Taim “King Bilong Gutaim” i Bosim Graun, Bai Gutaim i Kamap Long Olgeta Hap
“Wok king bilong em bai go bikpela, na gutaim i no ken pinis long sia king bilong Devit na long kingdom bilong em; na long stretpela lo na long stretpela pasin em i ken strongim na helpim dispela kingdom, kirap long nau na inap long taim bihain bihain. Strong bilong Jehova bilong ol ami bai mekim dispela samting.”—AISAIA 9:7, NW.
1, 2. (a) Taim Kingdom bilong God i kamap, em taim bilong mekim wanem? Wanem taim Kingdom bilong God i kamap? (b) Ol man i bin kamapim Yunaitet Nesen ol i makim wanem wok bilong en? Tasol kontrak bilong Kingdom i makim wanem wok bilong Krais Jisas? (c) Olsem wanem yumi save Jehova i no ken brukim kontrak bilong Kingdom?
TAIM nambawan gutpela man Jisas i kamap long graun, em taim bilong bikpela amamas, na taim Kingdom bilong em i kamap long heven, em tu i taim bilong bikpela amamas. (Sam 96:10-12) Ol samting i bin kamap long graun i makim olsem Jisas i kisim wok king long yia 1914. Maski i gat oganaisesen Yunaitet Nesen i stap long nau, tasol Kingdom bilong Krais i bin kamap tru long yia 1914. Yumi ken bilip tru long dispela samting. I no gat wanpela hetman bilong ol 159 lain insait long Yunaitet Nesen em i bilong lain bilong Devit. Tasol ol man i bin kamapim dispela oganaisesen ol i givim wok long ol dispela hetman bilong graun bilong kamapim gutaim long olgeta hap na bilong helpim olgeta man bambai ol i gat gutpela sindaun na ol i ken i stap bel isi.
2 Tasol kontrak bilong Kingdom Jehova i bin mekim, em i no pinis. God i bin tok promis long Devit long kamapim wanpela Kingdom em bai stap oltaim na Aisaia 9:7 (NW ) i strongim dispela tok, long wanem dispela ves i tok, dispela kingdom bai kamap long “sia king bilong Devit.” Na Jehova i bin tok tru antap olsem dispela kontrak o tok promis i no ken lus nating; dispela Kingdom i mas kamap tru. Sam 89:3, 4, 35, 36 i kamapim long ples klia olsem Jehova i no ken giaman na brukim dispela kontrak em i bin mekim. Em bai truim dispela tok promis bilong em. Sam 89 i tok: “Mi makim wanpela man pinis, na mi mekim wanpela kontrak wantaim em. Mi promis pinis long wokman bilong mi, Devit. Na mi tokim em olsem, ‘Ol king bai i kamap long lain bilong yu tasol. Oltaim bai mi putim wanpela man bilong lain bilong yu i stap king.’ Mi promis pinis wanpela taim tasol na mi kolim nem holi bilong mi yet bilong strongim dispela tok, na dispela inap long oltaim oltaim. Mi tok olsem: Mi no ken tok giaman long Devit. Ol lain tumbuna bilong en i no inap pinis, bai ol i stap oltaim. Na ol lain bilong en bai i bosim ol manmeri longtaim tru inap olsem san i stap.” Dispela kontrak na dispela nem “King Bilong Gutaim” i makim olsem God i givim wok long Krais Jisas bilong kamapim gutaim long olgeta hap bilong graun.
3. Taim “King Bilong Gutaim” i kirap mekim wok king, olsem wanem na i no gat gutaim long heven o long graun?
3 Tasol long yia 1914, taim God Jehova i putim Pikinini bilong em i stap King bilong gavman o Kingdom bilong em, i no gat gutaim long heven o long graun. Revelesen sapta 12 i stori olsem: Taim dispela Kingdom i kamap pinis, nau pait i kirap long heven. Seten wantaim ol spirit nogut i pait bilong daunim dispela Kingdom, na King bilong Kingdom wantaim ol ensel holi bilong em ol i pait na sakim ol dispela spirit nogut. Ol i tromoi Seten wantaim ol spirit nogut i kam daun long graun, olsem na wanpela maus i singaut strong long heven na i tok: “Yu graun, na yu solwara, yupela lukaut! Bikpela hevi i laik kamap long yupela! Seten i go daun pinis long yupela, na em i gat bikpela belhat tru. Em i save, em i gat sotpela taim tasol.” (Revelesen 12:12) Tru tumas, Seten i kam daun long graun na nau pasin pait na bagarapim man i pulap long graun, winim olgeta taim bipo. “King Bilong Gutaim” i mas bosim dispela graun bambai gutaim i ken kamap long olgeta hap!
