Sapta 3
Traim i Kamap—Tasol Ol i Stap Gut Long Jehova!
1, 2. Wanem ol bikpela samting i bin kamap paslain liklik long taim stori bilong Buk Daniel i kirap?
STORI i stap long Buk Daniel i kirap long taim i gat bikpela senis i kamap long ol kantri. Ninive, em nambawan biktaun bilong Asiria, i bagarap. Isip i no gat bikpela namba na strong olsem bipo na em i bosim hap graun i stap long hap saut bilong Juda. Na Babilon i wok long kamap nambawan strongpela kantri i laik bosim olgeta hap graun.
2 Long 625 B.C.E., em i laspela taim King Neko bilong Isip i traim long pasim Babilon long i kam long hap bilong saut. Bilong mekim olsem, em i bringim ami bilong em i kam long Karkemis long wara Yufretis. Pait bilong Karkemis em i wanpela bikpela pait tru. Nebukatnesar, em bai kisim wok king bilong papa bilong em, em i bosim ami bilong Babilon na em i mekim save tru long ami bilong King Neko. (Jeremaia 46:2) Nebukatnesar i daunim Isip pinis na em i go daunim Siria na Palestain, na em i pinisim strong bilong Isip long bosim dispela hap. Papa bilong en, em Nabopolasar, i dai na inap sotpela taim dispela samting i pasim Nebukatnesar long i go pait na daunim sampela kantri moa.
3. Wanem samting i kamap long namba wan taim Nebukatnesar i kam pait long Jerusalem?
3 Long yia bihain, Nebukatnesar—nau em i king bilong Babilon—em i kam bek gen bilong mekim pait long Siria na Palestain. Long dispela taim em i kamap long Jerusalem long namba wan taim. Baibel i tok: “Long taim Jehoiakim i stap king, King Nebukatnesar bilong kantri Babilon wantaim ol soldia bilong en i kam pait long ol Juda. Em i winim ol na mekim Jehoiakim i stap aninit long em. Tasol bihain long tripela yia, Jehoiakim i no laik tru long Nebukatnesar i bosim em, olsem na em i no moa i stap aninit long em.”—2 King 24:1.
NEBUKATNESAR LONG JERUSALEM
4. Wanem insait bilong dispela tok long Daniel 1:1 olsem, “long namba 3 yia bilong [Jehoiakim] i stap king?”
4 Yumi laik skelim dispela tok “long tripela yia,” long wanem, kirap bilong Buk Daniel i tok: “Jehoiakim i kamap king bilong Juda, na long namba 3 yia bilong em i stap king, Nebukatnesar, king bilong Babilon i kam bilong pait long Jerusalem, na ol ami bilong en i banisim taun olgeta.” (Daniel 1:1) Jehoiakim i mekim wok king kirap long yia 628 i go inap 618 B.C.E., na long namba 3 yia bilong em long i stap king bilong Juda, Nebukatnesar i no kamap “king bilong Babilon” yet, nogat, em i stap yet olsem pikinini bilong kisim wok king bilong papa. Long 620 B.C.E., Nebukatnesar i subim Jehoiakim long baim takis. Tasol klostu 3-pela yia bihain, Jehoiakim i bikhet. Olsem na long 618 B.C.E., long namba 3 yia bilong Jehoiakim long i stap king aninit long Babilon, King Nebukatnesar i kam long Jerusalem long namba tu taim bilong givim strafe long bikhetman Jehoiakim.
5. Wanem samting i kamap long namba tu taim Nebukatnesar i kam pait long Jerusalem?
5 Samting i kamap long dispela pait i olsem: “God i larim Nebukatnesar i kisim Jehoiakim . . . na ol kap na plet samting bilong haus bilong God.” (Daniel 1:2) Ating ol man i kilim Jehoiakim i dai o em i dai long pait, taim Babilon i banisim taun nupela. (Jeremaia 22:18, 19) Long 618 B.C.E., pikinini bilong em Jehoiakin, em i gat 18 krismas, i senisim em na kamap king. Tasol em i mekim wok king inap 3-pela mun na 10-pela de tasol na em i givim em yet long han bilong ol Babilon long 617 B.C.E.—Skelim wantaim 2 King 24:10-15.
