Sapta 9
Husat Bai Bosim Graun?
1-3. Stori long ol driman samting Daniel i bin lukim long namba wan yia bilong Belsasar i stap king.
ORAIT nau dispela gutpela tok profet bilong Daniel i stori long samting i bin kamap long namba wan yia bilong Belsasar i stap king bilong Babilon. Daniel i stap kalabus pinis inap planti yia long Babilon, tasol i no gat wanpela taim em i bin surik na lusim Jehova liklik. Nogat. Em i gat 70 krismas samting na nau dispela gutpela profet i lukim “samting olsem driman long nait.” Em i pret nogut tru long ol samting em i lukim long driman!—Daniel 7:1, 15.
2 Daniel i tok: “Win i kam long olgeta hap na i mekim solwara i kirap na biksi i bruk nabaut. Na 4-pela narakain narakain bikpela animal i lusim biksi na i kam antap.” Em ol narakain animal tru! Namba wan i olsem laion i gat wing, na namba tu i olsem bea. Bihain wanpela lepat i kam, em i gat 4-pela wing na 4-pela het! Namba 4 animal i gat bikpela strong na bikpela tit ain na 10-pela kom. Wanpela “liklik” kom i kamap namel long 10-pela kom, na kom i gat “ai na maus bilong man” na “em i hambak na litimapim nem bilong em yet.”—Daniel 7:2-8.
3 Orait nau Daniel i lukim driman bilong ol samting long heven. Man bilong bipo bipo i sindaun long sia king olsem Jas long Kot long heven. “I gat planti tausen manmeri i mekim wok bilong dispela Man, na planti milion manmeri i sanap klostu long em.” Em i skelim 4-pela animal na ol i lus long kot, olsem na em i rausim ol long wok king na em i kilim i dai namba 4 animal. Orait, wok king bilong bosim “olgeta manmeri bilong olgeta kantri na olgeta lain na olgeta tok ples” inap oltaim oltaim em i givim long “wanpela man i wankain olsem yumi man bilong graun.”—Daniel 7:9-14.
4. (a) Daniel i askim husat long givim save long em? (b) Samting Daniel i bin lukim na harim long dispela nait, bilong wanem em i bikpela samting long yumi?
4 Daniel i tok: “Mi lukim ol samting long dispela driman na mi kirap nogut na tingting planti.” Olsem na em i askim wanpela ensel long “as bilong dispela driman.” Na ensel i tokim em long insait bilong ol dispela samting. (Daniel 7:15-28) Yumi gat bikpela laik long save long ol samting Daniel i bin lukim na harim long dispela nait, long wanem, dispela driman i stori long ol samting i mas kamap bihain, i kam inap long taim bilong yumi. Long dispela taim “wanpela man i wankain olsem yumi man bilong graun” i kisim wok king bilong bosim “olgeta manmeri bilong olgeta kantri na olgeta lain na olgeta tok ples.” Sapos yumi kisim helpim long Baibel na spirit bilong God, yumi tu inap save long insait bilong ol dispela driman samting i olsem tok profet.a
FOPELA BIKPELA ANIMAL I LUSIM BIKSI
5. Biksi i makim wanem samting?
5 Daniel i tok: “Na 4-pela narakain narakain bikpela animal i lusim biksi na i kam antap.” (Daniel 7:3) Biksi i makim wanem samting? Planti yia bihain, aposel Jon i lukim wanpela wel animal i gat 7-pela het i kamap long “solwara.” Dispela solwara i makim “ol manmeri bilong olgeta lain man na bilong olgeta kain skin na bilong olgeta tok ples na bilong ol bikpela bikpela lain”—em olgeta man i no stap aninit long God. Olsem na biksi i makim stret bikpela lain manmeri ol i birua long God.—KTH 13:1, 2; 17:15; Aisaia 57:20.
6. Fopela animal i makim wanem samting?
6 Ensel bilong God i tok: “Dispela 4-pela bikpela animal i makim 4-pela strongpela kantri bai i kamap.” (Daniel 7:17) Ensel i tokaut klia olsem, 4-pela animal Daniel i lukim i makim “4-pela strongpela kantri.” Olsem na ol dispela animal i makim ol bikpela gavman i bosim graun. Tasol wanem ol gavman?
7. (a) Sampela saveman i tok wanem long driman bilong Daniel long 4-pela animal na driman bilong Nebukatnesar long bikpela imis? (b) Fopela hap bilong imis i makim wanem samting?
7 Planti saveman bilong Baibel i tok driman bilong Daniel long 4-pela animal na driman bilong Nebukatnesar long bikpela imis, tupela i stori long wankain samting. Olsem: Wanpela buk (The Expositor’s Bible Commentary), i tok: “Sapta 7 [bilong Buk Daniel] i stori long wankain samting olsem sapta 2.” Narapela buk (The Wycliffe Bible Commentary), i tok: ‘Planti man i wanbel olsem 4-pela gavman Daniel sapta 7 i stori long en i wankain olsem 4-pela gavman Daniel sapta 2 i stori long en.’ Fopela strongpela gavman em imis bilong driman bilong Nebukatnesar i makim em Babilon (het gol), Midia-Persia (bros na tupela han silva), Grik (namel ol i wokim long bras), na Rom (tupela lek ain).b (Daniel 2:32, 33) Nau yumi ken skelim olsem wanem ol dispela gavman i wankain olsem dispela 4-pela bikpela animal Daniel i bin lukim.
NOGUT OLSEM LAION, SPIT OLSEM TARANGAU
8. (a) Daniel i stori olsem wanem long namba wan animal? (b) Namba wan animal i makim wanem gavman? Olsem wanem em i bihainim pasin bilong wanpela laion?
8 Daniel i lukim ol animal i narakain stret! Em i stori long wanpela olsem: “Namba wan i olsem laion, na i gat wing olsem bikpela tarangau. Mi lukluk yet na mi lukim ol i rausim wing bilong en na ol i sanapim em long lek olsem man. Na ol i givim tingting bilong man long en.” (Daniel 7:4) Dispela animal i makim wankain gavman olsem het gol bilong bikpela imis, em Gavman Babilon (607-539 B.C.E.). Olsem wanpela “laion,” Babilon i bin kaikaim ol kantri, na lain bilong God tu. (Jeremaia 4:5-7; 50:17) Em i spit tru long daunim ol kantri, olsem em i gat wing bilong tarangau.—Krai 4:19; Habakuk 1:6-8.
9. Wanem senis i kamap long dispela animal i olsem laion? Ol dispela senis i mekim wanem long en?
9 Bihain ol i “rausim” wing bilong en. Klostu long pinis bilong wok king bilong Belsasar, Babilon i no moa daunim kwik na bosim strong ol kantri olsem wanpela laion. I olsem em i wokabaut long tupela lek olsem man. Em i kisim “tingting bilong man” na i no gat strong moa. Babilon i no “sanap strong olsem laion,” olsem na em i no inap bihainim pasin bilong laion “long painim abus long bus.” (Skelim wantaim 2 Samuel 17:10; Maika 5:8.) Narapela bikpela animal i daunim em.
KAIKAI MOA YET OLSEM BEA
10. “Bea” i makim wanem lain king?
10 Daniel i tok: “Orait mi lukim namba 2 animal i sanap long lek bilong en [“na wanpela sait i go antap,” NW ], na em i olsem wanpela bikpela animal ol i kolim bea. Em i holim 3-pela bun bilong banis bilong wanpela abus long maus bilong en. Na wanpela tok i kamap long em olsem, ‘Goan, kaikai planti mit.’ ” (Daniel 7:5) Kantri em bea i makim i wankain olsem kantri em bros na tupela han silva bilong bikpela imis i makim—em lain king bilong Midia-Persia (539-331 B.C.E.) kirap long Darius bilong Midia na Bikpela King Sairus na pinis long Darius 3.
11. Bea i sanap long lek bilong en na wanpela sait i go antap, em i makim wanem samting? Tripela bun long maus bilong en i makim wanem samting?