4. Olsem wanem dispela nem “Strongpela God” i no wankain olsem God i gat olgeta strong?
4 Aisaia 9:6 (NW ) i kolim sampela nem moa long : “King Bilong Gutaim.” Wanpela em olsem “Strongpela God.” Em i no kisim nem olsem “God I Gat Olgeta Strong,” olsem em i hap bilong wanpela god triwan. Nogat. Taim em i kirap bek pinis tu em i tokaut olsem em i no bikpela olsem Papa bilong em. Em i tokim Maria bilong Makdala long i go tokim ol disaipel bilong em, em i laik i go long Papa bilong ol na long Papa bilong em, na long God bilong ol na long God bilong em. (Jon 20:17) Inap long dispela taim nau em i paslain long kirapim olgeta man na olgeta ensel long lotuim ‘dispela God i winim olgeta narapela God,’ em God Jehova. (Danyel 11:36) Tru tumas, Krais Jisas i gat God bilong em na dispela God em i no Jisas yet. Nogat. Em Papa bilong em long heven, Jehova. Dispela “King Bilong Gutaim” em inap tru long kamapim gutaim long heven na long graun!
5. Bilong wanem Krais Jisas em inap tru long helpim olgeta man na olgeta ensel long lotuim dispela wanpela God em i God tru i gat laip, em Jehova?
5 Inap long olgeta taim bihain, dispela Pikinini bilong God i kisim biknem pinis, em bai i go pas long helpim olgeta man na olgeta ensel long lotuim dispela wanpela God em i God tru i gat laip, em Jehova. Em inap tru long mekim dispela samting, long wanem em i bin i stap wantaim Papa long bipo bipo yet. Em i save gut long Papa, winim olgeta narapela man na ensel. Long 1 Korin 2:11 aposel Pol i tok: “Wanem man i save long tingting bilong narapela man? Nogat. Spirit bilong dispela man yet, em i stap insait long em, em tasol i save.” Olsem tasol long Krais Jisas. God Jehova i givim wok long Krais Jisas bilong wokim man, tasol Krais yet i mas kamap man bambai em i ken save tru long tingting na bel bilong man. Olsem na Baibel i tok, “Jisas i Pikinini Bilong God, tasol em i karim pen [long graun], na dispela i skulim em tru long pasin bilong bihainim tok bilong God.” (Hibru 5:8) Em inap tru long kisim “bikpela namba long heven na long graun” na kisim nem olsem “Strongpela God.”—Matyu 28:18; skelim tu Filipai 2:5-11.
“Gutpela Tisa” na “Papa Bilong Oltaim”
6. Olsem wanem Jisas i bin mekim wok olsem “Gutpela Tisa”? Ol gutpela tok bilong em i helpim ‘bikpela lain’ olsem wanem?
6 I gat ol dispela strongpela as na dispela Man em God i putim em i stap King long heven em i “Gutpela Tisa.” (Aisaia 9:6, NW ) Tok em i givim long ol man i gat gutpela tingting long en, na i stret olgeta, na i no inap kranki. Em i Namelman i stap namel long God na ol man i insait long nupela kontrak, na em i bin givim gutpela tok na tingting long ol inap 19 handet yia pinis. Long nau, kirap long yia 1935, ‘bikpela lain manmeri’ bilong ol “arapela sipsip” bilong Jisas ol i bin kisim gutpela tingting na save i kam long em. (Revelesen 7:9-17; Jon 10:16) Ol i kisim long rot bilong lain ‘gutpela wokboi.’ Jisas i tok promis pinis long kirapim wanpela lain olsem ‘gutpela wokboi’ bilong em na putim ol i stap bos bilong olgeta samting bilong Kingdom bilong em long graun nau long taim bilong pinis. (Matyu 24:3, 45-47; Luk 12:42-44) Nau ‘bikpela lain’ i kisim ol tok long ol samting bilong spirit em i gutpela tok tru ol i ken bilip tru long en, long wanem Baibel i as bilong en.
7. Lain bilong Jehova i mekim wanem na Seten i no i stap strongpela god moa long ol?
7 Ol i bihainim ol dispela tok, olsem na Seten, em “god giaman bilong dispela graun,” em i no wanpela strongpela god moa long yumi lain bilong Jehova. (2 Korin 4:4) Yumi bihainim tok bilong Jehova na lusim pinis Bikpela Babilon, em olgeta lotu giaman. Yumi no poroman moa wantaim Bikpela Babilon long ol sin nogut bilong en. Yumi sanap strong wantaim lain bilong dispela Man em i holim wok gavman long Kingdom bilong God.