6. Nebukatnesar i mekim wanem long ol plet kap holi bilong tempel bilong Jerusalem?
6 Nebukatnesar i kisim ol plet na kap samting i holi long tempel bilong Jerusalem na “karim i go long haus bilong god bilong en long kantri Babilonia,” em god Marduk. (Daniel 1:2; Jeremaia 50:2) Long wanpela olpela rait bilong Babilon ol i painim, Nebukatnesar i stori long tempel bilong Marduk olsem: “Mi bungim planti silva na gol na ol ston i dia tumas . . . na mi putim olgeta gutpela samting i dia tumas bilong kingdom bilong mi i go insait long en.” Bihain bai yumi ritim sampela stori moa long ol dispela kap plet samting bilong tempel, long taim bilong King Belsasar.—Daniel 5:1-4.
OL NAMBAWAN YANGPELA BILONG JERUSALEM
7, 8. Taim yumi skelim Daniel 1:3, 4, na 6, yumi kisim wanem save long Daniel na 3-pela poroman bilong en?
7 Babilon i no kisim ol gutpela samting bilong tempel bilong Jehova tasol—em i kisim sampela samting moa i go. Baibel i tok: “King Nebukatnesar i tokim Aspenas, namba wan ofisa bilong ol man i wok long haus bilong en, long kisim sampela yangpela man namel long ol Juda. Em i mas kisim ol dispela yangpela man long ol famili bilong King Jehoiakim na bilong ol bikman tasol. Em i mas kisim ol yangpela man i gat gutpela pes na gutpela bodi, na i no gat wanpela hap bodi bilong ol i bagarap. Em i mas painim ol yangpela man i gat planti save na i bin kisim gutpela skul na ol i man bilong kisim save kwik. Olsem na bai ol inap long wok long haus bilong king.”—Daniel 1:3, 4.
8 Ol i kisim husat? Baibel i tok: “Namel long ol dispela yangpela man bilong lain Juda . . . i gat 4-pela man i stap. Nem bilong ol i olsem, Daniel na Hanania na Misael na Asaria.” (Daniel 1:6) I no gat planti stori long Daniel na ol poroman bilong em olsem ol i husat, tasol dispela tok i givim sampela save long yumi, olsem: Ol i bilong lain Juda, em lain bilong ol king. Ol i bilong lain bilong king stret o nogat, yumi no save, tasol ating ol i bilong ol famili i gat biknem na namba. Tingting na bodi bilong ol i gutpela, na tu, ol i gat gutpela tingting, na savepasin, na gutpela save, na pasin bilong skelim gut ol samting. Ol i gat ol dispela pasin taim ol i “yangpela,” inap olsem 14 o 15 krismas samting. Daniel na ol poroman bilong em ol i olsem nambawan lain tru namel long ol yangpela bilong Jerusalem.
9. Bilong wanem yumi ken tok olsem papamama bilong Daniel na 3-pela poroman bilong en ol i save pret long God?
9 Buk Daniel i no tokim yumi husat ol i papamama bilong 4-pela yangpela. Tasol yumi ken ting olsem ol i bilip long God na ol i bin pilim tru wok bilong ol olsem papamama long mekim bikpela long ol pikinini. Long Jerusalem long dispela taim pasin nogut na pasin bilong sakim ol samting bilong spirit i go bikpela moa, na pasin bilong ‘ol famili bilong king na bilong ol bikman’ i go nogut moa, olsem na i klia tru olsem ol gutpela pasin bilong Daniel na 3-pela poroman i no kamap nating. Ating papamama bilong ol i mas bel hevi stret long lukim ol birua i kisim ol pikinini man bilong ol i go long wanpela longwe ples. Sapos ol inap save long ol samting bai kamap long ol dispela pikinini bilong ol, bai ol i amamas tru long ol! Em i bikpela samting tru long ol papamama i mas “stretim gut ol pikinini bilong [ol] na skulim ol long tok bilong Bikpela”!—Efesus 6:4.
PAIT BILONG BOSIM TINGTING
10. Ol yangpela Hibru i kisim wanem skul? Wanem as na ol i givim dispela kain skul long ol?
10 Wantu wanpela pait i kirap, olsem husat bai bosim tingting bilong ol dispela yangpela kalabusman. Nebukatnesar i laik bai ol dispela yangpela Hibru i ken bihainim gut ol pasin bilong Babilon, olsem na em i tokim ol ofisa bilong em long “lainim ol long rit na rait long tok ples bilong ol Babilon.” (Daniel 1:4) Dispela i no liklik skul. Wanpela buk (The International Standard Bible Encyclopedia) i tok “ol i stadi long tok Sumeria, Akadia, Aram, na sampela tok ples moa, na ol i mas stadi long planti buk ol i bin raitim long ol dispela tok ples.” Ol dispela “planti buk” i stori long ol samting i bin kamap long bipo, matematiks, ol sta samting antap, na ol narapela samting. Tasol bikpela hap skul bilong ol, em ol i mas skul long “ol buk samting i stori long lotu, na ol pasin bilong glasman na lukluk long ol sta samting bilong kisim save.”
