Harim Tok Bilong Man Jehova i Makim Bilong Tokaut!
“Mi makim yu olsem man bilong tokaut long lain Isrel. Yu mas . . . toksave long ol.”−ESIKIEL 3:17, NW.
JEHOVA i makim wanpela “man bilong tokaut,” na nau em i autim tok bilong God. Yu putim yau na harim? Yu mas harim na pilim na yu mas kirap mekim sampela samting na bai yu ken i stap laip. Liklik taim na ol lain man ‘bai save long Jehova’ taim em i mekim gut nem holi bilong em na em i bagarapim ol man nogut na pinisim pasin nogut bilong dispela graun na em i lukautim lain bilong em bambai ol i ken i stap. Olsem wanem? Yu laik i stap laip wantaim ol? (Esikiel 36:23; 39:7; 2 Pita 3:8-13) Ating yu inap, tasol yu mas putim yau na harim tok taim dispela “man bilong tokaut” i toktok.
2 Kingdom o lain bilong Juda i no laik harim tok bilong ol profet bilong God, olsem na long yia 607 paslain long Krais ol i kisim bagarap. Ol lain birua i amamas taim ol Babilon i bagarapim ol Juda. Tasol long yia 537 paslain long Krais, Jehova i wokim rot na bai ol Juda i bin tanim bel na i stap gut long Jehova ol i ken i go bek long ples bilong ol, na dispela i litimapim tru nem bilong Jehova!
3 Esikiel i man bilong tokaut, em Jehova i bin makim em olsem, na Esikiel i bin tokaut pinis long ol dispela samting bai kamap; em i tok, Juda bai bagarap na i stap nating, tasol bihain moa Jehova bai stretim bek gen. Esikiel i raitim hap tok bilong Baibel, em dispela hap yumi kolim “Esikiel.” Em i pinis long raitim dispela tok taim em i stap long Babilon long yia 591 paslain long Krais. Dispela rait i stori long (1) wok em Esikiel i mas mekim; (2) ol samting em i mekim olsem piksa bilong makim ol samting bai kamap bihain; (3) ol tok em i givim long Isrel bilong kolim rong bilong ol; (4) ol toksave em i mekim bilong tokaut long strafe bai painim Jerusalem; (5) ol tok profet em i mekim long ol narapela lain; (6) ol tok promis bilong oraitim bek lain Isrel; (7) tok profet em i mekim long Gok bilong Megok; (8) taim em i driman na lukim haus lotu bilong God. Taim yumi stadi long dispela Wastaua, sapos yu inap yu ken kaunim ol tok bilong Esikiel long Baibel na bai yu ken save, ol dispela samting bilong bipo em i samting bilong yumi ol man bilong nau i mas tingim, na yumi ken putim yau na redi long harim tok bilong dispela “man bilong tokaut.”
God i Givim Wok long Dispela Man Bilong Tokaut
4 Long mun Tamus long de 5, long yia 613 paslain long Krais (long namba 5 yia bilong King Jehoiakin bilong Juda i stap kalabus long Babilon), Esikiel i kalabus wantaim ol Juda klostu long Wara Keba, em wanpela baret wara bilong Wara Yufretis. Esikiel i wanpela pris na long dispela taim em i gat 30 krismas. Em i driman na em i lukim karis o wilka bilong Jehova, na “4-pela samting i stap laip” olsem 4-pela ensel i gat wing, ol i was long en. (Esikiel 1:4-10) Ol dispela ensel wan wan i gat 4-pela pes. (Esikiel 10:1-20; 11:22) Dispela 4-pela pes bilong ol wan wan ensel i makim ol pasin God i bin givim long ol, olsem pasin sori (pes bilong man), stretpela pasin (pes bilong laion), strong (pes bilong bulmakau man), save (pes bilong taragau). Olgeta wan wan ensel i sanap klostu long wanpela bikpela ‘wil i gat wil i stap insait long en,’ na spirit o strong bilong God i save subim ol dispela wil i go long olgeta hap.−Esikiel 1:1-21.
