Kisim Skul Long Pasin Bilong Daniel

 1. Wai na ol Babilon i laikim tru profet Daniel?

TAIM profet Daniel i yangpela man, ol Babilon i kisim em olsem kalabusman bilong woa i go long Babilon, em kantri i stap longwe tru long asples bilong em. Maski Daniel i yangpela mangi tasol, ol ofisa bilong Babilon i laikim em. Ol i “lukluk long bodi” bilong Daniel na ol i lukim olsem em “i no gat wanpela bagarap long skin na [em] i luk smat” na em i kam long famili i gat biknem. (1 Sml. 16:7) Ol dispela samting i stap olsem as na ol Babilon i trenim Daniel long mekim wok long haus king bilong ol.​—Dan. 1:3, 4, 6.

 2. Jehova i pilim olsem wanem long Daniel? (Esekiel 14:14)

² Jehova i laikim Daniel, i no bikos em i luk nais o bikos em i holim wok i gat namba, nogat, em i laikim em bikos long ol pasin dispela yangpela man i wok long bihainim. Taim Daniel i gat 19 o 20 krismas samting, Jehova i tingim em olsem stretpela man wankain olsem Noa na Jop, em ol man husat i bin stap gut long God inap planti yia na ol i gat gutnem long ai bilong em. (Stt. 5:32; 6:9, 10; Jop 42:16, 17; ritim Esekiel 14:14.) Na Jehova i wok yet long laikim Daniel insait long longpela haptaim em i stap laip na i gat gutpela sindaun.​—Dan. 10:11, 19.

 3. Yumi bai stori long wanem samting long dispela atikol?

³ Long dispela atikol, yumi bai stori long tupela pasin bilong Daniel we i mekim na em i dia tumas long ai bilong Jehova. Pastaim yumi bai skelim wan wan bilong dispela tupela pasin na stori long wanem ol taim em i mekim ol dispela pasin. Bihain yumi bai stori long wanem samting i helpim Daniel long kisim ol dispela pasin. Laspela samting, yumi bai stori long hau yumi ken bihainim pasin bilong em. Dispela atikol i bilong helpim ol yangpela, tasol ol tok bilong en i ken helpim yumi olgeta long kisim skul long pasin bilong Daniel.

 4. Long wanem taim Daniel i strongim bel? Stori long wanpela eksampel.

⁴ Ol man i gat strongpela bel inap pret sampela taim, tasol ol i no larim dispela i pasim ol long mekim samting i stret long mekim. Daniel em wanpela yangpela man i gat strongpela bel. Skelim tupela taim em i bin soim olsem em i gat strongpela bel. Long namba 1 taim em tupela yia bihain long Babilon i bagarapim Jerusalem. King Nebukatnesar bilong Babilon i lukim wanpela traipela imis long driman na dispela i mekim em i pret nogut tru. Em i tok long kilim i dai olgeta saveman bilong em na Daniel tu, sapos ol i no tokaut long dispela driman bilong em na mining bilong en. (Dan. 2:3-5) Daniel i mas mekim sampela samting hariap, sapos nogat, laip bilong planti man inap lus. Em “i go long king na askim em long givim em sampela haptaim long kamapim mining bilong driman long king.” (Dan. 2:16) Dispela i soim olsem Daniel i gat strongpela bel na em i bilip long God. I no gat wanpela stori bilong Baibel i soim olsem Daniel i bin autim mining bilong ol driman paslain long dispela. Em i askim ol poroman bilong em—nem bilong ol long tokples bilong ol Babilon em Satrak, Mesak, na Abetnego—“long beten long God bilong heven long marimari long ol na kamapim long ol dispela samting i stap hait.” (Dan. 2:18) Jehova i bekim ol dispela beten. God i helpim Daniel na em inap kamapim mining bilong driman bilong Nebukatnesar. Dispela i seivim laip bilong Daniel na ol poroman bilong em.   

