Lotu​—⁠Em i Mekim Wanem Gutpela Wok?

“MI INAP i stap gutpela man, maski mi no tingim lotu!” Em tok planti man i save mekim. I gat planti manmeri i save mekim stretpela pasin, ol i gat pasin sori, redi long helpim narapela, tasol ol i no save tingim lotu. Olsem: I no gat planti manmeri bilong Westen Yurop i save go long lotu, tasol planti i save tok ol i bilip long God.a Long Latin Amerika tu, inap 15 i go inap 20 pesen tasol bilong ol Katolik i save go oltaim long lotu.

Olsem planti narapela man, ating yu tu i ting lotu i no samting bilong helpim man long i stap gutpela. Tasol ating yu save, bipo long taim bilong ol tumbuna bilong yu, planti manmeri i bin tingim lotu. Orait olsem wanem na long nau planti man i no save tingim moa lotu? Man inap i stap gutpela man maski em i no tingim lotu? I gat wanpela lotu inap helpim yu?

As na Planti Man i Lusim Lotu

Inap planti handet yia pinis, klostu olgeta lain i tok ol i Kristen ol i bilip olsem God i laik bai yumi mas bihainim tok bilong em. Ol i save go long lotu na bai God i ken orait long ol, olsem long rot bilong olkain beten em pris i mekim o long ol tok bilong stiaim ol em wanpela man bilong autim tok i givim long ol. Tru, planti ol i lukim pasin bilong tupela maus i stap insait long ol lotu. Planti ol i save pinis long pasin bilong ol lotu long insait long ol pait, na ol pasin nogut olsem pamuk samting em sampela pris pasto i mekim. Tasol planti manmeri i bin pilim olsem lotu yet em i gutpela samting. Na sampela i save laikim ol bilaspasin bilong lotu na pasin ol lotu i kisim long ol tumbuna, na ol singsing tu; na ol i ting em i gutpela samting long ol man i pret long kisim strafe bilong oltaim oltaim long helpaia, em wanpela bilip i no stap long Baibel. Tasol bihain sampela samting i kamap na i senisim tingting bilong planti man long lotu.

Planti ol i kirap laikim stori bilong evolusen. Sampela i bilip olsem olgeta samting i gat laip i kamap nating tasol​—⁠God i no bin wokim. Planti lotu i no bin kamapim klia olsem God i As bilong laip. (Song 36:⁠9) Na tu, ol man i wokim ol nupela masin, kisim save long wokim olkain nupela marasin samting, wokim ol ka samting, na olkain masin bilong salim tok i go i kam, olsem na ol man i ting ol saientis inap stretim olgeta kain hevi. Na ol i pilim olsem ol lain i gat wok long helpim sindaun bilong ol man o ol dokta bilong stretim tingting, ol i winim ol lotu long soim rot long ol man. Na ol lotu i no bin kamapim klia olsem pasin bilong bihainim ol lo bilong God i save helpim tru i stap bilong ol man.​—⁠Jems 1:⁠25.

Dispela i mekim na planti lotu i kirap senisim tok bilong ol. Ol pris na man bilong autim tok i no skulim moa ol man olsem God i laik bai ol i mas bihainim tok bilong em. Planti lotu i kirap na tok em samting bilong ol wan wan man yet long skelim wanem samting i stret na wanem samting i no stret. Sampela hetman bilong lotu i laik bai ol man i laikim ol, olsem na ol i tok God i save orait long yumi maski yumi bihainim wanem kain pasin. Dispela tok bilong ol i kirapim yumi long tingim tok profet bilong Baibel, i tok: “Bihain ol man bai i no laik harim moa ol stretpela tok. Nogat. Yau bilong ol bai i skrap long harim ol narakain narakain tok, na ol bai i kisim planti man bilong skulim ol long kain tok ol i save laik long harim.”​—⁠2 Timoti 4:⁠3.

Tasol dispela kain tok i no pulim ol man i kam long lotu, nogat. Em i mekim na ol i kirap lusim lotu. Ol i tingting olsem: ‘Sapos ol lotu i no bilip tumas olsem God i gat strong long wokim ol samting na em i no gat savetingting bilong kamapim ol lo, orait pasin bilong go long lotu bai i helpim mi olsem wanem? Bilong wanem mi mas skulim ol pikinini bilong mi long ol tok bilong lotu?’ Ol man na meri i laik bihainim stretpela pasin long i stap bilong ol, ol i lukim olsem lotu i no samting bilong helpim ol. Ol i lusim ol lotu, na lotu i no bikpela samting moa long ol. Orait, olsem wanem na samting i bilong helpim ol man i kamap olsem samting i no inap helpim ol? Baibel i tokaut long as bilong dispela samting.

Ol i Mekim Wok Nogut Long Lotu

Aposel Pol i givim tok lukaut long ol Kristen bilong pastaim olsem sampela man bai mekim wok long lotu bilong mekim ol pasin nogut. Em i tok: “Ol weldok nogut tru bai i kam namel long yupela, na ol bai i bagarapim ol sipsip. Na sampela man bilong yupela yet bai i kirap na mekim tok giaman nabaut, bilong pulim ol manmeri bilong God i go bihainim ol.” (Aposel 20:​29, 30) Wanpela man bilong “mekim tok giaman nabaut” em wanpela tisa bilong lotu Katolik, em Ogastin. Jisas i bin skulim ol disaipel olsem ol i mas toktok gut wantaim ol man long Baibel bilong kirapim ol long bilip. Tasol Ogastin i paulim mining bilong tok bilong Jisas i stap long Luk 14:23 olsem, “Tok strong long ol i mas kam,” na em i tok mining bilong dispela tok i olsem, i stret long yumi subim strong ol man taim yumi mekim wok bilong kirapim ol long tanim bel. (Matyu 28:​19, 20; Aposel 28:​23, 24) Ogastin i mekim wok long lotu long bosim strong ol man.

