Sapta 20
Wanpela Bikpela Lain Tru
1. Jon i stori pinis long 144,000 i kisim mak, na nau em i lukim wanem narapela lain?
JON i stori pinis long 144,000 i kisim mak, na nau em i stori long wanpela gutpela samting bipo i stap hait tasol nau em i kamap ples klia, na yumi kirap nogut long dispela gutpela samting. Ating bel bilong em i amamas tru taim em i kolim dispela samting. Em i tok: “Bihain mi lukluk gen, na mi lukim planti manmeri tru ol i bung i stap, na i no inap man i kaunim namba bilong ol. Dispela ol manmeri ol i bilong olgeta lain man na bilong olgeta kantri na bilong olgeta kain skin na bilong olgeta tok ples. Ol i sanap i stap long pes bilong sia king na long ai bilong Pikinini Sipsip. Ol i bin putim ol longpela waitpela klos, na long han bilong ol, ol i holim ol lip bilong diwai pam.” (KTH 7:9) Ol ensel i pasim 4-pela win, na dispela i helpim lain 144,000 Israel bilong spirit, na i helpim tu traipela lain manmeri bilong olgeta kantri na kain kain tok ples.—KTH 7:1.
2. Sampela man i bin tok wanem long bikpela lain? Ol Sumatin Bilong Baibel i bin ting olsem wanem long bikpela lain?
2 Sampela man i tok, dispela bikpela lain olsem “planti manmeri tru” i makim ol man i kamap Kristen na ol i no bilong lain Juda, o i makim ol Kristen ol i bilong i go long heven na ol man i bin givim pen long ol na kilim ol i dai. Bipo ol Sumatin Bilong Baibel tu i ting dispela lain i olsem namba tu lain bilong heven. Volyum Namba 1 bilong sampela buk (Studies in the Scriptures, The Divine Plan of the Ages ol i wokim long 1886) i tok: “Ol i lus long kisim sia king na long kamap kain olsem God, tasol ol bai kamap spirit na i stap daun. Ol i kisim mak, tasol tingting bilong graun i pulim ol na ol i no givim laip bilong ol olsem ofa.” Na inap long 1930 ol dispela Sumatin i gat tingting olsem buk Light Buk Namba Wan i kolim: “Ol manmeri bilong dispela bikpela lain ol i no bihainim tok long kamap strongpela witnes bilong autim tok bilong Bikpela.” Ol dispela Sumatin Bilong Baibel i tok, dispela lain i ting ol i stretpela man, na ol i save long tok i tru, tasol ol i no autim tok tumas. Ol bai stap olsem namba 2 lain long heven na ol i no ken wok wantaim Krais long mekim wok king.
3. (a) Sampela ol man i gat gutpela bel na ol i bin wok strong long autim tok, ol i gat wanem tingting na laik? (b) Wastaua (tok Inglis) bilong 1923 i tok wanem long tok piksa bilong sipsip na meme?
3 Tasol i gat sampela man moa ol i bung wantaim ol Kristen bilong liklik lain em God i bin makim ol, na bihain ol i wok strong long autim tok. Ol i no gat tingting long i go long heven; ol i gat tingting long i stap laip long graun. Ol i gat tingting wankain olsem wanpela pablik-tok em lain bilong Jehova i bin kamapim long 1918 i go inap 1922. Pastaim nem bilong dispela pablik-tok em olsem: “Pasin Bilong Dispela Graun i Pinis—Planti Milion Man Bilong Nau i No Ken i Dai.”a Bihain liklik, nius Wastaua (tok Inglis) bilong Oktoba 15, 1923, i kamapim insait bilong tok piksa bilong Jisas long sipsip na meme (Matyu 25:31-46) na i tok: “Ol sipsip i makim ol manmeri bilong olgeta lain, em God i no bin makim ol, tasol ol i laik bihainim pasin i stret na ol i bilip long Krais Jisas em i Bikpela na ol i tingting long i stap aninit long em na kisim gutpela sindaun, na em bai bosim gut ol.”
4. Long 1931 ol i bin kisim wanem nupela save, o lait, long dispela lain bilong i stap long graun? Na long 1932? Na long 1934?
4 Na long 1931 wanpela buk (Vindication, Buk 1) i stori long Esekiel sapta 9 na long sampela man long las taim ol bai kisim mak long pes bilong ol, na ol i olsem ol dispela sipsip long tok piksa bilong Jisas. Na narapela buk (Vindication, Buk 3 ol i bin wokim long 1932) i toktok long stretpela man Jonadap, em i no wanpela Israel, na em i go wantaim King Jehu bilong Israel long karis bilong Jehu; em i laik lukim Jehu i givim bel long pinisim ol man bilong lotu giaman. (2 King 10:15-17) Dispela buk i tok: “Jonadap i makim wanpela lain nau i stap long graun long taim wanpela wok i stap kain olsem wok bilong Jehu [long tokaut long kot bilong Jehova bai painim ol man], na dispela lain i gat gutpela bel na ol i no wanbel long oganaisesen bilong Satan; ol i bihainim pasin i stret. Bikpela bai lukautim ol long taim bilong Armagedon na bai ol i no ken lus long dispela taim nogut, na em bai givim laip oltaim long ol long graun. Ol i olsem lain ‘sipsip.’ ” Na long 1934 Wastaua (tok Inglis) i tok klia olsem ol dispela Kristen i gat tingting long i stap laip long graun ol i mas dediket long Jehova na kisim baptais. Jehova i wok long kamapim klia tru ol save o lait long dispela lain bilong graun.—Sindaun 4:18.