8. (a) Bilong wanem ol manmeri bilong ‘bikpela lain’ i laikim tru dispela nem bilong Jisas olsem “Papa Bilong Oltaim”? (b) Ol man i larim Seten i stap papa bilong ol long spirit, wanem samting bai painim ol?
8 Dispela “King Bilong Gutaim” i gat narapela nem tu, em “Papa Bilong Oltaim.” Bikpela lain “arapela sipsip” ol i laikim tru dispela nem bilong em. Ol i no laik bai Seten i stap papa bilong ol. Ol i no laik tru long i stap olsem ol hetman bilong lotu Juda, em ol i birua long Jisas na em i tokim ol: “Yupela i pikinini bilong papa bilong yupela, Seten. Na yupela i strong long bihainim laik bilong bel bilong papa bilong yupela. Bipo yet em i man bilong kilim man i dai. Na em i no bihainim pasin i tru. Long wanem pasin i tru em i no i stap long em. Tok giaman em i mekim, dispela em i tok bilong em stret. Em i man bilong tok giaman, na em i papa tru bilong pasin bilong tok giaman.” (Jon 8:44) ‘Bikpela lain’ ol i lusim pinis lain bilong Seten. Seten i no ken i stap papa oltaim bilong ol sin man bilong graun. Ol man i larim Seten i stap olsem papa bilong ol long spirit, ol bai bagarap wantaim em. Seten wantaim olgeta man i stap olsem pikinini bilong em o lain bilong em, ol bai go “long paia i no save dai,” em Matyu 25:41 i stori long en. Dispela i makim olsem ol bai pinis olgeta.—Matyu 25:41-46.
9. Olsem wanem ol manmeri bilong ‘bikpela lain’ i pilim pinis gutpela wok “Papa Bilong Oltaim” bai mekim?
9 Tasol ol manmeri bilong ‘bikpela lain’ ol i pilim pinis gutpela wok “Papa Bilong Oltaim” bai mekim. Long wanem ol i harim maus bilong em na ol i kamap ol “arapela sipsip” bilong em, na ol i bung wantaim liklik hap lain bilong Isrel bilong spirit ol i stap yet long graun. Ol i pas gut wantaim olsem wanpela famili na dispela i mekim ol i stap bel isi. Long Rom 16:20 aposel Pol i stori long God Jehova na em i tok: “God, em i as bilong bel isi.” Olsem na i stret ol i kolim nem bilong Pikinini bilong God olsem “King Bilong Gutaim.” Dispela “King Bilong Gutaim” bai mekim ol samting olsem nem bilong em i makim—bai em i kamapim gutaim long heven na long graun, na bai olgeta ensel na olgeta man i stap bel isi tru!
Gavman Bilong “King Bilong Gutaim”
10, 11. Aisaia i stori long mama i karim nambawan gutpela man na bihain Aisaia i tok wanem? Wanem insait bilong dispela tok?
10 Aisaia i tok profet long meri bai karim dispela nambawan gutpela man em i Pikinini Bilong God na “King Bilong Gutaim,” na bihain Aisaia i tok: “Wok king bilong em bai go bikpela, na gutaim i no ken pinis ․․․ Strong bilong Jehova bilong ol ami bai mekim dispela samting.”—Aisaia 9:7, NW.
11 Dispela tok “wok king bilong em bai go bikpela” i makim olsem em bai bosim olgeta hap bilong graun. Na taim olgeta hap bilong graun i kamap olsem gutpela ples Paradais, “gutaim i no ken pinis.” Bai i no gat kros o pait moa. Bai olgeta manmeri long olgeta hap bilong graun i gat gutpela sindaun na i stap bel isi. (Sam 72:7) Dispela tok “gutaim” i no makim tasol olsem i no gat pait. Nogat. I makim tu olsem i gat stretpela pasin i stap. Long wanem Aisaia i tok, “stretpela lo” na “stretpela pasin” bai “strongim na helpim dispela kingdom, kirap long nau na inap long taim bihain bihain.” Bai ol man i kisim planti blesing. Strong bilong Jehova bai mekim dispela samting i kamap long taim bilong yumi.
