Yu Ting Marit Tasol Em Rot Bilong i Stap Amamas?
“Sapos em i laik maritim wanpela man, orait em i ken maritim em. Tasol em i mas maritim man i bilip long Bikpela. Tasol . . . sapos em i no marit gen, em bai i stap amamas.”—1 KORIN 7:39, 40.
1. Baibel i stori olsem wanem long Jehova? Jehova i bin mekim wanem gutpela pasin long ol ensel na ol man na animal samting em i bin wokim?
JEHOVA em i “as bilong pasin tru bilong amamas.” (1 Timoti 1:11) Em i Man bilong givim “olgeta gutpela samting” long yumi na “olgeta presen i gutpela tru.” Olsem na em i bin givim olgeta samting long ol man na ol ensel inap long ol i ken amamas long mekim wok bilong em. (Jems 1:17) Pisin i singsing, pikinini dok i kalap na tanim tanim, bulmakau bilong solwara i pilai—olgeta dispela samting i kamapim long ples klia olsem Jehova i bin wokim ol animal tu bilong i stap amamas long ples bilong ol. Jehova i givim ol samting long ol diwai tu bambai ol i ken i stap gutpela. Baibel i tok: “Ren i save kam daun na ol diwai bilong Lebanon i save kisim planti wara. Ol dispela diwai sida i bilong Bikpela stret.”—Buk Song 104:16.
2. (a) Wanem samting i kamapim klia olsem Jisas i amamas long bihainim laik bilong Papa bilong em? (b) I gat wanem ol samting ol disaipel bilong Jisas inap amamas long en?
2 Jisas “em i wankain tru olsem God yet.” (Hibru 1:3) Olsem na Baibel i tok, Jisas em i “King bilong olgeta king,” na em i ‘as bilong amamas.’ (1 Timoti 6:15) Jisas i kamapim klia olsem sapos yumi bihainim laik bilong Jehova, dispela inap mekim bel bilong yumi i amamas moa yet, winim tru kaikai. Na Jisas i kamapim klia olsem sapos yumi aninit long God na lotu tru long em na pret long mekim pasin em i no laikim, yumi ken amamas. (Buk Song 40:8; Aisaia 11:3; Jon 4:34) Jisas i salim ol 70 disaipel i go raun autim tok bilong Kingdom, na taim ol i kam bek, “ol i amamas tru.” Na long dispela taim “Holi Spirit i mekim bel bilong Jisas i amamas,” na em i beten long Papa na kamapim dispela amamas bilong em. Bihain em i lukluk long ol disaipel na em i tok: “Ol man i lukim ol samting yupela i save lukim, ol i ken amamas. Mi tokim yupela, bipo planti profet na planti king ol i laik lukim ol samting nau yupela i lukim, tasol ol i no bin lukim. Na ol i laik harim dispela ol tok yupela i save harim, tasol ol i no bin harim.”—Luk 10:17-24.
Sampela As Bilong Amamas
3. I gat wanem sampela samting yumi ken amamas long en?
3 Yumi tu yumi ken amamas, long wanem, nau yumi lukim ol samting i kamap olsem Jehova i bin tok profet long en long Baibel na i mas kamap long taim bilong pinis. Yumi ken amamas moa yet, long wanem, nau yumi save long as bilong ol tok profet em planti profet na planti king bilong bipo, olsem Aisaia na Daniel na Devit, ol i no bin save long en. Na yumi ken amamas, long wanem, yumi mekim wok bilong dispela God em i as bilong amamas, em God Jehova, na King bilong amamas, em King Krais Jisas, em i go pas na mekim ol wok bilong soim rot long yumi.
4, 5. (a) Bilong holimpas amamas yumi kisim long mekim wok bilong Jehova, yumi mas was gut long wanem samting? (b) I gat wanem sampela samting i helpim yumi long i stap amamas? Tasol i gat wanem askim?