11 Dispela bea i sanap long lek bilong en na wanpela sait i go antap, na ating dispela i makim olsem em i redi long pait na daunim ol gavman na bosim graun. O ating dispela i makim ol king bilong Persia bai kamap strong na bosim ol kantri bihain long king bilong Midia, em Darius. Ating 3-pela bun long maus bilong bea i makim 3-pela hap em i go long en na i wok long winim pait. Dispela “bea” bilong Midia-Persia i bin go long hap not bilong daunim Babilon long 539 B.C.E. Bihain em i go long hap wes long Esia Maina na Tres. Bihain moa dispela “bea” i go long hap saut na daunim Isip. Sampela taim namba 3 i makim samting yumi strong long mekim, olsem na dispela 3-pela bun inap makim olsem bea em i strong long kisim ol narapela kantri.
12. Wanem samting i kamap taim bea i bihainim dispela tok: “Goan, kaikai planti mit”?
12 Dispela “bea” i pait long ol kantri na i olsem em i bihainim dispela tok: “Goan, kaikai planti mit.” Taim Midia-Persia i mekim laik bilong God na daunim Babilon, em inap mekim gutpela wok bilong helpim lain bilong Jehova. Na tru tumas, em i mekim olsem! (Lukim “Wanpela King i Save Isi Long Ol Man,” long pes 149.) Long rot bilong Bikpela King Sairus, Darius 1 (Bikpela King Darius), na Artaserksis 1, Midia-Persia i bin larim ol Juda i lusim Babilon na helpim ol long wokim gen tempel bilong Jehova na stretim banis bilong Jerusalem. Bihain, taim man bilong Kwin Esta, em Serksis 1, i stap king, Midia-Persia i bosim 127 provins, stat long India na i go inap long Itiopia. (Esta 1:1) Tasol narapela animal i laik kamap.
SPIT OLSEM WANPELA LEPAT I GAT WING!
13. (a) Namba 3 animal i makim wanem samting? (b) Yumi ken tok wanem long spit bilong namba 3 animal na hap graun em i bosim?
13 Namba 3 animal i “olsem bikpela wel pusi ol i kolim lepat. Dispela samting i gat 4-pela wing olsem wing bilong pisin i stap long baksait bilong en, na em i gat 4-pela het. Na ol i givim em strong bilong bosim olgeta samting.” (Daniel 7:6) Olsem namel bras bilong dispela imis long driman bilong Nebukatnesar, dispela lepat i gat 4-pela het i makim lain king bilong Masedonia, o Grik, kirap long Bikpela King Aleksander. Olsem wanpela lepat i spit tru, Aleksander i go long Esia Maina, na saut long Isip, na bihain em i go long hap is inap long boda bilong India. (Skelim wantaim Habakuk 1:8.) Hap graun em i bosim i bikpela moa, winim hap em “bea” i bin bosim, long wanem, em i bosim Masedonia, kantri Grik, na olgeta hap em Gavman Persia i bin bosim.—Lukim “Yangpela King i Kisim Olgeta Hap Graun,” long pes 153.
14. Olsem wanem “lepat” i kisim 4-pela het?
14 Bihain long indai bilong Aleksander long 323 B.C.E., dispela “lepat” i kisim 4-pela het. Bihain 4-pela jeneral bilong em i kisim ples bilong em long ol narapela narapela hap em i bin bosim. Selukus i kisim Mesopotemia na Siria. Tolemi i bosim Isip na Palestain. Laisimakus i bosim Esia Maina na Tres, na Kasanda i kisim Masedonia na kantri Grik. (Lukim “Ol i Brukim Wanpela Bikpela Gavman,” long pes 162.) Bihain wanpela nupela animal nogut i kamap.
ANIMAL I NOGUT TRU NA I NARAKAIN
15. (a) Stori long namba 4 animal. (b) Namba 4 animal i makim wanem samting? Olsem wanem em i wok long kaikai olgeta samting na bagarapim tru?
15 Daniel i tok long namba 4 animal olsem “pes bilong en i nogut tru na em i gat bikpela strong moa, na mi pret tru long en.” Em i stori moa olsem: “Em i gat bikpela tit ain na em i wok long kaikai olgeta samting na bagarapim tru. Na bihain em i krungutim na memeim pipia i bin pundaun. Dispela animal i no wankain olsem ol arapela animal, long wanem, em i gat 10-pela kom long het bilong en.” (Daniel 7:7) Pastaim dispela animal nogut tru em gavman bilong Rom tasol. Isi isi em i wok long kisim dispela 4-pela hap bipo Gavman Grik i bosim, na long yia 30 B.C.E., Rom i kamap strongpela gavman bilong bosim graun bihain long Gavman Grik, olsem tok profet bilong Baibel i stori long en. Long strong bilong ami bilong en, Gavman Rom i daunim planti kantri, na bihain em i bosim ol graun kirap long Inglan i go long Yurop na long olgeta hap klostu long Mediterenian, na i go moa long Babilon na i go inap long Galf Bilong Persia.
16. Ensel i tok wanem long dispela namba 4 animal?
16 Daniel i laik save gut long dispela animal i mekim em i “pret tru,” olsem na em i putim gut yau long tok bilong ensel: “Dispela 10-pela kom i olsem 10-pela king bai i kamap long dispela kantri. Bihain narapela king bai i kamap na em bai i narakain tru long ol king i bin kamap pastaim. Em bai i rausim tripela king.” (Daniel 7:19, 20, 24) Dispela “10-pela kom” o “10-pela king” i makim wanem samting?
17. Dispela “10-pela kom” bilong namba 4 animal i makim wanem samting?
17 Rom i kamap wanpela kantri i gat planti mani samting na i wok long bagarap, long wanem, ol man i bosim kantri ol i save mekim pasin pamuk na pasin i gat sem, na em i no strong moa long pait olsem long bipo. Bihain, strong bilong ami bilong Rom i wok long pinis na dispela i kamap ples klia. Bihain moa, dispela strongpela gavman i bruk bruk na i kamap planti narapela narapela gavman. Planti taim long Baibel namba 10 i makim samting em inap tru o inap olgeta, olsem na “10-pela kom” bilong namba 4 animal i makim olgeta gavman i kamap taim Rom i bruk bruk.—Skelim wantaim Lo 4:13; Luk 15:8; 19:13, 16, 17.
18. Olsem wanem Rom i bosim yet Yurop inap planti handet yia bihain long taim ol i rausim laspela king bilong en?
18 Tasol Gavman Rom i no pinis long taim ol i rausim laspela king bilong en long Rom long 476 C.E., nogat. Inap planti handet yia pop bilong Rom i wok long bosim ol samting bilong politik na lotu long Yurop. Em i bosim ol dispela hap olsem: Ol man long Yurop i bin stap aninit long ol bikman, na ol bikman i aninit long ol king, na olgeta king i daun long pop. Olsem na Gavman Holi Bilong Rom, em pop bilong Rom i het bilong en, i bosim ol samting bilong graun insait long ol yia (500-1000 C.E.) ol i kolim Taim Bilong Tudak.
19. Olsem wanpela saveman i tok, Rom i narapela kain long ol gavman bilong pastaim olsem wanem?
19 Husat inap sakim dispela tok olsem namba 4 animal “i no wankain olsem ol arapela animal”? I no gat wanpela, a? (Daniel 7:7, 19, 23) Saveman H. G. Wells i tok: “Long planti samting Gavman Rom i narapela kain long ol narapela strongpela gavman i bin i stap bipo. . . . [Em] i bosim klostu olgeta lain Grik long olgeta hap bilong graun, na planti ol man i stap aninit long en, ol i no bilong lain Ham na Sem olsem lain bilong ol narapela gavman paslain long en . . . Gavman Rom em nupela kain gavman i kru na kamap, na ol man i no tingting pastaim na kamapim; na ol man bilong Rom ol i no save olsem ol i wok long kamapim nupela pasin long bosim ol man.” Tasol dispela namba 4 animal bai kamapim narapela kru yet.