11. Ol i mekim wanem bambai ol yangpela Hibru i kisim pasin bilong ol man bilong Babilon em ol i stap long haus bilong king?
11 King i laik bai ol dispela yangpela Hibru i mas kisim pasin bilong ol man bilong Babilon, em ol i mekim wok long haus bilong king, olsem na king i tok “long olgeta de ol i mas kisim wankain kaikai na dring olsem ol lain man long haus bilong king i save kisim. Ol bai i kisim dispela skul inap long tripela yia na bihain ol bai i kamap wokman bilong king.” (Daniel 1:5) Na tu, “Aspenas i givim nupela nem long ol. Daniel em i kolim Beltesasar, na Hanania em i kolim Satrak, na Misael em i kolim Mesak, na Asaria em i kolim Abetnego.” (Daniel 1:7) Long taim bilong ol man i bin raitim Baibel, ol i save givim nupela nem long man bilong makim olsem wanpela bikpela samting i kamap long i stap bilong em. Olsem: Jehova i senisim nem bilong Abram na Sarai i kamap Abraham na Sara. (Stat 17:5, 15, 16) Taim wanpela man i senisim nem bilong narapela man, dispela i makim olsem man i senisim nem bilong narapela em i gat bikpela namba na strong o em i bosim dispela man. Taim Josep i kamap man bilong bosim kaikai bilong Isip, king i givim nem Safenat Panea long em.—Stat 41:44, 45; skelim wantaim 2 King 23:34; 24:17.
12, 13. Bilong wanem yumi ken tok olsem taim ol i senisim nem bilong ol yangpela Hibru, dispela i olsem ol i traim long bagarapim bilip bilong ol?
12 Ol nem ol i givim long Daniel na 3-pela pren Hibru bilong em i bikpela samting. Ol nem papamama i givim ol i stret wantaim lotu bilong Jehova. Mining bilong nem Daniel i olsem “Jas Bilong Mi Em God.” Insait bilong nem Hanania i olsem “Jehova i Bin Mekim Gut Long Mi.” Ating mining bilong nem Misael i olsem “Husat i Wankain Olsem God?” Na insait bilong nem Asaria i olsem “Jehova i Helpim Mi Pinis.” Ating papamama bilong ol i gat strongpela laik long ol pikinini man bilong ol i mas i go bikpela aninit long lukaut bilong God Jehova na kamap ol wokboi bilong em ol i stap gut long em.
13 Tasol mining bilong ol nupela nem ol i givim long 4-pela Hibru em i samting bilong ol god giaman, na i olsem ol dispela god giaman i bin daunim God tru. Isi isi dispela pasin inap bagarapim bilip bilong ol dispela yangpela!
14. Wanem mining bilong ol nupela nem ol i givim long Daniel na 3-pela poroman bilong em?
14 Ol i senisim nem bilong Daniel na kolim em Beltesasar, insait bilong en “Lukautim Laip Bilong King.” Dispela em i hap bilong wanpela beten ol i bin mekim long Bal o Marduk, em nambawan god bilong Babilon. Maski Nebukatnesar yet i bin givim dispela nem long Daniel o nogat, Nebukatnesar i amamas long tokaut olsem “dispela em nem bilong god bilong mi.” (Daniel 4:8) Hanania ol i kolim Satrak, na sampela i ting mining bilong en i olsem “Lo Bilong Aku.” Aku em i nem bilong wanpela god bilong Sumeria. Misael ol i kolim Mesak (o Mi·sha·aku), em ol i senisim nabaut nem “Husat i Wankain Olsem God?” na i kamap olsem “Husat i Wankain Olsem Aku?” Nem bilong Babilon ol i givim long Asaria em Abetnego, ating insait bilong en i olsem “Wokboi Bilong Nego.” Na “Nego” em i narapela pasin bilong spelim “Nebo,” em nem bilong wanpela god, na sampela king bilong Babilon ol i kisim dispela nem.
STRONG LONG STAP GUT LONG JEHOVA
15, 16. Wanem ol hevi i kamap long Daniel na ol poroman bilong em, na ol i mekim wanem?