5 Wanpela Man i draivim dispela karis na skin bilong em i gutpela tru na em i makim Jehova. (Esikiel 1:22-28) Karis o wilka hia i makim stret oganaisesen bilong Jehova long heven, olsem lain ensel bilong em! (Sam 18:10; 103:20, 21; Danyel 7:9, 10) Jehova i draivim o bosim dispela karis; i olsem em i bosim ol dispela ensel na em i mekim wok long ol long kamapim laik bilong em. Draiva hia i stap bel isi, olsem dispela renbo i bin kamap long dispela taim, tasol Esikiel i kirap nogut. Na yumi tu, taim yumi save long ol dispela samting na long bikpela strong bilong Jehova, em i Nambawan Bos bilong ol ensel bilong em long heven, dispela save i mas kirapim yumi long bihainim pasin daun, na yumi mas amamas, long wanem, em i larim yumi i mekim wok bilong em insait long oganaisesen bilong em hia long graun.
6 God i kolim Esikiel olsem “pikinini bilong man” na bai Esikiel i ken save em i man tasol na em i bilong graun tasol, na em i man nating i no gat nem. Tasol Jehova i makim em bilong i stap profet bilong Jehova. Esikiel i mas i go long “ol lain bilong bikhet,” em ol Isrel na Juda. (Esikiel 2:1-5, NW ) Pastaim God i tokim Esikiel em i mas kaikai ol pepa i gat rait long en na dispela rait em ol singsing sori, tasol Esikiel i pilim swit bilong en i olsem bilong hani, long wanem Esikiel i amamas long kamap profet bilong God. I olsem tu long liklik lain Kristen ol bai go long heven, em yumi kolim lain remnan, na ol narapela wokman bilong God−ol dispela lain i stap witnes bilong Jehova na ol i pilim dispela wok i swit tumas. Esikiel i mas strongim bel na autim tok profet long ol bikhetman, tasol God bai mekim pes bilong Esikiel i strong na bai pes bilong em i wankain olsem ol dispela bikhetman. Em i mas givim strongpela tok long ol, maski ol i laik harim o nogat. Esikiel i gat hatwok long mekim dispela wok, tasol God bai helpim em, na yumi amamas long dispela, long wanem, yumi save God bai helpim yumi tu na strongim yumi long autim tok witnes long olgeta kain man.−Esikiel 2:6–3:11.
7 Taim Esikiel i kaikai dispela pepa i gat ol rait i stap long en, bel bilong em i kirap olsem em i laik pait, na dispela i stret, long wanem, em i mas autim strongpela tok long ol bikhetman. Tasol taim em i kaikai dispela samting, pastaim dispela i olsem i kilim em na em i ai raun na em i slip long ples Telabip inap 7-pela de na bai em i ken tingim gut ol dispela tok na wok em i mas mekim. (Esikiel 3:12-15) Yumi tu i mas tingim tingim ol tok bilong Jehova na givim bel long stadi na kisim save na bai yumi ken save gut long ol strongpela tok bilong spirit. Esikiel i gat ol tok em i mas autim, olsem na God i makim em bilong kamap man bilong tokaut. (Esikiel 3:16-21) Em i mas toksave long lain Isrel, ol i wok long brukim ol lo bilong Jehova, na em i mas tokim ol olsem God bai givim strafe long ol.
8 Sapos Esikiel i no mekim dispela wok bilong em long tokaut long ol man, na sampela ol i no harim toksave na ol i kisim bagarap, Jehova bai gat tok long Esikiel. Sampela man bai sakim tok bilong Esikiel taim em i laik tokaut long ol bilong stretim ol, na ol bai wok long pasim Esikiel na bai em i no inap mekim wok bilong em−i olsem ol i pasim em long rop−tasol em bai strong na autim yet tok bilong God. (Esikiel 3:22-27) Long nau ol dispela misin i tok ol i Kristen ol i no laik harim tok bilong lain remnan, na ol dispela misin i laik pasim ol dispela Kristen na bai ol i no ken autim tok. Kirap long 1919 Jehova i makim lain remnan olsem “man bilong tokaut,” na ol i bin wok strong long autim tok bilong Jehova, em dispela tok ol i mas harim nau long “taim bilong pinis.” (Danyel 12:4, NW ) Na i gat narapela lain ol i wok wantaim lain remnan na dispela arapela lain i helpim ol long autim tok. Baibel i kolim dispela narapela lain olsem “planti tumas manmeri,” em ol “arapela sipsip” bilong Jisas. (Revelesen 7:9, 10; Jon 10:16) Dispela lain “man bilong tokaut” ol i no malolo long kamapim tok bilong God, olsem na olgeta wan wan bilong dispela liklik lain God i bin makim ol na dispela narapela lain “planti tumas manmeri” ol i laik autim dispela tok long olgeta taim.