4 Yumi mekim wok bilong Jehova na yumi stap amamas, tasol sapos yumi laik holimpas dispela amamas, yumi mas was gut. Yumi no ken bihainim tingting bilong ol manmeri bilong dispela graun ol i ting i gat sampela samting yumi mas kisim pastaim bambai yumi inap i stap amamas tru. Tingting bilong ol inap paulim tingting bilong yumi, long wanem, ol i ting ol i mas kisim planti mani kago, o ol samting i gat stail na ol i ken hambak long en, o kain samting olsem bambai ol i ken i stap amamas. Tasol “amamas” ol i kisim long dispela rot em bilong sotpela taim tasol, long wanem, pasin bilong dispela graun i laik pinis.—1 Jon 2:15-17.
5 Planti wokboi bilong Jehova, em ol i dediket pinis, ol i save, sapos ol i kisim ol samting bilong dispela graun, dispela i no inap helpim ol long i stap amamas tru. Papa bilong yumi long heven, em tasol i save givim ol samting bilong skin na spirit em inap helpim ol wokboi bilong em long i stap amamas tru. Yumi tenkyu tru long em long gutpela kaikai bilong spirit yumi save kisim long rot bilong ‘gutpela wokboi’! (Matyu 24:45-47) Na yumi tenkyu tu long em long kaikai na ol narapela samting bilong skin yumi kisim long han bilong Em. Na em i givim narapela gutpela presen long yumi, em pasin bilong marit na ol amamas yumi kisim insait long famili taim yumi kamapim pikinini. Olsem na yumi inap pilim tru tok Naomi i givim long tupela tambu meri bilong em, em man bilong tupela i dai pinis, Naomi i tok: “Bai Bikpela i ken helpim yutupela na yutupela i ken marit gen na yutupela i ken i stap gut.” (Rut 1:9) Olsem na sapos man o meri i marit em inap i stap amamas tru. Tasol yu ting marit tasol em i rot bilong i stap amamas? Yumi mas tingim gut dispela askim, na ol yangpela i mas tingim gut moa yet.
6. Wanem namba wan wok bilong marit, olsem Buk Stat long Baibel i makim?
6 Baibel i stori long pasin bilong marit i bin kamap olsem wanem na i tok: “God i wokim ol manmeri na ol i kamap olsem God yet. God i mekim ol i kamap man na meri. Na God i mekim gutpela tok bilong givim strong long ol. Em i tokim ol olsem, ‘Yupela i mas kamap planti na i go sindaun long olgeta hap bilong graun na bosim olgeta samting i stap long en.’ ” (Stat 1:27, 28) Jehova i kamapim pasin bilong marit na givim wok long Adam bilong kamapim ol pikinini long dispela rot bambai planti manmeri moa i ken kamap. Tasol marit i no bilong mekim dispela wok tasol.
Maritim Poroman “i Bilip Long Bikpela”
7. Wanpela tumbuna bilong lain Israel i bin wok strong long inapim wanem lo bilong marit?
7 Jehova em i As bilong marit, olsem na i stret em i kolim ol lo bilong marit ol wokboi bilong em i mas bihainim bambai ol i ken i stap amamas. Long taim bilong Abraham na Aisak na Jekop, ol i strong long maritim poroman i lotuim Jehova. Abraham i strong long wokboi bilong em Elieser i mas mekim tok tru antap long nem bilong Jehova long em i no ken makim wanpela meri bilong pikinini bilong Abraham, em Aisak, namel long ol meri bilong Kenan. Elieser i bihainim gut tru tok bilong Abraham na em i raun longwe bambai em inap painim ‘dispela meri Jehova i makim bilong pikinini bilong bikman bilong em.’ (Stat 24:3, 44) Olsem na Aisak i maritim Rebeka. Taim pikinini man bilong tupela, em Iso, i maritim tupela meri haiden bilong lain Hit, “pasin bilong dispela tupela meri i save mekim Aisak na Rebeka i bel pen tru long tupela.”—Stat 26:34, 35; 27:46; 28:1, 8.