WANPELA LIKLIK KOM I WINIM OL NARAPELA
20. Ensel i tok wanem long liklik kom i kamap namel long ol 10-pela kom long het bilong namba 4 animal?
20 Daniel i tok: “Mi lukluk strong yet long ol dispela 10-pela kom na mi lukim wanpela liklik kom i kamap namel long ol. Dispela nupela kom i kamautim tripela kom i bin i stap bipo.” (Daniel 7:8) Ensel i stori long dispela kom na em i tokim Daniel: “Bihain [long 10-pela king] narapela king bai i kamap na em bai i narakain tru long ol king i bin kamap pastaim. Em bai i rausim tripela king.” (Daniel 7:24) Dispela king em i husat? Em i kamap long wanem taim? Tripela king em i rausim, ol i husat?
21. Olsem wanem Inglan i kamap liklik kom bilong namba 4 animal?
21 Tingim ol dispela samting i bin kamap: Long 55 B.C.E., Jeneral Julius Sisar bilong Rom i kam insait long Inglan tasol em i no inap kamapim wanpela taun samting bilong ol Rom. Long 43 C.E., Empera [olsem King] Klodius i wok strong moa long daunim na kisim hap saut bilong Inglan. Orait long 122 C.E., Empera Hadrian i stat long wokim wanpela banis, kirap long wara Tain i go inap long wara Solwe Firt, na dispela i mak bilong boda bilong Gavman Rom long hap not. Long yia 400 samting, ami bilong Rom i lusim dispela ailan. Wanpela saveman i tok: “Long 1500 samting, Inglan i no strongpela kantri. Ol i no gat bikpela mani samting olsem kantri Netelan. Frans i gat planti manmeri moa. Na tu, ami na nevi bilong Inglan i no gat strong olsem ami na nevi bilong Spen.” Olsem na Inglan i olsem liklik gavman nating long dispela taim, na em i makim dispela liklik kom bilong namba 4 animal. Tasol dispela samting bai senis.
22. (a) Wanem 3-pela kom bilong namba 4 animal em “liklik” kom i daunim? (b) Inglan i kamap wanem samting?
22 Long 1588, Filip 2 bilong Spen i salim nevi bilong Spen long pait long Inglan. Nevi bilong Spen i gat 130 sip na 24,000 man, na ol i laik kam long Inglan, tasol nevi bilong Inglan i daunim ol na ol strongpela win na bikpela ren bilong solwara Atlantik i bagarapim ol. Wanpela saveman i tok, “dispela i makim nevi bilong Inglan i kamap strong moa, winim nevi bilong Spen.” Long 1600 samting, kantri Netelan (Holan) i kamapim nambawan bikpela nevi bilong karim kago. Tasol Inglan i wok long kisim planti kantri, olsem na nevi bilong en i gat bikpela strong moa, winim bilong Netelan. Namel long yia 1700 i go inap 1800, Inglan na Frans i pait wantaim long hap bilong Not Amerika na India, na long 1763 ol i sainim Kontrak Bilong Paris i tok long mekim i dai pait. William B. Willcox i tok dispela kontrak i “makim olsem Inglan i kamap nambawan strongpela gavman long hap bilong Yurop na long ol narapela hap tu.” Strong bilong Inglan long bosim graun i kamap ples klia taim ami bilong en i winim ami bilong Napoleon bilong Frans long 1815 C.E. Olsem na “tripela king” Inglan i bin “rausim” em Spen, Netelan, na Frans. (Daniel 7:24) Olsem na Inglan i kamap nambawan gavman i bosim planti kantri na wok bisnis. Em nau, “liklik” kom i go bikpela na kamap wanpela gavman i bosim graun!
23. Olsem wanem liklik kom i bin “daunim olgeta arapela kantri”?
23 Ensel i tokim Daniel olsem dispela namba 4 animal, o namba 4 kantri, bai “daunim olgeta arapela kantri.” (Daniel 7:23) Dispela tok i kamap tru long Inglan, bipo em i wanpela provins bilong Rom. Bihain em i kamap Gavman Inglan na em i “daunim olgeta arapela kantri.” Gavman Inglan i bin bosim 25 pesen bilong graun na 25 pesen bilong ol man.
24. Wanpela saveman i tok Gavman Inglan i narapela kain olsem wanem?
24 Gavman Rom em i narapela kain long ol gavman i bin stap paslain long en, na olsem tasol dispela king em “liklik” kom i makim, em tu bai “narakain tru long ol king i bin kamap pastaim.” (Daniel 7:24) Saveman H. G. Wells i stori long Gavman Inglan na em i tok: ‘I no gat kain gavman olsem long bipo. Em wanpela gavman i gat ol memba, tasol king i het bilong gavman . . . Dispela kain gavman i no kamap long tingting bilong wanpela man o dipatmen bilong gavman. Em i wanpela gavman i bungim kain kain tingting na em i narapela kain tru long ol narapela gavman i bin kamap bipo.’
25. (a) Long nau dispela liklik kom i makim wanem samting? (b) Olsem wanem “liklik” kom i gat ‘ai bilong man’ na maus bilong em i “hambak na litimapim nem bilong em yet”?
25 “Liklik” kom i no makim Gavman Inglan tasol. Long 1783, Inglan i orait long 13 provins bilong en long Amerika i kisim independens. Bihain, gavman bilong Amerika i wok wantaim Inglan, na taim Namba Tu Pait i pinis, em i stap olsem namba wan strongpela gavman long graun. Em i pas gut yet wantaim Inglan. Gavman bilong Inglan na Amerika i wok bung wantaim na ol i kamap olsem “kom i gat ai.” Tru tumas, dispela strongpela gavman i gat save long skelim gut ol samting long tingting! Em i save “hambak na litimapim nem bilong em yet” taim em i tokim ol narapela kantri long ol samting ol i mas mekim, na em i stap olsem maus, o “giaman profet” bilong ol.—Daniel 7:8, 11, 20; KTH 16:13; 19:20.
LIKLIK KOM I PAIT LONG GOD NA OL MANMERI BILONG EM
26. Dispela kom bai mekim wanem tok na pasin long Jehova na ol wokboi bilong em, olsem ensel i tok profet long en?
26 Daniel i stori yet long driman bilong em, olsem: “Mi bin lukim dispela kom i pait long ol manmeri bilong God na i wok long bagarapim ol.” (Daniel 7:21) Ensel i tok profet long dispela “kom,” o king, olsem: “Bai em i tok nogut long God Antap Tru na daunim ol manmeri bilong en. Na em bai traim long senisim ol lo bilong lotu na bilong ol bikpela de bilong lotu [“ol taim na lo,” NW ]. Na em bai i bosim ol manmeri bilong God inap long 3 na hap yia [“wanpela taim, na ol taim, na hap taim,” NW ].” (Daniel 7:25) Olsem wanem dispela hap bilong tok profet i kamap tru? Em i kamap tru long wanem taim?
27. (a) Dispela “ol manmeri bilong God” em “liklik” kom i mekim nogut long ol, ol i husat? (b) Olsem wanem dispela kom i traim long senisim “ol taim na lo”?
27 Dispela “ol manmeri bilong God” em “liklik kom”—olsem Gavman Inglan-Amerika—i mekim nogut long ol, em ol manmeri hia long graun em God i bin makim ol long spirit holi na ol i bihainim Jisas. (Rom 1:7; 1 Pita 2:9) Inap planti yia paslain long Namba Wan Pait, liklik hap lain bilong ol Kristen God i bin makim ol long spirit holi ol i givim tok lukaut long ol man olsem “taim God i bin makim bilong ol arapela lain man” i bosim graun bai pinis long 1914. (Luk 21:24) Taim pait i kirap long yia 1914, em i klia olsem “liklik” kom i sakim dispela tok lukaut, long wanem, em i wok yet long givim hevi long “ol manmeri bilong God.” Gavman Inglan-Amerika i birua long laik bilong ol long bihainim “lo” bilong Jehova, olsem ol witnes bilong em ol i mas autim gutnius bilong Kingdom long olgeta hap bilong graun. (Matyu 24:14) Olsem na “liklik” kom i traim long senisim “ol taim na lo.”
