Olgeta Samting Bai Kamap Nupela—Olsem God i Tok Profet Long En
“Dispela Man i sindaun long sia king, em i tok olsem, ‘Harim. Mi mekim olgeta samting i kamap nupela.’ Na em i tok moa olsem, . . . ‘Dispela tok em i tru olgeta, inap olgeta man i ken bilip tru long en.’ ”—KTH 21:5.
1, 2. I gat wanem as na planti man i surik long tingim ol samting bai kamap bihain?
OLSEM WANEM? I gat wanpela taim yu bin tok o tingting, ‘Yumi no save wanem samting bai kamap tumora?’ Em nau, yumi no hatwok long save long as na ol man i save surik long kolim ol samting ol i ting bai kamap bihain, na ol i no bilip tumas long ol man i tok ol inap long mekim olsem. Tru tumas, ol man i no inap tokaut long ol samting bai kamap long ol mun na ol yia bihain na ol dispela samting i kamap stret olsem ol i bin tok, nogat.
2 Long wanpela nius (Forbes ASAP) i stori long ol taim na ol yia, wanpela man bilong televisen, Robert Cringely, i tok: ‘Ol yia i wok long kamap na i go pinis, dispela i save semim ol man i bin tokaut long ol samting bai kamap bihain. Wan wan taim tasol samting ol i bin tokaut long en i kamap stret olsem ol i bin tok. Tasol ol saveman bilong graun i wok yet long tokaut long ol samting bai kamap bihain.’
3, 4. (a) Sampela man i ting nupela milenium bai kamapim wanem gutpela samting? (b) Tasol sampela i gat wanem stretpela tingting long ol samting bai kamap bihain?
3 Planti man i toktok long yia 2000 na bihain long en, olsem nupela milenium, na i olsem planti man moa i tingting long taim bihain. Long kirap bilong yia i go pinis, wanpela nius (Maclean’s) i tok: “Tru, long tingting bilong planti man long Kanada, yia 2000 em i wanpela yia nating long kalenda, tasol ating wanpela nupela taim tru inap kamap long dispela yia.” Profesa Chris Dewdney bilong Yunivesiti Yok i kamapim wanpela as na planti man i ting ol samting bai kamap gutpela. Em i tok: ‘Long yia 2000 yumi ken lusim tingting long ol samting nogut tru i bin kamap insait long dispela 100 yia i go pinis.’
4 Ating em wanpela tingting nating tasol, a? Long Kanada wanpela lain i askim sampela man long kamapim tingting bilong ol. Inap 22 pesen tasol bilong ol i “ting yia 2000 bai kamapim wanpela nupela taim.” Tasol 50 pesen ol i ting, insait long 50 yia bihain, ‘wanpela bikpela pait bai kamap long olgeta hap bilong graun.’ Dispela i kamapim klia tingting bilong planti man olsem maski nupela milenium i kamap, dispela i no inap mekim na ol hevi bilong yumi i pinis na olgeta samting i kamap nupela, nogat. Bikman Michael Atiyah, bipo em presiden bilong wanpela lain long Briten (Royal Society), em i tok: ‘Ol samting i save senis hariap hariap na dispela i makim olsem yia 2000 na bihain long en inap kamapim planti bikpela hevi em yumi mas stretim. Ol hevi olsem ol man i kamap planti, sot long wara, wel, timba samting; marasin nogut i bagarapim graun, pasin bilong i stap rabis, ol dispela hevi i kamap pinis na yumi mas hariap long stretim.’
5. Yumi inap kisim we stretpela save long ol samting bai kamap bihain?
5 Ating yu gat tingting olsem: ‘Ol man i no save tru tru long wanem samting bai kamap bihain, olsem na yumi no ken tingim i stap bilong yumi long bihain, a?’ Nogat, yumi mas tingim! Tru, ol man i no inap kolim stret ol samting bai kamap bihain, tasol nogut yumi ting i no gat wanpela man inap long mekim olsem. Orait husat inap mekim, na i gat wanem as na yumi ken ting wanpela gutpela taim bai kamap? Yu inap kisim gutpela bekim bilong ol dispela askim long 4-pela tok profet. Ol i stap long wanpela buk em planti man i holim na ol i bin kaunim, winim olgeta narapela buk, tasol planti man i gat tingting kranki long ol tok bilong en na ol i givim baksait long en. Dispela buk em Baibel. Maski yu gat wanem tingting long Baibel, na maski yu save gut long ol tok bilong en o nogat, i gutpela sapos yu tingim dispela 4-pela bikpela tok profet. Ol i tokaut olsem wanpela gutpela taim tru bai kamap. Na tu, ol dispela 4-pela tok profet i stori long sindaun em yu na famili bilong yu inap kisim long bihain.
