Ol Sitia—Narapela Kain Lain Bilong Bipo
WANPELA lain tripman i raun long ol hos na karim ol samting ol i bin stilim, ol i spit i kam. Long yia 700 i go inap 300 B.C.E., dispela narapela kain lain i bosim ol ples kunai bilong Yurop na Esia. Bihain ol i no stap moa—tasol ol stori bilong bipo i kamapim ol samting ol i bin mekim. Baibel tu i kolim nem bilong ol. Ol i lain Sitia.
Inap planti handet yia, ol lain tripman na ol wel hos i bin raun long ol ples kunai bilong ol maunten Carpathian long isten Yurop i go inap long hap nau ol i kolim saut-is Rasia. King Suan bilong Saina i kirap pait, olsem na long 800 B.C.E. samting, ol Sitia i go sindaun long hap bilong wes. Taim ol i go long dispela hap, ol i pait na bagarapim lain Simeria, em dispela lain i bosim hap Caucasus na hap not bilong solwara Blaksi.
Ol Sitia i laik kisim planti mani kago, olsem na ol i kisim ol samting bilong biktaun bilong Asiria, em Ninive. Bihain, ol i bung wantaim ol Asiria bilong pait long Midia, Babilonia, na sampela narapela kantri. Ol i pait tu long noten Isip. Ol i senisim nem bilong taun Betsan i stap long not-is bilong Israel i kamap Sitopolis, na ating dispela i soim olsem ol Sitia i bin stap long dispela hap.—1 Samuel 31:11, 12.
Bihain, ol Sitia i go sindaun long ples kunai bilong ol kantri nau ol i kolim Romenia, Moldova, Yukren, na sauten Rasia. Long dispela hap ol i kamap maniman taim ol i mekim wok olsem namelman bilong ol Grik na ol man i planim wit samting long ol kantri nau ol i kolim Yukren na sauten Rasia. Ol Sitia i senisim wit, hani, skin bilong ol animal, na ol bulmakau long wain bilong ol Grik, laplap, ol samting bilong pait, na ol gutpela bilas samting ol man i bin wokim. Long dispela rot ol i kisim planti gutpela gutpela samting i gat bikpela pe.
Ol Hapman Bilong Raun Long Hos
Hos em i bikpela samting long ol dispela man bilong ples kunai, wankain olsem kamel em i bikpela samting long ol man bilong ples wesan nating. Ol Sitia i hapman tru bilong raun long hos, na ol i namba wan lain long yusim sadel na hap ain man i sindaun long hos i putim lek long en. Ol i kaikai mit bilong hos na dring susu bilong hos meri. Na ol i kukim tu ol hos olsem ofa. Taim wanpela man bilong pait bilong lain Sitia i dai, ol i kilim i dai hos bilong em na planim em gut—wantaim ol rop ol i save pasim long hos na gutpela laplap bilong en.
Saveman Herodotus i tok, ol Sitia i save mekim ol pasin nogut tru, olsem ol i yusim bun bilong het bilong man olsem kap bilong dring. Taim ol i go pait long ol birua bilong ol, ol i bagarapim ol long bainat ol i wokim long ain, tamiok, spia, na ol supsup i gat ol nil i katkatim mit bilong man.
Matmat Bilong Stap Oltaim
Ol Sitia i mekim posin marila samting na ol i lotu long paia na wanpela god meri. (Lo 18:10-12) Ol i ting matmat em i haus bilong ol man i dai pinis. Ol i kilim i dai ol wokman nating na animal olsem ofa, bilong man i dai pinis i ken mekim wok long ol. Ol i ting ol gutpela gutpela samting na ol wokboi ol bai go wantaim bikman i dai pinis long narapela hap em bai go stap long en. Long wanpela matmat bilong bikman, ol i painim 5-pela wokboi i slip klostu long lek bilong em, na ol i redi long kirap na mekim wok bilong ol.
Ol i planim ol bikman wantaim planti gutpela samting, na taim ol Sitia i krai sori long ol, ol i save kapsaitim blut bilong ol yet na katim na rausim gras bilong het bilong ol. Herodotus i tok: “Ol i katim na rausim hap bilong yau bilong ol, sevim gras long het bilong ol, katkatim skin long han bilong ol, katim poret na nus bilong ol, na sutim spia long han kais bilong ol.” Tasol Lo Bilong God long ol Israel long dispela taim i tok: “Yupela i no ken katim skin bilong yupela bilong sori long man o meri i dai pinis.”—Wok Pris 19:28.
Ol Sitia i wokim planti tausen matmat ol i kolim kurgan. Ol gutpela bilas samting ol man i bin painim long ol kurgan i stori long sindaun bilong ol Sitia. King Peter bilong Rasia i kirap bungim ol dispela gutpela samting long 1715, na nau ol i stap long ol haus tumbuna long Rasia na Yukren. Sampela bilong ol dispela gutpela bilas ol man i bin wokim, em piksa bilong hos, tarangau, pusi, taiga, dia, na ol narakain pisin na laion i gat bodi bilong wanpela animal na het bilong narapela em ol i no animal tru.