8. Taim God i givim kontrak bilong Lo long lain bilong em, i gat wanem tambu long marit? Bilong wanem God i putim dispela tambu?
8 Bihain Jehova i wokim kontrak wantaim lain bilong em na givim Lo bilong em long ol. Dispela Lo i tambuim ol long maritim man o meri bilong sampela lain bilong Kenan em Jehova i makim. Jehova i tokim ol olsem: “Yupela i no ken senisim meri wantaim ol, long wanem, ol bai i pulim ol pikinini bilong yupela i go longwe long Bikpela na bai ol i lotu long ol giaman god. Sapos ol pikinini i mekim olsem, orait Bikpela bai i belhat long yupela na wantu bai em i bagarapim yupela.”—Lo 7:3, 4.
9. Baibel i givim wanem tok long ol Kristen long marit?
9 Olsem na yumi no ken kirap nogut long Jehova i bin putim wankain tambu long lain Kristen na em i tok, ol i mas maritim man o meri i lotuim em. Aposel Pol i tokim ol Kristen olsem: “Ol haiden ol i narakain, olsem na yupela i no ken pas wantaim ol na wok bung wantaim ol. Olsem wanem, stretpela pasin na pasin bilong sakim lo tupela i ken wok bung wantaim? Olsem wanem, lait i ken bung wantaim tudak? Ating Krais i save stap wanbel wantaim Satan, a? Man i bilip long Krais na man i no bilip, tupela i ken holim wanpela kain tingting, a?” (2 Korin 6:14, 15) Dispela tok i mas stiaim tingting bilong yumi long planti samting yumi mekim, na long marit tu. Pol i tok klia long olgeta wokboi bilong Jehova ol i dediket long em, olsem: Sapos ol i laik marit, ol i mas maritim man o meri “i bilip long Bikpela.”—1 Korin 7:39.
No Inap Maritim Poroman “i Bilip Long Bikpela”
10. Planti Kristen i no marit ol i mekim wanem? Tasol i gat wanem askim?
10 Planti Kristen singel i laik bihainim pasin bilong Krais Jisas na ol i no tingting long marit; ol i wok strong long holimpas pasin bilong i stap singel. Tasol planti gutpela Kristen i laik marit, tasol long dispela taim ol i no inap painim wanpela poroman “i bilip long Bikpela,” olsem na ol i wet long Jehova. Ol i no laik maritim poroman i no bilip, olsem na ol i stap singel. Spirit bilong God i kamapim ol gutpela pasin long ol, olsem pasin bilong amamas, na bel isi, na bilip, na pasin bilong bosim gut skin, na dispela i helpim ol long i stap singel na i stap klinpela. (Galesia 5:22, 23) Planti sista Kristen bilong yumi i sanap strong long dispela traim na ol i kamapim klia olsem ol i givim bel tru long God, na yumi pilim tru gutpela pasin ol i mekim. Long sampela kantri ol dispela sista i planti, winim ol brata, olsem na ol i mekim bikpela hap wok bilong autim tok. Tru tumas, “Bikpela i givim tok long ol manmeri bilong en, na planti meri i go autim dispela tok.” (Buk Song 68:11) Planti wokboi bilong God long nau, ol man na ol meri, em ol i no marit, ol i sanap strong na holimpas lo bilong God, long wanem, ol i ‘bilip strong long Bikpela, na em i soim stretpela rot long ol long bihainim.’ (Sindaun 3:5, 6) Tasol sapos long dispela taim man o meri Kristen i no inap painim poroman “i bilip long Bikpela” na em i no inap marit, yu ting em i no inap i stap amamas?