 5. Wanem narapela samting gen i kamap na i traim pasin bilong Daniel long strongim bel?

⁵ Sampela haptaim bihain long Daniel i kamapim mining bilong driman bilong king long traipela imis, narapela samting gen i kamap na i traim pasin bilong Daniel long strongim bel. Nebukatnesar i lukim narapela driman we i mekim em i pret nogut tru. Long dispela driman, em i lukim wanpela traipela diwai. Daniel i strongim bel na tokim king long mining bilong dispela driman, na em i tok tu olsem king bai kamap longlong na inap sampela haptaim em i no inap mekim wok king. (Dan. 4:25) Dispela tok Daniel i mekim inap mekim king i ting olsem Daniel i laik birua long wok king bilong em na em inap kilim i dai Daniel long dispela samting. Tasol Daniel i strongim bel na tokaut long dispela, maski wanem samting inap kamap.

 6. Wanem samting i helpim Daniel long strongim bel?

⁶ Wanem samting i helpim Daniel long strongim bel long laip olgeta bilong em? Taim Daniel i liklik, em i lain long pasin bilong papa na mama bilong em. I klia tru olsem ol i bihainim tok Jehova i givim long ol papamama Israel, na ol i skulim pikinini bilong ol long Lo Bilong God. (Lo 6:6-9) Daniel i save long ol bikpela astok bilong Lo, olsem Tenpela Lo, na tu, em i save long ol narapela tok bilong Lo long wanem ol samting ol Israel i ken kaikai o ol i no ken kaikai.b (Wkp. 11:4-8; Dan. 1:8, 11-13) Daniel i save tu long histori bilong lain bilong God na em i save long samting i bin painim ol taim ol i sakim ol lo bilong Jehova. (Dan. 9:10, 11) Ol samting i kamap long laip bilong Daniel i helpim em long bilip tru olsem Jehova na ol strongpela ensel bilong Em i stap bilong helpim em.​—Dan. 2:19-24; 10:12, 18, 19.

 7. Wanem narapela samting i helpim Daniel long strongim bel? (Lukim tu piksa.)

⁷ Daniel i stadi gut long ol tok em ol profet bilong God i bin raitim na ol tok profet bilong Jeremaia. Long rot bilong dispela stadi, Daniel i luksave olsem ol Juda i stap kalabus long Babilon inap longpela taim, tasol klostu nau ol bai lusim kalabus. (Dan. 9:2) I klia tru olsem Daniel i lukim ol tok profet bilong Baibel i kamap tru, na dispela i strongim pasin bilong em long trastim Jehova, na ol manmeri husat i trastim God ol i save strongim bel tru. (Skelim Rom 8:31, 32, 37-39.) Bikpela samting moa, oltaim Daniel i save beten long Papa bilong em long heven. (Dan. 6:10) Em i save autim ol sin bilong em long Jehova na kamapim bel na tingting bilong em long Em. Na Daniel i save askim God long helpim em. (Dan. 9:4, 5, 19) Em i man wankain olsem yumi so em i no bin bon wantaim pasin bilong strongim bel, nogat. Em i kisim dispela pasin long rot bilong beten, stadi, na trastim Jehova.

 8. Olsem wanem yumi ken kisim pasin bilong strongim bel?

⁸ Yumi mas mekim wanem samting bilong kisim pasin bilong strongim bel? Ating ol papamama bilong yumi inap kirapim yumi long kisim pasin bilong strongim bel, tasol ol i no inap givim dispela pasin long yumi, maski ol yet i gat dispela pasin. Yumi mas lain long kisim pasin bilong strongim bel, wankain olsem yumi lain long mekim wanpela wok. Wanpela rot yu ken lain long mekim gut dispela wok, em long lukim gut hau tisa i mekim dispela wok na bihainim pasin bilong em. Olsem tasol, yumi lain long kisim pasin bilong strongim bel taim yumi lukim gut hau ol narapela i mekim dispela pasin na yumi bihainim pasin bilong ol. So yumi lainim wanem samting long Daniel? Wankain olsem Daniel, yumi mas save gut long Tok Bilong God. Yumi mas kamap gutpela pren bilong Jehova long rot bilong toktok wantaim em planti taim na kamapim ol samting yumi pilim long bel. Na yumi mas trastim Jehova na bilip tru olsem oltaim em bai helpim yumi. Na taim ol samting i kamap na i traim bilip bilong yumi, bai yumi strongim bel.