Ol Piksa Bilong Makim Samting Bai Kamap Bihain
9 Jehova i tok Esikiel i mas makim ol samting bai kamap bihain, na long pasin daun Esikiel i bihainim dispela tok, na em i strongim bel na em i kirap mekim olsem Jehova i tok. Yumi ken bihainim dispela pasin bilong Esikiel na long pasin daun yumi tu i ken strongim bel na mekim ol samting God i tok yumi mas mekim. God i tok, Esikiel i mas slip na pes bilong em i mas lukluk i go long wanpela brik em i bin sapim piksa bilong Jerusalem long en; dispela samting i bilong makim ol Babilon bai kam na bagarapim Jerusalem. Em i mas slip long sait bilong han kais bilong em inap 390 de, na dispela i bilong makim ol rong em 10-pela lain bilong Isrel i bin mekim, na nau em i mas slip long sait bilong han sut bilong em inap 40 de, na dispela i bilong makim ol rong em tupela lain bilong Juda i bin mekim. Ol wan wan de i makim wan wan yia, olsem na dispela 390 de i makim 390 yia, na dispela 40 de i makim 40 yia. Dispela 390 yia i kirap long taim 10-pela lain bilong Isrel i lusim narapela tupela lain na kisim king bilong ol yet, olsem long yia 997 paslain long Krais, na i pinis long taim Jerusalem i kisim bagarap long yia 607 paslain long Krais. Na dispela 40 yia bilong Juda em i kirap long taim God i makim Jeremaia long kamap profet bilong em long yia 647 paslain long Krais na i pinis long taim lain Juda i kisim bagarap long yia 607 paslain long Krais.−Esikiel 4:1-8; Jeremaia 1:1-3.
10 Na nau Esikiel i kirap makim ol hevi bai painim Jerusalem taim ol Babilon i kalabusim ol. Em i makim hangre bilong ol, na long olgeta wan wan de em i kisim liklik kaikai tasol (inap 200 gram), na em i dring liklik wara tasol (inap tupela kap). Bret em i kaikai, em i wokim long ol samting i tambu long bungim wantaim, olsem wit, na bali, na bin, na lentil, na milet, na spel. Na bilong wokim paia bilong kukim dispela bret em i kisim pekpek bilong bulmakau i drai pinis, olsem na dispela kain bret i tambu long kaikai. (Levitikas 19:19) Dispela samting Esikiel i mekim olsem piksa, em i makim bikpela hevi bai painim ol man bilong Jerusalem. Tasol Jehova i bin lukautim na strongim Esikiel long dispela taim bilong traim na hevi, na Jehova bai mekim olsem long yumi tu na bai yumi ken i stap strong long taim bilong traim na hevi na yumi ken mekim yet wok bilong yumi long autim tok. Yumi amamas long dispela samting.−Esikiel 4:9-17.
11 Nau Esikiel i kisim bainat na em i sevim het na pes bilong em na rausim ol gras long het bilong em na ol wasket gras. (Esikiel 5:1-4) Em i kisim hap bilong ol dispela gras na em i kukim namel long taun Jerusalem bilong makim ol man bai dai long hangre na sik. Na wanpela hap gras i makim ol man bai kisim bagarap long bainat long pait bai kamap bihain. Na narapela hap bilong gras em Esikiel i tromoi na win i karim i go nabaut, na dispela i makim ol man i no bin kisim bagarap long pait ol bai i go nabaut insait long ol narapela lain. Taim Esikiel i laik tromoi dispela gras, pastaim em i kisim liklik hap bilong en na em i putim insait long klos bilong em, na dispela liklik hap gras i makim olsem sampela Juda bai kam bek gen bihain long taim 70 yia i go pinis na ol bai kirapim gen lotu i tru. (Esikiel 5:5-17) Ol dispela wok bilong Esikiel i olsem piksa bilong makim ol samting bai kamap bihain. Jehova i truim ol dispela piksa na sampela piksa moa bilong samting i mas kamap bihain, na dispela save i mas kirapim yumi long bilip strong long Jehova em i Man bilong truim ol piksa na tok profet.−Aisaia 42:9; 55:11.