28. Dispela “wanpela taim, na ol taim, na hap taim” i longpela olsem wanem?
28 Ensel bilong Jehova i tok profet long “wanpela taim, na ol taim, na hap taim.” Em i longpela olsem wanem? Ol saveman bilong Baibel i wanbel long tok dispela tok i makim 3-pela na hap taim—bungim wanpela taim, na tupela taim, na hap taim. Tingim: Dispela “7-pela hap taim” em Nebukatnesar i bin i stap longlong i makim 7-pela yia, olsem na 3-pela na hap taim i makim 3-pela na hap yia.c (Daniel 4:16, 25) Baibel An American Translation i tok: “Em bai bosim ol wanpela yia, na tupela yia, na hap yia.” Baibel bilong James Moffatt i tok: “Inap 3-pela yia na hap yia.” Kamapim Tok Hait 11:2-7 i stori long wankain hap taim, na i tok tupela man bilong autim tok bai pasim klos bilong sori na autim tok inap long 42 mun, o 1,260 de, na bai ol i kilim tupela i dai. Dispela hap taim i bin kirap long wanem taim? Em i pinis long wanem taim?
29. Dispela 3 na hap yia i bin kirap long wanem taim? Em i kirap olsem wanem?
29 Long taim bilong Namba Wan Pait ol traim i painim ol Kristen God i bin makim. Klostu long pinis bilong 1914, ol i save ol man bai kirap mekim nogut long ol. Yia-teks ol i makim bilong 1915 em wanpela askim Jisas i bin givim long ol disaipel bilong em olsem, ‘Yupela inap dring long dispela kap mi bai dring long en?’ Ol i kisim dispela tok long Matyu 20:22. Olsem na kirap long Disemba 1914, dispela liklik lain witnes ol i “pasim klos bilong sori” na ol i autim tok.
30. Long taim bilong Namba Wan Pait, olsem wanem Gavman Inglan-Amerika i bin mekim nogut long ol Kristen God i makim?
30 Ol man i givim bel long pait, na ol i putim hevi long ol Witnes na kalabusim sampela. Ol i givim bikpela pen long sampela, olsem Frank Platt long Inglan na Robert Clegg long Kanada. Long Februeri 12, 1918, gavman bilong Kanada, em Inglan i bosim, em i tambuim buk The Finished Mystery, em volium namba 7 bilong ol buk Studies in the Scriptures, na liklik nius nem bilong en The Bible Students Monthly. Long mun bihain, Dipatmen bilong Jastis bilong Amerika i tambuim ol man long tilim volium namba 7. Wanem samting i kamap long dispela? Ol polis i go long haus bilong ol Witnes bilong painim na kisim ol buk samting, na ol i kalabusim ol man i lotu long Jehova!
31. “Wanpela taim, na ol taim, na hap taim” i pinis long wanem taim? Em i pinis olsem wanem?
31 Pasin bilong mekim nogut long ol Kristen God i makim i go moa nogut long Jun 21, 1918, taim gavman i sutim tok giaman long presiden J. F. Rutherford wantaim ol dairekta bilong Sosaiti Was Taua, na kot i makim bikpela yia ol i mas kalabus. “Liklik” kom i laik senisim “ol taim na lo,” na em i kilim i dai wok bilong autim tok. (KTH 11:7) Olsem na dispela “wanpela taim, na ol taim, na hap taim” bilong tok profet i pinis long Jun 1918.
32. Bilong wanem yumi ken tok “liklik” kom i no bagarapim “ol manmeri bilong God” olgeta?
32 Tasol pasin birua “liklik” kom i mekim long “ol manmeri bilong God” i no bagarapim ol olgeta. Olsem Buk Kamapim Tok Hait i tok profet long en, inap sotpela taim ol Kristen God i bin makim ol i no mekim wok, na bihain ol i kamap laip na mekim wok gen. (KTH 11:11-13) Long Mas 26, 1919, presiden bilong Sosaiti Was Taua wantaim ol wanwok bilong em i lusim kalabus, na bihain kot i tok ol i no bin mekim rong. Kwiktaim dispela liklik lain God i bin makim ol i stretim rot long kirapim gen wok bilong autim tok. Tasol wanem samting bai painim dispela “liklik” kom?
MAN BILONG BIPO BIPO I KIRAPIM KOT
33. (a) Man bilong bipo bipo em i husat? (b) Wanem ol dispela ‘buk ol i opim’ long Kot bilong heven?
33 Pastaim Daniel i stori liklik long 4-pela animal, na bihain em i lukluk long samting i kamap long heven. Em i lukim Man bilong bipo bipo i sindaun olsem Jas long sia king bilong en. Dispela Man bilong bipo bipo em God Jehova tasol. (Song 90:2) Kot i laik kirap, na Daniel i lukim sampela “i opim ol buk.” (Daniel 7:9, 10) Jehova i bin i stap oltaim oltaim, olsem na em i save long olgeta samting ol man bilong graun i bin mekim, i olsem ol dispela samting i stap long wanpela buk. Em i bin lukim olgeta 4-pela animal tok profet i stori long en na em inap kotim ol long ol samting em yet i lukim ol i mekim.
34, 35. Wanem samting bai painim “liklik” kom wantaim ol gavman em 3-pela narapela animal i bin makim?
34 Daniel i tok moa: “Mi lukluk yet na mi harim dispela liklik kom bilong namba 4 animal i wok long litimapim nem bilong em yet. Orait na mi lukim ol i kilim i dai dispela namba 4 animal na tromoi bodi bilong en i go long paia na paia i kukim olgeta wantaim kom bilong en. Na long dispela tripela animal i stap yet, ol i pinisim strong bilong ol na i no larim ol i bosim moa ol samting. Tasol ol i no kilim ol kwik. Ol i larim ol i stap liklik taim.” (Daniel 7:11, 12) Ensel i tokim Daniel: “Dispela taim bilong en i pinis na God bai i kirapim kot, na bai em i pinisim strong bilong dispela king na bagarapim em olgeta.”—Daniel 7:26.
35 Bikpela Jas, em God Jehova, bai mekim tokaut bilong kot long dispela kom i bin tok bilas long God na mekim nogut long “ol manmeri bilong [em],” na wankain samting bai painim em olsem i bin painim Gavman Rom, em i bin mekim nogut long ol Kristen bilong bipo. Wok bilong dispela kom long bosim graun bai pinis. Na wok bos bilong ol narapela kom, olsem “king,” i bin kamap long Gavman Rom bai pinis. Tasol olsem wanem long wok bos bilong ol gavman em 3-pela narapela animal i bin makim? Tok profet i tok “ol i larim ol i stap liklik taim.” Hap graun ol i bin bosim i gat ol man i sindaun yet long en. Olsem, Irak i stap long hap bipo Babilon i bin bosim. Persia (Iran) na kantri Grik i stap yet. Ol dispela kantri, ol i hap bilong ol gavman bipo ol i bosim graun, ol i insait long Yunaitet Nesen. Ol dispela gavman tu bai pinis taim laspela bikpela gavman bilong bosim graun i kisim bagarap. Olgeta gavman bilong ol man bai kisim bagarap na i pinis olgeta long pait bilong “bikpela de bilong God I Gat Olgeta Strong.” (KTH 16:14, 16) Tasol husat bai bosim graun taim ol dispela samting i kamap pinis?
KLOSTU NAU—WANPELA GAVMAN I NO INAP PINIS!
36, 37. (a) Dispela tok “wanpela man i wankain olsem yumi man bilong graun” i makim husat? Wanem taim em i kamap long Kot long heven? Bilong wanem em i kamap long dispela Kot? (b) Wanem samting i kamap long 1914 C.E.?