11. Ol Kristen i tingim ol lo na tok bilong Baibel na ol i no marit, ol i ken save tru long wanem samting?
11 Yumi mas save, yumi Witnes bilong dispela God em i as bilong amamas, em God Jehova, na yumi wok aninit long King bilong amamas, em Krais Jisas. Olsem na sapos Kristen i tingim ol tok na lo bilong Baibel na em i stap singel, long wanem, em i no inap painim poroman “i bilip long Bikpela,” yu ting God Jehova na Krais Jisas bai larim em i stap bel hevi? Nogat, a? Brata o sista i stap singel, em inap i stap amamas. Bilong pilim tru dispela samting, ating planti i mas stretim tingting bilong ol long rot bilong i stap amamas tru. Maski yumi marit o singel, Jehova inap mekim yumi i stap amamas tru.
Rot Bilong i Stap Amamas Tru
12. Ol samting i bin painim ol ensel i bikhet i lainim yumi long wanem samting long marit?
12 Marit tasol i no rot bilong olgeta wokboi bilong Jehova i ken i stap amamas. Tingim ol ensel. Paslain long Bikpela Tait, sampela ensel i bin kisim laik nogut—ol i laik marit, na ol i bel nogut, long wanem, ol i no inap marit. Olsem na ol i tanim i kamap man bambai ol inap kisim ol meri bilong graun. Ol dispela ensel “i lusim ples bilong ol,” olsem na God “i pasim ol long ol sen i save stap oltaim oltaim, na em i kalabusim ol i stap long dispela ples i tudak nogut tru. Ol i wetim De bilong bikpela kot bilong God.” (Jut 6; Stat 6:1, 2) God i no bin wokim ol ensel bilong marit. Olsem na marit i no rot bilong ol i ken i stap amamas.
13. I gat wanem as na ol ensel holi i stap amamas? Orait, olsem wanem long olgeta wokboi bilong God?
13 Tasol ol gutpela ensel i stap amamas. Taim Jehova i kirap long wokim graun, “ol sta i bin lukim na ol i amamas na singim song, na ol ensel i amamas na singaut.” (Jop 38:7) Bilong wanem ol ensel holi i stap amamas? Long wanem, long olgeta taim ol i save stap klostu long Jehova, na ol i save “putim yau gut long tok bilong en” bambai ol i ken bihainim. Na ol i amamas long “bihainim laik bilong em.” (Buk Song 103:20, 21) Tru tumas, ol ensel i stap gut long wok bilong Jehova na long dispela as ol i stap amamas. Em rot bilong ol manmeri tu i ken i stap amamas tru. Ol Kristen bilong liklik lain, em nau ol i marit na ol i amamas long mekim wok bilong Jehova, taim ol i dai na kirap bek na kisim laip long heven, bai ol i no marit, tasol bai ol i stap amamas. Bai ol i kamap olsem ol ensel na bai ol i amamas long mekim wok bilong God. Olsem na olgeta wokboi bilong Jehova, maski ol i singel o marit, ol inap i stap amamas, long wanem, as tru bilong i stap amamas em olsem: Yumi mas mekim wok bilong Man i bin wokim yumi na yumi mas stap gut long dispela wok.
‘Winim Tru Man i Gat Pikinini’
14. God i mekim wanem gutpela tok promis long ol man bilong Israel bipo ol i rausim bol bilong ol? Olsem wanem dispela tok i narapela kain liklik?
14 Sapos Kristen i stap gut long God, maski em i no marit, God inap mekim na bai em i stap amamas. Yumi ken tingim tok profet Jehova i bin mekim long ol man bilong lain Israel ol i bin rausim bol bilong ol na ol i no inap marit. Jehova i tok promis long ol, olsem: “Sapos dispela kain ol man i bihainim lo bilong de Sabat na i bihainim ol pasin mi laikim na i bihainim olgeta tok bilong kontrak mi bin mekim wantaim ol manmeri bilong mi, orait bai mi putim wanpela mak i gat nem bilong ol i stap long en insait long haus bilong mi. Na oltaim ol manmeri bai i lukim na tingim ol. Na biknem bilong ol bai i winim tru nem bilong ol man i bin i gat ol pikinini. Bai mi no inap larim nem bilong ol i pinis.” (Aisaia 56:4, 5) God i mekim narapela kain tok promis, a? Em i no tok long givim meri long ol dispela man bambai ol i gat pikinini na nem bilong ol i no ken pinis. Nogat! God i tok, bai ol i kisim gutpela samting i winim tru man “i gat ol pikinini”—nem bilong ol bai stap oltaim insait long haus bilong Jehova.