6, 7. Aisaia i mekim tok profet bilong em long wanem taim? Ol samting em i tok profet long en i bin kamap tru olsem wanem?
6 Namba wan tok profet yumi ken lukim em i stap long Aisaia sapta 65. Tasol pastaim yumi ken tingim wanem taim Aisaia i bin raitim dispela tok na i gat wanem as na em i bin raitim. Aisaia em i wanpela profet bilong God i bin stap olsem 100 yia paslain long taim kingdom bilong Juda i bagarap. Bagarap i bin kamap long taim ol Juda i no stap gut long Jehova na em i no lukautim ol moa—em i larim ol Babilon i kam na bagarapim Jerusalem na kisim ol lain bilong en i go kalabus. Dispela samting i bin kamap olsem 100 yia bihain long taim Aisaia i tok profet long en.—2 Stori 36:15-21.
7 Narapela samting yumi ken tingim na i helpim yumi long save long truim bilong dispela tok profet, i olsem: God i bin stiaim tingting bilong Aisaia na em i tok profet long nem bilong wanpela man Persia em i no kamap yet, em Sairus, na bihain em i daunim Babilon. (Aisaia 45:1) Sairus i opim rot bilong ol Juda i ken go bek long ples bilong ol, long 537 B.C.E. Tasol yumi kirap nogut, long wanem, long sapta 65, Aisaia i bin tok profet olsem ol bai go bek. Em i kamapim planti tok long sindaun ol Israel inap kisim long taim ol i stap gen long ples bilong ol.
8. Aisaia i tok profet long wanem taim bilong amamas bai kamap bihain? Wanem tok em i kamapim yumi gat laik long save long en?
8 Aisaia 65:17-19 i tok: “Mi wokim nupela skai na nupela graun. Na ol man bai i no inap tingim moa ol samting i bin kamap bipo. Yupela i ken bel gut na amamas oltaim long nupela samting nau mi wokim. Dispela nupela Jerusalem mi laik wokim, em bai i kamap ples ol manmeri i ken laikim tumas na amamas long en, na ol manmeri bilong en bai i stap bel gut tru. Mi yet tu bai mi amamas long Jerusalem na bel gut long ol manmeri bilong mi. Na long nupela Jerusalem bai i no gat moa nois bilong ol man i krai, na bai i no gat moa singaut bilong ol man i gat bikpela pen.” Sindaun bilong ol Juda em Aisaia i stori long en em i gutpela, winim tru sindaun bilong ol long Babilon. Em i tok profet olsem ol bai amamas. Orait nau lukim dispela tok “nupela skai na nupela graun.” Em namba wan bilong 4-pela taim dispela tok i kamap long Baibel. Ol ves long dispela 4-pela hap inap mekim sampela samting long i stap bilong yumi long bihain, na i tok profet tu long en.
9. Olsem wanem wanpela truim bilong Aisaia 65:17-19 i bin kamap long ol Juda bilong bipo?
9 Namba wan truim bilong Aisaia 65:17-19 i kamap long ol Juda bilong bipo, na stret olsem Aisaia i tok profet, ol i go bek long ples bilong ol na kirapim gen lotu i tru long dispela hap. (Esra 1:1-4; 3:1-4) Yumi save, ol i go bek long ples em bipo ol i sindaun long en—ol i no lusim graun na i go i stap long narapela hap antap long skai samting, nogat. Dispela save bai helpim yumi long skelim dispela tok bilong nupela skai na nupela graun em Aisaia i stori long en. Yumi no ken tingting nabaut long dispela, olsem sampela i save mekim long ol tok profet bilong Nostradamus na sampela man moa. Baibel yet i kamapim klia tingting bilong Aisaia long dispela tok em i stori long en.
10. “Nupela graun” Aisaia i tok profet long en i makim wanem samting?
10 Long Baibel, sampela taim “graun” i no makim graun tru. Olsem: Song 97:1 i tok: “Bikpela i stap king. Graun, yu mas amamas.” Yumi save pinis olsem dispela graun—em graun yumi wokabaut long en wantaim solwara—em i no inap amamas. Ol manmeri i save amamas. Em nau, graun em Song 97:1 i stori long en i makim ol manmeri i stap long graun. Tasol Aisaia 65:17 i tokaut tu long “nupela skai.” Sapos “graun” i makim nupela lain manmeri i stap long kantri bilong ol Juda, orait olsem wanem long “nupela skai”?