12. Husat ol i autim tok bilong gavman bilong “King Bilong Gutaim” long olgeta hap bilong graun long nau?
12 Long nau i gat sampela man bilong lain bilong dispela Kingdom ol i stap long olgeta hap bilong graun. Long olgeta hap planti man i kirap na bilip long dispela Kingdom. God i bungim pinis hap lain bilong Krais, em spirit holi i bin makim ol na ol i stap yet long graun. Na nau God i wok long bungim ‘bikpela lain manmeri’ ol i bilong planti kantri, winim 200. Long nau i gat 3,229,022 witnes bilong Jehova i stap na planti man i wok yet long i kam bung wantaim ol. Dispela ‘bikpela lain’ i autim tok bilong Kingdom bilong “King Bilong Gutaim.” ‘Bikpela lain’ ol i amamas long i stap aninit long lo bilong dispela Kingdom, na ol i amamas long wok wantaim liklik hap lain ol i stap “maus bilong Krais” na autim tok bilong dispela Kingdom long olgeta hap bilong graun.—2 Korin 5:20.
Wok Bilong Ol Birua i Lus Nating
13. (a) Ol manmeri i autim tok bilong Kingdom, ol yet i wok long i stap olsem wanem? (b) God i ting olsem wanem long Yunaitet Nesen?
13 Ol dispela manmeri bilong autim tok bilong Kingdom, ol yet i wok long i stap wanbel wantaim. “Holi Spirit em i givim yumi pasin bilong i stap wanbel.” (Efesus 4:3) Maski ol narapela man i stap birua birua na ol i kros na pait, tasol lain bilong King Bilong Gutaim ol i stap wanbel. Ol lain insait na ausait long Yunaitet Nesen ol i birua long gavman bilong “King Bilong Gutaim.” Long ai bilong God, Yunaitet Nesen yet i olsem wanpela bikpela birua bilong gavman bilong “King Bilong Gutaim,” long wanem dispela oganaisesen i laik mekim wok God i bin givim long “King Bilong Gutaim” tasol, em wok bilong kamapim gutaim. Yunaitet Nesen i singautim olgeta lain man long helpim wok bilong en long kamapim gutaim long rot bilong ol wok ol man i mekim. Yunaitet Nesen i makim yia 1986 i olsem “Yia Bilong Gutaim.” Long dispela rot dispela oganaisesen i kamapim long ples klia olsem em i birua bilong “King Bilong Gutaim,” na em i birua long kontrak Jehova i bin mekim wantaim dispela King long givim Kingdom long em, em Kingdom bilong i stap oltaim.
14 Olsem wanem Aisaia i givim toksave long olgeta lain i birua long Jehova na long kontrak bilong Kingdom?
14 I gat kain samting olsem i bin kamap long taim bilong King Ehas, olsem na Aisaia i givim strongpela toksave long King Ehas wantaim lain bilong em na em i tok, ol i no ken bung wantaim Bikpela Gavman Bilong Asiria na wok long kamapim gutaim long dispela rot. Dispela tok save i stap long Aisaia 8:9, 10, NW. Profet i mekim dispela toksave long olgeta man i birua long Jehova na long kontrak bilong Kingdom. Profet i tok: “Yupela ol lain man, yupela i ken tingting long mekim pasin nogut, na bai yupela i bruk liklik liklik; putim yau, yupela olgeta i stap long ol longwe longwe hap bilong graun! Pasim let bilong yupela, na bai ol i brukim yupela olgeta! Pasim let bilong yupela, na bai ol i brukim yupela olgeta! Tingim wanpela wok yupela i laik mekim, na bai ol i bagarapim! Mekim wanpela tok, na em bai i lus nating, long wanem, God i stap wantaim mipela!”
15. Ol lain i birua long kontrak bilong Kingdom long nau, wanem samting bai painim wok birua bilong ol olsem i bin painim wok bilong ol birua long taim bilong Ehas?
15 Olsem na ol lain i stap aninit long hetman bilong dispela graun, ol i ken bung na pasim tok wantaim long ol samting ol i laik mekim bilong daunim kontrak bilong Kingdom wantaim King bilong Kingdom, tasol wok birua bilong ol bai lus nating wankain olsem wok bilong ol birua i lus nating long taim bilong King Ehas. King Resin bilong Siria na King Pika bilong Isrel i no pret long Jehova; tupela i pasim tok wantaim long daunim kontrak Jehova i bin mekim long Kingdom. Tasol ol samting ol i tingting long mekim i bagarap na i lus nating tasol. Na King Ehas bilong Juda em i no pret long Jehova na bihainim tok bilong em, olsem na em i go bung wantaim gavman bilong Asiria bambai ol i ken helpim em. Tasol dispela samting Ehas i mekim i no helpim em long i stap gutpela. Dispela samting i kamapim hevi na kalabus. Na i kamapim samting moa nogut tu, em olsem: Bihain Ehas i no i stap gutpela moa long ai bilong Jehova.