5. (a) Long 1935 wanem tok i kamap bilong tok klia long dispela bikpela lain manmeri ol i husat? (b) Long 1935, taim J. F. Rutherford i tokim ol man long kibung, ‘Ol man i laik i stap oltaim long graun, plis yupela sanap,’ wanem samting i kamap?
5 Taim i kamap pinis bilong Jehova i kamapim long ples klia insait bilong Kamapim Tok Hait 7:9-17! (Song 97:11) Wanpela kibung i laik kamap long Wosington, D.C., long Amerika long Me 30 i go inap Jun 3, 1935, na planti taim Wastaua (tok Inglis) i tok, ating dispela kibung bai helpim gut dispela lain em Jonadap i makim. Tru tumas, kibung i bin mekim olsem! Brata J. F. Rutherford, em long dispela taim em i go pas long wok bilong autim tok long olgeta hap, em i mekim wanpela gutpela tok, nem bilong en “Bikpela Lain Manmeri,” na 20,000 manmeri ol i harim. Em i kamapim tok bilong Baibel i makim olsem dispela lain narapela sipsip i wankain olsem dispela bikpela lain manmeri em Kamapim Tok Hait 7:9 i kolim. Taim Rutherford i laik pinisim tok em i tok olsem: “Ol man i laik stap oltaim long graun, plis yupela sanap.” Orait, planti man i kirap sanap, em bikpela hap bilong dispela lain i stap long kibung. Nau presiden i tokaut olsem: “Lukim! Bikpela lain manmeri!” Ol i kirap nogut long harim dispela tok, na i no gat man i toktok, tasol bihain liklik ol i kirap singaut strong na amamas. Lain em Jon i piksa bilong ol ol i amamas tru na lain em Jonadap i piksa bilong ol, ol tu i amamas! Long de bihain 840 nupela Witnes i kisim baptais, na klostu olgeta i bilong dispela bikpela lain.
Bilong Save Tru, Bikpela Lain i Husat
6. (a) Olsem wanem yumi ken save tru long dispela bikpela lain Kristen bilong nau ol i dediket pinis na ol i tingting long i stap laip long graun? (b) Waitpela klos bilong bikpela lain i makim wanem samting?
6 Olsem wanem yumi ken save tru olsem dispela bikpela lain em ol Kristen bilong nau ol i dediket pinis na ol i tingting long i stap laip long graun bilong God? Long driman, pastaim Jon i bin lukim wanpela lain long heven, em Jisas i “bin baim bek ol . . . bilong God,” na ol i “bilong olgeta tok ples, na bilong olgeta kain skin, na bilong olgeta kantri.” (KTH 5:9, 10) Bikpela lain tu i bilong olgeta tok ples na skin na kantri, tasol ol i no bilong i go long heven. God i bin makim hamas man i mas insait long Israel bilong God, tasol em i no bin mekim olsem long dispela bikpela lain. I no gat man inap save hamas man bai insait long bikpela lain. Ol i wasim klos bilong ol long blut bilong Pikinini Sipsip na klos i kamap waitpela, na nau dispela waitpela klos bilong ol i makim olsem ol i kamap stretpela man long ai bilong Jehova, long wanem ol i bilip long ofa Jisas i bin mekim bilong helpim ol. (KTH 7:14) Ol i holim lip bilong diwai pam na ol i singaut amamas long Krais em i King bilong ol.
7, 8. (a) Taim aposel Jon i driman na lukim ol man i holim lip bilong diwai pam, em i tingim wanem samting? (b) Taim bikpela lain i holim lip o han bilong diwai pam samting, dispela i makim wanem samting?
7 Taim Jon i lukim ol samting long driman hia ating em i tingim samting i bin kamap 60 yia bipo, olsem long laspela wik bilong Jisas i bin stap long graun. Long de 9 bilong mun Nisan long yia 33 ol man i bin bung bilong amamas long Jisas taim em i laik go insait long Jerusalem, “na ol i kisim ol han bilong diwai pam na ol i go bungim em long rot. Na ol i singaut olsem, ‘Amamas long God. God i ken mekim gut long dispela man i kam long nem bilong [Jehova]. Em i king bilong Israel.’ ” (Jon 12:12, 13) Na i olsem tu long bikpela lain em Jon i lukim ol, ol i holim han bilong diwai pam na ol i singaut amamas bilong makim olsem ol i orait tru long givim bel long Jisas em dispela King Jehova i bin makim.