15 Ol nem bilong Babilon, nupela skul, na ol kaikai bilong king—dispela olgeta samting em bilong mekim Daniel na 3-pela yangpela Hibru i kisim pasin bilong Babilon na mekim ol i lusim God bilong ol, em Jehova, na lusim ol bilip bilong lotu em papamama i bin lainim ol. Ol dispela samting i laik traim ol, olsem na ol dispela yangpela bai mekim wanem?
16 Baibel i tok: “Daniel i no laik kaikai na dring ol samting ol i givim em long haus bilong king. Daniel i [“tingting strong long bel,” NW ], nogut em i kaikai na dring na em i kamap doti long ai bilong God.” (Daniel 1:8a) Tru, Baibel i kolim nem bilong Daniel tasol, tasol ol samting i kamap i soim olsem 3-pela poroman i wanbel long tingting bilong em. Dispela tok “tingting strong long bel” i soim olsem ol skul papamama na ol narapela long ples i givim long Daniel i bin go daun long bel bilong em. Ating wankain skul i bin helpim 3-pela narapela Hibru long makim wanem samting ol bai mekim. Dispela i kamapim klia olsem em i bikpela samting long skulim ol pikinini bilong yumi, maski yumi ting ol i yangpela tumas long kisim gut tok yumi lainim ol long en.—Sindaun 22:6; 2 Timoti 3:14, 15.
17. Bilong wanem Daniel na 3-pela poroman bilong em i no laik kisim kaikai na wain king i save givim long ol long olgeta de, tasol ol narapela samting king i tok long mekim ol i orait long en?
17 Wanem as na ol yangpela Hibru i no laik kisim kaikai na wain, tasol ol narapela samting ol i orait long en? Tingting bilong Daniel i kamap klia: “Nogut em i . . . kamap doti.” Lain long “rit na rait long tok ples bilong ol Babilon” na kisim ol nem bilong Babilon ol i givim long ol, maski ol i no laikim, dispela i no inap mekim ol i kamap doti. Tingim samting i painim Moses klostu 1,000 yia paslain long dispela taim. Maski em i “skul long olgeta gutpela save bilong ol Isip,” em i stap gut long Jehova. Papamama yet i bin mekim bikpela long em, na dispela i mekim na bilip bilong em i gat strongpela as. Olsem na “Moses i bilip long God, na taim em i kamap bikpela pinis, em i no laik bai ol i kolim em pikinini bilong pikinini meri bilong king bilong Isip. Nogat. Em i ting, mobeta em i kisim hevi wantaim ol lain bilong God. Em i no laik bihainim pasin bilong sin na kisim amamas bilong sotpela taim tasol.”—Aposel 7:22; Hibru 11:24, 25.
18. Olsem wanem ol yangpela Hibru bai kamap doti sapos ol i kisim ol samting king i givim long ol?
18 Olsem wanem ol bai kamap doti sapos ol i kisim ol samting king bilong Babilon i givim long ol? Namba wan samting i olsem: Ating sampela bilong ol dispela kaikai em Lo Bilong Moses i tambuim. Olsem: Ol Babilon i save kaikai sampela animal i no klin, em Lo i tambuim ol Israel long kaikai. (Wok Pris 11:1-31; 20:24-26; Lo 14:3-20) Namba tu: Ol Babilon i no save rausim blut bilong animal pastaim na bihain ol i kaikai. Sapos ol i kaikai mit i gat blut long en ol i brukim lo bilong Jehova. (Stat 9:1, 3, 4; Wok Pris 17:10-12; Lo 12:23-25) Namba tri: Ol man i lotuim ol god giaman ol i save ofaim kaikai bilong ol long ol imis paslain long mekim kaikai bilong kamap wanbel wantaim god bilong ol. Ol wokboi bilong Jehova i no inap insait long dispela kain pasin! (Skelim wantaim 1 Korin 10:20-22.) Laspela samting: Maski man i gat hamas krismas, sapos em i kisim kaikai i gat bikpela gris na strongpela dring long olgeta de, dispela i no inap helpim bodi bilong em long kamap strong, na i no inap tru long helpim ol yangpela.
