Kingdom Bilong God i Mekim Wok Long Nau!

Kingdom Bilong God i kirap mekim wok long heven long yia 1914. Na tu, em kirap bilong laspela haptaim bilong wok bos bilong ol man. Hau mipela i save long dispela? Bai yumi skelim tok profet bilong Baibel, na ol samting i wok long kamap long graun, na pasin bilong ol man kirap long 1914 na i kam.

1. Baibel i tok profet long wanem samting?

Buk Daniel i tok profet olsem Kingdom Bilong God bai kirap mekim wok long pinis bilong haptaim em Baibel i kolim olsem “7-pela taim.” (Daniel 4:16, 17) Planti handret yia bihain, Jisas i kolim dispela seim haptaim olsem “haptaim bilong ol manmeri bilong ol arapela lain,” na em i tok dispela haptaim i no pinis yet. (Luk 21:24) Bai yumi kisim save olsem dispela 7-pela taim i pinis long yia 1914.

2. Kirap long 1914 wanem samting i kamap long graun na ol man i bihainim wanem kain pasin?

Ol disaipel bilong Jisas i askim em: “Wanem sain bai kamap bilong soim olsem yu kam i stap na pinis bilong dispela taim i kamap pinis?” (Matyu 24:3) Bilong bekim, Jisas i tok profet long planti samting bai kamap bihain long em i kirap mekim wok long heven olsem King bilong Kingdom Bilong God. Sampela bilong ol dispela samting em woa, ol bikpela hangre, na ol guria. (Ritim Matyu 24:7.) Na tu, Baibel i tok profet olsem pasin bilong ol man long “taim bilong las de” bai “givim hatwok long ol man.” (2 Timoti 3:1-5) Ol dispela samting na pasin bilong ol man i kamap klia moa kirap long 1914 na i kam.

3. Wai na ol samting long graun i go nogut moa taim Kingdom Bilong God i kirap mekim wok?

Bihain liklik long Jisas i kamap King long Kingdom Bilong God, em i pait wantaim Satan na ol spirit nogut long heven. Satan i lus long pait. Baibel i tok Jisas i ‘tromoi em i go daun long graun, na ol ensel bilong em i go daun wantaim em.’ (Revelesen 12:9, 10, 12) Satan i belhat nogut tru bikos em i save em bai kisim bagarap. So em i as bilong olgeta pen na hevi i kamap long graun. Olsem na ol samting long graun i go nogut moa! Kingdom Bilong God bai pinisim dispela olgeta hevi.

KISIM SAMPELA SAVE MOA

4. Tok profet bilong Baibel i makim 1914

VIDIO: Kingdom Bilong God i Kirap Mekim Wok Long 1914 (5:02)

God i mekim na King Nebukatnesar bilong Babilon bilong bipo i kisim wanpela driman i olsem tok profet. Daniel i stori long dispela driman na mining bilong en i soim olsem dispela driman i makim wok king bilong Nebukatnesar, na tu, Kingdom Bilong God.—Ritim Daniel 4:17.a

Ritim Daniel 4:20-26, na yusim sat long bekim ol dispela askim:

• (A) Nebukatnesar i lukim wanem samting long driman bilong em?—Lukim ves 20 na 21.

• (B) Wanem samting bai painim diwai?—Lukim ves 23.

• (C) Wanem samting bai kamap long pinis bilong dispela “7-pela taim”?—Lukim ves 26.

Driman Bilong Diwai i Makim Ol Samting Bilong Kingdom Bilong God

TOK PROFET (Daniel 4:20-36)

Wok king

(A) Wanpela bikpela diwai

Wok king i stop

(B) “Katim diwai i go daun,” na larim “7-pela taim i lus pastaim”

Wok king i kirap gen

(C) “Yu bai kisim bek kingdom bilong yu”

Long namba wan truim bilong dispela tok profet . . .

• (D) Dispela diwai i makim husat?—Lukim ves 22.

• (E) Wanem taim wok king bilong em i stop?—Ritim Daniel 4:29-33.

• (F) Wanem samting i kamap long Nebukatnesar long pinis bilong dispela “7-pela taim”?—Ritim Daniel 4:34-36.