11. “Nupela skai” i makim wanem samting?
11 Wanpela bikpela buk (Cyclopædia of Biblical, Theological, and Ecclesiastical Literature, bilong M’Clintock na Strong) i tok: ‘Long ol driman olsem tok profet ol man i bin lukim, skai i save makim gavman, em i antap long ol man na i bosim ol, olsem skai tru i antap long graun na i bosim graun.’ Na buk i tok, ‘long ol tok profet, dispela tok “skai na graun” em i makim ol manmeri. Skai i makim ol man i stap olsem bos, na graun i makim ol man nating i stap aninit long wok bos bilong ol.’
12. “Nupela skai na nupela graun” i bin kamap olsem wanem long ol Juda bilong bipo?
12 Taim ol Juda i sindaun gen long ples bilong ol, i olsem wanpela nupela taim i kamap. I gat nupela gavman i stap. Serubabel, em wanpela tumbuna pikinini bilong King Devit, i stap gavena bilong ol, na Josua i stap hetpris. (Hagai 1:1, 12; 2:21; Sekaraia 6:11) Tupela i kamap olsem “nupela skai.” Em i antap long wanem samting? Dispela “nupela skai” i antap long wanpela “nupela graun,” em ol manmeri God i mekim ol i kamap klin, ol i kam bek pinis long kantri bilong ol bambai ol inap wokim gen Jerusalem na tempel bilong en bilong lotuim Jehova. Olsem na i gat nupela skai na nupela graun long truim i bin kamap long ol Juda bilong bipo.
13, 14. (a) Yumi mas tingim wanem narapela hap long Baibel i kolim dispela tok “nupela skai na nupela graun”? (b) Olsem wanem na tok profet bilong Pita em i bikpela samting bilong yumi ol man bilong nau?
13 Tru, yumi bin stori long insait bilong sampela tok bilong Baibel na long sampela samting i bin kamap bipo, tasol i gat narapela samting yumi mas tingim. Yumi inap save long dispela samting long narapela ves i kolim dispela tok “nupela skai na nupela graun.” Long 2 Pita sapta 3, yu inap lukim dispela tok na save olsem i stap bilong yu long bihain em i insait long dispela.
14 Aposel Pita i raitim pas bilong em olsem 500 yia bihain long taim ol Juda i go bek long ples bilong ol. Pita em i wanpela aposel bilong Jisas na em i raitim dispela tok i go long ol disaipel bilong Krais, em dispela “Bikpela” 2 Pita 3:2 i stori long em. Long ves 4, Pita i stori long ‘kambek’ bilong Jisas, olsem na dispela tok profet em bikpela samting bilong yumi ol man bilong nau. Planti samting i kamapim klia olsem kirap long taim bilong Namba Wan Pait, Jisas i kam i stap pinis, olsem em i stap King long Kingdom bilong God long heven. (KTH 6:1-8; 11:15, 18) Em wanpela bikpela samting yumi mas tingim taim yumi skelim narapela samting Pita i tok profet long en long dispela sapta.
15. Tok profet bilong Pita long “nupela skai” em i wok long kamap tru olsem wanem?
15 Namba 2 Pita 3:13 i tok: “God i promis pinis long em bai i wokim nupela skai na nupela graun, na stretpela pasin tasol bai i stap long en. Yumi wet long dispela samting tasol i mas kamap.” Ating yu save pinis olsem Jisas em i nambawan King bilong “nupela skai.” (Luk 1:32, 33) Tasol sampela narapela ves i soim olsem i no Jisas wanpela tasol i mekim wok king. Jisas i tok promis olsem ol aposel na sampela man moa ol bai kisim wanpela wok long heven. Long Buk Hibru, aposel Pol i stori long dispela lain na em i tok ‘God i stap long heven em i bin singautim yupela tu.’ Na Jisas i tok dispela lain bai sindaun wantaim em long ol sia king long heven. (Hibru 3:1; Matyu 19:28; Luk 22:28-30; Jon 14:2, 3) Dispela i kamapim klia olsem i gat sampela moa bai mekim wok king wantaim Jisas olsem nupela skai. Orait, wanem dispela “nupela graun” Pita i stori long en?