19. Ol yangpela Hibru inap kisim wanem tingting, tasol wanem samting i bin helpim ol long kisim stretpela tingting?
19 Man inap save long samting em i mas mekim, tasol em i mas i gat strongpela bel long mekim dispela samting long taim bilong hevi o traim. Daniel na 3-pela pren bilong em inap kisim tingting olsem ol i stap longwe long papamama na ol pren bilong ol, na ol i no inap save long wanem samting ol i mekim. O ol inap kisim tingting olsem, king yet i tok long ol i mas mekim ol dispela samting, na i olsem ol i no gat narapela rot. Na tu, ating ol narapela yangpela i amamas long bihainim ol dispela tok na ol i no pilim hevi long dispela, ol i ting em i gutpela samting tasol. Tasol kain tingting kranki olsem inap kirapim ol long mekim hait sampela rong, em wanpela pasin i save pundaunim planti yangpela. Ol dispela yangpela Hibru i save, “Bikpela i save lukim olgeta samting i kamap long olgeta hap” na “God bai i kotim yumi long olgeta pasin yumi bin mekim, em ol gutpela pasin na ol pasin nogut na ol pasin hait.” (Sindaun 15:3; Saveman 12:14) Yumi olgeta i mas larim gutpela pasin bilong ol dispela yangpela i skulim yumi.
STRONGPELA BEL NA I NO LES KWIK
20, 21. Daniel i mekim wanem? Wanem samting i kamap long dispela?
20 Daniel i pasim tok pinis long bel long sakim ol samting i doti, na nau em i kirap mekim ol samting i stret wantaim dispela tingting. “Em i [“wok long,” NW ] askim namba wan ofisa Aspenas, inap ol i givim em narapela kain kaikai.” (Daniel 1:8b) Dispela tok “wok long askim,” em i wanpela tok bilong tingting gut long en. Bilong sakim ol traim na stretim sampela pasin kranki, yumi mas mekim mekim i go, no ken les kwik.—Galesia 6:9.
21 Gutpela samting i painim Daniel taim em i no les kwik. “Na God i mekim Aspenas i sori long Daniel na i laik helpim em.” (Daniel 1:9) I no olsem Daniel na ol poroman bilong em ol i gat gutpela pasin na bikpela save na ol man i laikim ol na dispela i mekim na ol gutpela samting i painim ol. Nogat. As bilong dispela, em Jehova i mekim gut long ol. Ating Daniel i tingim wanpela savetok bilong ol Hibru, i tok: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.” (Sindaun 3:5, 6) Taim em i bihainim dispela tok, gutpela samting i painim em.
22. Namba wan ofisa i kamapim wanem as na em i pret?
22 Pastaim namba wan ofisa i tok: “Mi pret long king, long wanem, em i makim pinis ol kaikai na dring bilong yupela. Na sapos skin bilong yupela i lus na i no kamap wankain olsem skin bilong ol arapela yangpela man i bin kam wantaim yupela, orait king bai i kilim mi i dai.” (Daniel 1:10) I gat as na dispela ofisa i pret olsem. Em i no inap bikhet long tok bilong King Nebukatnesar, na em i save king inap kilim em i dai sapos em i no bihainim tok bilong em. Orait Daniel bai mekim wanem?
23. Olsem wanem pasin Daniel i bihainim i kamapim pasin bilong skelim gut samting na bihainim savepasin?
23 Daniel i bihainim savepasin na gutpela tingting. Ating yangpela Daniel i tingim dispela savetok: “Sapos man i belhat long yu, orait bekim tok isi long em, na bai belhat bilong en i dai. Tasol sapos yu rabisim narapela man long tok bilong yu, bai yu mekim em i belhat nogut tru long yu.” (Sindaun 15:1) Sapos Daniel i bikhet na strong long ofisa i mas bihainim laik bilong em dispela bai kirapim ofisa long belhat na mekim save long em. Tasol em i no mekim olsem. Em i larim tasol. Orait long taim stret, em i toktok wantaim “wasman bilong lukautim” ol. Ating em inap bihainim tingting bilong Daniel liklik, long wanem, em i no gat wok long bekim tok stret long king.—Daniel 1:11.
TRAIM BILONG TENPELA DE
24. Daniel i laik mekim wanem traim?
24 Daniel i tokim wasman: “Mi laik bai yu ken traim mipela olsem. Givim mipela ol sayor samting tasol long kaikai, na kol wara bilong dring, inap long 10-pela de. Orait bihain long dispela 10-pela de, yu lukim ol arapela yangpela man i save kaikai insait long haus bilong king, na yu lukim mipela, na bai yu ken save, skin bilong mipela i kamap gutpela olsem bilong ol, o nogat. Na bihain, wanem samting yu laik mekim long mipela, orait yu mekim tasol.”—Daniel 1:12, 13.