Ol Sitia na Baibel
Baibel i kolim nem bilong ol Sitia wanpela taim tasol. Kolosi 3:11 i tok: “Yumi no ken ting moa olsem yumi bilong lain Grik o bilong lain Juda, na yumi bin katim skin o yumi no bin katim skin, na yumi bilong kain kain tok ples o bilong kain kain kantri, [“Sitia,” NW ] na yumi stap wokboi nating o yumi stap fri, long wanem, Krais tasol i stap, na Krais yet i stap insait long yumi olgeta.” Taim aposel Pol i raitim dispela tok, dispela tok Grik “Sitia” i no makim stret wanpela lain, em i makim ol man i wel olgeta. Pol i laik kamapim klia olsem taim spirit holi bilong Jehova, o strong bilong em, i stiaim man, ol kain man olsem ol Sitia ol tu inap kirap bihainim pasin bilong God.—Kolosi 3:9, 10.
Sampela saveman i ting nem Askenas i stap long Jeremaia 51:27 i wankain olsem Ashguzai long tok Asiria, em dispela tok i makim ol Sitia. Sampela rait ol i katim long ol ston i stori olsem dispela lain na ol Manai i bung wantaim na pait long ol Asiria long 650 B.C.E. samting. Paslain liklik long Jeremaia i mekim ol tok profet, ol Sitia i abrusim kantri Juda taim ol i go i kam long Isip, na ol i no mekim wanpela samting nogut. Olsem na ol man i harim Jeremaia i tok profet olsem lain bilong hap not bai pait long Juda, ating ol i no bilip tumas long tok profet bilong em.—Jeremaia 1:13-15.
Sampela saveman i ting Jeremaia 50:42 i stori tu long ol Sitia, em i tok: “Ol i no man bilong marimari. Ol i laikim tumas long bagarapim arapela man. Ol i holim ol banara na spia. Ol bai i sindaun long ol hos na i kam, na bikpela nois bai i kamap, olsem biksi i pairap long nambis. Ol bai i sanap long lain na redi long pait long Babilon.” Tasol dispela ves i tok long ol Midia na Persia em ol i daunim Babilon long 539 B.C.E.
Ol i tok “graun Magok” em Esekiel sapta 38 na 39 i tok long en, i tok long ol lain Sitia. Tasol “graun Magok” i no wanpela graun tru—em tok piksa tasol. Em i makim hap klostu long graun em Satan na ol ensel bilong em i kam daun long en, bihain long pait i kamap long heven.—KTH 12:7-17.
Ol Sitia i insait long truim bilong tok profet bilong Nahum i tok long Ninive bai bagarap. (Nahum 1:1, 14) Ol Kaldia, Sitia, na Midia i bagarapim Ninive long 632 B.C.E., na dispela i daunim Gavman Asiria.
Ol i Pinis
Ol Sitia i no stap moa, tasol bilong wanem i olsem? Wanpela saveman long Yukren i tok: “Mipela i no save wanem samting i kamap long ol.” Sampela i ting laik bilong ol Sitia long kisim planti mani kago i daunim strong bilong ol, olsem na inap 100 yia samting paslain long Krais, ol nupela lain tripman bilong Esia, em ol Samatia, i daunim ol.
Sampela narapela saveman i ting ol pait namel long ol Sitia yet i daunim dispela lain. Na sampela i ting hap lain bilong ol Sitia i stap yet namel long ol Osisian bilong Caucasus. Tasol ol stori bilong bipo i kamapim ol samting dispela narapela kain lain i bin mekim, em nem bilong dispela lain Sitia i makim pasin bilong mekim nogut tru long narapela.
[Mep long pes 24]
(Bilong save ol dispela rait i stap we long pes, lukim buk o magasin)
◻ Biktaun Bilong Bipo
• Biktaun Bilong Nau
Danube
SITIA ← ROT OL I BIHAINIM
• Kiev
Dnieper
Dniester
Solwara Blaksi
OSETIA
Ol maunten Caucasus
Solwara Caspian
ASIRIA ← OL ROT OL I BIHAINIM BILONG GO LONG PAIT
◻ Nineve
Taigris
MIDIA ← OL ROT OL I BIHAINIM BILONG GO LONG PAIT
MESOPOTEMIA
BABILONIA ← OL ROT OL I BIHAINIM BILONG GO LONG PAIT
◻ Babilon
Yufretis
GAVMAN PERSIA
◻ Susa
Persian Galf
PALESTAIN
• Betsan (Sitopolis)
ISIP ← OL ROT OL I BIHAINIM BILONG GO LONG PAIT
Nail
Solwara Mediterenian
KANTRI GRIK
[Ol Piksa long pes 25]
Ol Sitia ol i lain bilong pait
[Kredit Lain]
The State Hermitage Museum, St. Petersburg
[Piksa long pes 26]
Ol Sitia i senisim ol samting bilong ol long ol gutpela samting bilong ol Grik na ol i kisim planti mani kago
[Kredit Lain]
Courtesy of the Ukraine Historic Treasures Museum, Kiev