8 Na taim Jon i lukim ol lip bilong diwai pam na em i harim ol i singaut na amamas, ating em i tingim ol Israel bilong bipo ol i save wokim Ol Bikpela De Bilong I Stap Long Haus Win. Long dispela bung Jehova i tok: “Long de namba wan yupela i mas kisim sampela gutpela kaikai tru long ol diwai yupela i save kaikai pikinini bilong en. Na yupela i mas kisim ol han bilong diwai det na ol han bilong ol diwai i gat planti lip. Na yupela i mas amamas inap long 7-pela de long ai bilong mi, [Jehova], God bilong yupela.” Ol dispela han bilong diwai pam i bilong makim olsem ol i amamas. Ol dispela haus win i bilong kirapim ol long tingim taim Jehova i bin helpim ol long lusim Isip na ranawe i go long ples nating na ol i slip long ol haus sel. “Ol man bilong narapela kantri i stap wantaim [ol], na ol pikinini, papa bilong ol i dai pinis, na ol meri, man bilong ol i dai pinis,” ol tu i bung wantaim ol long dispela taim. Olgeta Israel wantaim “i mas amamas tru.”—Wok Pris 23:40; Lo 16:13-15.
9. Bikpela lain i singaut amamas na i tok wanem?
9 Dispela bikpela lain manmeri i no bilong Israel bilong spirit, tasol i stret ol i holim lip bilong diwai pam, long wanem, ol i save God na Pikinini Sipsip i helpim ol long winim ol hevi na pait, olsem na ol i amamas. Jon i tok olsem, em i tok: “Ol i singaut strong olsem, ‘God bilong yumi em i save sindaun long sia king bilong en, na Pikinini Sipsip, tupela tasol i save kisim bek yumi na mekim yumi i stap gut.’ ” (KTH 7:10) Ol i bilong ol narapela narapela tok ples o lain samting, tasol “ol i singaut strong” wantaim olsem wanpela nek tasol. Olsem wanem ol inap mekim olsem, maski ol i bilong planti ol narapela narapela kantri na tok ples?
10. Olsem wanem bikpela lain i wanbel long “singaut strong,” olsem wanpela nek tasol, maski ol i bilong planti ol narapela narapela kantri na tok ples?
10 Dispela bikpela lain i insait long wanpela oganaisesen hia long graun long nau, em ol i bilong olgeta lain na tok ples, tasol ol i stap wanbel tru. I no gat narapela oganaisesen i stap wanbel tru olsem. Maski ol i bilong wanem wanem lain o kantri, ol i save bihainim wankain pasin, na long olgeta taim ol i bihainim ol stretpela lo bilong Baibel, maski ol i stap we. Ol i no insait long wok politik o pait bilong ol man, nogat; “ol i paitim ol bainat bilong ol i kamap olsem ol ain bilong brukim graun.” (Aisaia 2:4) Ol i no bruk long ol narapela narapela lotu, olsem na ol i no gat ol narapela narapela tok o singaut olsem ol lotu i gat nem Kristen, em tok bilong ol i paul na i no klia liklik, nogat; na ol i no gat lain pris pasto tu bilong mekim wok bilong ol long litimapim nem bilong God, nogat. Na ol i no litimapim nem bilong spirit holi na tok, dispela samting tasol i givim laip long ol; long wanem, ol i no wokman bilong wanpela god triwan. Maski ol i stap long planti ol narapela narapela hap bilong graun, olsem 200 samting, ol i wanbel long kolim nem bilong Jehova, olsem long wanpela nek tasol, long wanem, olgeta i save mekim wanpela gutpela tok ples, em tok i tru. (Sefanaia 3:9) Ol i save tokaut long ol man na i tok, Jehova em Man bilong kisim bek ol, na em bai mekim olsem long rot bilong Krais Jisas, em i Nambawan Rot bilong Jehova long helpim ol man long kisim laip.—Song 3:8; Hibru 2:10.
11. Olsem wanem ol nupela masin samting bilong nau i bin helpim bikpela lain long mekim singaut bilong ol i go bikpela moa?
11 Ol man bilong nau i wokim ol nupela masin samting na dispela i helpim bikpela lain long mekim bikpela singaut moa yet. I no gat narapela lotu long graun ol i gat wok long wokim ol buk na nius long 400 tok ples samting bilong lainim ol man long tok bilong Baibel, long wanem i no gat narapela lotu i gat tingting long helpim olgeta man long lainim ol tok inap helpim ol long i stap wanbel. Lain Bilong Bosim Ol Witnes Bilong Jehova i helpim sampela man long wokim wanpela masin kompyuta ol i kolim MEPS na long dispela rot ol inap wokim ol buk na nius samting. Long nau long planti kantri, winim 125, i gat sampela kain masin kompyuta olsem MEPS bilong helpim ol long wokim nius Wastaua long kain kain tok ples i kamap long wankain taim olsem bilong tok Inglis na i gat wankain tok long en. Ol i wokim kain Wastaua olsem long planti tok ples, winim 130. Na lain bilong Jehova i wokim ol buk long planti tok ples wantaim, olsem dispela buk nau yu kaunim. Klostu olgeta Witnes Bilong Jehova i bilong dispela bikpela lain, na long olgeta yia ol i save tilim planti handet milion buk na nius long ol tok ples planti man i save long en, na planti man bilong olgeta lain na tok ples ol i ken lainim tok bilong Baibel na bung wantaim bikpela lain na mekim bikpela singaut wantaim ol.—Aisaia 42:10, 12.
Long Heven o Long Graun?
12, 13. Olsem wanem bikpela lain “i sanap i stap long pes bilong sia king na long ai bilong Pikinini Sipsip”?