16. Jehova i mekim wanem na wok birua Asiria i mekim long kontrak bilong Kingdom i lus nating? Dispela i makim wanem samting i mas kamap long taim bilong yumi?
16 Ehas i dai pinis na taim pikinini bilong em Hesekaia i stap king, Jehova i pinisim wok birua gavman bilong Asiria i mekim bilong daunim kontrak bilong Kingdom. Ensel bilong Jehova i kilim i dai 185,000 soldia bilong Asiria na king bilong Asiria i surik na lusim graun bilong Isrel. Ol dispela birua i no sutim wanpela spia i go long taun Jerusalem. Ol i no kirapim pait liklik. (Aisaia 37:33-36) Long nau tu ol birua bilong kontrak bilong Kingdom na ol birua bilong “King Bilong Gutaim” bai ol i bagarap. Wok birua ol i mekim bai lus nating, long wanem God i stap wantaim King Emanyuel na em i stap wantaim olgeta man i amamas long dispela King!
Stap Gut long Wok King Bilong Jehova na No Ken Pret
17. (a) Liklik taim na bai ol gavman i mekim wanem long Bikpela Babilon? Long dispela taim wanem samting i mas kamap bilong helpim lain bilong Jehova? (b) Ol hetman i no bilip long God, taim ol i bagarapim pinis Bikpela Babilon, bihain bai ol i mekim wanem? Na bai Jehova i kirap mekim wanem?
17 Liklik taim na bai ol gavman i kirapim pait long ol lotu ol i kolim Kristen na long ol narapela lotu bilong Bikpela Babilon, na pinisim olgeta. Long dispela taim Jehova i mas kirap lukautim moa yet lain bilong em. Ol hetman i no bilip long God, taim ol i bagarapim pinis Bikpela Babilon, bihain bai ol i kirapim pait nogut long ol manmeri i givim bel long Kingdom bilong God i stap long han bilong Krais. Long dispela taim, long rot bilong “King Bilong Gutaim,” bai God Jehova i kirapim pait bilong “bikpela de bilong God I Gat Olgeta Strong.” (Revelesen 16:14) Bai ol birua i no inap daunim dispela Strongpela Man Bilong Pait, na bai gavman bilong em i go bikpela. Bai em i kamap olsem “Strongpela God” i stap aninit long God i gat olgeta strong, em God Jehova. Long Amagedon bai dispela “Strongpela God” i winim tru pait na ol man i no ken lusim tingting long dispela samting inap long olgeta taim bihain. Yumi wet long dispela taim tasol!
18. Maski ol lain long nau i birua long kontrak bilong Kingdom, tasol ol Witnes Bilong Jehova i tingting strong long mekim wanem? Na wanem samting bai kamap?
18 Olsem na yupela ol witnes bilong Jehova, yupela i mas bilip tru long God na long “King Bilong Gutaim.” Yupela i mas wok strong i go yet bambai ol man long olgeta hap ol i save long yupela. Maski ol man i birua long yupela, yupela i no ken pret. Yupela i mas autim tok bilong Kingdom bilong God long olgeta hap na tokim ol man, dispela Kingdom bai daunim olgeta birua long taim bilong Amagedon. Long dispela rot bai yupela i stap olsem ol mak o mirakel i litimapim nem bilong Jehova. Taim Seten i kirapim ol hetman bilong graun long mekim pait long yumi, yumi no ken lusim tingting olsem: Sapos yumi stap gut long Kingdom bilong Emanyuel, em “King Bilong Gutaim,” bai yumi winim pait, long wanem “God i stap wantaim yumi”! (Matyu 1:23; skelim wantaim Aisaia 8:10.) Tru tumas, Jehova i stap king bilong olgeta samting em i bin wokim long heven na long graun, olsem na gutaim i no ken pinis! Olgeta ensel long heven na olgeta man long graun i stap gut long God, olgeta i mas tok “Tru,” long dispela samting.
Sampela Askim Bilong Kamapim ol Bikpela Tok
◻ Olsem wanem nem “Strongpela God” i stret long Jisas?
◻ Jisas i bin mekim wanem wok na em i stap olsem “Gutpela Tisa”?
◻ Yumi laik bai husat i stap papa bilong yumi? Yumi no laikim wanem papa?
◻ Yunaitet Nesen em i wanem samting tru?
◻ Wanem samting bai painim ol man i birua long kontrak bilong Kingdom na long Man bilong kisim ol samting bilong dispela kontrak, em “King Bilong Gutaim”?
[Piksa long pes 18, 19]
Olgeta ensel na olgeta man bai stap wanbel wantaim na lotuim Nambawan Bikpela King bilong heven na graun