25. Ating wanem kain kaikai i insait long dispela “ol sayor samting” Daniel na 3-pela pren bilong em i kisim?
25 Inap 10-pela de ol bai kisim ‘sayor samting na wara.’ Olsem wanem? Skin bilong ol bai “lus” na i no kamap gutpela olsem skin bilong ol narapela? Dispela tok “sayor samting” ol i tanim long wanpela tok Hibru, mining bilong en i olsem “pikinini bilong ol sayor samting.” Sampela Baibel i kolim wanpela tok i makim ol kain kain bin samting bilong kaikai. Sampela saveman i ting ol i no kaikai ol bin tasol. Wanpela buk i tok: “Kaikai Daniel wantaim ol poroman bilong em i singaut long kisim, em wankain sayor samting olsem ol man nating i save kaikai, na i no ol kaikai na mit i gat bikpela gris em ol lain bilong king i save kaikai.” Olsem na ating ol i laik kisim ol gutpela kaikai bilong strongim bodi olsem ol bin, kukamba, galik, melen, anian, na bret ol i wokim long kain kain wit samting. Man i kisim kain kaikai olsem, em i no sot long kaikai. Ating wasman i pilim pinis dispela samting. “Wasman i orait long tok bilong Daniel na em i mekim olsem Daniel i tok.” (Daniel 1:14) Orait wanem samting i kamap?
26. Wanem samting i kamap bihain long 10-pela de? I gat wanem as na ol samting i kamap olsem?
26 “Orait 10-pela de i pinis, na wasman i lukim bodi bilong ol i kamap gutpela tumas na ol i strong moa na i winim ol arapela yangpela man i bin kisim kaikai king i bin makim bilong ol.” (Daniel 1:15) Yumi no ken tok dispela i makim olsem pasin bilong kaikai ol sayor samting tasol i winim pasin bilong kaikai planti mit, nogat. Tenpela de i sotpela taim tumas long wanpela pasin bilong kaikai i ken kamapim sampela senis long bodi em yu inap lukim, tasol insait long 10-pela de Jehova inap kamapim laik bilong em. Baibel i tok: “Sapos Bikpela yet i givim yumi planti gutpela samting, em i no save larim ol dispela samting i givim hevi long yumi.” (Sindaun 10:22) Fopela yangpela Hibru ol i bilip strong long Jehova, na em i no lusim ol. Planti yia bihain, Jisas Krais i lusim kaikai inap 40 de. Em i kamapim tok i stap long Lo 8:3, em i tok: “Yumi man i no inap kisim laip long kaikai tasol. Nogat. Yumi mas bihainim olgeta tok bilong God tu na bai yumi kisim laip.” Samting i painim Daniel na ol pren bilong em i kamapim klia olsem dispela tok i tru olgeta.
GUTPELA TINGTING NA SAVEPASIN—GUTPELA KAIKAI NA WAIN NOGAT
27, 28. Pasin Daniel na 3-pela pren bilong em i mekim, olsem wanem dispela i redim ol long ol bikpela samting tru bai painim ol long bihain?
27 Dispela 10-pela de em bilong traim kaikai bilong ol, tasol samting dispela traim i kamapim em i klia tru. “Olsem na wasman i no givim Daniel wantaim ol tripela pren bilong en ol gutpela gutpela kaikai na wain bilong king. Em i givim sayor samting tasol long ol.” (Daniel 1:16) I no hatwok long save long tingting bilong ol narapela yangpela i insait long dispela skul, olsem ol i gat wanem tingting long Daniel na ol poroman bilong em. Ating ol i ting pasin bilong sakim ol gutpela kaikai bilong king na kaikai ol sayor samting long olgeta de em i longlong pasin. Tasol i gat ol bikpela traim na hevi bai bungim ol, olsem na tingting bilong ol yangpela Hibru i mas sap na ol i no ken spak. Nambawan bikpela samting, em strongpela bilip bilong ol long Jehova bai helpim ol long winim ol samting i traim bilip bilong ol.—Skelim wantaim Josua 1:7.