12 Jon i tok, bikpela lain “i sanap i stap long pes bilong sia king,” tasol olsem wanem yumi save dispela i no makim olsem ol i stap long heven? I gat planti samting i kamapim long ples klia bekim bilong dispela askim. Long tok Grik dispela tok “long pes bilong” (e·noʹpi·on) i olsem “long ai bilong,” na i olsem ol man i stap long graun ol i stap long ai bilong Jehova, na sampela taim Baibel i tok olsem. (1 Timoti 5:21; 2 Timoti 2:14; Galesia 1:20) Taim lain Israel i stap long ples nating, wanpela taim Moses i tokim Aron: “Bikpela i harim pinis tok kros bilong olgeta manmeri. Olsem na tokim olgeta i mas i kam sanap klostu long Bikpela.” (Kisim Bek 16:9) Tasol i no olsem ol i mas i go long heven na bai ol i ken sanap klostu long Jehova, olsem long pes bilong em, nogat. (Lukim Wok Pris 24:8.) Ol i stap long ples nating hia long graun na ol i stap long ai bilong Jehova na em i lukluk i kam long ol.
13 Na Baibel i tok: “Taim Pikinini Bilong Man i kam bek olsem king . . . olgeta lain manmeri bai ol i kam bung long pes bilong em.” Long taim bilong truim bilong dispela tok profet olgeta man bilong graun i no ken i stap long heven, nogat. Ol man “bilong kisim pe nogut, [na] pen i save stap oltaim” ol bai i no stap long heven. (Matyu 25:31-33, 41, 46) Long dispela taim ol man bai stap long graun long ples klia long ai bilong Jisas na em bai lukluk long ol bilong skelim pasin bilong ol. Na i olsem tasol long bikpela lain “i sanap i stap long pes bilong sia king na long ai bilong Pikinini Sipsip.” Jehova na King bilong em, em Krais Jisas, tupela i lukim dispela bikpela lain na tupela i orait long ol.
14. (a) Husat i “raunim . . . sia king” na “i sanap long maunten Saion [long heven]”? (b) Bikpela lain i save mekim wok bilong God “long haus bilong en,” tasol olsem wanem yumi save ol i no bilong lain pris?
14 Na Jon i tok, 24 hetman na 144,000 man em God i bin makim ol long spirit holi, ol i “raunim . . . sia king” bilong Jehova na ol i “sanap long maunten Saion [long heven].” (KTH 4:4; 14:1) Tasol dispela bikpela lain “planti manmeri tru” ol i no lain pris; olsem na ol i no kisim dispela bikpela wok. Tru, Kamapim Tok Hait 7:15 i tok, ol i mekim wok bilong God “long haus bilong en.” Tasol dispela haus i no makim Rum Tambu Tru, nogat. Em i makim banis bilong haus lotu spirit bilong God hia long graun. Ol i tanim tok Grik na·osʹ olsem “haus lotu,” na planti taim dispela i makim bikpela haus ol i wokim bilong lotuim Jehova. Long nau em i makim wanpela bikpela samting i stap long heven na graun wantaim.—Lukim Matyu 26:61; 27:5, 39, 40; Mak 15:29, 30; Jon 2:19-21.
Planti Ol i Singaut Litimapim Nem Bilong Jehova
15, 16. (a) Taim ol lain bilong heven i lukim bikpela lain, ol i mekim wanem? (b) Ol ensel i mekim wanem taim ol i lukim ol narapela narapela samting Jehova i mekim bilong kamapim long ples klia laik bilong em? (c) Yumi manmeri bilong graun i ken mekim wanem na bai yumi tu inap insait long dispela singsing bilong litimapim nem bilong Jehova?
15 Bikpela lain i litimapim nem bilong Jehova, na i gat sampela moa tu i mekim olsem. Jon i tok: “Olgeta ensel ol i sanap raunim sia king wantaim ol hetman na ol 4-pela samting i stap laip. Na ol i lukluk i go long sia king na ol i brukim skru na putim pes bilong ol i go daun long graun, na ol i lotu long God. Ol i tok olsem, ‘I tru. Yumi amamas moa yet long God bilong yumi, na yumi tokaut long biknem bilong em. Em i gat olgeta gutpela tingting, na yumi givim tenkyu long em, na litimapim nem bilong em. Em i gat strong tru. Yes, olgeta bikpela strong i stap long em. Oltaim oltaim dispela olgeta samting ol i bilong God tasol. I tru.’ ”—KTH 7:11, 12.
16 Taim Jehova i wokim graun, olgeta ensel holi bilong em “i bin lukim” na ol i singsing na ol “i amamas na singaut.” (Jop 38:7) Taim ol i kisim save long ol narapela narapela samting Jehova i mekim bilong kamapim laik bilong em, ating long olgeta taim, ol i singaut na litimapim nem bilong em. Taim 24 hetman—em lain 144,000 i kisim pinis biknem long heven—ol i singaut strong na i tok amamas long Pikinini Sipsip, olgeta ensel bilong God long heven ol tu i kirap litimapim nem bilong Jisas na God Jehova. (KTH 5:9-14) Ol i bin amamas long lukim Jehova i kamapim tru laik bilong em na em i kirapim bek long matmat ol man i bin stap gut long God na God i bin makim ol long spirit holi, na ol i kisim gutpela wok long heven. Nau olgeta gutpela lain bilong Jehova long heven ol i kirap singsing na litimapim nem bilong Jehova na Jisas taim ol i lukim bikpela lain ol i stap. Tru tumas, olgeta wokman bilong Jehova i amamas, long wanem, ol i stap long de bilong Bikpela. (KTH 1:10) Yumi olgeta hia long graun i ken amamas, long wanem, yumi gat gutpela wok na yumi tu i ken insait long dispela singsing bilong litimapim nem bilong Jehova na autim tok long Kingdom bilong em!