36 Daniel i tok: “Long dispela driman bilong mi long nait, mi lukim wanpela man i wankain olsem yumi man bilong graun. Em i stap namel long ol klaut na i wokabaut i kam klostu long mi. Na ol i kisim em i go long dispela Man bilong bipo bipo yet.” (Daniel 7:13) Taim Jisas Krais i stap long graun em i tok em i “Pikinini Bilong Man,” na dispela i makim olsem em i wanblut bilong ol man. (Matyu 16:13; 25:31) Jisas i tokim Nambawan Kaunsil bilong ol Juda, olsem: “Bihain bai yupela i lukim Pikinini Bilong Man i sindaun long han sut bilong God i gat bikpela strong. Na em bai i stap antap long ol klaut bilong heven na i kam.” (Matyu 26:64) Olsem na long driman bilong Daniel, dispela man em ol man bilong graun i no inap lukim, em i kam kamap long God Jehova, em Jisas Krais, em i kirap bek pinis na kisim biknem long heven. Dispela samting i bin kamap long wanem taim?
37 God i wokim wanpela kontrak bilong Kingdom wantaim Jisas Krais, olsem em i bin wokim wantaim King Devit. (2 Samuel 7:11-16; Luk 22:28-30) Long 1914 C.E., dispela “taim God i bin makim bilong ol arapela lain man” i pinis, na i stret Jisas Krais, em tumbuna pikinini bilong Devit, i ken kisim wok bilong bosim Kingdom. Tok profet bilong Daniel i tok: “Dispela Man bilong bipo bipo yet i mekim em i kamap king na i givim em strong na biknem. Na em bai i stap king i gat strong oltaim oltaim, na wok king bilong en bai i no inap pinis. Na olgeta manmeri bilong olgeta kantri na olgeta lain na olgeta tok ples bai i stap aninit long en.” (Daniel 7:14) Em nau Kingdom bilong Mesaia i kamap long heven long 1914. Tasol i gat sampela moa ol i kisim wok bilong bosim dispela kingdom.
38, 39. Husat bai kisim wok bilong bosim graun oltaim oltaim?
38 Ensel i tok: “Ol manmeri bilong God Antap Tru ol bai i kamap olsem ol king.” (Daniel 7:18, 22, 27) Jisas Krais em i nambawan bilong dispela lain. (Aposel 3:14; 4:27, 30) “Ol manmeri bilong God,” em lain 144,000 God i bin makim ol long spirit holi na ol i stap gut long em, ol bai kisim Kingdom na wok king wantaim Krais. (Rom 1:7; 8:17; 2 Tesalonaika 1:5; 1 Pita 2:9) Ol i kirap bek long matmat na kamap ol spirit i no inap dai bambai ol i ken wok king wantaim Krais long maunten Saion bilong heven. (KTH 2:10; 14:1; 20:6) Olsem na Krais Jisas wantaim ol Kristen God i bin makim na ol i kirap bek pinis ol bai bosim ol man bilong graun.
39 Ensel bilong God i stori long wok king bilong Pikinini Bilong Man wantaim “ol manmeri bilong God” ol i kirap bek pinis, na em i tok: “God Antap Tru bai i givim biknem na strong bilong olgeta king bilong graun i go long ol manmeri bilong en. Na ol bai i stap king oltaim oltaim. Na olgeta kantri bai i stap aninit long ol manmeri bilong God na bihainim tok bilong ol.” (Daniel 7:27) Ol manmeri bilong bihainim tok bai kisim planti blesing aninit long dispela Kingdom!
40. Taim yumi putim yau long ol driman samting bilong Daniel, dispela inap helpim yumi olsem wanem?
40 Daniel i no save long ol gutpela truim bilong ol driman God i bin givim long em. Em i tok: “Em tasol olgeta tok bilong dispela driman mi bin lukim. Mi Daniel, mi pret nogut tru na pes bilong mi i bin senis olgeta. Na mi tingting strong long ol dispela samting.” (Daniel 7:28) Tasol yumi stap long taim yumi inap kisim save long truim bilong ol samting Daniel i bin lukim. Taim yumi putim yau long dispela tok profet, dispela bai strongim bilip na tingting bilong yumi olsem King Mesaia, em Jehova i makim, bai bosim dispela graun.
[Ol Futnot]
a Ol ves bilong Daniel 7:15-28 i kamapim as bilong ol tok i stap long Daniel 7:1-14. Olsem na bilong ol tok i ken klia, taim mipela skelim ol wan wan ves bilong Daniel 7:1-14, mipela bai kamapim tu ol tok i stap long Daniel 7:15-28.
b Lukim Sapta 4 bilong dispela buk.
c Lukim Sapta 6 bilong dispela buk.
YU BIN KISIM WANEM SAVE?
• Fopela bikpela animal wan wan i lusim biksi na kam antap, ol i makim wanem samting?
• Dispela “liklik” kom i makim wanem samting?
• Olsem wanem dispela liklik kom i bin mekim nogut long “ol manmeri bilong God” long taim bilong Namba Wan Pait?
• Wanem samting bai painim dispela liklik kom wantaim ol narapela gavman em 3-pela narapela animal i makim?
• Taim yu putim yau long ol driman samting bilong Daniel i stori long fopela bikpela animal, dispela i bin helpim yu olsem wanem?
[Blok/Ol Piksa long pes 149-152]
WANPELA KING I SAVE ISI LONG OL MAN
WANPELA man Grik bilong yia 400 samting i tingim dispela man olsem wanpela man i save isi long ol narapela na em i wanpela gutpela king. Baibel i tok God i bin “makim” em na em i olsem “tarangau” i kam long “hap sankamap.” (Aisaia 45:1; 46:11) King yumi stori long en em Bikpela King Sairus bilong Persia.
Sairus i kirap kisim biknem long 560/559 B.C.E. samting taim em i senisim papa bilong em, Kambisis 1, na kamap king bilong Ansan, em wanpela taun o distrik bilong Persia. Ansan i stap aninit long King Astaijis bilong Midia. Sairus i bikhet na pait long Midia na kwiktaim em i win, long wanem, ami bilong Astaijis i lusim em na kam long lain bilong Sairus. Na bihain ol Midia i stap gut long Sairus. Kirap long dispela taim, ol Midia na Persia i wanbel long bihainim Sairus long pait. Olsem na long dispela rot gavman Midia-Persia i kamap na i bosim hap graun kirap long solwara Ijien i go inap long wara Indus.—Lukim mep.
Sairus i bungim ami bilong Midia na Persia na em i go pait long hap wes bilong Midia—long dispela hap King Krisas bilong Lidia i wok long kisim graun bilong Midia. Sairus i kam long Esia Maina long boda bilong graun em Gavman Lidia i bosim na em i daunim Krisas na kisim namba wan biktaun bilong em, Sardis. Bihain Sairus i daunim ol taun bilong Aionia, na olgeta hap bilong Esia Maina i stap aninit long Gavman Midia-Persia. Taim em i mekim olsem em i kamap nambawan gavman bilong resis wantaim Babilon na king bilong en, Nabonaidas.
Orait nau Sairus i wok long redi long pait wantaim strongpela gavman Babilon. Kirap long dispela taim em i insait long truim bilong sampela tok profet bilong Baibel. Tu handet yia paslain, long rot bilong profet Aisaia, Jehova i tokaut olsem Sairus bai daunim Babilon na larim ol Juda i lusim kalabus. Jehova i bin makim Sairus long mekim dispela wok, olsem na Baibel i kolim Sairus olsem man Jehova i “makim.”—Aisaia 44:26-28.
Taim Sairus i laik pait long Babilon long 539 B.C.E., em i gat bikpela hatwok. I luk olsem ol ami i no inap daunim dispela taun, long wanem, ol bikpela banis na bikpela baret wara, em wara bilong Yufretis i pulap long en, i raunim taun. Long hap em wara Yufretis i ran namel long Babilon, i gat bikpela banis wantaim ol bikpela dua bras bilong en i stap long arere bilong wara. Olsem wanem Sairus inap daunim Babilon?