 9. Wanem ol gutpela samting i save kamap long pasin bilong yumi long strongim bel?

⁹ Planti gutpela samting i save kamap long pasin bilong yumi long strongim bel. Tingim stori bilong Ben. Em i go long wanpela skul long Jemani we olgeta lain i bilip long evolusen na ol i tingim stori bilong Baibel long God i wokim ol samting olsem wanpela stori nating. Wanpela taim, rot i op long Ben inap sanap long fran bilong klas na stori long as na em i bilip olsem God i wokim olgeta samting i gat laip. Em i strongim bel na tokaut long bilip bilong em. Wanem gutpela samting i kamap long dispela? Ben i tok: “Tisa bilong mi i putim gut yau long mi, na em i mekim fotokopi bilong ol infomesen mi yusim bilong sapotim tok bilong mi na em i givim wanpela kopi long olgeta sumatin long klas.” Ol wanklas bilong Ben i mekim wanem? Ben i tok: “Planti bilong ol i putim yau long tok mi mekim na ol i tok ol i amamas long mi.” Olsem stori bilong Ben i soim, planti taim ol man i save rispektim ol man i gat pasin bilong strongim bel. Na tu, pasin bilong ol inap kirapim ol man i gat gutpela bel long kisim save long Jehova. Tru tumas, i gat gutpela risen long yumi mas kisim pasin bilong strongim bel.

10. Pasin bilong stap gut long narapela i makim wanem samting?

¹⁰ Long Baibel, dispela tok Hibru ol i tanim olsem “stap gut long narapela,” o “gutpela pasin laikim” i makim pasin bilong laikim tru na pas gut wantaim wanpela na planti taim Baibel i yusim dispela tok long makim pasin bilong God long laikim tru ol wokman bilong em. Baibel i yusim dispela wankain tok long makim pasin laikim i stap namel long ol wokman bilong God. (2 Sml. 9:6, 7) Pasin bilong yumi long stap gut long narapela i ken kamap strong insait long longpela haptaim. Yumi ken stori long hau pasin bilong Daniel long stap gut long God i kamap strong moa.

11. Wanem samting i kamap na i traim pasin bilong Daniel long stap gut long God taim em i lapun pinis? (Lukim fran pes piksa.)

¹¹ Long laip olgeta bilong Daniel, planti samting i kamap na i traim pasin bilong em long stap gut long God. Tasol wanpela bikpela traim tru i painim em taim em i winim pinis 90 krismas. Long dispela taim, lain Midia na Persia i bin daunim Babilon na King Darius i bin mekim wok king. Ol ofisa bilong king i no laikim Daniel na ol i no rispek liklik long God em i lotuim. So ol i wokim wanpela plen bilong kilim i dai Daniel. Ol i kamapim wanpela lo bilong traim Daniel na lukim em bai stap gut long God bilong em o long king. Bilong bihainim dispela lo, Daniel i no ken beten long Jehova inap 30 de, na long dispela rot em bai soim olsem em i stap gut long king na em i wankain olsem ol narapela manmeri. Daniel i laik stap gut long God na em i no bihainim dispela lo. Em as na ol i tromoi em i go insait long hul bilong laion. Tasol Jehova i blesim pasin bilong Daniel long stap gut long em na em i kisim bek Daniel long maus bilong ol laion. (Dan. 6:12-15, 20-22) Olsem wanem yumi ken kisim pasin bilong stap gut tru long Jehova olsem Daniel i bin mekim?