Bikpela Lain i Kamap
17. (a) Wanpela bilong 24 hetman i askim Jon long wanem samting? Dispela hetman i kisim save long bekim bilong dispela askim, na ating dispela i makim wanem samting? (b) Bekim bilong dispela askim i kamap long wanem taim?
17 Long taim aposel Jon i bin i stap long graun, na i go inap long de bilong Bikpela, ol Kristen em God i makim ol, ol i no save husat dispela bikpela lain. Olsem na i stret wanpela bilong 24 hetman i mekim wok olsem maus bilong dispela liklik lain Kristen i go pinis long heven na bai em i ken givim askim long Jon na kirapim tingting bilong em. “Orait wanpela bilong ol hetman em i askim mi olsem, ‘Ol dispela manmeri i bin putim ol longpela waitpela klos, em ol husat? Ol i kam long wanem hap?’ Na mi bekim tok bilong em olsem, ‘Bikman, yu yet yu save.’ ” (KTH 7:13, 14a) Dispela hetman inap painim bekim bilong dispela askim na givim long Jon. Ating dispela i makim olsem ol dispela Kristen insait long lain 24 hetman i bin kirap pinis long matmat na i stap pinis long heven ol i insait long wok bilong salim ol tok i tru bilong God i kam daun long lain bilong God i stap long graun nau long dispela taim. Pastaim dispela lain em Jon i piksa bilong ol, ol i no save husat dispela bikpela lain, tasol ol i lukim ol samting Jehova i mekim namel long ol na dispela i givim save long ol, na nau ol i save pinis husat dispela bikpela lain. Long 1935 em taim bilong Jehova long givim dispela bikpela ‘lait’ olsem save long ol, i olsem bekim bilong dispela askim, na kwiktaim ol i pilim dispela tok na dispela save na lait Jehova i givim long ol.
18, 19. (a) Long 1920 na i kam inap 1933 samting, lain em Jon i piksa bilong ol, ol i tingting tasol long husat? Tasol husat ol i harim tok bilong ol? (b) Long 1935 ol i save pinis long bikpela lain i husat, na nau ol i save long wanem samting bilong lain 144,000? (c) Yumi tingim hamas man i kam long Memorial long bipo na long nau, na hamas man i bin kisim bret na wain, na nau yumi save long wanem samting?
18 Long 1920 i go inap 1932 o 1933 samting, lain em Jon i piksa bilong ol, ol i tingting tasol long husat bai go long heven, na ol i stori long dispela tasol long ol buk bilong ol na long taim ol i autim tok. Olsem na ating long dispela taim sampela man moa i mas kam insait yet bilong inapim lain 144,000. Planti man i harim tok bilong ol na ol i givim bel long autim tok, tasol ol dispela man i no gat laik long i go long heven, nogat; ol i laik i stap oltaim long Paradais long graun. Ol i no bilong i go long heven, na ol i no bilong liklik lain sipsip; ol i bilong lain arapela sipsip. (Luk 12:32; Jon 10:16) Taim dispela save i kamap ples klia long 1935 em i makim olsem lain 144,000 em inap pinis.
19 Yumi inap save long dispela, long wanem, long 1938 i gat 59,047 Witnes Bilong Jehova i save autim tok, na 36,732 bilong ol i kisim bret na wain long Memorial bilong tingim i dai bilong Jisas, na dispela i makim olsem ol i bilong i go long heven. Long dispela taim na i kam inap nau lain bilong ol i wok long i go liklik, long wanem, ol dispela gutpela Witnes Bilong Jehova ol i wok long i dai i dai na wok bilong ol long graun i pinis. Long 2005 inap 8,524 tasol i kisim bret na wain bilong Memorial, tasol planti manmeri moa yet, inap 16,390,116, ol i bin i kam long Memorial.
20. (a) Long taim bilong Namba 2 Pait, J. F. Rutherford i bin tok wanem long bikpela lain? (b) Tasol olsem wanem nau yumi ken tok, dispela lain i bikpela tru?
20 Taim Namba 2 Pait i kirap, Satan i wok strong long pasim wok bilong bungim bikpela lain. Planti kantri i tambuim wok bilong Jehova. Long dispela taim nogut, na klostu long taim J. F. Rutherford i dai long 1942, em i tok: “Ating . . . dispela bikpela lain i no ken bikpela tumas olsem bipo yumi bin tingim.” Tasol God yet i mekim na dispela lain i kamap bikpela! Long 1946 lain Witnes i autim tok em i go bikpela inap 176,456, na klostu olgeta i bilong bikpela lain tasol. Na long 2005 i gat 6,390,022 Witnes i stap gut long mekim wok bilong Jehova long 235 kantri—em BIKPELA LAIN tru! Na ol i wok long i go bikpela moa yet.
21. (a) Olsem wanem wok bilong bungim lain bilong God long de bilong Bikpela em i stret olsem Jon i bin driman? (b) Truim bilong sampela bikpela tok profet i bin kamap olsem wanem?