16. Wanem “nupela graun” i stap pinis?
16 Bipo i gat truim bilong dispela tok profet i bin kamap taim ol Juda i go bek long ples bilong ol, na i olsem tasol long truim bilong 2 Pita 3:13 long nau—i gat ol man i daun long wok bos bilong nupela skai. Long nau yu inap lukim planti milion manmeri em ol i amamas long daun long dispela wok bos. Gutpela skul ol i kisim long en i save helpim gut ol na ol i wok strong long bihainim ol lo bilong en i stap long Baibel. (Aisaia 54:13) Dispela lain i olsem as bilong “nupela graun”—ol i olsem wanpela bikpela lain em ol i bilong olgeta lain na tok ples na skin, na ol i wok wantaim long daun long Krais Jisas, em i King. Wanpela bikpela samting i olsem: Yu tu yu ken insait long dispela samting!—Maika 4:1-4.
17, 18. Taim yumi lukim tok bilong 2 Pita 3:13, olsem wanem i gat as na yumi inap wetim gutpela samting i kamap bihain?
17 Tasol nogut yu ting Baibel i no stori planti long ol samting bai kamap long bihain. Taim yu skelim ol ves bilong 2 Pita sapta 3, yu bai save olsem ol dispela ves i makim olsem wanpela bikpela senis bai kamap. Long ves 5 na 6, Pita i stori long Bikpela Tait i bin kamap long taim bilong Noa, na dispela tait wara i bin pinisim ol man nogut. Long ves 7, Pita i tok “skai na graun i stap” long nau—em ol gavman wantaim ol manmeri—“i wetim de bilong bikpela kot i kamap, na ol man i bin givim baksait long God, ol bai i bagarap olgeta.” Dispela i strongim dispela tok olsem “skai na graun” i no makim skai na graun tru tru; em i makim ol manmeri na ol gavman i bosim ol.
18 Orait nau Pita i tok, dispela de bilong Jehova i laik kamap, em bai pinisim ol samting nogut na opim rot bilong nupela skai na nupela graun i ken kamap, em ves 13 i stori long en. Tingim namba tu hap bilong dispela ves—“stretpela pasin tasol bai i stap long en.” Dispela i makim olsem sampela bikpela senis i mas kamap na nau i stap bilong yumi bai kamap gutpela, a? Dispela i kamapim klia olsem ol samting bai kamap nupela tru, na ol man bai kisim bikpela amamas long i stap bilong ol, winim amamas ol i kisim long nau. Sapos yu kisim gut dispela tok, orait yu save gut long dispela samting Baibel i tok profet long en—em samting i no planti man i save gut long en, nogat.
19. Wanem sampela samting Buk Kamapim Tok Hait i stori long en paslain long dispela tok long “nupela skai na nupela graun”?
19 Orait nau yumi ken skelim sampela tok moa. Yumi skelim pinis dispela tok “nupela skai na nupela graun” long Aisaia sapta 65 na long 2 Pita sapta 3. Nau opim Baibel long Kamapim Tok Hait sapta 21, em wanpela taim moa dispela tok i kamap long Baibel. Tasol pastaim i gutpela sapos yumi skelim sampela ves klostu long dispela sapta. Long tupela sapta paslain long sapta 21, long Kamapim Tok Hait sapta 19, ol ves i tok piksa long wanpela pait—tasol em i no wanpela pait i kamap namel long tupela lain i stap birua birua, nogat. “Tok bilong God,” em wanpela biknem bilong Krais Jisas, em i insait long dispela pait. (Jon 1:1, 14) Em i stap long heven, na long dispela tok piksa em i stap wantaim ol ami bilong em long heven. Ol i pait long husat? Dispela sapta i tok ol i pait long “ol king,” “ol kepten bilong ol soldia,” na ol man i gat kain kain wok—“ol wokboi nating na ol man nating wantaim ol man i gat nem.” Dispela pait bai kamap long de bilong Jehova, na long dispela taim em bai pinisim ol pasin nogut. (2 Tesalonaika 1:6-10) Kamapim Tok Hait sapta 20 i tok “snek bilong bipo tru, em Satan,” em bai pinis. Orait nau yumi ken skelim Kamapim Tok Hait sapta 21.
20. Kamapim Tok Hait 21:1 i makim wanem bikpela senis bai kamap bihain?
20 Aposel Jon i kamapim namba wan tok bilong dispela sapta olsem: “Mi lukim nupela skai na nupela graun i stap. Namba wan skai na namba wan graun i go pinis olgeta. Na solwara i no i stap moa.” Ol tok yumi skelim long Aisaia sapta 65 na 2 Pita sapta 3 i soim yumi olsem skai na graun na solwara tru i no gat senis bilong en. Olsem ol sapta yumi skelim pinis i kamapim, ol man nogut wantaim ol gavman bilong ol, na Satan tu, em bos bilong ol, ol bai pinis. Em nau, dispela tok promis i olsem: Wanpela nupela taim bai kamap em ol manmeri long graun i insait long en.