15. Olsem wanem long truim bilong tok bilong Aisaia 56:4, 5?
15 Ol dispela man i no inap marit na sapos ol i olsem piksa bilong ol man long lain Israel bilong spirit, orait ol i makim liklik lain Kristen em ol bai i stap oltaim long haus bilong Jehova long heven. (Galesia 6:16) Na yumi ken ting dispela tok profet i makim tu ol kain man olsem bilong lain Israel bilong bipo, em ol i bin bihainim tok bilong God na bai ol i kirap bek. Long nupela taim God bai kamapim, taim ol i kirap bek, sapos ol i bilip long ofa bilong Krais na ol i wok yet long ‘bihainim ol pasin God i laikim,’ orait “nem bilong ol i no ken pinis.” Na dispela tok profet inap makim tu ol manmeri bilong lain “arapela sipsip” nau long taim bilong pinis, em ol i daunim laik bilong ol long marit na long kamapim pikinini bambai ol inap mekim bikpela wok moa long wok bilong Jehova. (Jon 10:16) Ating sampela bilong ol bai dai na ol i no bin marit na i no gat pikinini, tasol sapos ol i bin i stap gut long Jehova, orait taim ol i kirap bek bai ol i kisim gutpela samting ‘i winim tru man i gat pikinini’—long nupela taim bai nem bilong ol “i no ken pinis.”
Marit Tasol i No Rot Bilong i Stap Amamas
16. Olsem wanem na sampela taim marit i no rot bilong i stap amamas?
16 Sampela i ting olsem ol i mas marit bambai ol inap i stap amamas. Tasol long nau, insait long lain bilong Jehova tu, planti marit ol i no i stap amamas. Sapos man o meri i marit, dispela inap stretim sampela hevi bilong em, tasol marit inap kamapim ol narapela hevi i hatwok moa long stretim, winim ol hevi i save painim ol singel. Pol i tok, ol manmeri i marit ol “i painim planti hevi long laip bilong ol.” (1 Korin 7:28) Man o meri i marit, sampela taim bai em i “tingting planti,” na sampela taim bai “tingting bilong en i bruk.” Planti marit i save hatwok long “mekim wok bilong Bikpela oltaim”—i gat planti samting i save “pulim nabaut tingting” bilong ol.—1 Korin 7:33-35.
17, 18. (a) Sampela wasman sekit i mekim ripot na ol i tok wanem? (b) Tok bilong Pol i givim wanem tingting long yumi? Bilong wanem i gutpela sapos man o meri i no marit hariap taim em i yangpela yet?
17 Pasin bilong marit na pasin bilong i stap singel tu i olsem presen God i givim long yumi. (Rut 1:9; Matyu 19:10-12) Tasol bilong i stap singel na i stap amamas, o bilong marit na i stap amamas, yu mas tingting gut na beten askim God long helpim yu. Sampela wasman bilong raun i tok, long nau planti Witnes i save marit taim ol i yangpela tumas, na ol i kamapim ol pikinini taim ol i no redi yet long mekim ol wok papa o wok mama bilong lukautim pikinini. Marit bilong sampela i bagarap. Na sampela ol i lain long karim ol hevi i painim ol insait long marit, tasol ol i no i stap amamas. Wanpela man bilong Inglan em man bilong raitim ol pilai (William Congreve) em i tok, ol manmeri i marit hariap, ‘ating bihain bai ol i karim hevi oltaim long dispela.’