21 Long de bilong Bikpela em God i bin wok long kisim na bungim lain bilong em, na i stret olsem Jon i bin lukim long driman, long wanem, pastaim God i kisim ol man bilong inapim lain 144,000, na bihain em i kisim ol man bilong bikpela lain. Aisaia i bin tok profet long taim bilong yumi na i tok: “Wanpela taim bai i kamap bihain” na sampela man bilong olgeta lain ol bai kam insait long gutpela lotu bilong Jehova. Na tru tumas, yumi amamas long “nupela skai na nupela graun” Jehova i wokim. (Aisaia 2:2-4; 65:17, 18) God i wok long “bungim olgeta samting long Krais, ol samting bilong heven na bilong graun tu.” (Efesus 1:10) Long taim bilong Jisas na i kam inap long nau, God i bin wok long bungim “ol samting bilong heven,” em dispela lain God i bin makim ol bilong i stap king long Kingdom bilong heven. Na long nau dispela bikpela lain i kamap, em ol narapela sipsip, na ol i olsem ol namba wan lain bilong “ol samting . . . bilong graun.” Sapos yu insait long ol dispela wok, dispela bai helpim yu long i stap amamas oltaim.
Ol Gutpela Samting Em Bikpela Lain Bai Kisim
22. Jon i kisim wanem sampela save moa bilong bikpela lain?
22 Long rot bilong Jehova, Jon i kisim sampela save moa bilong bikpela lain: “Em [hetman] i tokim mi olsem, ‘Ol dispela manmeri ol i bin [winim taim bilong bikpela hevi tru]. Na ol i bin wasim ol klos bilong ol long blut bilong Pikinini Sipsip, na ol klos i kamap waitpela. Olsem na ol i save sanap long pes bilong sia king bilong God. Na long san na long nait ol i save stap long haus bilong en na mekim wok bilong en. Na God i save sindaun long dispela sia king, em yet bai i stap wantaim ol na lukautim ol.’ ”—KTH 7:14b, 15.
23. Wanem dispela bikpela hevi tru em bikpela lain bai “winim”?
23 Bipo Jisas i bin tok, em bai kam wantaim bikpela namba bilong Kingdom, na bihain “bai i gat bikpela hevi tru. Stat long taim graun i nupela yet na i kam inap long nau, kain hevi olsem i no bin kamap bipo. Na bihain tu bai i no gat kain hevi olsem i kamap gen.” (Matyu 24:21, 22) Bilong truim dispela tok profet, ol ensel bai lusim 4-pela win na dispela bai bagarapim ol samting bilong Satan hia long graun. Bikpela Babilon bai kisim bagarap pastaim, em olgeta lotu giaman. Na taim dispela “bikpela hevi” i go bikpela tru, long dispela taim Jisas bai helpim hap lain bilong 144,000 ol i stap yet long graun, na bikpela lain tu wantaim na bai ol i ken abrusim bagarap.—KTH 7:1; 18:2.
24. Ol manmeri bilong bikpela lain i mas mekim wanem na bai ol i no ken bagarap?
24 Ol manmeri bilong bikpela lain i mas mekim wanem na bai ol i no ken bagarap? Hetman i tokim Jon “ol i bin wasim ol klos bilong ol long blut bilong Pikinini Sipsip, na ol klos i kamap waitpela.” I olsem ol i bilip long Jisas, em i Man bilong baim bek ol, na ol i bin dediket long Jehova, olsem tok promis na givim bel olgeta long em, na ol i kisim baptais long wara, em bilong makim olsem ol i bin dediket pinis, na ol i bihainim “gutpela pasin . . . [na] stap stret long ai bilong God” na bai bel bilong ol i no gat tok. (1 Pita 3:16, 21; Matyu 20:28) Olsem na ol i stap klin na stret long ai bilong Jehova, na “pasin bilong dispela graun i no ken mekim [ol] i kamap doti long ai bilong God.”—Jems 1:27.
25. (a) Olsem wanem bikpela lain i mekim wok bilong Jehova ‘long san na long nait long haus bilong em’? (b) Olsem wanem Jehova “i stap wantaim [bikpela lain] na lukautim ol”?
25 Na bikpela lain i wok strong long autim tok bilong Jehova, “na long san na long nait ol i save stap long haus bilong en na mekim wok bilong en.” Olsem wanem long yu? Yu dediket pinis long Jehova na yu insait long dispela bikpela lain? Sapos olsem, yu inap mekim gutpela wok bilong Jehova insait long banis bilong bikpela haus lotu spirit bilong em hia long graun. Long nau bikpela lain i wok aninit long liklik lain em God i bin makim ol, na bikpela lain i mekim bikpela wok moa long autim tok, winim bilong liklik lain. Ol i mas mekim ol wok bilong skin, tasol planti handet tausen i painim pinis rot bilong mekim wok painia tu. Tasol sapos yu no inap mekim wok painia, na yu dediket pinis na yu bilong bikpela lain, yu ken amamas, long wanem yu bilip na yu mekim wok bilong God, olsem na em i makim yu i olsem stretpela man na yu kamap pren bilong em, olsem na em i amamas long yu ken kam insait long dispela haus bilong em. (Song 15:1-5; Jems 2:21-26) Long dispela rot Jehova i save “stap wantaim” ol man i laikim tumas em, na em i mekim gut long ol na lukautim ol.—Sindaun 18:10.