Winim 100 yia paslain, Jehova i bin tok profet olsem “olgeta wara bilong en i mas drai.” (Jeremaia 50:38) Olsem tok profet i tok, Sairus i wokim wanpela baret sampela kilomita long hap not bilong Babilon na bai wara Yufretis i ken ran long dispela baret, na taim wara i slek ami bilong em i wokabaut long as bilong dispela wara na i go antap long hapsait na go insait long taun, na ol i no gat hatwok, long wanem, ol soldia bilong Babilon i bin larim ol dua i op i stap. Olsem wanpela “tarangau” i save kisim abus kwiktaim, dispela king bilong “hap sankamap”—em hap bilong is—i daunim Babilon long wanpela nait tasol!
Taim Sairus i daunim Babilon, dispela i makim taim bilong ol Juda i stap long Babilon long lusim kalabus, na dispela i makim pinis bilong 70 yia em graun bilong ol i stap nating. Ol i mas amamas nogut tru taim Sairus i mekim wanpela tokaut i makim olsem em i orait long ol i go bek long Jerusalem na wokim gen tempel! Na tu, Sairus i givim bek long ol ol plet kap samting bilong tempel Nebukatnesar i bin karim i go long Babilon, na em i orait long ol i kisim ol diwai long Lebanon, na em i makim hap mani bilong haus bilong king long baim ol samting bilong wokim gen tempel.—Esra 1:1-11; 6:3-5.
Sairus i save mekim gutpela pasin na pasin isi long ol lain em i daunim. Ating wanpela as bilong dispela em lotu bilong em. I luk olsem Sairus i save bihainim tok bilong profet Soroasta bilong Persia na em i lotuim Ahura Masda—em wanpela god ol i ting em i god bilong wokim olgeta gutpela samting. Long buk bilong em (The Zoroastrian Tradition), Farhang Mehr i tok: “Soroasta i tok God em i gutpela olgeta. Em i tokim ol man olsem Ahura Masda em i no god bilong bekim nogut long man, nogat, em i god bilong mekim stretpela pasin long man, olsem na ol i no ken pret long em, ol i mas laikim em.” Sairus i bilip long wanpela god i save bihainim stretpela pasin, na ating dispela i mekim na em i laik mekim gut long ol man na mekim stretpela pasin long ol.
Tasol king i pilim olsem long taim bilong san Babilon i hat tumas na em i les long sindaun long dispela hap. Olsem na maski taun i stap olsem wanpela taun bilong king, na wanpela biktaun bilong lotu na gavman, Sairus i save stap long en long taim bilong kol tasol. Em i daunim Babilon pinis, na i no longtaim na em i go bek long namba wan biktaun bilong en, em Ekbatana. Dispela taun i stap 1,900 mita antap long mak bilong solwara, long as bilong maunten Alwand. Long dispela hap em i amamas long taim bilong kol, na taim bilong san i no hat tumas. Na tu, Sairus i wokim wanpela naispela haus king long Pasargade (klostu long Pesepolis), bipo dispela em i namba wan biktaun bilong em na i stap 650 kilomita saut-is long Ekbatana. Dispela haus i kamap olsem ples malolo bilong em.
Olsem na ol man i save tingim Sairus olsem strongpela man bilong pait na kisim ol narapela kantri na em i wanpela king i save isi long ol man i stap aninit long em. Em i wok king inap 30 yia na em i dai long 530 B.C.E. taim em i raun wantaim ami long mekim pait. Pikinini bilong em Kambisis 2 i senisim em na i kamap king bilong Persia.
YU BIN KISIM WANEM SAVE?
• Olsem wanem Sairus bilong Persia i kamap man Jehova i “makim”?
• Sairus i mekim wanem gutpela wok bilong helpim ol manmeri bilong Jehova?
• Sairus i save mekim wanem kain pasin long ol lain em i daunim?
[Mep]
(Bilong save ol dispela rait i stap we long pes, lukim buk o magasin)
GAVMAN MIDIA-PERSIA
MASEDONIA
Memfis
ISIP
ITIOPIA
Jerusalem
Babilon
Ekbatana
Susa
Pesepolis
INDIA
[Piksa]
Matmat bilong Sairus, long Pasargade
[Piksa]
Piksa ol i sapim long ston long haus king bilong Sairus long Pasargade
[Blok/Ol Piksa long pes 153-161]
YANGPELA KING I KISIM OLGETA HAP GRAUN
INAP 2,300 yia i go pinis, wanpela jeneral i gat yelopela gras na i gat 20 krismas samting em i sanap long nambis bilong solwara Mediterenian. Em i lukluk strong long wanpela taun long wanpela ailan longwe olsem wanpela kilomita. Ol man bilong dispela taun i no larim em i kam insait, olsem na dispela jeneral i belhat na em i gat strongpela laik long daunim dispela taun. Em bai mekim olsem wanem? Em bai wokim wanpela bris olsem rot i go long ailan na pait long dispela taun. Wok bilong wokim dispela rot i kirap pinis.
Tasol i gat wanpela toksave i kam long bikpela king bilong Gavman Persia. Em i laik tru long sekan wantaim dispela jeneral, olsem na em i laik givim em planti samting olsem: Gol inap olsem siks bilion kina, wanpela pikinini meri bilong king bilong maritim, na olgeta hap wes bilong Gavman Persia bilong bosim. Em i laik givim olgeta dispela samting bilong kisim bek famili bilong em, em dispela jeneral i bin kisim ol.
Dispela jeneral i gat wok long skelim ol dispela samting, em Aleksander 3 bilong Masedonia. Em bai orait long kisim ol dispela samting? Man bilong raitim stori bilong ol samting i bin kamap bipo, em Ulrich Wilcken, i tok: “Samting Aleksander i mekim em i bikpela samting long ol man bilong graun long dispela taim bipo na i kam inap long taim bilong yumi long ol man i stap long hap Is na Wes.” Paslain long skelim bekim bilong Aleksander, yumi ken stori long ol samting i bin kamap pastaim.
WANPELA MAN BILONG WINIM PAIT I KAMAP
Mama i karim Aleksander long Pela, Masedonia, long 356 B.C.E. King Filip 2 em i papa bilong em, na Olimpias em mama bilong em. Mama i lainim Aleksander olsem tumbuna bilong ol king bilong Masedonia em Hekulis, pikinini bilong Sus, em god bilong ol Grik. Wanpela stori Homa i raitim (Iliad) i stori long wanpela strongpela soldia, nem bilong em Akilis, na Olimpias i tok Akilis em i tumbuna bilong Aleksander. Ol tok na pasin papamama i mekim long Aleksander i skulim em long kisim laik long daunim ol narapela kantri na kisim biknem olsem king, olsem na yangpela Aleksander i tingting long dispela samting tasol. Wanpela man i askim em olsem em bai insait long wanpela resis bilong Olimpik-Gems o nogat, na Aleksander i bekim tok olsem em bai mekim sapos em bai resis wantaim ol king. Em i laik mekim ol samting i winim papa bilong em na kisim biknem long ol samting em i mekim.
Taim Aleksander i gat 13 krismas, saveman bilong ol Grik, em Aristotal, i skulim em na kirapim em long stadi long ol save bilong dispela graun, na marasin, na saiens. Ol man i no klia olsem tingting bilong Aristotal i bin stiaim tingting bilong Aleksander, o i no tumas. Saveman Bertrand Russell i tok: “Tupela i no inap wanbel long planti samting. Pasin bilong ol wan wan taun Grik long bosim ol samting bilong ol yet i as bilong tingting bilong Aristotal long ol samting bilong wok politik, na dispela pasin i wok long pinis.” Dispela tingting olsem ol wan wan taun i bosim ol yet em i no stret wantaim tingting bilong wanpela yangpela prins i gat bikpela laik long kamapim wanpela bikpela gavman bilong bosim graun. Na ating Aleksander i no laikim tingting bilong Aristotal olsem olgeta man i no bilong lain Grik ol i olsem wokboi nating, long wanem, Aleksander i laik kamapim wanpela gavman i kamap strong, na ol man i winim pait na ol man i lus long pait ol i wok gut wantaim.
