.”​—Aisaia 44:​26-28.

Taim Sairus i daunim Babilon, dispela i makim taim bilong ol Juda i stap long Babilon long lusim kalabus, na dispela i makim pinis bilong 70 yia em graun bilong ol i stap nating. Ol i mas amamas nogut tru taim Sairus i mekim wanpela tokaut i makim olsem em i orait long ol i go bek long Jerusalem na wokim gen tempel! Na tu, Sairus i givim bek long ol ol plet kap samting bilong tempel Nebukatnesar i bin karim i go long Babilon, na em i orait long ol i kisim ol diwai long Lebanon, na em i makim hap mani bilong haus bilong king long baim ol samting bilong wokim gen tempel.​—Esra 1:​1-11; 6:​3-5.