21, 22. Jon i stori long wanem ol gutpela blesing? Dispela tok olsem God bai mekim drai wara i stap long ai bilong ol man em i makim wanem samting?
21 Dispela samting i kamap klia taim yumi skelim sampela ves moa bilong dispela gutpela tok profet. Laspela hap bilong ves 3 i tok God bai stap wantaim ol man, olsem helpim ol man i bihainim laik bilong em. (Esekiel 43:7) Jon i tok moa long ves 4 na 5: “Em [Jehova] bai i mekim drai wara i stap long ai . . . bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta. Na dispela Man i sindaun long sia king, em i tok olsem, ‘Harim. Mi mekim olgeta samting i kamap nupela.’ Na em i tok moa olsem, ‘Yu raitim dispela tok. Dispela tok em i tru olgeta, inap olgeta man i ken bilip tru long en.’ ” Man! Em wanpela gutpela tok profet tru, a?
22 Orait nau gutpela sapos yumi tingim na pilim tru dispela samting Baibel i tok profet long en. ‘God bai i mekim drai wara i stap long ai bilong ol.’ Dispela i no makim aiwara nating o aiwara bilong amamas. Nogat. God bai mekim drai aiwara bilong man i kisim pen na hevi. Olsem wanem yumi save olsem? Orait, dispela gutpela tok promis bilong God long mekim drai aiwara, ol i bungim wantaim dispela tok olsem ‘indai, bel hevi, krai, na pen bai pinis olgeta.’—Jon 11:35.
23. Tok profet bilong Jon i makim wanem ol samting bai pinis?
23 Dispela i kamapim klia olsem sik kensa, sik strok, sik hat-atek, na dai tu ol bai pinis olgeta. Yumi olgeta i gat wanpela long famili i bin i dai long sik o long wanpela bikpela bagarap, a? Long dispela ves God i tok promis olsem man i no ken i dai moa, na dispela i makim olsem, sapos i gat ol pikinini i kamap long dispela taim, ol i no ken tingting long kamap bikpela na bihain go lapun na dai, nogat. Dispela tok profet i makim tu olsem bai i no gat moa ol sik olsem alsaima, ostioporosis, ol buk nogut, ol sik bilong ai olsem glokoma na katarak, em planti lapun i save kisim.
24. Olsem wanem “nupela skai na nupela graun” bai mekim gut long yumi? I gat wanem samting moa yumi bai stori long en?
24 Sapos i no gat dai moa, na lapun, na sik, orait pasin bilong bel hevi na krai bai i go liklik. Tasol olsem wanem long pasin bilong i stap rabis, na mekim nogut long ol pikinini, na daunim ol man bilong narapela kain sindaun o skin? Sapos ol dispela hevi i no pinis, orait krai na bel hevi tu i no inap pinis olgeta, a? Olsem na long dispela “nupela skai na nupela graun,” bai i no gat ol dispela pasin bilong nau i kamapim krai na bel hevi. Em nau, bikpela senis tru bai kamap, a? Tasol yumi stori pinis long tripela taim tasol dispela tok “nupela skai na nupela graun” i kamap long Baibel. I gat wanpela moa i kain olsem ol samting yumi skelim pinis na i soim olsem i gat as na yumi ken wetim taim God i makim na rot em bai mekim wok long en bilong truim tok promis bilong em long “mekim olgeta samting i kamap nupela.” Stori i kam bihain long dispela bai toktok long dispela tok profet na long gutpela sindaun yumi inap kisim long bihain.
Yu Inap Tingim Bek Wanem Ol Tok?
• Kolim tripela hap long Baibel i tok profet long “nupela skai na nupela graun.”
• Olsem wanem wanpela truim bilong “nupela skai na nupela graun” i bin kamap long ol Juda bilong bipo?
• Yumi ken save dispela “nupela skai na nupela graun” Pita i stori long en em i wanem samting?
• Olsem wanem Kamapim Tok Hait sapta 21 i helpim yumi long save olsem i stap bilong ol man bai i gutpela tru long bihain?
[Piksa long pes 10]
Stret olsem Jehova i bin tok profet, Sairus i opim rot bilong ol Juda i ken go bek long ples bilong ol long yia 537 B.C.E.