18 Sampela wasman sekit i mekim ripot na ol i tok, sampela yangpela brata i no laik i go wok long Betel o insait long Skul Bilong Lainim Wok Bilong Lukautim Kongrigesen, long wanem, sapos Sosaiti i kisim ol bilong wok long Betel o i go long dispela Skul, i gat lo i tok, nau ol i mas i stap singel inap wanpela yia samting pastaim. Taim yu yangpela yet, laik bilong marit i strong tru long skin bilong yu na nogut dispela i hariapim yu long marit. Gutpela sapos yu wet pastaim, na bai yu inap tingim gut ol samting yu laik mekim. Pol i tok, taim man i bikpela pinis, sapos laik bilong em long marit i strong yet, orait, gutpela sapos em i marit. (1 Korin 7:36-38) Dispela i givim tingting long yumi olsem, gutpela sapos ol yangpela i wet pastaim. Na taim yu bikpela pinis, sapos yu stap singel inap sampela yia pastaim bai yu inap lain na kisim gutpela save na tingting. Dispela bai helpim yu long tingting gut na painim gutpela poroman bilong marit long em, o helpim yu long tingting gut na i stap singel.
19. Sapos yumi no tingting tumas long marit, ating bai yumi kisim wanem tingting?
19 Yumi sampela i no yangpela moa na laik bilong marit i no strong moa long skin bilong yumi. Ating wan wan taim yumi tingting long ol blesing man o meri marit inap kisim, tasol yumi gat strong inap long yumi stap singel. Dispela i olsem presen yumi kisim. Ating Jehova i save yumi inap mekim gut wok bilong em taim yumi stap singel na i no gat wok tru long yumi marit, na ating bai yumi mas lusim sampela wok yumi kisim insait long wok bilong Em. Sapos yumi no guria long marit, na yumi no bin kisim wanpela poroman, ating God i laik givim narapela wok long yumi. Yumi mas bilip strong olsem God bai givim olgeta samting long yumi inap long yumi. Sapos dispela em i laik bilong God na yumi daun long dispela, bai yumi amamas moa. Bai yumi mekim pasin olsem ol brata Juda, em ‘ol i no kros moa na ol i litimapim nem bilong God’ taim ol i save em laik bilong God long ol man bilong ol narapela lain i tanim bel bambai ol i ken kisim laip.—Aposel 11:1-18.
20. (a) I gat wanem tok hia bilong ol yangpela Kristen long i stap singel? (b) Tasol i gat wanem bikpela samting yumi mas tingim long pasin bilong i stap amamas tru?
20 Olsem na sapos yu marit, yu inap i stap amamas, tasol planti hevi tu inap painim yu long dispela rot. Olsem na tru tumas, marit tasol em i no rot bilong i stap amamas. Em nau yumi skelim pinis ol dispela samting na yumi ken tok, sapos yangpela Kristen i laik bihainim gutpela tingting, orait gutpela sapos em i stap singel inap sampela yia pastaim na mekim wok bilong Jehova na wok long kamap strong long spirit. Tasol maski yumi yangpela o yumi lapun, maski yumi strongpela Kristen pinis o yumi wok long kamap strong, bikpela samting olgeta manmeri i dediket tru long God i mas save long en, em olsem: Yumi mas i stap gut long wok bilong God Jehova—em rot bilong i stap amamas tru.
Bai Yu Bekim Wanem Tok?
◻ I gat wanem as na ol wokboi bilong Jehova i stap amamas?
◻ Olsem wanem na marit i no rot bilong i stap amamas tru?
◻ Taim wanpela long lain bilong Jehova i laik painim poroman bilong marit, em i mas tingim wanem lo?
◻ Bilong wanem i stret yumi ken ting, ol Kristen i stap singel ol inap i stap amamas?
◻ Yumi ken tok wanem long marit na pasin bilong i stap amamas? I gat wanem tok bilong ol yangpela Kristen?