28 Yumi save Jehova i stap wantaim ol dispela yangpela—dispela samting i kamap klia long dispela tok: “God i givim gutpela save na tingting long Daniel wantaim ol tripela pren bilong en na ol i gat bikpela save tru long olkain tok i stap long ol buk, na ol i gat gutpela save long planti arapela samting. Na tu, God i givim save long Daniel bilong autim as bilong ol driman.” (Daniel 1:17) Bilong winim taim nogut bai kamap bihain, ol i mas i gat samting i winim strongpela bodi na i no gat sik. “Bai yu kisim planti gutpela tingting na bai yu belgut long gutpela save bilong yu. Pasin bilong tingting gut bai i banisim yu na gutpela save bai i was long yu. Na bai yu no bihainim ol man i save mekim pasin nogut na i save mekim tok i no stret.” (Sindaun 2:10-12) Jehova i givim ol dispela samting long dispela 4-pela yangpela ol i stap gut long em, bambai ol i ken redi long ol samting bai kamap bihain.
29. Bilong wanem Daniel inap “autim as bilong ol driman”?
29 Baibel i tok “God i givim save long Daniel bilong autim as bilong ol driman.” Dispela i no makim olsem em i kamap wanpela glasman samting, nogat. Daniel i wanpela profet Hibru i gat biknem, tasol God i no bin kirapim em long mekim kain tok olsem “God, Bikpela i tok olsem” o “Bikpela I Gat Olgeta Strong, em i tokim mi olsem.” (Aisaia 28:16; Jeremaia 6:9) Tasol long rot bilong spirit holi bilong God, Daniel inap save na kamapim as bilong ol driman i kamapim klia ol samting Jehova i laik mekim.
BIKPELA TRAIM I KAMAP
30, 31. Rot Daniel na ol poroman bilong em i bihainim i bin helpim ol olsem wanem?
30 Tripela yia bilong skulim na redim ol i pinis. Nau em taim bilong bikpela traim—king bai toktok wantaim ol wan wan. “Olgeta dispela yangpela man i pinisim tripela yia bilong skul King Nebukatnesar i bin makim, na Aspenas i kisim ol i go long king.” (Daniel 1:18) Em i taim bilong 4-pela yangpela long tokaut long ol samting ol i bin mekim. Pasin bilong bihainim ol lo bilong Jehova na no ken bihainim pasin bilong Babilon bai helpim ol o nogat?
31 “King i toktok wantaim ol na em i lukim olsem, save bilong Daniel na Hanania na Misael na Asaria i winim save bilong ol arapela yangpela man. Olsem na em i mekim ol i kamap wokman bilong en.” (Daniel 1:19) Em nau, dispela i kamapim klia olsem ol pasin ol i bin bihainim insait long 3-pela yia i go pinis em i win! Ol i bin strong long bihainim pasin em bilip na tingting bilong bel i tokim ol long bihainim, na dispela i no pasin longlong. Daniel na ol poroman bilong em ol i stap gut long ol samting i olsem em i liklik samting tasol, na long dispela rot ol i kisim bikpela blesing moa. Olgeta yangpela i bin insait long dispela skul ol i laik kisim dispela gutpela wok olsem kamap “wokman bilong king.” King i makim 4-pela Hibru tasol long mekim dispela wok o nogat, Baibel i no stori long dispela. Tasol ol i bin stap gut long God na em i “mekim sindaun bilong [ol] i kamap gutpela tru.”—Song 19:11.
32. Olsem wanem yumi ken tok Daniel, Hanania, Misael, na Asaria ol i kisim wanpela gutpela wok i winim wok bilong i stap wokman bilong king?
32 Baibel i tok: “Sapos man i mekim gutpela wok, orait em bai i kamap wokman bilong king. Dispela kain man i no inap kamap wokman bilong man i no gat nem.” (Sindaun 22:29) Olsem na Nebukatnesar i makim Daniel, Hanania, Misael, na Asaria long kamap wokman bilong em. Long ol dispela samting yumi inap luksave olsem Jehova i stiaim ol samting bambai long rot bilong ol dispela yangpela man—na moa yet long rot bilong Daniel—Jehova bai kamapim long ples klia sampela bikpela samting em i tingting pinis long mekim. Tru, em i bikpela samting long Nebukatnesar i bin makim ol long kamap wokman bilong em, tasol em i bikpela samting moa long King bilong heven na graun, em Jehova, bai mekim wok long rot bilong ol long kamapim klia ol dispela laik bilong em.
33, 34. (a) Bilong wanem king i amamas long ol yangpela Hibru? (b) Ol samting i bin painim 4-pela Hibru inap lainim yumi long wanem samting?