12. Olsem wanem Daniel i kisim pasin bilong stap gut tru long Jehova?

¹² Olsem yumi stori pinis, pasin bilong laikim tru Jehova bai kirapim yumi long stap gut long em. I no gat wanpela samting inap tekewe pasin bilong Daniel long stap gut tru long Jehova, long wanem, em i laikim tru Papa bilong em long heven. I klia tru olsem Daniel i kisim pasin bilong laikim Jehova long rot bilong tingim ol pasin bilong Jehova na hau Jehova i mekim ol dispela pasin. (Dan. 9:4) Na tu, Daniel i tingim tingim long bel olgeta gutpela samting Jehova i bin mekim long em na ol manmeri bilong Em.​—Dan. 2:20-23; 9:15, 16.

13. (a) Wanem samting i save traim pasin bilong ol yangpela long stap gut long God? Stori long wanpela eksampel. (Lukim tu piksa.) (b) Olsem vidio i soim, yu bai bekim wanem tok taim ol narapela i askim olsem ol Witnes Bilong Jehova i save sapotim ol gei lain o nogat?

¹³ Wankain olsem Daniel, ol yangpela bilong yumi i stap namel long ol manmeri em ol i no gat rispek long Jehova na ol lo bilong em. Ol kain manmeri i no save laikim ol manmeri em tingting na bilip bilong ol i no wankain olsem bilong ol. Sampela i traim long buli long ol yangpela bilong yumi bilong mekim ol i lusim pasin bilong ol long stap gut long Jehova. Olsem, tingim samting i painim wanpela yangpela man nem bilong em Graeme, em i save stap long Australia. Em i bungim wanpela hevi taim em i stap long haiskul. Tisa i askim klas long ol bai tok wanem taim wanpela pren bilong ol i tokim ol olsem em i gei. Tisa i tok ol pikinini long klasrum husat bai sapotim dispela pren long stap olsem gei, ol i mas sanap long wanpela sait bilong klasrum, na ol narapela husat i no inap sapotim dispela pren, ol i mas sanap long narapela sait. Graeme i tok: “Klas olgeta i sanap long sait bilong sapotim dispela pren long stap wanpela gei, tasol mi na narapela Witnes pikinini tasol i sanap long narapela sait.” Samting i kamap bihain i traim tru pasin bilong Graeme long stap gut long Jehova. Em i tok: “Insait long wanpela aua olgeta, ol sumatin na tisa i tok bilas na mekim ol tok i daunim mipela. Mi traim bes long mekim ol gutpela tok bilong sambai long bilip bilong mi long pasin isi, tasol ol i no putim yau long wanpela tok mi mekim.” Graeme i pilim olsem wanem long dispela traim i painim em long pasin bilong em long stap gut long God? Em i tok: “Mi no amamas long ol i sutim ol kain kain tok long mi, tasol mi amamas tru olsem mi stap gut long God na mi sambai long ol bilip bilong mi.”c

14. Wanem wanpela rot yumi ken kisim pasin bilong stap gut tru long Jehova?

¹⁴ Wankain olsem Daniel, yumi ken kisim pasin bilong stap gut tru long Jehova sapos yumi laikim Em tru. Yumi kisim dispela pasin laikim long rot bilong kisim save long ol pasin bilong Jehova. Olsem, yumi ken stadi long ol samting em i bin wokim. (Rom 1:20) Sapos yu laik kisim pasin bilong laikim tru na rispek long Jehova, orait yu ken ritim ol sotpela atikol i stap long atikol siris, “Yu Ting Wanpela i Bin Wokim?” o lukim ol vidio long dispela hap. Yu ken stadi tu long ol tok i stap long buklet Was Life Created? na The Origin of Life—Five Questions Worth Asking. Lukim tok wanpela yangpela sista long Denmak, nem bilong em Esther, i mekim long ol dispela pablikesen, em i tok: “Ol tok bilong kirapim yu long wokim tingting long ol dispela pablikesen i nais tru. Ol dispela pablikesen i no tokim yu long ol samting yu mas bilip long en, nogat, ol i kamapim ol tok i tru na larim yu yet i wokim disisen.” Ben em yumi stori pinis long em, em i tok: “Ol tok bilong ol dispela pablikesen i strongim tru bilip bilong mi. Ol i kamapim klia long mi olsem God i wokim olgeta samting i gat laip.” Taim yu stadi long ol dispela pablikesen, ating yu bai wanbel long tok Baibel i mekim olsem: “Jehova, yu God bilong mipela, i stret tru long yu kisim glori na ona na strong, long wanem, yu bin wokim olgeta samting.”​—Rev. 4:11.d