Bagarap Bai Kamap Bihain!
12 Long yia 613 paslain long Krais Esikiel i tokaut long ol samting bai painim ol bikhetman bilong Juda, em ol i lotuim ol god giaman. (Esikiel 6:1-7) Esikiel i tok, ol birua bai kam na bagarapim ol ples bilong wokim lotu giaman long en na ol ples bilong wokim smok smel na ol alta bilong lotu giaman. Ol man bai pret long bagarap bai painim ol, na ol bai pret long hangre na sik na pait tu, na ol bai tok “Sori!” na ol bai paitim han bilong ol na paitim graun long lek bilong ol. Ol man i bin mekim lotu giaman ol bai dai na skin bilong ol bai slip nabaut. Jerusalem i makim ol misin i giaman na tok ol i Kristen. Wankain samting bai painim ol dispela misin, na ol bai save Jehova yet i bagarapim ol.−Esikiel 6:8-14, NW.
13 Long rot bilong Esikiel Jehova i tokim ol Juda: ‘Pinis i laik painim olgeta hap bilong dispela graun.’ Dispela tok “graun” i makim lotu giaman bilong lain Juda, em ol i bin lusim Jehova. Nebukatnesa wantaim lain Babilon i olsem “stik” i stap long han bilong God na i bilong strafim lain Juda. Ol bai kam birua long ol Juda, em lain bilong Jehova, na long haus lotu bilong em. Ol hevi bai bungim ol man bilong lotu giaman, na dispela hevi i stap olsem “bilas bilong het” bilong ol. “Man i baim samting” na ol “man i baim samting i go long ol man” ol bai kisim bagarap o ol birua bai kalabusim ol, na sapos sampela i no dai ol bai ai raun na pundaun. Taim lotu bilong ol i bagarap ol bai krai na bel hevi, na ol bai mekim olsem man i save mekim taim bikpela hevi i painim em na em i sevim het bilong em na i kamap kela.−Esikiel 7:1-18, NW.
14 I no inap ol i grisim o baim Jehova na lain ami bilong em. (Esikiel 7:19) I no inap ol i ken baim Jehova na bai em i mas lukautim “ples hait,” olsem Rum Holi Tru, na bai ol Babilon, em “ol stilman,” ol i no ken kisim ol dis holi na bagarapim haus lotu. Ol birua i kalabusim King Sedekaia na kilim i dai ol hetman bilong lain pris Livai, olsem na Jehova i daunim “ol strongpela man” na ol “i no ken hambak moa long strong bilong ol.” (2 King 25:4-7, 18-21) Tru, ol dispela man i no bihainim tok bilong Jehova, ol bai kalabus insait long Jerusalem; ol i bin brukim kontrak o tok promis, na Jehova i ‘skelim ol pinis long kot,’ na ol i no inap grisim Jehova na bai em i ken sori gen long ol. Na i olsem tu long ol misin i giaman na tok ol i Kristen−ol tu i gat ol samting ol i ting em i holi, tasol taim Jehova i laik bagarapim ol dispela samting, ol dispela misin i no inap grisim Jehova o baim em na bai em i ken larim ol i stap laip; em i makim ol dispela misin bilong kisim bagarap, na i no gat taim moa nau na bai ol i ken putim yau na harim dispela man Jehova i bin makim, em “man bilong tokaut!”−Esikiel 7:20-27, NW.