26. Wanem sampela gutpela samting moa bikpela lain bai kisim?
26 Hetman i tok moa, olsem: “Ol bai i no hangre moa, na nek bilong ol bai i no drai gen. San bai i no inap boinim skin bilong ol, na i no gat wanpela samting bai i mekim skin bilong ol i hat nogut tru. Long wanem, Pikinini Sipsip i stap namel tru long sia king, em bai i stap wasman bilong ol. Em bai i bringim ol i go long ol hul i gat wara i kamap, em wara bilong givim laip. Na God bai i mekim drai wara bilong ai bilong ol, na ol bai i no krai moa.” (KTH 7:16, 17) Tru tumas, Jehova i save mekim gut long man! Tasol olsem wanem long insait bilong ol dispela tok?
27. (a) Olsem wanem tok bilong Aisaia na bilong hetman i wankain liklik? (b) Olsem wanem yumi ken save, truim bilong tok bilong Aisaia i wok long kamap long lain Kristen long taim bilong Pol?
27 I gat narapela tok profet i wankain liklik, em i tok: “Bikpela i tokim wokman bilong en olsem, ‘Mi yet mi bin makim taim bilong kisim bek yu na mekim gut long yu, na long dispela taim stret mi bin harim krai bilong yu na helpim yu. . . . Bai ol i no sot long kaikai na wara, na hatpela san na win bai i no inap kukim skin bilong ol. Long wanem, man bilong marimari long ol bai i lukautim ol gut, olsem wasman bilong sipsip i bringim ol lain sipsip i go long ol ples i gat planti gras na gutpela wara.’ ” (Aisaia 49:8, 10; lukim tu Song 121:5, 6.) Aposel Pol i kolim hap tok bilong dispela tok profet, na em i makim truim bilong en i kamap long “taim bilong God i kisim bek yumi.” Dispela taim i kirap long de Pentikos long yia 33. Pol i tok: “God i tok olsem, ‘Mi yet mi bin makim taim bilong kisim bek yu na mekim gut long yu, na long dispela taim stret mi bin harim krai bilong yu na helpim yu.’ Harim. Nau tasol em i taim bilong God i mekim gut long yumi. Nau tasol em i taim bilong God i kisim bek yumi.”—2 Korin 6:2.
28, 29. (a) Long taim bilong ol aposel wanem samting i kamap na i truim tok bilong Aisaia? (b) Wanem samting i painim bikpela lain na i truim tok bilong Kamapim Tok Hait 7:16? (c) Taim bikpela lain i kam long ‘wara bilong laip,’ dispela bai helpim ol olsem wanem? (d) Long bihain, olsem wanem bikpela lain bai narapela kain long ol narapela lain bilong graun?
28 Long bipo, olsem wanem na sampela Kristen i no hangre na nek bilong ol i no drai na san i no bin boinim ol? Tru, sampela Kristen long bipo ol i sot long kaikai na wara bilong bel. (2 Korin 11:23-27) Tasol ol i gat planti kaikai na wara bilong spirit. Jehova i bin lukautim ol gut long ol samting bilong spirit, olsem na ol i no bin sot liklik long kaikai na wara bilong spirit. Na Jehova i no bin kros long ol long taim em i bin belhat long lain Juda long yia 70 na em i bagarapim na pinisim dispela pasin na lo ol Juda i stap aninit long en. Na i olsem tu long Kamapim Tok Hait 7:16, em truim bilong en i painim bikpela lain long nau. Dispela lain wantaim liklik lain em God i makim, ol i kisim planti ol gutpela samting bilong spirit.—Aisaia 65:13; Nahum 1:6, 7.
29 Sapos yu bilong bikpela lain na yu gat gutpela bel, bai amamas i pulap long bel bilong yu na bai yu mekim ‘singsing bilong amamas,’ maski ol hevi na traim i painim yu nau long laspela taim bilong Satan i bosim graun. (Aisaia 65:14) Olsem na long nau tu Jehova inap long ‘rausim aiwara long ai bilong yu,’ na belhat bilong God i no ken hatim o boinim yu, na taim ol ensel i lusim 4-pela win dispela belhat bilong Jehova i no ken bagarapim yu. Taim dispela belhat bilong em i bagarapim pinis ol samting, Pikinini Sipsip bai bringim yu long samting bilong helpim na strongim yu, em “ol hul i gat wara i kamap, em wara bilong givim laip” long ol man, na dispela i makim ol samting Jehova i putim bilong helpim yu long kisim laip oltaim. Sapos yu bilip long blut bilong Pikinini Sipsip, dispela bilip bilong yu bai helpim yu long kamap gutpela olgeta. Yupela ol manmeri bilong bikpela lain, em yupela inap planti milion, yupela i no ken kisim bagarap wantaim ol narapela lain, na yupela i no ken i dai! Long dispela taim aiwara bilong yupela bai pinis olgeta.—KTH 21:4.
Stap Strong na Bai Yumi No Ken Lus
30. Wanem ol gutpela samting yumi ken tingim bilong bihain, olsem Jon i bin lukim long driman? Husat tasol inap long “stap gut”?