Satan, em wanpela ensel bilong bikhet, em yet i as bilong ol pasin na wok nogut ol man i mekim long lotu. Long taim bilong ol aposel em i bin kirapim ol man bilong lotu long wok strong long bagarapim ol kongrigesen Kristen. Baibel i tok long ol dispela man olsem: “Dispela ol man ol i giaman aposel na giaman wokman. Ol i save senisim pasin bilong ol bilong mekim ol man i ting ol i stap aposel tru bilong Krais. . . . Yumi save, Satan yet i save senisim pasin bilong en na kamap olsem ensel bilong lait. Olsem na sapos ol wokman bilong Satan tu i senisim pasin bilong ol na i mekim olsem ol wokman bilong stretpela pasin, yumi no ken kirap nogut long dispela.”​—⁠2 Korin 11:​13-15.

Satan i mekim wok yet long ol lotu i save tok ol i Kristen, na bihainim pasin i stret, na givim save long ol man bambai em i ken kirapim ol long bihainim ol lo bilong em na i no bilong God. (Luk 4:​5-7) Ating yu lukim pinis olsem planti pris pasto long nau ol i mekim wok long lotu bilong kisim olkain biknem na kisim mani long lain bilong ol. Ol gavman tu i bin mekim wok long lotu bilong kirapim lain bilong ol long go insait long ol pait bilong graun na givim laip bilong ol yet olsem ofa.

Satan i save mekim bikpela wok tru long ol lotu, na planti man i no save long dispela. Ating yu ting olsem sampela liklik lain i strong tumas long lotu, ol tasol i mekim wok bilong Satan. Tasol Baibel i tok, “Satan . . . i man bilong giamanim olgeta manmeri bilong graun.” Na Baibel i tok tu: “Dispela graun olgeta em i stap aninit long strong bilong Satan.” (KTH 12:9; 1 Jon 5:19) God i ting olsem wanem long ol lotu em ol hetman i mekim wok long ol bilong pulim ol manmeri i go bihainim ol?

“Mi No Save Amamas Long Ol”

Sapos yu kirap nogut long pasin bilong sampela lotu Kristen, yu ken save, God i Gat Olgeta Strong em i no amamas liklik long ol. Ol lotu i gat nem Kristen i tok ol i bin mekim kontrak wantaim God; Israel bilong bipo i bin mekim wankain tok. Tasol tupela wantaim i no stap gut long God. Olsem na strongpela tok Jehova i bin givim long Israel, em i stret long ol lotu i gat nem Kristen long nau. Jehova i tok: “Ol i bin sakim tok bilong mi na ol i no bin bihainim ol lo bilong mi. Ol i save go long ol man bilong lain Sabea na baim paura bilong kamapim smok i gat gutpela smel. . . . Mi no save amamas long ol ofa . . . ol i save mekim long mi.” (Jeremaia 6:​19, 20) God i no bin orait long lotu ol man bilong tupela maus i bin mekim. Em i no tingim ol bilaspasin bilong lotu na ol beten ol i bin mekim. Em i tokim ol Israel: “Mi no laikim tru ol . . . de yupela i save makim bilong lotu. Dispela olgeta samting i givim hevi long mi, na mi no inap long karim. Taim yupela i apim han na prea long mi, bai mi no ken lukim yupela. Maski yupela i prea planti taim, bai mi pasim yau bilong mi.”​—⁠Aisaia 1:​14, 15.

Yu ting Jehova i save laikim ol bikpela de bilong lotu em ol lotu i tok ol i Kristen i save mekim, tasol bipo ol dispela bikpela de i bilong givim biknem long ol god giaman? Yu ting em i save harim beten bilong ol pris pasto i save paulim ol tok bilong Krais? Yu ting God i orait long ol lotu i save sakim lo bilong em? Yu ken bilip tru olsem, tingting bilong em long ol pasin bilong lotu ol i mekim long nau i wankain olsem tingting bilong em long ol ofa bilong ol Israel bilong bipo, em i bin tok long ol olsem: “Mi no save amamas long ol.”

Tasol Jehova i save tingim tumas lotu i tru ol manmeri i gat gutpela bel ol i mekim. God i save amamas taim ol man i tok tenkyu long olgeta samting ol i save kisim long em. (Malakai 3:​16, 17) Olsem na yu ting yu inap i stap gutpela man o meri sapos yu no lotuim God? Sapos man i no mekim wanpela samting bilong helpim papamama, em i no ken tok em i gutpela man, a? Orait sapos man i no mekim wanpela wok bilong God, yu ting em i gutpela man? I stret yumi mas mekim sampela samting bilong save long God tru, em i as bilong laip. Long stori i kamap bihain long dispela, bai yumi toktok long olsem wanem lotu i tru i save givim biknem long God na i save helpim yumi tu wantaim.

[Futnot]

[Piksa long pes 4]

Yu ting ol lotu i bin kamapim klia olsem God i bin wokim olgeta samting?

[Piksa long pes 4, 5]

Yu ting wanpela wokman bilong God inap insait long kain pasin olsem?

[Piksa long pes 5]

God i ting olsem wanem long dispela kain bikpela de bilong lotu?

[Kredit Lain]

AP Photo/Georgy Abdaladze