Ol i Krai na Hevi long Ol Pasin Nogut i Stap
15 Long mun Elul long de 5, long yia 612 paslain long Krais, spirit holi i givim driman long Esikiel na em i lukim piksa bilong God wantaim ol gutpela bilas bilong em. Na Esekiel i lukim ‘olsem wanpela han bilong man i kam long em na han i holim hap gras long het bilong em’ na i litimapim em na karim em i go long Jerusalem. Na karis tu i stap long Jerusalem. Na nau Esikiel i lukim wanpela samting, na sapos yumi lukim kain samting olsem, dispela bai kirapim yumi na bai yumi klia olgeta long ol man i lusim Jehova na i go long narapela lotu. (Provep 11:9) Esikiel i lukim sampela Isrel i stap long haus lotu na ol i lotuim wanpela god giaman (ating wanpela pos ol i tok em i holi) na nau God i kros. (Eksodas 20:2-6) Esikiel i go insait long banis bilong haus lotu na em i lukim ol samting nogut nogut! (Esikiel 8:10, 11) Em i lukim 70 bikman bilong ol Isrel ol i mekim pasin nogut na ol i mekim smok smel long ol god giaman em piksa bilong ol i stap long banis.−Esikiel 8:1-12.
16 Taim yumi harim samting Esikiel i lukim long driman hia yumi ken save, sapos man i lusim lotu bilong Jehova na i go long wanpela lotu giaman, dispela inap kilim em i dai long ol samting bilong spirit. Na Esikiel i lukim tu ol meri Isrel, ol man i bin kirapim ol na ol i krai long Tamus, em wanpela god giaman bilong ol Babilon, na em i pren bilong wanpela god meri, em Ista, ol i ting em i helpim ol meri long karim planti pikinini. Na Esikiel i lukim narapela samting nogut−em i lukim 25 man Isrel i stap insait long banis bilong haus lotu na ol i lotuim san! (Diuteronomi 4:15-19) Ol i holim wanpela samting nogut, olsem hap han bilong diwai, na ating em i makim sem bilong man; i olsem ol i laik subim i go aninit long nus bilong Jehova. Olsem na Jehova i no inap harim beten bilong ol. Na bai i olsem tu long taim bilong “bikpela hevi tru”−ol misin giaman bai beten beten long God bai em i helpim ol, tasol em i no ken harim beten bilong ol.−Esikiel 8:13-18; Matyu 24:21.
Ol i Kisim Mak Bilong Abrusim Bagarap
17 Na nau Esikiel i lukim 7-pela man long dispela piksa; wanpela i gat klos linen na em i olsem wanpela kuskus, na 6-pela i karim ol samting bilong bagarapim man. Dispela 6-pela i makim lain ensel bilong Jehova long heven, em wok bilong ol long strafim ol man, tasol Jehova inap makim sampela man bilong graun tu long mekim dispela wok. Sampela man i no orait long ol dispela pasin nogut ol man i bin mekim long haus lotu, olsem na “man i pasim klos linen” em i putim mak long pes bilong ol. God i sori long ol dispela man na em bai lukautim ol na bai ol i no ken kisim bagarap, long wanem, ol i no bin orait long ol dispela pasin nogut i bin kamap long haus lotu. Taim dispela “6-pela man” i kirap long mekim wok bilong ol, pastaim ol i kilim i dai dispela 70 bikman i bin bihainim lotu giaman, na ol dispela meri i bin krai long god Tamus, na dispela 25 man i lotu long san. Ol dispela man na ol narapela man i no bin i stap gut long God, em lain Babilon i bagarapim ol long yia 607 paslain long Krais.−Esikiel 9:1-7, NW.
18 Dispela “man i pasim klos linen” em i makim lain remnan. Ol i save go long ol haus na i olsem ol i putim “mak” long pes bilong ol man ol i kam insait long dispela lain “planti tumas manmeri,” em ol “arapela sipsip” bilong Krais, Ol i dediket na baptais pinis, na ol i mekim ol samting olsem man i dediket na baptais pinis em i mas mekim, na ol i gat pasin olsem bilong Krais. Ol dispela samting i olsem “mak” i stap long ol. Ol i “krai na bel hevi long ol samting nogut nogut ol man i mekim insait long” ol dispela misin i giaman na tok ol i Kristen. Ol i lusim pinis Bikpela Babilon, em olgeta lotu giaman. (Revelesen 18:4, 5) Long taim bilong “bikpela hevi tru” God bai salim lain bilong em bilong bagarapim ol man i no gat “mak,” na dispela lain bai lukim ol man i gat “mak” em i stap ples klia na ol bai larim ol i stap laip. Long nau lain remnan i wok long putim “mak” i go long sampela man moa. Ol man i kisim pinis mak, sapos ol i wok wantaim lain remnan ol inap long holim yet dispela mak na bai ol i ken abrusim bagarap. Olsem na sapos yu kisim pinis dispela mak, yu mas givim bel long dispela wok bilong putim “mak” long sampela man moa.−Esikiel 9:8-11, NW.