33 Kwiktaim Nebukatnesar i kisim save olsem gutpela tingting na savepasin Jehova i givim long 4-pela yangpela Hibru i winim tru save bilong ol saveman bilong Babilon. “King i askim ol long planti kain samting na em i lukim olsem save bilong ol i winim tru save bilong ol saveman bilong Babilon. Ol dispela saveman i no inap tru long ol dispela 4-pela man bilong Juda.” (Daniel 1:20) Dispela em i mas tru, long wanem, ol saveman i bilip long ol save bilong graun na ol kain kain tingting kranki bilong Babilon, tasol Daniel na ol pren bilong em ol i bilip long save i kam long God. Save bilong ol i win tru!
34 Kirap long bipo na i kam inap long nau dispela pasin i no bin senis tumas. Long taim bilong ol aposel ol man i laikim tingting bilong ol Grik na ol lo bilong Rom, aposel Pol i tok: “Gutpela save bilong dispela graun em i olsem longlong pasin tasol long ai bilong God. Buk bilong God i tok olsem long dispela, ‘Sampela man i save tingting long ol kain kain pasin bilong mekim nogut long ol arapela man, tasol God i save mekim ol dispela pasin bilong ol i bagarapim ol yet.’ Na buk bilong God i tok tu olsem, ‘Bikpela i save pinis long tingting bilong ol saveman. Em i save, olgeta samting ol i tingting long mekim, ol bai i no inap kamap.’ Olsem na yupela i mas lusim pasin bilong apim nem bilong ol man.” (1 Korin 3:19-21) Long nau, yumi mas holim strong ol samting Jehova i lainim yumi long en na no ken larim ol samting bilong dispela graun i pulim yumi.—1 Jon 2:15-17.
STAP GUT INAP LONG PINIS
35. Baibel i tok wanem long 3-pela poroman bilong Daniel?
35 Daniel sapta 3 i kamapim klia strongpela bilip bilong Hanania, Misael, na Asaria taim Nebukatnesar i sanapim wanpela imis gol long ples stret bilong Dura na long traim bilong bikpela paia i hat nogut tru. Ol dispela Hibru i pret long God ol i bin stap gut long Jehova i go inap long ol i dai. Yumi save olsem, long wanem, Pol i stori long ol taim em i tok long ol man “ol i mekim ol traipela paia i dai.” (Hibru 11:33, 34) Ol i stap olsem gutpela piksa ol yangpela na ol lapun wokboi bilong Jehova i ken bihainim.
36. Daniel i stap gut na mekim wok inap hamas yia?
36 Laspela ves bilong sapta 1 i stori long Daniel olsem: “Em i wok i stap yet long taim Sairus i kamap king bilong Babilon.” Stori bilong ol samting i bin kamap long bipo i kamapim olsem Sairus i daunim Babilon long wanpela nait tasol long 539 B.C.E. Gutpela pasin na gutnem bilong Daniel i mekim, na em i wok yet olsem wokman bilong Sairus. Daniel 10:1 i tok: “Long namba 3 yia bilong Sairus i stap king bilong Persia,” Jehova i kamapim wanpela bikpela tok long Daniel. Sapos em i gat 14 o 15 krismas taim ol i bringim em i kam long Babilon long 617 B.C.E., em bai i gat klostu 100 krismas taim em i kisim laspela driman. Daniel i stap gut na mekim wok bilong Jehova inap planti yia na em i kisim planti blesing!
37. Taim yumi skelim sapta 1 bilong Buk Daniel, dispela inap lainim yumi long wanem ol samting?
37 Sapta 1 bilong Buk Daniel i kamapim stori bilong 4-pela yangpela ol i stap gut na winim ol samting i traim bilip bilong ol, na em i kamapim sampela samting moa. Sapta 1 i soim yumi olsem Jehova inap mekim wok long husat em i laikim bilong kamapim laik bilong em. Dispela stori i kamapim klia olsem sapos Jehova i larim wanpela samting i kamap, maski i luk olsem em i samting nogut, Em inap mekim gutpela wok long en. Na tu, dispela stori i lainim yumi olsem man i stap gut long Jehova long ol liklik samting em bai kisim bikpela prais.
YU BIN KISIM WANEM SAVE?
• Yumi ken tok wanem long famili na sindaun bilong Daniel na 3-pela yangpela pren bilong em?
• Wanem samting i kamap long 4-pela yangpela Hibru long Babilon bilong traim gutpela pasin bilong papamama long mekim bikpela long ol?
• Fopela Hibru i sanap strong na i no pret, olsem na Jehova i praisim ol olsem wanem?
• Ol samting i bin painim Daniel na 3-pela poroman bilong em inap skulim ol wokboi bilong Jehova long nau long wanem ol samting?
[Piksa i karamapim pes olgeta long pes 30]