NAMBA WAN TRUIM

Wok king

(D) Nebukatnesar, King bilong Babilon

Wok king i stop

(E) Bihain long 606 B.C.E., Nebukatnesar i lusim gutpela tingting na kamap longlong, na em i no mekim wok king inap 7-pela yia

Wok king i kirap gen

(F) Nebukatnesar i kisim gutpela tingting na kirap mekim wok king gen

Long namba tu truim bilong dispela tok profet . . .

• (G) Diwai i makim husat?—Ritim 1 Stori 29:23.

• (H) Hau na wok king bilong ol i stop? Hau na yumi save olsem ol i no bin mekim wok king taim Jisas i stap long graun?—Ritim Luk 21:24.

• (I) Long wanem taim na long wanem hap wok king i kirap gen?

NAMBA TU TRUIM

Wok king

(G) Ol king bilong Israel i makim wok king bilong God

Wok king i stop

(H) Jerusalem i bagarap, na wok king bilong ol king bilong Israel i stop inap 2,520 yia

Wok king i kirap gen

(I) Jisas i kirap mekim wok long heven olsem King bilong Kingdom Bilong God

5. Kirap long 1914 ol samting long dispela graun i senis

Pilaim VIDIO.

VIDIO: Kirap Long 1914 Ol Samting Long Dispela Graun i Senis (1:10)

Jisas i tok profet olsem ol samting long dispela graun bai senis na dispela i soim olsem em i kamap King. Ritim Luk 21:9-11, na stori long dispela askim:

• Yu lukim o harim stori bilong ol hevi em ol dispela ves i kolim?

Aposel Pol i stori long pasin ol manmeri bai mekim long taim bilong las de bilong ol man i mekim wok bos. Ritim 2 Timoti 3:1-5, na stori long dispela askim:

• Yu lukim wanem sampela bilong ol dispela pasin em ol man i mekim long nau?

6. Wok bos bilong Kingdom Bilong God i mas kirapim yumi

Ritim Matyu 24:3, 14, na stori long ol dispela askim:

• Wanem bikpela wok i soim olsem Kingdom Bilong God i mekim wok nau?

• Olsem wanem yu inap insait long dispela wok?

Kingdom Bilong God i mekim wok i stap nau, na taim i kam klostu long em i bosim dispela graun. Ritim Hibru 10:24, 25, na stori long dispela askim:

• Yumi olgeta wan wan i mas mekim wanem taim yumi “lukim dispela de i kam klostu”?

OL BIKPELA POIN

Ol tok profet bilong Baibel, na ol samting i kamap long graun i soim klia olsem Kingdom Bilong God i mekim wok i stap nau. Yumi soim olsem yumi bilip long dispela long rot bilong autim tok long Kingdom, na go long ol miting bilong kongrigesen.

Riviu

• Wanem samting i kamap long pinis bilong dispela 7-pela taim olsem Buk Daniel i tok profet long en?

• Wai na yu bilip tru olsem Kingdom Bilong God i kirap mekim wok long 1914?

• Hau bai yu ken soim olsem yu bilip Kingdom i mekim wok i stap nau?

MEKIM WOK PAINIMAUT

Skelim tok sampela saveman na ol narapela i mekim long ol senis i kamap long graun kirap long 1914 na i kam.

“When Morals Declined Dramatically” (Awake!, April 2007)

Ritim hau tok profet i stap long Matyu 24:14 i senisim laip bilong wanpela man.

“Mi Laik Tru Long Pilai Beisbal!” (Wastaua No. 3 2017)

Olsem wanem yumi save olsem tok profet i stap long Daniel sapta 4 i stori long Kingdom Bilong God?

“Kingdom Bilong God i Kirap Mekim Wok Bos Long Wanem Taim? (Namba 1 Hap)” (Wastaua, Oktoba 1, 2014)

Wanem samting i soim olsem “7-pela taim” em Daniel sapta 4 i stori long en i pinis long 1914?

“Kingdom Bilong God i Kirap Mekim Wok Bos Long Wanem Taim? (Namba 2 Hap)” (Wastaua, Novemba 1, 2014)