Tasol yumi save, Aristotal i kirapim Aleksander long kisim laik long rit na lain. Long olgeta taim em i laik tru long ritim ol buk, na em i laikim tru ol buk samting Homa i bin raitim. Ol i tok em inap kolim long tingting olgeta tok bilong buk Iliad—i gat 15,693 lain long en.
Skul bilong Aristotal i pinis wantu long 340 B.C.E. taim Aleksander i go bek long Pela bilong bosim Masedonia taim papa i no stap. Aleksander i no lusim taim long kisim biknem long pait. Filip i amamas taim Aleksander i daunim kwik wanpela bikhetlain bilong Tres ol i kolim Midi, na em i kisim namba wan biktaun bilong ol na givim nem Aleksandroupolis long en, i olsem nem bilong em yet.
DAUNIM YET OL LAIN
Ol man i kilim i dai Filip na Aleksander i kisim wok king long Masedonia long 336 B.C.E. taim em i gat 20 krismas. Aleksander i kam long Esia long rot bilong Helespon (long nau ol i kolim Dadaneles) long 334 B.C.E., na em i kirap long winim ol pait. Ami bilong em i liklik, olsem 30,000 soldia i wokabaut long lek na 5,000 ol i save sindaun long ol hos, tasol ol i save gut long wok bilong ol. Ol ensinia, ol man bilong makim graun, ol man bilong wokim piksa bilong ol haus samting, ol saientis, na ol saveman bilong raitim stori bilong ol samting i kamap, ol i go wantaim ami bilong em.
Long hap bilong wara Granikas long hap not-wes bilong Esia Maina (long nau em Turki), Aleksander i winim namba wan pait em i mekim wantaim ol Persia. Long taim bilong kol long 334 B.C.E. em i kisim hap wes bilong Esia Maina. Long yia bihain, em i mekim namba tu bikpela pait wantaim Persia long Isus, em long saut-is bilong Esia Maina. Long dispela hap strongpela king bilong Persia, em Darius 3, i kam wantaim 500,000 soldia bilong bungim Aleksander. Darius i bilip strong olsem em bai winim pait, olsem na em i bringim mama, na meri, na sampela wanblut moa bilong em i kam bambai ol inap lukim em i winim dispela pait. Tasol ami bilong Aleksander i kirap kwik tru long pait na ol i strong nogut tru na ol Persia i no redi long bekim pait long ol. Ami bilong Aleksander i daunim tru ami bilong Persia, na Darius i ranawe na larim famili bilong em i stap long han bilong Aleksander.
Aleksander i no laik ranim ol Persia, nogat. Em i mats i go long hap saut na bihainim nambis bilong solwara Mediterenian na wok long daunim ol taun em ol sip bilong Persia i save sua long en. Tasol taun i stap long ailan, em Tair, i sakim ami bilong em. Aleksander i gat strongpela tingting long daunim dispela taun, olsem na em i banisim taun inap 7-pela mun. Namel long dispela taim Darius i salim dispela toksave olsem em i laik sekan na pinisim pait, olsem yumi bin stori long en long kirap bilong dispela stori. Ol samting Darius i tok long givim em i gutpela tru, olsem na sampela i tok man i save givim tingting long Aleksander, em Parmenio, i bin tok: ‘Sapos mi Aleksander, bai mi tok orait long tok bilong Darius.’ Tasol yangpela jeneral i tok: ‘Sapos mi Parmenio, bai mi tok orait long tok bilong Darius.’ Aleksander i no laik sekan wantaim Darius, na em i wok yet long banisim Tair na em i bagarapim dispela strongpela taun long Julai, 332 B.C.E.
Ol lain long Jerusalem i givim ol yet long han bilong Aleksander, olsem na em i no bagarapim ol, na Aleksander i go saut na daunim Gasa. Ol Isip i les long Persia i bosim ol na ol i amamas long Aleksander i kamap olsem man bilong kisim bek ol. Long Memfis em i mekim ofa long bulmakau Apis, na dispela i amamasim ol pris bilong Isip. Em i kamapim biktaun Aleksandria, na bihain dispela taun i kamap ples bilong kisim bikpela skul, wankain olsem Atens, na nem bilong Aleksander i stap yet long dispela taun.
Bihain, Aleksander i go not-is long Palestain na long hap bilong wara Taigris. Long yia 331 B.C.E., em i mekim namba 3 bikpela pait wantaim ol Persia, long Gaugamela, klostu long ol hip pipia ston bilong Nineve. Long dispela hap, 47,000 soldia bilong Aleksander i daunim ami bilong Persia i gat samting olsem 250,000 soldia! Darius i ranawe na bihain ol lain bilong em yet i kilim em i dai.
Aleksander i amamas tru long winim pait, olsem na em i go saut na kisim Babilon. Na tu, em i kisim tupela biktaun, Susa na Pesepolis, na em i kisim bikpela haus mani bilong Persia na kukim bikpela haus king bilong Serksis. Bihain moa, em i kisim biktaun Ekbatana. Dispela man bilong daunim kwik ol narapela lain i kisim olgeta narapela hap bilong Persia, i go long hap is inap long wara Indus, em hap bilong kantri Pakistan long nau.
Taim em i brukim wara Indus klostu long boda bilong hapsait long provins Taksila bilong Persia, Aleksander i bungim wanpela strongpela birua, em King Porus bilong India. Dispela em i namba 4 bikpela pait bilong Aleksander na em i laspela pait bilong em, i kamap long Jun 326 B.C.E. Ami bilong Porus i gat 35,000 soldia na 200 elefan, na ol dispela elefan i pretim nogut tru ol hos bilong ami bilong Aleksander. Tupela lain wantaim ol i pait strong tru na planti blut i kapsait, tasol ami bilong Aleksander i winim pait. Porus i givim em yet long Aleksander na tupela gavman i pren wantaim.
Ami bilong Masedonia i bin lusim ples na i go long hap bilong Esia, na winim 8-pela yia ol i raun long pait, na strongpela pait ol i mekim wantaim Porus i mekim ol i les long pait na ol i laik go bek long ples. Pastaim Aleksander i no laik, tasol em i bihainim laik bilong ol soldia. Kantri Grik i kamap namba wan strongpela kantri i bosim graun. Ol lain bilong Grik i sindaun long ol hap ol i bin daunim, olsem na tok Grik na pasin Grik i kamap long dispela olgeta hap em kantri Grik i bosim.
PASIN BILONG ALEKSANDER
Pasin bilong Aleksander i mekim na ami bilong Masedonia i pas gut wantaim long ol dispela yia bilong pait. Bihain long ol pait, Aleksander i save go lukim ol man i bin kisim bagarap, na em bai skelim ol sua samting bilong ol, na litimapim nem bilong ol soldia i bin pait strong, na givim mani long ol long skel bilong pait ol i mekim. Em i save mekim bikpela bung bilong planim ol man i bin dai long pait. Na papamama na ol pikinini bilong ol man i dai long pait i no gat wok long baim takis na mekim ol wok ami samting. Bilong givim malolo long ol soldia bihain long ol pait, Aleksander i kirapim sampela pilai olsem spot samting. Wanpela taim em i larim ol soldia i marit nupela long go bek long Masedonia long taim bilong kol na stap wantaim meri bilong ol. Ol dispela kain pasin bilong em i mekim na ol soldia i laikim em.
Plutak, em man Grik i save raitim stori bilong ol man, em i stori long Aleksander i maritim Prinses Roksana bilong Baktria, na em i tok: “Aleksander i laikim tru Roksana, tasol tu, dispela marit bilong Aleksander i helpim wok bilong em long bosim ol man bilong dispela ples. Ol man Aleksander i bin daunim ol, ol i amamas long lukim em i kisim wanpela meri long lain bilong ol bilong maritim, na ol i laikim Aleksander, long wanem, maski em i laikim tru Roksana, em i no mekim maritpasin wantaim em inap long taim em i stretim gut marit bilong tupela.”