15. Wanem narapela rot yumi ken kisim pasin bilong pas gut wantaim Jehova?

¹⁵ Narapela rot we yumi ken kisim pasin bilong pas gut tru wantaim Jehova, em long rot bilong stadi gut long laip bilong Pikinini bilong em, Jisas. Wanpela yangpela sista nem bilong em Samira, em i save stap long Jemani, em i bin mekim olsem. Em i tok: “Mi save gut moa long Jehova long rot bilong Jisas.” Taim Samira i liklik, em i hatwok long kliagut olsem Jehova i ken kamap pren bilong em na Em i laikim em. Tasol em i kliagut long hau Jisas i ken pilim ol samting long bel. Em i tok moa olsem: “Mi laikim Jisas bikos em i gat gutpela pasin pren na em i save laikim ol pikinini.” Taim em i wok long kisim save long Jisas, dispela i helpim em long save gut moa long Jehova na pas gut wantaim em. Bilong wanem? Em i tok: “Isi isi mi kliagut olsem Jisas i save bihainim stret olgeta pasin bilong Papa bilong em. Ol i gat ol wankain pasin. Mi luksave olsem dispela em wanpela risen na Jehova i salim Jisas i kam long graun, long dispela rot ol manmeri i ken save gut moa long Jehova.” (Jon 14:9) Sapos yu laik pas gut moa wantaim Jehova, i gutpela long yu lusim haptaim long save gut moa long Jisas. Taim yu mekim olsem, pasin bilong yu long laikim tru Jehova na stap gut long em bai kamap strong moa.   

16. Bilong wanem yumi mas stap gut long God? (Buk Song 18:25; Maika 6:8)

¹⁶ Ol manmeri i save stap gut long narapela narapela, ol i save stap gutpela pren inap longpela taim tru. (Rut 1:14-17) Na tu, ol man i save stap gut long Jehova, i gat as long ol i ken stap bel isi na stap belgut tru. Bilong wanem? Long wanem, Jehova i promis long stap gut long ol man husat i stap gut long em. (Ritim Buk Song 18:25; Maika 6:8.) Tingim dispela—God i gat olgeta strong i redi long kamap gutpela pren bilong yumi! Na taim em i mekim olsem, i no gat wanpela traim, wanpela birua, o dai inap brukim dispela pasin pren bilong yumi wantaim em. (Dan. 12:13; Luk 20:37, 38; Rom 8:38, 39) So em i bikpela samting long yumi bihainim pasin bilong Daniel na stap gut yet long Jehova!

17-18. Yumi inap kisim wanem narapela skul long Daniel?

¹⁷ Long dispela atikol yumi bin stori long tupela pasin bilong Daniel. Tasol i gat sampela samting moa yumi ken lainim long em. Olsem, Jehova i givim sampela driman na ol visen long Daniel, na Em i givim em save bilong kamapim mining bilong ol tok profet. Planti bilong ol dispela tok profet i bin kamap tru pinis. Ol narapela tok profet i stori long ol samting bai kamap bihain na dispela bai mekim sampela samting long ol manmeri i stap long graun.

¹⁸ Long neks atikol, yumi bai stori long tupela tok profet Daniel i bin raitim. Taim yumi kliagut long ol dispela tok profet, dispela inap helpim yumi olgeta—ol lapun na ol yangpela wantaim—long mekim ol gutpela disisen long nau. Na tu, ol dispela tok profet inap strongim bel bilong yumi na pasin bilong yumi long stap gut long God na bai yumi ken redi long bungim ol bikpela hevi em klostu nau i laik kamap.