30 Ol dispela tok i makim gutpela samting tru yumi ken tingim bilong bihain! Jehova i sindaun long sia king bilong em na olgeta wokman bilong em long heven na long graun ol i bungim nek bilong ol long litimapim nem bilong em. Ol wokman bilong em long graun ol i save, i gutpela samting tru na ol inap insait long dispela wok bilong litimapim nem bilong em. Liklik taim nau Jehova na Jisas Krais bai givim strafe long ol man nogut, na long dispela taim ol man bai singaut na i tok: “Dispela bikpela De bilong tupela i belhat long ol manmeri na i bekim pe nogut long ol, nau em i kamap pinis. Na husat inap sakim strong bilong tupela na i stap gut?” (KTH 6:17) Orait, husat tru bai stap gut? I no planti. Liklik hap bilong lain 144,000—sapos ol i stap yet long graun long dispela taim—na dispela bikpela lain bilong ol narapela sipsip, ol tasol bai “stap gut” na i no ken kisim bagarap.—Jeremaia 35:19; 1 Korin 16:13.
31. Liklik lain wantaim bikpela lain i lukim ol samting i kamap bilong truim driman bilong Jon na dispela i mas kirapim ol long mekim wanem?
31 Olsem na ol Kristen em God i bin makim ol na Jon i piksa bilong ol, ol i wok “strong bilong kamap long mak na kisim prais. Dispela prais em i olsem: Long wok bilong Krais Jisas, God i singautim mi bilong i go antap na i stap gut tru wantaim em.” (Filipai 3:14) Ol dispela Kristen i lukim ol samting nau i wok long kamap, olsem na ol i save ol i mas wok strong na ol i no ken les. (KTH 13:10) Ol i bin mekim wok bilong Jehova inap planti yia pinis, na ol i sanap strong yet long bilip, na ol i amamas long wanem ol i tingim nem bilong ol i stap “long buk bilong [God] long heven.” (Luk 10:20; KTH 3:5) Na bikpela lain tu ol i save, “ol manmeri i stap strong inap long las de, God bai i kisim bek ol” dispela manmeri tasol. (Matyu 24:13) God i makim dispela bikpela lain na bai ol i mas winim dispela “bikpela hevi” bai kamap, tasol olgeta wan wan i mas wok strong long stap gut na mekim wok bilong God.
32. I gat tupela lain tasol bai “stap gut” long De bilong Jehova long kamapim belhat bilong em, olsem na yumi gat bikpela tingting long husat moa?
32 I gat dispela tupela lain tasol bai “stap gut” long taim Jehova bai kamapim kros bilong em, na i no gat narapela lain. Orait, olsem wanem long ol dispela planti milion man ol i gat hap tingting long ofa Jisas i bin mekim na long olgeta yia ol i save kam long Memorial bilong tingim i dai bilong Jisas, tasol ol i no gat strongpela bilip long dispela ofa inap long kirapim ol long dediket na kisim baptais na kamap wokman bilong God na mekim wok bilong em? Na olsem wanem long sampela moa, bipo ol i mekim wok bilong Jehova, tasol ol “i wari long ol samting bilong bodi” na nau ol i no stap moa long dispela wok? I gutpela sapos ol dispela man i ken kirap na “was i stap” na bai ol i ken “abrusim olgeta dispela samting i laik kamap,” na ol i ken “sanap long ai bilong Pikinini Bilong Man,” em Krais Jisas. Taim i sot pinis!—Luk 21:34-36.
[Futnot]
a Wastaua (tok Inglis), Epril 1, 1918, pes 98.
[Blok long pes 119]
God Tasol Inap Kamapim Insait Bilong Ol Tok
Inap planti yia, dispela lain Jon i piksa bilong ol, ol i bin traim kisim save long bikpela lain i husat, tasol ol i no inap. Bilong wanem? Gutpela man Josep i tok: “God tasol i save soim yumi as bilong ol [tok].” (Stat 40:8) Wanem taim God i save kamapim insait bilong truim bilong tok profet bilong em? Na em i mekim olsem wanem? Em i save mekim long taim truim i laik kamap, o long taim truim i wok long kamap, olsem bai ol wokman bilong em i ken kisim gut save long en taim ol i wok long painim dispela save. God i givim dispela save long yumi “bilong strongim bel bilong yumi na mekim yumi sanap strong.”—Rom 15:4.
[Blok long pes 124]
Bikpela lain
▪ ol i bilong olgeta kantri na lain man na tok ples
▪ ol i sanap long ai bilong sia king bilong Jehova
▪ ol i wasim klos bilong ol long blut bilong Pikinini Sipsip na klos i kamap waitpela
▪ ol i tokaut olsem Jehova na Jisas tasol inap helpim ol long kisim laip
▪ ol i winim taim bilong bikpela hevi tru
▪ ol i mekim wok long haus lotu bilong Jehova long san na long nait
▪ Jehova i lukautim ol na helpim ol
▪ Jisas i bringim ol i go long wara bilong laip
[Piksa i karamapim pes olgeta long pes 121]
[Piksa long pes 127]
Bikpela lain i save God wantaim Pikinini Sipsip tasol inap helpim ol long abrusim bagarap
[Piksa long pes 128]
Pikinini Sipsip bai bringim bikpela lain i go long wara bilong givim laip