Bikpela Bagarap i Klostu!
19 Dispela man i pasim klos linen em i go namel long ol wil na em i kisim sampela hap paia na em i tromoi dispela paia i go long Jerusalem. Em i mekim olsem bilong toksave long ol man bilong Jerusalem olsem God i belhat long ol na kros bilong em i bikpela olsem paia na em i laik bagarapim Jerusalem. (Esikiel 10:1-8; Krai Bilong Jeremaia 2:2-4; 4:11) Long taim bilong Esikiel ol Babilon i olsem rot bilong Jehova long kamapim kros bilong em na strafim ol Juda. (2 Kronikel 36:15-21; Jeremaia 25:9-11) Na olsem wanem long taim bilong yumi? Long nau dispela “man i pasim klos linen,” em lain remnan, ol i autim tok long ol misin i giaman na kolim Kristen, na dispela tok i olsem paia; lain remnan i tokim ol long bikpela kros bilong God bai painim ol na ol narapela lotu bilong Bikpela Babilon. Sapos ol i sakim tok bilong dispela “man bilong tokaut,” em lain remnan, ol i no inap i stap; ol bai kisim bagarap.−Aisaia 61:1, 2; Revelesen 18:8-10, 20.
20 Yumi tingim gen dispela karis, em i makim oganaisesen bilong Jehova long heven. Ol wil na ol ensel i wok gut wantaim, na dispela i mas kirapim yumi long wok gut wantaim oganaisesen bilong God hia long graun na bihainim tok bilong oganaisesen. Yumi mas helpim na lukautim oganaisesen na bai ol man nogut i no ken bringim tok giaman i kam insait. (Esikiel 10:9-22) Kain man nogut olsem i bin stap long taim bilong Esikiel. Em i lukim 25 hetman bilong gavman ol i toktok long Isip i ken helpim ol long biruaim dispela lain bilong God ol i gat wok long strafim ol man. Ol dispela hetman i tok, Jerusalem i olsem sospen na ol i ken hait insait long en na ol i no ken kisim bagarap. Tasol ol i kranki tru! “Bainat” bilong ol Babilon, em “ol man bilong narapela lain,” bai kilim i dai sampela bilong ol dispela hetman i laik mekim pasin birua, na ol narapela bai i go kalabus; long wanem, ol Juda i bin brukim kontrak em God i bin wokim wantaim ol, olsem na God i mas strafim ol. (Esikiel 11:1-13, NW; Eksodas 19:1-8; 24:1-7; Jeremaia 52:24-27) Ol dispela misin bilong nau ol i tok ol i Kristen, ol i ting ol i insait long wanpela kontrak wantaim God, tasol ol i wokim kontrak wantaim ol gavman bilong graun na ol i strong long bilipim dispela ol kontrak tasol, olsem na ol bai kisim bagarap long han bilong dispela lain em Jehova i makim bilong givim strafe long ol man.
21 Lain Isrel i bruk na ol i lus nabaut insait long ol narapela lain, olsem i bin kamap long yia 617 paslain long Krais, tasol God i stap olsem ples hait bilong ol man i laik tanim bel. (Esikiel 11:14-16) Na wanem sampela samting moa God i ken mekim bilong helpim ol? (Esikiel 11:17-21) Ol Juda i stap kalabus inap 70 yia, na bihain God i helpim hap lain bilong ol long i kam bek long as ples bilong ol, olsem long “graun bilong Isrel.” Na long nau tu i wankain: Lain remnan i bin stap kalabus long Babilon, na long 1919 Jehova i helpim ol long lusim Babilon na spirit bilong em i klinim na stretim “graun” bilong ol dispela Isrel bilong spirit. Olsem na long dispela taim nau God i orait long ol man i kisim pinis “mak” bilong abrusim bagarap na lain remnan bilong Isrel bilong spirit. Sapos oltaim yu putim yau na harim tok bilong dispela man em God i bin makim bilong tokaut, ating yu ken insait long dispela lain i no bagarap long taim Jehova i kamautim bainat bilong em na i mekim wok long en.