Na tu, Aleksander i save tingim gut marit bilong ol narapela. Maski meri bilong King Darius i stap kalabus, em i tokim ol man long mekim gutpela pasin long em. Na tu, taim em i harim olsem tupela soldia bilong Masedonia i bin mekim pasin nogut long ol meri bilong sampela man bilong narapela ples, em i tok long kilim ol i dai sapos dispela tok i tru.
Olsem mama bilong em, Olimpias, Aleksander i ting lotu i bikpela samting. Em i save wokim ofa paslain na bihain long ol pait na em bai singautim ol glasman long tokim em long mining bilong sampela ol mak samting i kamap. Em i bin go long glasmeri bilong Amon, long Libia bilong kisim sampela tok long em. Long Babilon em i bihainim tok bilong ol Babilon long mekim ofa long god bilong ol Babilon, em Bel (Marduk).
Aleksander i save kaikai long skel, tasol bihain em i kisim pasin bilong dring planti. Taim em i dring em bai mekim planti toktok na hambak long ol samting em i bin mekim. Wanpela taim em i spak na belhat na em i mekim samting nogut tru, em i kilim i dai pren bilong em Klitus. Tasol Aleksander em i bel hevi tru long samting em i bin mekim na inap 3-pela de em i slip long bet na em i no kaikai o dring. Bihain ol pren bilong em i kirapim em long kaikai.
Bihain, laik bilong Aleksander long kisim biknem i kamapim klia sampela pasin nogut moa bilong em. Em i kirap bilipim ol tok giaman ol man i sutim long narapela na em i kirap givim strongpela strafe long ol man. Olsem: Em i bilip olsem Filotas i helpim ol man i laik kilim em i dai, olsem na Aleksander i kilim i dai Filotas na papa bilong em, Parmenio, em man bilong givim gutpela tingting long Aleksander na pastaim Aleksander i save bilip long em.
ALEKSANDER I LUS
Aleksander i go bek long Babilon, na liklik taim bihain em i kisim sik malaria. Long Jun 13, 323 B.C.E., Aleksander i dai. Em i bin stap laip inap 32 yia na 8-pela mun tasol na nau nambawan bikpela birua bilong em—indai—i daunim em.
Olsem sampela saveman bilong India i bin tok: “King Aleksander, olgeta man inap kisim liklik hap bilong dispela graun, inap long sanap long en, na yu wanpela man olsem ol narapela, tasol yu save strong long raun raun long dispela hap graun i stap longwe long as ples bilong yu, na yu kisim hevi na givim hevi long ol narapela. Tasol i no longtaim na bai yu dai, na bai yu kisim hap graun inap tasol bilong planim yu.”
YU BIN KISIM WANEM SAVE?
• Olsem wanem long famili bilong Bikpela King Aleksander na i stap bilong em taim em i yangpela?
• Em i kamap king bilong Masedonia pinis na i no longtaim na em i kirap mekim pait long husat?
• Stori long sampela pait Aleksander i bin winim.
• Olsem wanem long pasin bilong Aleksander?
[Mep]
(Bilong save ol dispela rait i stap we long pes, lukim buk o magasin)
OL HAP ALEKSANDER I WINIM
MASEDONIA
ISIP
Babilon
Wara Indus
[Piksa]
Aleksander
[Piksa]
Aristotal na sumatin bilong em Aleksander
[Piksa i karamapim pes olgeta]
[Piksa]
Medal i gat piksa bilong Bikpela King Aleksander long en
[Blok/Ol Piksa long pes 162, 163]
OL I BRUKIM WANPELA BIKPELA GAVMAN
BAIBEL i tok profet olsem gavman bilong Bikpela King Aleksander bai bruk na kamap 4-pela kantri “na ol lain pikinini bilong em yet bai i no bosim ol dispela kantri.” (Daniel 11:3, 4) Olsem na insait long 14 yia bihain long indai bilong Aleksander long 323 B.C.E., ol man i kilim i dai tupela pikinini bilong em, em Aleksander 4, pikinini tru bilong em, na Heraklis, em pikinini i kamap long rot bilong pamuk.
I kam inap long yia 301 B.C.E., 4-pela jeneral bilong Aleksander ol i bosim bikpela gavman Aleksander i bin kamapim. Jeneral Kasanda i bosim Masedonia na Grik. Jeneral Laisimakus i kisim Esia Maina na Tres. Selukus 1 Naikato i kisim Mesopotemia na Siria. Na Tolemi Lagus, o Tolemi 1, i bosim Isip na Palestain. Olsem na long bikpela gavman bilong Aleksander i gat 4-pela gavman Grik i bin kamap.
Kasanda i bosim wanpela bilong dispela 4-pela gavman Grik, na gavman bilong em i stap sotpela taim tasol, winim ol narapela. Sampela yia bihain long taim Kasanda i kisim strong long bosim gavman, em i no gat pikinini man bilong senisim em, olsem na long 285 B.C.E., Laisimakus i kisim hap bilong Gavman Grik i stap long Yurop. Fopela yia bihain, Selukus 1 Naikato i kilim i dai Laisimakus na em i kisim bikpela hap bilong graun bilong Esia. Selukus em i namba wan king long lain bilong em bilong i stap king bilong Siria. Em i kamapim taun Antiok long Siria na makim dispela taun olsem nambawan biktaun bilong gavman bilong em. Ol man i kilim i dai Selukus long 281 B.C.E., tasol lain king em i bin kamapim i bosim gavman inap long 64 B.C.E. taim Jeneral Pompei bilong Rom i daunim Siria na mekim i kamap wanpela provins bilong Rom.
Tolemi i bosim wanpela bilong dispela 4-pela gavman i bin kamap long gavman bilong Aleksander, na dispela gavman i stap longpela taim, winim ol narapela. Tolemi 1 i kisim biknem olsem king long 305 B.C.E. na em i namba wan man bilong Masedonia long kamap king bilong Isip. Em i makim Aleksandria long i stap namba wan biktaun bilong gavman, na kwiktaim em i kirap stretim ol samting bilong dispela taun. Wanpela bikpela samting em i bin wokim, em haus laibreri bilong Aleksandria. Bilong bosim dispela bikpela wok, Tolemi i kisim long kantri Grik wanpela saveman bilong Atens, em Demitrius Falereus. Ol man i tok, long taim bilong ol aposel dispela laibreri i gat 1 milion buk samting long en. Lain king bilong Tolemi i bosim Isip i go inap long 30 B.C.E. taim Rom i daunim Isip. Em nau, Rom i kamap nambawan gavman bilong bosim graun.
YU BIN KISIM WANEM SAVE?
• Ol i brukim gavman bilong Aleksander olsem wanem?
• Lain king bilong Selukus i bosim Siria i go inap long wanem taim?
• Wanem taim lain king bilong Tolemi i pinis long bosim Isip?
[Mep]
(Bilong save ol dispela rait i stap we long pes, lukim buk o magasin)
GAVMAN BILONG ALEKSANDER I BRUK 4-PELA HAP
Kasanda
Laisimakus
Tolemi 1
Selukus 1
[Ol Piksa]
Tolemi 1
Selukus 1
[Sat/Piksa long pes 139]
(Bilong save ol dispela rait i stap we long pes, lukim buk o magasin)
OL BIKPELA GAVMAN LONG TOK PROFET BILONG DANIEL
Traipela imis (Daniel 2:31-45)
Fopela bikpela animal i lusim biksi na kam antap (Daniel 7:3-8, 17, 25)
BABILON kirap long 607 B.C.E.
MIDIA-PERSIA kirap long 539 B.C.E.
GRIK kirap long 331 B.C.E.
ROM kirap long 30 B.C.E.
INGLAN-AMERIKA kirap long 1763 C.E.
OL GAVMAN I BRUK NABAUT long taim bilong las de
[Piksa i karamapim pes olgeta long pes 128]
[Piksa i karamapim pes olgeta long pes 147]