Yu Tingim Yet?
◻ Bilong wanem yumi mas putim yau taim “man bilong tokaut” em i toktok?
◻ Dispela karis bilong God i makim wanem samting?
◻ Long nau husat i “man bilong tokaut”?
◻ Esikiel i lukim wanem pasin nogut long Jerusalem? Taim yumi tingim dispela samting yumi mas mekim wanem?
◻ Long nau husat i stap olsem “man i pasim klos linen”? Wanem dispela “mak” em i putim long pes bilong ol?
[Askim Bilong Stadi]
1. Bilong wanem yumi mas putim yau na harim tok taim “man bilong tokaut” em i toktok?
2. Kingdom bilong Juda i no harim tok bilong ol profet bilong God, olsem na wanem samting i painim ol?
3. Wanem ol tok i stap long Baibel long hap bilong Esikiel?
4. (a) Esikiel i driman na em i lukim wanem ol samting? (b) Husat dispela “4-pela samting i stap laip”? Ol i gat wanem ol pasin?
5. Dispela wilka o karis i makim wanem samting? Taim lain bilong Jehova i save long ol dispela samting, dispela save i mas mekim wanem long ol?
6. (a) God i givim wanem wok long Esikiel? Esikiel i ting olsem wanem long dispela wok? (b) Esikiel i mas autim tok long wanem kain man? Yumi save God i bin helpim Esikiel, na dispela save i helpim yumi olsem wanem?
7. Esikiel i mas mekim wanem ol wok?
8. Long nau, Jehova i makim husat i olsem “man bilong tokaut”? Husat i save helpim ol long autim tok?
9. (a) Olsem wanem Esikiel i makim gutpela pasin yumi tu i ken bihainim? (b) Esikiel i mekim wanem bilong makim lain Babilon bai kam na bagarapim Jerusalem? Dispela 390 de na 40 de i makim wanem samting?
10. Esikiel i mekim wanem bilong makim hangre bai painim ol Jerusalem long taim ol Babilon i kisim ol i go kalabus? Dispela stori i ken helpim yumi long save long wanem samting?
11. (a) Wanem ol samting i bin kamap olsem Esekiel 5:1-4 i kolim? Ol dispela i makim wanem ol samting? (b) Jehova i truim ol dispela piksa em Esikiel i bin mekim, na taim yumi save long dispela samting, dispela save i mas mekim wanem long yumi?
12. (a) Esikiel 6:1-7 i tok, ol birua bai mekim wanem long lain Juda? (b) Jerusalem i makim wanem samting? Wanem samting bai painim ol?
13. Dispela “stik” i stap long han bilong Jehova em i makim wanem samting? Taim Jehova i mekim wok long dispela “stik,” wanem ol samting i kamap?
14. Ol man bilong Jerusalem o ol misin i tok ol i Kristen, taim strafe i laik kisim ol na ol i traim grisim o baim Jehova, dispela bai helpim ol o olsem wanem?
15. Esikiel i lukim wanem samting long Jerusalem? Sapos yumi lukim samting olsem, yumi mas mekim wanem?
16. Taim yumi harim stori long ol samting Esikiel i lukim long driman, yumi ting olsem wanem long ol man i lusim lotu bilong Jehova na ol i go long narapela lotu?
17. Husat dispela 7-pela man Esikiel i bin lukim long driman? Wanem wok ol i mekim?
18. (a) Long nau, husat i wankain olsem dispela “man i pasim klos linen”? (b) Dispela “mak” em wanem samting? Long nau, husat i gat dispela “mak” i stap long ol? Sapos ol i holim yet dispela “mak,” olsem wanem long ol?
19. Long nau, dispela “man i pasim klos linen” em i mekim wanem long ol misin i giaman na tok ol i Kristen?
20. (a) Taim yumi tingim ol wil bilong dispela karis na ol dispela ensel, ol i save wok gut wantaim, dispela i mas kirapim yumi long mekim wanem? (b) Sampela hetman i mekim wanem? Wanem tingting kranki bilong ol long Jerusalem?
21. Taim ol Juda i stap kalabus inap 70 yia pinis, wanem samting i kamap? Na wanem wankain samting i bin painim lain remnan?